Maŋ Ko Hiɛkpatamɔ
Nii Ni Wɔkaseɔ Kɛjɛɔ Ŋmalɛi Lɛ Amli: Amos 1:1–9:15
“YEHOWA Zebaot Nyɔŋmɔ Iɛ” kɛɛ Israel maŋ Iɛ akɛ: “Saamɔ ohe ni okɛ o-Nyɔŋmɔ lɛ akpe, Israel!” (Amos 4:12, 13) Mɛni hewɔ? Akɛni ninámɔ eshwila amɛhiŋmɛi hewɔ Iɛ, Israel hiɛ ekpa E-Mla Iɛ nɔ, ni amɛye fɔ ejaakɛ amɛkɛ wɔŋjamɔ, ajwamaŋbɔɔ, lashishwiemɔ kɛ awuiyeli ebule eshikpɔŋ ni yɔɔ krɔŋkrɔŋ Iɛ.
Akɛ Yehowa gbalɔ lɛ, atee Amos shi koni ejaje kɔkɔbɔɔ sane, jeee kɛmiiha lɛ diɛŋtsɛ emaŋ ni ji Yuda, shi moŋ titri Iɛ kɛha kooyigbɛ Israel maŋtsɛyeli Iɛ. Ebu Israel fɔ yɛ ekɔnɔ shihilɛ Iɛ hewɔ ni egba naagbee gbele ni baaba enɔ yɛ jeŋmaji ni nyɛɔ lɛ lɛ adɛŋ lɛ he sane efɔ shi. Amos wolo Iɛ ni aŋma kɛjɛ 829 D.Ŋ.B. kɛmiiba 804 D.Ŋ.B. lɛ haa wɔleɔ bɔni Nyɔŋmɔ nyɛɔ etsɔɔ hiɛ enaa osharai ni baa lɛ mli, ni ekɛ kɔkɔbɔɔ haa yɛ ebe naa pɛpɛɛpɛ.
Nyɔŋmɔ Henyɛlɔi Lɛ Ahiɛkpatamɔ Tamɔ La
Mɔ ko mɔ ko nyɛŋ ajo Nyɔŋmɔ kojomɔi Iɛ naa foi. Kwɛ bɔ ni enɛ fee anɔkwale kɛha jeŋmaji ni ji Damasko (Siria) , Gaza (Filistia) , Tiro, Edom, Amon, Moab kɛ Yuda! Yehowa ‘kpaleŋ’ enine kɛjɛŋ shi ni ete ewo amɛ yɛ amɛ efɔŋfeemɔ hewɔ Iɛ he. Ni kɛlɛ, amanehulu ni baa amɛnɔ ni agba afɔ shi lɛ maa kojomɔ ni ka Israel nɔ akɛni ehiɛɛɛ kpaŋmɔ wekukpaa ni ka ekɛ Nyɔŋmɔ teŋ lɛ mli ni agbɛnɛ ediii emlai asɛɛ lɛ hewɔ lɛ nɔ mi.—Amos 1:1–2:16.
Bo Nyɔŋmɔ kɔkɔbɔɔ Iɛ toi. Yehowa kɛɛ lsrael akɛ: “Nyɛ kɛkɛ mile yɛ shikpɔŋ lɛ nɔ wekui lɛ ateŋ.” (Amos 3:2) Shi, amɛ eshafeemɔ gbɛ lɛ tsɔɔ bulɛ ni amɛbɛ kɛha Nyɔŋmɔ gbɛi lɛ kɛ emaŋtsɛyeli lɛ. Amɛteŋ mɛi pii etswa amɛfai shi akɛ amɛbaatsɔmɔ niiatsɛmɛi, ni amɛhi shi yɛ ogbɔjɔ shihilɛ mli kɛkɛ ni amɛhi ‘fɛi be shia kɛ latsaa be shia mli,’ ni nɔ ni baa amɛnyɛmimɛi anɔ lɛ jeee amɛhe sane ko. (Amos 3:15) Amɛkɛ shishiumɔ ŋsɛnii tsu nii ni amɛkɛshishiu ohiafoi lɛ. Yehowa anɔkwale jamɔ ni amɛkwa lɛ tsɔɔ akɛ Yehowa toigbalamɔ ebɛŋkɛ. Ni kɛlɛ, ‘Yehowa efeŋ nɔ ko akɛ ja ejie kpo etsɔɔ etsuji lɛ da.’ No hewɔ lɛ, Amos gba Yehowa kojomɔi ni ebɔ amɛ kɔkɔ akɛ: “Saamɔ ohe ni okɛ o-Nyɔŋmɔ lɛ akpe.”—Amos 3:1–4:13.
