Heyeli Diɛŋtsɛ Yɛ Maŋtsɛyeli Nɔyeli Shishi
“Bɔɔnii Iɛ diɛŋtsɛ hu baaye amɛhe kɛjɛ fitemɔ nyɔŋyeli Iɛ mli kɛya Nyɔŋmɔ bii lɛ anunyam heyeli lɛ mli.”—ROMABII 8:21.
1. Namɔ pɛ baanyɛ ekɛ heyelii ni adesai taoɔ kɛ hiɛdɔɔ lɛ aba, ni mɛni hewɔ?
1 EHE MIIHIA waa ni aha adesai aye amɛhe kɛjɛ shihilɛi ni gbaa mɔ naa babaoo ni amɛhi mli be kakadaŋŋ lɛ mli. Shi, taakɛ yinɔsane etsɔɔ lɛ, adesa bɛ hewalɛ ko ni ekɛ heyeli ni tamɔ nɛkɛ aaaba. “Jwɛŋmɔi pii yɛ gbɔmɔ tsuiŋ; shi Yehowa yiŋtoo lɛ, no baadamɔ shi.” (Abɛi 19:21) Nakai Yehowa “yiŋtoo” lɛ kɛ shiwoo haa akɛ “ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” (Kpojiemɔ 21:4) Mɛɛ gbɛkpamɔ ni woɔ mɔ hewalɛ nɛ! Kwɛ bɔ ni etamɔ heyeli diɛŋtsɛ ni atsɔɔ mli ni Biblia lɛ kɛɔ akɛ ebaaba kɛjɛ Yehowa ŋɔɔ lɛ: “Bɔɔnii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.”!—Romabii 8:21.
2. Mɛni nɔ Yehowa baatsɔ ni ekɛ nɛkɛ heyelii nɛɛ aba?
2 Nɔ ni abaatsɔ nɔ ni ekɛ heyelii ni yɔɔ naakpɛɛ nɛɛ aba ji nɔyeli ni Yehowa to ni eye shikpɔŋ muu lɛ fɛɛ nɔ lɛ, Nyɔŋmɔ ŋwɛi Maŋtsɛyeli lɛ. No nɔ abaatsɔ afee Nyɔŋmɔ suɔmɔnaa nii “yɛ shikpɔŋ nɔ taakɛ afeɔ yɛ ŋwɛi lɛ.” (Mateo 6:10) Nɛkɛ Maŋtsɛyeli nɛɛ nɔŋŋ etsɛŋ “eeejwara maŋtsɛyelii [ni yɔɔ shihilɛ mli ŋmɛnɛ] nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ” lɛ.—Daniel 2:44.
3. Mɛni hewɔ esaaa akɛ adesai agbɛjianɔtooi ni amɛkɛfeɔ tsabaa amɛhaa je nɛŋ naagbai lɛ lakaa wɔ lɛ.
3 Dabi, Nyɔŋmɔ tsakeŋ jeŋ ni ekpɔtɔ nɛɛ, Etee shɔŋŋ fe bɔ ni eeenyɛ etsake. No hewɔ lɛ kɛji akɛ mɔ ko kɛɛ kɛ́ anyiɛ adesa gbɛjianɔtoɔ ko sɛɛ lɛ, je lɛ diɛŋtsɛ baaná tsabaa eha enaagbai lɛ, kaahe oye, shi moŋ Nyɔŋmɔ Wiemɔ lɛ tsɔɔ yɛ anɔkwale mli akɛ piŋmɔ shihilɛ ni adesa nɔyeli kɛba aaafee afii 6,000 nɛ ni Nyɔŋmɔ kɛ ehe wooo amɛsaji amli lɛ ebote ‘enaagbee gbii’ lɛ amli kɛshɛ shɔŋŋ.—2 Timoteo 3:1-5, 13.
