“Ojie Otsɔɔ Abifabii”

Ani oosumɔ ni ole anɔkwale ni kɔɔ Nyɔŋmɔ he—mɔ ni eji, nɔ ni esumɔɔ kɛ nɔ ni ehiɔ loo enyɛɔ, kɛ nɔ ni esuɔmɔnaa nii ji? Yehowa Nyɔŋmɔ haa aleɔ anɔkwalei fɛɛ ni kɔɔ ehe lɛ yɛ e-Wiemɔ ni ji Biblia lɛ mli. Shi jeee mɔ fɛɛ mɔ kɛkɛ baanyɛ akane Biblia lɛ koni enu nakai anɔkwalei lɛ ashishi jogbaŋŋ. Mɛni hewɔ? Ejaakɛ eji hegbɛ akɛ mɔ baanu nakai mumɔŋ anɔkwalei lɛ ashishi; jeee mɔ fɛɛ mɔ nine shɛɔ nɔ. Nyɛhaa wɔkwɛa nɔ ni Yesu wie yɛ enɛ he.—Kanemɔ Mateo 11:25.

Nakai ŋmalɛ lɛ jeɔ shishi akɛ: “No be lɛ mli lɛ Yesu here nɔ ni ekɛɛ.” No hewɔ lɛ, ekolɛ nɔ ni Yesu yaawie lɛ kɔɔ shihilɛ ko ni ba etsɛko lɛ he. Etsɛko tsɔ ni Yesu kã Galilea maji etɛ ni eyafee naakpɛɛ nibii yɛ jɛmɛ lɛ amli bii lɛ ahiɛ akɛni amɛsumɔɔɔ ni amɛbafeɔ ekaselɔi lɛ hewɔ. (Mateo 11:20-24) Ekolɛ, obaashwie oyiŋ akɛ, ‘Te feɔ tɛŋŋ mɔ ko naa naakpɛɛ nibii ni Yesu fee lɛ, ni fɛɛ sɛɛ lɛ eheee anɔkwalei ni Yesu tsɔɔ lɛ eyeee koni enyiɛ esɛɛ?’ Akɛni gbɔmɛi lɛ atsuii ekpiliŋ hewɔ lɛ amɛsumɔɔɔ ni amɛbatsɔmɔɔ ekaselɔi.—Mateo 13:10-15.

Yesu le akɛ nibii enyɔ ahe miihia wɔ dani wɔbaanu Nyɔŋmɔ he anɔkwalei ni yɔɔ Biblia lɛ mli lɛ ashishi, nomɛi ji: Nyɔŋmɔ dɛŋ yelikɛbuamɔ kɛ tsui kpakpa. Yesu kɛɛ akɛ: “Miijie oyi, Ataa, ŋwɛi kɛ shikpɔŋ nuŋtsɔ, akɛ oŋɔ nii nɛɛ otee ŋaalɔi kɛ nilelɔi, ni ojie otsɔɔ abifabii.” Bɛ oona nɔ hewɔ ni akɛɔ akɛ kɛ́ mɔ ko nu mumɔŋ anɔkwalei ni yɔɔ Biblia lɛ mli lɛ ashishi lɛ, eji hegbɛ lɛ? Yehowa, ni ji “ŋwɛi kɛ shikpɔŋ nuŋtsɔ” lɛ, yɛ hegbɛ akɛ ejieɔ anɔkwale lɛ kpo etsɔɔ mɛi loo ekɛteɔ amɛ. Shi Nyɔŋmɔ kwɛɛɛ hiɛaŋ yɛ anɔkwale lɛ ni ejieɔ lɛ kpo etsɔɔ mɛi lɛ amli. Mɛni nɔ Nyɔŋmɔ damɔɔ ejieɔ Biblia mli anɔkwale lɛ kpo etsɔɔ mɛi komɛi, ni ekɛteɔ mɛi krokomɛi lɛ?

Yehowa duroɔ mɛi ni baa amɛhe shi lɛ, jeee henɔwolɔi. (Yakobo 4:6) Yehowa kɛ anɔkwale lɛ teɔ “ŋaalɔi kɛ nilelɔi”—je lɛŋ ŋaalɔi kɛ je lɛŋ nilelɔi ní yɛ amɛhe nɔ ni amɛwoɔ kɛ amɛhe ni amɛkɛfɔ̃ɔ amɛ diɛŋtsɛ amɛhe nɔ lɛ hewɔ lɛ, amɛnuuu he akɛ Nyɔŋmɔ yelikɛbuamɔ ko kwraa he miihia amɛ lɛ. (1 Korintobii 1:19-21) Shi Yehowa jieɔ anɔkwale lɛ shi etsɔɔ “abifabii”—mɛi ni kɛ tsui kpakpa baa eŋɔɔ, ní baa amɛhe shi tamɔ gbekɛbii lɛ. (Mateo 18:1-4; 1 Korintobii 1:26-28) Yesu, ni ji Nyɔŋmɔ Bi lɛ le mɛi ni baa amɛhe shi kɛ mɛi ni woɔ amɛhe nɔ lɛ fɛɛ. Jamɔŋ hiɛnyiɛlɔi kɛ woloŋlelɔi babaoo ni woɔ amɛhe nɔ lɛ eyanuuu Yesu sane lɛ shishi, shi wolɛi ni baa amɛhe shi lɛ nu shishi. (Mateo 4:18-22; 23:1-5; Bɔfoi lɛ Asaji 4:13) Nakai beaŋ nɔŋŋ lɛ, niiatsɛmɛi kɛ woloŋlelɔi komɛi ni jie heshibaa su diɛŋtsɛ kpo lɛ batsɔmɔ Yesu sɛɛnyiɛlɔi.—Luka 19:1, 2, 8; Bɔfoi lɛ Asaji 22:1-3.

Ha wɔba sane ni wɔbi kɛje shishi lɛ nɔ agbɛnɛ: Ani oosumɔ ni ole anɔkwale ni kɔɔ Nyɔŋmɔ he lɛ? Kɛ́ nakai ni lɛ, otsui baanyɔ omli akɛ obaale akɛ Nyɔŋmɔ edurooo mɛi ni buɔ amɛhe akɛ nilelɔi yɛ je lɛŋ lɛ. Nɔ ni tamɔɔɔ nakai lɛ, Yehowa duroɔ mɛi ni je lɛŋ nilelɔi lɛ ebuuu amɛ kwraa lɛ. Kɛ́ okɛ heshibaa kase Nyɔŋmɔ Wiemɔ lɛ, obaanyɛ ofata mɛi ni Yehowa duroɔ amɛ nikeenii ni nɔ bɛ, ni ji ehe anɔkwale lɛ shishinumɔ lɛ ahe. Kɛ́ onu anɔkwale nɛɛ shishi lɛ, omii baashɛ ohe waa yɛ shihilɛ mli amrɔ nɛɛ, ni onine baashɛ “wala diɛŋtsɛ lɛ,” ni ji wala ni sɛɛ efooo lɛ nɔ yɛ Nyɔŋmɔ jalɛ jeŋ hee ni ewo he shi ni etsɛŋ ni ebaaba lɛ mli.a—1 Timoteo 6:12, 19; 2 Petro 3:13.