Yehowa We lɛ Anunyam ni Da Lɛ

“‘Mikɛ anunyam sɔŋŋ aaawo shia nɛɛ obɔ,’ Yehowa Zebaot kɛɛ.” —HAGAI 2:7.

 1. Mumɔ krɔŋkrɔŋ kɔɔ hemɔkɛyeli kɛ nitsumɔ he yɛ mɛɛ gbɛ nɔ?

BENI Yehowa Odasefonyo ko shiɛɔ kɛjɛɔ shia kɛyaa shia lɛ, ekɛ Pentekost obalayoo ko kpe, ni yoo lɛ kɛɛ lɛ akɛ, ‘Wɔyɛ mumɔ krɔŋkrɔŋ lɛ, shi nyɛ ji mɛi ni tsuɔ nitsumɔ lɛ.’ Atsɔ ŋaa gbɛ nɔ atsɔɔ lɛ jogbaŋŋ akɛ, bɔ fɛɛ bɔ ni fee lɛ, mɔ ko ni yɔɔ mumɔ krɔŋkrɔŋ lɛ baana kanyamɔ ni etsu Nyɔŋmɔ nitsumɔ lɛ. Yakobo 2:17 jajeɔ akɛ: “Hemɔkɛyeli hu, kɛ́ nitsumɔi bɛ he lɛ, eji hemɔkɛyeli gbonyo.” Kɛtsɔ Yehowa mumɔ lɛ yelikɛbuamɔ nɔ lɛ, e-Dasefoi lɛ ena hemɔkɛyeli ni mli wa waa, ni ‘ekɛ anunyam ewo eshia lɛ obɔ’ kɛtsɔ jalɛ nitsumɔi ni ehaa amɛtsuɔ lɛ nɔ—titri lɛ, ‘Maŋtsɛyeli lɛ he sanekpakpa nɛɛ ni amɛshiɛɔ amɛtsɔɔ je nɛŋ fɛɛ ni amɛkɛyeɔ jeŋmaji lɛ fɛɛ odase lɛ.’ Kɛ́ atsu nitsumɔ nɛɛ kɛyashɛ he ni Yehowa sumɔɔ lɛ, “no dani naagbee lɛ aaaba.”—Mateo 24:14.

 2. (a) Wɔhe fɛɛ ni wɔkɛwoɔ Yehowa nitsumɔ lɛ mli lɛ kɛ mɛɛ jɔɔmɔi baaba? (b) Mɛni hewɔ esa akɛ wɔna nɔ ni tamɔ ‘shishashaomɔ’ nɛɛ he miishɛɛ lɛ?

² Wɔmuɔ sane naa kɛjɛɔ Yesu wiemɔi nɛɛ amli akɛ esa akɛ nitsumɔ ni wɔtsuɔ ŋmɛnɛ lɛ akɔ shiɛmɔ ni wɔɔshiɛ “miishɛɛ Nyɔŋmɔ lɛ anunyam sanekpakpa” ni atu awo wɔdɛŋ lɛ wɔtsɔɔ mɛi krokomɛi lɛ he titri. (1 Timoteo 1:11, NW) Babaoo ni wɔkɛ wɔhe fɛɛ woɔ Yehowa sɔɔmɔ mli kɛ miishɛɛ lɛ, babaoo ni naagbee lɛ feɔ tamɔ nɔ ni eeba oyayaayai ji no. Wɔkaneɔ Yehowa wiemɔi nɛɛ yɛ Habakuk 2:2, 3 akɛ: “Ŋmaa ninaa lɛ, ni okpɛ yɛ tɛ taoi anɔ, koni anyɛ akane oya. Shi ninaa lɛ yɛ ha be ni ato lɛ kɛ̃, ni eeye oyai ni eshɛ naagbee, ni emaleŋ; kɛ́ eshashao shi hu jiŋŋ, mɛɛ lɛ kɛ̃; ejaakɛ ebaaba lɛlɛŋ, ekpeŋ sɛɛ!” Hɛɛ, “ninaa lɛ” baaba mli anɔkwale “kɛ́ eshashao shi” po. Akɛni wɔyɔɔ Yesu Maŋtsɛyeli nɔyeli lɛ afi ni ji 83 lɛ mli hewɔ lɛ, ekolɛ mɛi komɛi baanu he akɛ wɔyɛ shishashaomɔ be mli amrɔ nɛɛ. Shi, ani esaaa ni wɔnaa miishɛɛ akɛ naagbee lɛ bako lolo? Ekolɛ eeefee tamɔ naakpɛɛ nii, akɛ ajie naatsii ni akɛba sanekpakpa lɛ shiɛmɔ nɔ lɛ kwraa, yɛ Europa Bokagbɛ, Afrika hei komɛi kɛ shikpɔji krokomɛi anɔ, yɛ 1990 afii nyɔŋma nɛɛ mli. Nɔ ni tamɔ ‘shishashaomɔ’ nɛɛ miiha aana be koni akɛbua “tooi” babaoo anaa kɛjɛ shikpɔŋkukuji ni kpaako atsuɔ mli nii lɛ amli.—Yohane 10:16.

 3. Mɛni hewɔ esa akɛ shishinumɔ hee ni wɔna yɛ “nɛkɛ yinɔ nɛɛ” he lɛ akanya wɔ ni wɔtsu Nyɔŋmɔ nitsumɔ lɛ kɛ oyaiyeli lɛ?

