Yehowa Jɔɔmɔ Feɔ Mɔ Niiatsɛ
“Yehowa jɔɔmɔ lɛ—no feɔ mɔ niiatsɛ, ni ekɛ piŋmɔ ko kwraa fataaa he.”—ABƐI 10:22, New World Translation
1-3. Eyɛ mli akɛ mɛi pii susuɔ heloonaa nii ahe babaoo moŋ, shi mɛɛ anɔkwale ni kɔɔ heloonaa nii ahe esa akɛ mɔ fɛɛ mɔ akadi?
MƐI komɛi yɛ ni amɛkpaaa shika namɔ—loo eko ni amɛbɛ lɛ he wiemɔ kɔkɔɔkɔ. Dɔlɛ sane kɛha amɛ ji akɛ, ehe ebahia ni amɛsusu nibii pii ahe yɛ afii fioo ni eho nɛɛ amli. Yɛ 1992 mli lɛ, Anaigbɛ maji ni yɔɔ nii babaoo lɛ po ba shi yɛ shika he gbɛjianɔtoo mli, ni nitsumɔ mli onukpai kɛ nitsulɔi krokomɛi fɛɛ ateŋ mɛi komɛi anitsumɔ fite kwraa loo eje amɛdɛŋ. Amɛteŋ mɛi pii po yiŋ fee amɛ kɔshikɔshi akɛ amɛaana shweremɔ be ni yɔɔ shiŋŋ tamɔ nakai wɔsɛɛ.
2 Ani tɔmɔ yɛ he akɛ wɔɔsusu wɔ heloonaa ninamɔ he? Dabi, yɛ gbɛ ko nɔ lɛ, eji adebɔɔ mli su. Yɛ nakai beaŋ nɔŋŋ lɛ, shishijee anɔkwale ko yɛ ni esa akɛ wɔyoo yɛ ninamɔ he. Yɛ naagbee lɛ, heloonaa nibii fɛɛ jɛɔ Bɔlɔ lɛ dɛŋ kɛbaa. Lɛ ji “anɔkwa Nyɔŋmɔ, Yehowa, . . . Mɔ ni lɛɛ shikpɔŋ lɛ kɛ emli nibaanii lɛ amli, Mɔ ni muɔ kɔɔyɔɔ ehaa gbɔmɛi ni yɔɔ nɔ lɛ, ni ekɛ mumɔ haa mɛi ni nyiɛɔ nɔ lɛ.”—Yesaia 42:5, NW.
3 Eyɛ mli akɛ Yehowa tsɔɔɔ hiɛ ehalaaa mɔ ni baana nii kɛ mɔ ni baaye ohia moŋ, shi wɔteŋ mɔ fɛɛ mɔ baabu bɔ ni wɔkɛ “shikpɔŋ lɛ kɛ emli nibaanii” ni wɔna lɛ tsuɔ nii wɔhaa lɛ he akɔntaa. Kɛ wɔkɛ wɔninamɔ yeɔ mɛi krokomɛi anɔ nuŋtsɔ lɛ, Yehowa kɛ wɔ baakojo. Ní mɔ fee mɔ ni sɔmɔɔ ninamɔ moŋ fe Yehowa lɛ baana akɛ “mɔ ni kɛ ehiɛ fɔɔ enii anɔ lɛ, eeegbee shi.” (Abɛi 11:28; Mateo 6:24; 1 Timoteo 6:9) Yɛ naagbee lɛ, sɛɛnamɔ ko kwraa bɛ heloonaa ninamɔ, ni tsui ni baa ehe shi ehaa Yehowa fataaa he lɛ he.—Jajelɔ 2:3-11, 18, 19; Luka 16:9.
