Kpaŋmɔi Ni Kɔɔ Nyɔŋmɔ Naanɔ Yiŋtoo He
“Yehowa lɛ . . . ekaiɔ ekpaŋmɔ lɛ kɛyaa naanɔ, wiemɔ ni ekɛma shi eha yinɔi akpe lɛ.”—LALA 105:7, 8.
1, 2. Mɛni hewɔ wɔbaanyɛ wɔkɛɛ akɛ kpaŋmɔ ko esa wɔteŋ mɛi pii ahe lɛ?
EKA shi faŋŋ akɛ kpaŋmɔ ko esa ohe—otsutsu shihilɛ, oŋmɛnɛŋmɛnɛ nɔ, kɛ owɔsɛɛ be. Shi ekolɛ obaasusu akɛ, ‘Mɛɛ kpaŋmɔ ni?’ Yɛ sane nɛɛ mli lɛ, eji gbalashihilɛ, ejaakɛ wɔteŋ mɛi pii ji shwiei ni jɛ gbalashihilɛ mli ni wɔteŋ mɛi pii hu wɔbote gbalashihilɛ mli. Mɛi ni boteko gbalashihilɛ mli po baanyɛ asusu wɔsɛɛ be gbalashihilɛ mli jɔɔmɔi ni kɛ miishɛɛ baa lɛ ahe.
2 Afii ohai abɔ ni eho nɛ ni Hebri gbalɔ Maleaki ŋma yɛ “obalahiiaŋ ŋa,” “ohefatalɔ kɛ okpaŋmɔ ŋa” lɛ he. (Maleaki 2:14-16) Ebaanyɛ etsɛ gbalashihilɛ akɛ kpaŋmɔ, ejaakɛ eji yelikɛfuamɔ loo gbeekpamɔ, gbɛjianɔtoo ni ka mɛi enyɔ teŋ akɛ amɛ fɛɛ amɛbaafee nɔ ko. Gbalashihilɛ kpaŋmɔ lɛ ji mɛi enyɔ kpaŋmɔ ni mɛi enyɔ lɛ ekpɛlɛ nɔ akɛ amɛbaafee wu kɛ ŋa, ni amɛkpɛlɛ gbɛnaa nii ni jwere amɛteŋ mɔ fɛɛ mɔ nɔ lɛ nɔ akɛ amɛbaatsu he nii ni amɛkpa naanɔ sɛɛnamɔi agbɛ.
3. Mɛni hewɔ kpaŋmɔi krokomɛi baanyɛ asa wɔhe babaoo fe gbalashihilɛ lɛ?
3 Gbalashihilɛ baanyɛ afee kpaŋmɔ ni ka mɔ kɛ mɔ teŋ diɛŋtsɛ aha wɔ, ni kɛlɛ Biblia lɛ wieɔ kpaŋmɔi ni mli lɛɛ fe nakai lɛ ahe. Yɛ be mli ni ekɛ Biblia mli kpaŋmɔi eto jamɔi ni jeee Biblia mli nɔ lɛ ahe lɛ, ɛnsaiklopedia ko kɛɛ akɛ Biblia lɛ mli pɛ “famɔ ni kɔɔ wekukpaa ni ka Nyɔŋmɔ kɛ ewebii ateŋ lɛ bafeɔ gbɛjianɔtoo ni mli lɛɛ ni kɔɔ jeŋ muu fɛɛ he yɛ.” Hɛɛ, nɛkɛ kpaŋmɔi nɛɛ kɔɔ wɔ Bɔlɔ ni yɔɔ suɔmɔ lɛ naanɔ yiŋtoo he. Taakɛ obaana lɛ, jɔɔmɔi babaoo ni ooona lɛ kɔɔ nɛkɛ kpaŋmɔi nɛɛ ahe. Shi oyɛ hegbɛ ni obiɔ akɛ, ‘Ebaa lɛ nakai yɛ mɛɛ gbɛ nɔ?’
