Namɔ Aaaje “Fimɔ Be” Lɛ Mli?

“Mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala.”​—YOEL 3:⁠5.

 1. Taakɛ Daniel kɛ Maleaki tsɔɔ lɛ, mɛni kadiɔ mɛi ni asaa amɛ kɛha yiwalaheremɔ yɛ “fimɔ be” ni baa lɛ mli lɛ?

BENI ekpaa wɔgbi nɛɛ gbɛ lɛ, gbalɔ Daniel ŋma akɛ: “Shi fimɔ be ko aaaba ni anako nɔ da kɛjɛ beyinɔ ni jeŋmaŋ yɔɔ lɛ kɛyashi nakai be lɛ mli; ni nakai be lɛ mli lɛ aaahere omaŋ lɛ mli mɔ fɛɛ mɔ ni aaana akɛ aŋma egbɛi yɛ wolo lɛ mli lɛ.” (Daniel 12:⁠1) Miishɛjemɔ wiemɔi lɛlɛŋ nɛ! Yehowa baakai ewebii ni ekpɛlɛ amɛnɔ lɛ, taakɛ bɔ ni Maleaki 3:16 lɛ hu jajeɔ lɛ pɛpɛɛpɛ: “Kɛkɛ ni mɛi ni sheɔ Yehowa gbeyei lɛ kɛ amɛhe wie, ni Yehowa bo toi, ni enu, ni aŋma kaimɔ wolo yɛ ehiɛ aha mɛi ni sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ.”

 2. Mɛni jɛɔ Yehowa gbɛi lɛ he ni ajwɛŋɔ lɛ mli baa.

² Yehowa gbɛi lɛ he jwɛŋmɔ nyiɛɔ mɔ hiɛ kɛyaa lɛ, kɛ e-Kristo lɛ, kɛ e-Maŋtsɛyeli yiŋtoi kpakpai lɛ fɛɛ ahe anɔkwa nilee mli. Enɛ hewɔ lɛ, ewebii ekase bɔ ni amɛaawo enɔ gojoo yɛ bulɛ mli, koni amɛkɛ lɛ ana wekukpaa ni tsɔɔ akɛ amɛjɔɔ amɛhe nɔ amɛha lɛ, koni amɛsumɔ lɛ ‘kɛ amɛtsui fɛɛ kɛ amɛnilee fɛɛ kɛ amɛhewalɛ fɛɛ.’ (Marko 12:​33; Kpojiemɔ 4:11) Yehowa ejɛ mɔbɔnalɛ mli eto gbɛjianɔ, kɛtsɔ Yesu Kristo afɔleshaa lɛ nɔ, koni shikpɔŋ lɛ nɔ heshibalɔi lɛ ana naanɔ wala. No hewɔ lɛ, mɛnɛɛmɛi baanyɛ amɛkɛ hiɛnɔkamɔ ati ŋwɛi ta kpele ni jie Nyɔŋmɔ yi, beni afɔ Yesu lɛ wiemɔi lɛ amli, beni amɛkɛɛ akɛ: “Anunyam aha Nyɔŋmɔ yɛ ŋwɛi flooflo, ni hejɔlɛ aba shikpɔŋ lɛ nɔ, koni ana gbɔmɛi ahe tsuijurɔ!”​—Luka 2:⁠14.

 3. Dani toiŋjɔlɛ baanyɛ aba shikpɔŋ nɛɛ nɔ lɛ, mɛɛ Yehowa nifeemɔ ko esa akɛ eba mli da?

³ Nakai toiŋjɔlɛ lɛ ebɛŋkɛ kpaakpa fe bɔ ni mɛi pii susuɔ. Shi nɔ ni sa akɛ eba tsutsu ji Yehowa kojomɔ he nitsumɔ yɛ jeŋ ni ekpɔtɔ nɛɛ nɔ. Egbalɔ Zefania jaje akɛ: “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa.” Mɛɛ gbi ni? Gbalɛ lɛ yaa nɔ akɛ: “Anuɔ Yehowa gbi lɛ gbee! No mli lɛ nuu kakalɔ aaabolɔ waa. Mlifu gbi ji nakai gbi lɛ, fimɔ kɛ amanehulu gbi ni, amaŋfɔ kɛ amaŋfɔfeemɔ gbi ni, duŋ kɛ jeŋ tuutuu-feemɔ gbi ni, atatu kɛ oblɔtu kpii gbi hu ni, tɛtrɛmaŋtrɛ kɛ oshebɔɔ gbi ni baa maji ni atswa gbogboi awo amɛhe lɛ kɛ mɔji ni kwɔlɔ lɛ anɔ ni. Ni mahao gbɔmɛi lɛ, ni amɛaanyiɛ tamɔ shwilafoi, ejaakɛ amɛfee esha amɛshi Yehowa.”​—Zefania 1:​14-17; kwɛmɔ Habakuk 2:3; 3:​1-6, 16-19 hu.

