Nɔ Ni Yehowa Bei ke Yinɔi Tsɔɔ Kɛha Wɔ Gbi Nɛɛ

“Tso fɛɛ tso ni wooo yibii kpokpai lɛ, aaatoo lɛ, ni aaaŋɔ Iɛ awo la mli.”​—MATEO 7:⁠19.

 1. Mɛni wɔɔnyɛ wɔkase kɛjɛ gbɛ ni Yehowa kɛ tsutsu nɔyelɔi komɛi ye ha lɛ mli?

YINƆSANE mli nibii ni aŋmala ashwie shi lɛ yeɔ anɔkwale ni eji akɛ Yehowa baanyɛ atsake “bei kɛ yinɔi, ni lɛ ekpaa maŋtsɛmɛi, ni esaa ewoɔ maŋtsɛmɛi” lɛ he odase. (Daniel 2:21) Yɛ afii ohai komɛi ni etsɔ hiɛ lɛ amli lɛ. ekpa Farao, Nebukadnezar, Belshazar, Herode Agripa I kɛ mɛi krokomɛi kɛ́ amɛkɛ eyiŋtoo kpaaa gbee. Ekolɛ mɛi komɛi baakɛɛ akɛ, ‘Shi nakai nibii ni ba lɛ fɛɛ lɛ blema yinɔsane ni. Mɛni no kɔɔ yɛ wɔhe?’ Ekɔɔ wɔhe babaoo diɛŋtsɛ, ejaakɛ nikasemɔi pii yɛ mli kɛha wɔ. Nɔ ni wɔkaseɔ kɛjɛɔ nakai nibii ni ba lɛ amli ji akɛ kɛ Yehowa be shɛ lɛ, ekɛ jeŋ nɔyelii kɛ nɔyelɔi baa amɛnaagbee. Ni kɛ be shɛ ni eesumɔ ni efee nakai lɛ, ehalaa nɔyelɔ ni esumɔɔ.

 2. Yehowa be eshɛ yɛ wɔgbii nɛɛ amli ni ekɛbaafee mɛni?

² Yehowa be eshɛ ekoŋŋ yɛ wɔgbii nɛɛ amli, ni ‘ebaakpa maŋtsɛmɛi ni ewo maŋtsɛmɛi.’ Akɛni ‘ewo’ Maŋtsɛ ni esumɔɔ lɛ hewɔ lɛ, etsɛŋ ni Nyɔŋmɔ baajie je nɛŋ nɔyelɔi lɛ fɛɛ, kɛ agbɛnɛ nibii agbɛjianɔtoo ni amɛye nɔ lɛ fɛɛ kɛya. Mɛni hewɔ? Ejaakɛ taakɛ blema Babilon Maŋtsɛ Belshazar ji lɛ, ‘aŋmɛ amɛ yɛ ŋsɛni mli ni ana akɛ amɛshɛɛɛ.’ Shihilɛi ni yɔɔ ŋmɛnɛ lɛ tamɔ bɔ ni eji yɛ blema yɛ be mli ni Nyɔŋmɔ tsulɔ Daniel kɛɛ Belshazar akɛ: “Nyɔŋmɔ ekane omaŋtsɛyeli lɛ gbii lɛ, ni egbe naa” lɛ. (Daniel 5:​26, 27, NW) No hewɔ lɛ, yɛ wɔbe nɛɛ nɔŋŋ mli lɛ, Yehowa “aaatswia maŋtsɛmɛi anii yɛ emlifu gbi lɛ nɔ. Eeekojo yɛ jeŋmaji lɛ ateŋ.”​—Lala 110:​5, 6.

‘Ana Akɛ Amɛshɛɛɛ’

 3, 4. Yɛ toiŋjɔlɛ he lɛ, mɛɛ gbɛ nɔ ana je lɛŋ nɔyelɔi lɛ akɛ “amɛshɛɛɛ” yɛ wɔ afii oha nɛɛ mli?

