Wiemɔ Wiemɔ Krɔŋŋ Lɛ Ni Ohi Shi Kɛya Naanɔ!
“Nyɛtaoa Yehowa sɛɛ gbɛ, . . . Nyɛtaoa jalɛ sɛɛ gbɛ, nyɛtaoa heshibaa sɛɛ gba. Ekolɛ aaaŋɔ nyɛ atee yɛ Yehowa mlifu gbi lɛ nɔ.”—ZEFANIA 2:3.
1. (a) Mɛɛ gbɛi anɔ nikaselɔi tsɔɔ amɛkaseɔ maŋ kroko nɔ wiemɔ? (b) Mɛni hewɔ esa akɛ wɔwie wiemɔ krɔŋŋ lɛ?
NIKASELƆI ni miikase wiemɔ hee ko lɛ nyɛɔ amɛtsɔɔ wiemɔ lɛ he mlai aloo wiemɔ lɛ diɛŋtsɛ nɔ amɛkaseɔ. Kɛ amɛkɛ wiemɔ lɛ he mlai miikase lɛ, amɛfɔɔ woji ni aŋmala yɛ he kɛ mlai ni atsɔɔ yɛ mli lɛ kɛ nitsumɔ. Kɛ amɛmiitsɔ ewiemɔ diɛŋtsɛ nɔ amɛkɛkase hu lɛ, amɛbɔɔ mɔdɛŋ ni amɛnyɛ amɛtsɛ wiemɔi lɛ ni egbɛɛ ni etsara nɔ hu tamɔ bɔ ni amɛtsɔɔlɔ lɛ tsɛɔ lɛ lɛ pɛpɛɛpɛ. Akɛ gbɛi enyɔ nɛɛ fɛɛ tsuɔ nii yɛ “wiemɔ krɔŋŋ” lɛ kasemɔ mli. Ni kɛji wɔhiɛ ka nɔ akɛ aaaŋɔ wɔ “atee yɛ Yehowa mlifu gbi lɛ nɔ” lɛ, no lɛ ehe miihia ni wɔwie wiemɔ krɔŋŋ lɛ.—Zefania 2:1-3; 3:8, 9.
2. Mɛɛ gbɛ nɔ wɔɔtsɔ wɔkase nɔ ni abaanyɛ atsɛ lɛ akɛ wiemɔ krɔŋŋ lɛ he mlai lɛ yɛ?
2 Wolo titri ni atsɔɔ nɔ akaseɔ wiemɔ krɔŋŋ lɛ ji Biblia lɛ. Ekasemɔ kɛ ekaa kɛ agbɛnɛ Biblia-kasemɔ woji krokomɛi lɛ hu tsɔɔ bo nɔ ni wɔɔnyɛ wɔtsɛ lɛ wiemɔ krɔŋŋ lɛ he wiemɔ he mlai lɛ jogbaŋŋ. Shia Biblia mli nikasemɔ ni Yehowa Odasefonyo ko kɛ bo aaafee lɛ baafee shishijee gbɛ kpakpa. Ni kɛha mɛi ni ejɔɔ amɛhe nɔ amɛha Nyɔŋmɔ momo lɛ, Ŋmalɛi lɛ akasemɔ daa kɛ ekaa hu lɛ he miihia waa. Shi ani gbɛi titrii ni mɔɔ shi jogbaŋŋ komɛi yɛ ni atsɔɔ nɔ akaseɔ wiemɔ krɔŋŋ lɛ? Ni mɛɛ sɛɛnamɔi jɛɔ ewiemɔ mli baa?
Bɔ ni Ooofee Okase Wiemɔ Krɔŋŋ Lɛ
3. Mɛni ji gbɛ kome ni wɔɔtsɔ nɔ wɔkase wiemɔ krɔŋŋ lɛ?
3 Gbɛ kome ni oootsɔ nɔ okase wiemɔ krɔŋŋ lɛ ji ni okɛ anɔkwalei ni okaseɔ lɛ ato otii ni ole momo lɛ ahe, taakɛ nikaselɔ ko baaya nɔ asusu wiemɔ he mlai heei ni ekaseɔ lɛ ahe lɛ. Akɛ nɔkwɛmɔ nɔ lɛ, be ko lɛ ekolɛ ole akɛ Yesu Kristo ji Nyɔŋmɔ Bi, shi enitsumɔi ahe nɔ ko bibioo pɛ ole. Kɛjɛ nakai beaŋ kɛbaa nɛɛ, ekolɛ Biblia lɛ kasemɔ eha ole akɛ Kristo miiye nɔ bianɛ akɛ ŋwɛi Maŋtsɛ, ni akɛ yɛ e-Afii Akpe Maŋtsɛyeli lɛ mli lɛ, abaahole adesai toibolɔi fɛɛ anɔ kɛshɛ emuuyeli mli. (Kpojiemɔ 20:5, 6) Hɛɛ, shishinumɔ hee ni wɔkɛaato nɔ ni wɔle momo lɛ he lɛ haa bɔ ni wɔkaseɔ wiemɔ krɔŋŋ lɛ wɔhaa lɛ yaa hiɛ.