 4. Namɛi hereɔ ninefɔɔ akɛ amɛbale Nyɔŋmɔ ni amɛsɔmɔ lɛ lɛ nɔ ŋmɛnɛ?

⁴ Miishɛɛ sane ji akɛ, gbɔmɛi akpekpei abɔ miihere ninefɔɔ akɛ amɛbale Nyɔŋmɔ ni amɛsɔmɔ lɛ lɛ nɔ ŋmɛnɛ. Agba yɛ Kristofoi ni afɔ amɛ mu, ni akɛ amɛ bote kpaŋmɔ hee lɛ mli lɛ ahe akɛ: “‘Amɛ fɛɛ kwa amɛaale mi, kɛaajɛ amɛteŋ mɔ bibioo nɔ kɛyashi amɛteŋ mɔ wulu nɔ,’ Yehowa kɛɛ.” (Yeremia 31:34) Mɛnɛɛmɛi enyiɛ ŋmɛnɛŋmɛnɛ beaŋ odaseyeli nitsumɔ lɛ hiɛ. Ni amrɔ nɛɛ, yɛ be mli ni mɛi ni afɔ amɛ mu lɛ ateŋ mɛi pii gbeɔ amɛ shikpɔŋ nɔ nitsumɔ lɛ naa lɛ, “asafo babaoo” ni ji “tooi krokomɛi” lɛ kɛ amɛhe eha kwraa koni ‘amɛkɛ sɔɔmɔ krɔŋŋ aha Nyɔŋmɔ nyɔɔŋ kɛ shwane’ yɛ egbɛjianɔtoo ni tamɔ sɔlemɔtsu lɛ mli. (Kpojiemɔ 7:​9, 15; Yohane 10:16) Ani oji mɛi ni naa hegbɛ kpeteŋkpele nɛɛ mli ŋɔɔmɔ lɛ ateŋ mɔ kome?

Bɔ ni Feɔ ni “Nii ni Jara Wa lɛ” Baa Mli

 5, 6. Dani aaahoso jeŋmaji lɛ fɛɛ kɛbote hiɛkpatamɔ mli lɛ, mɛɛ yiwalaheremɔ nitsumɔ ko esa akɛ atsu da?

⁵ Agbɛnɛ nyɛhaa wɔgbelea Hagai 2:​7, he ni Yehowa gbaa yɛ mumɔŋ shia ni eyɔɔ kɛha ejamɔ lɛ he lɛ. Ekɛɔ akɛ: “Ni mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ.” Biblia gbalɛi tsɔɔ akɛ ‘jeŋmaji lɛ ahosomɔ’ tsɔɔ kojomɔ ni Yehowa baatsu he nii yɛ jeŋmaji lɛ anɔ. (Nahum 1: 5, 6; Kpojiemɔ 6:​12-17) No hewɔ lɛ, nii ni Yehowa baafee, ni agba yɛ he afɔ shi yɛ Hagai 2:7 lɛ baashɛ enaagbee beni abaahoso jeŋmaji lɛ kɛaajɛ shihilɛ mli​—abaakpata amɛhiɛ kwraa lɛ. Shi “jeŋmaji lɛ fɛɛ anii ni jara wa lɛ” hu? Ani esa akɛ amɛmɛ aahu ni hosomɔ ni kpataa nii ahiɛ lɛ aba da, dani ekɛ amɛ aba mli? Dabi kwraa.

⁶ Yoel 3:5 kɛɔ akɛ “mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala; shi Zion gɔŋ lɛ nɔ kɛ Yerusalem lɛ, yiwalaheremɔ aaahi jɛi, bɔ ni Yehowa kɛɛ lɛ, ni mɛi ni Yehowa tsɛɔ lɛ aaahi mɛi ni eje mli lɛ ateŋ.” Yehowa gbalaa amɛ kɛbaa, ni amɛtsɛɔ egbɛi lɛ yɛ hemɔkɛyeli ni amɛyɔɔ yɛ Yesu afɔleshaa lɛ mli lɛ hewɔ dani hosomɔ ni amanehulu kpeteŋkpele lɛ kɛaaba lɛ baa. (Okɛto Yohane 6:​44; Bɔfoi lɛ Asaji 2:​38, 39 he.) Miishɛɛ sane ji akɛ, asafo babaoo ni jara wa waa, ni amrɔ nɛɛ amɛyi fa fe akpekpei ejwɛ lɛ, ‘baa’ Yehowa we kɛha ejamɔ lɛ, yɛ hosomɔ ni ‘eeehoso jeŋmaji lɛ fɛɛ’ yɛ Harmagedon lɛ he gbɛkpamɔ ni amɛyɔɔ lɛ hewɔ​—Kpojiemɔ 7:​9, 10, 14.

