“Kaahã Onijiaŋ Miigbɔjɔ”

“Kaahã onijiaŋ miigbɔjɔ! Yehowa, o-Nyɔŋmɔ lɛ, yɛ oteŋ, nuu ekaalɔ ni aaanyɛ oyiwala ahere ni.”—ZEFANIA 3:16, 17.

 1. Mɛni Biblia woloŋlelɔ ko wie yɛ Zefania gbalɛ lɛ he?

ZEFANIA gbalɛ lɛ gbalaa jwɛŋmɔ kɛyaa shɔŋŋ, fe eklɛŋklɛŋ mlibaa ni ba yɛ afii ohai kpawo kɛ afii ohai ekpaa D.Ŋ.B. lɛ nɔ kɛkɛ. Beni ewieɔ Zefania he lɛ, Univɛsiti Tsɔɔlɔ Nukpa C. F. Keil ŋma akɛ: “Jeee akɛ Zefania gbalɛ lɛ . . . jeɔ shishi kɛ jeŋ muu fɛɛ kojomɔ ni akɛbaaba je lɛ fɛɛ nɔ, ní kojomɔ ni akɛbaaba Yuda nɔ yɛ ehe eshai lɛ ahewɔ, kɛ nɔ ni akɛbaaba je lɛŋ jeŋmaji lɛ hu anɔ yɛ yiwalɛ nii ni amɛfee Yehowa webii hewɔ lɛ fata he lɛ he adafitswaa kɛkɛ; shi moŋ ewieɔ Yehowa gbi wulu ni yɔɔ gbeyei waa lɛ hu he yɛ egbalɛ lɛ mli fɛɛ.”

 2. Mɛɛ nibii ni je amɛhe yɔɔ shihilɛi ni hi shi yɛ Zefania gbii lɛ amli, kɛ shihilɛ ni yɔɔ Kristendom ŋmɛnɛ lɛ mli?

² Ŋmɛnɛ, Yehowa kojomɔ yiŋkpɛɛ ji ni ebua jeŋmaji lɛ anaa kɛha hiɛkpatamɔ ni mli lɛɛ kwraa fe nɔ ni ba yɛ Zefania gbii lɛ amli lɛ. (Zefania 3:8) Nakai jeŋmaji ni kɛɔ akɛ Kristofoi amaji ji amɛ lɛ ji mɛi ni he yɔɔ nyaŋemɔ yɛ Nyɔŋmɔ hiɛ fe fɛɛ. Taakɛ agbala Yerusalem toi waa yɛ anɔkwa ni eyeee Yehowa hewɔ lɛ, nakai nɔŋŋ esa akɛ Kristendom hu aha enyenyeŋtswibɔɔ gbɛi ni egbɛ eshwa babaoo lɛ hetoo yɛ Nyɔŋmɔ hiɛ. Nyɔŋmɔ kojomɔi ni ajaje ashi Yuda kɛ Yerusalem yɛ Zefania gbii lɛ amli lɛ kɔɔ sɔlemɔi kɛ jamɔ kui bibii ni yɔɔ Kristendom lɛ ahe kɛ hewalɛ ni mli wa waa diɛŋtsɛ. Amɛ hu amɛwo jamɔ krɔŋŋ lɛ he muji kɛtsɔ amɛtsɔɔmɔi ni wooo Nyɔŋmɔ hiɛ nyam, ni amɛteŋ babaoo shishijee jɛ wɔŋjamɔ mli lɛ anɔ. Amɛkɛ amɛ bihii ni yɔɔ hewalɛ waa lɛ ateŋ mɛi akpekpei abɔ esha afɔle yɛ ŋmɛnɛŋmɛnɛ beaŋ tai ni awuu lɛ amli. Kɛfata he lɛ, mɛi ni yɔɔ mfoniri feemɔ Yerusalem maŋ lɛ mli ŋmɛnɛ lɛ kɛ nɔ ni akɛɛ atsɛɔ lɛ Kristojamɔ lɛ efutu ŋulamiiaŋkwɛmɔ, mumɔi atsɛmɔ nifeemɔi, kɛ bɔlɛnamɔ mli jeŋba shara ni baa mɔ shi, ni akaiɔ yɛ Baal jamɔ mli lɛ.—Zefania 1:4, 5.