³ “Ekpeŋ sɛɛ,” gbalɔ lɛ kɛɛ. Yesu wie akɛ yinɔ fɔŋ ni yɔɔ amrɔ nɛɛ lɛ hoŋ eyaŋ, ja “nii nɛɛ fɛɛ eba mli” dã. (Mateo 24:34) Ani shishinumɔ hee ni wɔyɔɔ yɛ ewiemɔi nɛɛ ahe lɛ tsɔɔ akɛ belɛ wɔ shiɛmɔ nitsumɔ lɛ he ehiaaa babaoo tamɔ tsutsu lɛ dɔŋŋ?a Anɔkwa saji lɛ tsɔɔ akɛ jeee nakai kwraa ji sane lɛ! Yinɔ ni wɔyɔɔ mli amrɔ nɛɛ lɛ miibote efɔŋ feemɔ kɛ juu-kɛ-fɔ̃ shihilɛ mli, ni anako eko ni tamɔ nakai dã, yɛ yinɔsane be ni eho lɛ fɛɛ mli. (Okɛto Bɔfoi lɛ Asaji 2:40 he.) Esa akɛ wɔkɛ hehiamɔ atsu wɔ nitsumɔ lɛ. (2 Timoteo 4:2) Gbalɛi fɛɛ ni kɔɔ be ni amanehulu kpeteŋkpele lɛ baaba lɛ he lɛ tsɔɔ akɛ ebaaba trukaa, oya, ni hiɛ bɛ he nɔ—tamɔ julɔ. (1 Tesalonikabii 5:1-4; Kpojiemɔ 3:3; 16:15) “No hewɔ lɛ nyɛ hu nyɛsaa nyɛhe nyɛtoa, ejaakɛ nɔ̃ ŋmɛlɛtswaa ni nyɛsusuuu lɛ nɔ gbɔmɔ Bi lɛ baa.” (Mateo 24:44, NW) Beni adesai ayinɔ ni bɛ Nyɔŋmɔ gbeyeishemɔ nɛɛ bɛŋkɛɔ ehiɛkpatamɔ lɛ, eka shi faŋŋ akɛ esaaa ni wɔtaoɔ akɛ wɔɔŋmɛɛ wɔ hiɛnɔkamɔ ni jara wa, ni ji naanɔ wala lɛ he, kɛtsɔ wɔ sɛɛ ni wɔɔku ni ‘wɔyakokolo ŋmɔtɔ,’ ni ji je lɛŋ nibii ni gbalaa mɔ jwɛŋmɔ lɛ “mli” ekoŋŋ lɛ nɔ!—2 Petro 2:22; 3:10; Luka 21:32-36.

 4. Mɛɛ shihilɛ ko eha ehe ebahia ni ahã “[ŋmaa] yɛ be ni sa nɔ” lɛ afá, ni átsu hiamɔ nɛɛ he nii yɛ mɛɛ gbɛ nɔ?

⁴ Yɛ Yesu gbalɛ lɛ mlibaa mli lɛ, ‘kɔɔmɔi lɛ abɔimɔ’ ba yɛ afi 1914 mli beni adesai bote “je nɛɛŋ naagbee” lɛ mli lɛ. Awerɛho, nibii ni kɛ amanehulu baa, kɛ mlakwamɔ etee nɔ efa babaoo aahu kɛbashi ŋmɛnɛ. (Mateo 24:3-8, 12) Yɛ nakai beaŋ nɔŋŋ lɛ, Yehowa kɛ nitsumɔ ewo tsulɔ anɔkwafo kɛ nilelɔ kuu ni afɔ amɛ mu lɛ adɛŋ koni amɛha amɛ-Nuntsɔ, Kristo shiabii lɛ amumɔŋ “[ŋmaa] yɛ be ni sa nɔ.” (Mateo 24:45-47) Amrɔ nɛɛ, nɛkɛ Mesia Maŋtsɛ nɛɛ miijɛ emaŋtsɛsɛi ni yɔɔ ŋwɛi lɛ nɔ eekudɔ mumɔŋ niyenii kɛhamɔ he gbɛjianɔtoo ni yɔɔ naakpɛɛ ni yaa nɔ yɛ shikpɔŋ muu lɛ fɛɛ nɔ lɛ.

‘Niyenii’ ni Fa Babaoo

 5. Te atsuɔ “niyenii” lɛ ateŋ klɛŋklɛŋ nɔ lɛ he nii ahaa tɛŋŋ?

⁵ Susumɔ ‘niyenii’ he gbɛjianɔtoo lɛ he okwɛ. (Luka 12:42) Nibii sɔrɔtoi ni fata Kristofoi aniyenii he lɛ amli klɛŋklɛŋ nɔ kwraa ji Nyɔŋmɔ Wiemɔ, Biblia lɛ. Kɛji abaatsɔɔ Biblia lɛ jogbaŋŋ kɛmɔ shi lɛ, no lɛ shishitsɔɔmɔ ni anyɛɔ akaneɔ, ni ja jogbaŋŋ ji klɛŋklɛŋ hiamɔ nii. Atsu nɛkɛ hiamɔ nii nɛɛ he nii fiofio yɛ afii abɔ ni eho lɛ mli, titri lɛ kɛjɛ 1950 beni ajie New World Translation of the Christian Greek Scriptures lɛ kpo yɛ Ŋleshi Blɔfo wiemɔ mli lɛ. Beni shɛɔ afi 1961 mli lɛ, no mli lɛ agbe New World Translation Biblia muu lɛ fɛɛ naa, ni etsɛɛɛ ni eshishitsɔɔmɔi je kpo yɛ wiemɔi krokomɛi ni ale waa lɛ amli. Kpoi 3 ni ajie lɛ kpo yɛ 1996 sɔɔmɔ afi lɛ mli lɛ hãa efalɛ lɛ fɛɛ yashɛɔ 27, ni emli 14 ji Biblia muu lɛ fɛɛ. Bɔni afee ni atsu Biblia lɛ, kɛ Biblia kasemɔ woji krokomɛi ahe nitsumɔ nɛɛ he nii lɛ, amrɔ nɛɛ Kristofoi aaashɛ 1,174 ni ejɔɔ amɛhe nɔ, kɛ amɛbe fɛɛ miitsu woji ashishitsɔɔmɔ nitsumɔ yɛ maji 77 mli.

