Wɔ Bɔlɔ Kpeteŋkpele Lɛ Ni Wɔkɛ Lɛ Aaakwɛ Tooi Lɛ
“Yehowa ji mi-Kwɛlɔ, nɔ ko nɔ ko ehiaŋ mi. Ehaa mitsui nyɔɔ mimli. Ekpalaa mi kɛtsɔɔ jalɛ gbɛi anɔ yɛ egbɛi lɛ ahewɔ.”—LALA 23:1, 3.
1. Mɛɛ hejɔɔmɔ ni tsɔɔ suɔmɔ Yehowa haa wɔnaa?
“LALA 23, ni ji “David lala” lɛ eha susumai pii ni etɔ amɛ lɛ hejɔɔmɔ. Ewo amɛ hewalɛ ni amɛna hekɛnɔfɔɔ ni ewie he yɛ La 23 Kuku 6 lɛ, akɛ: Lɛŋlɛŋ ekpakpa kɛ mɔbɔnalɛ aaanyiɛ misɛɛ yɛ miwala gbii lɛ fɛɛ mli; ni masaa mahi shi yɛ Yehowa we lɛ, miwala gbii abɔ fɛɛ.” Ani nakai otaoɔ, akɛ ooohi shi yɛ Yehowa we kɛha ejamɔ lɛ owala gbii abɔ fɛɛ, ni okɛ ewebii ni amrɔ nɛɛ abuaa amɛnaa kɛjɛɔ shikpɔŋ nɔ jeŋmaji fɛɛ amli lɛ afee ekome? “Nyɛsusumai alɛlɔ kɛ nɔkwɛlɔ,” wɔ Bɔlɔ kpeteŋkpele, Yehowa Nyɔŋmɔ baaye abua bo ni onine ashɛ nakai oti lɛ nɔ.—1 Petro 2:25.
2, 3. (a) Yehowa jɛɔ suɔmɔ mli ekwɛɔ ewebii anɔ yɛ mɛɛ gbɛ nɔ? (b) Yehowa “tooku” lɛ eshwere oyayaayai waa yɛ mɛɛ gbɛ nɔ?
2 “Ŋwɛi hee kɛ shikpɔŋ hee” lɛ Bɔlɔ lɛ hu nɔŋŋ ji Kristofoi asafo, ni ji “Nyɔŋmɔ we” lɛ Gbɛjianɔtolɔ kɛ e-Nɔkwɛlɔ kpele. (2 Petro 3:13; 1 Timoteo 3:15) Enaa ewebii anɔkwɛmɔ he miishɛɛ waa, taakɛ Yesaia 40:10, 11 jajeɔ yɛ faŋŋ mli lɛ: “Naa! Nuŋtsɔ Yehowa miiba kɛ hewalɛ, ni enine lɛ aaaye nɔ aha lɛ; naa, ehiɛ enyɔmɔwoo lɛ kɛmiiba, ni enajiaŋtoo lɛ nyiɛ ehiɛ. Eeelɛ etooku lɛ tamɔ tookwɛlɔ; eeehiɛ etoobii lɛ yɛ ekpɔkɔiaŋ, ni eeehole amɛ eshaka etsitsi, ni toonyɛmɛi lɛ hu, eeekpala amɛ blɛoo.”
3 Yɛ shishinumɔ ni mli lɛɛ naa lɛ, mɛi ni fata nɛkɛ “tooku” nɛɛ he ji mɛi ni kɛ afii babaoo enyiɛ Kristofoi anɔkwale lɛ mli lɛ kɛ “toobii” ni abua amɛnaa yɛ nyɛsɛɛ be kukuoo nɛɛ mli—tamɔ mɛi babaoo ni abaptisiɔ amɛ amrɔ nɛɛ yɛ Afrika kɛ Europa Bokagbɛ lɛ nɛkɛ. Yehowa niji ni mli wa, ni buɔ mɔ he lɛ buaa amɛnaa eshakãa etsitsi. Eyɛ mli akɛ tsutsu lɛ amɛtamɔ tooi ni elaaje moŋ, shi amrɔ nɛɛ amɛba amɛkɛ amɛ-Nyɔŋmɔ kɛ Tookwɛlɔ ni yɔɔ suɔmɔ lɛ teŋ wekukpaa ni mli wa mli.
Yehowa Hefatalɔ Tookwɛlɔ Lɛ
4, 5. (a) Namɔ ji “tookwɛlɔ kpakpa lɛ,” ni gbalɛ wie ehe yɛ mɛɛ gbɛ nɔ? (b) Mɛɛ mligbalamɔ nitsumɔ ko Yesu kwɛɔ nɔ, ni mɛni jɛɔ mli baa ni sa kadimɔ jogbaŋŋ?