4. (a) Mɛni ji gbɛ kroko ni wɔɔtsɔ nɔ wɔkase wiemɔ krɔŋŋ lɛ he ‘mlai’ lɛ, ni mɛɛ Biblia mli sane ko abaanyɛ akɛfee enɛ he mfoniri? (b) Mɛni ba beni Gideon kɛ hii ohai etɛ ni fata ehe lɛ tee ta lɛ? (d) Mɛni wɔkaseɔ yɛ Gideon he sane lɛ mli?
4 Gbɛ kroko ni wɔɔtsɔ nɔ wɔkase wiemɔ krɔŋŋ lɛ he ‘mlai’ ji ni wɔfee Biblia mli nibii ahe mfoniri yɛ wɔjwɛŋmɔ mli. Akɛ nɔkwɛmɔ nɔ lɛ: Bɔɔ mɔdɛŋ ni ‘ona ni onu’ sane ni aŋma yɛ Kojolɔi 7:15-23 lɛ hu. Naa! Israel kojolɔ Gideon eja etabilɔi lɛ amli efee amɛ kui etɛ, ni kui lɛ eko fɛɛ eko hiɛ mɛi oha. Kɛkɛ ni amɛkpeleke shi blɛoo kɛjɛ Gilboa gɔŋ lɛ nɔ yɛ duŋ lɛ mli ni amɛbabɔle Midianbii ni ewɔ lɛ ŋsra lɛ he fɛɛ kɛkpe. Ani nɛkɛ mɛi ohai etɛ nɛɛ ewula amɛhe jogbaŋŋ? Jeee yɛ tawuu nibii agbɛfaŋ. Ojogbaŋŋ, mɛi ni ji tabilɔi ni woɔ amɛhe nɔ lɛ baaye amɛhe fɛo kɛ ŋmɔlɔ babaoo diɛŋtsɛ! Mɔ fɛɛ mɔ hiɛ tɛtrɛmaŋtɛrɛ, nu kpulu agbo, kɛ kɔti yɛ nu kpulu lɛ mli. Shi bo toi! Kɛ eha amɛ okadi lɛ, mɛi oha ni fata Gideon he lɛ baakpa amɛ tɛtrɛmaŋtɛrɛi lɛ ni amɛbaajwara amɛ nu kpuji lɛ. Nakai nɔŋŋ mɛi ohai enyɔ krokomɛi lɛ hu baafee. Beni amɛ fɛɛ amɛholeɔ amɛkɔtii ni tsoɔ lɛ anɔ lɛ, obaanu ni amɛmiibolɔ akɛ: “Yehowa kɛ Gideon klante!” Kwɛ bɔ ni enɛ wo Midianbii lɛ ahe gbeyei eha! Kɛkɛ ni amɛwo foi kɛ tɛrɛmɔ kɛjɛ amɛbuui lɛ amli, ni amɛhiŋmɛii ni etsii kɛ wɔ lɛ egbele kɛ gbeyeishemɔ kɛmiikwɛ la ni tsoɔ ni tumɔɔ tamɔ nibii ni he yɔɔ gbeyei asusumai ni ewoɔ amɛhe gbeyei lɛ. Beni Midianbii lɛ bɔi foijee lɛ, Gideon hii lɛ tee nɔ amɛkpa amɛ tɛtrɛmaŋtɛrɛi lɛ, ni Nyɔŋmɔ ha amɛ-henyɛlɔi lɛ tsɔ amɛhiɛ amɛwo amɛ diɛŋtsɛ amɛhe. Mɛɛ wiemɔ krɔŋŋ lɛ mli nikasemɔ ni woɔ mɔ hewalɛ nɛ! Nyɔŋmɔ baanyɛ akpɔ̃ etsuji ni ekɛ adesai asraafoi tsuuu nii. Ni kɛfata he lɛ, “Yehowa gbɛi kpeteŋkpele lɛ hewɔ lɛ, ekwaŋ emaŋ lɛ.”—1 Samuel 12:22.
