• Feemɔ Nibii Ni Baahã Ekomefeemɔ Aya Nɔ Ahi Asafo Lɛ Mli
    Oyi Aná Wala Kɛya Naanɔ!—Biblia Kasemɔ Ni Baafee Sanegbaa

    • Feemɔ Nibii Ni Baahã Ekomefeemɔ Aya Nɔ Ahi Asafo Lɛ Mli

      Kɛ́ wɔyɛ wɔnyɛmimɛi Kristofoi lɛ ateŋ lɛ, wɔnuɔ he tamɔ Maŋtsɛ David nu he lɛ nɔŋŋ. Ekɛɛ akɛ: “Kwɛ bɔ ni ehi, kwɛ bɔ ni eyɔɔ fɛo akɛ nyɛmimɛi baafee ekome kɛhi shi!” (Lala 133:1) Jeee heniianaa ekomefeemɔ yɔɔ wɔteŋ lɛ. Wɔteŋ mɔ fɛɛ mɔ feɔ nɔ ko koni ekomefeemɔ aya nɔ ahi wɔteŋ.

      1. Mɛni hãa esoroɔ Nyɔŋmɔ webii lɛ kwraa lɛ?

      Kɛ́ otee asafoŋ kpee yɛ maŋ kroko nɔ lɛ, ekolɛ onuŋ wiemɔ ni awieɔ yɛ jɛmɛ lɛ, shi onuŋ he hu akɛ gbɔ ji bo. Mɛni hewɔ? Ejaakɛ ekɔɔɔ he eko he ni wɔyɔɔ lɛ, woji kome too lɛ nɔŋŋ wɔkɛkaseɔ Biblia lɛ. Ni wɔbɔɔ mɔdɛŋ ni wɔjie suɔmɔ kpo wɔtsɔɔ wɔhe. Ekɔɔɔ he eko he ni wɔyɔɔ lɛ, ‘wɔ fɛɛ kwa wɔtsɛɔ Yehowa gbɛ́i lɛ, ni wɔfeɔ ekome kɛsɔmɔɔ lɛ.’​—Zefania 3:9.

      2. Mɛni obaanyɛ ofee koni ekomefeemɔ aya nɔ ahi wɔteŋ?

      Biblia lɛ kɛɛ ‘wɔjɛ wɔtsuiŋ wɔsumɔsumɔɔ wɔhe waa.’ (1 Petro 1:​22) Mɛɛ gbɛ nɔ obaanyɛ okɛ ŋaawoo nɛɛ atsu nii? Okɛ ojwɛŋmɔ ama sui kpakpai ni mɛi yɔɔ lɛ anɔ, moŋ fe amɛgbɔjɔmɔi. Okɛ mɛi ni nyaa nibii ni onyaa he lɛ ahe lɛ pɛ akabɔ; bɔɔ mɔdɛŋ ni ole nyɛmimɛi hii kɛ yei ni esoro amɛ yɛ ohe lɛ hu jogbaŋŋ. Ni kɛ́ aleenɔ wɔnuɔ he akɛ wɔhi fe mɛi krokomɛi lɛ, esa akɛ wɔbɔ mɔdɛŋ waa wɔjie nakai su lɛ yɛ wɔhe.​—Kanemɔ 1 Petro 2:​17.a

      3. Kɛ́ naagba ba okɛ onyɛmi Kristofonyo ko teŋ lɛ, mɛni obaafee?

      Ekomefeemɔ yɛ wɔteŋ moŋ, shi wɔyeee emuu. Bei komɛi lɛ, wɔfeɔ nibii ni dɔɔ wɔnyɛmimɛi lɛ loo eyeɔ amɛ awui po. Enɛ hewɔ lɛ, Nyɔŋmɔ Wiemɔ lɛ kɛɔ wɔ akɛ: “Nyɛyaa nɔ . . . nyɛkɛkea nyɛhe.” Ni ekɛfata he akɛ: “Bɔ ni Yehowa kɛke nyɛ tswaa lɛ, nyɛ hu nyɛfea nakai nɔŋŋ.” (Kanemɔ Kolosebii 3:​13.) Wɔtɔ̃ɔ Yehowa nɔ shii abɔ, shi ekɛ fɛɛ keɔ wɔ. Hewɔ lɛ, ekpaa gbɛ akɛ wɔ hu wɔkɛ wɔnyɛmimɛi lɛ atɔmɔi baake amɛ. Kɛ́ ona akɛ ofee nɔ ko ni egba mɔ ko naa lɛ, bo klɛŋklɛŋ feemɔ nɔ ko kɛsaa nyɛteŋ.​—Kanemɔ Mateo 5:​23, 24.b

      KASEMƆ PII OFATA HE

      Obaana nibii komɛi ni obaanyɛ ofee koni ekomefeemɔ kɛ toiŋjɔlɛ aya nɔ ahi asafo lɛ mli.