4 Yɛ be mli ni esɔmɔɔ yɛ e-Tsɛ ninejurɔ nɔ yɛ ŋwɛi lɛ, belɛ “tookwɛlɔ kpakpa,” Yesu Kristo miijɛ musuŋtsɔlɛ mli hu eejwɛŋ “tooi” lɛ ahe. Ekɛ ewala ha koni klɛŋklɛŋ lɛ, ehe aba sɛɛnamɔ aha “asafoku bibioo” ni afɔ amɛ mu lɛ, kɛ agbɛnɛ, asafo babaoo ni ji “tooi krokomɛi” lɛ hu ŋmɛnɛ. (Luka 12:32; Yohane 10: 14, 16) Tookwɛlɔ kpeteŋkpele, Yehowa Nyɔŋmɔ kɛ tooi nɛɛ fɛɛ wie, ni ekɛɛ: “Naa, mi diɛŋtsɛ mibakojo . . . too kɛ too teŋ. Ni maŋɔ tookwɛlɔ kome mato amɛnɔ, ni eeelɛ amɛ, lɛ ji mitsulɔ David; lɛ eeelɛ amɛ, ni lɛ eeetsɔ tookwɛlɔ eha amɛ. Ni mi, Yehowa, matsɔ amɛ-Nyɔŋmɔ, ni mitsulɔ David aaafee lumɔ yɛ amɛteŋ; mi, Yehowa, miwie!”—Ezekiel 34:20-24.
5 Gbɛi ni ji “mitsulɔ David” ni akɛtsu nii lɛ kɔɔ Kristo Yesu, mɔ ni ji “seshi” ni baata David maŋtsɛsɛi lɛ nɔ lɛ he yɛ gbalɛ mli. (Lala 89:36, 37) Yehowa hefatalɔ Tookwɛlɔ kɛ Maŋtsɛ, Kristo Yesu, David Bi lɛ miiya nɔ eegbala adesai ateŋ “gwantɛŋi” lɛ amli kɛmiijɛ mɛi ni tsɛɔ amɛhe “gwantɛŋi,” shi amɛji “abotiai” moŋ diɛŋtsɛ lɛ amli, yɛ nɛkɛ jeŋmaji lɛ akojomɔ gbi nɛɛ nɔ. (Mateo 25:31-33) Atee nɛkɛ “tookwɛlɔ kome” nɛɛ shi hu koni elɛ tooi lɛ. Mɛɛ gbalɛ nɛɛ mlibaa ni yɔɔ nyam wɔnaa ŋmɛnɛ nɛkɛ! Beni maŋkwralɔi miiwie adesai ekomefeemɔ he, kɛtsɔ jeŋ gbɛjianɔtoo hee ko nɔ lɛ, belɛ Tookwɛlɔ kome lɛ miifee tooi ni jɛ jeŋmaji fɛɛ mli lɛ ekome diɛŋtsɛ kɛtsɔ shiɛmɔ he ta ni afa yɛ wiemɔi sɔrɔtoi amli, ni Nyɔŋmɔ gbɛjianɔtoo ni yɔɔ shikpɔŋ nɔ lɛ pɛ baanyɛ atsu he nii lɛ nɔ.
6, 7. “Tsulɔ anɔkwafo kɛ nilelɔ” lɛ ekwɛ ni tooi lɛ ena “ŋmaa yɛ be ni sa nɔ” yɛ mɛɛ gbɛ nɔ?
6 Yɛ be mli ni Maŋtsɛyeli shɛɛ sane lɛ yaa nɔ emli lɛɛɔ kɛyashɛɔ shikpɔŋkukuji heei amli lɛ, belɛ “tsulɔ anɔkwafo kɛ nilelɔ” ni ji Kristofoi ni afɔ amɛ mu, ni Tookwɛlɔ kome lɛ kɛ nitsumɔ ewo amɛdɛŋ lɛ miikwɛ koni ato gbɛjianɔ fɛɛ ni sa ni akɛha amɛ “ŋmaa yɛ be ni sa nɔ.” (Mateo 24:45) Buu Mɔɔ Asafo lɛ nitsumɔ he niji 33 ni akalaa woji yɛ mli yɛ shikpɔŋ lɛ nɔ fɛɛ lɛ miiha amɛnitsumɔ miiya hiɛ waa bɔni afee ni amɛkɛkpee Biblia kasemɔ he woji kɛ woji tɛtrɛbii babaoo ni hi hu lɛ ahe hiamɔ ni yaa hiɛ be fɛɛ be lɛ naa.
