Yehowa Gbi lɛ Ebɛŋkɛ
“Nyɛboa enɛ toi, nyɛ onukpai, ni nyɛfea toi, nyɛ shikpɔŋ lɛ nɔ bii fɛɛ!”—YOEL 1:2.
1, 2. Mɛɛ shihilɛ ko ni hi Yuda hewɔ ni Yehowa kɛ mumɔ tsirɛ Yoel ni ejaje egbalɛ ni mli wa lɛ?
“NAKAI gbi lɛ! ejaakɛ Yehowa gbi lɛ ebɛŋkɛ, ni eeeba tamɔ hiɛkpatamɔ kɛaajɛ Ofe lɛ ŋɔɔ.” Mɛɛ adafitswaa ni yɔɔ naakpɛɛ nɛ! Eji Nyɔŋmɔ shɛɛ sane ni egbalɔ Yoel kɛha ewebii lɛ.
2 Aŋmala nakai wiemɔi ni yɔɔ Yoel 1:15 lɛ yɛ Yuda, ekolɛ aaafee afi 820 D.Ŋ.B. No mli lɛ, gɔji ni jwɛi fɔ́ yɔɔ nɔ ewula shikpɔŋ lɛ fɛfɛo. Tsei ayibii kɛ ŋmãa hu fá babaoo. Kooloi aniyelihei dara ni jwɛi lɛ yɛ frɔfrɔ. Shi kɛlɛ, nɔ ko ni ejaaa kwraa miiya nɔ. Baal jamɔ shwere yɛ Yerusalem kɛ Yuda shikpɔŋ lɛ nɔ. Gbɔmɛi lɛ kɛ amɛhe wo dãatɔɔ kɛ sakasakafeemɔ mli yɛ nɛkɛ apasa nyɔŋmɔ nɛɛ hiɛ. (Okɛto 2 Kronika 21:4-6, 11 he.) Ani Yehowa baaŋmɛ enɛɛmɛi fɛɛ gbɛ ni eya nɔ?
3. Yehowa bɔ kɔkɔ yɛ mɛni he, ni esa akɛ jeŋmaji lɛ asaa amɛhe kɛha mɛni?
3 Biblia mli wolo ni ji Yoel hãaa wɔyiŋ afee wɔ kɔshikɔshi yɛ hetoo lɛ he. Yehowa Nyɔŋmɔ baabu maŋtsɛ ni eji lɛ bem ni ebaatse egbɛi krɔŋkrɔŋ lɛ he. Yehowa gbi kpeteŋkpele lɛ ebɛŋkɛ. Nyɔŋmɔ baatsu kojomɔ he nii yɛ jeŋmaji lɛ fɛɛ anɔ yɛ nakai beaŋ, yɛ “Yehoshafat jɔɔ lɛ mli.” (Yoel 4:12) Hã amɛsaa amɛhe ni amɛkɛ Yehowa, Ofe Lɛ, awu ta. Wɔ hu Yehowa gbi wulu kpele lɛ kã wɔhiɛ kɛmiiba. No hewɔ lɛ nyɛhaa wɔpɛia Yoel gbalɛ wiemɔi kɛha wɔgbii nɛɛ kɛ be ni eho lɛ amli jogbaŋŋ wɔkwɛa.
Kooloi Filikilɔi Bibii Atutuamɔ
4. Te nifeemɔ ni Yoel bɔ kɔkɔ yɛ he lɛ baada aha tɛŋŋ?
4 Yehowa kɛɔ kɛtsɔ egbalɔ lɛ nɔ akɛ: “Nyɛboa enɛ toi, nyɛ onukpai, ni nyɛfea toi, nyɛ shikpɔŋ lɛ nɔ bii fɛɛ! Ani enɛ eko eba dã yɛ nyɛ yinɔ aloo nyɛtsɛmɛi ayinɔ tete? Nyɛgbaa nyɛbii, ni nyɛbii lɛ agba amɛbii, ni amɛbii lɛ hu agba yinɔ ni baaba yɛ amɛsɛɛ lɛ!” (Yoel 1:2, 3) Onukpai lɛ kɛ gbɔmɛi lɛ fɛɛ baanyɛ akpa nɔ ko ni eko bako tamɔ nakai dã yɛ amɛwala be mli loo yɛ amɛtsɛmɛi awala be mli lɛ gbɛ. Ebaafee nɔ ko ni yɔɔ naakpɛɛ, aahu akɛ abaagba ehe sane atsɔɔ aahu kɛyashi yinɔ ni ji etɛ nɔ tɔ̃ɔ! Mɛni ji nii ni sa kadimɔ ni baaba nɛɛ? Kɛ́ wɔmiitao ni wɔle lɛ, no lɛ nyɛhãa wɔfeɔ he mfoniri akɛ wɔyɛ Yoel gbii lɛ amli tɔ̃ɔ.
