Ha Ana Oshweremɔ lɛ Faŋŋ
“Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ lɛ faŋŋ.”—1 TIMOTEO 4:15.
1. Te ooofee tɛŋŋ okɛɛ akɛ aduawa ko etsu ni esa akɛ aye lɛ?
FEEMƆ aduawa ni osumɔɔ lɛ he mfoniri yɛ ojwɛŋmɔ mli okwɛ—akpakpa, pɛya, maŋo, loo nɔ kroko. Ani obaanyɛ otsɔɔ be ni etsu ni esa akɛ aye? Ekã shi faŋŋ akɛ hɛɛ. Eŋmá, esu, kɛ bɔ ni ehe ejɔ eha lɛ fɛɛ tsɔɔ akɛ obaaye nɔ ko ni ŋɔɔ diɛŋtsɛ. Kɛ́ okɛ fioo ko wo odaaŋ lɛ, ekolɛ obaamu waa kɛ miishɛɛ. Mɛɛ aduawa bɔdɔɔ po nɛ! Mɛɛ ŋɔɔmɔ po nɛ! Ehaa onyaa kɛ miishɛɛ babaoo diɛŋtsɛ.
2. Mɛɛ gbɛ nɔ mumɔŋ dalɛ jieɔ ehe kpo yɛ, ni te enáa mɔ ko kɛ mɛi krokomɛi ateŋ wekukpaa nɔ hewalɛ tɛŋŋ?
2 Niiashikpamɔ ni yɔɔ mlɛo shi eŋɔɔ nɛɛ baa yɛ shihilɛ mli hei krokomɛi nakai nɔŋŋ. Nɔ kome ji akɛ, bɔ ni anyɛɔ anaa aduawa ni etsu lɛ, nakai nɔŋŋ anyɛɔ anaa mumɔŋ dalɛ yɛ mɔ ko mli yɛ gbɛ̀i srɔtoi anɔ. Wɔtsɔɔ sɛɛyoomɔ, shishinumɔ, nilee kɛ ekrokomɛi ni fata he lɛ nɔ wɔyɔseɔ mumɔŋ dalɛ yɛ mɔ ko he. (Hiob 32:7-9) Ekã shi faŋŋ akɛ eyɛ miishɛɛ akɛ akɛ mɛi ni jieɔ nakai sui lɛ akpo yɛ amɛsubaŋi kɛ nifeemɔi amli lɛ aaabɔ ni akɛ amɛ atsu nii.—Abɛi 13:20.
3. Nɔ ni Yesu tsɔɔ yɛ gbɔmɛi ni yɔɔ egbii lɛ amli lɛ he lɛ jieɔ mɛni kpo yɛ dalɛ he?
3 Yɛ gbɛ kroko nɔ lɛ, mɔ ko baanyɛ ada yɛ gbɔmɔtsoŋ, shi bɔ ni ewieɔ ni efeɔ enii ehaa lɛ baatsɔɔ akɛ edako yɛ henumɔŋ kɛ mumɔŋ. Ákɛ nɔkwɛmɔnɔ lɛ, beni Yesu Kristo wieɔ egbii lɛ mli yinɔ ni egba afã lɛ he lɛ, ekɛɛ akɛ: “Yohane ba, ní eyeee nii ni esaa enuuu nɔ ko lɛ, amɛkɛɛ akɛ: Daimonio yɛ emli. Gbɔmɔbi lɛ ba, ni eyeɔ nii ni esaa enuɔ nɔ ko lɛ, amɛkɛɛ akɛ: Naa, nuu fulɔ kɛ daanulɔ.” Eyɛ mli akɛ gbɔmɛi nɛɛ edara yɛ gbɔmɔtsoŋ moŋ, shi Yesu kɛɛ akɛ amɛfee amɛnii tamɔ “gbekɛbii”—ni amɛdarako tsɔ̃. No hewɔ lɛ, ekɛfata he akɛ: ‘Abu nilee jalɔ kɛtsɔ enitsumɔi anɔ.’—Mateo 11:16-19.