7 Yehowa Odasefoi a-Nɔyeli Kuu lɛ miifee nɔ fɛɛ nɔ ni eeenyɛ ni ekɛha wiemɔi ashishitsɔɔmɔ nitsumɔ lɛ aya hiɛ yɛ wiemɔi aaashɛ 200 mli, koni aje wiemɔi ashishitsɔɔmɔ hu shishi yɛ wiemɔi krokomɛi ni he hiaa amli ni akɛtsu jeŋ muu fɛɛ shikpɔŋkuku lɛ mli nii. Enɛ fiɔ nitsumɔ ni Yesu kɛha ekaselɔi lɛ yɛ Bɔfoi lɛ Asaji 1:8 lɛ sɛɛ, akɛ: “Kɛ mumɔ krɔŋkrɔŋ lɛ na ba nyɛnɔ lɛ, nyɛaana hewalɛ ni nyɛaatsɔmɔ midasefoi . . . kɛyashi shikpɔŋ lɛ naagbee hei lɛ.” Kɛfata he lɛ, amrɔ nɛɛ aatsɔɔ New World Translation of the Holy Scriptures, ni akala fɛɛ loo efai komɛi yɛ wiemɔi 14 mli momo lɛ shishi kɛmiiya Europa, Afrika kɛ Bokagbɛ bii awiemɔi krokomɛi 16 mli.
‘Nyɔŋmɔ Toiŋjɔlɛ Lɛ’ Mli Ŋɔɔmɔ Namɔ
8. Tooi lɛ ena jɔɔmɔi babaoo kɛtsɔ toiŋjɔlɛ kpaŋmɔ ni Yehowa kɛ amɛ efee lɛ nɔ yɛ mɛɛ gbɛ nɔ?
8 Yehowa tsɔɔ e-Tookwɛlɔ kome, Kristo Yesu nɔ ekɛ E-tooi ni alɛɔ amɛ jogbaŋŋ lɛ kpaŋɔ ‘toiŋjɔlɛ kpaŋmɔ ko.’ (Yesaia 54:10) Akɛni amɛnaa hemɔkɛyeli yɛ Yesu la ni afɔse ashwie shi lɛ mli hewɔ lɛ, ayeɔ abuaa tooi lɛ ni amɛnyiɛɔ yɛ la lɛ mli. (1 Yohane 1:7) Amɛnaa ‘Nyɔŋmɔ toiŋjɔlɛ ni fe jwɛŋmɔi fɛɛ, ni buɔ amɛtsuii kɛ amɛjwɛŋmɔi ahe kɛtsɔɔ Kristo Yesu nɔ’ lɛ mli ŋɔɔmɔ. (Filipibii 4:7) Taakɛ Ezekiel 34:25-28 yaa nɔ etsɔɔ mli lolo lɛ, Yehowa kpalaa etooi lɛ kɛyaboteɔ mumɔŋ paradeiso ni ji miishɛɛ shihilɛ ni yɔɔ shweshweeshwe, ni kɛ shweremɔ kɛ yibiiwoo baa yɛ hejɔlɛ mli lɛ mli. Nɛkɛ Tookwɛlɔ ni yɔɔ suɔmɔ nɛɛ wieɔ yɛ etooi lɛ ahe akɛ: “Ni‘amɛaana amɛle akɛ mi ji Yehowa lɛ, beni mikumɔ amɛ kɔŋtsei lɛ, ni mijie amɛ kɛjɛ mɛi ni yeɔ amɛ nyɔŋ lɛ adɛŋ lɛ. Ni amɛtsɔmɔŋ haanii amɛhaŋ wɔŋjalɔi lɛ dɔŋŋ; . . . ni amɛaahi shi shweshweeshwe, ni mɔ ko mɔ ko woŋ amɛhe gbeyei.”
9. Mɛɛ hegbɛi komɛi anaa egbele eha Nyɔŋmɔ webii kɛtsɔ ‘kɔŋtsei ni akumɔ’ lɛ nɔ?
9 Amrɔ nɛɛ, Yehowa Odasefoi ni yɔɔ maji pii anɔ lɛ ená “amɛ kɔŋtsei lɛ” akuumɔ mli niiashikpamɔ yɛ afii fioo ni eho nɛɛ amli. Amɛyɛ heyeli ni amɛkɛ-aashiɛ fe bei fɛɛ ni eho. Ni eba akɛ wɔteŋ mɔ fɛɛ mɔ, yɛ maŋ fɛɛ maŋ nɔ, kɛ shweshweeshwe shihilɛ ni Yehowa kɛhaa lɛ aaatsu nii yɛ gbɛ kpakpa nɔ beni wɔmiaa wɔhiɛ koni wɔgbe nitsumɔ lɛ naa lɛ. Ni mɛɛ nɔmimaa Yehowa haa wɔ nɛkɛ, beni wɔbɛŋkɛɔ amanehulu kpeteŋkpele ni baafe eko fɛɛ eko ni adesai ena pɛŋ da lɛ he lɛ! —Daniel 12:1; Mateo 24:21, 22.