5, 6. (a) Tsɔɔmɔ bɔ ni haomɔ ni Yoel gba efɔ̃ shi lɛ ji. (b) Namɔ ji nakai haomɔ lɛ Jɛɛhe?
5 Bó toi! Yoel miinu hoofeemɔ ko he yɛ shɔŋŋ. Ŋwɛi miiwo duŋ, ni gbeyeishemɔ he bolɔmɔ lɛ naa miiwa beni duŋ lɛ mli lɛɛɔ kɛhaa gbɔmɛi lɛ ayiteŋ lɛ. Kɛkɛ ni atatu ni tamɔ lasu kpeleke shi. Eji kooloi filikilɔi bibii akpekpei abɔ. Ni kwɛ bɔ ni amɛkpataa nii ahiɛ amɛhãa! Agbɛnɛ, susumɔ Yoel 1:4 lɛ he. Nɛkɛ kooloi filikilɔi bibii nɛɛ jeee baalabii ni yɔɔ fiji, ni fãa kɛjɛɔ he kome kɛyaa he kroko lɛ kɛkɛ. Oo, dabi kwraa! Otukpɛi ni bɛ fiji, ni amɛwamɔɔ yɛ shikpɔŋ lɛ akpekpei abɔ ni hɔmɔ miiye amɛ hu miiba. Akɛni kɔɔyɔɔ lɛ tswa amɛ kɛba hewɔ lɛ, baalabii lɛ bashɛ shi trukaa, ni amɛgbɛɛmɔ tamɔ shwiilii agbɛɛmɔ. (Yoel 2:5) Bɔ ni amɛyeɔ nii babaoo ni amɛtɔrɔɔɔ lɛ hewɔ lɛ, amɛyifalɛ akpekpei abɔ baanyɛ ahã he ko ni tamɔ paradeiso atsɔ ŋã kpataa oya nɔŋŋ.
6 Gɔgɔmii—ni ji omlɛgɛi loo abɛii abii ni bɛ fiji, ni amɛnyiɛɔ hu nyiɛ sɛɛ kɛmiiba. Gɔgɔmii akpekpei abɔ ni hɔmɔ miiye amɛ lɛ baanyɛ aye kwɛ̃ɛnii anɔ baai fiofio, ekomekome aahu kɛyashi be mli ni anaŋ baa ŋmɔŋ yɛ tsei lɛ eko kwraa nɔ dɔŋŋ. Ni baalabii yeɔ nɔ ni amɛshiɔ lɛ mli babaoo. Ni nɔ ni baalabii lɛ shiɔ lɛ, kakalikai ni he yɔɔ oya baaye fɛɛ kɛgbe naa. Shi kadimɔ enɛ: Nyɔŋmɔ tsɛ́ baalabii akuu babaoo lɛ yɛ Yoel yitso 2, kuku 11 lɛ akɛ “eta.” Hɛɛ, lɛ ji baalabii ahaomɔ ni baakpata shikpɔŋ lɛ hiɛ ni ekɛ hɔmɔ ni naa wa waa baaba nɛɛ Jɛɛhe. Mɛɛ be? Enɛ baaba kɛtsɔ “Yehowa gbi lɛ” hiɛ nɔŋŋ.
“Nyɛhiɛ Atsɛ̃a, Nyɛ Dãatɔlɔi”!
7. (a) Mɛɛ shihilɛ mli Yuda jamɔ mli hiɛnyiɛlɔi lɛ yɔɔ? (b) Kristendom hiɛnyiɛlɔi ni yɔɔ ŋmɛnɛ lɛ yɛ shihilɛ ni tamɔ nɔ ni Yuda jamɔ mli hiɛnyiɛlɔi lɛ hi mli lɛ mli yɛ mɛɛ gbɛ nɔ?