      Mfonirii ni ato naa: Nyɛmi nuu ko miitiu toiŋjɔlɛ sɛɛ. 1. Nyɛmi nuu ko kɛ lɛ miiwie bɔ ni esaaa. 2. Eejwɛŋ nɔ ni nyɛmi nuu lɛ wie lɛ he. 3. Eesusu ŋaa ni Biblia lɛ ewo yɛ bɔ ni esa akɛ asaa bei aha lɛ he. 4. Ekɛ nyɛmi nuu lɛ ekpe koni amɛsaa amɛteŋ, ni amɛmiinu tii.

      Mɛni obaanyɛ ofee koni otiu toiŋjɔlɛ sɛɛ?

      4. Bɔɔ mɔdɛŋ ni okanu he akɛ ohi fe mɛi krokomɛi

      Wɔmiisumɔ ni wɔsumɔ wɔnyɛmimɛi lɛ fɛɛ. Shi ekolɛ, ewa kɛhã wɔ akɛ wɔbaasumɔ mɛi ni etamɔ nɔ ni esoro amɛ yɛ wɔhe lɛ. Mɛni baanyɛ awa wɔ? Nyɛkanea Bɔfoi 10:​34, 35 lɛ, ni nyɛsusua sanebimɔi nɛɛ ahe:

      • Yehowa hãa gbɔmɛi srɔtoi fɛɛ batsɔmɔɔ e-Dasefoi. Kɛ́ Yehowa feɔ nakai lɛ, te esa akɛ bo hu ona mɛi ni esoro amɛ yɛ ohe lɛ ohã tɛŋŋ?

      • Mɛɛ nibii mɛi feɔ yɛ he ni nyɛyɔɔ lɛ kɛtsɔɔ akɛ amɛhi fe mɛi krokomɛi? Mɛni hewɔ osumɔŋ ni okase amɛ lɛ?

      Nyɛkanea 2 Korintobii 6:​11-13 lɛ, ni nyɛsusua sanebimɔ nɛɛ he:

      • Mɛni obaanyɛ ofee koni osumɔ nyɛmimɛi hii kɛ yei ni esoro amɛ yɛ ohe lɛ waa?

      5. Jɛɛ osuɔmɔ mli okɛ tɔmɔi ake ni otiu toiŋjɔlɛ sɛɛ

      Eyɛ mli akɛ Yehowa tɔ̃ŋ wɔnɔ moŋ, shi kɛ́ wɔtɔ̃ enɔ lɛ ejɛɔ esuɔmɔ mli ekɛkeɔ wɔ. Nyɛkanea Lala 86:5 lɛ, ni nyɛsusua sanebimɔi nɛɛ ahe:

      • Mɛni ŋmalɛ nɛɛ tsɔɔ bo yɛ bɔ ni Yehowa kɛ eshai keɔ lɛ he?

      • Mɛni hewɔ ohiɛ sɔɔ bɔ ni ekɛ eshai keɔ lɛ?

      • Mɛɛ shihilɛi baanyɛ ahã ewa kɛhã wɔ akɛ wɔbaahã toiŋjɔlɛ aya nɔ ahi wɔ kɛ mɛi ateŋ?

      Mɛɛ gbɛ nɔ wɔbaanyɛ wɔkase Yehowa koni toiŋjɔlɛ aya nɔ ahi wɔ kɛ wɔnyɛmimɛi lɛ ateŋ? Nyɛkanea Abɛi 19:​11 lɛ, ni nyɛsusua sanebimɔ nɛɛ he:

      • Kɛ́ mɔ ko fee nɔ ko ni egba onaa lɛ, mɛni obaanyɛ ofee koni nyɛteŋ akafite?

      Bei komɛi lɛ, wɔfeɔ nibii ni gbaa mɛi krokomɛi anaa. Kɛ́ eba lɛ nakai lɛ, mɛni esa akɛ wɔfee? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

      VIDIO: Kɛ́ Wɔsaa Wɔkɛ Mɛi Ateŋ lɛ, Ekɛ Jɔɔmɔi Baa (6:01)

      • Mɛni nyɛmi yoo lɛ fee koni toiŋjɔlɛ aya nɔ ahi ekɛ enyɛmi lɛ teŋ?