 6. Te Asafo lɛ etsu Biblia kasemɔ woji ahe hiamɔ nii lɛ he nii eha tɛŋŋ?

⁶ Buu Mɔɔ Asafo lɛ nitsumɔ he niji 24 ni akalaa woji yɛ jɛmɛ lɛ, miifee woji babaoo ni miifa kɛmiiya hiɛ be fɛɛ be, ni amɛkɛmiifi nɛkɛ wiemɔi ashishitsɔɔlɔi babaoo nɛɛ anitsumɔ lɛ sɛɛ. Enɛ hewɔ lɛ, aaya nɔ aahe woji akalamɔ tsɔnei heei ni tsuɔ nii oya waa kɛmiiya nitsumɔ he niji wuji lɛ amli. Buu-Mɔɔ kɛ Awake! woji tɛtrɛbii lɛ afalɛ ni akalaa lɛ miiya hiɛ daa nyɔŋ nɔ, ni enyɔ lɛ fɛɛ falɛ eyashɛ ekomekomei 943,892,500, ni ji oha mlijaa 13.4 nɔyaa kɛha afi lɛ. Bibliai kɛ woji wuji fɛɛ ni afee yɛ United States, Brazil, Finland, Germany, Italy, Japan, Korea, kɛ Mexico pɛ lɛ etee hiɛ kɛ oha mlijaa 40 kɛjɛ 1995 mli, kɛyashɛ ekomekomei 76,760,098 yɛ 1996. Nitsumɔ he niji krokomɛi hu eye ebua bɔ ni sa yɛ woji afeemɔ ni etee hiɛ babaoo lɛ mli.

 7. Yesaia 54:2 he ebahia waa amrɔ nɛɛ yɛ mɛɛ gbɛ nɔ?

⁷ Woji afeemɔ ni etee hiɛ lɛ he bahia yɛ 1990 afii lɛ amli, yɛ jiemɔ ni ajie naatsii ni akɛba Yehowa Odasefoi anɔ yɛ Europa Bokagbɛ kɛ Afrika lɛ hewɔ. Mumɔŋ niyenii he hɔmɔ lɛ da yɛ nɛkɛ hei nɛɛ. No hewɔ lɛ, tsɛmɔ lɛ jijeɔ waa kɛ hehiamɔ kpele diɛŋtsɛ akɛ: “Hã ni obuu lɛ mli alɛɛ, ni okpã oshihilɛ he lɛ he mamai lɛ amli: kaalɛte he! Hã ni otaŋkpeei lɛ akɛlɛ, ni okala oshiŋmilitsei lɛ ni awa!”—Yesaia 54:2.

 8. Mɛɛ nɔheremɔ ni jɛ mlihilɛ mli kɛ shika gbɛfaŋ yelikɛbuamɔ hãa?

⁸ Enɛ hewɔ lɛ, ehe ebahia akɛ amamɔ̃ tsũi heei afata nɔ ni yɔɔ lɛ ahe, yɛ Asafo lɛ nitsumɔ he niji 104 lɛ ateŋ babaoo mli. Yɛ shika gbɛfaŋ jaramɔ shihilɛi ni yɔɔ shikpɔŋkukuji heei ni kpaako atsuɔ nii yɛ mli nɛɛ amli babaoo mli lɛ hewɔ lɛ, shika ni akɛtsuɔ nii kɛhaa nitsumɔ lɛ mlilɛɛmɔ nɛɛ mli babaoo jɛɔ too ni ayeɔ kɛhaa jeŋ muu fɛɛ nitsumɔ lɛ, yɛ shikpɔji ni yɔɔ nii saŋŋ lɛ anɔ lɛ amli. Nɔ ni yɔɔ miishɛɛ ji akɛ, asafoi kɛ aŋkroaŋkroi ejɛ amɛtsui muu fɛɛ mli amɛmiihere nɔ, yɛ mumɔ ni yɔɔ 2 Mose 35:21 lɛ naa: “Ni amɛba, mɔ fɛɛ mɔ ni etsui mli ta lɛ, kɛ mɔ fɛɛ mɔ ni na he tsui lɛ, ni amɛkɛ Yehowa nɔwomɔ nikeenii lɛ ba ni akɛfee.” Wɔmiiŋɔ hegbɛ nɛɛ ni wɔkɛda mɛi fɛɛ ni náa nɛkɛ nihamɔ ni jɛ mlihilɛ mli nɛɛ mli gbɛfaŋnɔ lɛ shi.—2 Korintobii 9:11.

