Suɔmɔ Kɛ Bulɛ Ni Ooojie Kpo Otsɔɔ Akɛ Wu
“Sa akɛ nyɛ hu nyɛteŋ fɛɛ mɔ asumɔ lɛ diɛŋtsɛ eŋa nakai, tamɔ lɛ diɛŋtsɛ ehe.”—EFESOBII 5:33.
1, 2. (a) Gbalamlitsemɔ etsɔɔ naagba yɛ je lɛ mli ŋmɛnɛ kɛyashɛ nɛgbɛ? (b) Nɔ ni tamɔɔɔ enɛ lɛ, mɛɛ shihilɛ yɔɔ?
YƐ 1930 afii lɛ teŋ gbɛ lɛ, wolo tɛtrɛɛ ni ji Psychology Today lɛ bɔ amaniɛ akɛ: “Gbalashihilɛ mli hefatalɔi fe akpeiakpe kome kɛ amɛ miishɛɛ gbɛkpamɔi lɛ baa naagbee yɛ gbalamlitsemɔ mli daa afi [yɛ U.S. Amerika]; kɛ gbalashihilɛ ko etsɛ aahu yɛ U.S. Amerika lɛ, kɛ aja mli lɛ, eyeɔ afii 9.4. . . . Yɛ anɔkwale mli lɛ, eshɛɔ be ni etamɔ nɔ ni mɔ ko mɔ ko bɛ jɛmɛ ni yɔɔ miishɛɛ yɛ gbalashihilɛ mli.” (June 1985) Kɛ asusu onukpai kɛ agbɛnɛ gbekɛbii ahe lɛ, amɛfeɔ kɛ hooo lɛ gbɔmɛi 3,000,000 ni gbala ni afiteɔ lɛ saa amɛhe daa afi yɛ maŋ kome pɛ mli. Shi gbalamlitsemɔ ji jeŋ muu fɛɛ naagba, ni etsɔɔ akɛ suɔmɔ kɛ bulɛ bɛ gbalashihilɛ akpekpei abɔ mli.
2 Shi yɛ gbɛ kroko nɔ lɛ, “kuu kroko [ni] akuɔ hiɛ ashwieɔ amɛnɔ yɛ: gbalashihilɛ mli hefatalɔi ni bɔɔ mɔdɛŋ amɛhiɔ shi yɛ he kome, ni amɛŋmɛɛɛ nɔ ko nɔ ko kwraa gbɛ akɛ ja gbele diɛŋtsɛ ji nɔ ni gbalaa amɛmli lɛ.” (Psychology Today) No hewɔ lɛ, gbalashihilɛ mli hefatalɔi akpekpei abɔ hu yɛ ni bɔɔ mɔdɛŋ waa akɛ amɛaaha amɛ gbalashihilɛ lɛ ahi shi yɛ ekomefeemɔ mli.
3. Mɛɛ saji wɔbaanyɛ wɔbi wɔ diɛŋtsɛ wɔhe?
3 Te ogbalashihilɛ lɛ yɔɔ tɛŋŋ? Ani suɔmɔ henumɔ kɛ bulɛ ni mli wa yɛ wu kɛ ŋa teŋ? Ani suɔmɔ ni tamɔ nɛkɛ yɛ fɔlɔi lɛ kɛ bii ni yɔɔ oweku lɛ mli lɛ ateŋ? Aloo yɛ bei komɛi amli lɛ onaa ohe tamɔ mɔ ni nyiɛ mlilawoo kɛ yiŋ ni etɛ̃ɛɛ mɔ kpaa leleoo lɛ nɔ? Akɛni wɔteŋ mɔ ko mɔ ko yeee emuu hewɔ lɛ, shihilɛi ni mli wawai baanyɛ ate shi yɛ shia fɛɛ shia mli, yɛ he ni mɔ fɛɛ mɔ miibɔ mɔdɛŋ ni etsɔ Kristofonyo lɛ po, ejaakɛ “mɛi fɛɛ efee esha, ni Nyɔŋmɔ anunyam lɛ ebɔ amɛ.”—Romabii 3:23.
