Anɔkwa Jamɔ Kunimyeli Miibɛŋkɛ
“Yehowa aaaye maŋtsɛ yɛ shikpɔŋ lɛ fɛɛ nɔ.”—ZAKARIA 14:9.
1. Mɛni ji Kristofoi ni afɔ amɛ mu lɛ aniiashikpamɔ yɛ Jeŋ Ta I mli, ni agba enɛ afɔ̃ shi yɛ mɛɛ gbɛ nɔ?
BENI awuɔ klɛŋklɛŋ jeŋ ta lɛ, Kristofoi ni afɔ amɛ mu lɛ kɛ amanehului kɛ tsuŋwooi babaoo kpe kɛjɛ jeŋmaji ni kɛ amɛhe wuɔ ta lɛ adɛŋ. Atsĩmɔ yijiemɔ afɔlei ni amɛkɛhaa Yehowa lɛ naa waa, ni amɛbote mumɔŋ nomŋɔɔ shihilɛ mli. Agba enɛɛmɛi fɛɛ afɔ̃ shi yɛ Zakaria 14:2, ni wieɔ majimaji ateŋ tutuamɔ ko ni baaba Yerusalem nɔ lɛ he lɛ. Maŋtiase ni gbalɛ nɛɛ wieɔ he lɛ ji “ŋwɛi Yerusalem,” Nyɔŋmɔ ŋwɛi Maŋtsɛyeli lɛ kɛ “Nyɔŋmɔ kɛ toobi lɛ maŋtsɛsɛi lɛ” shihilɛ he lɛ. (Hebribii 12:22, 28; 13:14; Kpojiemɔ 22:3) Nyɔŋmɔ webii ni afɔ amɛ mu, ni yɔɔ shikpɔŋ nɔ lɛ damɔ shi kɛha nakai maŋtiase lɛ. Amɛteŋ anɔkwafoi lɛ hi shi kɛfo nakai tutuamɔ lɛ, ni amɛŋmɛɛɛ amɛhe amɛhaaa ni aŋɔ amɛ nom ‘kɛjɛ maŋ lɛ mli.’a
2, 3. (a) Yehowa jamɔ eye kunim kɛjɛ 1919 kɛbaa yɛ mɛɛ gbɛ nɔ? (b) Kɛjɛ 1935 kɛbaa nɛɛ, mɛɛ nibii komɛi etee nɔ?
2 Yɛ 1919 mli lɛ, aha mɛi ni afɔ amɛ mu lɛ ateŋ anɔkwafoi lɛ ye amɛhe kɛjɛ amɛ nomŋɔɔ shihilɛ lɛ mli, ni amɛkɛ toiŋjɔlɛ be ni nyiɛ ta lɛ sɛɛ lɛ tsu nii amrɔ nɔŋŋ. Ákɛ ŋwɛi Yerusalem najiaŋdamɔlɔi lɛ, amɛkɛ hegbɛ kpele ni amɛna akɛ amɛshiɛ Nyɔŋmɔ Maŋtsɛyeli lɛ he sanekpakpa lɛ amɛtsɔɔ ni amɛye amɛbua kɛha mɛi 144,000 lɛ ateŋ naagbee bii lɛ anaabuamɔ lɛ tsu nii. (Mateo 24:14; 2 Korintobii 5:20) Yɛ 1931 mli lɛ, amɛŋɔ Ŋmalɛ naa gbɛi ni sa ni ji Yehowa Odasefoi—Yesaia 43:10, 12.