5. Mɛɛ gbɛ nɔ Kristofoi akpeei baanyɛ aye abua wɔ ni wɔwiemɔ he atse yɛ?
5 Kɛ aatsɔɔ nikaselɔi maŋ nɔ wiemɔ kroko kɛtsɔ wiemɔ lɛ diɛŋtsɛ kɛ nitsumɔ nɔ lɛ, amɛbɔɔ mɔdɛŋ ni amɛ hu amɛtsɛ tsɔɔlɔ lɛ wiemɔi lɛ ni egbɛɛ ni etsara nɔ nakai pɛpɛɛpɛ. Mɛɛ hegbɛi kpakpai wɔna ni wɔkɛaawie wiemɔ krɔŋŋ lɛ yɛ Kristofoi akpeei ashishi nɛkɛ! Jɛmɛ ji he ni wɔnuɔ ni mɛi krokomɛi miiwie yɛ nakai wiemɔ ni ji Ŋmalɛ mli anɔkwalei lɛ amli, ni ekolɛ wɔ hu wɔɔna hegbɛ akɛ wɔwie eko. Ani wɔsheɔ gbeyei akɛ wɔɔwie nɔ ko ni ejaaa? Ekaba akɛ no aaafee nɔ ni wɔsusuɔ he fe fɛɛ, ejaakɛ jajemɔ ni onukpa ni kwɛɔ nakai kpee, tamɔ daa otsi Buu-Mɔɔ Nikasemɔ lɛ nɔ lɛ aaajɛ suɔmɔ mli ejaje tɔmɔ lɛ baaha wɔwiemɔ lɛ he atse. No hewɔ lɛ, yaa Kristofoi akpeei daa ni okɛ ohe awo mli hu.—Hebribii 10:24, 25.
Nibii ni he Tseee ni Aaaba Mli
6. Mɛni hewɔ ni sɔrɔtofeemɔ yɔɔ Yehowa Odasefoi kɛ Kristendom jamɔ gbɛjianɔtoi lɛ ateŋ lɛ?
6 Mɛi ni jajeɔ Yehowa yiŋtoo ni amɛtswaa eŋwɛi Maŋtsɛyeli lɛ he adafi lɛ wieɔ wiemɔ krɔŋŋ lɛ akɛ e-Dasefoi. Amɛhaa aleɔ egbɛi lɛ ni amɛsɔmɔɔ lɛ “kɛ gbee kome,” aloo kɛ shishinumɔ kome. (Zefania 3:9) Eyɛ mli akɛ Kristendom jamɔi lɛ yɛ Biblia lɛ moŋ, shi amɛwieee wiemɔ krɔŋŋ lɛ aloo ni amɛaatsɛ Nyɔŋmɔ gbɛi yɛ hemɔkɛyeli mli. (Yoel 3:5) Amɛbɛ shɛɛ sane ko ni kɛ ehe kpaa gbee ni damɔ Ŋmalɛi lɛ anɔ. Mɛni hewɔ? Ejaakɛ amɛkɛ jamɔ mli blema saji, jeŋ nilee, kɛ maŋkwramɔŋ nitsumɔi yeɔ klɛŋklɛŋ gbɛhe yɛ Nyɔŋmɔ Wiemɔ lɛ hiɛ. Amɛ yiŋtoi, hiɛnɔkamɔ, kɛ gbɛi ni amɛtsɔɔ nɔ amɛfeɔ amɛnii lɛ ji jeŋ fɔŋ nɛɛ nɔ.
7. Mɛɛ sɔrɔtofeemɔi ni anaa yɛ Yehowa Odasefoi kɛ apasa jamɔi lɛ ateŋ awie he yɛ 1 Yohane 4:4-6?
7 Kristendom—yɛ anɔkwale mli lɛ, jeŋ apasa jamɔ maŋtsɛyeli lɛ fɛɛ—ewieee wiemɔ kome ni Yehowa Odasefoi wieɔ lɛ. Nɔ ni yɔɔ miishɛɛ ji akɛ, bɔfo Yohane ŋma wolo eyaha mɛi ni wieɔ wiemɔ krɔŋŋ lɛ akɛ: “Nyɛ lɛ nyɛjɛ Nyɔŋmɔ mli, ni nyɛye amɛnɔ kunim; ejaakɛ mɔ ni yɔɔ nyɛmli lɛ da fe mɔ ni yɔɔ je lɛŋ lɛ. Amɛ lɛ, je lɛŋ amɛjɛ, no hewɔ lɛ amɛwieɔ akɛ mɛi ni jɛ je lɛŋ, ni je lɛ boɔ amɛ toi. Wɔ lɛ, Nyɔŋmɔ mli wɔjɛ; mɔ ni le Nyɔŋmɔ lɛ, eboɔ wɔ toi; mɔ ni jɛɛɛ Nyɔŋmɔ mli lɛ, ebooo wɔ toi.” (1 Yohane 4:4-6) Yehowa tsuji eye amale tsɔɔlɔi lɛ anɔ kunim, ejaakɛ Nyɔŋmɔ, mɔ ni kɛ ewebii efee ekome lɛ “da fe [Abonsam] ni kɛ je lɛ,” ni ji adesai agbɛjianɔtoo fɔŋ lɛ efee ekome lɛ. Akɛni hemɔkɛyeli kwalɔi lɛ, “je lɛŋ amɛjɛ,” ni amɛyɛ emumɔ fɔŋ lɛ hu eko hewɔ lɛ, “amɛwieɔ akɛ mɛi ni jɛ je lɛŋ, ni je lɛ boɔ amɛ toi.” Shi aŋkroaŋkroi ni tamɔ gwantɛŋi lɛ boɔ mɛi ni jɛ Nyɔŋmɔ mli lɛ toi, ni amɛyooɔ akɛ Yehowa webii wieɔ wiemɔ krɔŋŋ ni ji Biblia mli anɔkwale ni ekɛhaa kɛtsɔ egbɛjianɔtoo lɛ nɔ lɛ.