4. Mɛɛ gbɛ nɔ Paulo kɛ Petro fɛɛ tsɔɔ mɔ ni miishɛɛ weku lɛ damɔ enɔ titri?
4 Yɛ anɔkwale ni eji akɛ naagbai baanyɛ ate shi yɛ shia fɛɛ shia mli hewɔ lɛ, namɔ ji mɔ titri ni esa akɛ eha weku lɛ ahi shi yɛ toiŋjɔlɛ kɛ gbeekpamɔ gbɛ nɔ? Bɔfo Paulo kɛ bɔfo Petro kɛ hetoo lɛ haa yɛ ŋaawoo ni amɛkɛha tɛɛ ni anaa yɛ amɛwoji lɛ amli lɛ mli. Paulo ŋma akɛ: “Shi miisumɔ akɛ nyɛle akɛ nuu fɛɛ nuu yitso ji Kristo, ni yoo fɛɛ yoo yitso ji nuu, ni Kristo yitso ji Nyɔŋmɔ.” Ewie hu akɛ: “Nyɛbabaa nyɛhe shi nyɛhaa nyɛhe yɛ Kristo gbeyeishemɔ mli. Nyɛ yeigbayei lɛ, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, tamɔ bɔ ni nyɛfeɔ nyɛhaa Nuŋtsɔ lɛ, ejaakɛ wu lɛ ji ŋa lɛ yitso, taakɛ bɔ ni Kristo hu ji asafo lɛ yitso.” (1 Korintobii 11:3; Efesobii 5:21-23) Petro hu ŋma yɛ nakai shishinumɔ nɔŋŋ mli akɛ: “Nakai nɔŋŋ [yɛ Kristo sɛɛnyiɛmɔ mli lɛ], nyɛ yeigbayei lɛ hu, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ.”—1 Petro 2:21–3:1.
Kristo—Nɔkwɛmɔ nɔ ni Haa Hejɔlɛ
5, 6. Yesu Kristo ji nɔkwɛmɔ nɔ yɛ yitsoyeli kɛ nitsumɔ mli yɛ mɛɛ gbɛ nɔ?
5 Akɛ nɔ ni kɛ ŋaawoo ni atsɔ hiɛ atsi ta nɛɛ kpaa gbee lɛ, wu lɛ ji weku lɛ yitso yɛ Ŋmalɛ naa. Shi eji yitso yɛ mɛɛ shishinumɔ naa? Te esa akɛ atsu yitsoyeli lɛ he nii aha tɛŋŋ? Ewaŋ kɛhaŋ wumɛi komɛi akɛ amɛaabi ni akɛ bulɛ aha amɛ kɛtsɔ enɛ nɔ mi ni amɛaama akɛ ‘amɛ amɛji shia lɛ yitso, ni Biblia lɛ kɛɔ nakai lɛ nɔ. Shi kɛ akɛ enɛ to Kristo nɔkwɛmɔ nɔ lɛ he lɛ, te anaa tɛŋŋ? Ani Kristo kɛ henɔwomɔ bi ni esɛɛnyiɛlɔi lɛ kɛ bulɛ aha lɛ? Ani wɔbaanyɛ wɔna be ko ni ekɛ hepupuumɔ kɛɛ: “Namɔ ji Nyɔŋmɔ Bi lɛ yɛ biɛ? Esa akɛ nyɛkɛ bulɛ aha mi!” Nɔ ni tamɔɔɔ nakai lɛ, Yesu na bulɛ akɛ nɔ ni sa lɛ. Yɛ mɛɛ gbɛ nɔ? Kɛtsɔ enɔkwɛmɔ nɔ kpakpa yɛ jeŋba, wiemɔ kɛ bɔ ni ekɛ mɛi krokomɛi ye yɛ musuŋtsɔlɛ naa lɛ nɔ.—Marko 6:30-34.
