Hekɛnɔfɔɔ Ni Wɔkɛaakpee Basabasafeemɔ Be Nɛɛ Ŋaa
“Nuŋtsɔ Maŋtsɛ Yehowa diɛŋtsɛ ewie! Ni namɔ egbaŋ?”—AMOS 3:8, NW.
1. (a) Mɛɛ hegbɛ ko ni yɔɔ nyam wɔyɔɔ yɛ Yehowa gbɛi lɛ he? (b) Yesu kɛ Paulo wó Yehowa gbɛi lɛ nɔ gojoo yɛ mɛɛ bɛ nɔ?
1 “NUŊTSƆ Maŋtsɛ Yehowa”—kwɛ bɔ ni nakai wiemɔi lɛ tsɔɔ bɔ ni Je Muu Fɛɛ Nɔyelɔ lɛ ji lɛ mli ehaa fɛfɛo! Eyɛ mli akɛ je lɛŋ bii lɛ baate shi awo moŋ, shi eji hegbɛ kpele ni yɔɔ nyam akɛ aaatsɛ Yehowa kɛ egbɛi, ni wɔkɛ Yehowa aye yitsoŋsane ni wɔjaje Yehowa gbɛi lɛ kɛ eyiŋtoi wɔtsɔɔ mɛi krokomɛi. Beni e-Bi, Yesu, yɔɔ shikpɔŋ nɔ lɛ, ejaje akɛ: “Yehowa mumɔ lɛ yɛ minɔ, . . . koni mijaje sanekpakpa mitsɔɔ ohiafoi.” Yɛ be mli ni esɔleɔ ehaa Yehowa lɛ, ewie yɛ ekaselɔi lɛ ahe akɛ: “Mijie ogbɛi lɛ kpo mitsɔɔ amɛ, masaa majie lɛ kpo matsɔɔ.” Ni yɛ be mli ni bɔfo Paulo tsɛɔ wiemɔ kɛjɛɔ blema Hebri gbalɔi lɛ awiemɔ mli lɛ ekɛɛ akɛ: “Ni mɔ fɛɛ mɔ ni aaatsɛ Yehowa gbɛi lɛ aaahere eyiwala.”—Luka 4:18; Yohane 17:26; Romabii 10:13; Yoel 3:5.
2. (a) Amos jie Yehowa yi yɛ mɛɛ bɛ nɔ? (b) Mɛɛ nitsumɔ Amos nine shɛ nɔ ni kɛ egbɛi lɛ kpaa gbee?
2 Amos ji nakai blema gbalɔi lɛ ateŋ mɔ kome. Ejie Yehowa gbɛi lɛ yi, ni ewiemɔ, “Nuŋtsɔ Maŋtsɛ Yehowa” lɛ jeɔ kpo shii 21 yɛ ewolo lɛ mli. Gbɛi Amos lɛ shishi ji “Atere Jatsu.” Yɛ anɔkwale mli lɛ, etere gbɛnaa nii ko he jatsu ni tsii, taakɛ Yehowa anɔkwale odasefoi lɛ ji ŋmɛnɛ lɛ. Amos kwɛɔ tooi kɛ mɔ ni duɔ aduawai. Etamɔ mɔ ko ni atsɔseko lɛ babaoo tsɔ ahako egbalɛ nitsumɔ lɛ. Shi kɛlɛ eka shi faŋŋ akɛ eji mɔ ni le Nyɔŋmɔ Wiemɔ lɛ jogbaŋŋ, ni Yehowa mumɔ lɛ yɛ enɔ koni eha etsu enitsumɔ ni wa lɛ egbe naa. Mɛni ji no? No ji ni eshi emaŋ ni yɔɔ Yuda lɛ ni eya maŋsɛɛ sanekpakpa shiɛmɔ nitsumɔ mli, ni eya Israel akutsei nyɔŋma ni yɔɔ kooyigbɛ lɛ ni amɛbɔ ko lɛ aŋɔɔ. Jɛmɛ, yɛ Israel, he ni ekɛ Samaria efee emaŋtiase lɛ, esa akɛ eya ni eyajaje hiɛkpatamɔ sane ko ni eŋɔɔɔ kwraa lɛ yɛ.
