Gbɛi Kpeteŋkpele Fe Fɛɛ lɛ he Teemɔŋ Sane lɛ Naagbelemɔ

Esa kadimɔ waa akɛ Muslim Koran kɛ Kristofoi a-Biblia lɛ fɛɛ wieɔ gbɛi kpeteŋkpele fe fɛɛ lɛ he. Nɛkɛ sane hesusumɔ nɛɛ gbalaa gbɛi kpeteŋkpele lɛ shishinumɔ kɛ bɔ ni ehe hiaa ha lɛ mli. Etsɔɔ bɔ ni nakai gbɛi lɛ saa adesai fɛɛ kɛ wɔ wɔsɛɛ be he ehaa yɛ shikpɔŋ nɛɛ nɔ.

HII kɛ yei akpekpei abɔ ehi shi ni amɛ gboi yɛ shikpɔŋ nɛɛ nɔ. Yɛ shihilɛi babaoo mli lɛ, amɛgbɛi efata amɛhe kɛgboi, ni hiɛ ekpa amɛkaimɔ nɔ kwraa. Shi gbɛii komɛi ni ale waa​—tamɔ Avicenna, Edison, Pasteur, Beethoven, Gandhi, kɛ Newton​—yɛ lolo. Nɛkɛ gbɛii nɛɛ kɛ nibii ni amɛfee, nibii ni amɛkpa shi, kɛ nibii heei ni mɛi ni hiɛ nakai gbɛi lɛ kɛba lɛ yɛ tsakpaa.

Shi, gbɛi kpele ko yɛ ni fe gbɛii krokomɛi fɛɛ. Blema kɛ ŋmɛnɛŋmɛnɛ beaŋ naakpɛɛ nii ni eba yɛ jeŋ muu fɛɛ lɛ kɔɔ nakai gbɛi lɛ he. Ejaakɛ, adesai ahiɛnɔkamɔ kɛha shihilɛ be kakadaŋŋ ni miishɛɛ yɔɔ mli lɛ kɛ gbɛi nɛɛ yɛ tsakpaa!

Mɛi babaoo etao akɛ amɛaale nɛkɛ gbɛi nɛɛ. Amɛtao, ni amɛbi he saji, shi amɛnako gbɛi lɛ. Kɛha amɛ lɛ, etee nɔ ehi shi akɛ teemɔŋ sane ko. Yɛ anɔkwale mli lɛ, adesa ko bɛ ni baanyɛ ale nɛkɛ gbɛi nɛɛ, ja gbɛi lɛ Nɔtsɛ lɛ jie kpo etsɔɔ lɛ. Miishɛɛ sane ji akɛ, agbele nɛkɛ gbɛi ni eko kɛ lɛ yeee egbɔ nɛɛ he teemɔŋ sane lɛ naa. Nyɔŋmɔ diɛŋtsɛ efee enɛ koni mɛi ni heɔ lɛ amɛyeɔ lɛ anyɛ ale ehe saji. Ejie egbɛi kpo etsɔɔ Adam, no sɛɛ lɛ Abraham, kɛ Mose, kɛ E-tsuji anɔkwafoi krokomɛi ni hi shi yɛ blema lɛ.

Gbɛi Kpeteŋkpele Fe Fɛɛ lɛ Taomɔ

Koran lɛ wieɔ mɔ ko “ni le Ŋmalɛi lɛ amli jogbaŋŋ” he sane. (27:40) Beni egbalaa ŋmalɛ kuku nɛɛ mli lɛ, wolo ko ni atsɛɔ lɛ Tafsĩr Jalãlayn lɛ kɛɔ akɛ: “Asaf Barkhiyã bi lɛ, jalɔ ji lɛ. Lɛ ji mɔ ni le Nyɔŋmɔ kpeteŋkpele fe fɛɛ lɛ, ni be fɛɛ be ni etsɛɔ lɛ lɛ, ahereɔ lɛ nɔ.” Enɛ haa wɔkaiɔ Biblia ŋmalɔ Asaf, mɔ ni wie yɛ Lala 83:19 akɛ: “Koni amɛna amɛle akɛ bo, ni okometoo ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!”