4. Mɛɛ shishijee kpaŋmɔ tsɔɔ Nyɔŋmɔ naanɔ yiŋtoo?
4 Ole oshara ni jɛ Adam kɛ Hawa ni kpoo hegbɛ ni Nyɔŋmɔ yɔɔ lɛ mli ba lɛ jogbaŋŋ. Wɔna emuu ni ayeee kɛjɛ amɛŋɔɔ, ni enɛ ji nɔ ni hɔ helai ni epiŋ wɔ, ni kɛ gbele baa lɛ sɛɛ. (1 Mose 3:1-6, 14-19) Shi wɔbaanyɛ wɔda shi akɛ amɛ esha lɛ fiteee Nyɔŋmɔ yiŋtoo akɛ ebaaha anɔkwa jalɔi ayi shikpɔŋ lɛ nɔ obɔ ni amɛna naanɔ gbɔmɔtsoŋ hewalɛnamɔ kɛ miishɛɛ. Yɛ enɛ hewɔ lɛ, Yehowa fee kpaŋmɔ ni aŋma afɔ shi yɛ 1 Mose 3:15 lɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.” Shi bɔ ni okadi wiemɔ nɛɛ yɔɔ kuku ha lɛ shi sanebimɔi pii ni ahaaa hetoo. Mɛɛ gbɛ nɔ Yehowa baatsɔ ni eha nɛkɛ kpaŋmɔ shiwoo nɛɛ aba mli?
5, 6. (a) Mɛni nɔ Nyɔŋmɔ to eyiŋ akɛ ebaatsɔ ni ekɛtsu eyiŋtoo he nii? (b) Mɛni hewɔ esa akɛ wɔnya nɔ ni Nyɔŋmɔ baatsɔ nɔ afee enɛ lɛ he lɛ?
5 Agbɛnɛ Nyɔŋmɔ hala akɛ eeeto ŋwɛi kpaŋmɔi pɔtɛɛ komɛi ahe gbɛjianɔ kɛtsara nɔ, ni Eden kpaŋmɔ lɛ fata he ni fɛɛ feɔ kpawo. Esa akɛ wɔteŋ mɔ fɛɛ mɔ ni hiɛ ka nɔ akɛ eeena naanɔ jɔɔmɔi amli ŋɔɔmɔ lɛ anu nɛkɛ kpaŋmɔi nɛɛ ashishi. Nɔ ni fata enɛ he ji ni wɔɔle be kɛ gbɛ ni atsɔ nɔ afee, mɛi ni ekɔɔ amɛhe, nɔ ni ji amɛyiŋtoo loo saji ni yɔɔ mli, kɛ bɔ ni kpaŋmɔ lɛ kɔɔ mɔ fɛɛ mɔ he yɛ Nyɔŋmɔ yiŋtoo akɛ ekɛ naanɔ wala aaajɔɔ adesai toibolɔi lɛ mli. Be ni sa jogbaŋŋ ni akɛaasusu nɛkɛ kpaŋmɔi nɛɛ ahe nɛ, ejaakɛ yɛ March 22, 1989 lɛ, Kristofoi asafoi baakpe ni amɛkai Nuŋtsɔ lɛ Gbɛkɛnaashi Niyenii lɛ ni kɔɔ nɛkɛ kpaŋmɔi nɛɛ ahe tɛɛ lɛ.
6 Shi kɛha mɛi komɛi lɛ, kpaŋmɔi ahe jwɛŋmɔ ni ahiɛ Iɛ tamɔ nɔ ko ni miishɛɛ bɛ mli, mla mli saji, ni gbɔmɛi nyaaa he tsɔ ko kɛha amɛ. Shi, susumɔ nɔ ni Theological Dictionary of the Old Testament lɛ kɛɔ lɛ he: “Wiemɔi kɛha ‘kpaŋmɔ’ yɛ blema Bokagbɛ ni Bɛŋkɛ kɛ agbɛnɛ yɛ Hela kɛ Roma je lɛ mli lɛ . . . ajara mli awo wiemɔi ashishinumɔi enyɔ mli: kita kɛ shiwoo yɛ gbɛ kome nɔ, suɔmɔ kɛ naanyobɔɔ yɛ gbɛ kroko nɔ.” Wɔbaanyɛ wɔna sui enyɔ lɛ fɛɛ —kita kɛ naanyobɔɔ—akɛ Yehowa kpaŋmɔi lɛ ashishitoo nɔ.
Abraham Kpaŋmɔ Lɛ—Nɔdaamɔ Nɔ Kɛha Naanɔ Jɔɔmɔi
7, 8. Mɛɛ kpaŋmɔ nɛkɛ Nyɔŋmɔ kɛ Abraham fee? (1 Kronika 16:15, 16)
7 Blematsɛ Abraham, “mɛi ni yɔɔ hemɔkɛyeli lɛ fɛɛ atsɛ,” lɛ ji “Yehowa naanyo.” (Romabii 4:11; Yakobo 2:21-23, New World Translation.) Nyɔŋmɔ ka lɛ kita, ni ekɛ kpaŋmɔ ni wɔɔdamɔ nɔ ni wɔnine ashɛ naanɔ jɔɔmɔi anɔ ha lɛ.—Hebribii 6:13-18.