3 Kɛjɛ nakai beaŋ kɛbaa nɛɛ, Nyɔŋmɔ Odasefoi ni afɔ amɛ mu lɛ gbɔjɔko amɛnijiaŋ. Hitler kɛ e-Nazi maŋkwramɔ kɛ asraafoi agbɛjianɔtoo lɛ po nyɛɛɛ atsi amɛ naa. Yɛ yiwaa ni akɛba amɛnɔ yɛ je lɛŋ fɛɛ lɛ fɛɛ sɛɛ lɛ, amɛnitsumɔ lɛ ewo yibii yɛ shikpɔŋ lɛ nɔ fɛɛ. Titri lɛ kɛjɛ afi 1935 kɛbaa nɛɛ, majimaji ateŋ “asafo babaoo” ni agba yɛ amɛhe afɔ̃ shi yɛ Kpojiemɔ wolo lɛ mli lɛ ebafata amɛhe. Mɛnɛɛmɛi hu ji Kristofoi ni ejɔɔ amɛhe nɔ ni abaptisi amɛ, ni “amɛfɔ amɛtadei lɛ ahe, ni amɛha eyɛ futaa yɛ toobi lɛ,” ni ji Yesu Kristo “la lɛ mli.” (Kpojiemɔ 7:9, 14) Shi kɛlɛ, amɛjeee mɛi ni afɔ amɛ mu ni yɔɔ ŋwɛi shihilɛ he hiɛnɔkamɔ. Amɛ hiɛnɔkamɔ ji akɛ amɛnine baashɛ nɔ ni Adam kɛ Hawa laaje, ni ji adesa wala ni eye emuu yɛ paradeiso shikpɔŋ nɔ lɛ nɔ. (Lala 37:29; Mateo 25:34) Ŋmɛnɛ, asafo babaoo lɛ ayifalɛ fe susumai akpekpei enumɔ. Yehowa anɔkwa jamɔ lɛ miiye kunim, shi enaagbee kunimyeli lɛ kã wɔhiɛ lolo.
Gbɔi ni yɔɔ Nyɔŋmɔ Mumɔŋ Sɔlemɔtsu lɛ Mli
4, 5. (a) Nɛgbɛ asafo babaoo lɛ jaa Yehowa yɛ? (b) Mɛɛ hegbɛi amɛnaa mli ŋɔɔmɔ, ni enɛ haa mɛɛ gbalɛ baa mli?
4 Taakɛ agba afɔ̃ shi lɛ, asafo babaoo lɛ “jaa [Nyɔŋmɔ] nyɔɔŋ kɛ shwane yɛ esɔlemɔtsu lɛ mli.” (Kpojiemɔ 7:15) Akɛni amɛjeee mumɔŋ Israelbii ni yeɔ osɔfo hewɔ lɛ, eeenyɛ efee akɛ Yohane na amɛ ni amɛdamɔ sɔlemɔwe lɛ, yɛ Jeŋmajiaŋbii akpo ni yɔɔ agbo lɛ naa lɛ nɔ. (1 Petro 2:5) Kwɛ anunyam ni Yehowa mumɔŋ sɔlemɔtsu lɛ ena, ni ekpoi lɛ anɔ fɛɛ eyi obɔ kɛ nɛkɛ asafo babaoo ni fataa mumɔŋ Israel shwɛɛnii lɛ ahe amɛkɛ yijiemɔ haa lɛ lɛ!
5 Asafo babaoo lɛ sɔmɔɔɔ Nyɔŋmɔ yɛ shihilɛ ni akɛ osɔfoi lɛ amligbɛ kpo lɛ nɔ fee he mfoniri lɛ mli. Abuuu amɛ jalɔi kɛ yiŋtoo akɛ amɛaafee Nyɔŋmɔ mumɔŋ bii ni ehala amɛ. (Romabii 8:1, 15) Shi kɛlɛ, Yesu kpɔmɔ nɔ lɛ mli hemɔkɛyeli ni amɛyɔɔ lɛ hewɔ lɛ, amɛyɛ shidaamɔ ni he tse yɛ Yehowa hiɛ. Abuɔ amɛ jalɔi kɛ yiŋtoo akɛ amɛji eshieŋtsɛmɛi. (Okɛto Yakobo 2:21, 23 he.) Amɛ hu amɛna hegbɛ akɛ amɛkɛ afɔleshaai ni akpɛlɛɔ nɔ aaabashwie Nyɔŋmɔ mumɔŋ afɔleshaa latɛ lɛ nɔ. Enɛ hewɔ lɛ, gbalɛ ni yɔɔ Yesaia 56:6, 7 lɛ miina emlibaa ni yɔɔ nyam yɛ nɛkɛ asafo babaoo nɛɛ agbɛfaŋ akɛ: “Gbɔi ni kɛ amɛhe bakpɛtɛɔ Yehowa he ni amɛsɔmɔɔ lɛ ni amɛsumɔɔ Yehowa gbɛi lɛ, . . . amɛ hu mikɛ amɛ aaaba migɔŋ krɔŋkrɔŋ lɛ nɔ, ni maha amɛnya yɛ misɔlemɔwe lɛ. Amɛ shãa afɔlei kɛ amɛ gbee afɔlei lɛ aaasa mihiɛ yɛ mifɔleshaa latɛ lɛ nɔ; ejaakɛ miwe lɛ, aaatsɛ lɛ sɔlemɔwe aha majimaji fɛɛ.”
