Wɔbaanyiɛ yɛ Yehowa Gbɛi Amli Kɛya Naanɔ!
“Wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ!”—MIKA 4:5.
1. Mɛɛ shɛɛ saji aŋmala yɛ Mika yitso 3 kɛyashi 5 lɛ mli?
YEHOWA yɛ nɔ ko ni ebaakɛɛ ewebii lɛ, ni ekɛ Mika miitsu nii akɛ egbalɔ. Eji Nyɔŋmɔ yiŋtoo akɛ efee nii eshi efɔŋfeelɔi lɛ. Ebaagbala Israel toi yɛ ehemɔkɛyeli kwamɔ lɛ hewɔ. Shi, miishɛɛ sane ji akɛ, Yehowa baajɔɔ mɛi ni nyiɛɔ yɛ egbɛi amli lɛ. Awie nɛkɛ shɛɛ saji nɛɛ ahe faŋŋ yɛ Mika gbalɛ lɛ yitso 3 kɛyashi 5 lɛ mli.
2, 3. (a) Mɛɛ su esa akɛ Israel hiɛnyiɛlɔi lɛ ajie lɛ kpo, shi mɛni diɛŋtsɛ ji nɔ ni amɛfeɔ lɛ? (b) Te obaatsɔɔ mfonirifeemɔŋ wiemɔi ni akɛtoɔ nii ahe ni akɛtsu nii yɛ Mika 3:2, 3 lɛ mli oha tɛŋŋ?
2 Nyɔŋmɔ gbalɔ lɛ jajeɔ akɛ: “Nyɛboa toi ko, nyɛ Yakob onukpai, kɛ nyɛ, Israel we lɛ lumɛi! Ani jeee nyɛgbɛnaa ji akɛ nyɛaale nɔ ni ja?” Hɛɛ, no ji nɔ ni akpaa amɛ gbɛ ni amɛfee, shi mɛni diɛŋtsɛ ji nɔ ni amɛfeɔ lɛ? Mika tsaa nɔ akɛ: “Nyɛnyɛ̃ɔ ekpakpa, ni nyɛsumɔɔ efɔŋ, nyɛjieɔ amɛhewolo kɛjɛɔ amɛhe kɛ amɛheloo hu kɛjɛɔ amɛwui ahe. Ni asaŋ nyɛyeɔ mimaŋbii lɛ aheloo, ni nyɛkpɔlɔɔ amɛhewolo kɛjɛɔ amɛhe, ni amɛwui lɛ tete nyɛkumɔɔ, ni nyɛfolɔɔ mli tamɔ nɔ ni akɛyaawo gbɛ́ mli, loo tamɔ loo ni yɔɔ kukwɛi mli.”—Mika 3:1-3.
3 Hiɛnyiɛlɔi lɛ miinyɛ ohiafoi lɛ, mɛi ni bɛ hefamɔ ko lɛ anɔ! Mɛi ni boɔ Mika toi lɛ nuɔ mfonirifeemɔŋ wiemɔi ni akɛtoɔ nii ahe ni akɛtsu nii yɛ biɛ lɛ shishi. Kɛ́ agbe too ni abaahoo lɛ, klɛŋklɛŋ lɛ, ashãa he ni no sɛɛ lɛ asaa. Bei komɛi lɛ, ajwaraa ewui lɛ amli bɔni afee ni nine ashɛ wuiaŋfɔ lɛ nɔ. Ahooɔ loo lɛ kɛ wui lɛ fɛɛ yɛ kukwɛi agbo ko ni tamɔ nɔ ni Mika tsĩ tã lɛ mli. (Ezekiel 24:3-5, 10) Kwɛ bɔ ni nɔkwɛmɔnɔ nɛɛ sa niseniianii ni gbɔmɛi ni hi shi yɛ Mika gbii lɛ amli lɛ naa yɛ amɛhiɛnyiɛlɔi ni yi wa lɛ adɛŋ!