³ Yɛ mɛɛ gbɛ nɔ ana shikpɔŋ lɛ nɔ nɔyelɔi akɛ ‘amɛshɛɛɛ’ yɛ jeŋ saji ni baa lɛ amli? Esa ákɛ akɛ nɔni eba adesa weku lɛ nɔ yɛ wɔbe nɛɛ mli, be ni amanehulu ni eko bɛ ni tamɔ yinɔ ko ni eho mli nɔ̃ lɛ he sɔ̃ afɔ amɛnɔ. Akɛ nɔkwɛmɔ nɔ lɛ, kɛjɛ 1914 kɛbaa nɛɛ, gbɔmɛi fe akpekpei oha egboi yɛ tai sɔrɔtoi amli! Ŋmɛnɛ, nuklea tawuu nii miiwo wala ni aaahi shikpɔŋ nɛɛ nɔ lɛ he gbeyei. Yɛ miniti ni wɔyɔɔ mli nɛɛ tuuŋtu mli lɛ, akɛ nuklea osramaŋi akpei abɔ kɛ amɛhe nitsulɔi ni amɛfee klalo ni amɛbaatswa etsɔɔtsɔɔ maji wuji ni gbɔmɛi fa babaoo yɛ mli lɛ anɔ.

⁴ Yɛ nuklea tawuu he lɛ, Science wolo tɛtrɛɛ lɛ bɔ sane mlitsɔɔmɔ ni haa ŋmiŋmi mɔɔ mɔ nɛɛ he amaniɛ: ‘Kɛ eba akɛ awuu nuklea ta wulu diɛŋtsɛ lɛ, abaanyɛ akpata kwɛ̃ɛ nii kɛ kooloi awala ni yɔɔ shikpɔŋ lɛ nɔ fa titri hiɛ. Ni anyɛŋ ajie adesai ni aaabule amɛshishi lɛ kɛjɛ mli.’ Ni maŋsɔɔlɔ ko ni yɔɔ Europa wie akɛ: “Jeee maji loo maŋtiasei kɛkɛ abaakɛɛ akɛ akpata amɛhiɛ, shi moŋ shikpɔŋ wuji diɛŋtsɛ hu.” Latin Amerika maŋ ko nɔ maŋnɔkwɛlɔ wie shika ni afiteɔ koni akɛfa he lɛ he akɛ: “Adesai ta ŋshɔ hiɛ lɛlɛ ko ni ehiii ni baanyɛ ajwa ni eshiu mli. . . ni kɛ eshiu lɛ, ekɛ mɔ fɛɛ mɔ ni yɔɔ mli lɛ baaya.” Ni Japan adafitswaa wolo ko kɛɛ akɛ: “Etamɔ nɔ ni je lɛ etsi ehe kɛjɛ [toiŋjɔlɛ] he kɛtee shɔŋŋ fe be fɛɛ yɛ yinɔsane mli.”

 5, 6. Te shika he lɛtemɔ shihilɛ lɛ yɔɔ tɛŋŋ yɛ shikpɔji kɛ gbɔmɛi pii ateŋ?

⁵ Ni kɛlɛ, jeŋmaji lɛ miifite shika babaoo yɛ tawuu nii ahe. Shikafitemɔ lɛ eyashɛ aaafee Amerika shika dɔla akpekpei toi akpekpei daa afi! Nibii amli taomɔ lɛ eko kadi akɛ je lɛ fiteɔ shika toi 50 yɛ asraafonyo kome he fe bɔ ni efeɔ yɛ gbekɛ ni eshɛ skulyaa he. Agbɛnɛ hu susumɔ Jeŋmaji Ekomefeemɔ lɛ amaniɛbɔɔ ni tsɔɔ akɛ kɛ hoo lɛ hɔmɔ miiye jeŋ gbɔmɛi akpekpei 450, ni amɛyifalɛ lɛ miiya hiɛ lolo Iɛ he okwɛ. Amaniɛbɔɔ kroko tsɔɔ akɛ “hɔmɔ yeɔ gbɔmɛi akpekpei 30 kɛmiishɛ 40 daa afi kɛboteɔ gbele mli” yɛ shikpɔji ni nako nɔyaa tsɔ lɛ anɔ. Ekɛɔ hu akɛ gbɔmɛi ni gboiɔ nɛɛ ateŋ mɛi fa kpotoo ji gbekɛbii ni yeko afii anumɔ.