 9. Romabii 10:13, 18 miiba mli ŋmɛnɛ yɛ mɛɛ gbɛ nɔ?

⁹ Woji ni Buu Mɔɔ Asafo lɛ fee lɛ ewo Yehowa gbɛi kɛ eyiŋtoi ahiɛ nyam lɛlɛŋ kɛtee shikpɔŋ lɛ naagbee hei lɛ, yɛ 1996 mli. Etamɔ bɔ ni bɔfo Paulo gba efɔ̃ shi lɛ pɛpɛɛpɛ. Beni etsɛɔ Yoel gbalɛ lɛ kɛ Lala 19 lɛ sɛɛ lɛ, eŋma akɛ: “ ‘Mɔ fɛɛ mɔ ni aaabo atsɛ Nuntsɔ [Yehowa, NW] gbɛi lɛ, aaahere eyiwala.’ Shi miikɛɛ akɛ: Aso nu amɛnuuu? Lɛlɛŋ akɛ ‘amɛgbee ejije kɛtee shikpɔŋ muu lɛ fɛɛ nɔ, ni amɛwiemɔi lɛ eshɛ jeŋ naagbee hei lɛ.’ ” (Romabii 10:13, 18) Yɛ gbɛi Yehowa ni jara wa waa lɛ yi ni amɛjieɔ yɛ nɛkɛ gbɛ nɔ lɛ hewɔ lɛ, ewebii lɛ ena ewe kɛha jamɔ, ni awoɔ lɛ obɔ kɛ anunyam sɔŋŋ lɛ mli gbɛfaŋnɔ ni sa kadimɔ waa. Shi, te nɛkɛ sane jajemɔ nɛɛ etee hiɛ waa eha tɛŋŋ, titri lɛ, yɛ afi 1996 mli? Ofainɛ kwɛmɔ tao ni nyiɛ sɛɛ lɛ yɛ baafai 18 kɛyashi 21 lɛ.

Nikpamɔ yɛ Je Lɛŋ Fɛɛ

10. Mɛɛ otii ni sa kadimɔ waa onaa yɛ Yehowa webii anitsumɔ lɛ mli, taakɛ amua naa awo tao ni yɔɔ baafai 18 kɛyashi 21 lɛ?

¹⁰ Be ko bako ni Yesu wiemɔi ni anaa yɛ Luka 10:2 lɛ he ebahia tamɔ nɛkɛ dã: “Nikpamɔ lɛ fa, shi nitsulɔi lɛ faaa; no hewɔ lɛ nyɛkpaa nikpamɔ nuntsɔ lɛ fai, koni etsu nitsulɔi kɛba enikpamɔ lɛ mli.” Ani oohere nakai ninefɔ̃ɔ lɛ nɔ? Gbɔmɛi akpekpei abɔ miifee nakai yɛ shikpɔŋ lɛ nɔ fɛɛ. Nɔ ni yeɔ enɛ he odase ji Maŋtsɛyeli shiɛlɔi ayifalɛ hee ni fe fɛɛ, ni ji 5,413,769 ni bu shiɛmɔyaa he akɔntaa yɛ 1996 mli lɛ. Kɛfata he lɛ, abaptisi nyɛmimɛi hii kɛ yei heei 366,579. Kwɛ bɔ ni wɔbuɔ nɛkɛ “jeŋmaji lɛ fɛɛ anii ni jara wa,” ni amrɔ nɛɛ amɛfataa he ni ‘akɛ anunyam sɔŋŋ woɔ Yehowa we kɛha jamɔ lɛ obɔ’ lɛ akɛ mɛi ni he hiaa waa diɛŋtsɛ!—Hagai 2:7.

11. Mɛni hewɔ wɔ fɛɛ wɔyɔɔ yiŋtoo ni wɔɔdamɔ nɔ wɔna miishɛɛ kɛteke nɔ lɛ?

¹¹ Hiɛyaa ni eba shikpɔŋkukuji heei ni kpaako atsuɔ nii yɛ mli lɛ ahe amaniɛbɔi lɛ hu sa kadimɔ waa. Ani wɔteŋ mɛi krokomɛi yeɔ mɛi ni náa nɔyaa ni tamɔ nɛkɛ amrɔ nɛɛ lɛ ahe awuŋa? Nɔ ni tamɔɔɔ nakai ji akɛ, wɔkɛ amɛ feɔ ekome kɛnaa miishɛɛ. Maji lɛ fɛɛ je shishi kɛ nibii bibii. Hagai yinɔ beaŋ gbalɔ, Zakaria, ŋma akɛ: “Namɔ gbeɔ nibii bibii agbi lɛ he guɔ?” (Zakaria 4:10) Wɔnaa miishɛɛ kɛtekeɔ nɔ akɛ amrɔ nɛɛ Maŋtsɛyeli shiɛlɔi akpekpei abɔ yɛ shikpɔji ni nitsumɔ lɛ emɔ shi jogbaŋŋ yɛ mli lɛ anɔ, ni atsuɔ shikpɔŋkuku lɛ mli nii agbeɔ naa yɛ be kɛ bei amli, daa otsi po yɛ maŋtiasei wuji pii amli. Ani wɔyɛ yiŋtoo ni wɔɔdamɔ nɔ wɔgbɔjɔ wɔnijiaŋ, amrɔ nɛɛ ni Yehowa kpãa yiwalaheremɔ hegbɛ mli ehaa hei ni tsutsu lɛ naatsii haaa amɛna hegbɛ lɛ? Dabi kɔkɔɔkɔ! “Abɔɔ lɛ ji je nɛɛŋ,” Yesu kɛɛ. (Mateo 13:38) Esa akɛ aya nɔ aye odase jogbaŋŋ kɛmɔ shi, tamɔ bɔ ni mra be mli kaselɔi lɛ ye odase jogbaŋŋ kɛmɔ shi yɛ Yudafoi anibii agbɛjianɔtoo lɛ naagbee lɛ.—Bɔfoi lɛ Asaji 2:40; 10:42; 20:24; 28:23.

Hiɛ ni Wɔɔkã He Wɔya Daa

12. Mɛɛ hewalɛwoo nɔ̃ wɔyɔɔ ni baaha ‘wɔya wɔhiɛ tɛ̃ɛ’? (Kwɛmɔ tao ni ji, “Nikpamɔ ‘Kɛjɛ Shikpɔŋ lɛ Naagbee He Lɛ’ ” hu.)