Yehowa Miikpa Gbɛ akɛ Wɔɔye Jalɛ Sane
4. Mɛɛ srɔtofeemɔ yɔɔ Yehowa kɛ Israel hiɛnyiɛlɔi lɛ ateŋ?
4 Srɔtofeemɔ ko ni hɛleɔ mɔ shi yɛ Yehowa, ni ji Tookwɛlɔ ni yɔɔ suɔmɔ lɛ, kɛ Israel hiɛnyiɛlɔi lɛ ateŋ. Akɛni amɛyeee jalɛ sane hewɔ lɛ, amɛtsuuu nitsumɔ ni akɛwo amɛdɛŋ akɛ amɛbu tooi lɛ ahe lɛ. Yɛ no najiaŋ lɛ, amɛyeɔ mfonirifeemɔŋ tooi lɛ ahe nii, amɛyeee jalɛ sane amɛhaaa amɛ ni amɛkɛ amɛhe woɔ ‘láshishwiemɔ nifeemɔi’ amli taakɛ Mika 3:10 lɛ tsɔɔ lɛ. Mɛni wɔbaanyɛ wɔkase kɛjɛ shihilɛ nɛɛ mli?
5. Mɛni Yehowa kpaa gbɛ kɛjɛɔ mɛi ni nyiɛɔ hiɛ yɛ ewebii lɛ ateŋ lɛ adɛŋ?
5 Nyɔŋmɔ kpaa gbɛ akɛ mɛi ni nyiɛ hiɛ yɛ ewebii lɛ ateŋ lɛ baaye jalɛ sane. Enɛ ji nɔ ni wɔnaa akɛ eji anɔkwale yɛ Yehowa tsuji ahe ŋmɛnɛ. Agbɛnɛ hu, enɛ kɛ Yesaia 32:1 lɛ kpãa gbee, he ni wɔkaneɔ yɛ akɛ: “Naa, maŋtsɛ ko baaye maŋtsɛ yɛ jalɛ naa, ni lumɛi hu, baaye lumɛi yɛ kojomɔ naa.” Shi, mɛni wɔnaa yɛ Mika gbii lɛ amli? ‘Mɛi ni nyɛ̃ɔ ekpakpa, ni amɛsumɔɔ efɔŋ’ kã he amɛmiitsɔmɔ jalɛsaneyeli hiɛ amɛkɛmiibumɔ shi.
Namɔ Ahaa Esɔlemɔi Ahetoo?
6, 7. Mɛɛ sane oti ko ni he hiaa amaa nɔ mi yɛ Mika 3:4?
6 Ani Mika yinɔbii ni yi wa lɛ baanyɛ aná Yehowa nɔkpɛlɛmɔ? Eka shi faŋŋ akɛ dabi! Mika 3:4 kɛɔ akɛ: “Amɛaabolɔ amɛaatsɛ́ Yehowa, ni efoŋ amɛdaaŋ, shi moŋ ekɛ ehiɛ aaatee amɛ yɛ nakai be lɛ mli, taakɛ bɔ ni amɛfee efɔŋ yɛ amɛnifeemɔ nii amli lɛ.” Enɛ maa sane oti ko ni he hiaa waa nɔ mi.
7 Kɛ́ wɔfeɔ esha lɛ, no lɛ Yehowa haŋ wɔsɔlemɔi ahetoo. Enɛ ji anɔkwale kɛji akɛ wɔhiɛ jeŋbai enyɔ, ni wɔkɛ efɔŋ ni wɔfeɔ lɛ toɔ yɛ be mli ni wɔkwaa wɔfeɔ tamɔ nɔ ni wɔmiisɔmɔ Nyɔŋmɔ yɛ anɔkwale mli lɛ. Taakɛ Lala 26:4 lɛ tsɔɔ lɛ, David la akɛ: “Mikɛ yakayaka gbɔmɛi tarako shi, ni mikɛ osatofoi hu ebɔko.” Enyiɛ nɔŋŋ ni Yehowa baaha mɛi ni jeɔ gbɛ amɛkuɔ e-Wiemɔ lɛ mli lɛ asɔlemɔi lɛ ahetoo!