⁶ South Amerika maŋ wulu ko mli nɔyeli lɛ mli onukpa ko kɛɛ akɛ “nitsulɔi lɛ ateŋ oha fɛɛ mli 40 hiɔ shi yɛ ohia kwraa mli.” Yɛ maŋ kroko ni yɔɔ jɛmɛ nɔŋŋ mli lɛ, nitsumɔ ni anaaa atsu yɛ emaŋtiase Iɛ mli lɛ saa nitsulɔi oha fɛɛ mli 51 he. Ni amaniɛbɔɔ ko mu sane naa akɛ: “Shikpɔŋ wulu ni gbɔmɛi akpekpei 260 yɔɔ nɔ lɛ ebote ohia ni naa wa fe fɛɛ mli yɛ afii nyɔŋmai enumɔ mli.” Agbɛnɛ kadimɔ nɛkɛ saneyitsei etɛ ni jɛ shikpɔji sɔrɔtoi anɔ nɛɛ. “Átsɛ Ohia ni Yaa nɔ lɛ Akɛ ‘Eefa Mɔ Tsui,’” “Mɛi ni Yeɔ Ohia lɛ Ayi Efa.” “Ohia, Eji Niiashikpamɔ ni kɛ Dɔlɛ Baa.” Ani nɛkɛ amaniɛbɔɔi nɛɛ jɛ maji ni nako nɔyaa teɔ lɛ amli? Dabi, amɛji wiemɔi ni jɛ nɔyeli ni yɔɔ Kanada, U. S. Amerika, kɛ Federal Republic of Germany lɛ mli onukpai lɛ adaaŋ. Hɛɛ mɛi ni akɛɛ atsɛɔ amɛ maji ni yɔɔ shika lɛ po ebote naagbai amli vii.

 7. Mɛni awie yɛ efɔŋfeemɔ kɛ awuyeIi ni yaa nɔ babaoo yɛ wɔbe nɛɛ mli lɛ he?

⁷ Shikpɔji pii yɛ ni nɔ ni jɛɔ naagbai nɛɛ amli baa kɛhaa amɛ ji efɔŋfeemɔ, awuyeli kɛ yiwalɛ nifeemɔ babaoo. Akɛ nɔkwɛmɔ nɔ lɛ, yɛ U. S. Amerika lɛ, Maŋ Nitsumɔ He ni kwɛɔ Helai Anaakuu nɔ lɛ yɔse ákɛ akɛ awuyeli gbeɔ Amerikabii fe 50,000 daa afi aloo amɛ diɛŋtsɛ amɛgbeɔ amɛhe! No hewɔ lɛ, New York Times mli niŋmaa titri ko mu sane naa akɛ: “Anyɛɛɛ aye nɔ ko nɔ dɔŋŋ.” Niŋmaa kroko hu yɔse akɛ: “Majimaji ateŋ be ni mɔ ko yeee mla nɔ lɛ mli wɔyɔɔ nɛɛ.” No hewɔ lɛ, yɛ mɔdɛŋ ni akɛ afii ohai abɔ lɛ ebɔ, niiashikpamɔ kɛ nɔyaa yɛ tsɔnei ahe nitsumɔ mli Iɛ fɛɛ sɛɛ lɛ, jeŋ nɔyelɔi nyɛɛɛ aha amɛmaŋbii lɛ nibii ni he hiaa amɛ.

 8. Yinɔsane mli nibii ni eŋmala ashwie shi lɛ yeɔ mɛni he odase?

⁸ Yɛ anɔkwale mli lɛ, yinɔsane mli nibii ni aŋmala ashwie shi yɛ blema kɛ ŋmɛnɛŋmɛnɛ beaŋ fɛɛ lɛ yeɔ odase akɛ, gbɔmɔ diɛŋtsɛ bɛ hetoo lɛ. Maŋkwramɔŋ, shika helɛtemɔ mli kɛ jamɔ mli hiɛnyiɛlɔi ni yɔɔ je nɛŋ lɛ nyɛŋ amɛkɛ toiŋjɔlɛ, shweshweeshwe shihilɛ, miishɛɛ, gbɔmɔtsoŋ hewalɛnamɔ kɛ wala ni wɔsumɔɔ ni he hiaa wɔ lɛ aba. No hewɔ lɛ, esa akɛ je nɛɛ aya! Ni ebaaya hu, ejaakɛ nakai ji bɔ ni Yehowa eto eyiŋ yɛ he. Eji taakɛ bɔ ni Biblia lɛ kɛɔ lɛ: “Lema lɛ ka tsei lɛ ashishifai lɛ anɔ momo; no hewɔ Iɛ tso fɛɛ tso ni wooo yibii kpakpai lɛ, aaatoo ni aaashɛ afɔ la mli.”​—Luka 3:⁠9.