8. Mɛni akɛyooɔ mlakwamɔ gbɔmɔ lɛ jogbaŋŋ?
8 Agba hemɔkɛyeli kwamɔ kpeteŋkpele ko he sane afɔ shi, ni ‘mlakwamɔ he teemɔŋ sane’ lɛ je shishi mra mli yɛ Ŋ.B. lɛ mli klɛŋklɛŋ afii oha lɛ mli tɔɔ. Yɛ be fioo sɛɛ lɛ, hii ni kpɛlɛ nitsɔɔmɔ gbɛhei anɔ—aloo amɛkɛ ekaa shɔ̃—yɛ asafo lɛ mli lɛ tsɔɔ amale tsɔɔmɔi pii. Amɛwiemɔ lɛ he tseee bibioo po. No hewɔ lɛ “mlakwamɔ gbɔmɔ” kuu, ni ji Kristendom osɔfoi lɛ bate shi, ni amɛkɛ amɛhe kpɛtɛ amale jamɔ mli blema saji, jeŋ nilee, kɛ tsɔɔmɔi ni damɔɔɔ Ŋmalɛi anɔ lɛ ahe.—2 Tesalonikabii 2:3, 7.
Aanu Wiemɔ Krɔŋŋ lɛ yɛ Jeŋ Fɛɛ
9. Mɛɛ jamɔ mli nifeemɔ baje kpo yɛ afii ohai 19 lɛ mli.
9 Gbɔmɛi akuu fioo ko ni sheɔ Nyɔŋmɔ gbeyei lɛ pɛ ‘pele hemɔkɛyeli ni atuu awo krɔŋkrɔŋbii lɛ adɛŋ shikome lɛ he.’ (Yuda 3) Nɛgbɛ abaanyɛ ana nakai heyelilɔi lɛ yɛ? Yɛ afii ohai abɔ lɛ fɛɛ mli lɛ, apasa jamɔ ha gbɔmɛi babaoo hi mumɔŋ duŋ mli, ni mɛi ni Nyɔŋmɔ le amɛ pɛ ji mɛi fioo ni na enɔkpɛlɛmɔ lɛ. (2 Timoteo 2:19) Shi anu gbeei sɔrɔtoi ni soro nomɛi yɛ jamɔ mli yiŋfutumɔ ni tamɔ babel nɔ lɛ he kɛfata jarayeli, dadei ahe nitsumɔ, kɛ adesai ashihilɛ mli tsakemɔi ni ba yɛ afii ohai 19 lɛ mli lɛ he. Kui bibii ka akɛ amɛaatsɔɔ bei lɛ ahe okadii lɛ ashishi ni amɛka amɛyiŋ amɛkɛtsɔɔ Yesu baa ni ji enyɔ lɛ shishi, shi jeee amɛ fɛɛ amɛwie wiemɔ krɔŋŋ lɛ.
10. Mɛɛ kuu ni wieɔ “baa ni ji enyɔ” lɛ he Nyɔŋmɔ hala ni amɛwie wiemɔ krɔŋŋ lɛ, ni mɛni hewɔ anaa faŋŋ akɛ Yehowa nine fata amɛhe lɛ?
10 Shi, yɛ 1879 lɛ, “baa ni ji enyɔ” lɛ he gbee ni Yehowa halaa koni amɛwie wiemɔ krɔŋŋ lɛ akɛ e-Dasefoi lɛ baafee faŋŋ ni ana. Yɛ nakai beaŋ lɛ, Biblia kaselɔi akuu ko ni Charles Taze Russell ji amɛhiɛnyiɛlɔ lɛ kpeɔ yɛ Pittsburgh, Pennsylvania, yɛ U.S. Amerika. Amɛna nɔmimaa diɛŋtsɛ akɛ Yesu baa ni ji enyɔ lɛ baaje ebaa ni anaaa lɛ lɛ shishi, ni akɛ jeŋ jaramɔ be ko ka amɛhiɛ, ni nɔ ni baanyiɛ no sɛɛ ji Kristo Afii Akpe Nɔyeli ni kɛ Paradeiso baasaa aba shikpɔŋ nɔ ekoŋŋ, kɛ naanɔ wala kɛha adesai toibolɔi lɛ. Yɛ July 1879 mli lɛ, nɛkɛ Biblia kaselɔi nɛɛ bɔi wolo tɛtrɛɛ ni amrɔ nɛɛ ale akɛ Buu-Mɔɔ lɛ kalamɔ. Klɛŋklɛŋ nɔ ni akala lɛ mli 6,000 pɛ aja. Shi “Nuŋtsɔ lɛ [Yehowa] nine” fata nakai Odasefoi lɛ ahe, ejaakɛ amrɔ nɛɛ akalaa nakai wolo lɛ yɛ wiemɔi 111 mli, ni kɛ aja mli pɛpɛɛpɛ lɛ, eko fɛɛ eko ni jeɔ kpo lɛ, akalaa nɔ ni fe ekomekomei 15,000,000.—Okɛto Bɔfoi lɛ Asaji 11:19-21 he.