Wɔkaneɔ yɛ Koran 17:2 akɛ: “Wɔkɛ Ŋmalɛi lɛ ha Mose ni wɔha amɛfee gbɛtsɔɔmɔ kɛha Israelbii lɛ.” Mose kɛ Nyɔŋmɔ wie, yɛ nakai Ŋmalɛi lɛ amli, ni ekɛɛ lɛ akɛ: “Naa, mi lɛ, kɛ mitee lsraelbii lɛ aŋɔɔ, ni mikɛɛ amɛ akɛ: ‘Nyɛtsɛmɛi a-Nyɔŋmɔ lɛ tsu mi nyɛŋɔɔ nɛɛ,’ ni amɛaabi mi akɛ: ‘Te egbɛiŋ?’ lɛ, te mikɛɛ amɛ tɛŋŋ?” Nyɔŋmɔ ha Mose hetoo ni ekɛɛ lɛ akɛ: “Bɔ ni okɛɛ lsraelbii lɛ nɛ: ‘Yehowa nyɛtsɛmɛi a-Nyɔŋmɔ lɛ ni ji Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ, tsu mi nyɛŋɔɔ nɛɛ;’ enɛ ji migbɛi kɛyaa naanɔ, ni enɛ ji mikaimɔ kɛyaa yinɔi fɛɛ.”​—2 Mose 3:​13, 15.

Yɛ blema beaŋ lɛ, Israelbii lɛ le nɛkɛ Nyɔŋmɔ gbɛi kpeteŋkpele nɛɛ. Akɛtsuɔ nii po akɛ gbɛi sɔrɔtoi ni amɛwoɔ lɛ ahefatamɔ. Bɔ ni ŋmɛnɛ ni ayɔɔ gbɛi Abdullah, ni shishi ji “Nyɔŋmɔ Tsulɔ” lɛ, nakai nɔŋŋ blema Israel bii lɛ yɛ gbɛi Obadia, ni shishi ji “Yehowa Tsulɔ.” Atsɛɔ gbalɔ Mose nyɛ gbɛi akɛ Yokebed, ni eshishinumɔ baanyɛ afee “Yehowa Ji Anunyam.” Gbɛi Yohane lɛ shishi ji “Yehowa Ejie Mɔbɔnalɛ Kpo.” Ni gbalɔ Elia gbɛi lɛ shishi ji “Mi-Nyɔŋmɔ Ji Yehowa.”

Gbalɔi lɛ le nɛkɛ gbɛi kpeteŋkpele nɛɛ ni amɛkɛtsu nii kɛ bulɛ ni mli kwɔ. Anaa fe shii 7,000 yɛ Ŋmalɛ Krɔŋkrɔŋ lɛ mli. Yesu Kristo, Maria bi lɛ, ma nɔ mi waa beni ekɛɛ Nyɔŋmɔ yɛ esɔlemɔ ko mli akɛ: “Mijie ogbɛi lɛ ashi mitsɔɔ gbɔmɛi ni oŋɔ amɛ kɛjɛ je lɛŋ oha mi lɛ . . . mijie ogbɛi lɛ kpo mitsɔɔ amɛ, ni masaa majie lɛ kpo matsɔɔ, koni suɔmɔ ni okɛsumɔ mi lɛ ahi amɛmli.” (Yohane 17:6, 26) Bayḍāwī wieɔ Koran 2:87 he, yɛ ewolo ko ni ehe gbɛi waa ni wieɔ Koran lɛ mli saji ahe lɛ mli, ni ekɛɔ akɛ Yesu kɛ “Nyɔŋmɔ gbɛi kpeteŋkpele fe fɛɛ lɛ tsuɔ nii ni ekɛteeɔ gbohii ashi.”

Belɛ, mɛni ba ni eha nakai gbɛi lɛ batsɔ teemɔŋ sane lɛ? Mɛni nakai gbɛi lɛ kɛ wɔteŋ mɔ fɛɛ mɔ wɔsɛɛ be yɔɔ feemɔ?

Te Fee Tɛŋŋ ni Gbɛi lɛ Batsɔ Teemɔŋ Sane?