 7. Mɛni hu fata ‘Yehowa gbɛi lɛ ni aaatsɛ’ lɛ he?

⁷ Nakai mɛi ni baana yiwalaheremɔ lɛ tsɛɔ Yehowa gbɛi lɛ yɛ mɛɛ gbɛ nɔ? Yakobo 4:8 tsɔɔ bɔ ni eji eha lɛ mli, ni ekɛɔ akɛ: “Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ. Nyɛtsuua nyɛniji ahe, nyɛ eshafeelɔi, ni nyɛhaa nyɛtsuii ahe atsea, nyɛ jwɛŋmɔi enyɔnyɔ tsɛmɛi.” Taakɛ eji yɛ mɛi ni afɔ amɛ mu ni nyiɛ hiɛ lɛ agbɛfaŋ lɛ, esa akɛ mɛi ni hiɛ ka nɔ akɛ amɛbaafata asafo babaoo ni baafo Harmagedon lɛ ahe lɛ hu afee amɛnii kɛ yiŋkpɛɛ ni yɔɔ shiŋŋ. Kɛji ohiɛ ka nɔ akɛ obaana yiwalaheremɔ lɛ, no lɛ esa akɛ okase Yehowa Wiemɔ ni tsuuɔ mɔ he lɛ jogbaŋŋ ni okɛ ejalɛ shishitoo mlai lɛ atsu nii yɛ oshihilɛ mli. Esa akɛ okpɛ oyiŋ kwraa kɛmɔ shi akɛ obaajɔɔ owala nɔ oha Yehowa, ni okɛ nu mli baptisimɔ afee he okadi. Nɔ ni fata Yehowa gbɛi lɛ ni oootsɛ yɛ hemɔkɛyeli mli lɛ he hu ji ehe odase ni oooye. Enɛ hewɔ lɛ, Paulo ŋma yɛ Romabii yitso 10, kukuji 9 kɛ 10 lɛ akɛ: “Shi kɛji okɛ onaabu jaje akɛ Yesu ji Nuŋtsɔ lɛ, ni ohe oye yɛ otsui mli akɛ Nyɔŋmɔ tee lɛ shi kɛjɛ gbohii ateŋ lɛ, aaahere oyiwala. Ejaakɛ tsui akɛheɔ ayeɔ kɛshɛɔ jalɛ he, ni naabu akɛjajeɔ kɛshɛɔ yiwalaheremɔ he.” Kɛkɛ ni bɔfo lɛ tsɛ Yoel gbalɛ lɛ sɛɛ yɛ Ro 10 kuku 13 lɛ, ni ema nɔ mi akɛ “mɔ fɛɛ mɔ ni aaabo atsɛ Nuŋtsɔ [Yehowa] gbɛi lɛ, aaahere eyiwala.”

‘Nyɛtaoa, Nyɛtaoa, Nyɛtaoa Esɛɛ Gbɛ’

 8. (a) Taakɛ gbalɔ Zefania tsɔɔ lɛ, mɛni Yehowa taoɔ kɛha wɔyiwalaheremɔ? (b) Mɛɛ kɔkɔbɔɔ wiemɔ “ekolɛ” ni akɛtsu nii yɛ Zefania 2:8 lɛ hɛleɔ wɔ shi yɛ he?