7 Awie gbɔmɛi babaoo ni amɛhe guɔ egbo kwraa, ni ji Yuda jamɔ mli hiɛnyiɛlɔi lɛ titri he beni akɛ fãmɔ hã lɛ, akɛ: “Nyɛhiɛ atsɛ̃a, nyɛ dãatɔlɔi, ni nyɛfoa! ni nyɛwóa lele, nyɛ weinnulɔi, yɛ wein dɔkɔdɔkɔ lɛ hewɔ, ejaakɛ aha eje nyɛdaaŋ.” (Yoel 1:5) Hɛɛ, akɛɛ Yuda mumɔŋ dãatɔlɔi lɛ akɛ ‘amɛhiɛ atsɛ̃,’ ni amɛha dãa lɛ atserɛ yɛ amɛhiɛ. Shi kaasusu akɛ enɛ ji blema yinɔsane folo ko kɛkɛ ni eho. Amrɔ nɛɛ, dani Yehowa gbi kpeteŋkpele lɛ aaaba lɛ, Kristendom osɔfoi lɛ etɔrɔ kɛ wein dɔkɔdɔkɔ yɛ mfonirifeemɔ mli aahu akɛ amɛnuuu fãmɔ nɛɛ ni jɛ Ŋwɛi Flooflonyo lɛ dɛŋ lɛ he. Kwɛ bɔ ni amɛhiɛ baafee amɛ yaa beni Yehowa gbi kpeteŋkpele ni he yɔɔ gbeyei lɛ hãa amɛhiɛ tsɛ̃ɔ kɛjɛɔ amɛdãatɔɔ ni éha amɛlu lɛ mli lɛ!
8, 9. (a) Te Yoel wie baalabii lɛ kɛ nɔ ni jɛ amɛhaomɔ lɛ mli ba lɛ he eha tɛŋŋ? (b) Namɛi baalabii lɛ feɔ amɛhe mfoniri ŋmɛnɛ?
8 Kwɛmɔ nakai baalabii ata babaoo lɛ! “Jeŋmaŋ ko efã kɛba mishikpɔŋ lɛ nɔ, amɛhe wa, ni aleee amɛyibɔ; amɛ nyanyɔji lɛ, jata nyanyɔji ni, ni amɛhiɛ jatayoo kadaa. Amɛkpata miweintso lɛ hiɛ, ni amɛkumɔ migbamitso lɛ; amɛkpɔlɔ ehetotoi lɛ amɛshwie, ni eniji lɛ ahe eyɛ futafuta. Wó yara tamɔ obalayoo ni emĩa kpekpe eha ebalayeiaŋ wu lɛ!”—Yoel 1:6-8.
9 Ani “jeŋmaŋ” ni ji baalabii akuu ni miitutua Yuda he gbalɛ folo ko kɛkɛ nɛ? Dabi, babaoo yɛ ni kɔɔ he fe no pɛ kɛkɛ. Afeɔ Nyɔŋmɔ webii ahe mfoniri yɛ Yoel 1:6 kɛ Kpojiemɔ 9:7, fɛɛ akɛ baalabii. Ŋmɛnɛŋmɛnɛ beaŋ baalabii akuu lɛ jeee mɔ ko mɔ ko, fe Yehowa baalabii ni afɔ amɛ mu lɛ ata, ní amrɔ nɛɛ Yesu “tooi krokomɛi” aaafee 5,600,000 ebafata amɛhe lɛ. (Yohane 10:16) Ani eŋɔɔɔ onaa akɛ oji Yehowa jálɔi asafo kpeteŋkpele nɛɛ fã?
10. Mɛɛ hewalɛ baalabii ahaomɔ lɛ ná yɛ Yuda nɔ?
10 Wɔkaneɔ nibii ni jɛ baalabii ahaomɔ lɛ mli kɛba lɛ ahe saji yɛ Yoel 1:9-12. Kuu kome nyiɛ ekroko sɛɛ ni amɛkɛ hiɛkpatamɔ ba shikpɔŋ lɛ nɔ kwraa. Akɛni amɛbɛ ŋmãa, wein, kɛ mu hewɔ lɛ, osɔfoi ni yeee anɔkwa lɛ nyɛɛɛ amɛtsa amɛnitsumɔi lɛ anɔ. Shikpɔŋ lɛ po ye awerɛho, ejaakɛ baalabii lɛ hã enɔ ŋmãa fɛɛ tã kwraa, ni yeli tsei anɔ yibii fɛɛ hu tã kwraa. Akɛni afite weintromii lɛ hewɔ lɛ, wein ko kwraa bɛ kɛha nakai Baal jálɔi dãatɔlɔi, ni ji mumɔŋ dãatɔlɔi hu lɛ!
“Nyɛwoa Yara, Nyɛ Osɔfoi”
11, 12. (a) Namɛi kɛɔ akɛ Nyɔŋmɔ osɔfoi ji amɛ ŋmɛnɛ? (b) Te ŋmɛnɛŋmɛnɛ beaŋ baalabii ahaomɔ lɛ saa Kristendom jamɔ mli hiɛnyiɛlɔi lɛ ahe ehaa tɛŋŋ?