6. (a) Mɛɛ afɔleshaai nɛkɛ gbɔi lɛ kɛhaa? (b) Mɛni lalakã kɛ nu ni yɔɔ osɔfoi akpo lɛ nɔ lɛ kaiɔ amɛ yɛ he?
6 Afɔlei ni nɛkɛ gbɔi nɛɛ bashãa lɛ ekomɛi ji “naabui [ni tamɔ niyenii afɔlei ni afee lɛ jogbaŋŋ] ni jajeɔ [Nyɔŋmɔ] gbɛi lɛ ayibii lɛ” kɛ “ejurɔfeemɔ kɛ nikee.” (Hebribii 13:15, 16) Nu kɛ lalakã agbo ni esa akɛ osɔfoi lɛ kɛfɔflɔ amɛhe nɛɛ hu feɔ kaimɔ nɔ ni he hiaa kɛha nɛkɛ gbɔi nɛɛ. Esa akɛ amɛ hu amɛba amɛhe shi amɛha mumɔŋ kɛ jeŋba mli hetsuumɔ, beni ahaa Nyɔŋmɔ Wiemɔ lɛ yaa nɔ efeɔ faŋŋ kɛhaa amɛ lɛ.
He Krɔŋkrɔŋ lɛ kɛ Nibii ni Yɔɔ Mli
7. (a) Te asafo babaoo lɛ buɔ osɔfoi aweku krɔŋkrɔŋ lɛ hegbɛi amɛhaa tɛŋŋ? (b) Mɛɛ hegbɛi krokomɛi gbɔi lɛ ateŋ mɛi komɛi anine eshɛ nɔ?
7 Ani He Krɔŋkrɔŋ lɛ kɛ nibii ni akɛsaa mli lɛ hiɛ shishinumɔ kɛha nɛkɛ gbɔi asafo babaoo nɛɛ? Ojogbaŋŋ, amɛhiŋ shihilɛ ni He Krɔŋkrɔŋ lɛ feɔ he mfoniri lɛ mli kɔkɔɔkɔ. Afɔko amɛ ehee akɛ Nyɔŋmɔ mumɔŋ bii ni yɔɔ hegbɛ akɛ ŋwɛi maŋ lɛ mli bii. Ani enɛ haa amɛnuɔ awuŋayeli loo hiɛjoomɔ he? Dabi. Yɛ no najiaŋ lɛ, amɛnaa hegbɛ ni amɛna akɛ amɛaaye amɛbua mɛi 144,000 lɛ amli shwɛɛnii lɛ he miishɛɛ, ni amɛjieɔ hiɛsɔɔ ni mli kwɔ kpo yɛ Nyɔŋmɔ yiŋtoo ni ekɛkpɛlɛ nɛkɛ mumɔŋ bii, ni kɛ Kristo baafee ekome kɛhole adesai anɔ kɛyashɛ emuuyeli mli lɛ anɔ lɛ he. Agbɛnɛ hu, gbɔi asafo babaoo lɛ buɔ Nyɔŋmɔ duromɔ kpele ni amɛsaaa, ni ji shikpɔŋ nɔ hiɛnɔkamɔ ni eha amɛ kɛha naanɔ wala namɔ yɛ Paradeiso lɛ, akɛ nɔ ni jara wa waa kɛha amɛ. Taakɛ blema Nethinim lɛ ji lɛ, aha nɛkɛ gbɔi nɛɛ ateŋ mɛi komɛi nɔkwɛmɔ hegbɛi koni amɛye amɛbua osɔfoi aweku krɔŋkrɔŋ lɛ.b (Yesaia 61:5) Mɛnɛɛmɛi ateŋ Yesu baahala “lumɛi yɛ shikpɔŋ lɛ nɔ fɛɛ” lɛ kɛbaajɛ.—Lala 45:17.
8, 9. Mɛɛ sɛɛnamɔ asafo babaoo lɛ naa kɛjɛɔ nibii ni yɔɔ He Krɔŋkrɔŋ lɛ he susumɔ mli?