 3. Mɛni abaanyɛ awie yɛ je lɛŋ hiɛnyiɛlɔi babaoo kɛ maŋkwramɔŋ nɔyelii ni yɔɔ ŋmɛnɛ lɛ ahe, ni mɛni Zefania gba efɔ shi?

³ Kristendom maŋkwramɔŋ hiɛnyiɛlɔi lɛ ateŋ mɛi pii sumɔɔ ni ana akɛ amɛyɛ gbɛhei yɛ sɔlemɔ lɛ mli. Shi taakɛ Yuda “lumɛi” lɛ ji lɛ, amɛteŋ mɛi babaoo naa gbɔmɛi lɛ ahe sɛɛ waa tamɔ “jatai ni hũuɔ” kɛ “klaji” fulɔi. (Zefania 3:1-3) Nɛkɛ gbɔmɛi nɛɛ amaŋkwramɔŋ sɔɔlɔi lɛ kɛ “yiwalɛ kɛ shishiumɔ woɔ amɛnuntsɔmɛi lɛ awei lɛ obɔbɔ.” (Zefania 1:9) Nyɔɔŋ-nihamɔ kɛ juu-kɛ-fɔ̃ egbɛ eshwa he fɛɛ he. Yɛ maŋkwramɔŋ nɔyelii ni yɔɔ Kristendom mli kɛ esɛɛ fɛɛ lɛ agbɛfaŋ lɛ, amɛmli babaoo miiya nɔ ‘amɛmiiwó amɛhe nɔ’ amɛmiishi Yehowa zebaot webii, ni ji e-Dasefoi lɛ, ni amɛkɛ amɛ yeɔ akɛ ‘kuu fã’ ni agbeɔ amɛhe guɔ. (Zefania 2:8; Bɔfoi lɛ Asaji 24:5, 14) Zefania gba yɛ nɛkɛ maŋkwramɔŋ hiɛnyiɛlɔi kɛ amɛsɛɛnyiɛlɔi nɛɛ fɛɛ ahe akɛ: “Asaŋ, amɛjwiɛtɛi kɛ amɛshika fɛɛ nyɛŋ amɛ ajie yɛ Yehowa mlifu gbi lɛ nɔ, shi ewuŋayeli la lɛ aaashã shikpɔŋ muu lɛ fɛɛ; ejaakɛ ekɛ pleneemɔ ni baa trukaa aaaplenee shikpɔŋ lɛ nɔ bii lɛ fɛɛ.”—Zefania 1:18.

“Aaaŋɔ Nyɛ Atee yɛ Yehowa Mlifu Gbi lɛ Nɔ”

 4. Mɛni tsɔɔ akɛ mɛi ayi baana wala kɛfo Yehowa gbi wulu lɛ, shi mɛni esa akɛ amɛfee?

⁴ Jeee gbɔmɛi ni hi Yuda lɛ fɛɛ akpata amɛhiɛ yɛ afii ohai kpawo D.Ŋ.B lɛ mli. Nakai nɔŋŋ hu, mɛi komɛi ayi baana wala kɛfo Yehowa gbi wulu lɛ. Yehowa tsɔ egbalɔ Zefania nɔ ekɛ nɛkɛ gbɔmɛi nɛɛ wie akɛ: “Dani akpɔ lɛ afɔ, ni gbi lɛ aho tamɔ tutuu; dani Yehowa mlifu ni naa wa lɛ aba nyɛnɔ, dani Yehowa mlifu gbi lɛ aba nyɛnɔ. Nyɛtaoa Yehowa sɛɛ gbɛ, nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtaoa jalɛ sɛɛ gbɛ, nyɛtaoa heshibaa sɛɛ gbɛ; ekolɛ aaaŋɔ nyɛ atee yɛ Yehowa mlifu gbi lɛ nɔ!”—Zefania 2:2, 3.