Yehowa Ji Yiwalaheremɔ
Nyɔŋmɔ baajie mɔbɔnalɛ kpo etsɔɔ mɛi ni tsakeɔ amɛtsui Iɛ. Fai ni Yehowa kpa lsrael ji akɛ: “Nyɛtaoa misɛɛ gbɛ, ni nyɛyi aaana wala.” (Amos 5:4) “Nyɛnyɛa nɔ fɔŋ, ni nyɛsumɔa nɔ kpakpa.” (Amos 5:15) Shi amɛku amɛhiɛ amɛshwie nɛkɛ wiemɔi nɛɛ anɔ. Hemɔkɛyeli kwalɔi lɛ miisumɔ ni amɛya Betel kɛ Gilgal, hei ni amagajamɔ ehe shi yɛ lɛ, koni amɛsha tsofa-kɛ-ŋma amɛha epasa nyɔŋmɔi. (Amos 5:26; 1 Maŋtsɛmɛi 12:28-30) Amɛkamɔ shwuɔwu saatsei anɔ, ni efɔŋfeelɔi nɛɛ nuɔ dãi kpakpa ni amɛshɛjeɔ amɛ diɛŋtsɛ amɛmii kɛ niyenii kɛ fɔ kpakpa. (Amos 5:11; 6:4-6) “Yehowa gbi” lɛ miiba, ni Nyɔŋmɔ ‘eka lɛ diɛŋtsɛ esusuma kita’ akɛ abaakpata lsrael hiɛ. (Amos 5:18; 6:8) Yehowa baatee jeŋmaŋ ko shi ni ebanyɛ lsrael nɔ ni enyiɛ ehiɛ kɛya nomŋɔɔ mli.—Amos 5:1–6:14.
She Yehowa gbeyei, jeee shitee-kɛ-wolɔi. Baalabii loo la ni kpataa nii ahiɛ baanyɛ ekɛ lsrael hiɛkpatamɔ lɛ aba. Amos kpa Nyɔŋmɔ fai eha Israel ni “Yehowa shwa ehe yɛ enɛ he,” yɛ kojomɔi nɛɛ ahewɔ, no hewɔ lɛ atsuuu he nii yɛ nɛkɛ gbɛ nɔ. Shi, taakɛ tsutswalɔ kɛ plomo loo kulomulo toɔ gbogbo he ekwɛɔ lɛ, Yehowa “hoŋ” lsrael “he dɔŋŋ.” (Amos 7:1-8) Esa akɛ aha maŋ lɛ atsɔ amaŋfɔ. Akɛni Amazia, tsina amaga osɔfo lɛ mli fu gbalɔ lɛ shɛɛsane Iɛ hewɔ lɛ, ekɛ emale folɔ Amos naa akɛ ebɔ musu ni efa lɛ ni ‘ejo foi kɛya Yuda shikpɔŋ lɛ nɔ ni ekagba dɔŋŋ’ yɛ Betel. (Amos 7:12, 13) Ani Amos she gbeyei? Dabi! Egba Amazia gbele kɛ oshara ni baaba eweku Iɛ nɔ lɛ efɔ shi ni gbeyeishemɔ bɛ mli. Taakɛ abuaa yibii anaa yɛ nikpamɔ be mli lɛ, nakai nɔŋŋ be eshɛ ni Yehowa kɛ lsrael baakojo. Amɛnyɛŋ amɛjo enɛ naa foi.—Amos 7:1–8:14.