Nyɔŋmɔ Mumɔ lɛ Woɔ Wɔ Hewalɛ
8. Abɔ apasa gbalɔi ni hi shi yɛ Mika gbii lɛ amli lɛ kɔkɔ yɛ mɛni he?
8 Mɛɛ nifeemɔi ni yɔɔ nyaŋemɔ egbɛ eshwã Israel mumɔŋ hiɛnyiɛlɔi lɛ ateŋ nɛkɛ! Apasa gbalɔi lɛ ha Nyɔŋmɔ webii dũ gbɛ yɛ mumɔŋ. Hiɛnyiɛlɔi ni hiɛ jooɔ lɛ kɛɔ akɛ, “Omanye!” shi mɔ ni wooo amɛdaaŋ nɔ ko lɛ, amɛjeɔ ta amɛwoɔ lɛ. Yehowa kɛɔ akɛ: “Enɛ hewɔ lɛ, je aaana nyɛ, koni nyɛkana ninaa ko, ni duŋ aaawo nyɛ, koni nyɛkakla, ni hulu aaanyɔ shi yɛ gbalɔi lɛ anɔ, ni shwane aaatsɔ duŋ kpii yɛ amɛnɔ. Ni ninalɔi lɛ ahiɛ aaagboi, ni klamɔi lɛ ahiɛ aaashwie shi, ni amɛ fɛɛ kwa amɛaahàhàa amɛnaabui anɔ.”—Mika 3:5-7a.
9, 10. Ní ‘aaahàhàa naabui anɔ’ lɛ tsɔɔ mɛni, ni mɛni hewɔ ehe ehiaaa ni Mika afee nakai nɔ ko lɛ?
9 Mɛni hewɔ “amɛaahàhàa amɛnaabui anɔ” lɛ? Enɛ ji nɔ ko ni Mika yinɔbii ni yi wa lɛ feɔ kɛ́ hiɛgbele mɔ amɛ. Ni esa akɛ mɛi fɔji nɛɛ ahiɛ agboi. “Nyɔŋmɔ hetoo ko bɛ” kɛha mɛi fɔji nɛɛ. (Mika 3:7b) Yehowa booo mɛi fɛɛ ni feɔ efɔŋ ni amɛwoɔ amɛhe nɔ lɛ asɔlemɔi atoi.
10 Ehe ehiaaa ni Mika ‘ahà enaabu nɔ.’ Ehiɛ gbooo. Yehowa haa esɔlemɔi lɛ ahetoo. Kadimɔ Mika 3:8 lɛ, he ni gbalɔ anɔkwafo lɛ kɛɔ yɛ akɛ: “Miyi obɔ̃ kɛ hewalɛ kɛ Yehowa Mumɔ lɛ kɛ kojomɔ kɛ ekãa sɔŋŋ.” Kwɛ bɔ ni Mika daa shi akɛ etee nɔ ‘eyi obɔ kɛ hewalɛ kɛ Yehowa mumɔ lɛ’ yɛ esɔɔmɔ ni ekɛ be babaoo kɛ anɔkwayeli tsu lɛ mli fɛɛ! Enɛ eha ená hewalɛ ‘koni ejaje Yakob mlatɔmɔ lɛ kɛ Israel he eshai lɛ etsɔɔ.’
11. Awoɔ gbɔmɛi hewalɛ koni amɛjaje Nyɔŋmɔ shɛɛ sane lɛ yɛ mɛɛ gbɛ nɔ?
11 Hewalɛ ni fe adesai anɔ̃ he miihia Mika bɔni afee ni enyɛ ejaje Nyɔŋmɔ kojomɔ shɛɛ sane lɛ. Yehowa mumɔ lɛ, loo nitsumɔ hewalɛ lɛ he miihia lɛ. Ni wɔ hu? Gbɛ pɛ ni wɔbaanyɛ wɔtsɔ nɔ wɔtsu wɔshiɛmɔ nitsumɔ lɛ ji kɛtsɔ Yehowa mumɔ krɔŋkrɔŋ lɛ ni ekɛaawaje wɔ lɛ nɔ. Kɛ́ wɔjɛ wɔsuɔmɔ mli wɔfee esha lɛ, no lɛ mɔdɛŋ ni wɔbɔɔ yɛ shiɛmɔ nitsumɔ lɛ mli lɛ baafee efolo kwraa. Kɛ́ eba lɛ nɛkɛ lɛ, Nyɔŋmɔ nyɛŋ aha sɔlemɔ ni wɔsɔleɔ koni ewo wɔ hewalɛ ni wɔkɛtsu nitsumɔ nɛɛ hetoo. Wɔnyɛŋ wɔjaje wɔŋwɛi Tsɛ lɛ kojomɔ shɛɛ sane lɛ wɔtsɔɔ akɛ ja “Yehowa Mumɔ lɛ” yɛ wɔnɔ. Kɛtsɔ sɔlemɔi ni Nyɔŋmɔ boɔ toi kɛ mumɔ krɔŋkrɔŋ lɛ yelikɛbuamɔ nɔ lɛ, wɔnyɛɔ wɔkɛ ekãa jajeɔ Nyɔŋmɔ wiemɔ lɛ taakɛ Mika fee lɛ.