8 Beni Abraham yɔɔ Ur lɛ, Yehowa kɛɛ lɛ akɛ eshi jɛmɛ kɛya maŋ kroko nɔ, ni enɛ bafee Kanaan. Yehowa wo Abraham shi yɛ nakai be lɛ mli akɛ: “Ni maha otsɔ jeŋmaŋ kpeteŋkpele, ni majɔɔo, ni maha ogbɛi ada, . . . ni omli aaajɛ ajɔɔ shikpɔŋ lɛ nɔ wekui fɛɛ.”a (1 Mose 12:1-3) Yɛ no sɛɛ lɛ, Nyɔŋmɔ kɛ nibii krokomɛi fata nɔ ni wɔle akɛ Abraham kpaŋmɔ lɛ he fiofio: Abraham seshi lɛ, aloo gboshiniyelɔ lɛ, baana Shiwoo Shikpɔŋ lɛ; eshwiei ni anyɛŋ akane amɛ baajɛ eseshi lɛ mli aba; maŋtsɛmɛi baajɛ Abraham kɛ Sara mli aba.—1 Mose 13:14-17; 15:4-6; 17:1-8, 16; Lala 105:8-10.
9. Te wɔfeɔ tɛŋŋ wɔleɔ akɛ Abraham kpaŋmɔ lɛ baanyɛ akɔ wɔhe?
9 Nyɔŋmɔ tsɛ lɛ “mikpaŋmɔ [ni ka] mikɛo [Abraham] teŋ.” (1 Mose 17:2) Shi esa akɛ wɔnu he akɛ ekɔɔ wɔwala he, ejaakɛ yɛ sɛɛ mli lɛ, Nyɔŋmɔ lɛɛ nakai kpaŋmɔ lɛ mli, ni ejaje akɛ: “Jɔɔmɔ majɔɔo, ni fa maha oseshi afa tamɔ ŋwɛi ŋulamii kɛ ŋshɔ naa shia, ni oseshi lɛ aaaye ehenyɛlɔi agboi lɛ anɔ; ni oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ.” (1 Mose 22:17, 18) Wɔfata nakai jeŋmaji fɛɛ lɛ ahe; jɔɔmɔi babaoo yɛ ni asaa ato aha wɔ.
10. Mɛni wɔleɔ kɛjɛɔ kpaŋmɔ ni akɛ Abraham fee lɛ mli?
10 Nyɛhaa wɔwaa fioo ni wɔsusua nɔ ni wɔbaanyɛ wɔkase kɛjɛ Abraham kpaŋmɔ lɛ mli lɛ he. Taakɛ Eden kpaŋmɔ ni tsɔ enɛ hiɛ lɛ ji lɛ, enɛ tsɔɔ “seshi” ko ni miiba, ni tsɔɔ akɛ seshi lɛ baana adesa wekukpaa. Mɛni wɔleɔ kɛjɛɔ kpaŋmɔ ni akɛ Abraham fee lɛ mli? (1 Mose 3:15) Enɛ baafee Shem wekukpaa lɛ, kɛbashi Abraham nɔ, ni kɛtsɔ ebi Isak nɔ. Maŋtsɛyeli baajɛ wekukpaa nɛɛ mli aba, ni ebaaŋmɛ gbɛ ni jɔɔmɔ aba aha adesai fɛɛ ni yɔɔ shikpɔji fɛɛ nɔ shi jeee kɛha weku kome pɛ. Kpaŋmɔ nɛɛ ba mli yɛ mɛɛ gbɛ nɔ?