Hiɛnɔkamɔ yɛ kɛha mɛi ni kɛ amɛhiɛ fɔɔ Yehowa nɔ lɛ. Yehowa kɛɛ: “Kɛlɛ mikpataŋ Yakob we lɛ hiɛ kwrakwra.” Hiɛnɔkamɔ yɛ lolo kɛha Yakob seshibii lɛ ekomɛi shi jeee kɛha eshafeelɔi lɛ. Amɛ hiɛkpatamɔ lɛ baaba kɛ̃, ni kɛlɛ, Yehowa ‘baakpale emaŋ lsrael nomŋɔɔ lɛ kɛaaba ekoŋŋ.’—Amos 9:1-15.
Nikasemɔ ni yɔɔ mli kɛha wɔ ŋmɛnɛ: Abaakojo mɛi ni feɔ amɛhe Nyɔŋmɔ henyɛlɔi lɛ akɛ mɛi ni sa gbele. Shi, mɔ fɛɛ mɔ ni boɔ ŋwɛi kɔkɔbɔɔ akɛ atsake lɛ toi lɛ nine baashɛ Yehowa mɔbɔnalɛ nɔ ni ebaahi wala mli. Kɛ wɔsheɔ Nyɔŋmɔ gbeyei lɛ, wɔŋmɛŋ gbɛ ni shitee-kɛ-wolɔi atsi wɔ gbɛ koni wɔkafee esuɔmɔnaa nii.
[Akrabatsa ni yɔɔ baafa 22]
BIBLIA MLI ŊMALƐI Nl ATSƆƆ MLI
○ 1:5—Blema maŋtiasei lɛ yɛ gbogboi ni kwɔlɔ kɛ agboi ni dara. Akɛ dade loo akɔɔble adabaŋi kakadaji lalaa sɛɛ yɛ emligbɛ. No hewɔ lɛ. ‘Damasko agbo sɛɛ adabaŋi lɛ ni aaakumo’ lɛ tsɔɔ akɛ Siria maŋtiase lɛ baagbee shi yɛ Ashur hiɛ. Ebaafee tamɔ nɔ ni anyɛɛɛ aŋa maŋtiase Iɛ agboi lɛ, ejaakɛ akumɔ esɛɛ adabaŋi lɛ.—2 Maŋtsɛmɛi 16:8, 9.
○ 4:1—Yei ni sumɔɔ nibii ni yɔɔ fɛo ni hi Samaria lɛ ji mɛi ni awieɔ amɛhe akɛ “Bashan tsinayei” lɛ. Bashan niyeli hei kpakpai Iɛ ha ekooloi lɛ shwere ni amɛhe fee fɛo. (5 Mose 32:14; Ezekiel 39:18) Eka shi faŋŋ akɛ nɛkɛ “Bashan tsinayei” ni feɔ pɛsɛmkunya nɛɛ tsirɛ “amɛ nuŋtsɔmɛi” loo wumɛi Iɛ ni amɛshɔ shika kɛjɛ ohiafoi lɛ adɛŋ koni amɛkɛwo amɛ “shwuɔwu shia” lɛ amli obɔbɔ. (Amos 3:15) Shi nifeemɔi ni tamɔ nɛkɛ kɛ ŋwɛi najiaŋtoo ba.
○ 4:6—Atsɔɔ wiemɔ “nyanyɔji anɔ tsemɔ” lɛ mli kɛ tsɔ wiemɔ “aboloo hɔmɔ” lɛ nɔ. No hewɔ lɛ atamɔ no ni eetsɔɔ hɔmɔ, akɛni nyanyɔji anɔ etse ejaakɛ nɔ ko bɛ ni abaaye hewɔ. Eka ahi faŋŋ akɛ Yehowa etsɔɔ bɔni esumɔɔɔ akutsei nyɔŋma maŋtsɛyeli ni jaa wɔŋ lɛ kɛtsɔ hɔmɔ ni etsu kɛba shikpɔŋ lɛ nɔ lɛ hewɔ, taakɛ bɔni etsɔ hiɛ agba afɔ shi jeeŋmɔ lɛ.(5 Mose 28:48) Shi,enɛ loo ŋwɛi kojomɔ wiemɔi krokomɛi boteee nɛkɛ gbɔmɛi ni kuɔ kpaŋmɔ mli nɛɛ atsuii amli.—Amos 4:6. 8-11.