8 Eyɛ mli akɛ amɛboteŋ mfoniri feemɔŋ He Krɔŋkrɔŋ lɛ moŋ, shi gbɔi asafo babaoo lɛ kaseɔ nibii ni he yɔɔ sɛɛnamɔ kɛjɛɔ nibii ni akɛsaa mli lɛ amli. Taakɛ bɔ ni ehe hiaa ni awo kanetso lɛ mli mu be fɛɛ be lɛ, nakai nɔŋŋ ehe hiaa ni gbɔi lɛ ana mumɔ krɔŋkrɔŋ lɛ koni eye ebua amɛ ni amɛnu Nyɔŋmɔ Wiemɔ lɛ mli anɔkwalei ni yaa hiɛ fiofio, ni akɛtsɔɔ “tsulɔ anɔkwafo kɛ nilelɔ” lɛ nɔ akɛhaa lɛ ashishi. (Mateo 24:45-47) Kɛfata he lɛ, Nyɔŋmɔ mumɔ lɛ yeɔ ebuaa amɛ ni amɛhereɔ ninefɔ̃ɔ nɛɛ nɔ, akɛ: “Mumɔ lɛ kɛ ayemforo [shwɛɛnii ni afɔ amɛ mu] lɛ kɛɔ akɛ: ‘Ba!’ Ni mɔ ni nuɔ lɛ, ha ni ekɛɛ: ‘Ba!’ Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.” (Kpojiemɔ 22:17) Enɛ hewɔ lɛ, kanetso lɛ feɔ kaimɔ nɔ kɛhaa asafo babaoo lɛ yɛ gbɛnaa nii ni kã amɛnɔ akɛ amɛkpɛ akɛ Kristofoi, ni amɛtsi amɛhe kɛjɛ subaŋ, susumɔ, wiemɔ, loo nifeemɔ mli nɔ fɛɛ nɔ ni baafee Nyɔŋmɔ mumɔ krɔŋkrɔŋ lɛ nidɔɔ nii lɛ he lɛ he.—Efesobii 4:30.
9 Okpɔlɔ kɛ hiɛmaa aboloo lɛ kaiɔ asafo babaoo lɛ akɛ, kɛ amɛaaya nɔ amɛhe awa daa yɛ mumɔŋ lɛ, no lɛ esa akɛ amɛye mumɔŋ niyenii ni jɛ Biblia lɛ kɛ “tsulɔ anɔkwafo kɛ nilelɔ” lɛ woji amli lɛ be fɛɛ be. (Mateo 4:4) Tsofa-kɛ-ŋma afɔleshaa latɛ lɛ kaiɔ amɛ yɛ bɔ ni ehe hiaa ni amɛkɛ hiɛmiamɔ asɔle amɛbi Yehowa yelikɛbuamɔ koni amɛnyɛ amɛhiɛ amɛ emuuyeli mli lɛ he. (Luka 21:36) Esa akɛ yijiemɔ kɛ shidaa wiemɔi ni jɛ amɛtsuiiaŋ afata amɛsɔlemɔi lɛ ahe. (Lala 106:1) Tsofa-kɛ-ŋma afɔleshaa latɛ lɛ hu kaiɔ amɛ yɛ bɔ ni ehe hiaa ni amɛjie Nyɔŋmɔ yi yɛ gbɛi krokomɛi anɔ, tamɔ amɛtsui muu fɛɛ mli ni amɛaajɛ amɛla Maŋtsɛyeli lalai yɛ Kristofoi akpeei ashishi, kɛ amɛhe ni amɛaasaa jogbaŋŋ ni ‘amɛkɛ amɛnaabui ajaje jogbaŋŋ kɛmɔ shi kɛshɛ yiwalaheremɔ he’ lɛ he.—Romabii 10:10.
Anɔkwa Jamɔ Kunimyeli Kwraa Kɛmɔ Shi
10. (a) Mɛɛ hiɛnɔkamɔ ni yɔɔ nyam wɔbaanyɛ wɔkpa gbɛ? (b) Mɛɛ nifeemɔ ko esa akɛ etsɔ̃ hiɛ kɛba klɛŋklɛŋ?