11. Abraham kpaŋmɔ lɛ mlibaa diɛŋtsɛ yɛ heloo naa ba mli yɛ mɛɛ gbɛ nɔ?
11 Abraham seshibii kɛtsɔ Yakob loo Israel nɔ lɛ ayi bafa ni amɛbafee maŋ kpeteŋkpele. Akɛ Abraham seshibii diɛŋtsɛ ni anyɛɛɛ akane amɛ lɛ, amɛjɔɔ amɛhe nɔ amɛha Abraham, Isak kɛ Yakob Nyɔŋmɔ lɛ jamɔ krɔŋŋ lɛ. (1 Mose 28:13; 2 Mose 3:6, 15; 6:3; Bɔfoi lɛ Asaji 3:13) Yɛ be babaoo mli lɛ Israelbii lɛ tsiɔ amɛhe kɛjɛɔ jamɔ krɔŋŋ he, ni kɛlɛ “Yehowa duroɔ amɛ ni emusuŋ tsɔɔ lɛ yɛ amɛ hewɔ . . . yɛ ekpaŋmɔ ni ekɛ Abraham kɛ Isak kɛ Yakob ekpaŋ lɛ hewɔ, ni esumɔɔɔ akɛ ekpata amɛhiɛ.” (2 Maŋtsɛmɛi 13:23; 2 Mose 2:24; 3 Mose 26:42-45) Yɛ sɛɛ mli beni Nyɔŋmɔ kpɛlɛ Kristofoi asafo lɛ nɔ akɛ ewebii po lɛ, ekɛ amɛ hi shi kɛha be ko koni ejie duromɔ krɛdɛɛ ko kpo etsɔɔ Israelbii lɛ akɛ maŋ ni ji Abraham heloonaa seshibii diɛŋtsɛ.—Daniel 9:27.
Abraham Mumɔŋ Seshibii
12, 13. Te fee tɛŋŋ ni Yesu jie ehe kpo akɛ seshi lɛ klɛŋklɛŋ loo shishijee fa yɛ Abraham kpaŋmɔ lɛ mlibaa yɛ mumɔŋ lɛ mli?
12 Abraham kpaŋmɔ lɛ na emlibaa kroko, mumɔŋ nɔ. Nɛkɛ emlibaa ni da nɛɛ nyɛŋ aba ja Yesu be lɛ eshɛ da, shi wɔbaanyɛ wɔna miishɛɛ akɛ efee faŋŋ yɛ wɔbe nɛɛ mli. Wɔyɛ emlibaa lɛ mlitsɔɔmɔ yɛ Nyɔŋmɔ Wiemɔ lɛ mli. Paulo ŋma akɛ: “Shi Abraham lɛ, awie shiwoo wiemɔi lɛ aha lɛ kɛ eseshi lɛ. Ekɛɛɛ akɛ: ‘Kɛ eseshibii lɛ,’ taakɛ mɛi pii anɔ, shi moŋ taakɛ mɔ kome nɔ, akɛ ‘kɛ oseshi lɛ,’ mɔ ni ji Kristo lɛ.”—Galatabii 3:16.
13 Hɛɛ, seshi lɛ baaba kɛtsɔ wekukpaa loo weku kome nɔ, ni enɛ ji anɔkwale yɛ Yesu he, mɔ ni afɔ lɛ yɛ heloo naa akɛ Yudanyo lɛ, Abraham heloo naa seshinyo lɛ. (Mateo 1:1-16; Luka 3:23-34) Kɛfata he lɛ, eji Abraham Kpeteŋkpele ni yɔɔ ŋwɛi lɛ weku lɛ mli nyo. Kaimɔ akɛ yɛ hemɔkɛyeli ni mli kwɔ ni blematsɛ Abraham yɔɔ hewɔ lɛ, eesumɔ ni ekɛ ebinuu Isak asha afɔle kɛ Nyɔŋmɔ miisumɔ lɛ nakai. (1 Mose 22:1-18; Hebribii 11:17-19) Nakai nɔŋŋ hu Yehowa tsu e-Bi koome lɛ kɛba shikpɔŋ nɔ koni ebatsɔ kpɔmɔ afɔleshaa nɔ eha adesai ni heɔ eyeɔ. (Romabii 5:8; 8:32) Belɛ anuɔ nɔ hewɔ ni Paulo tsɔɔ akɛ Yesu Kristo ji Abraham seshi lɛ mli mɔ titri taakɛ kpaŋmɔ nɛɛ ji lɛ shishi.