⁸ Kɛ wɔgbele kɛtee Biblia mli wolo ni ji Zefania, yitso 2, kukuji 2 kɛ 3 lɛ, wɔkaneɔ nɔ ni Yehowa taoɔ kɛha yiwalaheremɔ lɛ akɛ: “Dani Yehowa mlifu ni naa wa lɛ aba nyɛnɔ, dani Yehowa mlifu gbi lɛ aba nyɛnɔ! Nyɛtaoa Yehowa sɛɛ gbɛ, nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtaoa jalɛ sɛɛ gbɛ, nyɛtaoa heshibaa sɛɛ gbɛ. Ekolɛ aaaŋɔ nyɛ atee yɛ Yehowa mlifu gbi lɛ nɔ.” Kadimɔ wiemɔ “ekolɛ” lɛ. Ejeee shihilɛ ni tsɔɔ akɛ kɛji ana ahere bo lɛ, belɛ ahere oyiwala kɛmiiya naanɔ. Teemɔ ni akɛ wɔ baatee yɛ nakai gbi lɛ nɔ lɛ damɔ nakai nibii etɛ lɛ ni wɔɔya nɔ wɔfee daa lɛ nɔ. Esa akɛ wɔtao Yehowa sɛɛ gbɛ, wɔtao jalɛ sɛɛ gbɛ, ni wɔtao heshibaa hu sɛɛ gbɛ.

 9. Mɛɛ gbɛ nɔ awoɔ mɛi ni taoɔ heshibaa sɛɛ gbɛ lɛ nyɔmɔ yɛ?

⁹ Lɛlɛŋ, heshibaa taomɔ he nyɔmɔwoo lɛ yɛ naakpɛɛ diɛŋtsɛ! Wɔkaneɔ yɛ Lala 37, kukuji 9 kɛyashi 11 lɛ akɛ: “Mɛi ni kwɛɔ Yehowa gbɛ lɛ, shikpɔŋ lɛ aaatsɔ amɛnɔ. Eshwɛ fioo kɛkɛ ni mɔ fɔŋ lɛ bɛ dɔŋŋ . . . Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” Ni jalɛ sɛɛ gbɛ ni ataoɔ lɛ hu? La 37 Kuku 29 kɛɔ akɛ: “Jalɔi lɛ, shikpɔŋ lɛ aaatsɔ amɛnɔ, ni amɛaahi nɔ daa.” Ni yɛ Yehowa sɛɛgbɛtaomɔ he lɛ, La 37 kukuji 39 kɛ 40 kɛɔ wɔ akɛ: “Shi jalɔi lɛ ayiwalaheremɔ lɛ jɛ Yehowa ŋɔɔ, lɛ ji amɛmɔɔ yɛ fimɔ be mli. Ní Yehowa yeɔ ebuaa amɛ ni ejieɔ amɛ; ejieɔ amɛ yɛ mɛi fɔji adɛŋ ni ehereɔ amɛyiwala; ejaakɛ amɛyaba lɛ abo.”

10. Namɛi sa kadimɔ jogbaŋŋ yɛ kpoomɔ ni amɛkpoo akɛ amɛaatao Yehowa kɛ heshibaa sɛɛ gbɛ lɛ mli?

¹⁰ Kristendom mligbalamɔ kui bibii lɛ taooo Yehowa sɛɛ gbɛ. Amɛ osɔfoi lɛ ekpoo egbɛi krɔŋkrɔŋ lɛ po, ni amɛkɛ henɔwomɔ ejie kɛjɛ amɛ Biblia shishitsɔɔmɔi amli. Amɛsumɔɔ moŋ ni amɛjá Nuŋtsɔ loo Nyɔŋmɔ ko ni bɛ gbɛi ni amɛwo wɔŋjalɔi a-Triniti lɛ hiɛ nyam. Kɛfata he lɛ, Kristendom taooo jalɛ sɛɛ gbɛ. Mɛi ni kɛ amɛhe ekpɛtɛ ehe lɛ ateŋ mɛi pii ekɔ shihilɛ ni ŋmɛɔ nɔ fɛɛ nɔ feemɔ gbɛ aloo amɛfiɔ nakai shihilɛ sɛɛ. Ni amɛaatao heshibaa moŋ sɛɛ gbɛ taakɛ Yesu fee lɛ, amɛkɛ amɛninamɔ kɛ agbɛnɛ, yɛ be babaoo mli lɛ, amɛ jeŋba shara lɛ tsɔɔ, akɛ nɔkwɛmnɔ lɛ, yɛ televishin nɔ. Osɔfoi lɛ yeɔ amɛ sɔlemɔyalɔi lɛ ahe nii ni amɛkɛfeɔ amɛhe niiatsɛmɛi. Taakɛ Yakobo 5:5 mli wiemɔi lɛ tsɔɔ lɛ, ‘amɛyeɔ amɛnaa nii yɛ shikpɔŋ lɛ nɔ ni amɛbɔɔ ahoshwi.’ Beni Yehowa gbi lɛ bɛŋkɛɔ nɛɛ, eka shi faŋŋ akɛ amɛbaana akɛ nɛkɛ mumɔ naa wiemɔi nɛɛ kɔɔ amɛhe jogbaŋŋ: “Mlifu gbi lɛ nɔ lɛ, nii he bɛ sɛɛnamɔ ko.”​—Abɛi 11:⁠4.