4. Mɛɛ gbɛ̀i anɔ shweremɔ kɛ mumɔŋ dalɛ jeɔ kpo yɛ?
4 Kɛtsɔ Yesu wiemɔi lɛ anɔ lɛ, wɔbaanyɛ wɔna akɛ nɔ ni baaha wɔna akɛ mɔ ko yɛ nilee diɛŋtsɛ—ni ji mumɔŋ dalɛ kadimɔ nii ni anaa faŋŋ lɛ—ji nibii ni etsuɔ kɛ nɔ ni jɛɔ mli kɛbaa. Yɛ enɛ gbɛfaŋ lɛ, kadimɔ ŋaawoo ni bɔfo Paulo kɛha Timoteo lɛ. Beni Paulo etsĩ nibii ni esa akɛ Timoteo atiu sɛɛ lɛ tã lɛ, ekɛɛ akɛ: “Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ lɛ faŋŋ.” (1 Timoteo 4:15) Hɛɛ, shweremɔ ni Kristofonyo náa ni ekɛyaa ehiɛ lɛ ‘jeɔ kpo’ loo anyɛɔ anaa lɛ faŋŋ. Taakɛ kane ji lɛ, Kristofoi adalɛ lɛ jeee nɔ ko ni anaaa loo su ko ni etee. (Mateo 5:14-16) No hewɔ lɛ, wɔbaasusu gbɛ̀i titrii enyɔ ni wɔshweremɔ kɛ mumɔŋ dalɛ lɛ baanyɛ aje kpo yɛ mli lɛ he: (1) ní wɔɔya hiɛ yɛ nilee, sane shishinumɔ, kɛ ŋaalee mli; (2) ní wɔɔwo mumɔ lɛ yibii lɛ.
Ekomefeemɔ yɛ Hemɔkɛyeli kɛ Nilee Mli
5. Te abaanyɛ atsɔɔ dalɛ mli aha tɛŋŋ?
5 Wiemɔi komekomei ashishitsɔɔmɔ woji pii tsɔɔ dalɛ mli akɛ nɔ ko ni eda kwraa, mɔ ko ni eda egbe naa, nɔ ko ni etee hiɛ kɛyashɛ he ni ataoɔ. Taakɛ wɔwie aduawa he kɛtsɔ hiɛ lɛ, kɛ́ esa egbe naa ni esu, eŋmá kɛ eŋɔɔmɔ shɛ he ni asusuɔ akɛ ehi lɛ, wɔkɛɔ akɛ esa, loo etsu. No hewɔ lɛ, dalɛ kɛ salɛ, kɛ emuuyeli po nyiɛ.—Yesaia 18:5; Mateo 5:45-48; Yakobo 1:4.
6, 7. (a) Mɛni tsɔɔ akɛ Yehowa yɛ he miishɛɛ waa akɛ eeeha ejálɔi lɛ ashɛ mumɔŋ dalɛ he? (b) Mɛɛ mumɔŋ dalɛ ekɛ yɔɔ tsakpaa gbagbalii?
6 Yehowa Nyɔŋmɔ yɛ he miishɛɛ waa akɛ ejálɔi fɛɛ baaya amɛhiɛ kɛshɛ mumɔŋ dalɛ mli. Ekɛ nikeenii ni yɔɔ naakpɛɛ eha yɛ Kristofoi asafo lɛ mli bɔni afee ni wɔshɛ enɛ he. Bɔfo Paulo ŋma kɛyaha Kristofoi ni yɔɔ Efeso lɛ akɛ: “Lɛ nɔŋŋ eha mɛi komɛi tsɔmɔ bɔfoi, ni mɛi komɛi gbalɔi, mɛi komɛi hu sanekpakpa jajelɔi, ni mɛi komɛi hu nɔkwɛlɔi kɛ tsɔɔlɔi, koni aŋɔsaa hetselɔi lɛ aha sɔɔmɔ nitsumɔ lɛ, kɛ Kristo gbɔmɔtso lɛ tswaa; kɛyashi beyinɔ ni wɔ fɛɛ wɔɔshɛ Nyɔŋmɔ bi lɛ nɔ hemɔkɛyeli kɛ ehe nilee ekomefeemɔ lɛ he ni wɔfee nuu ni eye emuu yɛ Kristo dalɛ muu lɛ susumɔ naa; koni wɔkakã he wɔfee abifabii ni tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ amɛ, ni ekpalaa amɛ kɛyaa kɛbaa yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa.”—Efesobii 4:11-14.