10. Namɛi Yehowa kɛha koni amɛye amɛbua Tookwɛlɔ Kpakpa, Kristo Yesu, ni te bɔfo Paulo kɛ mɛnɛɛmɛi ateŋ mɛi komɛi wie ha tɛŋŋ?
10 Yehowa kɛ tookwɛlɔi bibii eha koni amɛye amɛbua Tookwɛlɔ Kpakpa, Kristo Yesu, ni akɛkwɛ tooku lɛ nɔ, ákɛ hesaamɔ kɛtoo kɛha nakai gbi ni ekɛbaatɔ ehe owele yɛ efɔŋfeelɔi anɔ lɛ. Awie mɛnɛɛmɛi ahe yɛ Kpojiemɔ 1:16 akɛ yibɔ ni eye emuu, ni ji “ŋulamii kpawo” ni Yesu hiɛ yɛ eninejurɔ. Bɔfo Paulo kɛ kuu ko ni feɔ nɛkɛ tookwɛlɔi bibii nɛɛ ahe mfoniri lɛ wie, yɛ klɛŋklɛŋ afii oha lɛ mli, ni ekɛɛ: “No hewɔ lɛ nyɛlea nyɛhe nɔkwɛmɔ kɛ tooiku lɛ fɛɛ ni mumɔ krɔŋkrɔŋ lɛ ewo nyɛ amɛ nɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ e-Bi lɛ la he lɛ.” (Bɔfoi lɛ Asaji 20:28, New World Translation)Ŋmɛnɛ, ayɛ tookwɛlɔi bibii nɛɛ akpei nyɔŋmai abɔ ni miisɔmɔ yɛ asafoi 69,558 amli yɛ shikpɔŋ lɛ nɔ fɛɛ.
Tookwɛlɔi Bibii ni Nyiɛ Hiɛ!
11. Tookwɛlɔi komɛi enyiɛ hiɛ yɛ omanyeyeli mli yɛ shikpɔŋkukuji ni atsuɔ mli nii waa lɛ amli yɛ mɛɛ gbɛ nɔ?
11 Yɛ hei pii lɛ, esa akɛ nɛkɛ tookwɛlɔi nɛɛ anyiɛ hiɛ yɛ shikpɔŋkukuji ni atsu nii yɛ mli shii abɔ yɛ naagbee gbii nɛɛ amli lɛ amli. Mɛɛ gbɛ nɔ amɛaatsɔ amɛha tooku lɛ mɔdɛŋbɔɔ mli awa be fɛɛ be? Nii ni tookwɛlɔi nɛɛ tsuɔ lɛ sa yijiemɔ waa, ni gbɛi ni amɛtsɔ nɔ amɛye omanye lɛ ateŋ ekome ji ekaa ni amɛwoɔ yɛ gbɛgbalɔi awalɔi kɛ daa gbɛgbalɔi anitsumɔ lɛ he lɛ. Tookwɛlɔi lɛ babaoo kɛ amɛ diɛŋtsɛ amɛhe ewo sɔɔmɔ nɛɛ mli, ni shiɛlɔi po ni nyɛɛɛ nakai amɛfee lɛ hu ejie gbɛgbamɔ mumɔ kpo, ni amɛmiisɔmɔ kɛ miishɛɛ ni yeɔ buaa ni anyɛɔ ayeɔ shikpilikpii-feemɔ ni yɔɔ shikpɔŋkuku lɛ mli lɛ nɔ. (Lala 100:2; 104: 33, 34; Filipibii 4:4, 5) Enɛ hewɔ lɛ, beni efɔŋfeemɔ kɛ nɔ ni miihe atsɔ basabasa shihilɛ heɔ aye je lɛ nɔ butuu kwraa lɛ, belɛ aahɛle gbɔmɛi ni tamɔ gwantɛŋi lɛ babaoo shi yɛ Maŋtsɛyeli hiɛnɔkamɔ lɛ he.—Mateo 12:18, 21; Romabii 15:12.