 5. Namɛi ji mɛi ni bo Zefania kɔkɔbɔɔ lɛ toi klɛŋklɛŋ yɛ naagbee be nɛɛ mli, ni Yehowa kɛ amɛ etsu nii yɛ mɛɛ gbɛ nɔ?

⁵ Mɛi ni here gbalɛ mli ninefɔɔ nɛɛ nɔ klɛŋklɛŋ yɛ je nɛɛ naagbee be nɛɛ mli ji mumɔŋ Israel shwɛɛnii, ni ji Kristofoi ni afɔ amɛ mu lɛ. (Romabii 2:28, 29; 9:6; Galatabii 6:16) Akɛni amɛtao jalɛ kɛ heshibaa sɛɛ gbɛ ni amɛjie bulɛ kpo amɛtsɔɔ Yehowa kojomɔ yiŋkpɛi lɛ hewɔ lɛ, ajie amɛ kɛjɛ Babilon Kpeteŋkpele, ni ji jeŋ apasa jamɔ maŋtsɛyeli lɛ mli, ni amɛsaa amɛna Nyɔŋmɔ hiɛ duromɔ ekoŋŋ yɛ afi 1919 mli. Kɛjɛ nakai beaŋ, titri lɛ, kɛjɛ 1922 kɛbaa nɛɛ, nɛkɛ shwɛɛnii anɔkwafoi nɛɛ etee nɔ amɛkɛ ekaa ejaje Yehowa kojomɔi ni ekɛshiɔ Kristendom sɔlemɔi kɛ ejamɔ kui bibii lɛ, kɛ agbɛnɛ hu maŋkwramɔŋ jeŋmaji lɛ.

 6. (a) Mɛni Zefania gba efɔ shi yɛ shwɛɛnii anɔkwafoi lɛ ahe? (b) Gbalɛ nɛɛ eba mli yɛ mɛɛ gbɛ nɔ?

⁶ Zefania gba yɛ nɛkɛ shwɛɛnii anɔkwafoi nɛɛ ahe akɛ: “Ni mashwɛ maŋ ni ji nɔnalɔi kɛ ohiafoi yɛ oteŋ, ni amɛkɛ amɛhiɛ aaafɔ̃ Yehowa gbɛi lɛ nɔ. Israel shwɛɛnɔ lɛ efeŋ nishaianii, ni amɛmaleŋ dɔŋŋ, ni asaŋ anaŋ shishiumɔ lilɛi yɛ amɛdaaŋ; ejaakɛ amɛaaye nii ni amɛaabumɔ shi, ni mɔ ko mɔ ko woŋ amɛhe gbeyei.” (Zefania 3:12, 13) Nɛkɛ Kristofoi ni afɔ amɛ mu nɛɛ eha Yehowa gbɛi lɛ eye klɛŋklɛŋ gbɛhe be fɛɛ be, shi titri lɛ, kɛjɛ 1931 kɛbaa, beni amɛŋɔ gbɛi ni ji Yehowa Odasefoi lɛ. (Yesaia 43:10-12) Amɛwo Nyɔŋmɔ gbɛi lɛ hiɛ nyam kɛtsɔ sane ni kɔɔ Yehowa maŋtsɛyeli he lɛ nɔmimaa nɔ, ni enɛ ebafee abobaa he kɛha amɛ. (Abɛi 18:10) Yehowa kɛ mumɔŋ niyenii babaoo elɛ amɛ kɛteke nɔ, ni amɛhiɔ mumɔŋ paradeiso mli ni amɛsheee gbeyei.—Zefania 3:16, 17.

“Gbɛi kɛ Yijiemɔ yɛ Shikpɔŋ lɛ nɔ Majimaji Fɛɛ Mli”

7, 8. (a) Mɛɛ gbalɛ kroko hu eba mli yɛ mumɔŋ Israel shwɛɛnii lɛ anɔ? (b) Mɛni gbɔmɛi akpekpei abɔ ebayoo, ni mɛni ji bo diɛŋtsɛ ohenumɔi yɛ enɛ gbɛfaŋ?

⁷ Akũko hiɛ afɔ̃ko bɔ ni shwɛɛnii lɛ kɛ amɛhe ekpɛtɛ Yehowa gbɛi lɛ kɛ jalɛ shishitoo mlai ni yɔɔ e-Wiemɔ lɛ mli lɛ he kpɛŋŋ lɛ nɔ. Gbɔmɛi anɔkwafoi lɛ ena sɔrɔto feemɔ ni yɔɔ shwɛɛnii lɛ anifeemɔ, kɛ juu-kɛ-fɔ̃ kɛ osatofeemɔ ni anaa yɛ je nɛŋ maŋkwramɔ kɛ jamɔ mli hiɛnyiɛlɔi lɛ ahe lɛ teŋ. Yehowa ejɔɔ “[mumɔŋ] Israel shwɛɛnɔ lɛ.” Ewo amɛhiɛ nyam kɛtsɔ hegbɛ ni eha amɛ akɛ egbɛi akã amɛnɔ lɛ nɔ, ni eha amɛna gbɛi kpakpa waa yɛ shikpɔŋ lɛ nɔ jeŋmaji lɛ ateŋ. Enɛ eba mli taakɛ Zefania gba efɔ shi lɛ pɛpɛɛpɛ, akɛ: “ ‘Nakai be lɛ mli lɛ maŋɔ nyɛ kɛaaba ekoŋŋ, ni nakai be lɛ mli lɛ mabua nyɛnaa; ejaakɛ maŋɔ nyɛ mafee gbɛi kɛ yijiemɔ yɛ shikpɔŋ lɛ nɔ majimaji fɛɛ mli, beni makpale nyɛ nomŋɔɔ lɛ kɛaaba ekoŋŋ yɛ mihiŋmɛiiaŋ lɛ,’ Yehowa kɛɛ.”—Zefania 3:20.