Nɔyeli kome
4. Mɛni Maŋtsɛyeli nɔyeli kome lɛ baaji aha adesai?
4 Nyɔŋmɔ ŋwɛi Maŋtsɛyeli lɛ nɔyeli baatsɔ nɔyeli kome pɛ ni aaaná aha shikpɔŋ muu lɛ fɛɛ. E-Maŋnɔkwɛlɔ nukpa lɛ baafee Yesu Kristo, ni Nyɔŋmɔ tsuji anɔkwafoi lɛ ateŋ kuu fioo ko ni aŋɔ amɛ kɛjɛ shikpɔŋ nɔ baafata ehe ni amɛsɔmɔ akɛ nɔyelɔi hefatalɔi. Susumɔ nɔ ni nɔyeli kome, ni Nyɔŋmɔ mlai kɛ shishitoo anɔkwalei yeɔ nɔ baaji aha shikpɔŋ lɛ he. Majimaji ateŋ husui ni gbalaa maji ateŋ efeɔ amɛ kui ni nyɛɛɔ amɛhe Iɛ fɛɛ baalaaje. Abaafee gbɔmɛi ekome, afee amɛ adesa weku kome, mɛi ni yɔɔ hegbɛ akɛ amɛyaa he fɛɛ he yɛ shikpɔŋ muu lɛ fɛɛ nɔ ni nɔ ko etsiii amɛ gbɛ. Gbɛfaa he woji tamɔ paasport kɛ visa aloo asraafoi ni buɔ husui anaa bɛ dɔŋŋ—Filipibii 2:9, 10; Kpojiemɔ 14:4; 20:6.
5. Mɛɛ gbɛ nɔ ayoo bɔ ni ehe hiaa akɛ ana nɔyeli kome aha shikpɔŋ muu lɛ fɛɛ lɛ yɛ?
5 Mɛi pii ejɛ jeeŋmɔ eyoo bɔ ni nɔyeli kome he hiaa ha lɛ. Niŋmalɔ Gwynne Dyer wie yɛ Bulletin Today, ni ji Philippines wolo ko mli akɛ: “A. J. P. Taylor, wɔyinɔ nɛɛ mli yinɔsaneŋmalɔi ni ehe gbɛi lɛ ateŋ mɔ kome kɛɛ mi nyɛsɛɛ nɛɛ akɛ eheɔ eyeɔ akɛ hiɛnɔkamɔ kome pɛ ni yɔɔ ni akɛaatsi amanehulu ni jeŋ ta kɛbaaba ni no aaaha hiŋmɛigbelemɔ fɛɛ aba naagbee lɛ naa ji ni mɔ ko aaafee jeŋ maŋtsɛyeli. . . . Esa akɛ wɔna—jeŋ nɔyeli kome—kɛjɛ maji sɔrɔtoi fe [150], ni yeɔ amɛhe ni amɛ fɛɛ amɛkɛ tawuu nii ewula amɛhe kpɛŋshɛŋŋ, ni kɛlɛ, hegbɛ yɛ hu akɛ abaanyɛ akpata amɛhiɛ nɛɛ aŋɔɔ . . . Ni esa akɛ wɔfee nakai oya. Bɔ ni Jeŋmaji Ekomefeemɔ lɛ efee wudɔɔ ni enii yɔɔ mɔbɔ ni emli egbala kwraa nɛɛ tsɔɔ he ni esa akɛ wɔfee nakai kɛyashɛ . . . Blema sabala ni yɔɔ 1950 afii lɛ amli lɛ ka he eji anɔkwale lolo: jeŋ kome aloo jeŋ ko ni bɛ kwraa po.”