11. Namɔ ji mlakwamɔ gbɔmɔ lɛ, ni mɛɛ gbɛ nɔ ebua la yi sɔyeli babaoo naa yɛ?

¹¹ Yɛ Ŋ.B. klɛŋklɛŋ afii oha lɛ mli, taakɛ bɔfo Paulo tsɔɔ mli yɛ wolo ni ji enyɔ ni eŋma eyaha Tesalonikabii lɛ mli lɛ, Kristofoi komɛi kɛ hiɛdɔɔ susu saji ahe waa, ejaakɛ amɛsusu akɛ Yehowa gbi lɛ eba amɛnɔ yɛ nakai beaŋ lɛ. Shi Paulo bɔ kɔkɔ akɛ klɛŋklɛŋ lɛ, esa akɛ hemɔkɛyelikwamɔ kpele lɛ aba da, ni esa akɛ ajie ‘mlakwamɔ gbɔmɔ’ lɛ hu kpo. (2 Tesalonikabii 2:​1-3) Amrɔ nɛɛ, yɛ nɛkɛ afii ohai 20 nɛɛ mli lɛ, wɔnyɛɔ wɔnaa bɔ ni nakai hemɔkɛyeli kwamɔ lɛ mli elɛɛ eha kɛ bɔ ni Kristendom osɔfoi lɛ etsɔmɔ mlakwalɔi hu yɛ Nyɔŋmɔ hiɛ lɛ jogbaŋŋ. Osɔfoi lɛ ebua la yi sɔyeli babaoo naa, yɛ nɛkɛ naagbee gbii nɛɛ amli, kɛjɛ 1914 kɛbaa, kɛtsɔ fi ni amɛfi ‘kɔii ni akɛsɔ̃ klantei,’ ni ji tawuu sɛɛ lɛ nɔ. (Yoel 4:10) Amɛtee nɔ amɛtsɔɔ apasa tsɔɔmɔi hu, tamɔ adesa susuma ni akɛɛ eyɔɔ emli ni egbooo, hetsuumɔ hé, hɛl la mli piŋmɔ, abifabii abaptisimɔ, kɛ Triniti, kɛ ekrokomɛi ni tamɔ nakai. Nɛgbɛ amɛbaadamɔ beni Yehowa tsuɔ ekojomɔ yiŋkpɛɛ lɛ he nii lɛ? Abɛi 19:5 jajeɔ akɛ: “Mɔ ni maleɔ lɛ, ejeŋ mli.”

12. (a) Mɛni ji nibii ni feɔ adesai ‘a-ŋwɛi’ kɛ “shikpɔŋ” ni etsɛŋ ni abaakpata hiɛ kwraa lɛ? (b) Mɛni wɔkaseɔ kɛjɛɔ nɛkɛ yiwalɛ jeŋ fɔŋ nɛɛ hiɛkpatamɔ ni baa lɛ mli?

¹² Wɔkaneɔ yɛ 2 Petro 3:10 akɛ: “Nuŋtsɔ [Yehowa] gbi lɛ baaba tamɔ julɔ baa nyɔɔŋ, ni no mli lɛ ŋwɛi lɛ aaaho aya kɛ gbɛɛmɔ, ni je nɛŋ shishijee nii lɛ aaasere yɛ la mli, ni shikpɔŋ kɛ emli nitsumɔi lɛ aaashã.” Abaabɛɛ nɔyelii fɔji ni eha adesai anɔ tamɔ ajɛɔ ŋwɛi akɛ buu haa nii anɔ lɛ, kɛ nibii krokomɛi fɛɛ ni fataa he feɔ ŋmɛnɛŋmɛnɛ adesai ashihilɛ ni ekpɔtɔ nɛɛ fɛɛ kɛjɛ Nyɔŋmɔ shikpɔŋ lɛ nɔ kwraa kɛya. Naagbee hiɛkpatamɔ gbi he tawuu nii afeelɔi kɛ amɛhe jarayelɔi, hiɛjoolɔi shishiulɔi, Nyɔŋmɔ jamɔ mli osatofoi kɛ amɛ osɔfoi lɛ, mɛi ni woɔ jeŋba shara, yiwalɛ, kɛ awuiyeli he hewalɛ​—enɛɛmɛi fɛɛ baalaje kwraa. Yehowa mlifu lɛ baasere fɛɛ kɛjɛ jɛmɛ kɛya. Shi Petro kɛ ŋaawoo nɛɛ haa Kristofoi yɛ La 37 kukuji 11 kɛ 12, kɛha amɛ henɔkwɛmɔ akɛ: “Akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? Mɛi ni kwɛɔ gbɛ̃ ni amɛshweɔ [Yehowa] Nyɔŋmɔ gbi lɛ baa lɛ.