11, 12. Mɛni ji Ŋmalɛ mli anɔkwalei ni mɛi ni wieɔ wiemɔ krɔŋŋ lɛ nu shishi lɛ ekomɛi?
11 Kɛtsɔ Biblia lɛ kɛ Yehowa Odasefoi awoji lɛ anɔ, kɛ titri lɛ kɛtsɔ ekaa ni nɛkɛ Kristofoi nɛɛ kɛjajeɔ sanekpakpa lɛ nɔ lɛ, abana ale wiemɔ krɔŋŋ lɛ yɛ je lɛŋ hei sɔrɔtoi fɛɛ. Ni mɛɛ sɛɛnamɔi wuji mɛi ni wieɔ lɛ naa mli ŋɔɔmɔ nɛkɛ! Ni amɛaakɛɛ akɛ ‘Nyɔŋmɔ ji Nyɔŋmɔ, Kristo ji Nyɔŋmɔ, ni Mumɔ Krɔŋkrɔŋ lɛ ji Nyɔŋmɔ’ yɛ naakpɛɛ Triniti wiemɔ ni anuuu shishi lɛ mli moŋ lɛ, amɛkɛ Biblia lɛ shidaamɔ ni tsɔɔ akɛ Yehowa ji Mɔ ni Kwɔ Fe Fɛɛ, ni Yesu Kristo ni baa shi lɛ ji E-Bi, ni mumɔ krɔŋkrɔŋ lɛ ji Nyɔŋmɔ nitsumɔ hewalɛ ni yɔɔ naakpɛɛ lɛ kpaa gbee. (1 Mose 1:2; Lala 83:19; Mateo 3:16, 17) Mɛi ni wieɔ wiemɔ krɔŋŋ lɛ le akɛ gbɔmɔ adesa jeee bɔɔ nɔ kroko ni wala yɔɔ emli ni baa shi fe lɛ mli, shi moŋ Nyɔŋmɔ ni yɔɔ suɔmɔ lɛ ji mɔ ni bɔ lɛ. (1 Mose 1:27; 2:7) Amɛyoo akɛ susuma lɛ ehiii shihilɛ mli dɔŋŋ yɛ gbele sɛɛ—ni enɛ ji anɔkwale ko ni ejie gbohii ahe gbeyeishemɔ lɛ kwraa kɛtee. (Jajelɔ 9:5, 10; Ezekiel 18:4) Anuɔ hɛl shishi akɛ adesai fɛɛ akwamaŋ gbonyobu, ni ejeee he ko ni nyɔŋmɔ ni yitsoŋ wa waa ko piŋɔ mɛi yɛ la mli yɛ. (Hiob 14:13) Agbɛnɛ hu amɛle akɛ gbohiiashitee lɛ ji hiɛnɔkamɔ ni Nyɔŋmɔ kɛhaa kɛha mɛi ni egboi lɛ.—Yohane 5:28, 29; 11:25; Bɔfoi lɛ Asaji 24:15.
12 Mɛi ni wieɔ wiemɔ krɔŋŋ lɛ jieɔ bulɛ kpo amɛhaa lá kɛ wala. (1 Mose 9:3, 4; Bɔfoi lɛ Asaji 15:28, 29) Amɛyooɔ akɛ Kristo wala yɛ shikpɔŋ nɔ lɛ ji kpɔmɔ nɔ jara ni awoɔ ahaa adesai toibolɔi lɛ. (Mateo 20:28; 1 Yohane 2:12) Amɛsɔleee amɛhaaa “hetselɔi” kɔkɔɔkɔ, ejaakɛ amɛle akɛ esa akɛ amɛsɔle amɛha Yehowa Nyɔŋmɔ kɛtsɔ Yesu Kristo nɔ. (Yohane 14:6,13,14) Akɛni Nyɔŋmɔ Wiemɔ lɛ buɔ wɔŋjamɔ fɔ hewɔ lɛ, amɛkɛ amagai tsuuu nii yɛ amɛjamɔ lɛ mli. (2 Mose 20:4-6; 1 Korintobii 10:14) Ni amɛtsiɔ amɛhe kɛjɛɔ amanehului ni jɛɔ daimonioi anifeemɔi amli baa lɛ he ejaakɛ amɛtsiɔ amɛhe kɛjeɔ mumɔi atsɛmɔ ni Biblia lɛ buɔ lɛ fɔ lɛ hu he.—5 Mose 18:10-12; Galatabii 5:19-21.