Ninamɔ ni He Hiaa fe Fɛɛ
4. Mɛni hewɔ mumɔŋ ninamɔ hi fe heloonaa nii babaoo namɔ lɛ?
4 Biblia lɛ wieɔ mumɔŋ ninamɔ hu he kɛfataa heloonaa ninamɔ he. Eka shi faŋŋ akɛ no ji nɔ ni hi fe fɛɛ. (Mateo 6:19-21) Mumɔŋ ninamɔ biɔ ni mɔ lɛ ana ekɛ Yehowa teŋ wekukpaa ni haa mɔ miishɛɛ, ni baanyɛ ahi shi kɛya naanɔ. (Jajelɔ 7:12) Kɛfata he lɛ, Nyɔŋmɔ sɔɔlɔi ni ji mumɔŋ niiatsɛmɛi lɛ anine enyɛɛɛ shi yɛ heloonaa jɔɔmɔi kpakpai agbɛfaŋ. Mumɔŋ ninamɔ kɛ heloo gbɛfaŋ ninamɔ baana tsakpaa yɛ jeŋ hee lɛ mli. Anɔkwafoi lɛ baana heloo gbɛfaŋ shweshweeshwe shihilɛ, ni efeŋ nɔ ni anaa kɛjɛɔ akaŋshii shɛii loo hewalɛnamɔ kɛ miishɛɛ ni akɛshaa afɔle lɛ mli, tamɔ bɔ ni efɔɔ baa ŋmɛnɛ lɛ he. (Lala 72:16; Abɛi 10:28; Yesaia 25:6-8) Amɛbaana akɛ gbɛ fɛɛ gbɛ nɔ lɛ, “Yehowa jɔɔmɔ . . . feɔ mɔ niiatsɛ, ni ekɛ piŋmɔ ko kwraa fataaa he.”—Abɛi 10:22, NW.
5. Mɛɛ shiwoo Yesu kɛha yɛ heloonaa nibii ahe?
5 Ŋmɛnɛ po, mɛi ni buɔ mumɔŋ nibii akɛ nii ni jara wa lɛ nuɔ toiŋjɔlɛ shihilɛ ko he yɛ heloonaa ninamɔ gbɛfaŋ. Eji anɔkwale, amɛtsuɔ nii ni amɛkɛwoɔ nibii ahe nyɔmɔ ni amɛkɛlɛɔ amɛwekui hu. Aloo amɛteŋ mɛi komɛi anitsumɔi po nyɛɔ ejeɔ amɛdɛŋ yɛ jaramɔ bei amli. Shi nɛkɛ haomɔi ni baa amɛnɔ nɛɛ yeee amɛnɔ butuu. Shi moŋ, amɛheɔ Yesu shiwoo lɛ amɛyeɔ, beni ewie akɛ: “Nyɛkahaoa nyɛhe nyɛkɛa akɛ, ‘Mɛni wɔɔye?’ aloo ‘Mɛni wɔɔnu?’ aloo ‘Mɛni wɔɔŋɔha wɔhe?’ . . . Shi nyɛ-Tsɛ lɛ ni yɔɔ ŋwɛi lɛ le akɛ nii nɛɛ ahe miihia nyɛ. Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”—Mateo 6:31-33.
Mumɔŋ Ninámɔ Ŋmɛnɛ
6, 7. (a) Tsɔɔmɔ mumɔŋ ninamɔ ni Nyɔŋmɔ webii ena lɛ fai komɛi amli. (b) Mɛɛ gbalɛ ahaa ebaa mli ŋmɛnɛ, ni mɛɛ sanebimɔi enɛ teeɔ amɛ shi?
6 Enɛ hewɔ lɛ, Yehowa webii ehala akɛ amɛkɛ Maŋtsɛyeli lɛ baaye klɛŋklɛŋ gbɛhe yɛ amɛshihilɛ mli, ni kwɛ bɔ ni ajɔɔ amɛ babaoo! Amɛyeɔ omanye babaoo yɛ amɛ kaselɔi afeemɔ nitsumɔ lɛ mli. (Yesaia 60:22) Yehowa tsɔɔ amɛ nii, ni amɛnaa mumɔŋ niyenii kpakpai ni tsaa nɔ kɛbaa daa gbi kɛtsɔɔ “tsulɔ anɔkwafo kɛ nilelɔ” lɛ nɔ lɛ mli ŋɔɔmɔ. (Mateo 24:45-47; Yesaia 54:13) Kɛfata he lɛ, Yehowa mumɔ lɛ hu yɛ amɛnɔ, ni etsakeɔ amɛ efeɔ amɛ majimaji ateŋ nyɛmifeemɔ ni yɔɔ miishɛɛ.—Lala 133:1; Marko 10:29, 30.