⁸ Kɛjɛ 1935 kɛbaa nɛɛ, gbɔmɛi akpekpei abɔ diɛŋtsɛ ebayoo akɛ Yehowa jɔɔmɔi yɛ shwɛɛnii lɛ anɔ. Amɛkɛ miishɛɛ nyiɛɔ nɛkɛ mumɔŋ Yudafoi, loo Israelbii nɛɛ asɛɛ, ni amɛkɛɔ akɛ: “Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ.” (Zakaria 8:23) Nɛkɛ “tooi krokomɛi” nɛɛ naa shwɛɛnii ni afɔ amɛ mu lɛ akɛ amɛji “tsulɔ anɔkwafo kɛ nilelɔ” ni Kristo ehala lɛ “eto [eshikpɔŋ nɔ] nii fɛɛ kwa nɔ” lɛ. Amɛkɛ shidaa yeɔ mumɔŋ niyenii ni tsulɔ kuu lɛ kɛhaa “yɛ be ni sa nɔ lɛ.”—Yohane 10:16; Mateo 24:45-47.

 9. Mɛɛ “wiemɔ” gbɔmɛi akpekpei abɔ ekase wiemɔ, ni mɛɛ nitsumɔ kpele ko tooi krokomɛi lɛ kɛ shwɛɛnii ni afɔ amɛ mu lɛ fɛɛ efee ekome kɛsɔmɔɔ yɛ mli “kɛ gbee kome”?

⁹ Kɛfata shwɛɛnii lɛ ahe lɛ, nɛkɛ tooi krokomɛi akpekpei abɔ nɛɛ miikase bɔ ni amɛaafee amɛhi shi ni amɛwie yɛ “wiemɔ krɔŋŋ” lɛ kɛ gbeekpamɔ naa.a Yehowa gba kɛtsɔ Zefania nɔ akɛ: “No mli lɛ maŋɔ wiemɔ krɔŋŋ maha majimaji lɛ, koni amɛ fɛɛ kwa amɛtsɛ Yehowa gbɛi lɛ, koni amɛkɛ gbee kome asɔmɔ lɛ.” (Zefania 3:9, NW) Hɛɛ, tooi krokomɛi lɛ kɛ “asafoku bibioo” ni ji mɛi ni afɔ amɛ mu lɛ mli bii lɛ feɔ ekome kɛsɔmɔɔ Yehowa “kɛ gbee kome,” yɛ nitsumɔ ni he hiaa waa, ni ji shiɛmɔ ni ashiɛɔ “maŋtsɛyeli lɛ he sanekpakpa nɛɛ . . . ni akɛye jeŋmaji lɛ fɛɛ odase” lɛ mli.—Luka 12:32; Mateo 24:14.

“Nuntsɔ [Yehowa] Gbi lɛ Baaba”

10. Shwɛɛnii ni afɔ amɛ mu lɛ ena nɔmimaa waa yɛ mɛni he be fɛɛ be, ni akɛ kuu lɛ, mɛni amɛbaahi shi ni amɛna?

¹⁰ Shwɛɛnii ni afɔ amɛ mu lɛ etee nɔ amɛha bɔfo Petro wiemɔ ni jɛ mumɔŋ nɛɛ ehi amɛjwɛŋmɔ mli be fɛɛ be, akɛ: “Jeee tsɛ Nuntsɔ [Yehowa] haa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui. Shi Nuntsɔ [Yehowa] gbi lɛ baaba tamɔ julɔ baa nyɔɔŋ [lɛ].” (2 Petro 3:9, 10) Tsulɔ anɔkwafo kuu lɛ mli bii lɛ ayiŋ efeko amɛ kɔshikɔshi yɛ Yehowa gbi ni baaba yɛ wɔbe nɛɛ mli lɛ he dã. Nakai gbi wulu lɛ baaje shishi kɛ Nyɔŋmɔ kojomɔi ni abaatsu he nii yɛ Kristendom, ni feɔ Yerusalem he mfoniri lɛ, kɛ Babilon Kpeteŋkpele lɛ fã ni eshwɛ lɛ hu nɔ.—Zefania 1:2-4; Kpojiemɔ 17:1, 5; 19:1, 2.