7 Yɛ nɛkɛ kukuji nɛɛ amli lɛ, Paulo tsɔɔ mli akɛ yiŋtoi ahewɔ ni Nyɔŋmɔ to nakai mumɔŋ gbɛjianɔ babaoo lɛ ekomɛi ji bɔni afee ni mɔ fɛɛ mɔ ‘afee ekome yɛ hemɔkɛyeli kɛ anɔkwa nilee mli,’ afee “nuu ni eye emuu,” ni aye ‘emuu yɛ Kristo mli.’ Ja enɛ pɛ dani wɔfeŋ abifabii ni apasa susumɔi kɛ tsɔɔmɔi hosoɔ amɛ kɛyaa kɛbaa. No hewɔ lɛ, wɔnaa wekukpaa ni kã hiɛ ni wɔyaa kɛshɛɔ Kristofoi adalɛ mli kɛ shɛ ni “wɔɔshɛ Nyɔŋmɔ bi lɛ nɔ hemɔkɛyeli kɛ ehe nilee ekomefeemɔ lɛ he” lɛ teŋ. Saji otii babaoo yɛ Paulo ŋaawoo lɛ mli ni esa akɛ wɔbo toi jogbaŋŋ.
8. Mɛni “ekomefeemɔ” yɛ hemɔkɛyeli kɛ anɔkwa nilee mli lɛ biɔ?
8 Klɛŋklɛŋ lɛ, akɛni esa akɛ wɔhiɛ “ekomefeemɔ” mli hewɔ lɛ, esa akɛ Kristofonyo ni eda yɛ mumɔŋ lɛ kɛ nanemɛi heyelilɔi afee ekome kɛmɔ shi yɛ hemɔkɛyeli kɛ nilee mli. Yɛ nɔ ni kɔɔ Biblia mli shishinumɔ he lɛ, efiii lɛ diɛŋtsɛ esusumɔi asɛɛ loo ehiɛɛɛ lɛ diɛŋtsɛ ejwɛŋmɔ ni mli wa mli. Shi moŋ, enáa anɔkwale lɛ, ní Yehowa Nyɔŋmɔ tsɔ e-Bi, Yesu Kristo, kɛ “tsulɔ anɔkwafo kɛ nilelɔ” lɛ nɔ ekɛha lɛ mli hekɛnɔfɔɔ. Kɛ́ wɔye mumɔŋ niyenii ni akɛha yɛ “be ni sa nɔ”—kɛtsɔ Kristofoi awoji, asafoŋ kpeei, kpeei bibii kɛ kpeei wuji—anɔ be fɛɛ be lɛ, no lɛ wɔbaanyɛ wɔná hekɛnɔfɔɔ akɛ wɔkɛ wɔnanemɛi Kristofoi baahiɛ hemɔkɛyeli kɛ nilee lɛ mli yɛ “ekomefeemɔ” mli.—Mateo 24:45.