12. Mɛni hewɔ Yesu mra be mli kaselɔi lɛ nyɛ “amɛkɛ ekãa jaje Nyɔŋmɔ wiemɔ lɛ”?
12 Ekolɛ, okaiɔ sane ni yɔɔ Bɔfoi lɛ Asaji 4:23-31 lɛ. Ŋɔɔ lɛ akɛ, Yesu klɛŋklɛŋ afii 100 lɛ mli kaselɔi lɛ ateŋ mɔ kome ji bo. Yiwalɔi ni eye jamɔ he sɛkɛ lɛ miitao ni Kristo sɛɛnyiɛlɔi lɛ amɔ amɛnaabu mli. Shi nɛkɛ anɔkwafoi nɛɛ sɔle amɛha amɛ-Nuŋtsɔ Maŋtsɛ lɛ, ni amɛkpa fai akɛ: “[Yehowa, NW], kwɛmɔ amɛhe gbeyei ni amɛwoɔ lɛ, ni oha otsuji lɛ kɛ ekãa [diɛŋtsɛ] ajaje owiemɔ lɛ.” Mɛni jɛ mli kɛba? Beni amɛsɔle lɛ, he ni amɛnaa ebakpe shi yɛ lɛ hoso, ni mumɔ krɔŋkrɔŋ yimɔ amɛ fɛɛ amɛmli obɔbɔ, ni amɛkɛ ekãa jaje Nyɔŋmɔ wiemɔ lɛ. No hewɔ lɛ, eba akɛ wɔbaaya Yehowa ŋɔɔ yɛ sɔlemɔ mli, ni wɔkɛ wɔhiɛ afɔ̃ emumɔ krɔŋkrɔŋ lɛ nɔ yɛ be mli ni wɔtsuɔ wɔsɔɔmɔ nitsumɔ lɛ he nii lɛ.
13. Mɛni baaba Yerusalem kɛ Samaria nɔ, ni mɛni hewɔ?
13 Susumɔ Mika gbii lɛ ahe ekoŋŋ okwɛ. Taakɛ Mika 3:9-12 lɛ tsɔɔ lɛ, nɔyelɔi ni amɛye lá yi sɔ̃ lɛ kojoɔ yɛ nyɔɔŋnii hewɔ, ni osɔfoi lɛ heɔ amɛnitsɔɔmɔ lɛ he nyɔmɔwoo, ni apasa gbalɔi lɛ yeɔ ŋkunyaa yɛ shika hewɔ. Ebɛ naakpɛɛ akɛ Nyɔŋmɔ ewo akpɔ akɛ Yuda maŋtiase, ni ji Yerusalem “aaatsɔ̃ koikoi”! Akɛni apasa jamɔ kɛ jeŋba shara ehe shi hu yɛ Israel hewɔ lɛ, akɛ mumɔ tsirɛ Mika koni ebɔ kɔkɔ akɛ Nyɔŋmɔ baaha Samaria afee “koikoi.” (Mika 1:6) Yɛ anɔkwale mli lɛ, gbalɔ lɛ hi shi ni ena Samaria hiɛkpatamɔ ni agba afɔ̃ shi ni Ashur asraafoi lɛ kɛba enɔ yɛ afi 740 D.Ŋ.B. lɛ. (2 Maŋtsɛmɛi 17:5, 6; 25:1-21) Eyɛ faŋŋ akɛ, Yehowa hewalɛ nɔ pɛ abaanyɛ atsɔ ni akɛ shɛɛ saji ni mli wawai ni akɛshiɔ Yerusalem kɛ Samaria lɛ aha.