Yiŋtoo Kroko Kɛha Kojomɔ

 9. Te je lɛŋ hiɛnyiɛlɔi buɔ Yehowa yiŋtoi amɛhaa tɛŋŋ?

⁹ Yibii gbohii ni je nɛɛ kɛ ehiɛnyiɛlɔi lɛ ewo lɛ ji yiŋtoo kome hewɔ ni akɛni Yehowa eŋmɛ je lɛ yɛ ŋsɛni mli ni ena akɛ eshɛɛɛ hewɔ lɛ ebaakpata hiɛ lɛ. Shi yiŋtoo kroko hu yɛ: Je lɛŋ hiɛnyiɛlɔi lɛ eshi Yehowa​—Bɔlɔ kɛ Je Muu Fɛɛ Maŋtsɛ lɛ​—kɛjɛ amɛsaji amli. Amɛbɛ miishɛɛ diɛŋtsɛ ko yɛ yiŋtoo loo bei kɛ yinɔi amli. No hewɔ ni Klɛŋklɛŋ Korintobii 2:8 kɛɔ yɛ amɛhe yɛ anɔkwale mli akɛ: “Nɔ [nilee] ni je nɛŋ onukpai lɛ ateŋ mɔ ko mɔ ko leee” lɛ. No hewɔ lɛ Lala 146:3 woɔ wɔ ŋaa akɛ: “Nyɛkaŋɔa nyɛhiɛ nyɛfɔa lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ.”

10, 11. (a) Mɛni esa akɛ mɛi ni sumɔɔ ni amɛle Yehowa lɛ afee? (b) Te efeɔ tɛŋŋ ni Nyɔŋmɔ tsuii leɔ nɔ ni mɛi krokomɛi leee lɛ?

¹⁰ Shi moŋ Abɛi 3:​5, 6 woɔ hewalɛ akɛ: “Okɛ ohiɛ afɔ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ.” Gbɔmɛi ni feɔ enɛ lɛ ehiŋ shi yɛ je ni hiɛnɔkamɔ ko bɛ mli ni leee nii lɛ mli. Yehowa kɛ emumɔ lɛ baajɔɔ amɛ koni amɛbale eyiŋtoi kɛ ebei kɛ eyinɔi kɛha amɛ lɛ. Taakɛ Bɔfoi lɛ Asaji 5:​32, NW kɛɔ lɛ, Yehowa kɛ mumɔ krɔŋkrɔŋ lɛ haa “mɛi ni boɔ lɛ toi akɛ nɔyelɔ” lɛ.

¹¹ No hewɔ lɛ Nyɔŋmɔ tsuji le nɔ ni je nɛŋ nɔyelɔi lɛ leee. Amɛle Yehowa yiŋtoi kɛ yinɔi. Klɛŋklɛŋ Petro 1:11 kɛɔ akɛ, yɛ blema bei ni eho lɛ amli Iɛ, Nyɔŋmɔ tsuji “saa amɛbi be lɛ shi, be ni kɛ bɔ ni Kristo mumɔ ni yɔɔ amɛmli lɛ jie tsɔɔ.” Akɛni Nyɔŋmɔ mumɔ lɛ tsɔɔ enɛ hewɔ lɛ, Bɔfo Paulo baanyɛ akɛɛ enanemɛi jálɔi enɔkwafo lɛ akɛ: “Wɔle be lɛ.” (Romabii 13:11) Akɛni Nyɔŋmɔ tsuji ni yɔɔ ŋmɛnɛ lɛ boɔ lɛ toi akɛ nɔyelɔ hewɔ lɛ, Nyɔŋmɔ mumɔ krɔŋkrɔŋ lɛ hu jieɔ nɔ yinɔ ni eji yɛ ehiɛ lɛ kpo etsɔɔ amɛ. Amos 3:7 kɛɔ akɛ: “Ejaakɛ Nuŋtsɔ Yehowa efeŋ nɔ ko, akɛ ja ejie eyiŋtoo lɛ kpo etsɔɔ etsuji, gbalɔi lɛ da.”