¹² Hɛɛ, esa akɛ wɔkɛ Yehowa ŋwɛi shwiili ni ji ŋwɛibɔfoi agbɛjianɔtoo lɛ anyiɛ, ni wɔkɛ lɛ ‘aya hiɛ tɛ̃ɛ.’ (Ezekiel 1:12) Wɔkaiɔ Petro wiemɔi nɛɛ akɛ: “Jeee tsɛ Nuntsɔ [Yehowa, NW] haa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) Esa akɛ ekaa ni sa kadimɔ waa, ni wɔnyɛmimɛi ni yɔɔ shikpɔji ni bɛ nɔ ko yɛ shika gbɛfaŋ lɛ anɔ lɛ yɔɔ lɛ akanya wɔ. Nɔ ni efee tamɔ Harmagedon fɛmɔ ni sɛɛ etsɛ nɛɛ eha ana hegbɛ akɛmiibua gbɔmɛi akpei ohai abɔ naa yɛ shikpɔji nɛɛ anɔ, kɛfata mɛi babaoo ni abuaa amɛnaa yɛ shikpɔŋkukuji ni atsuɔ nii yɛ mli jogbaŋŋ lɛ anɔ lɛ ahe. Kaahã nɔ ko miilaka bo yɛ he: “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa.” (Zefania 1:14) Esa akɛ wɔ hu wɔye oyai ni wɔkɛye naagbee odase jogbaŋŋ kɛmɔ shi!

13, 14. (a) Mɛni abaanyɛ awie yɛ woji afalɛ ni akɛha yɛ 1996 mli lɛ he? (b) Mɛɛ gbɛjianɔ krɛdɛɛi komɛi asafoi baanyɛ ato daa afi, ni mɛɛ gbɛjianɔ otoɔ koni ona mli gbɛfaŋnɔ?

¹³ Eyɛ mli akɛ otii lɛ fɛɛ ejeee kpo yɛ sɔɔmɔ he tao lɛ nɔ moŋ, shi shweremɔ ni sa kadimɔ eba yɛ Bibliai, woji wuji, kɛ woji tɛtrɛbii ni akɛha yɛ afi ni ho lɛ mli lɛ mli. Akɛ nɔkwɛmɔ nɔ lɛ, woji tɛtrɛbii ni akɛha yɛ je lɛŋ fɛɛ lɛ ná oha mlijaa 19 nɔyaa, ni ji ekomekomei 543,667,923 ni akɛha. Wɔ woji tɛtrɛbii lɛ hãa wɔnyɛɔ wɔshiɛɔ yɛ hegbɛi sɔrɔtoi amli—yɛ gbɛjegbɛi anɔ, yɛ shitaramɔ hei, yɛ bɔs shidaamɔ hei, yɛ nitsumɔ hei. Amaniɛbɔi tsɔɔ akɛ, mɛi ni ekase nii babaoo ni amɛkɛmiitsu nii lɛ ená bɔ ni aŋmala wɔ woji tɛtrɛbii lɛ amli saji jogbaŋŋ lɛ he miishɛɛ, ni amɛmiikpɛlɛ Biblia kasemɔ nɔ yɛ shikpɔŋkukuji komɛi ni Maŋtsɛyeli shiɛmɔ lɛ emɔ shi waa yɛ nɔ lɛ amli.

¹⁴ Daa afi, yɛ April nyɔŋ lɛ mli lɛ, efɔɔ kaa akɛ asafoi toɔ gbɛjianɔ krɛdɛɛ kɛhaa woji tɛtrɛbii kɛ nitsumɔ, ni amɛkɛ gbi muu fɛɛ tsuɔ nii yɛ shia kɛ shia kɛ hei ni maŋbii buaa amɛhe naa yɛ. Ani nyɛ asafo lɛ kɛ ehe baawo enɛ mli yɛ April 1997 mli? Áfee April Buu-Mɔɔ kɛ Awake! woji tɛtrɛbii ni sa kadimɔ waa, ni eka shi faŋŋ akɛ abaaná amɛmli saji ni jeɔ kpo yɛ be kometoo mli yɛ jeŋ fɛɛ lɛ he miishɛɛ waa diɛŋtsɛ! Yɛ Cyprus ŋshɔkpɔ lɛ nɔ nɛkɛ lɛ, asafoi lɛ, ni eŋɔ wiemɔ ni ji “wɔkɛ Maŋtsɛyeli shɛɛ sane lɛ ashɛ mɔ fɛɛ mɔ ŋɔɔ bɔ ni wɔɔnyɛ” lɛ efee amɛ sabala lɛ, po nyiɛ gbɛjianɔ ni amɛto kɛha woji tɛtrɛbii kɛ nitsumɔ daa nyɔŋ nɔ nɛɛ sɛɛ, ni amɛna yifalɛ hee ni ji ekomekomei 275,359 ni amɛkɛha yɛ afi lɛ mli, ni feɔ oha mli 54 nɔyaa.

Hagai Naagbee Shɛɛ Saji

15. (a) Mɛni hewɔ Yehowa kɛ shɛɛ saji krokomɛi tsu kɛtsɔ Hagai nɔ lɛ? (b) Mɛni esa akɛ wɔkase kɛjɛ Hagai shɛɛ sane ni ji etɛ lɛ mli?