3. Mɛɛ “yiŋtoo” loo teemɔŋsane ni ba yɛ ebe naa pɛpɛɛpɛ ajie lɛ kpo kɛtsɔ Amos nɔ?
3 Ani Amos kpoo nitsumɔ nɛɛ? Dabi! Nakai bei lɛ ji basabasafeemɔ bei, shi ehe miihia ni aha gbɔmɛi lɛ ahiɛ ahi amɛhe nɔ yɛ “gbi fɔŋ” ko ni ehiii kwraa ni baa lɛ he. Nɔ ni amɛfeɔ yɛ amɛshihilɛ be mli pɛ ji niyeli kɛ ninumɔ. Amɛkamɔ amɛsaatsei kɛ sɛii fɛfɛji lɛ anɔ, ni amɛsusuuu Yehowa kɛ enɔkwa jamɔ lɛ he kwraa. (Amos 6:3-6) Yehowa tswa efai shi akɛ ebaagbala amɛtoi, shi klɛŋklɛŋ lɛ esa akɛ atsɔ gbalɛ nɔ abɔ amɛ kɔkɔ da. Yɛ enɛ kɛ gbeekpamɔ naa lɛ, Yehowa diɛŋtsɛ jaje akɛ: “Ejaakɛ Nuŋtsɔ Yehowa efeŋ nɔ ko, akɛ ja ejie eyiŋtoo lɛ kpo etsɔɔ etsuji, gbalɔi lɛ, da.”—Amos 3:7.
Emlibaa Yɛ Ŋmɛnɛŋmɛnɛ Beaŋ
4. (a) Mɛni hewɔ akɛ blema gbalɛ to lɛ? (b) Mɛni nɔ atsɔɔ koni aba ale shishinumɔ lɛ agbɛnɛ?
4 Ani nɛkɛ blema gbalɛ nɛɛ tsɔɔ nɔ ko kɛhaa wɔ ŋmɛnɛ? Hɛɛ, eyɛ sane ko ni mli wa waa kɛha wɔ. Abua Nyɔŋmɔ Wiemɔ ni jɛ mumɔŋ lɛ naa yɛ ŋwɛi gbɛtsɔɔmɔ shishi, ni ábaa yi aahu kɛbashi “naagbee be” lɛ kɛha Nyɔŋmɔ webii ni “nibii agbɛjianɔtoo lɛ naagbee lɛ enina amɛ” lɛ asɛɛnamɔ. Ahaa wɔleɔ nɔ ni etsɔɔ yɛ gbalɛ naa lɛ kɛtsɔɔ “tsulɔ anɔkwafo kɛ nilelɔ” lɛ ni ji Kristofoi ni afɔ amɛ mu lɛ akuu ni Nuŋtsɔ, Yesu Kristo kɛ amɛ tsuɔ nii bianɛ koni amɛkɛ mumɔŋ “niyenii yɛ be ni sa mli” aha Nyɔŋmɔ webii fɛɛ lɛ nɔ.—Daniel 12:4; 1 Korintobii 10:11; Mateo 24:45-47.
5. Te esa akɛ wɔhere Yehowa wiemɔ ni yɔɔ Amos 3:8 lɛ nɔ wɔha tɛŋŋ?
5 Ani wɔbuɔ nɛkɛ Amos gbalɛ lɛ mli “yiŋtoo” aloo teemɔŋsane nɛɛ akɛ nɔ ko ni he ehiaaa tsɔ ni abaanyɛ atsu he nii kɛ wɔna be? Ojogbaŋŋ, kɛ wɔnyiɛ ŋa kplanaa ko nɔ wɔ pɛ, ni trukaa lɛ jata ko ni miihuu fite dioofeemɔ ni yɔɔ jɛmɛ lɛ, te wɔbaafee wɔnii wɔha tɛŋŋ? Ani wɔfeŋ nɔ ko amrɔ nɔŋŋ yɛ wala kɛ gbele shihilɛ lɛ mli? Wɔshashaoŋ shi kwraa! No hewɔ lɛ, ani wɔ hu esaaa akɛ wɔhereɔ Yehowa gbalɛ wiemɔi nɛɛ anɔ nakai nɔŋŋ? Yehowa diɛŋtsɛ jajeɔ akɛ: “Jata miihuu, namɔ sheŋ gbeyei? Nuŋtsɔ Yehowa miiwie, namɔ egbaŋ? (Amos 3:8) Belɛ ehe miihia akɛ wɔha mɛi ale gbalɛ lɛ kɛ eshishi. Shi yɛ mɛɛ gbɛ nɔ?