14. Mɛɛ gbɛ nɔ gbalɛ ni aŋma afɔ shi yɛ Mika 3:12 lɛ na emlibaa, ni te esa akɛ no asa wɔhe aha tɛŋŋ?
14 Eka shi faŋŋ akɛ Yuda nyɛŋ aje Yehowa fɔbuu kojomɔ lɛ mli. Yɛ gbalɛ ni aŋma afɔ̃ shi yɛ Mika 3:12 lɛ mlibaa naa lɛ, “aaahu” Zion “tamɔ ahuɔ ŋmɔ.” Kɛ́ wɔkwɛ nii kɛjɛ wɔŋmɛnɛŋmɛnɛ beaŋ afii ohai 21 nɛɛ mli lɛ, wɔle akɛ nɛkɛ nibii nɛɛ ba beni Babilonbii bakpata Yuda kɛ Yerusalem hiɛ yɛ afi 607 D.Ŋ.B. lɛ. Enɛ ba mli yɛ be mli ni Mika egba afii komɛi asɛɛ, shi ená nɔmimaa akɛ ebaaba. Ekã shi faŋŋ akɛ, esa akɛ wɔ hu wɔná nɔmimaa akɛ nibii agbɛjianɔtoo fɔŋ nɛɛ baaba naagbee yɛ be ni agba afɔ̃ shi lɛ mli yɛ “Yehowa gbi” lɛ mli.—2 Petro 3:11, 12.
Yehowa Jajeɔ Saji
15. Te obaatsɔɔ gbalɛ ni aŋma afɔ̃ shi yɛ Mika 4:1-4 lɛ mli yɛ bo diɛŋtsɛ owiemɔ mli oha tɛŋŋ?
15 Kɛ́ wɔsusu nɔ ni tee nɔ yɛ nakai beaŋ lɛ he lɛ, wɔnaa akɛ no sɛɛ lɛ, Mika wie hiɛnɔkamɔ he shɛɛ sane ko ni ŋɔɔ he. Mɛɛ wiemɔi ni woɔ mɔ hewalɛ wɔnaa yɛ Mika 4:1-4 lɛ nɛkɛ! Nɔ ni Mika kɛɛ lɛ fã ko kɛɔ akɛ: “Aaaba mli akɛ naagbee gbii lɛ amli lɛ Yehowa we gɔŋ lɛ aaama shi yɛ gɔji lɛ ayiteaŋ, ni aaawó enɔ fe gɔŋkpɔi lɛ; ni majimaji aaaho kɛaaba he. . . . Ni eeekojo maji pii ateŋ, ni eeekã jeŋmaji agboi ahiɛ kɛaatee shɔŋŋ; ni amɛkɛ amɛklantei aaasɔ̃ kɔii, ni amɛkɛ amɛkpɔlɔi lɛ hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ! Ni mɔ fɛɛ mɔ aaata eweintso kɛ egbamitso shishi, ni mɔ ko woŋ amɛhe gbeyei; ejaakɛ Yehowa Zebaot naabu wie.”
16, 17. Mika 4:1-4 lɛ miiná emlibaa ŋmɛnɛ yɛ mɛɛ gbɛ nɔ?
16 Namɛi ji “maji pii” kɛ “jeŋmaji agboi” ni atsĩ tã yɛ biɛ lɛ? Amɛjeee maji kɛ je nɛŋ nɔyelii lɛ. Nɔ ni tamɔɔɔ nakai lɛ, gbalɛ lɛ kɔɔ aŋkroaŋkroi ni jɛ maji fɛɛ mli ní amrɔ nɛɛ amɛ́fee ekome yɛ jamɔ krɔŋŋ mli yɛ Yehowa anɔkwa jamɔ gɔŋ lɛ mli lɛ ahe.
17 Yɛ Mika gbalɛ lɛ kɛ gbeekpamɔ naa lɛ, etsɛŋ ni abaatsu Yehowa jamɔ krɔŋŋ he nii yɛ je lɛŋ fɛɛ. Ŋmɛnɛ, aatsɔɔ mɛi ni “ajie ato naanɔ wala lɛ” anii yɛ Yehowa gbɛ̀i anɔ. (Bɔfoi lɛ Asaji 13:48 ) Yehowa kɛ kojomɔ miiha, ni eekudɔ nibii jogbaŋŋ yɛ mumɔŋ kɛha heyelilɔi ni fiɔ Maŋtsɛyeli lɛ sɛɛ lɛ. Amɛyi baaná wala yɛ “amanehulu kpeteŋkpele” lɛ mli ákɛ mɛi ni fata “asafo babaoo” lɛ he. (Kpojiemɔ 7:9, 14) Amrɔ nɛɛ po ni amɛkɛ amɛklantei esɔ̃ kɔii nɛɛ, amɛkɛ amɛnanemɛi Yehowa Odasefoi lɛ kɛ mɛi krokomɛi hiɔ shi yɛ toiŋjɔlɛ mli. Kwɛ miishɛɛ ni eji akɛ ofata amɛhe!