6. Mɛɛ maŋnɔkwɛmɔ gbɛjianɔtoo nɛkɛ Maŋtsɛyeli lɛ baaji?
6 Ebaafee jeŋ kome, yɛ Nyɔŋmɔ nɔyeli kome shishi. Mɛɛ jɔɔmɔ nɛ, akɛ wɔɔná maŋnɔkwɛmɔ kome ni kɛ mɔ fɛɛ mɔ baaye yɛ mlihilɛ, jalɛ kɛ gbɛ ni hiɛaŋkwɛmɔ bɛ mli nɔ! Yɛ be mli ni ewieɔ ŋwɛi Maŋtsɛ, Yesu Kristo he lɛ, Biblia lɛ kɛɛ yɛ gbalɛ mli akɛ: “Eeekojo ohiafoi yɛ jalɛ naa, ni jajemɔ hu ekɛaaka mɛi lɛ.” (Yesaia 11:3, 4) Hɛɛ, Kristo baafee nɔ ni ja. Eye enɛ he odase etsɔɔ yɛ be mli ni eyɔɔ shikpɔŋ nɔ lɛ, ejaakɛ ewie anɔkwale lɛ ni ekpa osatofeemɔ he mama. Efi mɛi ni anaanaa amɛnɔ lɛ asɛɛ ni eyeee ebuaaa niiatsɛmɛi kɛ mɛi ni yɔɔ hewalɛ lɛ, eyɛ mli akɛ ejieee hiɛaŋ eshiii amɛ. Kɛ Maŋnɔkwɛlɔ ni sa ni yɔɔ nyɛmɔ ni tamɔ nɛkɛ miitsu nii yɛ Yehowa gbɛtsɔɔmɔ shishi lɛ, ‘anɔkwale baakwɛ̃ kɛjɛ shikpɔŋ nɔ, ni jalɛ baajɛ ŋwɛi agboo ehiɛ shi ekwɛ.’—Lala 85:11, 12.
Anɔkwale Toiŋjɔlɛ Kɛ Kpoomɔ Loo Shweremɔ
7. Mɛi ni abaabaa amɛyi kɛbote Nyɔŋmɔ Gbɛjianɔtoo Hee lɛ mli lɛ efee mɛni momo?
7 Mɛɛ miishɛɛ eeeji akɛ wɔhiii shi yɛ adesa nɔyeli ni mli egbala ni hiɛ asraafoi babaoo ni tawuu ka amɛteŋ daa nɛɛ shishi dɔŋŋ! Afiteŋ shikpɔŋ lɛ nɔ nibaanii ahaŋ hiɛkpatamɔ dɔŋŋ. Shi moŋ, akɛ nakai nibaanii lɛ baatsu nii aha toiŋjɔlɛ, yiŋtooi ni sɛɛnamɔ yɔɔ he. Yɛ anɔkwale mli lɛ, no mli lɛ mɛi ni Nyɔŋmɔ baabaa amɛyi kɛtsɔ ŋmɛnɛŋmɛnɛ nibii agbɛjianɔtoo nɛɛ naagbee ni baa lɛ mli lɛ eha gbalɛ ni yɔɔ Mika 4:3 Iɛ eba mli momo po: “Ni amɛkɛ amɛklantei aaasɔ kɔii ni amɛkɛ amɛkpɔlɔi hu aaasɔ adedai. Jeŋ maŋ ko woŋ klante nɔ eshiŋ jeŋ maŋ ko, ni amɛkaseŋ tawuu dɔŋŋ!” Namɛi, ŋmɛnɛ amɛyɔɔ shikpɔŋ lɛ nɔ ni amɛpɛ amɛha nɛkɛ gbalɛ nɛɛ eba mli momo? Ŋmɛnɛŋmɛnɛŋ beaŋ yinɔsane tsɔɔ akɛ amɛji Yehowa Odasefoi. Amɛji mɛi ni yeɔ anɔkwale ni eji akɛ shikpɔŋ muu lɛ fɛɛ nɔ toiŋjɔlɛ yɛ Nyɔŋmɔ nɔyeli shishi lɛ baafee nɔ ni baaba mli diɛŋtsɛ lɛ he odase, ejaakɛ shikpɔŋ muu lɛ fɛɛ nɔ toiŋjɔlɛ lɛ ji nɔ ko ni yɔɔ amɛteŋ bianɛ!
8, 9. Nɛgbɛ toiŋjɔlɛ kɛ kpɔomɔ ni baaba Maŋtsɛyeli lɛ shishi lɛ baashwere kɛyashɛ?
8 Abaaha toiŋjɔlɛ mli alɛɛ yɛ shikpɔŋ muu lɛ fɛɛ nɔ yɛ Nyɔŋmɔ Gbɛjianɔtoo Hee lɛ shishi. Yesaia 32:17, 18 wieɔ “hejɔlɛ kɛ toiŋjɔlɛ kɛaatee naanɔ” he, ni ekɛ fata he akɛ: “Ni mimaŋ lɛ aaahi shi yɛ hejɔlɛ shia, kɛ shihilɛhe ni yɔɔ shweshweeshwe, kɛ hejɔɔmɔhe ni yɔɔ kpoo.” Bo lɛ susumɔ shweshweeshwe shihilɛ ni tamɔ nɛkɛ ni oyɔɔ ni ehe ehiaŋ ni oooŋmɛ oshinaa mli po lɛ he, ni ákɛ ooonyɛ onyiɛ yɛ he fɛɛ he yɛ gbi muu lɛ mli be fɛɛ mli aloo gbɛkɛ ni osheee awuyelɔi aloo mɛi ni mɔmɔɔ yei ekãa naa lɛ agbeyei. Belɛ yiŋtoo kpakpa hewɔ ni Biblia lɛ kɛɛ akɛ: “Ni amɛmii aaashɛ amɛhe yɛ hejɔlɛ babaoo mli.”—Lala 37:11.