11, 12. (a) Mɛɛ Zefania gbalɛ lɛ fã kroko hu eba mli yɛ shwɛɛnii lɛ anɔ? (b) Shwɛɛnii ni afɔ amɛ mu lɛ ehere ekaawoo ni akɛha akɛ, “Kaaha onijiaŋ miigbɔjɔ” lɛ nɔ yɛ mɛɛ gbɛ nɔ?

¹¹ Shwɛɛnii anɔkwafoi lɛ naa miishɛɛ akɛ akpɔ̃ amɛ kɛjɛ mumɔŋ nomŋɔɔ mli yɛ Babilon Kpeteŋkpele lɛ, ni ji jeŋ apasa jamɔ maŋtsɛyeli lɛ mli yɛ afi 1919 mli. Amɛna Zefania gbalɛ lɛ mlibaa mli niiashikpamɔ, akɛ: “La nyamɔ lala, Zion biyoo! Bɔɔ oshe, Israel! Nya ni omli afili bo kɛ otsui fɛɛ, Yerusalem biyoo! Ejaakɛ Yehowa ejie okojomɔi lɛ kɛtee, eshwie ohenyɛlɔi lɛ kɛjɛ ohe; Israel maŋtsɛ Yehowa lɛ yɛ oteŋ; osheŋ nɔ fɔŋ ko gbeyei dɔŋŋ! Nakai gbi lɛ nɔ lɛ aaakɛɛ Yerusalem akɛ: ‘Kaashe gbeyei! Zion, kaaha onijiaŋ miigbɔjɔ! Yehowa, o-Nyɔŋmɔ lɛ, yɛ oteŋ, nuu ekaalɔ ni aaanyɛ oyiwala ahere ni.’ ”—Zefania 3:14-17.

¹² Akɛni amɛyɔɔ nɔmimaa kɛ odaseyeli babaoo akɛ Yehowa yɛ amɛteŋ hewɔ lɛ, shwɛɛnii ni afɔ amɛ mu lɛ kɛ ekaa etee hiɛ waa yɛ nitsumɔ ni ajɛ ŋwɛi akɛwo amɛdɛŋ lɛ he nitsumɔ mli. Amɛshiɛ Maŋtsɛyeli lɛ he sanekpakpa lɛ, ni amɛha ale Yehowa kojomɔi ni ekɛshiɔ Kristendom, kɛ Babilon Kpeteŋkpele lɛ fã ni eshwɛ lɛ, kɛ Satan nibii agbɛjianɔtoo fɔŋ lɛ hu fɛɛ lɛ. Yɛ jaramɔ shihilɛi ni amɛkɛkpe, yɛ afii nyɔŋmai abɔ ni ho kɛjɛ afi 1919 mli kɛbaa lɛ fɛɛ sɛɛ lɛ, amɛbo famɔ ni ajɛ ŋwɛi akɛha nɛɛ toi, akɛ: “Kaashe gbeyei! Zion, kaaha onijiaŋ miigbɔjɔ!” Amɛgbɔjɔko amɛnijiaŋ kwraa yɛ dɛhiɛmɔ woji, woji tɛtrɛbii, woji wuji, kɛ woji bibii akpekpei akpei abɔ ni amɛjaa, ni tswaa Yehowa Maŋtsɛyeli lɛ he adafi lɛ kɛhamɔ mli. Amɛfee nɔkwɛmɔ nɔ ni woɔ hemɔkɛyeli hewalɛ kɛha tooi krokomɛi lɛ, mɛi ni kɛjɛ 1935 kɛbaa nɛɛ, amɛke yuu kɛbafata amɛhe lɛ.