Yiŋtoo Kroko Hu

12, 13. Mɛni ji yiŋtoo kroko ni mli wa waa ni tsɔɔ nɔ hewɔ ni Yehowa naa akɛ nɛkɛ je nɛɛ kɛ emli hiɛnyiɛlɔi lɛ shɛɛɛ lɛ?

¹² Enɛ kɛwɔ baa yiŋtoo kroko hu ni no hewɔ ni Yehowa ena akɛ je nɛɛ kɛ ehiɛnyiɛlɔi lɛ shɛɛɛ ni yɛ enɛ hewɔ amɛbaaba naagbee lɛ he. Kaimɔ nɔ ni Farao, Belshazar, Herode kɛ nɔyelɔi krokomɛi ni hi shi yɛ blema bei lɛ amli lɛ fee Yehowa tsuji. Amɛte shi amɛwo amɛ, amɛwa amɛyi, ni amɛgbe amɛ po. Nyɔŋmɔ kɛ nakai sɔ̃ lɛ efɔ nakai nɔyelɔi lɛ anɔ.

¹³ Nakai nɔŋŋ eji yɛ wɔgbii nɛɛ amli. Je lɛŋ nɔyelɔi sɔrɔtoi ete shi ewo, amɛwa ni amɛgbe Yehowa tsuji ni sumɔɔ toiŋjɔlɛ lɛ po. Nɛkɛ nɔyelɔi nɛɛ ‘wieɔ wiemɔ amɛshiɔ Mɔ ni Yɔɔ Ŋwɛi Shɔŋŋ lɛ, ni amɛhaoɔ Mɔ ni Yɔɔ Ŋwɛi Shɔŋŋ lɛ mɛi krɔŋkrɔŋi lɛ.’ (Daniel 7:​25; 11:36) Shi mumɔ naa wiemɔi ni yɔɔ Yesaia 54:17 lɛ jaje akɛ: “Tawuu nii ni ashɔɔ ashiɔo lɛ eko eko nyɛŋ nɔ ko afee, . . . Enɛ ji Yehowa tsuji lɛ agboshinii.” No hewɔ lɛ, abaaba shitee kɛ wolɔi fɛɛ shi, taakɛ afee mɛi krokomɛi yɛ blema lɛ. Yɛ gbɛ kroko nɔ lɛ, Yehowa ewo shi akɛ ebaaha ewebii lɛ ashwere ni ebaabaa amɛyi.

Kpamɔ Be Lɛ Miibɛŋkɛ

14, 15. (a) Mɛɛ be mli wɔyɔɔ nɛɛ, ni mɛɛ kɔkɔbɔi esa akɛ wɔbo toi? (b) Yɛ mɔdɛŋ ni je lɛŋ hiɛnyiɛlɔi aaabɔ lɛ fɛɛ sɛɛ lɛ, mɛni hiɛ foi kɛbaa lɛ?

¹⁴ No hewɔ lɛ, atswa mɛɛ be yɛ Nyɔŋmɔ hiɛ? Eji kpamɔ loo naagbee be kɛha je nɛɛ. Ehulu lɛ miinyɔ shi. Duŋ miiwo yɛ oyaiyeli mli. Efɛi be lɛ eshɛ wɔnɔ eta. Odaseyeli lɛ fɛɛ ni haa Biblia gbalɛ baa mli kɛ Yehowa bebuu tsɔɔ akɛ “nibii agbɛjianɔtoo nɛɛ” “naagbee gbii” lɛ mli wɔyɔɔ lɛ. (2 Timoteo 3:​1-5; Mateo 24:​3-14) No hewɔ lɛ ehe miihia ni wɔbo Yesu kɔkɔbɔɔ nɛɛ toi jogbaŋŋ: “Shi nyɛsɔlea, koni nyɛfoijee akaba yɛ fɛi be lɛ mli.” (Mateo 24:20) Kɛ je nɛɛ jenamɔ be aloo fɛi be lɛ ba lɛ, ebaafee nɔ ni ekpe sɛɛ tsɔ akɛ aaatao Yehowa hiɛ duromɔ.