11 Bó Nyɔŋmɔ shɛɛ sane ni ekɛha nakai osɔfoi sɛɛsɛɛyalɔi lɛ toi: “Nyɛmiaa ni nyɛwoa yara, nyɛ osɔfoi, nyɛwóa lele, nyɛ afɔleshaa latɛ lɛ he sɔɔlɔi!” (Yoel 1:13) Yɛ Yoel gbalɛ lɛ klɛŋklɛŋ mlibaa mli lɛ, osɔfoi ni jɛ Levi akutso lɛ mli sɔmɔɔ yɛ afɔleshaa latɛ lɛ he. Shi naagbee mlibaa kwraa lɛ hu? Ŋmɛnɛ, Kristendom osɔfoi lɛ ekɔ hegbɛ amɛfɔ̃ amɛnɔ akɛ amɛ amɛsɔmɔɔ yɛ Nyɔŋmɔ afɔleshaa latɛ lɛ he, ni amɛkɛɔ akɛ amɛji esɔɔlɔi, ‘esɔfoi’ ji amɛ. Shi kɛlɛ, mɛni yaa nɔ amrɔ nɛɛ ni Nyɔŋmɔ ŋmɛnɛŋmɛnɛ beaŋ baalabii lɛ efã kɛnyiɛ lɛ?
12 Kɛ́ Kristendom “osɔfoi” lɛ na Yehowa webii ni amɛmiitsu nii, ni amɛnu ŋwɛi kojomɔ he kɔkɔbɔɔ ni amɛkɛhaa lɛ, ehaa amɛhe hiaa amɛ. Amɛshimɔɔ amɛtsitsi yɛ dɔlɛ kɛ mlifu mli yɛ Maŋtsɛyeli shɛɛ sane lɛ hewalɛ ni feɔ amɛ amaŋfɔ lɛ hewɔ. Ni amɛbolɔɔ waa diɛŋtsɛ, beni amɛ asafokui lɛ shiɔ amɛ kɛyaa lɛ. Akɛni aahe amɛ niyelihe lɛ kɛmiijɛ amɛdɛŋ hewɔ lɛ, ha amɛwɔ kpekpe mli, ni amɛye awerɛho yɛ amɛsɛɛnamɔ ni eŋmɛɛ amɛ lɛ hewɔ. Etsɛŋ kwraa ni amɛnitsumɔi lɛ diɛŋtsɛ hu baaje amɛdɛŋ! Yɛ anɔkwale mli lɛ, Nyɔŋmɔ miikɛɛ amɛ akɛ amɛfó nyɔɔŋ-nyɔɔŋ fɛɛ ejaakɛ amɛnaagbee ebɛŋkɛ.
13. Ákɛ kuu lɛ, ani Kristendom fɛɛ baahere Yehowa kɔkɔbɔɔ lɛ nɔ yɛ gbɛ kpakpa nɔ?
13 Taakɛ Yoel 1:14 tsɔɔ lɛ, amɛ hiɛnɔkamɔ kome pɛ ji heshwamɔ kɛ bolɔmɔ ni ‘amɛaabolɔ amɛtsɛ Yehowa kɛha yelikɛbuamɔ.’ Ani wɔbaanyɛ wɔkpa gbɛ akɛ Kristendom osɔfoi akuu muu lɛ fɛɛ baakpale kɛba Yehowa ŋɔɔ? Eka shi faŋŋ akɛ dabi! Ekolɛ aŋkroaŋkroi komɛi ni yɔɔ amɛteŋ lɛ baabo Yehowa kɔkɔbɔɔ lɛ toi. Shi mumɔŋ hɔmɔ kpele ni nɛkɛ osɔfoi nɛɛ kɛ amɛ sɔlemɔyalɔi lɛ yɔɔ mli lɛ baakã he eya nɔ. Gbalɔ Amos gba efɔ̃ shi akɛ: “Naa, gbii miiba, Nuntsɔ Yehowa kɛɛ, ni maha hɔmɔ aba shikpɔŋ lɛ nɔ, jeee aboloo hɔmɔ loo nu kumai ni, shi Yehowa wiemɔi lɛ atoiboo nɔ ni!” (Amos 8:11) Nɔ ni tamɔɔɔ enɛ lɛ, kwɛ bɔ ni wɔdaa shi waa yɛ mumɔŋ niyenii kpakpa ni Nyɔŋmɔ jɛɔ suɔmɔ mli ehaa wɔ kɛtsɔɔ “tsulɔ anɔkwafo kɛ nilelɔ” lɛ nɔ lɛ he!—Mateo 24:45-47.