“Kaaha Onijiaŋ Miigbɔjɔ”

13, 14. (a) Mɛni hewɔ Yudafoi komɛi gbala amɛhe shi kɛjɛ Yehowa sɔɔmɔ mli lɛ, ni enɛ je kpo faŋŋ yɛ mɛɛ gbɛ nɔ? (b) Mɛni efeŋ nilee kɛhaŋ wɔ akɛ wɔɔfee, ni esaaa ni wɔhaa wɔnijiaŋ gbɔjɔɔ yɛ mɛɛ nitsumɔ mli?

¹³ Be mli ni wɔyaa nɔ ‘wɔkwɛɔ’ Yehowa gbi wulu lɛ ‘gbɛ’ lɛ, mɛɛ gbɛ nɔ wɔɔtsɔ wɔna yelikɛbuamɔ diɛŋtsɛ kɛjɛ Zefania gbalɛ lɛ mli? Klɛŋklɛŋ lɛ, esa akɛ wɔkwɛ jogbaŋŋ ni wɔkatamɔ Yudafoi ni hi shi yɛ Zefania gbii lɛ amli, ni gbala amɛhe shi kɛjɛ Yehowa sɛɛnyiɛmɔ mli, yɛ amɛyiŋ ni fee amɛ kɔshikɔshi yɛ bɔ ni Yehowa gbi lɛ ebɛŋkɛ eha lɛ he lɛ. Etsɔɔɔ doo akɛ Yudafoi nɛɛ jie amɛ yiŋkɔshikɔshi feemɔ kpo amɛtsɔɔ yɛ faŋŋ mli, shi amɛnifeemɔ tsɔɔ akɛ amɛheee amɛyeee diɛŋtsɛ akɛ Yehowa gbi wulu lɛ ebɛŋkɛ kpaakpa. Amɛkɛ amɛjwɛŋmɔ fɛɛ fɔ̃ ninamɔ babaoo naabuamɔ nɔ, moŋ fe ni amɛaakwɛ Yehowa gbɛ.—Zefania 1:12, 13; 3:8.

¹⁴ Jeee be ni esa akɛ wɔŋmɛɔ gbɛ ni yiŋkɔshikɔshi feemɔ heɔ shi yɛ wɔtsui mli nɛ. Ebaafee nɔ ni nilee bɛ mli kwraa akɛ wɔɔtsi Yehowa gbi lɛ baa lɛ wɔto sɛɛ yɛ wɔjwɛŋmɔ loo wɔtsuii amli. (2 Petro 3:1-4, 10) Esa akɛ wɔkwa wɔhe shi ni wɔɔgbala kɛjɛ Yehowa he aloo ‘wɔnijiaŋ ni wɔɔgbɔjɔ’ yɛ esɔɔmɔ mli. Nɔ ni fata enɛ he hu ji ‘wɔnijiaŋ ni wɔhaŋ eŋɔɔ wɔ’ yɛ wɔ “sanekpakpa lɛ” shiɛmɔ mli.—Abɛi 10:4; Marko 13:10.

Ni Aaawuu Ashi Shikpilikpii Feemɔ

15. Mɛni baanyɛ aha wɔnijiaŋ agbɔjɔ yɛ Yehowa sɔɔmɔ mli, ni agba naagba nɛɛ he sane afɔ̃ shi yɛ Zefania gbalɛ lɛ mli yɛ mɛɛ gbɛ nɔ?

¹⁵ Nɔ ni ji enyɔ lɛ, esa akɛ wɔhiɛ ahi wɔhe nɔ yɛ bɔ ni shikpilikpii feemɔ gbɔjɔɔ mɔ kwraa lɛ he. Yɛ Anaigbɛ maji pii anɔ lɛ, jwɛŋmɔ ni ajieɔ kwraa kɛjɛɔ mumɔŋ nibii anɔ lɛ baanyɛ ekɛ nijiaŋwujee aba sanekpakpa shiɛlɔi lɛ ateŋ mɛi komɛi agbɛfaŋ. Nɛkɛ shikpilikpii feemɔ nɛɛ hi shi yɛ Zefania gbii lɛ amli. Yehowa jaje kɛtsɔ egbalɔ lɛ nɔ akɛ: “Mawo gbɔmɛi . . . lɛ anyɔmɔ, mɛi ni kɛɔ yɛ amɛtsui mli akɛ: ‘Yehowa efeŋ ekpakpa, ni esaa efeŋ efɔŋ hu’ lɛ.” (Zefania 1:12) Beni eŋmaa ŋmalɛ kuku nɛɛ he sane yɛ Cambridge Bible for Schools and Colleges lɛ mli lɛ, A. B. Davidson wie akɛ ekɔɔ gbɔmɛi ni “emii kɛyashɛ shikpilikpii feemɔ ni anuuu nɔ ko he, aloo kɛyashɛ he ni amɛheee amɛyeee akɛ hewalɛ ko ni nɔ kwɔ kwraa fe adesai kɛ ehe baawo adesai asaji amli” lɛ ahe.