6 No hewɔ lɛ nɔ ni haa anyɛɔ atsuɔ yitsoyeli lɛ he nii yɛ gbɛ ni sa nɔ akɛ wu kɛ tsɛ ji ni anyiɛ Yesu Kristo nɔkwɛmɔ nɔ lɛ sɛɛ. Eyɛ mli akɛ Yesu boteee gbalashihilɛ mli moŋ, shi gbɛ ni etsɔ nɔ ekɛ ekaselɔi lɛ ye ha lɛ ji nɔkwɛmɔ nɔ kpakpa kɛha wumɛi. Eka shi faŋŋ akɛ enɛ,kɛ kaa bahaa wu fɛɛ wu, ejaakɛ Yesu ji nɔkwɛmɔ nɔ kpakpa ni yeɔ emuu. (Hebribii 4:15; 12:1-3) Ni kɛlɛ, bɔ ni wu ko bɛŋkɛɔ Kristo nɔkwɛmɔ nɔ lɛ he ehaa lɛ, nakai nɔŋŋ hu suɔmɔ kɛ bulɛ ni ejieɔ lɛ kpo lɛ hu mli baakwɔ aha. No hewɔ lɛ, nyɛhaa wɔkwɛa nɔ gbɔmɔ ni Yesu ji lɛ jogbaŋŋ—Efesobii 5:25-29; 1 Petro 2: 21, 22.
7. Mɛni Yesu kɛha esɛɛnyiɛlɔi lɛ, ni enɛ jɛ mɛni mli?
7 Be ko lɛ Yesu kɛɛ asafo ko akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipa lɛ nyɛfoa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.” Agbɛnɛ, mɛni ji nɔ ni Yesu kɛha etoibolɔi lɛ? Mumɔŋ hejɔɔmɔi! Shi nɛgbɛ ji he ni hejɔɔmɔ nɛɛ baajɛ aba? Bianɛ tɔɔ nɛɛ ekɛɛ: “Asaŋ Tsɛ lɛ hu, mɔ ko mɔ ko leee lɛ, akɛ ja Bi lɛ, kɛ mɔ ni Bi lɛ sumɔɔ akɛ ejieɔ lɛ etsɔɔ lɛ.” Enɛ tsɔɔ akɛ Yesu kɛ mumɔŋ hejɔɔmɔ baaha kɛtsɔ jiemɔ ni eeejie e-Tsɛ lɛ kpo etsɔɔ enɔkwa sɛɛnyiɛlɔi lɛ nɔ. Shi Yesu wiemɔi lɛ hu tsɔɔ akɛ hejɔɔmɔ baaba kɛjɛ bɔ ni akɛlɛ aaabɔ lɛ mli, ejaakɛ ‘ehe jɔ ni ebaa ehe shi kɛjɛɔ etsui mli.’—Mateo 11:25-30.