14. Mɛni ji Abraham seshi lɛ fa ni ji enyɔ lɛ, ni enɛ kɛ mɛɛ saji ahe susumɔ baa lolo?
14 Paulo tee nɔ etsɔɔ akɛ Nyɔŋmɔ ‘baaha Abraham seshi lɛ afa’ yɛ emumɔŋ mlibaa mli. Eŋma akɛ: “Shi kɛ Kristo nii ji nyɛ lɛ, belɛ Abraham seshibii ji nyɛ, kɛ gboshiniyelɔi hu yɛ shiwoo lɛ naa.” (1 Mose 22:17; Galatabii 3:29) Mɛnɛɛmɛi ji Kristofoi 144,000 ni akɛ mumɔ efɔ amɛ mu lɛ ni feɔ Abraham seshi lɛ fa ni ji enyɔ lɛ. Amɛjeee mɛi ni teɔ shi woɔ shishijee seshi lɛ fa lɛ, shi moŋ amɛji “Kristo nii.” (1 Korintobii 1:2; 15:23) Wɔle akɛ amɛteŋ mɛi pii nyɛŋ atsɔɔ amɛ wekukpaa aahu kɛyashɛ Abraham nɔ, ejaakɛ amɛjeee Yudafoi, shi moŋ amɛjɛ jeŋmaji lɛ ateŋ. Nɔ ni hiɛdɔɔ yɔɔ mli babaoo hu yɛ mumɔ mlibaa mli lɛ, amɛjeee Abraham Kpeteŋkpele lɛ, Yehowa Nyɔŋmɔ, weku lɛ mlibii yɛ adebɔɔ naa; shi moŋ, amɛjɛ Adam eshafeelɔ lɛ weku ni yeee emuu lɛ mli. No hewɔ lɛ ehe baahia ni wɔna nɔ hewɔ ni amɛhe saa kɛhaa “Abraham seshi” lɛ fa lɛ mlibii atsɔmɔ yɛ sɛɛ mli kpaŋmɔi amli.
Akɛ Mla Kpaŋmɔ Lɛ Fata Be Yɛ Be Kuku Ko Mli
15-17. (a) Mɛni hewɔ akɛ Mla kpaŋmɔ lɛ fata Abraham kpaŋmɔ lɛ he lɛ? (b) Mla Iɛ tsu nɛkɛ otii nɛɛ ahe nii yɛ mɛɛ gbɛ nɔ?
15 Beni Nyɔŋmɔ efee Abraham kpaŋmɔ lɛ akɛ shishijee nɔ kɛha eyiŋtoo he nitsumɔ lɛ sɛɛ lɛ, te aaafee tɛŋŋ abaa Seshi lɛ wekukpaa lɛ yi koni nibii krokomɛi akɛbafata he loo ekpata hiɛ kɛyashi be mli ni be lɛ aaashɛ koni epue? Kɛ Seshi lɛ ba lɛ, te aaafee tɛŋŋ ni anɔkwa jalɔi aaayoo lɛ lɛ? Paulo ha nɛkɛ sanebimɔi nɛɛ ahetoo kɛtsɔ nilee ni Nyɔŋmɔ yɔɔ ni no ha ekɛ Mla kpaŋmɔ lɛ fata he yɛ be kuku ko mli lɛ. Bɔfo lɛ ŋma akɛ:
16 “Agbɛnɛ, mɛɛ ji mla lɛ mɔ? Nɔtɔmɔi lɛ ahewɔ aŋɔfata he, kɛbashi beyinɔ ni seshi ni awo shi aha lɛ lɛ aaaba; ni ŋwɛibɔfoi anɔ atsɔ awo, yɛ mlidamɔlɔ dɛŋ. . . . No hewɔ lɛ mla lɛ etsɔ tsɔselɔ kɛmiiya Kristo nɔ, koni hemɔkɛyeli mli abu wɔ bem yɛ.”—Galatabii 3:19, 24.
17 Yehowa fee maŋ kpaŋmɔ ko ni ekaaa yɛ Sinai Gɔŋ lɛ he, yɛ lɛ kɛ Israel teŋ—Mla kpaŋmɔ lɛ, ni Mose ji eteŋdamɔlɔ lɛ.b (Galatabii 4:24, 25) Gbɔmɛi lɛ kpɛlɛ nɔ akɛ amɛbaahi nɛkɛ kpaŋmɔ nɛɛ mli, ni akɛ tsinai kɛ toi ala wo mli hewalɛ. (2 Mose 24:3-8; Hebribii 9:19, 20) Ekɛ teokrase mlai ha Israel kɛ gbɛjianɔtoo kɛha jalɛ nɔyeli. Kpaŋmɔ lɛ gu jeŋmaji ni akɛ amɛ aaabote gbalashihilɛ mli aloo apasa jamɔ kɛ jeŋba shara mli nifeemɔi ni akɛ he aaawo mli. No hewɔ lɛ ebu Israelbii lɛ ahe ni eji hewalɛ yɛ seshi lɛ wekukpaa lɛ yibaamɔ mli koni muji ko akaba he. (2 Mose 20:4-6; 34:12-16) Shi akɛni Israelnyo ko ni yeee emuu nyɛŋ aye Mla lɛ nɔ kɛmɔ shi hewɔ lɛ, eha nɔtɔmɔi loo eshai je kpo. (Galatabii 3:19) Ekɛ enine tsɔɔ bɔ ni osɔfo kuu ni yeɔ emuu ni hiɔ shi daa he ehia kɛ bɔ ni afɔleshaa ni ehe ehiaaa ni ati mli,daa afi hu he ehia ha. Mla lɛ tsɔ tamɔ tsɔɔlɔ ni nyiɛɔ gbekɛ hiɛ kɛyaa tsɔselɔ ni he hiaa lɛ ŋɔɔ, mɔ ni baafee Mesia lɛ aloo Kristo lɛ. (Hebribii 7:26-28; 9:9, 16-22; 10:1-4, 11) Beni etsu eyiŋtoo he nii egbe naa lɛ, Mla kpaŋmɔ lɛ baaba naagbee.—Galatabii 3:24, 26; Romabii 7:6; kwɛmɔ “Sanebimɔi ni jɛ Kanelɔi Adɛŋ” yɛ baafa 31.