16. Mɛɛ yiŋsusumɔ ko yɔɔ Kristendom sɔlemɔi lɛ amli bii lɛ ateŋ mɛi pii ajwɛŋmɔ mli, shi mɛɛ hewalɛwoo Yehowa haa wɔ?

¹⁶ Shikpilikpii feemɔ ji su ni egbɛ eshwa fe fɛɛ ŋmɛnɛ, yɛ shikpɔŋ nɛɛ nɔ hei babaoo, titri lɛ yɛ maji ni etee hiɛ yɛ amɛshihilɛ mli lɛ amli. Kristendom sɔlemɔi lɛ amli bii lɛ po heee yeee akɛ Yehowa Nyɔŋmɔ kɛ ehe baawo adesai asaji amli yɛ wɔ gbii nɛɛ amli. Amɛtswaa mɔdɛŋ ni wɔbɔɔ akɛ wɔkɛ Maŋtsɛyeli lɛ he sanekpakpa lɛ aaashɛ amɛŋɔɔ lɛ amɛfɔɔ afã, kɛ yiŋkɔshikɔshi feemɔ ŋmɔlɔ aloo kɛ naatsii wiemɔ kuku akɛ “Mibɛ he miishɛɛ!” Yɛ shihilɛi ni tamɔ nɛkɛ shishi lɛ, hiɛ ni aaamia yɛ odaseyeli nitsumɔ lɛ mli lɛ baanyɛ afee kaa diɛŋtsɛ. Ekaa wɔ tsuishiŋmɛɛ ekwɛɔ. Shi kɛtsɔ Zefania gbalɛ lɛ nɔ lɛ, Yehowa haa ewebii anɔkwafoi lɛ hewalɛ hee, ni ekɛɔ akɛ: “Kaaha onijiaŋ miigbɔjɔ! Yehowa, o-Nyɔŋmɔ lɛ, yɛ oteŋ, nuu ekaalɔ ni aaanyɛ oyiwala ahere ni; eeenya ohe kɛ miishɛɛ, eeefee dioo yɛ esuɔmɔ lɛ mli, emli aaafili lɛ yɛ ohe kɛ nyamɔ lala.”—Zefania 3:16, 17.

17. Mɛɛ nɔkwɛmɔ nɔ fɛfɛo esa akɛ mɛi heei ni yɔɔ tooi krokomɛi lɛ ateŋ lɛ anyiɛ sɛɛ, ni yɛ mɛɛ gbɛ nɔ?

¹⁷ Eji anɔkwa sane yɛ Yehowa webii aŋmɛnɛŋmɛnɛ beaŋ yinɔsane mli akɛ shwɛɛnii lɛ, kɛ agbɛnɛ tooi krokomɛi lɛ ateŋ mɛi ni edara yɛ afii amli lɛ etsu naabuamɔ nitsumɔ kpele diɛŋtsɛ yɛ nɛkɛ naagbee gbii nɛɛ amli. Nɛkɛ Kristofoi anɔkwafoi nɛɛ fɛɛ ejie tsuishiŋmɛɛ kpo yɛ afii nyɔŋmai abɔ ni eho lɛ fɛɛ mli. Amɛŋmɛɛɛ gbɛ ni shikpilikpii feemɔ ni anaa yɛ mɛi ni yɔɔ Kristendom lɛ ateŋ mɛi pii agbɛfaŋ lɛ aha amɛnijiaŋ aje wui. No hewɔ lɛ eba akɛ mɛi heei ni yɔɔ tooi krokomɛi lɛ ateŋ lɛ haŋ shikpilikpii ni mɛi babaoo efee yɛ mumɔŋ nibii ahe, ni anaa babaoo yɛ shikpɔji pii anɔ ŋmɛnɛ lɛ aje amɛnijiaŋ wui kɔkɔɔkɔ. Eba akɛ amɛhaŋ ‘amɛnijiaŋ hu agbɔjɔ,’ aloo amɛnijiaŋ aje wui. Eba akɛ amɛkɛ hegbɛ fɛɛ hegbɛ ni amɛaana lɛ aaatsu nii ni amɛkɛ Buu-Mɔɔ, Awake!, kɛ woji kpakpai krokomɛi babaoo ni aje gbɛ afee koni eye ebua gbɔmɛi ni hiɛ gwantɛŋ su lɛ ni amɛkase anɔkwale ni kɔɔ Yehowa gbi lɛ he, kɛ jɔɔmɔi ni baanyiɛ sɛɛ lɛ ahe nii lɛ aha mɛi.