9 Kpɔomɔ loo shweremɔ baafata nakai toiŋjɔlɛ lɛ he fe ni akpekpei abɔ aaagboi daa afi yɛ niyenii kpakpa ni anaaa aye taakɛ eji bianɛ lɛ. Akɛni Yesu yɔɔ hewalɛ ni ekɛaalɛ mɛi akpei abɔ kɛtsɔ naakpɛɛ gbɛ ni etsɔ nɔ eha aboloi kɛ loo fioo ko fa hewɔ lɛ, yɛ Maŋtsɛyeli lɛ maŋnɔkwɛmɔ shishi lɛ, ebaanyɛ enyiɛ adesai ahiɛ ni eha gbalɛ ni yɔɔ Lala 72:16 lɛ aba mli: “Shikpɔŋ lɛ nɔ aaaba abele babaoo kɛyashwie gɔji Iɛ ayiteaŋ.” Ni akɛni Nyɔŋmɔ Maŋtsɛyeli lɛ baajie maŋkwramɔŋ husui fɛɛ, kɛ agbɛnɛ jarayeli mli hiɛjoomɔ kɛ akaŋshii ni fiteɔ nii hewɔ lɛ, shikpɔŋ lɛ nɔ nibaanii lɛ baaho yaka ni ehe baaba sɛɛnamɔ aha adesai fɛɛ, jeee kɛha mɛi fioo ko pɛ. No hewɔ lɛ, gbekɛbii ni kɛ okwɛ amɛ lɛ amɛnii efee mɔbɔ yɛ amɛniji kɛ naji ni etsɔ̃mɔ efee bibioo kɛ kwashiɔkor mũsui agboi ni jɛ hɔmɔ hewɔ lɛ bɛ dɔŋŋ, etee kwraa kɛmiiya naanɔ.
Nitsumɔ Ni Ŋɔɔ Ni Sɛɛnamɔ Yɔɔ He
10. Mɛɛ gbɛ nɔ nitsumɔ yɛ Gbɛjianɔtoo Hee lɛ mli lɛ baafee nɔ ni yɔɔ sɔrɔto yɛ ŋmɛnɛ nɔ lɛ he?
10 Ŋmɛnɛ, mɛi pii bɛ miishɛɛ yɛ nii ni amɛtsuɔ ni amɛkɛ naa amɛdaaŋ ŋmaa lɛ mli. Akpekpei krokomɛi hu tsuuu nii, amɛbɛ nitsumɔ. Shi gbɔmɛi baaná miishɛɛ kpele yɛ nitsumɔ mli yɛ Nyɔŋmɔ Gbɛjianɔtoo Hee lɛ mli. Ni oshara ko baŋ yɛ na ni amɛaana akɛ amɛmɔdɛŋbɔɔ efee yaka yɛ shikahelɛtemɔ he gbɛjianɔtoo gbonyo, oshara loo tawuu ko hewɔ. “Shi amɛaamamɔ tsui ni amɛaahi mli, ni amɛaafee weintromi ni amɛaaye mli yibii! Amɛmamɔŋ tsui ni mɔ ko ahi mli, ni amɛhuŋ hu ni mɔ kroko aye. . . . Mɛi ni mihala lɛ aaaye amɛninenaa ni tsumɔ lɛ mli nii ahu po. Amɛgboŋ deŋme yakatswaa.”—Yesaia 65:21-23.