12. Mɛɛ naagba ko ni yɔɔ hiɛdɔɔ waa yɔɔ hei ni nɔyaa baa oyayaayai lɛ, ni bei komɛi lɛ te atsuɔ he nii ahaa tɛŋŋ?
12 Naagba kroko hu ji akɛ, bei pii lɛ anaaa tookwɛlɔi ni he esa ni baatsu tooku lɛ he nii. Yɛ hei ni nɔyaa baa yɛ oyayaayai, tamɔ Europa Bokagbɛ nɛkɛ lɛ, asafoi heei pii yɛ ni amɛbɛ onukpa ko kwraa ni ahala yɛ mli. Tooi ni kɛ amɛhe eha ji mɛi ni jatsu lɛ ka amɛnɔ, shi amɛbɛ niiashikpamɔ ko kwraa, ni yelikɛbuamɔ he miihia, koni akɛtsɔse tooi ni keɔ yuu kɛbaa asafoi lɛ amli lɛ. Yɛ shikpɔji tamɔ Brazil, Mexico, kɛ Zaire, he ni shweremɔ miiba oyayaayai nɛkɛ lɛ, Odasefoi obalaŋtai ni darako kwraa akɛtsuɔ nii ni akɛtoɔ sɔɔmɔ nitsumɔ lɛ kɛ mɛi heei krokomɛi lɛ atsɔsemɔ he gbɛjianɔ. Gbɛgbalɔi kɛ yelikɛbuamɔ kpele miiha, ni naa shikpɔŋkuku ni nyɛmimɛi yei baanyɛ atsɔse nyɛmimɛi yei heei lɛ yɛ mli. Yehowa tsɔɔ emumɔ lɛ nɔ ejɔɔ nɔ ni jɛɔ mli baa lɛ nɔ. Shweremɔ lɛ miiba lolo.—Yesaia 54:2, 3.
13. (a) Akɛni nikpamɔ lɛ da nɛkɛ hewɔ lɛ, mɛni he esa akɛ Odasefoi fɛɛ asɔle yɛ? (b) Mɛɛ gbɛ nɔ aha Nyɔŋmɔ webii asɔlemɔi ahetoo yɛ, dani jeŋ ta ni ji enyɔ lɛ fɛ, kɛ agbɛnɛ beni awuɔ ta lɛ?
13 Yesu wiemɔi ni yɔɔ Mateo 9:37, 38 lɛ kɔɔ shikpɔji ni shiɛmɔ nitsumɔ lɛ ehe shi jogbaŋŋ yɛ nɔ, kɛ shikpɔji ni nyɛsɛɛ nɛɛ ajie naatsii yɛ nitsumɔ lɛ nɔ, kɛ shikpɔŋkukuji heei ni naa egbele lɛ fɛɛ ahe lolo, akɛ: “Nikpamɔ lɛ fa moŋ, shi nitsulɔi lɛ faaa. No hewɔ lɛ nyɛkpaa nikpamɔ Nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli.” Ehe miihia hu ni wɔsɔle ni Yehowa atee tookwɛlɔi babaoo shi. Efee he mfoniri akɛ ebaanyɛ efee enɛ. Dani Jeŋ Ta II baaje shishi, kɛ beni ta lɛ yaa nɔ lɛ, yiwalɔi ni tamɔ Ashurbii ni kɛ amɛwie lɛ, awieee dɔŋŋ lɛ bɔ mɔdɛŋ akɛ amɛaakpata Yehowa Odasefoi ahiɛ. Shi Yehowa tsuu amɛ gbɛjianɔtoo lɛ he, yɛ amɛsɔlemɔ lɛ hetoohamɔ mli, ni eha etsɔ teokrase nɔ̃ lɛlɛŋ, ni ekɛ “tookwɛlɔi” ni he hiaa ha.a Enɛ kɛ nɛkɛ gbalɛ nɛɛ kpaa gbee, akɛ: “Kɛ Ashur miitao aba wɔshikpɔŋ lɛ nɔ ni ebabote wɔmɔji fɛfɛji lɛ amli lɛ, no lɛ wɔɔtee nɔkwɛlɔi kpawo kɛ lumɛi kpaanyɔ shi wɔwo lɛ”—onukpai ni ejɔɔ amɛhe nɔ ni fa po fe nine koni amɛnyiɛ hiɛ.—Mika 5:4.