¹⁵ Yehowa kɛ sane jajemɔ ni ji etɛ ni wɔbaanyɛ wɔŋɔto wɔtsui mli jogbaŋŋ ŋmɛnɛ tsu Hagai, beni ekɛ eshɛɛ sane ni ji enyɔ lɛ eyahã lɛ sɛɛ gbii 63. Hagai wie tamɔ nɔ ni Yudafoi lɛ miitswa sɔlemɔtsu lɛ shishi, nɔ ni amɛfee momo yɛ afii 17 ni etsɔ̃ hiɛ lɛ mli lɛ yɛ nakai beaŋ. Yehowa na ekoŋŋ akɛ esa akɛ etsu hetsuumɔ nitsumɔ ko. Osɔfoi kɛ maŋbii tsuuu amɛ nitsumɔi lɛ jogbaŋŋ, ni no hewɔ lɛ amɛhe tseee yɛ Yehowa hiɛ. Ani eeenyɛ efee akɛ Yehowa webii ateŋ mɛi komɛi egbɔjɔ amɛnijiaŋ ŋmɛnɛ, ni amɛkɛ amɛhe woɔ je lɛ gbɛi ni ŋmɛɔ nɔ fɛɛ nɔ feemɔ gbɛ lɛ kɛ heloonaa ninamɔ sɛɛdii mli? Ehe miihia ni wɔteŋ mɔ fɛɛ mɔ ahã ekã etsui nɔ akɛ, wɔbaawo Yehowa gbɛi lɛ hiɛ nyam “[kɛjɛ] ŋmɛnɛ gbi nɛɛ nɔ kɛyaa,” kɛ hekɛnɔfɔɔ yɛ eshiwoo nɛɛ mli akɛ: “Kɛjɛ ŋmɛnɛ gbi nɛɛ nɔ lɛ majɔɔ nyɛ!”—Hagai 2:10-19; Hebribii 6:11, 12.

16. Mɛɛ ‘hosomɔ’ ko ebɛŋkɛ kpaakpa, ni mɛni baajɛ mli aba?

¹⁶ Nakai gbi lɛ nɔ nɔŋŋ lɛ, “Yehowa Zebaot” wiemɔ ba Hagai ŋɔɔ ekoŋŋ nɔ ni ji shii ejwɛ kɛ naagbee nɔ̃. Eha ale nɔ ni hosomɔ ni “[E-baahoso] ŋwɛi kɛ shikpɔŋ lɛ” tsɔɔ, ni ekɛɛ: “Mabutu maŋtsɛyelii asɛi lɛ, ni makpata jeŋmaji lɛ amaŋtsɛyelii lɛ ahewalɛ hiɛ, ni mabutu shwiilii kɛ amɛmlitaralɔi, ni okpɔŋɔi kɛ amɛnɔtaralɔi lɛ aaanyɔnyɔi, mɔ fɛɛ mɔ yɛ enyɛmi klante naa.” (Hagai 2:6, 21, 22) Nɛkɛ gbɛ nɔ ‘hosomɔ’ lɛ baatsɔ ashɛ he ni mli wa fe fɛɛ, beni Yehowa tsuuɔ shikpɔŋ lɛ he kɛmɔɔ shi yɛ Harmagedon lɛ. No mli lɛ, “jeŋmaji lɛ fɛɛ anii ni jara wa lɛ” eba mli, ni amɛaafee adesai ashihilɛ gbɛjianɔtoo lɛ shishijee yɛ jeŋ hee lɛ mli. Mɛɛ yiŋtoi ni wɔɔdamɔ nɔ wɔmli afili wɔ ni wɔjie Yehowa yi nɛ!—Hagai 2:7; Kpojiemɔ 19:6, 7; 21:1-4.

17. Ahala Yesu akɛ “wolo naasɔomɔ nɔ̃” yɛ mɛɛ gbɛ nɔ?

¹⁷ Hagai ŋma ni ekɛmu egbalɛ lɛ naa akɛ: “ ‘Nakai gbi lɛ nɔ lɛ,’ Yehowa Zebaot kɛɛ, ‘maŋɔ bo, Zerubabel, . . . ni maŋɔo mafee tamɔ wolo naasɔomɔ nɔ̃; ejaakɛ bo lɛ mihalao,’ Yehowa Zebaot kɛɛ.” (Hagai 2:23) Amrɔ nɛɛ Kristo Yesu ji Yehowa mfoniri-feemɔŋ Mesia Maŋtsɛ kɛ Osɔfonukpa, ni eetsu gbɛhei sɔrɔtoi ni Amralo Zerubabel kɛ Osɔfonukpa Yoshua hi mli yɛ shikpɔŋ nɔ Yerusalem lɛ ahe nii kutuu yɛ ŋwɛi. Yesu ji mɔ ni ebatsɔ “Hɛɛ,” akɛ Yehowa dɛŋdade ni ekɛhaa “Nyɔŋmɔ shiwooi” babaoo lɛ baa mli lɛlɛŋ, tamɔ maŋtsɛ wolo naasɔomɔ nɔ̃ ni yɔɔ Yehowa ninejurɔ dɛŋ. (2 Korintobii 1:20; Efesobii 3:10, 11; Kpojiemɔ 19:10) Biblia gbalɛ mli shɛɛ sane muu lɛ fɛɛ gbalaa jwɛŋmɔ kɛyaa Kristo ni Yehowa kɛ lɛ eha akɛ Maŋtsɛ kɛ Kpɔlɔ ni yeɔ osɔfo lɛ nɔ.—Yohane 18:37; 1 Petro 1:18, 19.