14. Mɛɛ nɔ ko ni baaba wɔsɛɛ baalabii ahaomɔ lɛ tswaa he adafi?
14 Baalabii ahaomɔ lɛ tswa, ni ekã he eetswa nɔ ko ni baaba wɔsɛɛ he adafi. Mɛni he adafi? Yoel kɛɔ wɔ nɔ ni eji yɛ faŋŋ mli akɛ: “Ao, nakai gbi lɛ! ejaakɛ Yehowa gbi lɛ ebɛŋkɛ, ni eeeba tamɔ hiɛkpatamɔ kɛaajɛ Ofe lɛ ŋɔɔ.” (Yoel 1:15) Bɔ ni Nyɔŋmɔ baalabii akuu lɛ haa nii ni amɛkpataa nii ahiɛ yɛ je lɛŋ fɛɛ ŋmɛnɛ lɛ tsɔɔ faŋŋ akɛ Yehowa gbi kpeteŋkpele ni he yɔɔ gbeyei waa lɛ ebɛŋkɛ. Eka shi faŋŋ akɛ, mɛi fɛɛ ni yɔɔ jalɛ tsuii lɛ shweɔ ni nakai akɔntaabuu gbi krɛdɛɛ, ni ji be ni abaatsu ŋwɛi kojomɔ he nii yɛ mɛi fɔji anɔ, ni Yehowa baaye kunim kɛmɔ shi akɛ Jeŋ Muu Fɛɛ Maŋtsɛ lɛ ashɛ.
15. Yɛ awerɛho shihilɛ ni shikpɔŋ lɛ yɔɔ mli lɛ hewɔ lɛ, te mɛi ni boɔ ŋwɛi kɔkɔbɔɔi atoi lɛ feɔ amɛnii amɛhaa tɛŋŋ?
15 Taakɛ Yoel 1:16-20 tsɔɔ lɛ, afo niyenii namɔ sɛɛ yɛ blema Yuda. Nakai nɔŋŋ ji mlifilimɔ hu. Aboŋoi lɛ kãmɔ shi efolo, ni akumɔ ŋmãa toohei lɛ ashwie shi. Akɛni baalabii lɛ eye shikpɔŋ lɛ nɔ jwɛifɔ́ fɛɛ ni amɛnaaa niyelihe hewɔ lɛ, tsinai lɛ nyiɛ kɛtee kɛba kɛkɛ, ni tooi akui lɛ hu ahiɛ kpata. Mɛɛ amanehulu nɛ! Shi mɛni ba Yoel nɔ, yɛ shihilɛi nɛɛ amli? Taakɛ kuku 19 lɛ tsɔɔ lɛ, ekɛɛ: “Bo, Yehowa, mibolɔɔ mitsɛɔ nɛɛ!” Ŋmɛnɛ hu, mɛi babaoo boɔ ŋwɛi kɔkɔbɔɔi atoi ni amɛbolɔɔ amɛtsɛɔ Yehowa Nyɔŋmɔ yɛ hemɔkɛyeli mli.
“Yehowa Gbi lɛ Miiba”
16. Mɛni hewɔ esa akɛ “shikpɔŋ lɛ nɔ bii” lɛ ahe akpokpo lɛ?
16 Bó fãmɔ ni jɛ Nyɔŋmɔ ŋɔɔ nɛɛ toi: “Nyɛkpãa tɛtɛrɛmantɛrɛ yɛ Zion, ni nyɛbɔa oshe yɛ migɔŋ krɔŋkrɔŋ lɛ nɔ! Shikpɔŋ lɛ nɔ bii lɛ fɛɛ he aaakpokpo.” (Yoel 2:1) Mɛni hewɔ amɛbaafee amɛnii yɛ nakai gbɛ nɔ lɛ? Gbalɛ lɛ haa hetoo akɛ: “Ejaakɛ Yehowa gbi lɛ miiba, ni eshɛ shi etã. Duŋ kɛ jeŋ tuutuufeemɔ gbi ni, atatu kɛ oblɔtu kpii gbi hu ni, taakɛ bɔ ni jetsɛremɔ gbɛɔ shwãa gɔji anɔ lɛ.” (Yoel 2:1, 2) Oyaiyeli henumɔ diɛŋtsɛ ko fata Yehowa gbi kpeteŋkpele lɛ he.