¹⁵ Be ni akɛ je ni buleɔ Nyɔŋmɔ gbɛi lɛ aaaba enaagbee lɛ hiɛ foi kɛmiiba. Kɛ eshɛ shi lɛ, Yehowa baanyɛ jeŋ nɔyelɔi fɛɛ anɔ ni ejie amɛ kɛjɛ amɛnitsumɔi anɔ. Bɔ fɛɛ bɔ ni amɛyeɔ anɔkwale ha lɛ, amɛ mɔdɛŋbɔi ni wooo yibii ni hiɛnɔkamɔ bɛ mli lɛ sɛɛ baafo. Eji anɔkwale akɛ nɔyelɔi lɛ baabɔ mɔdɛŋ ni amɛshɛje amɛwebii lɛ amii kɛ tawuu he kpaŋmɔi kɛ gbɛjianɔtoi sɔrɔtoi kɛha toiŋjɔlɛ kɛ shweshweeshwe shihilɛ, kɛ ‘afii krɔŋkrɔŋi’ po; shi ako ni ashiɔ kɛyaa naagbee tawuu he yɛ Nyɔŋmɔ ta ni ji Harmagedon lɛ he lɛ miiya nɔ ni hejɔɔmɔ bɛ mli.​—Kpojiemɔ 16:​13-16.

16. Yehowa kɛ jeŋ nɔyeli ewo namɔ dɛŋ?

¹⁶ Agbɛnɛ hu, kaimɔ akɛ, jeee akɛ Yehowa “kpaa maŋtsɛmɛi” kɛkɛ, shi moŋ “ewoɔ maŋtsɛmɛi” hu. (Daniel 2:21) Ŋwɛi nɔyelɔ ni ‘eto’ kɛha shikpɔŋ lɛ fɛɛ lɛ ji mɔ ni baanyiɛ ŋwɛi tabilɔi ni Yehowa kɛ amɛ baatsu nii ni amɛkɛ fɔbuu kojomɔi aba yɛ Harmagedon lɛ ahiɛ. Nakai mɔ lɛ ji e-Bi anɔkwafo, Kristo Yesu, ni amrɔ nɛɛ eyɔɔ ŋwɛi hewalɛ kɛ anunyam mli lɛ. Kpojiemɔ 19:16 tsɛɔ lɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ.” Daniel 7:14 kɛɔ akɛ: “Ni aha lɛ nɔyeli kɛ anunyam kɛ maŋtsɛyeli, koni majimaji kɛ asafoi kɛ wiemɔi lɛ fɛɛ asɔmɔ lɛ, enɔyeli lɛ naanɔ nɔyeli ni hoŋ eyaŋ ni, ni emaŋtsɛyeli lɛ nɔ ni fiteŋ ni.”​—Kwɛmɔ Daniel 2:44 hu.

17, 18. (a) Mɛni ji nɔ ni Nyɔŋmɔ Wiemɔ lɛ kɛɔ akɛ ebaaba mɛi ni hereee lɛ kɛ mɔ ni ehala lɛ akɛ shikpɔŋ nɛɛ Nɔyelɔ lɛ nɔ lɛ anɔ? (b) Namɔ hu le akɛ be ni eshwɛ lɛ faaa?