14. Mɛɛ hiamɔ titri ko yɔɔ gbɛjianɔtoo lɛ mli, ni mɛɛ hewalɛwoo akɛhaa nyɛmimɛi hii?
14 Hiamɔ ko ni sa kadimɔ waa yɛ akɛ Odasefoi hii fɛɛ ni abaptisi amɛ lɛ aya amɛhiɛ kɛyashɛ gbɛnaa nii babaoo he. (1 Timoteo 3:1) Shihilɛ lɛ he miihia waa. Nibii agbɛjianɔtoo nɛɛ naagbee lɛ miibɛŋkɛ oyayaayai. Habakuk 2:3 jajeɔ akɛ: “Ninaa lɛ yɛ ha be ni ato lɛ kɛ̃, ni eeye oyai ní eshɛ naagbee, ni emaleŋ; . . . ejaakɛ ebaaba lɛlɛŋ, ekpeŋ sɛɛ.” Nyɛmimɛi hii, ani nyɛbaanyɛ nyɛya nyɛhiɛ koni nyɛhe asa kɛha hegbɛi babaoo ahe nitsumɔ yɛ nɛkɛ tookwɛmɔ nitsumɔ nɛɛ mli —dani naagbee lɛ aba?—Tito 1:6-9.
Nɔkwɛmɔ yɛ Teokrase Gbɛ Nɔ
15. Yehowa webii ji teokrase gbɛjianɔtoo yɛ mɛɛ gbɛ nɔ?
15 Ehe miihia ni Yehowa webii afee amɛnii yɛ teokrase gbɛ nɔ, koni amɛna egbɛjianɔtoo lɛ shweremɔ lɛ mli gbɛfaŋnɔ kɛmɔ shi. Mɛɛ gbɛ nɔ amɛaatsɔ amɛtsu enɛ he nii? Ojogbaŋŋ, mɛni ji wiemɔ “teokrase gbɛ nɔ” lɛ shishinumɔ? Webster’s New Twentieth Century Dictionary tsɔɔ “teokrase” shishi akɛ “maŋ nɔyeli ni yɔɔ Nyɔŋmɔ dɛŋ.” Nɛkɛ shishinumɔ nɛɛ naa “jeŋmaŋ krɔŋkrɔŋ” ni ji Yehowa webii ji teokrase lɛ. ( 1 Petro 2:9; Yesaia 33:22) Ákɛ nakai teokrase maŋ lɛ mli bii loo amɛhefatalɔi lɛ, esa akɛ anɔkwa Kristofoi ahi shi ni amɛsɔmɔ yɛ Nyɔŋmɔ Wiemɔ lɛ kɛ eshishitoo mlai lɛ atoiboo mli.
16. Mɛɛ gbɛ titri nɔ wɔɔtsɔ wɔtsɔɔ akɛ wɔfeɔ wɔnii yɛ teokrase gbɛ nɔ?
16 Bɔfo Paulo tsɔɔ bɔ ni esa akɛ Kristofoi afee amɛnii yɛ teokrase gbɛ nɔ lɛ mli faŋŋ. Klɛŋklɛŋ lɛ, ekɛɛ akɛ esa akɛ “amɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.” Esa akɛ atsake Kristofonyo lɛ su yɛ Nyɔŋmɔ jalɛ shishitoo mlai ni atsɔɔ yɛ e-Wiemɔ lɛ mli lɛ anaa. Esa akɛ eye Yehowa kɛ E-mlai lɛ anɔkwa. Beni efee gbɛ ni aaatsɔ nɔ afee enɛ he mfoniri sɛɛ lɛ, Paulo wo hewalɛ akɛ: “Nyɛfea Nyɔŋmɔ kaselɔi, tamɔ bii ni asumɔɔ.” (Efesobii 4:24–5:1) Esa akɛ wɔkase Nyɔŋmɔ, tamɔ bii toibolɔi. No bafeɔ anɔkwa teokrase ni miitsu nii, ni tsɔɔ akɛ Nyɔŋmɔ ji mɔ ni kudɔɔ wɔ lɛlɛŋ! —Kwɛmɔ Kolosebii 3:10, 12-14 hu.
17, 18. (a) Mɛɛ Nyɔŋmɔ su titri Kristofoi ni feɔ amɛnii yɛ teokrase gbɛ nɔ lɛ kaseɔ? (b) Yehowa ma E-su titri lɛ nɔ mi yɛ wiemɔi ni ekɛ Mose wie lɛ mli yɛ mɛɛ gbɛ nɔ, shi mɛɛ kɔkɔbɔɔ E-kɛfata he?