7 Mumɔŋ ninámɔ lɛlɛŋ nɛ, nɔ ko ni shika nyɛŋ ahe kɔkɔɔkɔ. Eji Yehowa shiwoo nɛɛ mlibaa ni anaa yɛ faŋŋ mli, akɛ: “‘Nyɛkɛ mlijaa nyɔŋma mli ekomekome lɛ fɛɛ abaa fiase lɛ, koni niyenii ahi miwe lɛ, ni nyɛkɛkaa mi nyɛkwɛa,’ Yehowa Zeboat kɛɛ, ‘akɛ migbeleŋ ŋwɛi samfɛji lɛ mihaŋ nyɛ, ni mifɔseŋ jɔɔmɔ mihaŋ nyɛ ni ateke nɔ lo?’” (Maleaki 3:10) Wɔ mɛi ni wɔyɔɔ ŋmɛnɛ nɛɛ ena nɛkɛ gbalɛ nɛɛ mlibaa. Shi, mɛni hewɔ ni Yehowa, mɔ ni ji ninámɔ fɛɛ Jɛɛhe lɛ biɔ ni etsuji kɛ mlijaa nyɔŋma mli ekomekome aba lɛ? Namɔ naa mlijaa nyɔŋma mli ekome ni akɛbahaa nɛɛ he sɛɛ? Dani ooonyɛ oha nɛkɛ sanebimɔi nɛɛ ahetoo lɛ, susumɔ nɔ hewɔ ni Yehowa tsɔ Maleaki nɔ ewie nɛkɛ wiemɔi nɛɛ yɛ afii ohai enumɔ D.Ŋ.B. lɛ he okwɛ.
Mlijaa Nyɔŋma kɛ Afɔleshaai
8. Taakɛ Mla kpaŋmɔ lɛ tsɔɔ lɛ, mɛni nɔ Israel heloonaa ninamɔ lɛ baadamɔ?
8 Nyɔŋmɔ webii ni hi shi yɛ Maleaki beaŋ lɛ shwereee. Mɛni hewɔ? Nɔ hewɔ ni ebalɛ nakai lɛ jɛ afɔleshaai kɛ mlijaa nyɔŋma nihamɔ lɛ yɛ gbɛ ko nɔ. Nakai beaŋ lɛ, Israel yɛ Mose Mla kpaŋmɔ lɛ shishi. Beni Yehowa kɛ amɛ fee nakai kpaŋmɔ lɛ, ewo shi akɛ kɛ Israel ye amɛgbɛfaŋnɔ lɛ mli anɔkwa lɛ, ebaajɔɔ amɛ yɛ mumɔŋ kɛ heloo gbɛfaŋ fɛɛ. Nɔ ni enɛ tsɔɔ ji akɛ, Israel shweremɔ damɔ amɛ anɔkwayeli nɔ.—5 Mose 28:1-19.
9. Mɛni hewɔ ni Yehowa bi ni Israel aha mlijaa nyɔŋma mli ekomekome kɛ afɔleshaa nii hu yɛ blema Israel gbii lɛ amli lɛ?
9 Sɔ̃ ni ka Israel nɔ yɛ Mla lɛ shishi lɛ fa ko ji ni amɛkɛ afɔleshaai aba sɔlemɔ we lɛ ni amɛha mlijaa nyɔŋma. Nibii ni amɛkɛbaa nɛɛ ateŋ ekomɛi lɛ, ashaa fɛɛ yɛ Yehowa afɔleshaa latɛ lɛ nɔ, ni ekrokomɛi lɛ, ajaraa mli ni ahaa osɔfoi lɛ kɛ mɛi ni kɛ afɔleshaa nii lɛ ba lɛ eko, shi ajieɔ emli fai krɛdɛɛi komɛi akɛshaa afɔle ahaa Yehowa. (3 Mose 1:3-9; 7:1-15) Mose kɛɛ Israelbii lɛ yɛ mlijaa nyɔŋma nihamɔ lɛ he akɛ: “Shikpɔŋ lɛ nɔ nibii amlijaa nyɔŋma mli ekome lɛ, dumɔnii jio, tsei ayibii jio, Yehowa nɔ ni; efee krɔŋkrɔŋ eha Yehowa.” (3 Mose 27:30) Akɛ mlijaa nyɔŋma mli ekome nɛɛ haa Levibii ni tsuɔ nii yɛ kpeebuu lɛ mli, kɛ sɛɛ mli lɛ, yɛ sɔlemɔ we lɛ. Ni Levibii ni amɛjeee osɔfoi lɛ hu kɛ nɔ ni amɛnaa lɛ mlijaa nyɔŋma mli ekome haa Aaron weku lɛ mli osɔfoi lɛ. (4 Mose 18:21-29) Mɛni hewɔ ni Yehowa bi ni Israel aha mlijaa nyɔŋma lɛ? Klɛŋklɛŋ lɛ, koni amɛkɛjie hiɛsɔɔ ni amɛyɔɔ kɛha Yehowa ejurɔfeemɔ lɛ kpo, yɛ gbɛ ni anaa faŋŋ nɔ. Nɔ ni ji enyɔ lɛ, koni amɛnyɛ amɛye amɛbua ni akɛkwɛ Levibii lɛ, koni no aha amɛjwɛŋmɔ ahi gbɛnaa nii ni jwere amɛnɔ, ní Mla lɛ ni amɛaatsɔɔ gbɔmɛi lɛ fata he lɛ nɔ. (2 Kronika 17:7-9) Amɛtsɔɔ nɛkɛ gbɛ nɔ amɛfiɔ anɔkwa jamɔ hu sɛɛ, ni mɔ fɛɛ mɔ naa he sɛɛ.