Mɛi komɛi susuɔ akɛ “Yehowa” shishi yɛ Hebri mli ji “Allah” (Nyɔŋmɔ). Shi “Allah” kɛ Hebri wiemɔi ‘Elo·himʹ, ni tsɔɔ wiemɔ ‘elohʹah (nyɔŋmɔ) lɛ anunyam pii-feemɔ lɛ kpaa gbee. Hemɔkɛyeli gbonyo ko te shi yɛ Yudafoi lɛ ateŋ ni tsi amɛnaa ni ehaaa amɛtsɛ Nyɔŋmɔ gbɛi, Yehowa. No hewɔ lɛ, kɛ amɛmiikane Ŋmalɛi Krɔŋkrɔŋi lɛ ni amɛna gbɛi Yehowa lɛ, ebatsɔ nɔ ni amɛfeɔ daa, akɛ amɛtsɛɔ ‘Adho·naiʹ, ni shishi ji “Nuŋtsɔ.” Yɛ hei komɛi lɛ, amɛtsake shishijee Hebri niŋmaa lɛ po kɛjɛ “Yehowa” kɛtee ‘Adho·naiʹ.

Kristendom jamɔ mli hiɛnyiɛlɔi lɛ hu kɔ gbɛ ni tamɔ nakai nɔŋŋ. Amɛjie gbɛi Yehowa lɛ ni amɛkɛ “Nyɔŋmɔ” (“Allah” yɛ Arabik mli) kɛ “Nuŋtsɔ” ye najiaŋ. No fata he ni apasa tsɔɔmɔ ni ji Triniti, ni bɛ nɔdaamɔ nɔ ko yɛ Ŋmalɛ Krɔŋkrɔŋ lɛ mli lɛ ba. Yɛ enɛ hewɔ lɛ, mɛi akpekpei abɔ jaa Yesu kɛ mumɔ krɔŋkrɔŋ lɛ yɛ gbɛ ni ejaaa nɔ, ni amɛbuɔ amɛ akɛ amɛkɛ Nyɔŋmɔ yeɔ egbɔ.a

No hewɔ lɛ, Yuda jamɔ kɛ Kristendom hiɛnyiɛlɔi lɛ esa akɛ ashwa yɛ gbɛi kpeteŋkpele fe fɛɛ lɛ ni mɛi pii leee lɛ hewɔ. Shi Nyɔŋmɔ gba efɔ shi akɛ: “Mafee migbɛi kpeteŋkpele lɛ . . . krɔŋkrɔŋ, ni jeŋmaji lɛ aaana ale akɛ mi ji Yehowa lɛ.” Hɛɛ, Yehowa baaha ale egbɛi lɛ yɛ jeŋmaji lɛ fɛɛ mli. Mɛni hewɔ? Ejaakɛ ejeee Yudafoi lɛ pɛ aloo jeŋmaŋ loo gbɔmɛi akuu kome ko pɛ Nyɔŋmɔ. Yehowa ji gbɔmɛi adesai fɛɛ a-Nyɔŋmɔ.​—Ezekiel 36:​23; 1 Mose 22:​18; Lala 145:​21; Maleaki 1:⁠11.

Gbɛi kpeteŋkpele lɛ kɛ Wɔ Wɔsɛɛ Be

Ŋmalɛ Krɔŋkrɔŋ lɛ kɛɔ akɛ: “Mɔ fɛɛ mɔ ni aaabo atsɛ Nuŋtsɔ [Yehowa] gbɛi lɛ, aaahere eyiwala.” (Romabii 10:13) Wɔ yiwalaheremɔ yɛ kojomɔ gbi lɛ nɔ lɛ kɛ le ni wɔɔle Nyɔŋmɔ gbɛi lɛ yɛ tsakpaa. Nɔ ni fata egbɛi ni wɔɔle lɛ he hu ji esui, enitsumɔi, kɛ eyiŋtoi ni wɔɔle, ni wɔhi shi yɛ emlai ni nɔ kwɔlɔ lɛ kɛ gbeekpamɔ naa. Akɛ nɔkwɛmɔ nɔ lɛ, Abraham le Nyɔŋmɔ gbɛi ni ebo etsɛ nakai gbɛi lɛ. Nɔ ni jɛ mli ba ji akɛ, ena ekɛ Nyɔŋmɔ teŋ wekukpaa kpakpa mli ŋɔɔmɔ, ena hemɔkɛyeli yɛ emli, ekɛ ehe fɔ enɔ, ni ebo lɛ toi. No hewɔ lɛ, Abraham batsɔ Nyɔŋmɔ naanyo. Nakai nɔŋŋ Nyɔŋmɔ ni wɔɔle lɛ lɛ gbalaa wɔ kɛbɛŋkɛɔ lɛ kpaakpa ni eyeɔ ebuaa wɔ ni wɔnaa wɔkɛ lɛ teŋ wekukpaa ni mli wa, ni wɔhiɛɔ esuɔmɔ lɛ mli kpɛŋŋ.​—1 Mose 12:8; Lala 9:​11; Abɛi 18:​10; Yakobo 2:⁠23.