Bɔ ni Wɔɔfee Wumɛi kɛ Tsɛmɛi ni kɛ Hejɔɔmɔ Haa
8. Mɛɛ gbɛi anɔ nɛkɛ esa akɛ wu kɛ tsɛ afee mɔ ni kɛ hejɔɔmɔ haa mɛi yɛ?
8 Yesu wiemɔi lɛ yeɔ ebuaa wɔ koni wɔna akɛ esa akɛ wu Kristofonyo lɛ kɛ hejɔɔmɔ aha eweku lɛ yɛ mumɔŋ kɛ heloo naa fɛɛ. Yɛ emlijɔlɛ nɔkwɛmɔ nɔ kɛ nitsɔɔmɔ hewɔ lɛ, esa akɛ efee mɔ ni yeɔ ebuaa eweku lɛ koni amɛbale ŋwɛi Tsɛ lɛ jogbaŋŋ. Esa akɛ ejeŋba ajie Nyɔŋmɔ Bi lɛ jwɛŋmɔ kɛ nifeemɔi akpo. (Yohane 15:8-10; 1 Korintobii 2:16) Eji hejɔɔmɔ kɛha mɛi fɛɛ ni yɔɔ weku lɛ mli lɛ akɛ amɛkɛ nuu ni tamɔ nɛkɛ aaabɔ ejaakɛ eji wu, tsɛ, kɛ naanyo ni sumɔɔ mɔ. Esa akɛ efee mɔ ni anyɛɔ abɛŋkɛɔ lɛ kɛ mɔ ni jeee mɔ ni bɛ deka tsɔ ni no hewɔ lɛ anyɛŋ abɛŋkɛ lɛ. Yɛ anɔkwale mli lɛ, esa akɛ ele bɔ ni aboɔ sane toi shi jeee ni anu sane kɛkɛ.—Yakobo 1:19.
9. Mɛɛ naagba saa asafo lɛ mli onukpai ahe yɛ bei komɛi amli?
9 Enɛ haa wɔkaiɔ naagba ko ni yɛ bei komɛi amli lɛ esaa asafoŋ onukpai kɛ amɛwekui ahe lɛ. Daa nɛɛ onukpa lɛ bɛ deka yɛ asafo lɛ mumɔŋ hiamɔ nii ahe nitsumɔ hewɔ. Esa akɛ eto okadi kpakpa yɛ Kristofoi akpeei ashishi, yɛ sɔɔmɔ nitsumɔ lɛ mli, kɛ kwɛmɔ nitsumɔ lɛ mli. (Hebribii 13:7, 17) Shi, onukpai komɛi kɛ amɛbe fɛɛ eha asafo lɛ yɛ enɛ feemɔ mli. Nɔ ni jɛɔ mli baa ji amɛkuɔ amɛhiɛ amɛshwieɔ amɛwekui anɔ, ni yɛ bei komɛi amli lɛ nɔ ni jɛɔ mli baa lɛ feɔ dɔlɛ sane. Yɛ sane lɛ ekome mli lɛ onukpa lɛ bafee mɔ ni bɛ deka kwraa bɔ ni eeena be ni ekɛ lɛ diɛŋtsɛ ebinuu akase nii. Eto gbɛjianɔ koni mɔ kroko afee enɛ!
10. Te onukpai lɛ aaafee tɛŋŋ amɛŋmɛ pɛpɛɛpɛ yɛ yitsoyeli he nii ni amɛtsuɔ yɛ asafo lɛ kɛ shia lɛ mli lɛ mli?
10 Nɛkɛ niiashikpamɔ nɛɛ maa mɛni nɔ mi? Bɔ ni ehe ehia akɛ nuu aŋmɛ pɛpɛɛpɛ yɛ asafoŋ nitsumɔi kɛ nɔ ni esa akɛ etsu eha eŋa kɛ eweku lɛ he lɛ mli. Akɛ nɔkwɛmɔ nɔ lɛ, kɛ akpa kpee lɛ, anaa ni onukpai lɛ bɛ deka kwraa kɛ saji ni mli wawai komɛi ahe susumɔ. Kɛ eeenyɛ eba lɛ nakai ni eeehi feemɔ lɛ, ani efeŋ hejɔɔmɔ akɛ onukpa ni tamɔ nɛkɛ aaato gbɛjianɔ koni mɔ ko kɛ eŋa kɛ ebii aya shia, fe ni eeeha amɛmɛ ŋmɛlɛtswai abɔ yɛ Maŋtsɛyeli Asa lɛ nɔ? Yɛ Biblia mli taomɔ nii kɛ gbeekpamɔ naa lɛ, abaanyɛ akɛɛ akɛ ‘kwɛmɔ nitsumɔ lɛ jeɔ shishi kɛjɛɔ shia.’ Kɛji akɛ onukpa ko ku ehiɛ eshwie eweku lɛ nɔ lɛ, ekɛ egbɛhe baawo oshara mli. No hewɔ lɛ, onukpai, nyɛsusua saji ahe ni nyɛjwɛŋa nyɛweku lɛ henumɔŋ, mumɔŋ kɛ hiamɔ nii krokomɛi anɔ.—1 Timoteo 3:4, 5; Tito 1:5, 6.