9. Tsɔɔmɔ wiemɔ, ni ji “hemɔkɛyeli lɛ” ní Paulo kɛtsu nii yɛ ewolo ni eŋma kɛyaha Efesobii lɛ mli lɛ shishi.
9 Nɔ ni ji enyɔ lɛ, wiemɔ “hemɔkɛyeli lɛ” etsɔɔɔ nɔ ni Kristofoi aŋkroaŋkroi komɛi heɔ amɛyeɔ, shi moŋ wɔhemɔkɛyeli lɛ fɛɛ, ‘elɛɛmɔ kɛ kɛlɛ kɛ mlikwɔlɛ kɛ nɔkwɔlɛ lɛ.’ (Efesobii 3:18; 4:5; Kolosebii 1:23; 2:7) Yɛ anɔkwale mli lɛ, kɛ́ “hemɔkɛyeli lɛ” fã ko pɛ ji nɔ ni Kristofonyo ko heɔ eyeɔ lɛ, te eeefee tɛŋŋ ekɛ enanemɛi heyelilɔi lɛ afee ekome? Enɛ tsɔɔ akɛ esaaa akɛ wɔhaa Biblia lɛ shishijee tsɔɔmɔi ni wɔɔle loo wɔɔná anɔkwale lɛ henilee bibioo pɛ lɛ faa ehaa wɔ. Yɛ no najiaŋ lɛ, esa akɛ wɔná miishɛɛ akɛ wɔkɛ Yehowa gbɛjianɔtoo lɛ fɛɛ ni etsɔ egbɛjianɔtoo lɛ nɔ ekɛha wɔ lɛ baatsu nii jogbaŋŋ kɛmɔ shi ni wɔkɛtao e-Wiemɔ lɛ mli vii. Esa akɛ wɔbɔ mɔdɛŋ ni wɔná Nyɔŋmɔ suɔmɔnaa nii kɛ eyiŋtoo lɛ he anɔkwale nilee kɛ shishinumɔ ni yeɔ emuu bɔ ni wɔɔnyɛ. Nɔ ni fata enɛ he ji be ni wɔbaahe koni wɔkane Biblia lɛ kɛ Biblia kasemɔ woji lɛ ní wɔkase, ni wɔsɔle wɔbi Nyɔŋmɔ yelikɛbuamɔ kɛ gbɛtsɔɔmɔ, ni wɔya Kristofoi akpeei be fɛɛ be, ni wɔkɛ wɔhe awo Maŋtsɛyeli shiɛmɔ lɛ kɛ kaselɔ-feemɔ nitsumɔ lɛ mli jogbaŋŋ kɛmɔ shi.—Abɛi 2:1-5.
10. Mɛni wiemɔ “kɛyashi beyinɔ ni wɔ fɛɛ wɔɔshɛ” taakɛ akɛtsu nii yɛ Efesobii 4:13 lɛ tsɔɔ?
10 Nɔ ni ji etɛ lɛ, Paulo kɛ wiemɔ “kɛyashi beyinɔ ni wɔ fɛɛ wɔɔshɛ” lɛ ye otii titrii etɛ lɛ he sane ni ewie he lɛ hiɛ. Yɛ nɔ ni kɔɔ wiemɔ “wɔ fɛɛ” lɛ he lɛ, Biblia mlipɛimɔ he wolo ko tsɔɔ shishi akɛ “jeee wɔ fɛɛ akɛ aŋkroaŋkroi, shi wɔ fɛɛ akɛ kuu.” Yɛ gbɛ kroko nɔ lɛ, esa akɛ wɔteŋ mɔ fɛɛ mɔ abɔ mɔdɛŋ bɔ ni eeenyɛ akɛ ekɛ nyɛmifeemɔ kuu lɛ fɛɛ baashɛ oti ni ma Kristofoi ahiɛ lɛ he. The Interpreter’s Bible lɛ wie akɛ: “Aŋkroaŋkroi pɛ nyɛŋ atse amɛhe ni amɛshɛ mumɔŋ emuuyeli he, taakɛ bɔ ni gbɔmɔtso lɛ fã kome pɛ nyɛŋ ada agbe naa akɛ ja gbɔmɔtso muu lɛ eda yɛ gbɛ ni sa nɔ lɛ.” Paulo kai Efesobii Kristofoi lɛ akɛ esa akɛ ‘amɛkɛ hetselɔi lɛ fɛɛ’ abɔ mɔdɛŋ ni amɛnu hemɔkɛyeli lɛ shishi kwraa kɛmɔ shi.—Efesobii 3:18a.
11. (a) Mɛni mumɔŋ hiɛyaa ni aaaná lɛ etsɔɔɔ? (b) Mɛni ehe hiaa ni wɔfee koni wɔya wɔhiɛ?