“Yaa, Ni Oyagba”
6. Kristendom je blema Samaria yɛ mɛɛ gbɛi anɔ?
6 Yehowa famɔ kɛha Amos ji: “Yaa, ni oyagba otsɔɔ mimaŋ Israel!” (Amos 7:15) Israel maŋtsɛyeli ni kwa hemɔkɛyeli lɛ yɛ eŋmɛnɛŋmɛnɛ beaŋ henɔ, ni lɛ ji Kristendom ni enifeemɔ fɛɛ tsɔɔ heloo gbɛfaŋ nibii asɛɛdii, ni ekɛ ehe fɔɔ basabasafeemɔ aloo awuyeli he gbeyeiwoo nɔ kɛhaa eyibaamɔ ni teɔ shi woɔ Nuŋtsɔ Maŋtsɛ Yehowa ni enyɛ̃ɛɔ egbɛi lɛ. Kɛha sabala “Kristofonyo” lɛ, Kristendom kɛ enɛ ekpɛtɛ etsitsi akɛ kadimɔ nii kɛkɛ, ejaakɛ eteɔ shi ewoɔ Kristo jalɛ Maŋtsɛyeli ni baa lɛ. Yesu diɛŋtsɛ tsɔɔ bɔ ni Kristendom jamɔi lɛ amlibii ji diɛŋtsɛ, akɛ “mɛi ni tsuɔ nibii ni ejaaa gbɛ.”—Mateo 7:21-23.
7, 8. (a) Yɛ mɛɛ gbɛ nɔ ‘áshiɛ’ Kristendom hiɛkpatamɔ lɛ fiofio kɛtee hiɛ yɛ afii ni eho lɛ amli kɛbashi bianɛ? (b) Mɛɛ “heyeli” ajaje atsɔɔ ‘nomi’ lɛ, ni mɛni jɛ mli ba?
7 Kɛjɛ be mli ni ato Maŋtsɛyeli lɛ ama shi yɛ ŋwɛi yɛ 1914 kɛbaa nɛɛ, ŋmɛnɛŋmɛnɛ beaŋ Amos kuu lɛ, Yehowa Odasefoi, ejaje Yehowa oweletɔɔ gbi lɛ yɛ Kristendom fɛɛ. Abɔ kɔkɔ ni mɔɔ shi yɛ Kristendom shikpɔji lɛ anɔ kɛjɛ afi 1919 kɛbashi 1939 titri, ni enɛ etee nɔ aahu kɛbashi ŋmɛnɛŋmɛnɛ gbii nɛɛ amli. Kɛha Yehowa Odasefoi lɛ, Jeŋ Ta II, 1939-45 afii lɛ ji yiwaa be kɛha amɛ, shi eji gbɛjianɔtoo be hu. Buu-Mɔɔ Biblia Skul ni ji Gilead lɛ je shishi etsɔse maŋsɛɛ sanekpakpa shiɛlɔi kɛha maŋsɛɛ nitsumɔ yɛ 1943, ni beni Jeŋ Ta II baa naagbee lɛ no mli lɛ aatsu amɛ kɛmiiya maji sɔrɔtoi anɔ koni amɛyalɛɛ Maŋtsɛyeli odaseyeli lɛ mli. No hewɔ lɛ alɛɛ nitsumɔ ni yaa nɔ yɛ Kristendom teŋ lɛ mli, titri lɛ yɛ Italia, Portugal, Spania kɛ Amerika shikpɔŋ wulu lɛ wuoyigbɛ maji lɛ anɔ.