10. Mɛni ba beni Israel kɛ mlijaa nyɔŋma mli ekomekome kɛ afɔleshaai lɛ baaa lɛ?
10 Eyɛ mli akɛ sɛɛ mli lɛ Levibii lɛ kɛ mlijaa nyɔŋma kɛ afɔleshaa nii ni akɛbaa lɛ tsuɔ nii moŋ, shi amɛji nikeenii diɛŋtsɛ ni akɛbaha Yehowa, ni no hewɔ lɛ esa akɛ efee ekpakpa, nɔ ni sa lɛ. (3 Mose 22:21-25) Kɛ Israelbii lɛ kɛ mlijaa nyɔŋma lɛ baaa, aloo amɛkɛ nibii ni esaaa basha afɔle lɛ, mɛni baa? Toigbalamɔ pɔtɛɛ ko bɛ ni atsɔɔ yɛ Mla lɛ mli, shi nibii komɛi jɛɔ nakai feemɔ mli baa. Yehowa tsiɔ ejɔɔmɔi anaa, ni Levibii lɛ, ni amɛnaaa heloonaa yelikɛbuamɔ lɛ hu shiɔ amɛ sɔlemɔ we nitsumɔi lɛ koni amɛyabɔ amɛhe mɔdɛŋ. No hewɔ lɛ Israel fɛɛ naa amanehulu.
“Nyɛjwɛŋa Nyɛgbɛ́i Iɛ Ahe”
11, 12. (a) Mɛni jɛ Mla lɛ nɔ yeli ni Israel ku ehiɛ efɔ nɔ lɛ mli ba? (b) Mɛɛ nitsumɔ Yehowa kɛwo Israel dɛŋ beni ekɛ amɛ ku sɛɛ kɛjɛ Babilon kɛba lɛ?
11 Israel yinɔsane be mli lɛ, amɛteŋ mɛi komɛi fee nɔkwɛmɔ nɔ kpakpa ni amɛbɔ mɔdɛŋ akɛ amɛaaye Mla lɛ, ni mlijaa nyɔŋma nihamɔ fata he lɛ nɔ. (2 Kronika 31:2-16) Shi, bei babaoo lɛ, maŋ muu lɛ fɛɛ kuɔ amɛhiɛ amɛshwieɔ nɔ. Amɛku kpaŋmɔ ni ka amɛkɛ Yehowa teŋ lɛ mli shii abɔ, aahu kɛyashi naagbee kwraa lɛ, eŋmɛ gbɛ ni aye amɛnɔ kunim, ni aŋɔ amɛ nom kɛtee Babilon, yɛ afii 607 D.Ŋ.B.—2 Kronika 36:15-21.
12 Tsɔsemɔ ni mli wa nɛ, shi afii 70 sɛɛ lɛ, Yehowa saa ekɛ ewebii lɛ ba amɛshikpɔŋ nɔ ekoŋŋ. Paradeiso he shiwooi ni yɔɔ Yesaia lɛ mli babaoo baana amɛ klɛŋklɛŋ mlibaa yɛ nakai sɛɛkuu lɛ sɛɛ. (Yesaia 35:1, 2; 52:1-9; 65:17-19) Shi yiŋtoo titri hewɔ ni Yehowa ku sɛɛ ekɛ ewebii lɛ ba lɛ jeee ni amɛto shikpɔŋ nɔ paradeiso ko amɛma shi, shi moŋ ni amɛsaa amɛma sɔlemɔtsu lɛ ni amɛtswa anɔkwa jamɔ amɛma shi ekoŋŋ. (Ezra 1:2, 3) Kɛ Israel bo Yehowa toi lɛ, heloonaa sɛɛnamɔi baanyiɛ sɛɛ, ni Yehowa jɔɔmɔi baaha amɛtsɔmɔ niiatsɛmɛi yɛ mumɔŋ kɛ heloo gbɛfaŋ fɛɛ. Enɛ hewɔ lɛ, yɛ afii 537 D.Ŋ.B., beni amɛyashɛ amɛshikpɔŋ lɛ nɔ nɔŋŋ lɛ, Yudafoi lɛ ma afɔleshaa latɛ yɛ Yerusalem ni amɛje sɔlemɔtsu lɛ he nitsumɔ shishi. Shi, amɛkɛ shitee-kɛ-woo ni mli wa waa kpe, ni amɛkpa. (Ezra 4:1-4, 23) Nɔ ni jɛ mli ba ji akɛ, Israel naaa Yehowa dɛŋ jɔɔmɔ dɔŋŋ.