Wɔtswa Wɔfai Shi akɛ Wɔbaanyiɛ yɛ Yehowa Gbɛi Amli
18. Ní ‘mɔ aaata lɛ diɛŋtsɛ egbamitso kɛ eweintso shishi lɛ’ feɔ mɛni he mfoniri?
18 Yɛ wɔgbii nɛɛ ni gbeyeishemɔ ehà shikpɔŋ lɛ nɔ tamɔ atatu nɛɛ, wɔnáa miishɛɛ diɛŋtsɛ akɛ mɛi babaoo miikase Yehowa gbɛ̀i lɛ. Wɔmiikpa be ni ebɛŋkɛ kpaakpa, be mli ni jeee akɛ mɛi fɛɛ ni sumɔɔ Nyɔŋmɔ lɛ ekaseŋ tawuu dɔŋŋ kɛkɛ shi moŋ, amɛbaata amɛ diɛŋtsɛ amɛ agbamitsei kɛ weintsei ashishi lɛ gbɛ. Bei pii lɛ, adũɔ agbamitsei yɛ weintromii amli. (Luka 13:6) Ní mɔ ko aaata lɛ diɛŋtsɛ egbamitso kɛ eweintso shishi lɛ feɔ toiŋjɔlɛ, shweremɔ, kɛ shweshweeshwe shihilɛ he mfoniri. Amrɔ nɛɛ po lɛ, wɔkɛ Yehowa teŋ wekukpaa lɛ haa wɔnáa jwɛŋmɔŋ toiŋjɔlɛ kɛ mumɔŋ shweshweeshwe shihilɛ. Kɛ́ nakai shihilɛ lɛ ba Maŋtsɛyeli nɔyeli lɛ shishi lɛ, wɔsheŋ gbeyei, ni wɔbaahi shi shweshweeshwe.
19. Ní aaanyiɛ yɛ Yehowa gbɛi amli lɛ tsɔɔ mɛni?
19 Bɔni afee ni wɔná Nyɔŋmɔ nɔkpɛlɛmɔ kɛ jɔɔmɔ lɛ, esa akɛ wɔnyiɛ yɛ Yehowa gbɛi amli. Awie enɛ he jogbaŋŋ yɛ Mika 4:5, he ni gbalɔ lɛ jajeɔ yɛ akɛ: “Majimaji lɛ fɛɛ ateŋ mɔ fɛɛ mɔ nyiɛɔ yɛ enyɔŋmɔ gbɛi amli; shi wɔ lɛ wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ!” Ní wɔɔnyiɛ yɛ Yehowa gbɛi amli lɛ etsɔɔɔ kɛɛmɔ ni wɔɔkɛɛ akɛ lɛ ji wɔ-Nyɔŋmɔ kɛkɛ. Ebiɔ babaoo fe wɔhe ni wɔkɛaawo Kristofoi akpeei amli kɛ Maŋtsɛyeli shiɛmɔ nitsumɔ mli, eyɛ mli moŋ akɛ nakai nitsumɔi lɛ hu ahe miihia waa. Kɛ́ wɔmiinyiɛ yɛ Yehowa gbɛi amli lɛ, no lɛ wɔjɔɔ wɔhe nɔ wɔha lɛ ni wɔmiibɔ mɔdɛŋ koni wɔjɛ suɔmɔ ni jɛ wɔsusuma muu fɛɛ mli wɔsɔmɔ lɛ yɛ anɔkwale mli. (Mateo 22:37) Ni ákɛ ejálɔi lɛ, wɔtswa wɔfai shi akɛ wɔbaanyiɛ yɛ Yehowa, wɔ-Nyɔŋmɔ lɛ gbɛi amli kɛaatee naanɔi anaanɔ.