11. Mɛni Nyɔŋmɔ Maŋtsɛyeli lɛ shishibii lɛ baafee yɛ shikpɔŋ nɛɛ kɛ wala ni yɔɔ nɔ lɛ he?
11 Akɛni shihilɛi ni hi nɛkɛ eba shihilɛi ni atsuɔ nii yɛ shishi lɛ amli, ni gbɔmɛi lɛ hu yɛ suɔmɔ diɛŋtsɛ kɛha amɛnanemɛi hewɔ lɛ, Maŋtsɛyeli lɛ shishibii lɛ baatsu nii ni baahi aha shikpɔŋ nɛɛ kɛ wala ni yɔɔ nɔ lɛ, nibii ni yɔɔ naakpɛɛ shii akpei abɔ fe nɔ ni je nɛɛ ena pɛŋ. No hewɔ ni Yesu baanyɛ ekɛ enine atsɔɔ Paradeiso ni baa lɛ. (Luka 23:43) Taakɛ Yesaia gba fɔ shi lɛ: “Ŋa kpataa kɛ shikpɔŋ gbiŋ aaanya, . . . eeegba afofro babaoo ni emli aaafili lɛ, ni emli aaafili lɛ kɛ miishɛɛ nyamɔ sɔŋŋ; aaaŋɔ Lebanon anunyam lɛ aha lɛ, kɛ Karmel kɛ Sharon wulamɔ lɛ hu. . . . Ejaakɛ nui aaatue yɛ ŋa kpataa nɔ, faai aaaho yɛ ŋa olɛŋlɛ nɔ. Shi ŋa ni edɔ aaatsɔ kpaakpo, ni shikpɔŋ ni nu bɛ nɔ aaatsɔ nui ni baa sɔŋŋ . . . Amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.”—Yesaia 35:2, 6, 7, 10.
Hela Kɛ Gbele Bɛ Dɔŋŋ
12. Mɛɛ gbɛ nɔ Yesu fee helatsamɔ he gbɛjianɔtoo kpele ni ebaatsu he nii yɛ Maŋtsɛyeli hewalɛ mli lɛ he mfoniri yɛ?
12 Shi kɛ̃lɛ, ebaafee mɔbɔ sane akɛ aaaná enɛɛmɛi fɛɛ, ni agbɛnɛ alaaje fɛɛ, akɛni he yeɔ, agbɔɔ ni agboɔ hewɔ. Shi nɔ ni tsofafeelɔi kɛ jeŋ nilelɔi nyɛŋ afee bianɛ lɛ, Nyɔŋmɔ baafee yɛ emaŋtsɛyeli nɔyeli lɛ shishi. Nyɔŋmɔ ji mɔ ni bɔ gbɔmɔtso lɛ, jwɛŋmɔ kɛ ehenumɔi. Lɛ ele nɔ ni baaha ehi shi ni ena hewalɛ yɛ gbɔmɔtso ni eye emuu mli. Beni Yesu yɔɔ shikpɔŋ nɔ lɛ, efee tsamɔ hewalɛ ni Nyɔŋmɔ kɛha lɛ ni ekɛbaatsu nii yɛ Gbɛjianɔtoo Hee lɛ mli lɛ he nɔkwɛmɔ nɔ: “Ni asafoi pii ba eŋɔɔ amɛhiɛ Obubuafoi kɛ shwilafoi kɛ mumuii kɛ kpajelɔi kɛ mɛi krokomɛi pii; ni amɛkɛ amɛ bashwie Yesu naji anaa; ni etsa amɛ. Ni asafoi lɛ anaa kpɛ amɛhe beni amɛna akɛ mumuii miiwie ni kpajelɔi eye emuu ni obubuafoi miinyiɛ ni shwilafoi miina nii lɛ.” (Mateo 15:30, 31) Nɔ ni fata he lɛ, akɛni áwo adesa nɔ kɛshɛ emuuyeli mli yɛ Maŋtsɛyeli lɛ nɔyeli shishi hewɔ lɛ, “aaami gbele kɛaatee naanɔ.” (Yesaia 25:8) Yehowa suɔmɔ lɛ mli baakpã kɛya mɛi ni egboi jeeŋmɔ lɛ hu nɔ, ejaakɛ amɛbaana hegbɛ ni amɛhi shi yɛ Nyɔŋmɔ Gbɛjianɔtoo Hee lɛ mli kɛtsɔ wala mli ni akɛ amɛ aaaba ekoŋŋ kɛtsɔ gbohiiashitee nɔ. Abaati nakai nyamɔ lɛ mli shii abɔ, ni ebaakai amɛ be mli ni Yesu tee gbekɛyoo ko shi ni mɛi ni na nɔ ni tee nɔ lɛ “anaa kpɛ amɛhe naakpa” lɛ.—Marko 5:41, 42; Yohane 5:28, 29.