17. Te baalabii ahaomɔ lɛ sa Yuda shikpɔŋ lɛ kɛ enɔ bii lɛ ahe eha tɛŋŋ?
17 Bo diɛŋtsɛ feemɔ hewalɛ ni gbalɔ lɛ ninaa lɛ baaná yɛ amɛnɔ, beni baalabii ni amɛyifalɛ baaa shi lɛ hãa he ko ni tamɔ Eden abɔɔ fɛfɛo lɛ tsɔɔ amaŋfɔ lɛ he mfoniri okwɛ. Bó bɔ ni awie baalabii akuu lɛ he aha lɛ toi: “Amɛ su tamɔ okpɔŋɔi asu, ni amɛsháa foi tamɔ ta okpɔŋɔi. Bɔ ni shwiilii gbɛɛɔ lɛ, nakai amɛtumɔɔ yɛ gɔji anɔ, bɔ ni lalilɛi gbɛɛɔ kɛ́ eeshã gbetselii lɛ, nakai amɛgbɛɛɔ, tamɔ maŋ ni he wa ni egbá ta. Majimaji ahe kpokpoɔ yɛ amɛhiɛ, mɛi fɛɛ hiɛ shaleɔ.” (Yoel 2:4-6) Beni baalabii ahaomɔ lɛ yaa nɔ yɛ Yoel gbii lɛ amli lɛ, Baal jálɔi lɛ ahejaramɔ lɛ tee nɔ efa babaoo, ni anyɛɔ anaa bɔ ni shihɛlemɔ lɛ eha amɛfee yeyeeye lɛ yɛ amɛhiɛ.
18, 19. Nyɔŋmɔ webii ni yɔɔ ŋmɛnɛ lɛ anitsumɔ efee tamɔ baalabii ahaomɔ yɛ mɛɛ gbɛ nɔ?
18 Nɔ ko kwraa etsĩii baalabii ni ato amɛ gbɛjianɔ, ni etɔɔɔ amɛ nɛɛ naa. Amɛjoɔ foi “tamɔ kãkãlɔi” ni amɛkwɔɔ gbogboi po. Kɛ́ ‘amɛteŋ ekomɛi yagbee tawuu nii ateŋ tete lɛ, ekrokomɛi lɛ ejeee gbɛ lɛ nɔ.’ (Yoel 2:7, 8) Mɛɛ ŋmɛnɛŋmɛnɛ beaŋ Nyɔŋmɔ mfonirifeemɔŋ baalabii akuu lɛ he gbalɛ mli mfoniri ni mli kã shi faŋŋ nɛ! Ŋmɛnɛ hu, Yehowa baalabii akuu lɛ kã he amɛmiiya amɛhiɛ tɛ̃ɛ. “Gbogbo,” ni ji shitee-kɛ-woo ko bɛ ni tsĩɔ amɛ naa. Amɛŋmɛɛɛ amɛ emuuyeli mli ni amɛhiɛ kɛha Nyɔŋmɔ lɛ he ni amɛkɛsaa, shi moŋ amɛmiisumɔ ni amɛgboi, taakɛ Odasefoi akpei abɔ ni ‘gbee tawuu nii amli,’ akɛni amɛkpɛlɛɛɛ ni amɛjieɔ Hitler ni hi shi yɛ Nazi Germany lɛ yi lɛ fee lɛ.
19 Ŋmɛnɛŋmɛnɛ beaŋ Nyɔŋmɔ baalabii akuu lɛ eye odase jogbaŋŋ kɛmɔ shi yɛ Kristendom “maŋ lɛŋ.” (Yoel 2:9) Amɛfee nakai yɛ je lɛŋ he fɛɛ he. Amɛkã he amɛmiiye gbɛtsĩi nii fɛɛ anɔ kunim lolo, ni amɛmiibote shiai akpekpei abɔ mli, amɛmiibɛŋkɛ gbɔmɛi yɛ gbɛjegbɛi anɔ, amɛkɛ amɛ miiwie yɛ tɛlifon nɔ, ni amɛmiiya amɛ ŋɔɔ kɛtsɔ gbɛ fɛɛ gbɛ ni baahi nɔ, beni amɛjajeɔ Yehowa shɛɛ sane lɛ amɛtsɔɔ lɛ. Lɛɛlɛŋ, amɛkɛ Biblia kasemɔ he woji akpekpei akpei abɔ ehã, ni amɛbaaya nɔ amɛkɛ babaoo diɛŋtsɛ ahã lolo yɛ amɛ sɔɔmɔ nitsumɔ ni sɛɛ efooo lɛ mli—yɛ maŋ kɛ shia kɛ shia fɛɛ.—Bɔfoi lɛ Asaji 20:20, 21.