18. Nɔ ni “Yehowa Zebaot kɛɛ,” ni ji naagbee nɔ lɛ baaná emlibaa ni hãa mɔ hejɔɔmɔ yɛ mɛɛ gbɛ nɔ?

¹⁸ Lɛlɛŋ, anaa anunyam ni da fe fɛɛ yɛ Yehowa mumɔŋ sɔlemɔtsu ni kpɛlɛɔ lɛ mli yɛ wɔgbii nɛɛ amli! Ni beni Yehowa ebɛɛ Satan gbɛjianɔtoo lɛ fɛɛ kɛtee kwraa sɛɛ lɛ, etsɛŋ ni Hagai 2:9 baaná mlibaa kroko ni yɔɔ miishɛɛ kɛfata he: “ ‘Ni biɛ nɛɛ mahã hejɔlɛ yɛ,’ Yehowa Zebaot kɛɛ.” Toiŋjɔlɛ baaba kɛ̃!—jeŋ muu fɛɛ toiŋjɔlɛ ni sɛɛ tsɛɔ, ni Yehowa “wolo naasɔomɔ nɔ̃,” Kristo Yesu, “Hejɔlɛ Lumɔ” lɛ baafee sɛɛdamɔlɔ, mɔ ni aŋma yɛ ehe akɛ: “Elumɔyeli lɛ shweremɔ kɛ hejɔlɛ lɛ sɛɛ efoŋ . . . Yehowa Zebaot hiɛdɔɔ lɛ aaafee enɛ.” (Yesaia 9:6, 7) Abaajie Yehowa we kɛha jamɔ lɛ anunyam lɛ kpo yɛ ejeŋ muu fɛɛ maŋtsɛyeli lɛ nɔyeli he ni toiŋjɔlɛ yɔɔ mli lɛ mli kɛya naanɔi anaanɔ. Eba akɛ wɔɔya nɔ wɔhi nakai shia lɛ daa!—Lala 27:4; 65:5; 84:11.

[Shishigbɛ niŋmai]

Ani Obaanyɛ Otsɔɔ Mli?

◻ Yehowa we lɛ ‘miiyi obɔ kɛ anunyam’ ŋmɛnɛ, yɛ mɛɛ gbɛ nɔ?

◻ Mɛni hewɔ oyaiyeli ni akɛaashiɛ sanekpakpa lɛ he ehiako tamɔ nɛkɛ dã lɛ?

◻ Mɛɛ hewalɛwoo nɔ̃ ni wɔkɛaashiɛ wiemɔ lɛ kɛ hehiamɔ 1996 Sɔɔmɔ Afi Akɔntaabuu lɛ kɛhaa?

◻ Kristo miisɔmɔ akɛ Yehowa “wolo naasɔomɔ nɔ̃” yɛ mɛɛ gbɛ nɔ?

[Akrabatsa ni yɔɔ baafa 15]

Nikpamɔ “Kɛjɛ Shikpɔŋ lɛ Naagbee He Lɛ”

Wɔkaneɔ Yehowa famɔ nɛɛ yɛ Yesaia 43:6 lɛ akɛ: “Kaatsi naa! Ŋɔɔ mibihii lɛ kɛjɛ shɔŋŋ kɛba, kɛ mibiyei lɛ hu kɛjɛ shikpɔŋ lɛ naagbee he lɛ.” Nɛkɛ ŋmalɛ nɛɛ miiná emlibaa ni sa kadimɔ waa ŋmɛnɛ yɛ Europa Bokagbɛ. Akɛ nɔkwɛmɔnɔ lɛ, susumɔ tsutsu Komunist maŋ ni ji Moldova lɛ he okwɛ. Amɛyɛ akrowai komɛi ni nɔ ni miihe ashɛ amɛyifalɛ lɛ fã kpotoo ji Odasefoi amrɔ nɛɛ. Esa akɛ amɛfa gbɛ kakadaŋŋ ni amɛyatao shikpɔŋkuku kɛha shiɛmɔ, shi amɛmiibɔ mɔdɛŋ waa diɛŋtsɛ! Shiɛlɔ ni yɔɔ asafoi nɛɛ amli lɛ atɛŋ mɛi babaoo ji fɔlɔi ni atswa amɛnane shi tu kɛtee Siberia yɛ 1950 afii lɛ shishijee gbɛ lɛ ashwiei. Amrɔ nɛɛ, amɛwekui lɛ miinyiɛ hiɛ yɛ nikpamɔ nitsumɔ lɛ amli. Abaptisi shiɛlɔi 12,565 ni amɛyɔɔ lɛ ateŋ mɛi 1,917 yɛ afi ni ho nɛɛ mli. Asafoi lɛ amli 43 yɛ shiɛlɔi aaashɛ 150 yɛ eko fɛɛ eko mli, ni kpokpai lɛ afalɛ etee hiɛ kɛjɛ ejwɛ kɛyashɛ kpaanyɔ yɛ sɔɔmɔ afi hee lɛ mli.

