“Mibaa Mihe Shi Kɛjɛ Mitsui Mli”

1-3. Mɛɛ gbɛ nɔ Yesu tsɔ ebote Yerusalem, ni mɛni hewɔ ekolɛ asafoku lɛ mlibii lɛ ateŋ mɛi komɛi ahiɛ fee amɛ yaa lɛ?

YERUSALEM fɛɛ efee hoo kɛ miishɛɛ. Hiɛnaanɔ gbɔmɔ ko miiba jɛi! Mɛi ebua amɛhe naa yɛ gbɛjegbɛ ni kã maŋtiase lɛ sɛɛ lɛ he. Amɛmiishwe waa ni amɛkpee nuu nɛɛ atuu, ejaakɛ amɛteŋ mɛi komɛi kɛɛ eji Maŋtsɛ David niyelɔ kɛ Mɔ ni sa akɛ eyeɔ Israel nɔ. Amɛteŋ mɛi babaoo hiɛ tɛŋ blɛoi kɛba ni amɛbafɔ̃ kɛkpee lɛ; mɛi krokomɛi hu ŋɔ atadei kɛ tsei aniji amɛshwie gbɛ lɛ nɔ amɛha lɛ koni amɛkɛwo ehiɛ nyam. (Mateo 21:7, 8; Yohane 12:12, 13) Mɛi babaoo miisusu bɔ ni ebaapue eha lɛ he.

² Ekolɛ, mɛi komɛi miikpa gbɛ akɛ amɛbaana nibii komɛi ni tsɔɔ akɛ eje agbo. Ekã shi faŋŋ akɛ, amɛle hii komɛi ni abuɔ amɛ waa ni pue yɛ agbojee mli. Ákɛ nɔkwɛmɔnɔ lɛ, David bi Absalom wo ehe maŋtsɛ; ni eha hii 50 hiɛ foi kɛnyiɛ eshwiili lɛ hiɛ. (2 Samuel 15:1, 10) Roma nɔyelɔ Julius Caesar bi ni afee nɔ ko ni yɔɔ gbidii po fe nakai aha lɛ; be ko beni ekɛ mɛi shiɔ akoŋ kɛboteɔ Roma maŋkwramɔ gwabɔɔhe lɛ yɛ kunim ko ni amɛye lɛ hewɔ lɛ, eha shwuɔi 40 tere kanei kɛnyiɛ amɛkoŋ nɔ biɛ kɛ biɛ! Shi amrɔ nɛɛ, mɛi ni yɔɔ Yerusalem lɛ miikpa mɔ ko ni nɔ kwɔ kwraa fe nɛkɛ gbɛ. Kɛji asafoku lɛ le enɛ jogbaŋŋ jio, amɛleee jio, mɔ nɛɛ ji Mesia lɛ, gbɔmɔ ni fe fɛɛ ni ehi shi pɛŋ lɛ. Shi beni Maŋtsɛ ni baaye nɔ wɔsɛɛ nɛɛ pue lɛ, ekolɛ mɛi komɛi ahiɛ fee amɛ yaa.

³ Amɛnaaa shwiili ko lɛ, mɔ ko ehiɛɛɛ foi kɛnyiɛɛɛ ehiɛ lɛ, amɛnaaa okpɔŋɔ ko kwraa​—ni asaŋ amɛnaaa shwuɔi hu. Yɛ no najiaŋ lɛ, Yesu ta teji, ni ji nitsumɔ kooloo ko ni baa shi nɔ.a Ewulako ehe kɛ nibii ni jara wa, ni nakai nɔŋŋ awulako kooloo ni eta enɔ lɛ hu. Yɛ nɔ najiaŋ ni Yesu kɛ teji nɔtamɔnii ni jara wa aaafɔ̃ teji lɛ nɔ ni eta nɔ lɛ, esɛɛnyiɛlɔi ni bɛŋkɛ lɛ kpaakpa lɛ kɛ atadei komɛi shwie kooloo lɛ nɔ. Mɛni hewɔ Yesu hala akɛ ebaatsɔ gbɛ ni baa shi tamɔ nɛkɛ nɔ kɛbote Yerusalem, be mli ni mɛi ni bɛ hegbɛ ni tamɔ lɛ lɛ po sumɔɔ ni amɛpue bɔ ni baaha mɛi ana akɛ amɛje agbo lɛ?

 4. Mɛni Biblia lɛ gba yɛ gbɛ nɔ ni Maŋtsɛ ni ji Mesia lɛ baatsɔ abote Yerusalem lɛ he?

⁴ No mli lɛ, Yesu miiwo gbalɛ ko obɔ̃, akɛ: “Omli afilio pii, . . . Bɔɔ oshe, Yerusalem biyoo! Naa, omaŋtsɛ lɛ miiba oŋɔɔ: jalɔ kɛ yiwalaherelɔ ji lɛ; ebaa ehe shi, ni etá teji nɔ.” (Zakaria 9:9) Gbalɛ nɛɛ tsɔɔ akɛ gbi ko baashɛ ni Mɔ ni Nyɔŋmɔ Efɔ Lɛ Mu ni ji Mesia lɛ baaha Yerusalembii lɛ ana akɛ lɛ ji Maŋtsɛ ni Nyɔŋmɔ ehala. Kɛfata he lɛ, gbɛ nɔ ni ebaatsɔ efee enɛ, ní nɔ ni fata he ji teji ni ehala akɛ ebaata enɔ lɛ, baaha ana akɛ eyɛ su ko ni hi jogbaŋŋ yɛ etsuiŋ​—no ji heshibaa.