20. Namɔ fiɔ ŋmɛnɛŋmɛnɛ beaŋ baalabii lɛ asɛɛ, ni mɛni jɛɔ mli baa?
20 Yoel 2:10 lɛ tsɔɔ akɛ baalabii akuu babaoo feɔ tamɔ atatu ni baanyɛ ahã hulu, nyɔɔŋtsere, kɛ ŋulamii akpɛmɔ afee kusuu. (Okɛto Yesaia 60:8 he.) Ani yiŋkɔshikɔshifeemɔ ko yɛ mɔ ni yɔɔ asraafoi ata nɛɛ sɛɛ lɛ he? Wɔnuɔ wiemɔ nɛɛ ni yɔɔ Yoel 2:11 lɛ, kɛfataa baalabii lɛ agbɛɛmɔ lɛ he akɛ: “Yehowa woɔ egbee yɛ eta lɛ hiɛ; shi esra lɛ da naakpa diɛŋtsɛ, ni mɔ ni haa ewiemɔ baa mli lɛ he wa; ejaakɛ Yehowa gbi lɛ da, ni eyɛ gbeyei naakpa, ni namɔ aaanyɛ naa adamɔ?” Hɛɛ, Yehowa Nyɔŋmɔ miitsu esraafoi ata ni ji baalabii lɛ kɛmiiya amrɔ nɛɛ—dani egbi kpeteŋkpele lɛ ashɛ.
‘Jeee Tsɛ Yehowa Sɛɛ Tsɛɔ’
21. Kɛ́ ‘Yehowa gbi lɛ ba tamɔ julɔ’ lɛ, mɛni baajɛ mli aba?
21 Taakɛ Yoel fee lɛ, bɔfo Petro hu wie Yehowa gbi kpeteŋkpele lɛ he. Eŋma akɛ: “[Yehowa, NW] gbi lɛ baaba tamɔ julɔ baa nyɔɔŋ, ni no mli lɛ ŋwɛi lɛ aaaho aya kɛ gbɛɛmɔ, ni je nɛŋ shishijee nii lɛ aaasere yɛ la mli, ni shikpɔŋ kɛ emli nitsumɔi lɛ aaashã.” (2 Petro 3:10) Nɔyeli gbɛjianɔtoo fɔŋ ni ji “ŋwɛi” lɛ yeɔ “shikpɔŋ” lɛ, ni ji adesai ni etsi amɛhe kɛjɛ Nyɔŋmɔ he lɛ anɔ, yɛ Satan Abonsam hewalɛ shishi. (Efesobii 6:12; 1 Yohane 5:19) Nɛkɛ mfonirifeemɔŋ ŋwɛi kɛ shikpɔŋ nɛɛ yi naŋ wala kɛfoŋ ŋwɛi mlifu ni naa baawa waa yɛ Yehowa gbi kpeteŋkpele lɛ nɔ lɛ. Shi moŋ, “yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ,” ni akɛ no baaye amɛnajiaŋ.—2 Petro 3:13.
22, 23. (a) Te esa akɛ wɔfee wɔnii yɛ mɔbɔnalɛ ni Yehowa kɛ́to etsui shi lɛ he wɔha tɛŋŋ? (b) Te esa akɛ wɔfee wɔnii yɛ bɔ ni Yehowa gbi lɛ ebɛŋkɛ eha lɛ he wɔha tɛŋŋ?
22 Yɛ ŋmɛnɛŋmɛnɛ beaŋ nibii ni gbalaa mɔ jwɛŋmɔ kɛ hemɔkɛyeli he kaai nɛɛ fɛɛ ahewɔ lɛ, wɔjwɛŋmɔ baanyɛ aje bɔ ni hiamɔ yɔɔ wɔbei nɛɛ ahe lɛ nɔ. Shi yɛ be mli ni mfonirifeemɔŋ baalabii lɛ yaa hiɛ lolo lɛ, belɛ gbɔmɛi babaoo miihere Maŋtsɛyeli shɛɛ sane lɛ nɔ. Eyɛ mli akɛ Nyɔŋmɔ ehã be kɛha enɛ moŋ, shi esaaa ni wɔŋɔɔ etsuishitoo lɛ akɛ shɔ̃ɔfeemɔ. “Jeee tsɛ [Yehowa, NW] hãa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehãa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.”—2 Petro 3:9.