11, 12. Te Kristofonyo wu lɛ aaafee tɛŋŋ ni eweku lɛ aye abua lɛ, ni mɛɛ saji esa akɛ wu fɛɛ wu abi lɛ diɛŋtsɛ ehe?
11 Kristofonyo wu ni haa mɔ he jɔɔ lɛ lɛ hu efeŋ nɔyelɔ yiwalɔ, ni eeekpɛ eyiŋ ni ebiii eweku lɛ. Ekolɛ esa akɛ akpɛ yiŋ yɛ nitsumɔ tsakemɔ aloo he ni esa akɛ shia lɛ ayahi he aloo nɔ ko ni waaa tamɔ weku lɛ hiɛtserɛjiemɔ he. Akɛni ebaasa weku lɛ mli bii fɛɛ he hewɔ lɛ, ani efeŋ nɔ ni nilee yɔɔ mli kɛ mlihilɛ gbɛ hu akɛ aaabi amɛ fɛɛ? Amɛjwɛŋmɔ baaye abua lɛ koni ekpɛ eyiŋ yɛ gbɛ ni nilee kɛ mɔ he susumɔ yɔɔ mli nɔ. Kɛkɛ lɛ ebaafee mlɛo aha weku lɛ mli bii fɛɛ akɛ amɛaaye amɛbua lɛ.—Okɛto Abɛi 15:22 he.
12 Anaa kɛjɛɔ enɛ mli akɛ, eka shi faŋŋ akɛ Kristofonyo wu kɛ tsɛ lɛ jeee mɔ ni tsɔseɔ mɔ yɛ shia lɛ mli pɛ kɛkɛ. Esa akɛ efee mɔ ni kɛ hejɔɔmɔ haa hu. Wumɛi kɛ tsɛmɛi, ani nyɛtamɔ Kristo? Ani nyɛ ji hejɔɔmɔ kɛha nyɛwekui lɛ?—Efesobii 6:4; Kolosebii 3:21.
Shihilɛ yɛ Nilee Naa
13. Mɛɛ ŋaawoo kpakpa ko Petro kɛha wumɛi?
13 Taakɛ wɔyoo lɛ, Petro kɛ Paulo fɛɛ kɛ ŋaawoo kpakpai haa gbalashihilɛ mli hefatalɔi. Akɛni eji mɔ ni ebote gbalashihilɛ mli hewɔ lɛ, Petro na hegbɛi ni bɔ he enyɔ yɛ ŋaawoo lɛ mli—niiashikpamɔ kɛ mumɔ krɔŋkrɔŋ lɛ gbɛtsɔɔmɔ. (Mateo 8:14) Ekɛ ŋaawoo ni yaa tɛɛ ha wumɛi fɛɛ, akɛ: “Nakai nɔŋŋ kɛ̃ nyɛ wumɛi lɛ, nyɛkɛ amɛ ahia shi yɛ nilee naa, ni nyɛkɛ woo awoa yoo akɛ nɔ ni he waaa tuutu ko.” Kuku nɛɛ ni no hu afo lɛ kuku ni J. W. C. Wand tsɔɔ shishi lɛ kaneɔ nɛkɛ: “Esa akɛ wumɛi kɛ Kristofoi ashishitoo mlai kɛ nilee atsu wekukpaa ni ka amɛkɛ amɛŋamɛi ateŋ lɛ he nii nakai nɔŋŋ.”—1 Petro 3:7.
14. Mɛɛ sanebimɔi teɔ shi agbɛnɛ?
14 Agbɛnɛ, akɛ akɛ ŋa aaahi shi “yɛ nilee naa” loo “akɛ Kristofoi ashishitoo mlai kɛ nilee atsu . . . nii” lɛ tsɔɔ mɛni? Te wu aaafee tɛŋŋ ni ekɛ woo aaaha eŋa? Yɛ anɔkwale mli lɛ, te esa akɛ Kristofonyo wu lɛ anu Petro ŋaawoo nɛɛ shishi eha tɛŋŋ?