Mikael Je Kpo ni Ebɔi Nitsumɔ!

13, 14. Namɔ ji Yehowa nɔyeli lɛ Bembulɔ kpeteŋkpele lɛ, ni etsu nii waa kɛjɛ 1914 kɛbaa nɛɛ yɛ mɛɛ gbɛ nɔ?

¹³ Mɛɛ gbɛ nɔ mɔ ko aaatsɔ aje mli yɛ Yehowa “fimɔ be” lɛ mli? Nyɔŋmɔ Najiaŋdamɔlɔ ni ekɛba kɛha yiwalaheremɔ ji ŋwɛibɔfo nukpa Mikael, ni egbɛi lɛ shishi ji “Namɔ Tamɔ Nyɔŋmɔ?” Belɛ, esa jogbaŋŋ akɛ lɛ ji Mɔ ni buɔ Yehowa nɔyeli lɛ bem, ni ewoɔ Yehowa nɔ gojoo akɛ anɔkwa Nyɔŋmɔ koome kɛ Jeŋ Muu Fɛɛ Nuŋtsɔ yɛ gbɛ ni ja jogbaŋŋ nɔ.

¹⁴ Mɛɛ nibii ni sa kadimɔ, ni kɔɔ “Nuŋtsɔ lɛ gbi” lɛ he kɛjɛ 1914 kɛbaa, Kpojiemɔ yitso 12, kukuji 7 kɛyashi 17 lɛ wieɔ he nɛkɛ! (Kpojiemɔ 1:10) Ŋwɛibɔfo nukpa Mikael shɛ Satan ni efee ehe atuatselɔ lɛ kɛjɛ ŋwɛi efɔ shikpɔŋ lɛ nɔ. Yɛ sɛɛ mli, taakɛ atsɔɔ mli yɛ Kpojiemɔ yitso 19, kukuji 11 kɛyashi 16 lɛ, mɔ ko ni atsɛɔ lɛ “Heyelilɔ kɛ Anɔkwafo” ‘naanaa Nyɔŋmɔ Ofe lɛ mlifu ni naa wa lɛ weinŋaanɔ lɛ nɔ.’ Atsɛɔ nɛkɛ ŋwɛi tatsɛ hewalɔ nɛɛ akɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ.” Yɛ naagbee lɛ, Kpojiemɔ yitso 20, kukuji 1 kɛ 2 wieɔ ŋwɛibɔfo kpeteŋkpele ko he akɛ eshɛ Satan efɔ bu kwɔŋkwɔŋ lɛ mli ni etsi enaa ewo jɛmɛ afi akpe. Eyɛ faŋŋ akɛ, nɛkɛ ŋmalɛi nɛɛ fɛɛ wieɔ Yehowa jeŋ muu fɛɛ maŋtsɛyeli lɛ Bembulɔ koome lɛ nɔŋŋ he, Nuŋtsɔ Yesu Kristo, mɔ ni Yehowa kɛ lɛ ta enunyam maŋtsɛsɛi nɔ yɛ ŋwɛi yɛ 1914 lɛ.

15. Etsɛŋ ni Mikael “aaate shi adamɔ shi” yɛ mɛɛ gbɛ krɛdɛɛ nɔ?

¹⁵ Mikael ‘edamɔ shi’ eha Yehowa webii, taakɛ ajaje yɛ Daniel 12:1 lɛ, kɛjɛ be mli ni awo lɛ Maŋtsɛ yɛ afi 1914 mli kɛbaa nɛɛ fɛɛ. Shi etsɛŋ ni Mikael “aaate shi adamɔ shi” yɛ shishinumɔ krɛdɛɛ ko naa​—akɛ Yehowa Najiaŋdamɔlɔ ni ekɛaatsu nii kɛjie efɔŋfeemɔ fɛɛ kɛje shikpɔŋ nɔ, kɛ agbɛnɛ akɛ Nyɔŋmɔ webii asafo ni yɔɔ jeŋ muu fɛɛ lɛ hu a-Kpɔlɔ. Yesu wiemɔi ni yɔɔ Mateo 24:​21, 22 lɛ tsɔɔ bɔ ni nakai “fimɔ be” lɛ mli baawa aha lɛ mli jogbaŋŋ: “Ejaakɛ no be lɛ mli lɛ amanehulu babaoo aaaba, ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ. Ni kɛ afooo no gbii lɛ anɔ kpitioo lɛ, kulɛ ahereŋ heloo ko heloo ko yiwala; shi mɛi ni ahala lɛ ahewɔ lɛ, aaafo no gbii lɛ anɔ kpitioo.”