10 Ŋmɛnɛ, “majimaji pii” ni jɛ jeŋmaji fɛɛ mli miike yuu kɛmiiba Yehowa we kɛha jamɔ lɛ. (Yesaia 2:2, 3) Kpojiemɔ 15:4 jajeɔ kɛmaa enɛ nɔ mi akɛ: “Namɔ po sheŋo gbeyei, Nuntsɔ [Yehowa], ni ewoŋ ogbɛi lɛ hiɛ nyam? Ejaakɛ bo okometoo ji mɔ krɔŋkrɔŋ; ejaakɛ jeŋmaji lɛ fɛɛ aaaba ni amɛbaja yɛ ohiɛ, ejaakɛ ajie ojalɛ nii lɛ ashi faŋŋ.” Zakaria yitso 14 lɛ wieɔ nɔ ni baanyiɛ sɛɛ kɛba lɛ he. Yɛ wɔsɛɛ be ni etsɛŋ mli lɛ, subaŋ fɔŋ ni gbɔmɛi ni yɔɔ shikpɔŋ nɔ lɛ ateŋ mɛi pii jieɔ lɛ kpo lɛ baashɛ he ni mli wa fe fɛɛ, beni amɛbuaa amɛhe naa nɔ ni ji naagbee kwraa, koni amɛwuu amɛshi Yerusalem—ni ji ŋwɛi Yerusalem najiaŋdamɔlɔi ni yɔɔ shikpɔŋ nɔ lɛ. Kɛkɛ lɛ Yehowa baafee he nɔ ko. Akɛ Nyɔŋmɔ Tawulɔ lɛ, ‘eeeje kpo, ni ekɛ nakai jeŋmaji ni kaa akɛ amɛkɛ nakai tutuamɔ lɛ aaaba lɛ ayawuu.’—Zakaria 14:2, 3.
11, 12. (a) Te Yehowa baatsu jeŋ muu fɛɛ tutuamɔ ni baaba ejalɔi ni yɔɔ esɔlemɔtsu lɛ mli lɛ anɔ lɛ he nii eha tɛŋŋ? (b) Mɛni baajɛ Nyɔŋmɔ ta lɛ mli aba?
11 “Enɛ ji haomɔ ni Yehowa kɛaahao majimaji fiaa ni efã ta eshi Yerusalem lɛ: Amɛheloo aaakpɔtɔ beni amɛdamɔ amɛnaji anaa lolo lɛ, ni amɛhiŋmɛii aaakpɔtɔ yɛ amɛfɔji lɛ amli, ni amɛlilɛi hu aaakpɔtɔ yɛ amɛdaaŋ. Ni aaaba mli akɛ nakai gbi lɛ nɔ lɛ [yiŋfutumɔ] kpeteŋkpele aaajɛ Yehowa ŋɔɔ aba amɛteŋ, ni amɛteŋ mɔ fɛɛ mɔ aaamɔ enaanyo nine mli, ni mɔnɛ aaawo enine nɔ yɛ mɔnɛ nɔ.”—Zakaria 14:12, 13.
12 Kɛji haomɔ nɛɛ ji haomɔ diɛŋtsɛ jio mfoniri feemɔŋ nɔ jio, wɔbaamɛ ni wɔkwɛ nɔ ni baaba. Shi, nɔmimaa yɛ nɔ kome he. Kɛji Nyɔŋmɔ henyɛlɔi nɛɛ fã akɛ amɛkɛ amɛ jeŋ muu fɛɛ tutuamɔ miiba Yehowa tsuji anɔ lɛ, akɛ Nyɔŋmɔ hewalɛ ofe lɛ kpojiemɔ ni yɔɔ gbeyei diɛŋtsɛ baatsĩ amɛ naa. Abaaha amɛfee dioo ni amɛtswaaa amɛsɛŋ. Ebaafee tamɔ nɔ ni amɛlilɛii ni amɛkɛtswaa mpoa lɛ ekpɔtɔ. Oti ni amɛfee ekome kɛtiuɔ lɛ baafee tuutuu yɛ amɛhiɛ, tamɔ nɔ ni amɛhiŋmɛii ekpɔtɔ. Amɛ gbɔmɔtsoŋ hewalɛi, ni ha amɛná ekãa akɛ amɛkɛ tutuamɔ aaaba lɛ, baatã kwraa. Amɛkɛ yiŋfutumɔ baatsɔ amɛhiɛ amɛwo amɛhe ni amɛbaagbegbee amɛhe jogbaŋŋ. Nɛkɛ gbɛ nɔ abaatsɔ akpata Nyɔŋmɔ henyɛlɔi ni yɔɔ shikpɔŋ nɔ lɛ fɛɛ ahiɛ. Yɛ naagbee lɛ, abaanyɛ jeŋmaji lɛ fɛɛ nɔ ni amɛkpɛlɛ Yehowa jeŋ muu fɛɛ maŋtsɛyeli lɛ nɔ. Ni gbalɛ nɛɛ baaba mli akɛ: “Yehowa aaaye maŋtsɛ yɛ shikpɔŋ lɛ fɛɛ nɔ.” (Zakaria 14:9) Yɛ no sɛɛ lɛ, abaafimɔ Satan kɛ edaimonioi lɛ beni Kristo Afii Akpe Nɔyeli lɛ jeɔ shishi kɛ jɔɔmɔi wuji ni asaa ato aha adesai lɛ.—Kpojiemɔ 20:1, 2; 21:3, 4.