8 Tsɛmɔ lɛ ji, “yaa, ni oyagba!” Wekui ni amɛtuu amɛhe amɛha fa kɛjɛ Kanada, U.S. Amerika, Ŋlesi Ablotsiri, Europa kɛ Australia ni amɛyafata maŋsɛɛ sanekpakpa shiɛlɔi ni yɔɔ shikpɔŋkukuji heei ni sɔɔmɔ nitsumɔ lɛ he hiaa waa yɛ jɛmɛ lɛ ahe. Amɛkɛ hekɛnɔfɔɔ jaje nɔ ni ‘Nuŋtsɔ Maŋtsɛ Yehowa diɛŋtsɛ ewie lɛ.’ Yehowa mumɔ lɛ etee nɔ ehi edasefoi lɛ anɔ koni amɛjaje Nyɔŋmɔ “oweletɔɔ gbi” lɛ ni baa Kristendom nɔ lɛ yɛ jeŋ fɛɛ, kɛ agbɛnɛ hu ‘heyeli kɛha nomi’ ni apasa jamɔ eŋɔ amɛ lɛ. (Yesaia 61:1, 2; Zakaria 4:6) No hewɔ lɛ, yɛ afii 40 mli lɛ nɔyaa ko ni yɔɔ naakpɛɛ ba yɛ Odasefoi ni shiɛɔ Maŋtsɛyeli lɛ daa nyɔŋ nɔ kɛ aja mli lɛ ayifalɛ mli: kɛjɛ 109,794 yɛ afi 1943 kɛbashi 2,501,722 yɛ afi 1983 mli.
Nɔ Ko Ni Yaa Nɔ Yɛ Jeŋ Fɛɛ
9, 10. (a) Ajaje nakai sane lɛ yɛ Amos gbii lɛ amli kɛyashɛ nɛgbɛ, ni mɛni tamɔ nakai ŋmɛnɛ?(b) Taakɛ Amos gbalɛ lɛ fee he mfoniri lɛ, te mɛi ni akɛɛ atsɛɔ amɛ wɔŋjalɔi lɛ buɔ Kristendom amɛhaa tɛŋŋ ŋmɛnɛ?
9 Enɛ tamɔ nɔ ko ni tee nɔ yɛ Amos gbii lɛ amli, be mli ni abaajaje hiɛkpatamɔ sane lɛ yɛ Ashdod—wɔŋjalɔi ashihemɔ he ni bɛŋkɛ Filistia lɛ—kɛ agbɛnɛ kɛyashi Mizraim tɔ̃ɔ lɛ. Ejaakɛ Nuŋtsɔ Maŋtsɛ Yehowa ewie akɛ: “Nyɛjajea yɛ Ashadod mɔji lɛ kɛ Mizraim shikpɔŋ lɛ mɔji lɛ ayiteaŋ, ni nyɛkɛɛ akɛ: Nyɛbabuaa nyɛhe naa yɛ Samaria gɔji lɛ anɔ, ni nyɛkwɛa emli hoofeemɔ babaoo kɛ amimyeli ni yɔɔ emli lɛ! Ejaakɛ mɛi ni buaa yiwalɛ kɛ hiɛkpatamɔ naa yɛ amɛmɔji lɛ amli lɛ, amɛleee nɔ ni ja gbɛ feemɔ, Yehowa kɛɛ.”—Amos 3:9, 10.
10 Nakai nɔŋŋ hu agbɛ ŋmɛnɛŋmɛnɛ beaŋ Yehowa oweletɔɔ ni ekɛbaaba Kristendom nɔ lɛ he sane lɛ ashwa kɛteke enɔyeli he lɛ—kɛtsɔ Afrika, ŋshɔ mli ŋshɔkpɔi anɔ kɛ Bokagbɛ shikpɔji sɔrɔtoi babaoo nɔ. Taakɛ akɛ Mizraim tsuɔ nii yɛ Biblia lɛ mli ákɛ jeŋ fɔŋ ni etse ehe kɛjɛ Nyɔŋmɔ he lɛ he okadi lɛ, nakai nɔŋŋ hu ájaje Kristendom hiɛkpatamɔ lɛ yɛ jeŋ fɛɛ. (Okɛto Yesaia 19:19, 20 he.) Mɛi ni akɛɛ atsɛɔ amɛ wɔŋjalɔi amaji lɛ pii le ‘basabasafeemɔi, ojotswaa, saji kɔ̃dɔ̃ji, awuyeli kɛ amimyeli’ ni yaa nɔ yɛ Kristendom lɛ. Amɛkɛ afii ohai abɔ ena bɔ ni Kristendom maŋsɛɛ sanekpakpa shiɛlɔi lɛ kɛ amɛhe woɔ jwɛŋmɔŋ tai kɛ maŋ hiɛ atuatsemɔi amli kɛ bɔ ni amɛtsuɔ nii akɛ mɛi ni nyiɛɔ majimaji ateŋ jarayeli yɛ tũi kɛ tsofai fɔji amli lɛ hiɛ. Ni kɛji akɛ Buu-Mɔɔ Asafo lɛ maŋsɛɛ sanekpakpa shiɛlɔ ko je shishi akɛ ekɛ Budhanyo aaawie lɛ, nɔ ni akɛteɔ shi awoɔ lɛ yɛ be babaoo mli ji: ‘Shi kwɛmɔ Kristofoi ajeŋba gbonyo lɛ; wɔ Budhabii lɛ yɛ jeŋba kpakpa kwraa, ni no hewɔ lɛ mɛni hewɔ esa akɛ wɔtsake?’ Esa akɛ maŋsɛɛ sanekpakpa shiɛlɔi lɛ afee lɛ faŋŋ akɛ esoro Kristendom jamɔ lɛ kwraa yɛ Biblia mli Kristojamɔ he. No dani ebaanyɛ ená mɔ ko ni ebo lɛ toi.