Wɔya Hiɛ Beni Wɔmɛɔ Gbi Wulu Lɛ!

18, 19. (a) Mɛɛ hewalɛwoo ni akɛhaa wɔ koni wɔŋmɛ wɔtsui shi wɔnaa yɛ Mateo 24:13 kɛ Yesaia 35:3, 4? (b) Kɛ wɔkɛ ekomefeemɔ tee hiɛ yɛ Yehowa sɔɔmɔ mli lɛ, mɛɛ jɔɔmɔ wɔɔna?

¹⁸ Yesu wie akɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) No hewɔ lɛ, ‘wɔnijiaŋ akaje wui,’ ni ‘wɔ nakutsei hu akagbɔjɔ,’ beni wɔmɛɔ Yehowa gbi wulu lɛ! (Yesaia 35:3, 4) Zefania gbalɛ lɛ kɛ nɔmimaa wiemɔ jajeɔ yɛ Yehowa he akɛ: “Nuu ekaalɔ ni aaanyɛ oyiwala ahere ni.” (Zefania 3:17) Hɛɛ, Yehowa baahere “asafo babaoo” lɛ yiwala kɛtsɔ “amanehulu kpeteŋkpele lɛ” naagbee fã lɛ mli, beni efãa e-Bi lɛ koni ekumɔ maŋkwramɔŋ maji ni yaa nɔ “amɛwóɔ amɛhe nɔ” amɛshiɔ ewebii lɛ wɔtsɔwɔtsɔ lɛ.—Kpojiemɔ 7:9, 14; Zefania 2:10, 11; Lala 2:7-9.

¹⁹ Beni Yehowa gbi wulu lɛ bɛŋkɛɔ lɛ, eba akɛ wɔɔya nɔ kɛ ekaa, ni wɔsɔmɔ lɛ kɛ “gbee kome”! (Zefania 3:9) Kɛtsɔ nakai feemɔ nɔ lɛ, wɔ diɛŋtsɛ kɛ mɛi krokomɛi babaoo ni anyɛŋ amɛ akane lɛ, baafee mɛi ni sa akɛ “aaaŋɔ [wɔ] atee yɛ Yehowa mlifu gbi lɛ nɔ,” ni wɔye egbɛi krɔŋkrɔŋ lɛ hetsemɔ lɛ he odase.—Zefania 2:3.

[Shishigbɛ niŋmaa]

Yɛ Emlitii Mli Lɛ

◻ Mɛɛ nibii amli jamɔ shihilɛ ni yɔɔ Kristendom lɛ kɛ nɔ ni hi shi yɛ Zefania gbii lɛ amli lɛ yeɔ egbɔ yɛ?

◻ Maŋkwramɔŋ hiɛnyiɛlɔi ni yɔɔ ŋmɛnɛ lɛ ateŋ mɛi pii je maŋ “lumɛi” ni hi shi yɛ Zefania beaŋ lɛ yɛ mɛɛ gbɛ nɔ?

◻ Mɛɛ shiwoi ni yɔɔ Zefania wolo lɛ mli aha eba mli yɛ shwɛɛnii lɛ anɔ?

◻ Mɛni gbɔmɛi akpekpei abɔ ebayoo?

◻ Mɛni hewɔ esaaa ni wɔnijiaŋ gbɔjɔɔ yɛ Yehowa sɔɔmɔ mli lɛ?

[Mfonirii ni yɔɔ baafa 15]

Taakɛ Zefania ji lɛ, shwɛɛnii anɔkwafoi ni ji Kristofoi ni afɔ amɛ mu lɛ miiya nɔ amɛkɛ ekaa miijaje Yehowa kojomɔi lɛ amɛmiitsɔɔ

[Mfonirii ni yɔɔ baafa 18]

“Tooi krokomɛi” lɛ eŋmɛɛɛ gbɛ ni gbɔmɛi ashikpilikpii feemɔ aha amɛnijiaŋ aje wui