17 Mɛni ji Nyɔŋmɔ su titri ni esa akɛ wɔkase? Bɔfo Yohane ha hetoo yɛ 1 Yohane 4:8 ni ewie akɛ: “Nyɔŋmɔ lɛ, suɔmɔ ji lɛ.” Beni etsa nɔ yɛ kukuji kpaanyɔ sɛɛ, ni ebashɛ kuku lɛ, esaa eti nɛkɛ shishitoo mla ni he hiaa nɛɛ mli ekoŋŋ akɛ: “Nyɔŋmɔ lɛ, suɔmɔ ji lɛ, ni mɔ ni hiɔ suɔmɔ mli lɛ, ehiɔ Nyɔŋmɔ mli, ni Nyɔŋmɔ hu hiɔ emli.” Tookwɛlɔ kpeteŋkpele, Yehowa ji suɔmɔ ni ejie ehe kpo yɛ gbɔmɔtso mli. Tookwɛlɔi ni tsuɔ nii yɛ teokrase gbɛ nɔ lɛ kaseɔ lɛ kɛtsɔɔ suɔmɔ ni mli kwɔ ni amɛjieɔ lɛ kpo amɛtsɔɔ Yehowa tooi lɛ nɔ.—Okɛto 1 Yohane 3:16, 18; 4:7-11 he.
18 Teokrat kpeteŋkpele lɛ jie ehe kpo etsɔɔ Mose akɛ “Yehowa, Yehowa, Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii, ni hiɛɔ mɔbɔnalɛ mli ehaa mɛi akpei abɔ, ni ŋɔɔ tɔmɔ kɛ efɔŋ kɛ esha efaa, ni ehaaa mɔ ko mɔ ko aŋɔ ehe aye kwraa; mɔ ni woɔ tsɛmɛi atɔmɔi anyɔmɔ kɛtsɔɔ bii kɛ nabii anɔ kɛyashiɔ yinɔbii ni ji etɛ kɛ nɔ niji ejwɛ lɛ nɔ lɛ.” (2 Mose 34:6, 7) No hewɔ lɛ Yehowa tsɔ nɛkɛ gbɛ nɔ ema eteokrase su ni sa kadimɔ waa fe fɛɛ, ni ji suɔmɔ lɛ fai sɔrɔtoi anɔ mi, ni ekɛ shiŋŋfeemɔ hu bɔ kɔkɔ akɛ ebaagbala toi yɛ tɔmɔi ahewɔ kɛji eebi ni efee nakai.
19. Akɛ mɛi ni tamɔɔɔ Farisifoi lɛ, te esa akɛ Kristofoi tookwɛlɔi afee amɛnii yɛ teokrase gbɛ nɔ amɛha tɛŋŋ?
19 Ni aaafee nii yɛ teokrase gbɛ nɔ lɛ tsɔɔ mɛni, yɛ mɛi ni yɔɔ gbɛnaa nii kɛ gbɛhei amli yɛ asafo mli lɛ agbɛfaŋ? Yesu wie egbii lɛ amli woloŋmalɔi kɛ Farisifoi lɛ ahe akɛ: “Amɛfimɔɔ jatsui kɛ tsiimɔ ni teremɔ jaraa amɛkɛ shwieɔ mɛi akɔji anɔ; shi amɛ diɛŋtsɛ lɛ, amɛsumɔɔɔ akɛ amɛkɛ amɛwao kome tsiɔ.” (Mateo 23:4) Kwɛ bɔ ni amɛnyɛɔ mɔ nɔ ni amɛbɛ suɔmɔ hu! Anɔkwa teokrase, loo Nyɔŋmɔ nɔyeli biɔ ni akwɛ tooku lɛ nɔ kɛtsɔ Biblia mli shishitoo mlai ni suɔmɔ yɔɔ mli lɛ kɛ nitsumɔ nɔ, shi jeee ni abaafimɔ adesai amlai babaoo ashwie tooi lɛ anɔ tamɔ jatsu. (Okɛto Mateo 15:1-9 he.) Yɛ nakai beaŋ nɔŋŋ lɛ, esa akɛ teokrase tookwɛlɔi lɛ akase Nyɔŋmɔ kɛtsɔ shiŋŋfeemɔ ni amɛkɛaafata amɛsuɔmɔ lɛ he, koni amɛkɛhiɛ asafo lɛ hetsemɔ mli lɛ nɔ.—Okɛto Romabii 2:11; 1 Petro 1:17 he.
20. Mɛɛ asafoŋ gbɛjianɔtoi tookwɛlɔi ni feɔ amɛnii yɛ teokrase gbɛ nɔ lɛ kpɛlɛɔ nɔ?
20 Anɔkwa tookwɛlɔi lɛ yɔseɔ akɛ Yesu ehala etsulɔ anɔkwafo kɛ nilelɔ lɛ eto enibii fɛɛ kwa nɔ, yɛ nɛkɛ naagbee gbii nɛɛ amli, ni ákɛ, mumɔ krɔŋkrɔŋ lɛ ekudɔ nɛkɛ tsulɔ nɛɛ yɛ onukpai ahalamɔ mli kɛha tooi lɛ anɔkwɛmɔ. (Mateo 24:3, 47; Bɔfoi lɛ Asaji 20:28) Enɛ hewɔ lɛ, ní aaafee nii yɛ teokrase gbɛ nɔ lɛ kɔɔ bulɛ ni mli kwɔ ni aaana aha tsulɔ nɛɛ, kɛ asafoŋ gbɛjianɔtoi ni tsulɔ lɛ eto shishi lɛ, kɛ agbɛnɛ onukpai agbɛjianɔtoo ni yɔɔ asafo lɛ mli lɛ fɛɛ he.—Hebribii 13:7, 17.