13, 14. (a) Mɛni nyiɛ sɛɛ ba beni Israel kpa sɔlemɔtsu lɛ maa lɛ? (b) Mɛɛ gbɛ nɔ atsɔ ama sɔlemɔtsu lɛ yɛ naagbee, shi mɛɛ shigbeemɔi komɛi ni ana yɛ Israel he ekoŋŋ abɔ he amaniɛ?
13 Yɛ afii 520 D.N.B. lɛ, Yehowa tee gbalɔ Hagai kɛ gbalɔ Zakaria shi koni amɛwo Israel hewalɛ ni amɛku amɛsɛɛ kɛba nitsumɔ ni ji sɔlemɔtsu ni amɛmaa lɛ he ekoŋŋ. Hagai tsɔɔ akɛ maŋ lɛ miina amanehulu yɛ heloonaa nibii agbɛfaŋ, ni ewie akɛ enɛ jɛ ekaa ni amɛbɛ kɛha Yehowa we lɛ hewɔ. Ekɛɛ: “Bɔ ni Yehowa Zebaot kɛɛ nɛ: ‘Nyɛjwɛŋa nyɛgbɛ̀i lɛ ahe! Nyɛdũɔ nii pii, shi fioo pɛ baa; nyɛyeɔ nii, shi nyɛtɔrɔɔɔ; nyɛnuɔ dãai, shi nyɛtɔrɔɔɔ dãa; nyɛbumɔɔ mamai, shi mɔ ko mɔ ko he efeee kulɔɔ; ni mɔ ni yeɔ apaa ni awoɔ lɛ nyɔmɔ lɛ, ekɛwoɔ kotokui ni agbulɔ he mli.’ Bɔ ni Yehowa Zeboat kɛɛ nɛ: ‘Nyɛjwɛŋa nyɛgbɛi lɛ ahe! Nyɛkwɔa kɛyaa gɔŋ lɛ nɔ, ni nyɛyaŋɔa tsei kɛbaa, ni nyɛkɛbamaa shia lɛ; ni mana he tsui, ni aaawo mihiɛ nyam.’”—Hagai 1:5-8.
14 Akɛni Hagai kɛ Zakaria wo amɛ hewalɛ hewɔ lɛ, Israelbii lɛ jwɛŋ amɛgbɛi lɛ ahe, ni amɛma sɔlemɔtsu lɛ. Shi, aaafee afii 60 sɛɛ lɛ, Nehemia tee Yerusalem ni eyana akɛ Israel esaa eku ehiɛ efɔ Yehowa Mla lɛ nɔ ekoŋŋ. Ni ejaje shihilɛ nɛɛ. Shi beni etee jɛmɛ nɔ ni ji shii enyɔ nɔ lɛ, eyana akɛ nibii esaa efite kwraa ekoŋŋ. Ebɔ amaniɛ akɛ: “Ni minu akɛ Levibii lɛ agbɛnaa nii lɛ ahako amɛ; no hewɔ lɛ Levibii lɛ kɛ lalatsɛmɛi lɛ fɛɛ ni tsuɔ nii lɛ, mɔ fɛɛ mɔ ejo foi kɛtee ekosɛɛ.” (Nehemia 13:10) Ajaje nɛkɛ naagba nɛɛ, ni “Yuda muu lɛ fɛɛ kɛ abele kɛ wein kɛ mu mlijaai nyɔŋma mli ekomekome lɛ ba amɛbawo nitoo hei lɛ.”—Nehemia 13:12.
Yehowa Shishiumɔ
15, 16. Mɛɛ tɔmɔi komɛi ahewɔ ni Yehowa tsɔ Maleaki nɔ ekã Israel hiɛ lɛ?