11 Paulo wiemɔi lɛ haa efeɔ faŋŋ akɛ mumɔŋ dalɛ ní aaaná lɛ etsɔɔɔ akɛ wɔkɛ nilee kɛ woloŋlee baawo wɔjwɛŋmɔi amli obɔbɔ kɛkɛ. Kristofonyo ni eda yɛ mumɔŋ lɛ jeee mɔ ni kɛ enilee haa mɛi krokomɛi anaa kpɛɔ amɛhe. Yɛ no najiaŋ lɛ, Biblia lɛ kɛɔ akɛ: “Jalɔi atempɔŋ lɛ tamɔ la ni kpɛɔ ni eyaa nɔ ekpɛɔ aahu kɛyashiɔ shwane fintiŋŋ.” (Abɛi 4:18) Hɛɛ, ‘tempɔŋ’ lɛ ji nɔ ni yaa nɔ “ekpɛɔ aahu” lɛ, shi jeee gbɔmɔ lɛ. Kɛ́ wɔbɔ mɔdɛŋ wɔtee nɔ wɔhiɛ Nyɔŋmɔ Wiemɔ lɛ mli shishinumɔ ni yaa nɔ ekpɛɔ ní Yehowa kɛhaa ewebii lɛ mli lɛ, belɛ, wɔmiiná mumɔŋ nɔyaa. Yɛ enɛ mli lɛ, emli ni wɔɔhiɛ lɛ tsɔɔ wɔhiɛ ni wɔɔya, ni eji nɔ ko ni wɔ fɛɛ wɔbaanyɛ wɔfee.—Lala 97:11; 119:105.
Jiemɔ “Mumɔ lɛ Yibii” Akpo
12. Mɛni hewɔ mumɔ lɛ yibii akpojiemɔ he hiaa yɛ mumɔŋ hiɛyaa ni wɔtaoɔ lɛ mli lɛ?
12 Yɛ be mli ni “hemɔkɛyeli kɛ ehe nilee ekomefeemɔ” ni wɔshɛɔ he lɛ he hiaa lɛ, ehe miihia hu ni wɔjie Nyɔŋmɔ mumɔ lɛ yibii lɛ akpo yɛ wɔshihilɛ mli nɔ fɛɛ nɔ mli. Mɛni hewɔ? Ejaakɛ taakɛ wɔna lɛ, dalɛ jeee nɔ ko ni anyɛŋ ana loo teemɔŋ nɔ ko, shi moŋ eji sui ni anaa lɛ faŋŋ ní he baanyɛ aba sɛɛnamɔ kɛha mɛi krokomɛi ni etswa amɛ ema shi. Eji anɔkwale akɛ, mumɔŋ nɔyaa ni wɔtaoɔ ni wɔná lɛ jeee mɔdɛŋ ni wɔbɔɔ akɛ wɔbaaná su kpakpa ko kɛkɛ. Yɛ no najiaŋ lɛ, beni wɔdaa yɛ mumɔŋ ni wɔnyiɛɔ Nyɔŋmɔ mumɔ lɛ gbɛtsɔɔmɔ sɛɛ lɛ, tsakemɔ ko ni yɔɔ naakpɛɛ baaba wɔshihilɛ kɛ wɔnifeemɔi amli. Bɔfo Paulo kɛɛ akɛ: “Nyɛnyiɛa yɛ mumɔ naa, ni nyɛfeŋ heloo akɔnɔi lɛ anaa nii.”—Galatabii 5:16.
13. Mɛɛ tsakemɔ ji hiɛyaa he okadi ni yɔɔ faŋŋ?
13 Paulo tee nɔ etsĩ “heloo lɛ nitsumɔi lɛ” ní fa babaoo ni “jeɔ kpo” lɛ tã. Dani mɔ ko baanu Nyɔŋmɔ taomɔ nii lɛ ashishi lɛ, ekolɛ no mli lɛ ekɛ ehe ewo je lɛŋ gbɛ̀i lɛ amli ni ekɛ nibii ni Paulo tsĩ tã lɛ ekomɛi ewo emli obɔ: “gbalafitemɔ, ajwamaŋbɔɔ, muji nitsumɔ, nyenyeŋtswibɔɔ, wɔŋjamɔ, sũu, nyɛ̃ɛ, béi, awuŋayelii, mlilawooi, bolɔmɔi, atuatsemɔi, mligbalamɔi, hiɛkɔɔi, awuyelii, dãatɔɔi, shwɛmɔ fɔŋ kɛ nii ni tamɔ enɛɛmɛi.” (Galatabii 5:19-21) Shi beni mɔ lɛ náa mumɔŋ nɔyaa lɛ, eyeɔ “heloo lɛ nitsumɔi” ni asumɔɔɔ nɛɛ anɔ fiofio, ni ekɛ “mumɔ lɛ yibii” lɛ toɔ najiaŋ. Nɛkɛ tsakemɔ ni anaa faŋŋ nɛɛ yeɔ odase akɛ mɔ lɛ miiya ehiɛ kɛmiishɛ Kristofoi adalɛ he.—Galatabii 5:22.