○ 5:2—Beni Amos kɛ nɛkɛ gbalɛ nɛɛ ha lɛ, no mli lɛ ebako gbɔmɛi lɛ loo lsrael shikpɔŋ lɛ shi ni maŋsɛɛ hewalɛ ko yeko amɛnɔ. No hewɔ lɛ awie ahe akɛ obalayoo. Shi etsɛŋ yɛ afii fioo sɛɛ ni Israel obalayoo lɛ baagbee shi aha Ashurbii lɛ, ni “amɛbaaya nom mli yɛ Damasko sɛɛ” (Amos 5:27) Bɔ ni Amos yɔɔ nɔmimaa yɛ lsrael hiɛkpatamɔ lɛ he yɛ anɔkwale ni eyeee hewɔ lɛ ha atsɔɔ mli akɛ etamɔ nɔ ni eba mli momo po.
○ 7:1—Eka ahi faŋŋ akɛ “maŋtsɛ jwɛi” Iɛ kɔɔ onia ni maŋtsɛ lɛ ha atsu koni akɛtao niyenii aha ekooloo kɛ ekpɔŋɔi lɛ he. Abaawo maŋtsɛ lɛ too lɛ klɛŋklɛŋ, ni no sɛɛ dani gbɔmɛi lɛ anine baashɛ “jwɛi” lɛ loo shikpɔŋ lɛ nɔ kɛha amɛ diɛŋtsɛ amɛ nitsumɔ. Shi dani amɛaanyɛ amɛfee nakai po lɛ, baalabii lɛ ba ni amɛbaye nɔ ni amɛdu yɛ sɛɛ mli lɛ fɛɛ.
○ 8:2—Abua latsaa be mli tseiayibii anaa yɛ ŋmaa kpamɔ ba mli. Okwaayeli afi lɛ naagbee lɛ tsɔɔ akɛ Israel eshɛ enaagbee. Yehowa jaje akɛ: “Mihoŋ amɛhe dɔŋŋ!” Be ashɛ ni akɛ ekojomɔi baaba maŋ lɛ nɔ.
○ 9:7—Yɛ anɔkwafoi ni amɛ blematsɛmɛi lɛ ji hewɔ Iɛ, Yehowa hala Israelbii lɛ,ejie amɛ blematsɛmɛi lɛ kɛjɛ Mizraim nyɔŋyeli mli ni akɛ amɛ ba Kanaan. Shi amɛbɛ no ni amɛbaadamɔ nɔ amɛshwa yɛ enɛ he, ejaakɛ amɛ nɔfɔŋfeemɔ lɛ tamɔ Kushbii Iɛ nɔŋŋ. (Okɛto Romabii 2:25 he.) Nakai nɔŋŋ hu jiemɔ kɛmiijɛ Mizraim lɛ jeee nɔ ni amɛaadamɔ nɔ ni amɛ na nɔkpɛlɛmɔ taakɛ bɔ ni anɔkwale ni eji akɛ he ni Filistibii lɛ kɛ Siriabii lɛ yɔɔ lɛ jeee amɛ tsutsu shihilɛ hei lɛ. Blematsɛmɛi anɔkwafoi lɛ amli ni amɛjɛ lɛ hereŋ lsrael yiwala. Shidaamɔ ni akpɛlɛ nɔ yɛ Nyɔŋmɔ hiɛ lɛ damɔ esuɔmɔnaa nii ahe nitsumɔ nɔ.—Amos 9:8-10; Bɔfoi lɛ Asaji 10:34,35.