Shikpɔŋ nɔ Gbohiiashitee Lɛ
13. Namɛi ji ‘jeŋmaji lɛ fɛɛ ateŋ mɛi ni eshwɛ lɛ’?
13 Zakaria gbalɛ lɛ yaa nɔ yɛ yitso 14, kuku 16 lɛ akɛ: “Ni aaaba mli akɛ jeŋmaji fɛɛ ni te shi wo Yerusalem lɛ ateŋ mɛi ni eshwɛ lɛ aaaba daa afi, ni amɛbaja maŋtsɛ Yehowa Zebaot, ni amɛbaye asesei agbijurɔ lɛ hu.” Taakɛ Biblia lɛ tsɔɔ lɛ, gbɔmɛi fɛɛ ni yɔɔ wala mli ŋmɛnɛ, ni yaa nɔ amɛhiɔ shi aahu kɛyashiɔ nibii agbɛjianɔtoo fɔŋ nɛɛ naagbee, ni akojoɔ amɛ akɛ anɔkwa jamɔ henyɛlɔi lɛ baaná “nyɔmɔwoo ni ji naanɔ hiɛkpatamɔ.” (2 Tesalonikabii 1:7-9; kwɛmɔ Mateo 25:31-33, 46 hu.) Amɛnaŋ gbohiiashitee. Belɛ, eka shi faŋŋ akɛ, jeŋmaji lɛ amli bii ni gboi dani Nyɔŋmɔ naagbee ta lɛ fɛ, ni gbohiiashitee hiɛnɔkamɔ ni damɔ Biblia lɛ nɔ yɔɔ kɛha amɛ lɛ fata “mɛi ni eshwɛ” lɛ ahe. “Ŋmɛlɛtswaa lɛ miiba,” taakɛ Yesu wo shi lɛ, “nɔ mli ni mɛi fɛɛ ni yɔɔ gbohii abui lɛ amli lɛ aaanu egbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.”—Yohane 5:28, 29.
14. (a) Mɛni esa akɛ mɛi ni atee amɛ shi lɛ afee ni amɛna naanɔ wala? (b) Mɛni baaba mɛi ni ekpɛlɛɛɛ akɛ amɛaajɔɔ amɛhe nɔ amɛha Yehowa ni amɛkɛ amɛhe awo anɔkwa jamɔ mli lɛ anɔ?
14 Esa akɛ mɛi ni abaatee amɛ shi nɛɛ fɛɛ afee nɔ ko, bɔni afee ni amɛ shitee lɛ afee nɔ ni kɛ amɛ yaa wala mli, shi jeee nɔ ni kɛ amɛ yaa fɔbuu kojomɔ mli. Esa akɛ amɛba Yehowa sɔlemɔtsu lɛ kpo ni yɔɔ shikpɔŋ nɔ lɛ nɔ, ni amɛbakoto shi amɛha Nyɔŋmɔ yɛ henɔjɔɔmɔ mli kɛtsɔ Yesu Kristo nɔ. Mɛi ni atee amɛ shi lɛ ateŋ mɔ fɛɛ mɔ ni ekpɛlɛɛɛ ni efeɔ enɛ lɛ baaná haomɔ ni baaba ŋmɛnɛŋmɛnɛ beaŋ jeŋmaji lɛ anɔ lɛ eko. (Zakaria 14:18) Namɔ le mɛi ni atee amɛ shi ni kɛ miishɛɛ baafata asafo babaoo lɛ ahe ni amɛkɛye mfoniri feemɔŋ Asesei Agbijurɔ lɛ ayifalɛ? Ŋwanejee ko bɛ he akɛ, abaana mɛi babaoo, ni no baaha anunyam babaoo ajɛ mli aba aha Yehowa mumɔŋ sɔlemɔtsu kpeteŋkpele lɛ!
Mfoniri Feemɔŋ Asesei Agbijurɔ Lɛ
15. (a) Mɛni ji blema Israel Asesei Agbijurɔ lɛ mli nibii komɛi ni sa kadimɔ waa? (b) Mɛni hewɔ agbeɔ tsina hii 70 yɛ gbijurɔyeli lɛ mli lɛ?