Nɔ ni sa kadimɔ waa hu ji shweremɔ ni eba yɛ Albania lɛ. Odasefoi anɔkwafoi fioo ko ŋmɛ amɛtsui shi yɛ jɛmɛ, yɛ yiwalɛ nɔyeli ni mli wa fe fɛɛ yɛ aaafee afii 50 mli lɛ shishi. Agbe amɛteŋ mɛi babaoo. Enɛ haa wɔkaiɔ Yesu shiwoo nɛɛ akɛ: “Kaashe amanehulu ni obaana lɛ eko eko gbeyei. Naa, abonsam baaŋɔ nyɛteŋ mɛi komɛi awo tsuŋ, koni aŋɔka nyɛ . . . Feemɔ anɔkwafo kɛyashi gbele mli, ni mahao wala akekre lɛ.” (Kpojiemɔ 2:10; kwɛmɔ Yohane 5:28, 29; 11:24, 25 hu.) Mɛni wɔnaa yɛ Albania bianɛ? Yehowa shiwoo ni wɔnaa yɛ Yesaia 60:22 lɛ mlibaa ni sa kadimɔ jogbaŋŋ lɛlɛŋ, akɛ: “Mɔ bibioo ko aaatsɔ mɛi akpe”! Yɛ 1990 mli lɛ, shiɛlɔ kome pɛ bu shiɛmɔ nitsumɔ he akɔntaa yɛ Albania. Shi, “nitsulɔi” babaoo ni jɛ Italy shikpɔji krokomɛi anɔ bo Yesu famɔ lɛ toi akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ.” (Mateo 28:19; Luka 10:2) Beni shɛɔ Yesu gbele lɛ Kaimɔ be lɛ yɛ 1996 mli lɛ, no mli lɛ shiɛlɔ 773 kɛ ekaa miishiɛ waa, ni mɛnɛɛmɛi bua mɛi 6,523 naa kɛba amɛ Kaimɔ kpeei lɛ ashishi, ni ji yibɔ ni fe shiɛlɔi lɛ ayifalɛ toi kpaanyɔ! Abɔ mɛi ayifalɛi ni yɔɔ naakpɛɛ, ni tee kpee nɛɛ ahe amaniɛ kɛjɛ hei ni etse amɛhe banee lɛ hu. Eyɛ mli akɛ shiɛlɔi bɛ maji nɛɛ amli moŋ, shi Kukës kɛ Divjakë maji lɛ ná mɛi 192 kɛ 230 ni ba yɛ maji nɛɛ amli. Krujë, ni yɔɔ shiɛlɔ kome pɛ lɛ, ná mɛi 212 ni ba kpee lɛ. Shiɛlɔi 30 ni yɔɔ Korçë lɛ yahai nibii kɛha mɛi ayifalɛ ni fe 300. Beni nakai yibɔ lɛ yi maŋ kpee he lɛ obɔ lɛ, eba lɛ akɛ esa akɛ ahã mɛi krokomɛi 200 lɛ aku amɛsɛɛ amɛya shia ejaakɛ gbɛ bɛ tsu lɛ mli dɔŋŋ. Lɛlɛŋ, ŋmɔ ni eyɛ futaa kɛha nikpamɔ nɛ!

Amaniɛbɔɔ nɛɛ jɛ Romania kɛba akɛ: “Beni wɔtsuɔ nii yɛ shia-kɛ-shia lɛ, wɔkɛ mɔ ko kpe ni ewie akɛ Yehowa Odasefoi ateŋ mɔ kome ji lɛ, ni eyɛ maŋ bibioo ko, ni taake wɔle lɛ, Odasefonyo ko kwraa bɛ jɛmɛ lɛ mli. Ekɛɛ wɔ akɛ yɛ lɛ esɛɛ lɛ, mɛi krokomɛi 15 hu yɛ, ni amɛkɛ afii babaoo etee kpeei aahu daa Soo kɛ Hɔgbaa, ni amɛbɔi shiɛmɔ yɛ shia kɛ shia hu. Enɔ jetsɛremɔ lɛ, wɔtee nakai maŋ lɛ mli. Wɔyanina mɛi 15 ni ji hii, yei, kɛ gbekɛbii ni amɛmiimɛ wɔ yɛ tsũi enyo mli, ni amɛhe woji wuji 20 kɛ woji tɛtrɛbii heei ni eba lɛ hu 20. Wɔtsɔɔ amɛ bɔ ni afeɔ Biblia mli nikasemɔi ahãa. Wɔkɛ amɛ fee akome kɛla, ni wɔha amɛ sanebimɔi ni he hiaa waa lɛ amli babaoo hetoo. Mɔ ni nyiɛɔ hiɛ yɛ kuu lɛ mli lɛ jaje yɛ faŋŋ mli akɛ: ‘Gbii fioo ko nɛ, ni mikɛ yaafonui sɔle miha Yehowa akɛ etsu tookwɛlɔ kɛba wɔ ŋɔɔ, ni amrɔ nɛɛ ahã misɔlemɔ lɛ hetoo.’ Wɔmii shɛ wɔhe jogbaŋŋ diɛŋtsɛ, ni beni wɔshiɔ jɛmɛ lɛ, ekɛ wɔ wie, tamɔ awusã ni naagbee lɛ eyana etsɛ, ni ekɛɛ: ‘Nyɛfainɛ nyɛhiɛ akakpaa wɔ nɔ. Nyɛbaa nyɛbasaraa wɔ ekoŋŋ! Wɔfee nakai, ni amrɔ nɛɛ wɔmiifee Biblia mli nikasemɔi kpawo yɛ nakai maŋ lɛ mli. Yɛ shikpɔŋkukuji heei pii amli lɛ, nitsumɔ lɛ jeɔ shishi yɛ naakpɛɛ gbɛ nɔ kɛ Biblia kasemɔ woji, ni anaa he miishɛɛ waa, ni enɛ tsɔɔ akɛ nitsumɔ lɛ jɛ ŋwɛi.”

[Akrabatsa ni yɔɔ baafa 18-21]

1996 SERVICE YEAR REPORT OF JEHOVAH’S WITNESSES WORLDWIDE

(Kwɛmɔ “bound volume”)

[Mfonirii ni yɔɔ baafa 16-17]

Aabua “jeŋmaji lɛ fɛɛ anii ni jara wa lɛ” anaa yɛ Ŋshɔkpɔi anɔ (1), Amerika Wuoyigbɛ (2), Afrika (3), Asia (4), Amerika Kooyigbɛ (5), kɛ Europa (6)