Wɔkaneɔ yɛ Biblia lɛ mli akɛ: “Yehowa bo toi, ni enu, ni aŋma kaimɔ wolo yɛ ehiɛ aha mɛi ni sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ.” (Maleaki 3:16) Mɛni hewɔ ehe hiaa ni ‘wɔjwɛŋ’ gbɛi kpeteŋkpele lɛ he lɛ? Gbɛi Yehowa lɛ shishinumɔ diɛŋtsɛ ji “E-Haa Ebaa Shihilɛ Mli.” Enɛ jieɔ Yehowa kpo akɛ Mɔ ni Haa lɛ diɛŋtsɛ eshiwoi Baa Mli. Ehaa eyiŋtoi fɛɛ baa mli pɛpɛɛpɛ be fɛɛ be. Lɛ ji Nyɔŋmɔ ofe lɛ, Bɔlɔ koome pɛ lɛ, mɔ ni yɔɔ sui kpakpai fɛɛ lɛ. Wiemɔ kome ko bɛ ni baanyɛ atsɔɔ bɔ ni Nyɔŋmɔ su ji ha lɛ mli jogbaŋŋ. Shi Nyɔŋmɔ hala gbɛi kpeteŋkpele fe fɛɛ lɛ eha ehe​—Yehowa​—ni ehaa wɔkaiɔ esui, kɛ eyiŋtoi fɛɛ.

Nyɔŋmɔ kɛɔ wɔ nɔ ni ji eyiŋtoi yɛ adesai ahe yɛ Ŋmalɛ Krɔŋkrɔŋ lɛ mli. Yehowa Nyɔŋmɔ bɔ gbɔmɔ koni ena naanɔ wala ni yɔɔ miishɛɛ mli ŋɔɔmɔ yɛ Paradeiso. Esuɔmɔnaa nii kɛha adesai ji akɛ gbɔmɛi fɛɛ afee weku kome, ni efee ekome yɛ suɔmɔ kɛ toiŋjɔlɛ mli. Nyɔŋmɔ ni yɔɔ suɔmɔ lɛ baaha yiŋtoo nɛɛ aba mli yɛ wɔsɛɛ be ni ebɛŋkɛ kpaakpa lɛ mli.​—Mateo 24:​3-14, 32-42; 1 Yohane 4:​14-21.

Nyɔŋmɔ etsɔɔ nɔ hewɔ ni adesai naa amanehulu lɛ ni etsɔɔ akɛ abaanyɛ ana yiwalaheremɔ. (Kpojiemɔ 21:⁠4) Wɔkaneɔ yɛ Lala 37:​10, 11 akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ okwɛ eshihilɛhe lɛ, ebɛ jɛi. Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.”​—Kwɛmɔ Koran 21:105 hu.

Hɛɛ, akɛ Nyɔŋmɔ gbɛi kpeteŋkpele lɛ baale lɛ. Jeŋmaji lɛ baana amɛle akɛ lɛ ji Yehowa lɛ. Mɛɛ hegbɛ ni yɔɔ nyam nɛ, akɛ aaale gbɛi kpeteŋkpele lɛ, ni aye he odase, ni akpɛtɛ he gbagbalii! Kɛtsɔ nakai gbɛ nɔ lɛ, Nyɔŋmɔ yiŋtoo ni yɔɔ miishɛɛ lɛ baaba mli yɛ wɔteŋ mɔ fɛɛ mɔ nɔ: “Ejaakɛ eesumɔ mi, hewɔ lɛ majie lɛ, mawo enɔ gojoo, ejaakɛ ele migbɛi lɛ. Eeetsɛ mi, ni mahere lɛ nɔ; . . . Maha etɔ kɛ wala sɛɛtsɛlɛ, ni maha ena miyiwalaheremɔ lɛ!”​—Lala 91:​14-16.

[Shishigbɛ niŋmai]

[Mfonirii ni yɔɔ baafa 5]

Nyɔŋmɔ jie ehe kpo etsɔɔ Mose yɛ jwɛi ni shãa lɛ mli akɛ ‘Yehowa, Abraham Nyɔŋmɔ Iɛ’

[He ni Sane lɛ Jɛ]

Moses and the Burning Bush, by W. Thomas, Sr.