15 Daa afi lɛ, abiɔ ni blema Israel aye Asesei Agbijurɔ lɛ. Eyeɔ otsi, ni ebaa yɛ amɛ nikpamɔ nii lɛ anaabuamɔ be lɛ naagbee. Eji shidaa be ni yɔɔ miishɛɛ. Yɛ otsi ni eyeɔ lɛ mli fɛɛ lɛ, esa akɛ amɛhi buui ni sɛɛ etsɛɛɛ ni akɛ tsei anɔ baai, titri lɛ tɛŋ blɛoi eha yiteŋ lɛ amli. Gbijurɔ lɛ kaiɔ Israel bɔ ni Nyɔŋmɔ here amɛ blematsɛmɛi lɛ ayiwala kɛjɛ Mizraim, kɛ bɔ ni ekwɛ amɛnɔ jogbaŋŋ beni amɛhiɔ asesei amli ni amɛkpaa shi afii 40 yɛ ŋa lɛ nɔ, aahu kɛyashi be mli ni amɛshɛ Shiwoo Shikpɔŋ lɛ nɔ lɛ. (3 Mose 23:39-43) Be mli ni ayeɔ gbijurɔ lɛ, akɛ tsina hii 70 shãa afɔle yɛ sɔlemɔtsu lɛ afɔleshaa latɛ lɛ nɔ. Eka shi faŋŋ akɛ, nɛkɛ gbijurɔyeli lɛ mli nifeemɔ nɛɛ feɔ yiwalaheremɔ nitsumɔ ni eye emuu kɛmɔ shi ni Yesu Kristo batsu lɛ he gbalɛ mli mfoniri. Yɛ naagbee lɛ, ekpɔmɔ afɔleshaa lɛ mli sɛɛnamɔi lɛ baaho kɛba adesai awekui 70 ni jɛ Noa mli lɛ aseshibii babaoo ni anyɛŋ amɛ akane lɛ anɔ.—1 Mose 10:1-29; 4 Mose 29:12-34; Mateo 20:28.
16, 17. (a) Mɛɛ be mfoniri feemɔŋ Asesei Agbijurɔ lɛ yeli je shishi, ni etee nɔ yɛ mɛɛ gbɛ nɔ? (b) Asafo babaoo lɛ naa gbijurɔyeli lɛ mli gbɛfaŋnɔ yɛ mɛɛ gbɛ nɔ?
16 Enɛ hewɔ lɛ blema Asesei Agbijurɔ lɛ gbalaa jwɛŋmɔ kɛyaa eshafeelɔi ni akpɔ̃ amɛ lɛ anaabuamɔ kɛ miishɛɛ kɛmiiya Yehowa sɔlemɔtsu kpeteŋkpele lɛ mli lɛ nɔ. Nɛkɛ gbijurɔyeli nɛɛ mlibaa je shishi yɛ Pentekoste, yɛ afi 33 Ŋ.B. kɛjɛ be mli ni abɔi mumɔŋ Israelbii lɛ anaabuamɔ kɛ miishɛɛ kɛmiiba Kristofoi asafo lɛ mli lɛ. (Bɔfoi lɛ Asaji 2:41, 46, 47) Nɛkɛ mɛi ni afɔ amɛ mu nɛɛ nuɔ shishi jogbaŋŋ akɛ “mɛi kpɔ̃ji” ji amɛ yɛ Satan je lɛ mli ejaakɛ ‘amɛmaŋ diɛŋtsɛ lɛ, ŋwɛi eyɔɔ.’ (1 Petro 2:11; Filipibii 3:20) Hemɔkɛyeli kwamɔ ni kɛ Kristendom shishitoo ba lɛ batsimɔ gbijurɔyeli kɛ miishɛɛ nɛɛ nɔ yɛ be kukuoo ko mli. (2 Tesalonikabii 2:1-3) Shi, asaa aje gbijurɔyeli lɛ shishi ekoŋŋ yɛ 1919 beni akɛ miishɛɛ bua mumɔŋ Israelbii 144,000 lɛ ateŋ naagbee bii lɛ anaa, ni majimaji ateŋ asafo babaoo ni awie amɛhe yɛ Kpojiemɔ 7:9 lɛ hu anaabuamɔ lɛ nyiɛ sɛɛ lɛ.