11. Samaria fitemɔ yɛ jeŋba mli lɛ kɛ namɔ nɔ̃ yeɔ egbɔ ŋmɛnɛ?
11 Taakɛ eji yɛ blema Samaria lɛ, nakai nɔŋŋ Kristendom maŋkwralɔi kɛ maŋ onukpai, mɛi wuji kɛ mɛi bibii “leee nɔ ni ja gbɛ feemɔ.” Agbɛnɛ, awuyeli kɛ mlakwamɔ eyimɔ hei ni akɛɛ atsɛɔ amɛ Kristofoi ashikpɔji anɔ lɛ agbɛjegbɛi babaoo nɔ. (Mateo 24:3, 12) Enɛ yɛ sɔrɔto kwraa yɛ toiŋjɔlɛ shihilɛ ni yɔɔ shikpɔji babaoo “ni amɛnɔ bii jeee Kristofoi” lɛ anɔ lɛ anɔ̃ he.
12. Kristendom “miibua awuyeli kɛ hiɛkpatamɔ” naa yɛ mɛɛ gbɛ nɔ?
12 Ato “yiwalɛ kɛ hiɛkpatamɔ” he gbɛjianɔ hu yɛ gbɛ ni yɔɔ gbeyei nɔ yɛ majimaji ateŋ. Jeee akɛ efa akɛ Kristendom mli maji lɛ ji mɛi ni wo hewalɛ ni awuu jeŋ tai enyɔ lɛ, ni no hewɔ ni amrɔ nɛɛ amɛye la yi sɔ̃ yɛ adesai aaafee 69,000,000 ni akpata amɛwala hiɛ lɛ kɛkɛ hewɔ. Agbɛnɛ Kristendom kɛ ehe ewo jeŋ hewalɛi wuji enyɔ lɛ akaŋshii lɛ mli waa, “wuoyigbɛ maŋtsɛ lɛ” kɛ “kooyigbɛ maŋtsɛ lɛ,” ni nɔ ni ejɛ mli eba ji akɛ amɛmaji lɛ kɛ amɛhe woɔ nuklea tawuu nii ni kpataa wala hiɛ ni akɛmiimamɔ shi yɛ shikpɔji sɔrɔtoi anɔ lɛ mli.
13. Maŋkwralɔi ni fiɔ awuyeli sɛɛ lɛ ená Daniel 11:40 kɛ Luka 21:25 mlibaa lɛ mli gbɛfaŋnɔ yɛ mɛɛ gbɛ nɔ?
13 Yɛ be mli ni eyasara Japan lɛ, “wuoyigbɛ maŋtsɛ lɛ” naawielɔi titri lɛ jaje akɛ: “Sɛɛnamɔ kome pɛ ni yɔɔ nuklea tawuu nii ni ahiɛ loo ayɔɔ lɛ mli ji ni akwɛ ni akɛkatsu nii—kwraa.” Belɛ mɛni hewɔ esa akɛ amɛfee enɛɛmɛi kwraa po? No ji akɛ Satan, je nɛɛ Nyɔŋmɔ lɛ edũ jeŋmaji lɛ yɛ haomɔ shihilɛ he tsɔne ko ni amɛnyɛŋ amɛje mli lɛ mli. Yɛ nɛkɛ “shimɔ” ni “wuoyigbɛ maŋtsɛ lɛ” kɛbaa nɛɛ hewɔ lɛ, “kooyigbɛ maŋtsɛ lɛ” naawielɔ titri lɛ tswa adafi akɛ amɛkɛ nuklea osramaŋi “miimamɔ ŋshɔ hiɛ” ni amɛkɛ yitsei lɛ etsɔɔ Amerika shikpɔŋ wulu lɛ nɔ. Enɛɛmɛi fɛɛ tsɔɔ akɛ “jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye yɛ ŋshɔ kɛ ŋshɔkei agbɛɛmɔ hewɔ” lɛ miiba mli.—Daniel 11:40; Luka 21:25; Kpojiemɔ 12:9, 12.