20. Mɛni agba afɔ̃ shi yɛ Mika 4:6-13?
20 Agbɛnɛ, ofainɛ susumɔ gbalɛ mli wiemɔi ni yɔɔ Mika 4:6-13 lɛ he okwɛ. Esa akɛ “Zion biyoo lɛ” aya nomŋɔɔ mli yɛ “Babel tɔ̃ɔ.” Enɛ ji nɔ ni ba mɛi ni yɔɔ Yerusalem lɛ anɔ yɛ afii 700 D.Ŋ.B. lɛ. Ni kɛlɛ, Mika gbalɛ lɛ tsɔɔ akɛ shwɛɛnii ko baaku amɛsɛɛ kɛya Yuda, ni akɛ, beni asaa atswa Zion ama shi ekoŋŋ sɛɛ lɛ, Yehowa baakwɛ koni akpata ehenyɛlɔi lɛ ahiɛ.
21, 22. Te fee tɛŋŋ ni Mika 5:1 ba mli?
21 Mika yitso 5 lɛ gbaa nibii krokomɛi ni yɔɔ naakpɛɛ he sane. Ákɛ nɔkwɛmɔnɔ lɛ, kadimɔ nɔ ni akɛɛ yɛ Mika 5:1-3 lɛ. Mika gba akɛ Nɔyelɔ ni Nyɔŋmɔ ehala lɛ—mɔ ni “ekpojeei jɛ blema beebe”—lɛ baajɛ Betlehem. Ebaaye nɔ akɛ tookwɛlɔ “yɛ Yehowa hewalɛ” mli. Kɛfata he lɛ, nɛkɛ Nɔyelɔ nɛɛ baaje agbo, jeee yɛ Israel pɛ kɛkɛ, shi moŋ “kɛyashi shikpɔŋ lɛ naagbeehei lɛ.” Mɔ ni eji lɛ baanyɛ aha je lɛ yiŋ afutu lɛ, shi ejeee teemɔŋ sane kɛha wɔ.
22 Namɔ ji gbɔmɔ ni he hiaa fe fɛɛ ni afɔ́ pɛŋ yɛ Betlehem? Ni namɔ ‘aaaje agbo kɛyashi shikpɔŋ lɛ naagbeehei lɛ’? Jeee mɔ ko mɔ ko fe Mesia lɛ, ni ji Yesu Kristo! Beni Herode Kpeteŋkpele lɛ bi osɔfonukpai kɛ woloŋmalɔi lɛ he ni abaafɔ́ Mesia lɛ yɛ lɛ, amɛha hetoo akɛ: “Betlehem yɛ Yudea.” Amɛtsɛ́ wiemɔi ni yɔɔ Mika 5:1 lɛ mli wiemɔi lɛ ayisɛɛ po. (Mateo 2:3-6) Gbɔmɛi foji lɛ ateŋ mɛi komɛi hu le enɛ, ejaakɛ Yohane 7:42 tsɛ amɛwiemɔi ayisɛɛ akɛ: “Ani ŋmalɛ lɛ ekɛɛɛ akɛ: David seshi lɛ mli kɛ Betlehem maŋ, he ni David hi lɛ, jɛi Kristo lɛ baajɛ?”