13. Mɛni hewɔ mɛi ni wieɔ wiemɔ krɔŋŋ lɛ ayiŋ futuuu amɛ lɛ?
13 Yehowa tsuji, mɛi ni wieɔ wiemɔ krɔŋŋ lɛ, ayiŋ futuuu amɛ yɛ he ni wɔshɛ yɛ beebuu naa nɛɛ mli. Yehowa etsɔɔ amɛ akɛ “naagbee be lɛ” mli amɛyɔɔ lɛ, ni Yesu eba akɛ mumɔ ni awo ehiɛ nyam ni anaaa lɛ. (Daniel 12:4; Mateo 24:3-14; 2 Timoteo 3:1-5; 1 Petro 3:18) Ni akɛni ŋwɛi tai kpele ko nyiɛ esɛɛ hewɔ lɛ, eshwɛ fioo ni Kristo baata okpɔŋɔ nɔ kɛwuu ta ni ekɛtsu Nyɔŋmɔ kojomɔ he nii eshi nɛkɛ nibii agbɛjianɔtoo nɛɛ. (Daniel 2:44; Kpojiemɔ 16:14, 16; 18:1-8; 19:11-21) Hɛɛ, ni mɛi ni wieɔ wiemɔ krɔŋŋ lɛ kɛ amɛbe fɛɛ miijaje sanekpakpa lɛ akɛ etsɛŋ ni Nyɔŋmɔ Maŋtsɛyeli ni yɔɔ Kristo shishi lɛ kɛ jɔɔmɔi ni yɔɔ nyam baaba abaha adesai toibolɔi fɛɛ yɛ paradeiso shikpɔŋ nɔ. (Yesaia 9:6, 7; Daniel 7:13, 14; Mateo 6:9, 10; 24:14; Luka 23:43) Ni kɛ wɔbua enɛɛmɛi fɛɛ naa lɛ, ehiɛ kɛkɛ wɔkpa nɛɛ. Eka shi faŋŋ akɛ, wiemɔ krɔŋŋ lɛ ji wiemɔ ni ŋɔɔ fe fɛɛ, wiemɔ ni abuɔ fe fɛɛ yɛ shikpɔŋ nɔ!
14. Mɛɛ sɛɛnamɔi krokomɛi mɛi ni wieɔ wiemɔ krɔŋŋ lɛ naa mli ŋɔɔmɔ?
14 Sɛɛnamɔi ni jɛɔ mli baa haa mɛi ni wieɔ wiemɔ krɔŋŋ lɛ ekomɛi ji “Nyɔŋmɔ toiŋjɔlɛ” lɛ ni buɔ amɛtsuii kɛ amɛjwɛŋmɔi ahe lɛ. (Filipibii 4:6, 7, New World Translation) Amɛboɔ Biblia mli mlai, ni haa gbɔmɔtsoŋ hewalɛ kpakpa, miishɛɛ, kɛ tsui ni nyɔɔ mɔ mli ni anaa kɛjɛɔ Yehowa suɔmɔnaa nifeemɔ mli lɛ yaa hiɛ lɛ atoi. (1 Korintobii 6:9, 10) Hɛɛ, ni mɛi ni wieɔ wiemɔ krɔŋŋ lɛ yɛ naanɔ wala he hiɛnɔkamɔ yɛ jeŋ hee ni Nyɔŋmɔ ewo shi yɛ he lɛ mli.—2 Petro 3:13.
Okɛtsu Nii, no lɛ Ebaaje Odɛŋ
15. Mɛɛ gbɛ nɔ ooona wiemɔ krɔŋŋ lɛ shishi ni ooonu jogbaŋŋ lɛ he sɛɛ yɛ?
15 Kɛji obaanyɛ owie wiemɔ krɔŋŋ lɛ yɛ jeŋ hee lɛ mli lɛ, no lɛ esa akɛ ole wiemɔ lɛ jogbaŋŋ aahu akɛ eeetsɔ wiemɔ mli ni osusuɔ nii ahe yɛ. Kɛji mɔ ko miikase wiemɔ ko lɛ, klɛŋklɛŋ lɛ esusuɔ saji ahe yɛ lɛ diɛŋtsɛ emaŋ wiemɔ mli ni etsɔɔ ejwɛŋmɔi lɛ ashishi kɛbaa wiemɔ hee lɛ mli. Shi beni enaa tseɔ yɛ wiemɔ hee lɛ mli lɛ, ebɔiɔ saji ahe susumɔ yɛ wiemɔ hee lɛ mli ni ehe ehiaaa ni etsɔɔ shishi dani enu shishi. Nakai nɔŋŋ kɛtsɔ nikasemɔ kɛ ekaa nɔ lɛ, obaanyɛ onu wiemɔ krɔŋŋ lɛ shishi jogbaŋŋ, ni eeeha ole bɔ ni ooofee okɛ Biblia mlai kɛ shishitoo mlai atsu naagbai ahe nii koni oya nɔ onyiɛ “wala gbɛ lɛ” nɔ.—Lala 16:11.