14. Tsɔɔmɔ wiemɔi enyɔ nɛɛ, “heloo lɛ nitsumɔi lɛ” kɛ “mumɔ lɛ yibii” lɛ mli.
14 Esa akɛ wɔkadi wiemɔi enyɔ nɛɛ, “heloo lɛ nitsumɔi lɛ” kɛ “mumɔ lɛ yibii” lɛ. “Nitsumɔi” ji nɔ ni jɛɔ nɔ ni mɔ ko efee lɛ mli kɛbaa, mɔ ko nifeemɔ mli yibii. Yɛ gbɛ kroko nɔ lɛ, nibii ni Paulo tsĩ tã akɛ heloo lɛ nitsumɔ lɛ ji nibii ni mɔ ko jeɔ gbɛ efeɔ loo adesai aheloo ni egbee shi lɛ haa efeɔ. (Romabii 1:24, 28; 7:21-25) Yɛ gbɛ kroko nɔ lɛ, wiemɔ “mumɔ lɛ yibii” lɛ tsɔɔ akɛ sui ni atsĩ tã lɛ jɛɛɛ nɔ ni akɛɛ atsɛɔ lɛ subaŋ nɔyaa loo adesa su nɔyaa lɛ mli, shi moŋ ejɛ Nyɔŋmɔ mumɔ lɛ ni miitsu nii yɛ gbɔmɔ lɛ nɔ lɛ mli. Taakɛ bɔ ni tso ko baawo yibii kɛ́ akwɛ lɛ jogbaŋŋ lɛ, nakai nɔŋŋ mɔ ko baajie mumɔ lɛ yibii lɛ akpo kɛji mumɔ krɔŋkrɔŋ lɛ tsuɔ nii yɛ mɔ lɛ shihilɛ mli.—Lala 1:1-3.
15. Mɛni hewɔ ehe hiaa akɛ wɔsusu “mumɔ lɛ yibii” lɛ fɛɛ he lɛ?
15 Oti kroko ni sa akɛ wɔsusu he ji wiemɔ “yibii” ni Paulo kɛtsu nii ni ekɛtsɔɔ sui kpakpai ni etsĩ tã lɛ fɛɛ lɛ.a Mumɔ lɛ wooo yibii srɔtoi koni wɔhala emli nɔ ni wɔsumɔɔ. Sui kpakpai ní Paulo tsĩ tã—suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, kɛ hiɛshikamɔ—lɛ fɛɛ he miihia pɛpɛɛpɛ, ni fɛɛ feɔ ekome ni ehaa mɔ ko nyɛɔ enáa Kristofoi agbɔmɔtso hee lɛ. (Efesobii 4:24; Kolosebii 3:10) No hewɔ lɛ, yɛ be mli ni wɔbaanyɛ wɔna akɛ sui kpakpai nɛɛ ekomɛi yɛ faŋŋ yɛ wɔshihilɛ mli yɛ wɔsu kɛ susumɔi ahewɔ lɛ, ehe miihia ni wɔsusu nibii fɛɛ ni Paulo tsĩ tã lɛ he. Kɛ́ wɔfee nakai lɛ, wɔbaanyɛ wɔjie su ni tamɔ Kristo nɔ lɛ kpo babaoo kɛmɔ shi yɛ wɔshihilɛ mli.—1 Petro 2:12, 21.