17 Afeɔ asafo babaoo lɛ he mfoniri akɛ amɛhiɛ tɛŋ blɛoi yɛ amɛdɛŋ, ni tsɔɔ akɛ amɛ hu amɛyeɔ mfoniri feemɔŋ Asesei Agbijurɔ lɛ kɛ miishɛɛ. Akɛ Kristofoi ni ejɔɔ amɛhe nɔ lɛ, amɛkɛ miishɛɛ naa nitsumɔ ni ji jalɔi babaoo ni abuaa amɛnaa kɛbaa Yehowa sɔlemɔtsu lɛ mli lɛ mli gbɛfaŋnɔ kɛ miishɛɛ. Kɛfata he lɛ, akɛ eshafeelɔi lɛ, amɛbɛ naanɔ shihilɛ hegbɛi yɛ shikpɔŋ nɔ. Esa akɛ amɛ, kɛ mɛi ni abaatee amɛ shi wɔsɛɛ lɛ fɛɛ aya nɔ ana Kristo kpɔmɔ afɔleshaa lɛ mli hemɔkɛyeli aahu kɛyashi be mli ni amɛaashɛ adesa emuuyeli mli yɛ Kristo Afii Akpe Nɔyeli lɛ naagbee.—Kpojiemɔ 20:5.
18. (a) Mɛni baaba yɛ Yesu Kristo Afii Akpe Nɔyeli lɛ naagbee? (b) Yɛ naagbee lɛ, Yehowa anɔkwa jamɔ baaye kunim yɛ mɛɛ gbɛ nɔ?
18 Kɛkɛ lɛ, Nyɔŋmɔ jalɔi ni yɔɔ shikpɔŋ nɔ lɛ baadamɔ ehiɛ yɛ adesa emuuyeli mli ni ŋwɛi osɔfoyeli he ehiaaa amɛ. No mli lɛ, be ni Yesu Kristo “[aaaŋɔ] maŋtsɛyeli lɛ eha Nyɔŋmɔ kɛ tsɛ lɛ” eshɛ. (1 Korintobii 15:24) Abaafɛne Satan “be fioo ko” koni ebaka adesai ni eye emuu lɛ. Abaakpata mɛi fɛɛ ni yeee anɔkwa lɛ ahiɛ kɛya naanɔ, kɛfata Satan kɛ edaimonioi lɛ ahe. Akɛ naanɔ wala hegbɛ baaha mɛi ni baaye anɔkwa lɛ. Amɛbaafee mɛi ni baahi shi daa yɛ shikpɔŋ nɔ Paradeiso lɛ mli. Nɛkɛ gbɛ nɔ mfoniri feemɔŋ Asesei Agbijurɔ lɛ baatsɔ eba naagbee yɛ gbɛ ni yɔɔ nyam nɔ, yɛ omanyeyeli mli. No mli lɛ anɔkwa jamɔ eye kunim kɛha Yehowa hiɛnyamwoo kɛ adesai amiishɛɛnamɔ kɛmiiya naanɔ.—Kpojiemɔ 20:3, 7-10, 14, 15.
[Shishigbɛ niŋmai]
a Kɛ ootao Zakaria yitso 14 lɛ kukuji lɛ fɛɛ amlitsɔɔmɔ ekomekome lɛ, kwɛmɔ Paradise Restored to Mankind—By Theocracy! wolo ni Watchtower Bible and Tract Society of New York, Inc. fee yɛ afi 1972 mli lɛ, yitsei 21 kɛ 22.
b Kɛ ootao ŋmɛnɛŋmɛnɛ beaŋ Nethinim lɛ ahe saji babaoo lɛ, kwɛmɔ April 15, 1992, Buu-Mɔɔ, baafa 16.
Sanebimɔi ni Akɛtĩɔ Mli
◻ “Yerusalem” baje tutuamɔ shishi yɛ klɛŋklɛŋ jeŋ ta lɛ mli yɛ mɛɛ gbɛ nɔ?—Zakaria 14:2.
◻ Mɛni eba Nyɔŋmɔ webii anɔ kɛjɛ 1919 kɛbaa?
◻ Namɛi naa mfoniri feemɔŋ Asesei Agbijurɔ lɛ mli gbɛfaŋnɔ ŋmɛnɛ?
◻ Anɔkwa jamɔ baaye kunim kɛmɔ shi yɛ mɛɛ gbɛ nɔ?
[Mfoniri ni yɔɔ baafa 23]
Akɛ tɛŋ blɛoi tsu nii ni akɛye Asesei Agbijurɔ lɛ