14. Shihilɛ nɛɛ kɛ nɔ ni jɛ mli ba lɛ kaiɔ wɔ nibii ni ba yɛ Noa gbii lɛ amli lɛ yɛ mɛɛ gbɛi anɔ?
14 Ja Noa gbii lɛ amli pɛ adesa kɛ hiɛkpatamɔ ni awuyeli kpeteŋkpele he gbeyeishemɔ fata he kpe tamɔ bɔ ni wɔnaa nɛɛ. Noa be lɛ mli yinɔsane mli nibii ni aŋmala ashwie shi lɛ kaneɔ akɛ: “Ni Yehowa na akɛ gbɔmɛi anɔfɔŋfeemɔ fa yɛ shikpɔŋ lɛ nɔ, ni amɛtsuii asusumɔ kɛ jwɛŋmɔ lɛ efɔŋ kɛkɛ eji daa nɛɛ. . . . Ni shikpɔŋ lɛ nɔ eyi obɔ kɛ yiwalɛ ni jɛ amɛ.” Yɛ nakai efɔŋfeemɔ kɛ yiwalɛ lɛ hewɔ lɛ, Yehowa kpata efɔŋfeelɔi lɛ ahiɛ kɛtsɔ Nu Afua lɛ nɔ. Agbɛnɛ hu, ŋmɛnɛ, eto eyiŋ akɛ “ebaafite mɛi ni fiteɔ shikpɔŋ lɛ.”—1 Mose 6:5-13; Kpojiemɔ 11:18; Luka 17: 26, 27.
Bɔ Ni Ahaa Kristendom
15. Yehowa ha “henyɛlɔ” ko kɛ fɔbuu kojomɔ ba Samaria nɔ yɛ mɛɛ gbɛ nɔ?
15 Yɛ naagbee lɛ mɛni baajɛ béi ni ka jeŋ hewalɛi enyɔ lɛ ateŋ lɛ mli aba? Yehowa yɛ nɔ ko kɛɛmɔ yɛ enɛ he, taakɛ wɔkaneɔ yɛ Amos 3:11 lɛ: “No hewɔ lɛ bɔ ni Nuŋtsɔ Yehowa kɛɛ nɛ: Henyɛlɔi aaabɔle shikpɔŋ lɛ kɛaakpe, ni amɛaaha ohewalɛ lɛ aba shi, ni aaaha omɔji fɛfɛji lɛ.” Namɛi ji “henyɛlɔi” nɛɛ? Yɛ Amos gbii lɛ amli lɛ, “henyɛlɔi” lɛ ji Ashur Jeŋ Hewalɛ lɛ. Yehowa kudɔ Ashur asraafoi ni he wa lɛ ni ekɛ amɛ tsu nii akɛ okadi “tso” koni ekɛ fɔbuu kojomɔ aba Samaria ni ekwa hemɔkɛyeli lɛ nɔ, taakɛ atsɔɔ mli yɛ Yesaia 10:5, 6 lɛ: “Kpoo ha Ashur ni ji mimlifu tso lɛ, amɛdɛhiɛmɔ tso ji mimlila lɛ! Matsu lɛ kɛaatee jeŋ maŋ fɔŋ ko nɔ, ni mafa lɛ mawo maŋ ni mimli efu amɛ lɛ he, koni eyaha nii ni eŋɔ nom, ni enaanaa amɛnɔ tamɔ anaa blohuiaŋ ŋmiamɔ nɔ.”
16. (a) Yɛ mɛɛ bɛ nɔ Kpojiemɔ 17 tsɔɔ béi ko ni tamɔ nakai ni mli ŋmɛnɛ? (b) Mɛni nibii ni baa tsɔɔ akɛ Kristendom hiɛkpatamɔ lɛ ebɛŋkɛ?