      6. Okɛ ojwɛŋmɔ ama onyɛmimɛi lɛ asui kpakpai lɛ anɔ

      Kɛ́ wɔkɛ wɔnyɛmimɛi lɛ bɔ waa lɛ, wɔnaa amɛsui kpakpai lɛ kɛ amɛfatɔi. Mɛɛ gbɛ nɔ wɔbaanyɛ wɔkɛ wɔjwɛŋmɔ ama amɛsui kpakpai lɛ anɔ? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

      VIDIO: Yaa Nɔ Ofee Ohe Kristofonyo Kpakpa! (5:10)

      • Mɛni baanyɛ awa bo ni ona sui kpakpai ni onyɛmimɛi hii kɛ yei lɛ yɔɔ lɛ?

      Yehowa kɛ ejwɛŋmɔ maa wɔsui kpakpai lɛ anɔ. Nyɛkanea 2 Kronika 16:9a lɛ, ni nyɛsusua sanebimɔ nɛɛ he:

      • Te le ni ole akɛ Yehowa kɛ ejwɛŋmɔ maa osui kpakpai lɛ anɔ lɛ hãa onuɔ he ohãa tɛŋŋ?

      Daimɔnd ga ko.

      Kɛ́ okwɛ daimɔnd fɛfɛo ko jogbaŋŋ lɛ, obaana akɛ jeee nɔ fɛɛ nɔ eja pɛpɛɛpɛ yɛ he, shi loloolo lɛ ejara wa. Nakai nɔŋŋ wɔnyɛmimɛi hii kɛ yei lɛ fɛɛ yeee emuu moŋ, shi amɛjara wa hã Yehowa

      MƐI KOMƐI KƐƆ AKƐ: “Dani mikɛ mɔ ko he baake lɛ lɛ, ja ekpa mi fai dã.”

      • Mɛni hewɔ esa akɛ wɔjɛ wɔsuɔmɔ mli wɔkɛ mɛi atɔmɔi ake amɛ lɛ?

      EMLI OTI

      Kɛ́ okɛ nyɛmimɛi lɛ fɛɛ ahe keɔ amɛ ni ojieɔ suɔmɔ kpo otsɔɔ amɛ lɛ, no baahã ekomefeemɔ aya nɔ ahi asafo lɛ mli.

      Mɛni Okase?

      • Mɛni baawa bo ni okanu he akɛ ohi fe mɛi krokomɛi?

      • Kɛ́ naagba ba okɛ onyɛmi Kristofonyo ko teŋ lɛ, mɛni obaafee?

      • Mɛni hewɔ osumɔɔ ni okase Yehowa ni okɛ mɛi atɔmɔi ake amɛ lɛ?

      Nɔ Ni Obaanyɛ Ofee

      EHE SAJI KROKOMƐI

      Obaana bɔ ni abɛbua ko ni Yesu gba lɛ baanyɛ awa wɔ ni wɔkpa mɛi kojomɔ.

      Jiemɔ Mplaŋ Lɛ (6:56)

      Kɛ́ wɔnu he akɛ jeee wɔ tɔmɔ lɛ jɛ po lɛ, ani ehe baahia ni wɔkpa fai?

      “Faikpamɔ​—Gbɛ ni Hi Jogbaŋŋ ni Akɛtaoɔ Toiŋjɔlɛ” (Buu-Mɔɔ, November 1, 2002)

      Obaana bɔ ni mɛi komɛi ekase bɔ ni amɛkɛ mɛi baaye amɛhã ni amɛkwɛɛɛ hiɛiaŋ.

      Kaakwɛ Kponɔgbɛ Okojo (6:42)

      Obaana bɔ ni obaafee osaa okɛ mɛi ateŋ dani efite toiŋjɔlɛ ni yɔɔ asafo lɛ mli lɛ.

      “Nyɛjɛa Suɔmɔ Mli Nyɛsaa Bei” (Buu-Mɔɔ, May 2016)

      a Saji Krokomɛi 6 lɛ hãa wɔnaa akɛ, suɔmɔ tsirɛɔ Kristofoi ni amɛkwɛɔ jogbaŋŋ koni amɛkɛ hela ko akatsɛŋe mɛi krokomɛi.

      b Saji Krokomɛi 7 lɛ tsɔɔ bɔ ni wɔɔfee wɔtsu nitsumɔ mli naagbai kɛ mla saji ahe nii.