13. Mɛni nibii gbɔmɛi baanyɛ ahala ni amɛfee yɛ Gbɛjianɔtoo Hee lɛ mli?
13 Susumɔ nɔ ni okɛ jwɛŋmɔ kɛ gbɔmɔtso ni eye emuu yɛ toiŋjɔlɛ kɛ kpɔomɔ loo shweremɔ jalɛ Gbɛjianɔtoo Hee mli—ni ogbooo dɔŋŋ hu lɛ baanyɛ afee lɛ he! Nibii enyiɛ po oyasumɔ akɛ ooofee, shi onyɛɛɛ ona be ni okɛfee aloo onyɛɛɛ ofee! Susumɔ gɔji sɔrɔtoi ni oookwɔ oyale amɛnɔ nibii ni oná jɛmɛ shihilɛ he miishɛɛ, kooi ni kɔɔyɔɔ kpakpa tswaa kɛtsɔɔ mli, ŋai ni amɛnɔ eyimɔ obɔ kɛ fɔfɔii kɛ abɔɔi, kooloi sɔrɔtoi ni he yɔɔ naakpɛɛ, faai kɛ emli nu ŋmai ni hiɛ tswaa afui kɛ kpaakpoi ni mli woko muji, kɛ gbɔmɛi sɔrɔtoi aniyenii sɔrɔtoi ni hii kɛ yei baaná yɛ ninenaa nitsumɔ mli, shikpɔŋ lɛ nɔ saamɔ mli, shia saamɔ, nitɛŋmɔ kɛ lalafoo mli lɛ ahe. Ŋwanejee ko bɛ he akɛ nibii nɛɛ baakanya adesai kɛyashɛ hei ni kwɔlɔ yɛ nifeemɔi akpojiemɔ kɛ fɛo mli. Agbɛnɛ susumɔ le ni wɔɔle Mɔ ni ha enɛɛmɛi fɛɛ nyɛ eba lɛ nakai, Yehowa Nyɔŋmɔ, lɛ he. Ejeŋ muu fɛɛ ni yɔɔ naakpɛɛ nɛɛ kɛ eŋulamii kuikui kɛ ŋulamii kutsai kɛ shibɔlemɔ ŋulamii sɔrɔtoi ahe nilee ni baafa lɛ baaha wɔnaa akpɛ wɔhe tsɔ. Hɛɛ, “ákɛ bɔɔnii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.”—Romabii 8:21.
Anɔkwale Lɛ Nɔkpɛlɛmɔ
14. Mɛni hewɔ wɔbaanyɛ wɔna hekɛnɔfɔɔ kwraa yɛ Yehowa shiwooi amli lɛ?
14 Ani obaanyɛ ohe nɛkɛ Nyɔŋmɔ shiwooi nɛɛ fɛɛ oye? Hɛɛ, obaanyɛ. Obaanyɛ onu he tamɔ bɔ ni Yoshua ni sheɔ Nyɔŋmɔ gbeyei lɛ nu he lɛ beni ekɛɛ: “Nibii kpakpai fɛɛ ni Yehowa, nyɛ-Nyɔŋmɔ lɛ wie yɛ nyɛhewɔ lɛ, ekome folo ekaaa shi, fɛɛ eba mli ehanyɛ, emli ekome folo ekaaa shi.” (Yoshua 23:14) Yɛ anɔwale mli lɛ, obaanyɛ okɛ ohe fɛɛ afɔ Nyɔŋmɔ shiwooi lɛ anɔ, ejaakɛ nɔ ni ekɛɔ lɛ ji anɔkwale lɛ, ni ebaaba mli anɔkwale, ni efeŋ efolo.—Yesaia 46:9-11.