15 Ekolɛ, Maleaki gbalɛ be lɛ ba yɛ nɛkɛ be koome nɛɛ nɔŋŋ mli, ni gbalɔ lɛ kɛɔ wɔ nibii babaoo yɛ anɔkwa ni Israel yeee lɛ he. Eŋma Yehowa wiemɔi ni ekɛ Israel wie lɛ akɛ: “‘Kɛji tsɛ ji mi lɛ, nɛgbɛ miwoo lɛ yɔɔ? Ni kɛji nuŋtsɔ hu ji mi lɛ, nɛgbɛ migbeyeishemɔ lɛ yɔɔ?’ Yehowa Zebaot miikɛɛ nyɛ, osɔfoi, ni nyɛgbeɔ migbɛi lɛ he guɔ lɛ.” Mɛni etɔ̃tɔ̃? Yehowa tsɔɔ mli akɛ: “Kɛji nyɛkɛ kooloo shwilafo baha ni akɛsha afɔle lɛ [nyɛkɛɔ akɛ]: ‘Ejeee nɔ fɔŋ ko!’ Ni kɛji nyɛkɛ akpake loo helatsɛ baha lɛ [nyɛkɛɔ akɛ]: ‘Ejeee nɔ fɔŋ!’”—Maleaki 1:6-8.
16 Maleaki kɛ niiamlitsɔɔmɔ ni mli ka shi faŋŋ nɛɛ tsɔɔ akɛ eyɛ mli akɛ Israelbii lɛ kɛ afɔleshaai baa moŋ, shi nibii gbohii ni amɛkɛbaa lɛ tsɔɔ bulɛ ni amɛbɛ. Maleaki ŋma hu akɛ: “‘Kɛjɛ nyɛtsɛmɛi ayinɔ beebe nyɛgba afa kɛjɛ mikpɔi lɛ ahe ni nyɛyeee nɔ. Nyɛkpalea kɛbaa miŋɔɔ, ni makpale kɛba nyɛŋɔɔ,’ Yehowa Zebaot kɛɛ.” Israelbii lɛ ahiɛ fee amɛ yaa yɛ nɔ pɔtɛɛ ni esa akɛ amɛfee lɛ he, no hewɔ lɛ amɛbi akɛ: “Mɛni mli wɔkpale yɛ?” Ni Yehowa ha hetoo akɛ: “Aso gbɔmɔ ko shishiuɔ Nyɔŋmɔ? Shi nyɛ lɛ, nyɛshishiuɔ mi.” Te aaafee tɛŋŋ ni Israel ashishiu Yehowa, mɔ ni ji ninamɔ fɛɛ Jɛɛhe lɛ? Yehowa ha hetoo akɛ: “Yɛ mlijaa nyɔŋma mli ekomekome lɛ kɛ nɔwomɔ afɔlei lɛ amli.” (Maleaki 3:7, 8) Hɛɛ, akɛni amɛkɛ amɛ mlijaa nyɔŋma mli ekomekomei kɛ afɔlei lɛ baaa hewɔ lɛ Israel miishishiu Yehowa!
17. Mɛɛ yiŋtoo he nii mlijaa nyɔŋma kɛ afɔleshaa nii lɛ tsu yɛ Israel, ni mɛɛ shiwoo Yehowa kɛha yɛ mlijaa nyɔŋma nihamɔ lɛ he?
17 Nɛkɛ yinɔsane hesusumɔ nɛɛ tsɔɔ bɔ ni mlijaa nyɔŋma nihamɔ kɛ afɔlei he hiaa ha yɛ Israel. Eji hiɛsɔɔ ni mɔ ni kɛ nii lɛ haa lɛ yɔɔ lɛ kpojiemɔ. Ni eyeɔ ebuaa ni akɛfiɔ anɔkwa jamɔ sɛɛ yɛ heloonaa nibii agbɛfaŋ. Enɛ hewɔ lɛ, Yehowa tee nɔ ewo Israel hewalɛ akɛ: “Nyɛkɛ mlijaa nyɔŋma mli ekomekome lɛ fɛɛ abaa fiase lɛ.” Beni etsɔɔ nɔ ni baanyiɛ sɛɛ aba kɛ amɛfee nakai lɛ, Yehowa wo shi akɛ: ‘Ni mafɔse jɔɔmɔ maha nyɛ ni ateke nɔ.’ (Maleaki 3:10) Yehowa jɔɔmɔ baaha amɛtsɔmɔ niiatsɛmɛi.