16 Nakai nɔŋŋ Yehowa baatsɔ ŋmɛnɛŋmɛnɛ beaŋ Ashur asraafoi ni amɛkɛ tawuu nii ewula amɛhe kpɛŋshɛŋŋ lɛ anɔ atsu nii akɛ “tso” kɛ “lema” ni ehiɛ yɛ edɛ ni ekpata Kristendom ni ekwa hemɔkɛyeli lɛ hiɛ. Yɛ anɔkwale mli lɛ, “akolontoi” ni he yɔɔ gbeyei—maŋkwramɔŋ hewalɛ ni kɛ tawuu nii ewula amɛhe ni amrɔ nɛɛ amɛji Jeŋmaji Ekomefeemɔ lɛ mlibii lɛ baakpata jeŋ apasa jamɔ maŋtsɛyeli lɛ fɛɛ, Babilon Kpeteŋkpele lɛ hiɛ yɛ be ko mli. (Yesaia 10:15; Kpojiemɔ 17:5, 16, 17) Anuɔ mpleshii ni baa nɛɛ he yɛ be babaoo mli yɛ adafitswaa woji amli ŋmɛnɛ. Akɛ nɔkwɛmɔ nɔ lɛ, U.S.News & World Report lɛ kɛɛ nyɛsɛɛ nɛɛ akɛ: “Jeee Poland pɛ etamɔ nɔ ni Katolek jamɔ kɛ Komunist nɔyeli lɛ miihe akpe hiɛ kɛ hiɛ kɛha nɔmɔ. Shi yɛ Europa Bokagbɛ fɛɛ lɛ, wekukpaa ni ka sɔlemɔ lɛ kɛ Komunist nɔyelii lɛ ateŋ lɛ efite kwraa, kɛjɛ be mli ni John Paul II ni ji Polandnyo lɛ batsɔ Paapa yɛ 1978 nɛɛ. Keketee-feemɔ ko eje kpo yɛ Roma Katolek osɔfonukpai ni yɔɔ Soviet loo Russia nɔyeli he maji lɛ amli lɛ ateŋ. . . . Bɔ ni Paapa lɛ fiɔ Katolek nifeemɔ sɛɛ keketee lɛ hu eha béi nɛɛ ete shi waa. . . . Komunist nɔyelii lɛ kɛ bɔ ni amɛheee Paapa lɛ amɛyeee lɛ eteee kwraa.”
17. Mɛni Amos wolo lɛ kɛ agbɛnɛ gbalɛi krokomɛi kɛɔ yɛ ha ni aaaha epasa jamɔ lɛ he?
17 No hewɔ lɛ ebaaba mli pɛpɛɛpɛ tamɔ bɔ ni Yehowa jaje yɛ Amos 3:15 lɛ: “Ni shwuɔwu shiai lɛ hu ahiɛ baakpata, ni shiai babaoo aaalaaje kwraa, Yehowa kɛɛ.” Abaakpata Kristendom ninamɔ babaoo lɛ fɛɛ hiɛ, kɛ apasa jamɔ shihilɛ he lɛ fɛɛ—Ezekiel 7:19; Kpojiemɔ 18:15-17.
18. (a) Mɛɛ henɔwomɔ nifeemɔ ko “Ashur” baafee yɛ enɛ sɛɛ? (b) Enɛ baatee mɛni shi, ni mɛni baajɛ mli aba aha Yehowa webii?