16. Mɛni baanyɛ aba kɛji ofɔɔɔ wiemɔ krɔŋŋ lɛ wiemɔ daa?
16 Esa akɛ okɛ wiemɔ krɔŋŋ lɛ atsu nii daa, kɛ jeee nakai lɛ ohiɛ baakpa bɔ ni onyɛɔ owieɔ lɛ jogbaŋŋ ohaa lɛ nɔ. Kɛ wɔɔfee he mfoniri lɛ: Afii komɛi ni eho nɛ lɛ, wɔteŋ mɛi komɛi kase maŋsɛɛ wiemɔ. Ekolɛ wɔbaanyɛ wɔkai bɔ ni atsɛɔ wiemɔi komɛi yɛ nakai wiemɔ lɛ mli, shi ekolɛ wɔnyɛɛɛ wɔwie jogbaŋŋ ejaakɛ wɔkɛfɔɔɔ nitsumɔ. Nakai nɔŋŋ ebaanyɛ ebalɛ yɛ wiemɔ krɔŋŋ lɛ gbɛfaŋ. Kɛ wɔkɛtsuuu nii daa lɛ, hewalɛ ni wɔyɔɔ yɛ ekɛ nitsumɔ nɔ baalaaje kwraa, ni enɛ baanyɛ ekɛ osharai aba wɔnɔ yɛ mumɔŋ. No hewɔ lɛ nyɛhaa wɔwiea daa yɛ wɔkpeei ashishi kɛ Kristofoi asɔɔmɔ nitsumɔ lɛ hu mli. Nɛkɛ nitsumɔi nɛɛ, kɛ teemɔŋ nikasemɔ baaye abua wɔ ni wɔwie nibii yɛ gbɛ ni ja nɔ yɛ wiemɔ krɔŋŋ lɛ mli. Ni kwɛ bɔ ni nakai feemɔ he hiaa ha!
17. Mɛɛ sane ko feɔ bɔ ni wiemɔ nyɛɔ ehereɔ mɔ yiwala loo ekpataa mɔ hiɛ lɛ he mfoniri?
17 Wiemɔ baanyɛ ahere mɔ yiwala loo ekpata mɔ hiɛ. Afee enɛ faŋŋ yɛ béi ko ni ba Israel akutso ni ji Efraim kɛ Kojolɔ Yefta ni jɛ Gilead lɛ teŋ lɛ mli. Gileadbii lɛ kɛ wiemɔ “Shibolet,” ni etsɛmɔ jeɔ shishi kɛ “sh” lɛ tsu nii, bɔni afee ni amɛkɛna mɛi ni ji Efraimbii ni joɔ foi kɛfoɔ Yordan Faa lɛ kɛyaa lɛ. Efraim hii lɛ jie amɛhe shi amɛha Gilead bulɔi lɛ yɛ hei ni afoɔ Yordan faa lɛ yɛ lɛ kɛtsɔ kɛɛmɔ ni amɛkɛɛ “Sibolet,” yɛ nɔ najiaŋ ni amɛaakɛɛ “Shibolet” lɛ nɔ, ejaakɛ amɛnyɛɛɛ amɛtsɛ wiemɔ lɛ shishijee gbɛɛmɔ lɛ jogbaŋŋ. Nɔ ni jɛ mli ba ji, agbe Efraimbii 42,000! (Kojolɔi 12:5, 6) Nakai nɔŋŋ nɔ ni Kristendom osɔfoi lɛ tsɔɔ lɛ baafee tamɔ nɔ ni eebɛŋkɛ wiemɔ krɔŋŋ lɛ he kɛha mɛi ni leee Biblia mli anɔkwalei lɛ jogbaŋŋ lɛ. Shi wiemɔ ni amɛwieɔ yɛ apasa jamɔ gbɛ nɔ lɛ kɛ amɛ hiɛkpatamɔ baaba yɛ Yehowa mlifu gbi lɛ nɔ.
Wɔɔya nɔ Wɔfee Ekome
18, 19. Te Zefania 3:1-5 he hiaa ha tɛŋŋ?
18 Beni awieɔ blema Yerusalem ni yeee anɔkwa lɛ kɛ eŋmɛnɛŋmɛnɛ beaŋ henɔ, Kristendom, he lɛ, awie yɛ Zefania 3:1-5 akɛ: “Kpoo ha maŋ ni tseɔ atua ni abule lɛ, maŋ ni yi wa lɛ! Ebooo gbee ko gbee ko toi, ni ekpɛlɛɛɛ tsɔsemɔ; ekɛ ehiɛ efɔɔɔ Yehowa nɔ, ni etsiii ebɛŋkɛɛɛ e-Nyɔŋmɔ lɛ. Elumɛi ni yɔɔ emli lɛ, jatai ni hũuɔ ni; ekojolɔi lɛ hu, gbɛkɛ klaji ni; amɛshwɛɛɛ nɔ ko nɔ ko ni je atsɛre nɔ. Egbalɔi lɛ, yiŋ-flɛflɛtsɛmɛi kɛ kutumpɔfoi sɔŋŋ ni; esɔfoi lɛ ebule he krɔŋkrɔŋ lɛ, amɛtsɔɔ mla lɛ hiɛ amɛbuɔ shi. Yehowa ni yɔɔ eteŋ lɛ, jalɔ ji lɛ: efeŋ nɔ sha ko; ekɛ ekojomɔ lɛ baa la hiɛ daa leebi, efɔ̃ɔɔ; shi nɔshafeelɔi lɛ leee hiɛgbele.” Te nɛkɛ wiemɔi nɛɛ ahe hiaa ha tɛŋŋ?