‘Anɔkwa Nuŋtsɔ lɛ’ Kojo Amɛ
18. (a) Namɔ baa he Yehowa bɔ kɔkɔ yɛ? (b) Mɛɛ be mli aba sɔlemɔ we lɛ, ni namɔ ji mɔ ni ba, ni mɛni jɛ mli ba ha Israel?
18 Yehowa tsɔ Maleaki nɔ hu ebɔ amɛ kɔkɔ akɛ ebaaba ni ebakojo ewebii lɛ. “Naa! Miitsu mibɔfo lɛ, ni esaa gbɛ lɛ eto mi; ni Nuŋtsɔ lɛ ni nyɛtaoɔ lɛ aaaba esɔlemɔ we lɛ trukaa; ni kpaŋmɔ bɔfo lɛ ni nyɛnaa ehe tsui lɛ, naa, eeeba!” (Maleaki 3:1) Mɛɛ be nakai sɔlemɔ we lɛ baa ni ewo shi yɛ he lɛ ba mli? Yesu tsɛ Maleaki gbalɛ ni kɔɔ tsulɔ ko he, mɔ ni baasaa gbɛ ato lɛ lɛ sɛɛ yɛ Mateo 11:10 ni ekɛto Yohane Baptisilɔ lɛ he. (Maleaki 3:23; Mateo 11:14) No hewɔ lɛ, nakai kojomɔ be lɛ bashɛ yɛ afi 29 Ŋ.B.! Namɔ ji tsulɔ ni ji enyɔ, ni ji kpaŋmɔ bɔfo ni baafata Yehowa, ‘anɔkwa Nuŋtsɔ lɛ’ he kɛba sɔlemɔ we lɛ? Lɛ ji Yesu diɛŋtsɛ, ni eba sɔlemɔ we ni yɔɔ Yerusalem lɛ shii enyɔ sɔŋŋ ni ebatsuu he yɛ naakpɛɛ gbɛ nɔ, ni ebashwie shika tsakelɔi ni yeee anɔkwa lɛ kɛjɛ jɛmɛ. (Marko 11:15-17; Yohane 2:14-17) Yehowa bi yɛ gbalɛ wiemɔi mli, yɛ nɛkɛ klɛŋklɛŋ afi oha lɛ mli kojomɔ be nɛɛ he akɛ: “Namɔ aaanyɛ akpee ebaa gbi lɛ naa? Ni namɔ aaanyɛ shi adamɔ beni eeebapue lɛ?” (Maleaki 3:2) Yɛ anɔkwale mli lɛ, Israel nyɛɛɛ shi edamɔ. Abakwɛ bɔ ni amɛyɔɔ amɛha, ni ana akɛ amɛshɛɛɛ, kɛkɛ ni yɛ afii 33 Ŋ.B. lɛ, ashɛrɛ amɛ ashwie kwraa akɛ Yehowa maŋ ni ehala.—Mateo 23:37-39.
19. Mɛɛ gbɛ nɔ shwɛɛnii ko ku amɛsɛɛ kɛba Yehowa ŋɔɔ yɛ klɛŋklɛŋ afii oha lɛ mli, ni mɛɛ jɔɔmɔi amɛna?
19 Shi kɛlɛ, Maleaki ŋma hu akɛ: “Ni [Yehowa lɛ] eeeta shi tamɔ jwiɛtɛi hetsuulɔ kɛ krɔŋŋ-feelɔ, ni eeefee Levibii lɛ krɔŋŋ, ni eeetsuu amɛhe tamɔ shika loo jwiɛtɛi, ni amɛkɛ nikeenii aaabaha Yehowa yɛ jalɛ mli.” (Maleaki 3:3) Yɛ enɛ kɛ gbeekpamɔ naa lɛ, eyɛ mli akɛ ashɛrɛ mɛi ni kɛɔ akɛ amɛsɔmɔɔ Yehowa yɛ klɛŋklɛŋ afii oha lɛ mli lɛ ateŋ mɛi pii ashwie moŋ, shi atsuu mɛi komɛi ahe ni afee amɛ krɔŋŋ ni amɛba Yehowa ŋɔɔ amɛkɛ afɔleshaai ni sa baha lɛ. Namɛi ji mɛi nɛɛ? Amɛji mɛi ni here Yesu, mɔ ni ji kpaŋmɔ bɔfo lɛ nɔ lɛ. Yɛ Pentekoste afii 33 Ŋ.B. lɛ, nɛkɛ toibolɔi nɛɛ ateŋ mɛi 120 bua amɛhe naa yɛ ŋwɛitsu ko nɔ yɛ Yerusalem. Akɛni mumɔ krɔŋkrɔŋ lɛ wo amɛ hewalɛ hewɔ lɛ, amɛkɛ nikeenii bɔi hamɔ yɛ jalɛ mli, ni amɛyifalɛ lɛ tee hiɛ oyayaayai. Etsɛɛɛ ni amɛgbɛ amɛshwa Roma Maŋtsɛyeli lɛ mli fɛɛ. (Bɔfoi lɛ Asaji 2:41; 4:4; 5:14) Yɛ nɛkɛ gbɛ nɔ lɛ, shwɛɛnii ko ku amɛsɛɛ kɛba Yehowa ŋɔɔ.—Maleaki 3:7.