¹⁷ Nyɔŋmɔ gbalɛ Wiemɔ lɛ kɛɔ wɔ nɔ ni baaba mɛi ni ekpɛlɛɛɛ Yehowa kɛ Nɔyelɔ ni ehala lɛ kɛha shikpɔŋ muu lɛ fɛɛ lɛ anɔ lɛ yɛ wiemɔ ni ka shi faŋŋ mli. Ekɛɔ akɛ: “Ni mina bɔfo ko damɔ hulu mli, ni ebo kɛ gbee wulu ekɛɛ loofɔji ni filikiɔ yɛ ŋwɛi lɛ fɛɛ lɛ akɛ: Nyɛbaa ni nyɛbabuaa nyɛhe naa yɛ Nyɔŋmɔ okpɔlɔ kpeteŋkpele lɛ he, koni nyɛbaye maŋtsɛmɛi aloo kɛ asafoiatsɛmɛi aloo kɛ hewalɔi aloo kɛ okpɔŋɔi kɛ mɛi ni tara amɛnɔ lɛ aloo, kɛ odehei kɛ nyɔji kɛ mɛi bibii kɛ mɛi wuji fɛɛ aloo.”​—Kpojiemɔ 19:​17, 18.

¹⁸ Yeremia 25:33 tsɔɔ mli yɛ nɛkɛ gbɛ nɔ: “Ni mɛi ni Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbee he kome kɛaatee shikpɔŋ lɛ naagbee he kroko lɛ; afeŋ amɛ yara, abuaŋ amɛnaa, ni asaŋ afuŋ amɛ: amɛaatsɔ tumu yɛ shikpɔŋ lɛ nɔ.” Satan nibii agbɛjianɔtoo ni ekpɔtɔ lɛ fɛɛ naagbee be eshɛ. Ni lɛ diɛŋtsɛ lɛ elé enɛ! Kpojiemɔ 12:12 jajeɔ akɛ ele akɛ “be fioo kɛkɛ” eyɔɔ.

Taomɔ Yehowa Bianɛ

19. Mɛɛ miishɛɛ gbi kɛ yinɔ baaje shishi yɛ be mli ni akɛ gbɛjianɔtoo nɛɛ eba enaagbee lɛ?

¹⁹ Kɛ Satan gbɛjianɔtoo lɛ jenamɔ be loo fɛi be lɛ ho lɛ, kɛkɛ lɛ mɛni? Kɛkɛ lɛ ebaafee Yehowa be ni ekɛ jetsɛremɔ gbi hee ko baaba, miishɛɛ be ko ni tamɔ agbiɛnaa be. Ebaafee be ni akɛaaje Yehowa jalɛ gbɛjianɔtoo hee lɛ shishi yɛ Kristo Yesu, ŋwɛi Maŋtsɛ lɛ nɔyeli shishi. Awuyelii, jalɛsane ni ayeee, piŋmɔ, helai kɛ gbele ehiŋ shi dɔŋŋ yɛ nakai gbɛjianɔtoo hee lɛ mli. Abaahole adesai anɔ kɛba emuuyeli mli, kɛ naanɔ wala gbɛkpamɔ. Mɛɛ gbɛkpamɔ ni kanyaa mɔ po enɛ ji!​—Lala 37:​10, 11, 29; Kpojiemɔ 21:⁠4.

20, 21. Mɛi babaoo ni jɛ jeŋmaji fɛɛ mli miitao Yehowa sɛɛgbɛ bianɛ yɛ mɛɛ gbɛ nɔ?

²⁰ Shi, dani gbɛjianɔtoo nɛɛ aaaba naagbee ni gbɛjianɔtoo hee lɛ aaaje shishi lɛ, ebafeɔ Yehowa yinɔ akɛ ekɛfee nɔ ko ni he hiaa eha shikpɔŋ lɛ nɔ heshibalɔi. Eji be ni ekɛ aabua mɛi ni sumɔɔ ni amɛkase ehe nii, ni amɛsumɔɔ ni amɛba amɛhe shi amɛha esuɔmɔnaa nii, ni sumɔɔ ni amɛkula shi amɛha Maŋtsɛ ni ehala lɛ lɛ anaa yɛ he kome. Yɛ enɛ feemɔ mli lɛ, amɛbaa Yehowa hebuu shishi: “Mɔɔ ni wa ji Yehowa gbɛi lɛ: no mli jalɔ shaa foi kɛyaa ni ehiɔ shi shweshweeshwe.”​—Abɛi 18:⁠10.