18. Mɛɛ gbɛkpamɔ lolo kɔɔ Mla kpaŋmɔ lɛ he, shi mɛni hewɔ ewa akɛ aaanu enɛ shishi lɛ?
18 Beni efeɔ nɛkɛ kpaŋmɔ ni baahi shi yɛ be kuku mli lɛ, Nyɔŋmɔ tsi yiŋtoo kroko ni yɔɔ miishɛɛ nɛɛ ta: “No hewɔ lɛ agbɛnɛ kɛji nyɛaabo migbee toi ni nyɛye mikpaŋmɔ lɛ nɔ lɛ, no lɛ nyɛaatsɔ mi diɛŋtsɛ minɔ yɛ maji fɛɛ ateŋ; . . . shi nyɛ lɛ, nyɛaatsɔ osɔfoi amaŋtsɛyeli kɛ maŋ krɔŋkrɔŋ nyɛha mi.” (2 Mose 19:5, 6) Mɛɛ gbɛkpamɔ nɛ! Osɔfoi amaŋtsɛyeli maŋ ko. Shi te aaafee tɛŋŋ ni enɛ aaaba lɛ nakai hu? Taakɛ yɛ sɛɛ mli lɛ Mla lɛ tsɔɔ mli lɛ, akɛ gbɛnaa nii ni yɔɔ sɔrɔto ha (Yuda) akutso ni baaye nɔ lɛ kɛ (Levi) osɔfoi akutso lɛ. (1 Mose 49:10; 2 Mose 28:43; 4 Mose 3:5-13) Gbɔmɔ kome ko nyɛŋ afee maŋnɔyelɔ kɛ osɔfo hu yɛ nakai beaŋ nɔŋŋ. Shi, Nyɔŋmɔ wiemɔ lɛ ni yɔɔ 2 Mose 19:5, 6 lɛ haa wɔyiŋtoo ko ni wɔɔdamɔ nɔ wɔhe wɔye akɛ mɛi ni yɔɔ Mla kpaŋmɔ lɛ mli lɛ baana hegbɛ ni amɛkɛ “osɔfoi amaŋtsɛyeli kɛ maŋ krɔŋkrɔŋ” ko aha yɛ gbɛ ko ni atsɔɔ mli lɛ nɔ.
David Maŋtsɛyeli Kpaŋmɔ
19. Atsɔɔ akɛ maŋtsɛyeli fata kpaŋmɔi nɛɛ ahe yɛ mɛɛ gbɛ nɔ?
19 Yɛ be ni sa mli lɛ Yehowa kɛ kpaŋmɔ kroko fata he ni enɛ ha gbɛ ni eeetsɔ nɔ etsu eyiŋtoo nɛɛ he nii kɛha wɔnaanɔ jɔɔmɔ lɛ mli fee faŋŋ. Wɔna akɛ Abraham kpaŋmɔ lɛ kɛ enine tsɔɔ maŋtsɛyeli ko ni baaba yɛ Abraham heloo naa seshibii diɛŋtsɛ lɛ ateŋ. (1 Mose 17:6) Mla kpaŋmɔ lɛ hu miikpa maŋtsɛmɛi agbɛ kɛmiijɛ Nyɔŋmɔ webii ateŋ, ejaakɛ Mose kɛɛ Israelbii lɛ akɛ: “Kɛji oyashɛ shikpɔŋ ni Yehowa, o-Nyɔŋmɔ lɛ, ŋɔhaao lɛ nɔ, ni oŋɔ akɛ onɔ, ni ohe shi yɛ jɛi, ni okɛɛ akɛ: Mawo maŋtsɛ maha mihe, tamɔ jeŋmaji fɛɛ ni ebɔle mi lɛ; mɔ ni Yehowa, o-Nyɔŋmɔ lɛ, aaahala lɛ, lɛ nɔŋŋ oŋɔto maŋtsɛ. . . Kaaŋɔ mɔkpɔŋ ko ni jeee onyɛmi lɛ oto onɔ maŋtsɛ.” (5 Mose 17:14, 15) Mɛɛ gbɛ nɔ Nyɔŋmɔ aaatsɔ ato maŋtsɛyeli ni tamɔ nɛkɛ he gbɛjianɔ, ni te ebaakɔ Abraham kpaŋmɔ lɛ he eha tɛŋŋ?