23 Yɛ be mli ni wɔmɛɔ Yehowa gbi kpeteŋkpele lɛ, nyɛhãa wɔkɛ Petro wiemɔi ni aŋmala yɛ 2 Petro 3:11, 12 lɛ atoa wɔtsuii amli akɛ: “Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? Mɛi ni kwɛɔ gbɛ ni amɛshweɔ [Yehowa, NW] gbi lɛ baa lɛ, no mli ni ŋwɛi aaahere kɛ la ni eeeshã, ni jeŋ shishijee nii hu aaasere yɛ la mli.” Eka shi faŋŋ akɛ, nɔ ni fata nɛkɛ nifeemɔi nɛɛ ahe ji Yehowa baalabii akuu lɛ ni wɔkɛ amɛ aaanyiɛ pɛpɛɛpɛ, kɛtsɔ Maŋtsɛyeli lɛ he sanekpakpa lɛ shiɛmɔ mli gbɛfaŋnɔ ni wɔɔná jogbaŋŋ kɛmɔ shi dani naagbee lɛ aba lɛ nɔ.—Marko 13:10.
24, 25. (a) Te ohereɔ hegbɛ ni oná akɛ ooná Yehowa baalabii akuu lɛ anitsumɔ lɛ mli gbɛfaŋnɔ lɛ nɔ ohaa tɛŋŋ? (b) Mɛɛ sanebimɔ ni shishinumɔ yɔɔ mli Yoel teɔ lɛ shi?
24 Nyɔŋmɔ baalabii akuu lɛ kpaŋ enitsumɔ lɛ aahu kɛyashi be ni Yehowa gbi kpeteŋkpele ni he yɔɔ gbeyei lɛ baafɛ. Shihilɛ mli diɛŋtsɛ ni nɛkɛ baalabii akuu ni anyɛɛɛ atsĩ amɛ naa nɛɛ yɔɔ lɛ ji odaseyeli ni sa kadimɔ waa ni tsɔɔ akɛ, Yehowa gbi lɛ ebɛŋkɛ. Ani eŋɔɔɔ onaa akɛ ofata Nyɔŋmɔ baalabii ni afɔ amɛ mu, kɛ amɛhefatalɔi lɛ ahe kɛmiisɔmɔ yɛ naagbee tutuamɔ nɛɛ mli dani Yehowa gbi kpeteŋkpele ni he yɔɔ gbeyei lɛ aba?
25 Kwɛ bɔ ni Yehowa gbi lɛ baafee gbi kpeteŋkpele diɛŋtsɛ! Ebɛ naakpɛɛ akɛ abiɔ sane akɛ: “Namɔ aaanyɛ naa adamɔ?” (Yoel 2:11) Abaasusu sanebimɔ nɛɛ kɛ ekrokomɛi babaoo he yɛ nikasemɔi enyɔ ni nyiɛ enɛ sɛɛ lɛ amli.
Ani Obaanyɛ Otsɔɔ Mli?
◻ Mɛni hewɔ Yehowa bɔ kooloi filikilɔi bibii ahaomɔ ni baaba Yuda nɔ lɛ he kɔkɔ lɛ?
◻ Namɛi ji Yehowa baalabii lɛ yɛ Yoel gbalɛ lɛ mlibaa mli yɛ ŋmɛnɛŋmɛnɛ beaŋ?
◻ Te Kristendom hiɛnyiɛlɔi lɛ feɔ amɛnii yɛ baalabii ahaomɔ lɛ he amɛhaa tɛŋŋ, ni mɛɛ gbɛ nɔ amɛteŋ mɛi komɛi baatsɔ amɛjo nɔ ni baajɛ mli aba lɛ naa foi?
◻ Nɛgbɛ baalabii ahaomɔ lɛ mli elɛɛ kɛyashi yɛ afii ohai 20 lɛ mli, ni ebaaya nɔ aahu kɛyashi mɛɛ be?
[Mfoniri ni yɔɔ baafa 9]
Kooloi filikilɔi bibii ahaomɔ lɛ tswaa nɔ ko ni mli wa ni baaba he adafi
[He ni Sane lɛ Jɛ]
Tso ni wooo yibii: FAO mfoniri/G. Singh
[Mfoniri ni yɔɔ baafa 10]
Yehowa Nyɔŋmɔ yɛ ŋmɛnɛŋmɛnɛ beaŋ baalabii ahaomɔ lɛ sɛɛ
[He ni Mfoniri ni yɔɔ baafa 8 lɛ Jɛ]
Baalabii: FAO mfoniri/G. Tortoli; baalabii akuu: FAO mfoniri/Desert Locust Survey