²¹ Ŋmɛnɛ, gbɔmɛi babaoo diɛŋtsɛ miifee enɛ​—yɛ anɔkwale mli Iɛ, amɛteŋ mɛi akpekpei abɔ miifee nakai. Amɛhaa kɛjɛɔ shikpɔŋ lɛ nɔ maŋ fɛɛ maŋ mli. Atsɔɔ bɔ ni amɛji lɛ mli yɛ Zakaria yitso 8, kukuji 20 kɛ 21: “Bɔ ni Yehowa Zebaot kɛɛ nɛ: Aaaka he aba mli akɛ majimaji kɛ maji pii amli bii aaaba, ni maŋ kome mli bii aaatee maŋ kroko mli ayakɛɛ akɛ: Nyɛhaa wɔyaa wɔyakpaa Yehowa fai, ni wɔyatao Yehowa Zebaot sɛɛgbɛ!” Kuku 23 lɛ kɛfataa he akɛ: “Nakai gbii lɛ amli [hɛɛ, yɛ wɔgbii nɛɛ amli] lɛ, aaaba mli akɛ hii nyɔŋma ni jɛ jeŋmaji anɔ wiemɔi sɔrɔtoi fɛɛ mli aaamɔ Yudanyo kome [Yehowa yijielɔi ni afɔ amɛ mu lɛ] atade naamuu mli, amɛaakɛɛ: Wɔkɛnyɛ aaatee; ejaakɛ wɔnu akɛ Nyɔŋmɔ kɛnyɛ yɛ.”

22. Mɛni esa akɛ wɔyoo ni wɔtsu kɛ wɔmiisumɔ ni wɔje Yehowa mlifu gbi lɛ mli?

²² No hewɔ lɛ, okɛ Yehowa webii lɛ ajá lɛ ni oba eyibaamɔ he lɛ. Na nitsumɔ ni he hiaa fe fɛɛ ni atsuɔ yɛ shikpɔŋ nɛɛ nɔ ŋmɛnɛ ni ji mɛi ni baaje Harmagedon mli ni akɛ nitsumɔ ni ŋɔɔ ni yɔɔ naakpɛɛ ni ji paradeiso shikpɔŋ lɛ nɔ saamɔ ni amɛhi mli kɛya naanɔ ni abuaa amɛnaa ni atsɔseɔ amɛ ŋmɛnɛ lɛ mli gbɛfaŋnɔ. Ha ohiɛ asɔ ni oyoo be kɛ yinɔ ni eji lɛ ni ofee nɔ ni Yesaia 55:6 woɔ hewalɛ yɛ he nɛɛ: “Nyɛtaoa Yehowa, be mli ni eeeha ana lɛ, nyɛtsɛa lɛ, he mli ni ebɛŋkɛ!” Hɛɛ, “nyɛtaoa Yehowa sɛɛgbɛ nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtaoa jalɛ sɛɛgbɛ, nyɛtaoa heshibaa sɛɛgbɛ: ekolɛ aaaŋɔnyɛ atee yɛ Yehowa mlifu gbi lɛ nɔ!”​—Zefania 2:⁠3.a

[Shishigbɛ niŋmai]

Sanebimɔi Ni Akɛtiɔ Mli

◻ Ana akɛ je lɛŋ nɔyelɔi “shɛɛɛ” yɛ Nyɔŋmɔ hiɛ yɛ mɛɛ gbɛi anɔ?

◻ Mɛni hewɔ Yehowa tsuji le E-bei kɛ yinɔi yɛ be mli ni je leŋ nɔyelɔi leee lɛ?

◻ Mɛni hewɔ Nyɔŋmɔ kojomɔ mlifu sa je lɛŋ nɔyelɔi lɛ?

◻ Mɛɛ be kɛ yitso eshɛ shi yɛ Yehowa hiɛ lɛ?

◻ Mɛni hewɔ ni yɛ mɛɛ gbɛ nɔ esa akɛ wɔatao Yehowa bianɛ lɛ?

[Wiemɔ ni akɔ ni akɛmiitsu nii ni yɔɔ baafa 30]

“Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi, ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyeli nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”​—Daniel 2:⁠44.

[Mfoniri ni yɔɔ baafa 28]

Mɛi pii ni tsɔɔ hemɔkɛyeli ŋmɛnɛ lɛ baaje je nɛɛ naagbee be lɛ mli

October Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)