16. Mɛɛ heloo yiwala abaahere yɛ amanehulu kpeteŋkpele lɛ mli lɛ?

¹⁶ Kwɛ bɔ ni wɔɔnyɛ wɔna miishɛɛ wɔha akɛ abaahere heloo ko yiwala kɛ̃ yɛ nakai be lɛ mli! Dabi, jeee tamɔ Yudafoi atuatselɔi ni adu amɛ yɛ Yerusalem yɛ afi 70 Ŋ.B., ni aloo amɛteŋ mɛi komɛi kɛtee Roma akɛ nyɔji lɛ. Shi moŋ, mɛi ni baaje mli yɛ “naagbee be lɛ” mli lɛ baafee tamɔ Kristofoi asafo ni ejo foi kɛshi Yerusalɛm momo beni naagbee kawoo lɛ je shishi lɛ. Amɛbaafee Nyɔŋmɔ diɛŋtsɛ webii, asafo kuu babaoo akpekpei abɔ lɛ kɛ mɛi ni afɔ amɛ mu lɛ ateŋ mɛi fɛɛ ni ekolɛ amɛyɔɔ shikpɔŋ nɔ lolo lɛ. (Daniel 12:⁠4) Asafo kuu babaoo lɛ “je amanehulu kpeteŋkpele lɛ mli.” Mɛni hewɔ? Ejaakɛ “amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli.” Amɛnaa kpɔmɔ hewalɛ ni yɔɔ Yesu la ni efɔse eshwie lɛ mli lɛ mli hemɔkɛyeli ni amɛkɛ anɔkwayeli sɔmɔɔ Nyɔŋmɔ kɛjieɔ nakai hemɔkɛyeli lɛ kpo. Ni amrɔ nɛɛ po, Yehowa, “Mɔ ni ta maŋtsɛsɛi lɛ nɔ lɛ,” shiɔ ebuu ni buɔ mɔ he lɛ yɛ amɛnɔ, yɛ be mli ni Toobi, Kristo Yesu hu kpalaa amɛ ni etsɔɔ amɛ gbɛ kɛyaa wala nu bui ahe lɛ.​—Kpojiemɔ 7:​14, 15.

17. Awoɔ asafo babaoo lɛ titri hewalɛ ni amɛfee amɛnii yɛ mɛɛ gbɛ nɔ, koni aŋɔ amɛ atee yɛ haomɔ gbi ni baa lɛ nɔ?

¹⁷ Esaaa akɛ asafo kuu babaoo ni amɛyi falɛ shɛɔ akpekpei abɔ lɛ haa anɔkwale lɛ he suɔmɔ ni amɛna klɛŋklɛŋ kwraa lɛ he jɔɔ, yɛ Yehowa, kɛ jalɛ, kɛ heshibaa sɛɛ gbɛ ni amɛtaoɔ lɛ mli! Kɛ oji gbɔmɛi ni tamɔ gwaŋtɛŋi nɛɛ ateŋ mɔ ko lɛ, mɛni esa akɛ ofee? Taakɛ ajaje yɛ Kolosebii yitso 3, kukuji 5 kɛyashi 14 lɛ, esa akɛ ‘ojie gbɔmɔ momo lɛ kɛ enitsumɔi lɛ fɛɛ oshwie’ kwraa. Yɛ be mli ni otaoɔ ŋwɛi yelikɛbuamɔ lɛ, bɔɔ mɔdɛŋ ni ‘owo gbɔmɔ hee ni etsɔ ehee ekoŋŋ lɛ, kɛtsɔ anɔkwale nilee namɔ nɔ.’ Tswaa ekaa ni oyɔɔ lɛ oma shi shiŋŋ ni ohiɛ mli yɛ heshibaa mli kɛjie Yehowa yi ni okɛha mɛi krokomɛi hu ale eyiŋtoi ni yɔɔ nyam lɛ. Kɛtsɔ nakai feemɔ nɔ lɛ, ekolɛ aaaŋɔ bo atee yɛ “fimɔ be” lɛ mli, yɛ “Yehowa mlifu ni naa wa” lɛ gbi lɛ nɔ.