21. Mɛɛ nɔkwɛmɔ nɔ fɛfɛo Yesu fee efɔ shi eha tookwɛlɔi bibii?
21 Yesu diɛŋtsɛ fee nɔkwɛmɔ nɔ kpakpa efɔ shi, ni ekwɛ Yehowa kɛ E-Wiemɔ lɛ gbɛ be fɛɛ be kɛha gbɛtsɔɔmɔ. Ewie akɛ: “Mi diɛŋtsɛ minyɛŋ miyiŋ mato mafee nɔ ko; bɔ ni minuɔ lɛ, nakai mikojoɔ; ni mikojomɔ lɛ jalɛ kojomɔ ni, ejaakɛ mitaooo nɔ ni mi diɛŋtsɛ misumɔɔ, shi moŋ nɔ ni Tsɛ lɛ ni tsu mi lɛ sumɔɔ.” (Yohane 5:30) Esa akɛ Nuŋtsɔ Yesu Kristo tookwɛlɔi bibii lɛ hu akase heshibaa su ni tamɔ enɛ. Kɛji onukpa ko kwɛɔ Nyɔŋmɔ Wiemɔ lɛ mli be fɛɛ bɛ kɛhaa gbɛtsɔɔmɔ, taakɛ Yesu fee lɛ, no lɛ eetsu nii yɛ teokrase gbɛ nɔ lɛlɛŋ.—Mateo 4:1-11; Yohane 6:38.
22. (a) Esa akɛ mɔ fɛɛ mɔ abɔ mɔdɛŋ ni efee enii yɛ teokrase gbɛjianɔtoo naa yɛ mɛɛ gbɛ nɔ? (b) Mɛɛ ninefɔɔ ni jɛ mlihilɛ mli Yesu kɛhaa tooi lɛ?
22 Hii ni abaptisi nyɛ, nyɛyaa hiɛ ni nyɛhe asaa kɛhaa sɔɔmɔ gbɛhei yɛ asafo lɛ mli! Nyɛ tooi fɛɛ ni asumɔɔ nyɛ, nyɛhaa teokrase gbɛ ni nyɛkɛaafee nyɛnii lɛ afea oti ni ma nyɛhiɛ, ni nyɛkasea Nyɔŋmɔ kɛ Kristo yɛ suɔmɔ kpojiemɔ mli! Eba akɛ tookwɛlɔi kɛ tooku lɛ fɛɛ amli aaafili amɛ ejaakɛ amɛhere Yesu ninefɔɔ nɛɛ nɔ, akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipa lɛ nyɛfɔa nyɛnɔ ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.”—Mateo 11:28-30.
[Shishigbɛ niŋmai]
a Kwɛmɔ Watchtower lɛ mli saneyitsei ni ji “Organization,” ni yɔɔ June 1 kɛ 15, 1938 nɔ lɛ amli lɛ.
Ani Obaanyɛ Otsɔɔ Mli?
◻ Mɛni ji Yehowa “tooku” lɛ, ni namɛi fata he?
◻ Yesu tsu nii akɛ “tookwɛlɔ kpakpa lɛ” yɛ klɛŋklɛŋ afii oha lɛ, kɛ ŋmɛnɛ hu, yɛ mɛɛ gbɛ nɔ?
◻ Mɛɛ gbɛhe titri tookwɛlɔi bibii tsuɔ he nii yɛ tooku lɛ nɔkwɛmɔ mli?
◻ Mɛni ji shishinumɔ titri ni yɔɔ wiemɔ “teokrase” lɛ sɛɛ?
◻ Te esa akɛ Kristofonyo, titri lɛ, tookwɛlɔ bibioo afee enii eha tɛŋŋ, koni ekɛ teokrase gbɛjianɔtoo anyiɛ?
[Mfoniri ni yɔɔ baafa 20]
Yehowa kwɛɔ etooku lɛ nɔ, tamɔ tookwɛlɔ ni etuu ehe eha
[Mfoniri ni yɔɔ baafa 23]
Yehowa Nyɔŋmɔ su ni ji suɔmɔ lɛ kasemɔ tsɔɔ teokrase ni miitsu nii