19 Blema Yerusalem kɛ ŋmɛnɛŋmɛnɛ beaŋ Kristendom fɛɛ tse Yehowa hiɛ atua ni amɛkɛ apasa jamɔ bule amɛhe. Efɔŋfeemɔ ni amɛhiɛnyiɛlɔi lɛ kɛ amɛhe wo mli lɛ kɛ nɔnyɛɛ ba. Ni yɛ kɔkɔbɔɔ ni Nyɔŋmɔ kɛha shii abɔ lɛ fɛɛ sɛɛ lɛ, amɛbooo toi ni amɛaatsi amɛbɛŋkɛ lɛ. Amɛ lumɛi lɛ etsɔ tamɔ jatai ni hũuɔ, ni amɛkɛ hewoo jieɔ bulɛ ni amɛbɛ kɛha jalɛ lɛ kpo. Amɛkojolɔi lɛ etserɛ jalɛsaneyeli mli dukuduku tamɔ klaji fulɔi tserɛɔ nii amli lɛ. Amɛ osɔfoi lɛ ‘ebule nibii ni yɔɔ krɔŋkrɔŋ lɛ, ni amɛye Nyɔŋmɔ mla lɛ awui.’ No hewɔ lɛ eshwɛ fioo ni Yehowa ‘baabua jeŋmaji lɛ anaa, ni ebaakpee maŋtsɛyelii lɛ kɛaakpe, koni efɔse emlila kɛ emlifu ni naa wa lɛ fɛɛ eshwie amɛnɔ.’—Zefania 3:8.
20. (a) Mɛni esa akɛ wɔfee ni wɔna yibaamɔ yɛ Yehowa mlifu gbi lɛ nɔ? (b) Mɛɛ gbɛ nɔ oootsɔ ona hiɛnɔkamɔ akɛ obaana naanɔ jɔɔmɔi kɛjɛ Nyɔŋmɔ ŋɔɔ.
20 Yehowa mlifu gbi lɛ miibɛŋkɛ oyayaayai. No hewɔ lɛ, kɛji obaana yibaamɔ kɛyabote Nyɔŋmɔ jeŋ hee lɛ mli lɛ, no lɛ kasemɔ wiemɔ krɔŋŋ lɛ wiemɔ bianɛ ni owie hu. Nakai feemɔ nɔ pɛ oootsɔ ona hebuu kɛjɛ mumɔŋ oshara mli bianɛ, kɛ agbɛnɛ kɛjɛ jeŋ muu fɛɛ oshara ni baa oyayaayai lɛ hu mli. Yehowa Odasefoi miijaje Nyɔŋmɔ mlifu gbi ni baa lɛ kɛ e-Maŋtsɛyelii lɛ he shɛɛ sane ni haa mɔ tsui nyɔɔ emli lɛ amɛmiitsɔɔ. Kwɛ bɔ ni amɛmli filiɔ amɛ akɛ amɛaawie emaŋtsɛyeli lɛ he anunyam lɛ he! (Lala 145:10-13) Okɛ amɛ afee ekome, ni obaana hiɛnɔkamɔ akɛ ooona naanɔ wala kɛ jɔɔmɔi krokomɛi ni jɛ wiemɔ krɔŋŋ lɛ Shishitolɔ, Jeŋ Muu Fɛɛ Nuŋtsɔ Yehowa ŋɔɔ lɛ mli ŋɔɔmɔ.
Te Obaaha Hetoo Oha Tɛŋŋ?
◻ Mɛni ji gbɛi komɛi ni wɔɔtsɔ nɔ wɔkase wiemɔ krɔŋŋ Iɛ?
◻ Mɛni hewɔ ni sɛɛnamɔ yɔɔ Wiemɔ krɔŋŋ Iɛ wiemɔ he Iɛ?
◻ Mɛni baanyɛ aba kɛji ofɔɔɔ wiemɔ krɔŋŋ Iɛ wiemɔ daa?
◻ Te mɔ ko aaafee tɛŋŋ ena yibaamɔ yɛ Yehowa mlifu gbi Iɛ nɔ ni ena naanɔ jɔɔmɔi amli ŋɔɔmɔ?
[Mfoniri ni yɔɔ baafa 16]
Gideon kɛ hii ni fata ehe lɛ kpa amɛ tɛtrɛmaŋtrɛ lɛ ni amɛhole amɛkɔtii lɛ anɔ
[Mfoniri ni yɔɔ baafa 18]
Kɛjɛ 1879 mli kɛbaa Iɛ, ebafee faŋŋ akɛ Nyɔŋmɔ kɛ Charles Taze Russell kɛ ehefatalɔi Iɛ miitsu nii ni ekɛha ale wiemɔ krɔŋŋ Iɛ
[Mfonirii ni yɔɔ baafa 20]
Ani okɛ Yehowa Odasefoi efee ekome kɛmiiwie wiemɔ krɔŋŋ Iɛ?