18, 19. Tsuishiŋmɛɛ he ebahia kɛha yiwaheremɔ yɛ mɛɛ gbɛ nɔ?

¹⁸ Nakai gbi lɛ ebɛŋkɛ! Eebɛŋkɛ wɔ kɛ foi. Asafo kuu babaoo lɛ mlibii aŋkroaŋkroi lɛ anaabuamɔ etee nɔ aahu nɔ ni miihe ashɛ afii 57 sɔŋŋ nɛ. Mɛnɛɛmɛi ateŋ mɛi saŋŋ egboi ni amɛmiimɛ amɛ gbohiiashitee. Shi Kpojiemɔ gbalɛ lɛ haa wɔ nɔmimaa akɛ, ákɛ kuu lɛ, asafo kuu babaoo lɛ baafo amanehulu kpeteŋkpele lɛ akɛ “shikpɔŋ hee” gbɛjianɔtoo lɛ shikwɛ̃ɛ hé. (Kpojiemɔ 21:⁠1) Ani obaahi jɛmɛ? Eeenyɛ ebalɛ nakai, ejaakɛ Yesu wie yɛ Mateo 24:13 akɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.”

¹⁹ Nɔnyɛɛ ni Yehowa webii kɛkpeɔ yɛ nɛkɛ nibii agbɛjianɔtoo momo nɛɛ mli lɛ baaya nɔ afa babaoo lolo. Ni kɛji amanehulu kpeteŋkpele ni kɛ hejaramɔ baaba lɛ fɛ lɛ, ekolɛ obaana haomɔi komɛi. Shi yaa nɔ ni okɛ ohe akpɛtɛ Yehowa kɛ egbɛjianɔtoo lɛ he gbagbalii. Ohiɛ atsɛ̃! “‘No hewɔ lɛ nyɛkwɛa mi gbɛ,’ Yehowa kɛɛ, ‘kɛyashi gbi nɔ ni mato shi akɛ odasefonyo! Ejaakɛ miyiŋtoo ji akɛ mabua jeŋmaji lɛ anaa, ni makpee maŋtsɛyelii lɛ kɛaakpe, koni mafɔse mimlila kɛ mimlifu ni naa wa lɛ fɛɛ mashwie amɛnɔ; ejaakɛ miwuŋayeli la lɛ aaashã shikpɔŋ muu lɛ fɛɛ.’”​—Zefania 3:⁠8.

20. Yɛ be mli ni “fimɔ be” ni ji naagbee lɛ bɛŋkɛɔ kpaakpa lɛ mɛni esa akɛ wɔfee?

²⁰ Yehowa ejɛ emɔbɔnalɛ mli eha ewebii “wiemɔ krɔŋŋ,” kɛha wɔ hebuu kɛ ekaawoo, ni nɔ ni fata enɛ he ji e-Maŋtsɛyeli ni baa lɛ he shɛɛ sane ni yɔɔ nyam lɛ, “bɔni afee ni amɛ fɛɛ kwa amɛtsɛ Yehowa gbɛi lɛ, koni amɛsɔmɔ lɛ kɔŋ kɛ kɔŋ.” (Zefania 3:​9, New World Translation) Yɛ be mli ni “fimɔ be” ni ji naagbee kwraa lɛ bɛŋkɛɔ oyayaayai lɛ, eba akɛ wɔɔsɔmɔ kɛ ekaa, ni wɔye wɔbua heshibalɔi krokomɛi hu ni ‘amɛtsɛ Yehowa gbɛi lɛ’ kɛha yiwalaheremɔ.

Ani Okaiɔ?

◻ Mɛɛ Yehowa nifeemɔ ko baatsɔ toiŋjɔlɛ ni akɛaaba shikpɔŋ nɔ lɛ hiɛ?

◻ Taakɛ Yoel tsɔɔ Iɛ, mɛni esa akɛ mɔ afee koni ahere eyiwala?

◻ Taakɛ Zefania tsɔɔ Iɛ, mɛɛ gbɛ nɔ heshibalɔi lɛ aaatsɔ amɛna hebuu yɛ Yehowa mlifu ni naa wa lɛ mli?

◻ Namɔ ji ‘mlakwamɔ gbɔmɔ Iɛ,’ ni ebua la yi sɔyeli babaoo naa yɛ mɛɛ gbɛ nɔ?

◻ Te tsuishiŋmɛɛ he hiaa yɛ yiwalaheremɔ he sane lɛ mli ehaa tɛŋŋ?