20. Beni akpata Yerusalem kɛ esɔlemɔtsu lɛ hiɛ lɛ, mɛni ba Nyɔŋmɔ Israel hee lɛ nɔ?
20 Nɛkɛ Israel shwɛɛnii, ni Jeŋmajiaŋbii ni kɛji wɔɔkɛɛ lɛ, atɛo amɛ awo Israel tsoku ni ma shi lɛ mli lɛ fata he nɛɛ ji “Nyɔŋmɔ Israel” hee, ni ji jeŋmaŋ ni emli bii lɛ ji Kristofoi ni akɛ mumɔ efɔ amɛ mu lɛ. (Galatabii 6:16; Romabii 11:17) Yɛ afii 70 Ŋ.B. lɛ, “gbi . . . ni edɔ tamɔ flɔnɔɔ” ba heloonaa Israel nɔ beni Roma asraafoi bakpata Yerusalem kɛ esɔlemɔtsu lɛ hiɛ lɛ. (Maleaki 3:19; Luka 19:41-44) Mɛni ba Nyɔŋmɔ mumɔŋ Israel lɛ nɔ? Yehowa “baa amɛyi, tamɔ bɔ ni mɔ baa lɛ diɛŋtsɛ ebi ni sɔmɔɔ lɛ yi” lɛ. (Maleaki 3:17) Kristofoi ni afɔ amɛ mu lɛ asafo lɛ bo Yesu kɔkɔbɔɔ gbalɛ ni ekɛha lɛ toi. (Mateo 24: 15, 16) Amɛna yibaamɔ, ni Yehowa jɔɔmɔ tee nɔ eha amɛtsɔmɔ niiatsɛmɛi yɛ mumɔŋ.
21. Mɛɛ sanebimɔi yɔɔ lolo yɛ Maleaki 3:1 kɛ 10 he?
21 Mɛɛ Yehowa bembuu nɛ! Shi kɛlɛ, mɛɛ gbɛ nɔ ahaa Maleaki 3:1 baa mli yɛ ŋmɛnɛ? Ni te esa akɛ Kristofonyo atsu hewalɛwoo ni akɛha yɛ Maleaki 3:10 akɛ akɛ mlijaa nyɔŋma muu lɛ fɛɛ aba fiase lɛ he nii eha tɛŋŋ? Abaasusu enɛ he yɛ nikasemɔ ni nyiɛ sɛɛ lɛ mli.
Ani Obaanyɛ Otsɔɔ mli?
◻ Yɛ naagbee lɛ, namɔ ji ninamɔ fɛɛ Jɛɛhe?
◻ Mɛni hewɔ mumɔŋ ninamɔ hi fe heloonaa ninumɔ lɛ?
◻ Mɛɛ yiŋtoo he nii mlijaa nyɔŋma nihamɔ kɛ afɔleshaai tsu yɛ lsrael?
◻ Mɛɛ be Yehowa anɔkwa Nuŋtsɔ, lɛ ba sɔlemɔ we lɛ koni ebakojo lsrael, ni mɛni jɛ mli ba?
◻ Namɛi ku amɛsɛɛ kɛba Yehowa ŋɔɔ beni eba esɔlemɔ we lɛ yɛ Ŋ.B., klɛŋklɛŋ afii oha lɛ mli lɛ sɛɛ?
[Mfoniri ni yɔɔ baafa 10]
Kpaŋmɔ bɔfo, Yesu, ni edamɔ shi kɛha Yehowa lɛ ba sɔlemɔ we lɛ kɛha kojomɔ yɛ Ŋ.B. klɛŋklɛŋ afii oha lɛ mli