16. Mɛni ji oti ni ma wɔhiɛ yɛ Kristofoi adalɛ ni wɔtiuɔ sɛɛ lɛ he, ni te wɔɔfee tɛŋŋ wɔnine anyɛ ashɛ nɔ?
16 Nikasemɔ ni he hiaa ni wɔbaanyɛ wɔkase yɛ Paulo sane lɛ mli ji akɛ beni wɔtiuɔ Kristofoi adalɛ sɛɛ lɛ, oti ni ma wɔhiɛ lɛ jeee ni wɔná nilee babaoo ni wɔnilee afa, loo ni wɔná sui ni baaha wɔhiŋmɛi agbele. Shi moŋ koni eha wɔná Nyɔŋmɔ mumɔ lɛ yɛ wɔshihilɛ mli. Kɛ́ Nyɔŋmɔ mumɔ lɛ ji nɔ ni kudɔɔ wɔsusumɔi kɛ nifeemɔi lɛ, no lɛ wɔmiida yɛ mumɔŋ ji no. Te wɔɔfee tɛŋŋ wɔnine ashɛ oti nɛɛ nɔ? Esa akɛ wɔgbele wɔtsui kɛ wɔjwɛŋmɔ mli koni Nyɔŋmɔ mumɔ lɛ atsu nii yɛ mli. Enɛ biɔ ni wɔya Kristofoi akpeei be fɛɛ be ni wɔkɛ wɔhe awo mli. Esa akɛ wɔkase Nyɔŋmɔ Wiemɔ lɛ daa ni wɔjwɛŋ nɔ, ni wɔha eshishitoo mlai lɛ akudɔ bɔni wɔkɛ mɛi krokomɛi yeɔ haa lɛ kɛ nihalamɔi kɛ yiŋkpɛi ni wɔfeɔ lɛ. Eka shi faŋŋ akɛ, kɛ́ wɔfee nakai lɛ wɔ hiɛyaa lɛ baaje kpo faŋŋ.
Yaa Ohiɛ ní Okɛwo Nyɔŋmɔ Hiɛ Nyam
17. Mɛɛ gbɛ nɔ hiɛyaa kɛ wɔŋwɛi Tsɛ lɛ hiɛnyamwoo yɔɔ tsakpaa yɛ?
17 Yɛ naagbee kwraa lɛ, wɔ hiɛyaa ni wɔɔha eje kpo faŋŋ lɛ kɛ anunyam kɛ yijiemɔ bahaa wɔŋwɛi Tsɛ, Yehowa, mɔ ni haa wɔnyɛɔ wɔnáa mumɔŋ dalɛ lɛ, shi jeee wɔ diɛŋtsɛ. Yɛ gbi gbɛkɛ dani abaagbe Yesu lɛ, ekɛɛ ekaselɔi lɛ akɛ: “Enɛ akɛwoɔ mitsɛ hiɛ nyam, kɛ́ nyɛwo yibii pii, ni nyɛtsɔmɔ mikaselɔi lɛ.” (Yohane 15:8) Kaselɔi lɛ kɛ mumɔ lɛ yibii lɛ kɛ Maŋtsɛyeli lɛ yibii ní amɛwo yɛ amɛshiɛmɔ nitsumɔ lɛ mli lɛ fɛɛ wo Yehowa hiɛ nyam.—Bɔfoi lɛ Asaji 11:4, 18; 13:48.
18. (a) Mɛɛ nikpamɔ ni yɔɔ miishɛɛ yaa nɔ ŋmɛnɛ? (b) Mɛɛ gbɛnaa nii nɛkɛ nikpamɔ nɛɛ kɛfɔ̃ɔ wɔnɔ?