15. Mɛɛ su ni yɔɔ je nɛŋ Nyɔŋmɔ tsuji kpooɔ?
15 Biblia lɛ tsɔɔ faŋŋ akɛ anɔkwale yɛ, etsɔɔ nɔ ni eji, he ni eyɔɔ kɛ mɛi ni yɔɔ enɛ. Sanebimɔ kɛha wɔteŋ mɔ fɛɛ mɔ ji akɛ: Ani oosumɔ anɔkwale lɛ lɛlɛŋ? Mɛi komɛi baakɛɛ akɛ, ‘Ojogbaŋŋ, ani jeee mɛi pii sumɔɔ anɔkwale lɛ?’ Dabi, ejaakɛ Yesu kɛɛ akɛ gbɛ ni kɛ mɔ yaa naanɔ wala mli lɛ yɛ fintɔŋŋ ni kɛ akɛaato he lɛ, mɛi fioo ko nyiɛ nɔ. (Mateo 7:13, 14) Adesai ni yɔɔ wala mli ŋmɛnɛ lɛ ateŋ mɛi ni fa nuɔ he tamɔ bɔ ni Biblia lɛ tsɔɔ mli yɛ Hiob 21:14-16 lɛ: “Jee wɔnɔ ejaakɛ wɔtaooo ogbɛ̀i lɛ wɔle! Namɔ ji Ofe lɛ, ni wɔɔsɔmɔ lɛ, ni kɛ wɔkpa lɛ fai hu, mɛni wɔbaaná yɛ mli?” Shi Hiob kɛɛ, “Mɛi fɔji aŋaawoo lɛ akagbale mi fɔɔŋfɔ!” Gbɛ ni amɛtsɔɔ nɔ amɛsusuɔ nii ahe lɛ damɔɔɔ anɔkwale lɛ nɔ, shi moŋ edamɔ Satan amale akɛ kɛ adesai ye amɛhe kɛjɛ Nyɔŋmɔ he lɛ eeehi aha amɛ lɛ nɔ.
16. Mɛni hewɔ wɔbaanyɛ wɔna nɔmimaa akɛ mɔ fɛɛ mɔ ni taoɔ anɔkwale lɛ lɛlɛŋ lɛ baana lɛ?
16 Mɔ fɛɛ mɔ ni taoɔ anɔkwale lɛ lɛlɛŋ ni ebiɔ Nyɔŋmɔ ni eye ebua lɛ lɛ baana, abaanyiɛ ehiɛ kɛya enɛ he. He ni eyɔɔ kɛ nɔ̃ shihilɛ mli ni eyɔɔ lɛ kɔɔɔ he eko. Mɛni hewɔ? Ejaakɛ, yɛ be mli ni Yehowa kɛ etsuji anɔkwafoi ni yɔɔ shikpɔŋ nɔ lɛ tsuɔ nii ni amɛshiɛɔ Maŋtsɛyeli lɛ he sanekpakpa lɛ dani naagbee lɛ aba lɛ, mɛi ni sumɔɔ anɔkwale lɛ ni ataoɔ amɛ nɛɛ ahe nitsumɔ lɛ jeee adesa nitsumɔ ko kɛkɛ. Ŋwɛi Maŋtsɛ Yesu Kristo kɛ ŋwɛibɔfoi asafoi ni yɔɔ hewalɛ lɛ hɔ sane nɛɛ ni ashiɛɔ yɛ jeŋ muu fɛɛ kɛ hewalɛ ni yaa hiɛ babaoo lɛ sɛɛ.—Mateo 25:31, 32; Kpojiemɔ 14:6, 7.
17. Kɛ mɔ ko miitao anɔkwale lɛ lɛlɛŋ lɛ, mɛni esa akɛ efee?
17 Nibii agbɛjianɔtoo muu ko miihe aba naagbee. Kɛji akɛ oosumɔ anɔkwale lɛ lɛlɛŋ ni oosumɔ ni oya nɔ ohi shi lɛ, belɛ esa akɛ ojie enɛ kpo otsɔɔ Nyɔŋmɔ kɛ gbɔmɔ. Taomɔ Nyɔŋmɔ Wiemɔ lɛ mli anɔkwale nilee. Okɛ ewebii lɛ akpe. “Yaa nɔ otao maŋtsɛyeli lɛ kɛ ejalɛ lɛ tsutsu.”—Mateo 6:33; Yohane 17:3, Hebribii 10:24, 25.