20. Te fee tɛŋŋ ni David kɛ ewekukpaa lɛ baje sane nɛɛ mli lɛ?
20 Eyɛ mli akɛ klɛŋklɛŋ Israel maŋtsɛ ji Saul ni jɛ Benyamin akutso lɛ mli lɛ moŋ, shi mɔ ni baye esɛɛ ji David anɔkwafo ni yɔɔ ekaa ni jɛ Yuda lɛ. (1 Samuel 8:5; 9: 1, 2; 10:1; 16:1, 13) Beni David eye maŋtsɛ yɛ be saŋŋ mli lɛ, Yehowa hala akɛ ekɛ David aaafee kpaŋmɔ. Klɛŋklɛŋ lɛ ekɛɛ: “Matee oseshinyo ni jɛ omusuŋ shi yɛ osɛɛ, maha emaŋtsɛyeli lɛ adamɔ shi shiŋŋ. Lɛ eeema tsu eha migbɛi lɛ, ni maha emaŋtsɛyeli sɛi lɛ ama shi shiŋŋ kɛya naanɔ.”(2 Samuel 7:12, 13) Taakɛ atsɔɔ mli yɛ jɛmɛ lɛ, David bi Salomo bafee maŋtsɛ yɛ esɛɛ, ni lɛ ji mɔ ni akɛ lɛ tsu nii ni ema shia loo sɔlemɔ tsu eha Nyɔŋmɔ yɛ Yerusalem. Ni kɛlɛ, babaoo fata he.
21. David Maŋtsɛyeli kpaŋmɔ lɛ to gbɛjianɔ kɛha mɛni?
21 Yehowa tee nɔ ekɛ David fee kpaŋmɔ nɛɛ: “Shi owe kɛ omaŋtsɛyeli lɛ aaadamɔ shi shiŋŋ yɛ ohiɛ kɛaatee naanɔ: Omaŋtsɛsɛi lɛ aaama shi shiŋŋ kɛaatee naanɔ!” (2 Samuel 7:16) Nyɔŋmɔ kɛ enɛ miito maŋtsɛmɛi awekukpaa ko aha Israel yɛ David weku lɛ mli yɛ faŋŋ mli. Ejeee David weku lɛ mli maŋtsɛmɛi ni baaye nɔ kɛtsara nɔ kɛkɛ. Yɛ naagbee lɛ, mɔ ko baajɛ David wekukpaa lɛ mli aba ni baaye nɔ ni “seshi lɛ aaahi shi daa, ni emaŋtsɛsɛi lɛ hu aaatamɔ hulu yɛ [Nyɔŋmɔ] mihiɛ.”—Lala 89:21, 30, 35-37; Yesaia 55:3, 4.
22. Kpaŋmɔ ni akɛ David fee lɛ kɔɔ Seshi lɛ wekukpaa lɛ he yɛ mɛɛ gbɛ nɔ, ni mɛni jɛ mli ba?
22 Belɛ eka shi faŋŋ akɛ David kpaŋmɔ lɛ haa Seshi lɛ wekukpaa lɛ jeɔ kpo faŋŋ. Klɛŋklɛŋ afii oha lɛ mli Yudafoi lɛ po yɔse akɛ esa akɛ Mesia lɛ afee David seshinyo. (Yohane 7:41, 42) Yesu Kristo, Abraham kpaŋmɔ lɛ seshi lɛ fa titri lɛ, bafee mɔ ni sa akɛ efeɔ nɛkɛ David Maŋtsɛyeli nɛɛ naanɔ Niyelɔ, taakɛ ŋwɛibɔfo lɛ ye he odase lɛ. (Luka 1:31-33) No hewɔ lɛ Yesu na hegbɛ lɛ akɛ eeefee mɔ ni baaye Shiwoo Shikpɔŋ lɛ nɔ, David shikpɔŋ nɔ nɔyeli he lɛ. Esa akɛ enɛ aha hekɛnɔfɔɔ ni wɔyɔɔ yɛ Yesu mli lɛ afa; eyeɔ maŋtsɛ, jeee kɛtsɔ nɔyeli shɔmɔ ni mla eŋmɛɛɛ gbɛ lɛ nɔ, shi moŋ kɛtsɔ mlanaa gbɛjianɔtoo ni ato ama shi, ŋwɛi kpaŋmɔ nɔ.