18 Shi ani nɔ ni enɛ baatsɔɔ ji kpɔmɔ ni aaakpɔ Yehowa anɔkwa tsuji lɛ kɛjɛ ahorabɔɔ, yiwaa, kɛ nɔnyɛɛi sɔrɔtoi ni Satan je lɛ kɛbaa amɛnɔ lɛ shishi amrɔ nɔŋŋ? Be shɛko! Ejaakɛ “Ashur”—“tso” kɛ “lema” ni maŋkwramɔ he saji yɔɔ ejwɛŋmɔ mli lɛ ni Yehowa kɛ lɛ tsuɔ nii ni ekɛ fɔbuu kojomɔ baa Kristendom ni ekwa hemɔkɛyeli lɛ nɔ lɛ—kɛ hewoo aaawo ehe nɔ ashi Yehowa kɛtsɔ edasefoi anɔkwafoi ni yɔɔ shikpɔŋ nɔ yɛ biɛ ni eeetsɔ ehiɛ eha amɛ lɛ nɔ. Shi ebaafee yaka! (Yesaia 10:15-19) Taakɛ bɔfo Yohane na yɛ ninaa mli lɛ, “shikpɔŋ lɛ nɔ maŋtsɛmɛi,” maŋkwramɔŋ hewalɛi ni yɔɔ Jeŋmaji Ekomefeemɔ ni ji ‘kooloo ni hiɛ yɔɔ la’ lɛ mli lɛ aaabua amɛhe naa koni amɛkɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ” ni Nyɔŋmɔ kɛ lɛ eta maŋtsɛsɛi nɔ lɛ ayawuu. Enɛ baafee Harmagedon, “Nyɔŋmɔ Ofe lɛ gbi wulu lɛ nɔ ta lɛ” he okadi. Ekɛ hiɛkpatamɔ baaba Satan tabilɔi ni yɔɔ shikpɔŋ nɔ lɛ fɛɛ nɔ, kɛ yiwalaheremɔ kɛha “mɔ fɛɛ mɔ ni tsɛɔ Yehowa gbɛi lɛ.”—Kpojiemɔ 16:14, 16; 19:11, 16, 19-21; Romabii 10:13.
19. Esa akɛ Amos nɔkwɛmɔ nɔ lɛ kɛ egbalɛ lɛ mlibaa ni ba Samaria nɔ lɛ akanya mɛɛ hekɛnɔfɔɔ yɛ wɔmli?
19 Belɛ te wɔkpeeɔ basabasafeemɔ be nɛɛ naa wɔhaa tɛŋŋ? Yɛ anɔkwale mli lɛ, kɛ hekɛnɔfɔɔ ni yɔɔ shiŋŋ ákɛ Yehowa baabu egbalɛ Wiemɔ lɛ bem! Ni wɔkpɛ wɔyiŋ shiŋŋ tamɔ Amos, mɔ ni shiɛ hiɛkpatamɔ sane ni eŋɔɔɔ etsɔɔ gbɔmɛi ni amɛkwa hemɔkɛyeli lɛ! Shi te ooofee tɛŋŋ ni bo diɛŋtsɛ lɛ oje mli ni oná Gbɛjianɔtoo Hee ni yɔɔ nyam ni Nuŋtsɔ Maŋtsɛ Yehowa saa eha mɛi ni sumɔɔ lɛ lɛ mli ŋɔɔmɔ hu? Sane ni nyiɛ enɛ sɛɛ lɛ baaha nakai sanebimɔ lɛ hetoo.a
[Shishigbɛ niŋmaa]
a Ajie kɛjɛ July 1, 1984 Watchtower lɛ mli.
Sanebimɔi ni Akɛtiɔ Mli:
◻ Amos ji nɔkwɛmɔ nɔ kpakpa kɛha wɔ yɛ basabasafeemɔ be ni anyɛɔ akpeeɔ naa mli yɛ mɛɛ gbɛ nɔ?
◻ Mɛɛ ‘yitsoŋsane’ aloo teemɔŋsane wɔna hegbɛ ŋmɛnɛ akɛ ‘wɔɔjaje wɔtsɔɔ’?
◻ Blema Samaria fee Kristendom he mfoniri yɛ mɛɛ gbɛi anɔ nɛkɛ?
◻ Basabasafeemɔ be nɛɛ baabo naagbee yɛ mɛɛ gbɛ nɔ, ni mɛni tsɔɔ akɛ enɛ ebɛŋkɛ?
[Mfoniri ni yɔɔ baafa 8]
Nuŋtsɔ Maŋtsɛ Yehowa tsu tookwɛlɔ Amos ni eyashiɛ sane ko ni eŋɔɔɔ
[Mfoniri ni yɔɔ baafa 12]
Nɔ ni yɔɔ yiteŋgbɛ nɛɛ miitsɔɔ okɛ Italia kpaŋmɔ loo mla ko ebo hegbɛi ni sɔlemɔ lɛ yɔɔ lɛ ashi ni eji: ‘Gbogbo he Niŋmaa’ kɛha Babilon Kpeteŋkpele Lɛ