18. Mɛɛ sɛɛnamɔi mɛi ni hiɔ shi yɛ anɔkwale lɛ naa lɛ anine shɛɔ nɔ bianɛ po?
18 Yɛ be mli ni ofeɔ nakai lɛ, obaana he sɛɛ babaoo bianɛ po. Mɛi ni kaseɔ anɔkwale lɛ ni amɛhiɔ shi yɛ naa lɛ naa jwɛŋmɔŋ kɛ henumɔŋ heyeli babaoo, ejaakɛ amɛle nɔ hewɔ ni be nɛɛ ehiii kwraa nakai kɛ nɔ ni yɔɔ wɔsɛɛ be hu. Agbɛnɛ hu amɛye amɛhe kɛjɛ gbɔmɛi ni yɔɔ je nɛŋ Iɛ ayaka shihilɛ ni amɛdiɔ heloo gbɛfaŋ nibii asɛɛ babaoo, shi amɛbaalaaje fɛɛ yɛ be mli ni gbɛjianɔtoo nɛɛ aaaba naagbee lɛ he. (1 Yohane 2:15-17) Hejɔlɛ kpele hu baa, yɛ jamɔ mli tɔmɔi ni áha mɔ eye ehe kɛjɛ mli lɛ hewɔ.
19. Kɛ oyɛ suɔmɔ kɛha anɔkwale lɛ mɛni obaafee?
19 Ani oyɛ suɔmɔ diɛŋtsɛ kɛha anɔkwale lɛ? Belɛ obaasumɔ Nyɔŋmɔ anɔkwafo lɛ. Obaasumɔ anɔkwalei ni yɔɔ naakpɛɛ ni kɔɔ e-Maŋtsɛyeli nɔyeli lɛ he ni ejieɔ lɛ kpo lɛ. Obaasumɔ egbɛjianɔtoo ni anaa ni yɔɔ shikpɔŋ nɔ, ni gbɔmɛi ni ebuaa amɛnaa kɛha yiwalaheremɔ yɔɔ mli lɛ. (Yesaia 2:2-4) Oŋmɛŋ gbɛ ni nɔ ko ni yɔɔ ŋwɛi loo shikpɔŋ nɔ atsi onaa koni okɛ anɔkwayeli akasɔmɔ Nyɔŋmɔ anɔkwafo lɛ ni baanyɛ atsɔ enɔkwale lɛ nɔ eha oye ohe lɛ.—Yohane 8:31, 32.a
[Shishigbɛ niŋmai]
a Ajie kɛjɛ April 15, 1983 Blɔfo Buu-Mɔɔ lɛ mli.
Ani obaanyɛ oha sanebimɔi nɛɛ ahetoo?
□ Mɛɛ gbɛ Yehowa baanyɛ atsɔ nɔ ni ekɛ anɔkwale heyeli abaha adesai?
□ Mɛni jeŋ nɔyeli kome baaji aha gbɔmɛi lɛ?
□ Mɛɛ odaseyeli ni yɔɔ wala mli tsɔɔ akɛ anɔkwale toiŋjɔlɛ baafee nɔ ni yɔɔ diɛŋtsɛ yɛ Maŋtsɛyeli nɔyeli lɛ shishi?
□ Mɛɛ sɔrɔtofeemɔ baahi shi yɛ nitsumɔ mli yɛ gbɛjianɔtoo nɛɛ kɛ Gbɛjianɔtoo Hee lɛ mli?
□ Mɛni hewɔ wɔbaanyɛ wɔhe wɔye akɛ abaanyiɛ mɛi ni taoɔ anɔkwale lɛ lɛlɛŋ lɛ ahiɛ kɛya he lɛ?
[Mfoniri ni yɔɔ baafa 17]
Mɛi ni jeɔ gbɛjianɔtoo nɛɛ naagbee lɛ mli lɛ kɛ ‘amɛklantei esɔ kɔji momo’
[Mfoniri ni yɔɔ baafa 19]
Gbɔmɛi baana miishɛɛ babaoo yɛ nitsumɔi kpakpai ni atsuɔ yɛ shihilɛi kpakpai amli lɛ shishi yɛ Nyɔŋmɔ Gbɛjianɔtoo Hee lɛ mli