Anɔkwa Miishɛjemɔ Kɛha Gbɔmɛi Lɛ
23. Mɛni ji nɔ ni yaa nɔ amrɔ nɛɛ kɛha Mika 5:6 lɛ mlibaa?
23 Mika 5:4-14 lɛ wieɔ Ashur tutuamɔ ni baaye omanye be fioo lɛ he, ni etsɔɔ akɛ Nyɔŋmɔ baatɔ owele yɛ maji ni gbo enɔ toi lɛ anɔ. Mika 5:6 lɛ kɛ shiwoo kɛha Yudafoi shwɛɛnii anɔkwafoi ni shwa amɛhe kɛjɛ amɛhe eshai amli ni baaku amɛsɛɛ kɛba amɛshikpɔŋ nɔ lɛ ha, shi nɛkɛ wiemɔi nɛɛ kɔɔ wɔgbii nɛɛ hu he. Mika jajeɔ akɛ: “Yakob shwɛɛnɔ lɛ aaatsɔ tamɔ bɔ́ ni jɛ Yehowa ŋɔɔ yɛ majimaji pii ateŋ, tamɔ futufuli ni shwãa jwɛi nɔ.” Akɛ okadi ni suɔmɔ yɔɔ mli nɛɛ tsu nii ni akɛgba akɛ mumɔŋ Yakob, loo Israel shwɛɛnii lɛ baafee jɔɔmɔ ni Nyɔŋmɔ kɛbaaba gbɔmɛi lɛ anɔ. Yesu “tooi krokomɛi,” ní yɔɔ shikpɔŋ nɔ hiɛnɔkamɔ lɛ yɛ miishɛɛ akɛ amɛkɛ ŋmɛnɛŋmɛnɛ beaŋ “Nyɔŋmɔ Israel” shwɛɛnii lɛ aaatsu nii kɔŋ kɛ kɔŋ, ni amɛye amɛbua ni akɛ mumɔŋ miishɛɛ abaha mɛi krokomɛi. (Yohane 10:16; Galatabii 6:16; Zefania 3:9) Enɛ hewɔ lɛ, oti ko ni he hiaa yɛ ni esa akɛ asusu he. Ákɛ Maŋtsɛyeli jajelɔi lɛ, esa akɛ wɔ fɛɛ wɔbu hegbɛ ni wɔná akɛ wɔkɛ anɔkwa miishɛɛ aaaha mɛi krokomɛi lɛ akɛ nɔ ni jara wa.
24. Mɛɛ saji otii komɛi ni yɔɔ Mika yitso 3 kɛyashi 5 lɛ ena onɔ hewalɛ?
24 Mɛni okase kɛjɛ Mika gbalɛ lɛ mli kɛjɛ yitso 3 kɛyashi 5 lɛ? Ekolɛ otii tamɔ enɛɛmɛi: (1) Nyɔŋmɔ miisumɔ ni mɛi ni nyiɛɔ hiɛ yɛ ewebii ateŋ lɛ aye jalɛ sane. (2) Yehowa haŋ wɔsɔlemɔi ahetoo kɛji wɔjɛ wɔsuɔmɔ mli wɔfee esha. (3) Wɔbaanyɛ wɔtsu wɔshiɛmɔ nitsumɔ lɛ he nii kɛji Nyɔŋmɔ waje wɔ kɛtsɔ emumɔ krɔŋkrɔŋ lɛ pɛ nɔ. (4) Bɔni afee ni wɔná ŋwɛi nɔkpɛlɛmɔ lɛ, esa akɛ wɔnyiɛ yɛ Yehowa gbɛi amli. (5) Ákɛ Maŋtsɛyeli jajelɔi lɛ, esa akɛ wɔbu hegbɛ ni wɔyɔɔ akɛ wɔkɛ anɔkwa miishɛɛ baaha gbɔmɛi lɛ akɛ nɔ ni jara wa. Ekolɛ, otii krokomɛi ená onɔ hewalɛ. Mɛɛ nɔ̃ kroko hu wɔbaanyɛ wɔkase kɛjɛ nɛkɛ Biblia mli gbalɛ wolo nɛɛ mli? Nikasemɔ ni nyiɛ sɛɛ lɛ baaye abua wɔ koni wɔkase nii kɛjɛ naagbee yitsei enyɔ ni yɔɔ Mika gbalɛ ni woɔ mɔ hemɔkɛyeli mli hewalɛ lɛ mli?
Te Obaaha Hetoo Oha Tɛŋŋ?
• Mɛni Nyɔŋmɔ kpaa gbɛ akɛ mɛi ni nyiɛɔ ewebii lɛ ahiɛ lɛ baafee?
• Mɛni hewɔ sɔlemɔ kɛ mumɔ krɔŋkrɔŋ lɛ he hiaa yɛ sɔɔmɔ ni wɔkɛhaa Yehowa lɛ mli lɛ?
• Gbɔmɛi ‘nyiɛɔ yɛ Yehowa gbɛi amli’ yɛ mɛɛ gbɛ nɔ?
[Mfoniri ni yɔɔ baafa 15]
Ani obaanyɛ otsɔɔ Mika nɔkwɛmɔnɔ ni kɔɔ kukwɛi he lɛ mli?
[Mfonirii ni yɔɔ baafa 16]
Taakɛ Mika ji lɛ, wɔkɛ ekãa tsuɔ wɔsɔɔmɔ nitsumɔ lɛ