18 Ŋmɛnɛ, Yehowa jɔɔmɔi yɛ ewebii anɔ yɛ be mli ni amɛkɛ amɛhe woɔ jeŋ fɛɛ mumɔŋ nikpamɔ nitsumɔ lɛ mli lɛ. Afii fioo ko ni ebaho lɛ, mɛi heei ni shɛɔ aaafee 300,000 jɔɔ amɛhe nɔ amɛhaa Yehowa ni amɛkɛ nu mli baptisimɔ feɔ amɛhenɔjɔɔmɔ lɛ he okadi daa afi. Enɛ haa wɔmii shɛɔ wɔhe, ni ŋwanejee ko bɛ he akɛ ehaa Yehowa hu tsui nyaa kɛ miishɛɛ. (Abɛi 27:11) Shi kɛlɛ, bɔni afee ni mɛi heei nɛɛ fɛɛ aya nɔ amɛfee miishɛjemɔ jɛɛhe kɛ yijiemɔ kɛha Yehowa lɛ, ehe miihia ni ‘amɛya nɔ amɛnyiɛ yɛ Kristo mli, ní amɛshishifãi amɔmɔ shi, ni amamɔ amɛ yɛ enɔ, ní amɛfĩ shi yɛ hemɔkɛyeli lɛ mli.’ (Kolosebii 2:6, 7) Enɛ kɛ gbɛnaa nii ni bɔ he enyɔ bahaa Nyɔŋmɔ webii lɛ. Yɛ gbɛ ko nɔ lɛ, kɛ́ oji mɔ ko ni abaptisi lɛ ehee lɛ, ani obaakpɛlɛ gbɛnaa nii nɛɛ nɔ ni obɔ mɔdɛŋ koni “mɛi fɛɛ ana oshweremɔ lɛ faŋŋ”? Yɛ gbɛ kroko nɔ lɛ, kɛ́ oba anɔkwale lɛ mli etsɛ fioo lɛ, ani obaakpɛlɛ gbɛnaa nii lɛ nɔ ni otsu mɛi heei lɛ amumɔŋ hilɛ-kɛhamɔ he nii? Yɛ fɛɛ mli lɛ, bɔ ni ehe ehia akɛ wɔya wɔhiɛ kɛyashɛ dalɛ mli lɛ yɛ faŋŋ.—Filipibii 3:16; Hebribii 6:1.
19. Mɛɛ hegbɛ kɛ jɔɔmɔi baanyɛ afee onɔ kɛ́ oha oshweremɔ lɛ fee faŋŋ lɛ?
19 Jɔɔmɔi ni yɔɔ naakpɛɛ yɛ kɛha mɛi fɛɛ ni tsuɔ nii waa koni amɛha amɛshweremɔ lɛ afee faŋŋ lɛ. Kaimɔ Paulo ekãawoo wiemɔi beni ewo Timoteo hewalɛ koni eya ehiɛ lɛ: “Ohiɛ ahi ohe nɔ kɛ tsɔɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.” (1 Timoteo 4:16) Yɛ be mli ni obɔɔ mɔdɛŋ koni oha oshweremɔ lɛ afee faŋŋ lɛ, bo hu obaanyɛ oná hegbɛ koni okɛ ohe awo Nyɔŋmɔ gbɛi lɛ hiɛnyamwoo mli ni oná ejɔɔmɔi lɛ amli ŋɔɔmɔ.
[Shishigbɛ niŋmaa]
a Wiemɔ ni ji “yibii” lɛ tsɔɔ kɛkɛ akɛ “aduawa” yɛ wiemɔ ni aŋma yɛ mli klɛŋklɛŋ lɛ mli.—Galatabii 5:22, Kingdom Interlinear Translation.
Ani Okaiɔ?
• Mɛɛ gbɛ̀i anɔ abaanyɛ aha mumɔŋ dalɛ afee faŋŋ yɛ?
• Mɛɛ nilee kɛ shishinumɔ jieɔ dalɛ kpo?
• Mɛɛ gbɛ nɔ “mumɔ lɛ yibii” lɛ kpojiemɔ tsɔɔ mumɔŋ shweremɔ yɛ?
• Mɛɛ gbɛnaa nii esa akɛ wɔkpɛlɛ nɔ yɛ be mli ni wɔyaa wɔhiɛ kɛshɛɔ dalɛ mli lɛ?
[Mfoniri ni yɔɔ baafa 13]
Wɔnyɛɔ wɔnaa nii ni etsu loo esa jogbaŋŋ
[Mfoniri ni yɔɔ baafa 15]
Wɔnáa mumɔŋ hiɛyaa kɛtsɔ anɔkwale lɛ ni ajie lɛ kpo ni wɔkɛtsuɔ nii lɛ nɔ
[Mfoniri ni yɔɔ baafa 17]
Sɔlemɔ yeɔ ebuaa wɔ ni wɔjieɔ “mumɔ lɛ yibii” lɛ akpo