23. Mɛɛ sanebimɔi kɛ saji yɔɔ lolo ni esa akɛ ana naa?
23 Wɔsusu ŋwɛi kpaŋmɔi ejwɛ ni kɔɔ gbɛ ni Nyɔŋmɔ tsɔ nɔ eto gbɛjianɔ koni etsu eyiŋtoo he nii ni ekɛ naanɔ jɔɔmɔi abaha adesai lɛ he. Eka shi faŋŋ akɛ Obaana akɛ mfoniri lɛ yeko emuu. Sanebimɔi yɛ lolo: Akɛni adesai etee nɔ amɛfee mɛi ni yeee emuu hewɔ lɛ, mɛɛ osɔfo loo afɔleshaa baanyɛ atsake enɛ kwraa kɛya naanɔ? Te adesai aaafee tɛŋŋ ni amɛfee mɛi ni sa akɛ amɛbafeɔ Abraham seshibii lɛ fa? Ani nɔ ko yɛ ni wɔɔdamɔ nɔ wɔhe wɔye akɛ hegbɛ ni akɛyeɔ nɔ lɛ mli baakpa ni eteke shikpɔŋ nɔ shikpɔŋkuku ko kɛkɛ? Te aaafee tɛŋŋ ni Abraham seshi lɛ, shishijee nɔ lɛ, kɛ fa ni ji enyɔ lɛ, aaanyɛ ni amɛkɛ jɔɔmɔi abaha “shikpɔŋ lɛ nɔ jeŋmaji fɛɛ,” ni wɔteŋ mɔ fɛɛ mɔ fata he lɛ? Nyɛhaa wɔkwɛa.
[Shishigbɛ niŋmai]
a Enɛ ji mɔ kome kpaŋmɔ, ejaakɛ fa kome (Nyɔŋmɔ) ji mɔ ni sɔ ka enɔ akɛ etsu emli saji lɛ ahe nii.
b “Kpaŋmɔ he jwɛŋmɔ ni ahiɛ lɛ ji Israel jamɔ lɛ mli nɔ krɛdɛɛ ko, ekome pɛ ni biɔ anɔkwayeli fɛɛ ni eŋmɛɛɛ gbɛ ni aye mɛi enyɔ loo mɛi babaoo anɔkwale taakɛ aŋmɛɔ gbɛ yɛ jamɔi krokomɛi amli lɛ.”—Theological Dictionary of the Old Testament, Kpo II, baafa 278.
Mɛni Ji Ohetoo?
◻ Abraham kpaŋmɔ lɛ kɛ shishitoo kɛha naanɔ jɔɔmɔi ni wɔnine aaashɛ nɔ lɛ ha yɛ mɛɛ gbɛ nɔ
◻ Mɛni ji Abraham hetoo naa seshi lɛ? Okadi seshi lɛ?
◻ Mɛni hewɔ mla kpaŋmɔ lɛ fata Abraham kpaŋmɔ lɛ he lɛ?
◻ David Maŋtsɛyeli kpaŋmɔ lɛ ha Nyɔŋmɔ yiŋtoo shwere loo etee hiɛ yɛ mɛɛ gbɛ nɔ?
[Nitɛŋmɔ ni akɛmiitsɔɔ nɔ ko mli ni yɔɔ baafa 13]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Eden kpaŋmɔ 1 Mose 3:15
Abraham kpaŋmɔ
Seshi lɛ mli klɛŋklɛŋ mɔ
Seshi lɛ fa ni ji enyɔ
Naanɔ Jɔɔmɔi
[Nitɛŋmɔ ni akɛmiitsɔɔ nɔ ko mli ni yɔɔ baafa 14]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Eden kpaŋmɔ 1 Mose 3:15
Abraham kpaŋmɔ
Mla kpaŋmɔ
David Maŋtsɛyeli kpaŋmɔ
Seshi lɛ mli klɛŋklɛŋ mɔ
Seshi lɛ fa ni ji enyɔ
Naanɔ jɔɔmɔi
[Mfoniri ni yɔɔ baafa 10]
Bɔni afee ni atsu eyiŋtoo yɛ adesai ahe lɛ he nii Iɛ, Nyɔŋmɔ kɛ onɔkwafo Abraham fee kpaŋmɔ