15. (a) Mɛni hewɔ gbalashihilɛi komɛi yeee omanye lɛ? (b) Mɛni ji kaa diɛŋtsɛ ni yɔɔ gbalashihilɛ mli lɛ?
15 Gbalashihilɛi pii damɔ gbɔmɔtsoŋ kɛ bɔlɛnamɔ mli nibii ni gbalaa mɔ lɛ anɔ kɛkɛ. Ni kɛlɛ, gbalashihilɛ ni sɛɛ tsɛɔ lɛ nyɛŋ afee nɔ ni damɔ hefɛo nɔ kɛkɛ, ejaakɛ nɛkɛ nibii nɛɛ sɛɛ etsɛɛɛ. Etsɛɛɛ ni yiteŋ waŋ kɛ hiɛkuamɔ ninaa mɛi ni amɛbote gbalashihilɛ mli afii babaoo lɛ. Shi kaimɔ akɛ gbalashihilɛ ji jwɛŋmɔi enyɔ ni afeɔ lɛ ekome, gbɔmɛi enyɔ ni afeɔ amɛ ekome, mɛi enyɔ ni jɛ shihilɛi sɔrɔtoi kɛ mumɔŋ taomɔ nii sɔrɔtoi enyɔ ni afee amɛ ekome mli, kɛ lilɛii enyɔ ni afeɔ lɛ ekome. Enɛ ji nɔ ko ni kaa mɔ waa diɛŋtsɛ! Ni kɛlɛ, enɛ ni aaanu shishi lɛ he miihia kɛha gbalashihilɛ ni miishɛɛ yɔɔ mli.—Abɛi 17:1; 21:9.
16. ‘Akɛ yoo ahi shi yɛ nilee naa’ lɛ kɔɔ mɛni he?
16 Kɛfata nibii krokomɛi ahe lɛ, kɛ Kristofonyo wu lɛ aaanyɛ ni ekɛ eŋa lɛ ahi shi “yɛ nilee naa” lɛ, belɛ no tsɔɔ akɛ esa akɛ enu eŋa lɛ hiamɔ nii ashishi diɛŋtsɛ. Enɛ jeee egbɔmɔtsoŋ hiamɔ nii kɛkɛ, shi nɔ ni he hiaa titri lɛ, ehenumɔŋ, jwɛŋmɔŋ kɛ mumɔŋ hiamɔ nii. Kɛ ekɛ ‘eŋa lɛ hi shi yɛ nilee naa’ lɛ, ebaanu nitsumɔ ni Nyɔŋmɔ kɛha lɛ lɛ shishi. Ebaatsɔɔ hu akɛ ekɛ bulɛ haa lɛ akɛ yoo. Enɛ yɛ sɔrɔto kwraa yɛ jwɛŋmɔ ni mɛi ni hi shi yɛ Petro gbii lɛ amli ni kɛɛ akɛ kɛ Nyɔŋmɔ yɛ jio ebɛ jio amɛleee lɛ hiɛ lɛ he, ejaakɛ yɛ amɛteŋ lɛ, “amɛgbeɔ yei ahe guɔ akɛ amɛbaa shi, heloo ko kɛkɛ, kɛ gbɔmɛi ni he tseee.” (The Anchore Bible) Ŋmɛnɛŋmɛnɛ beaŋ Spanish shishitsɔɔmɔ ko tsɔɔ Petro wiemɔi lɛ ashishi akɛ: “Yɛ wumɛi ahe lɛ: nyɛkɛ ŋaa atsua nii yɛ nyɛkɛ amɛ shihilɛ mli, ni nyɛsusua yoo lɛ he, ejaakɛ ebɔɔ su waaa kwraa.” (Nueva Biblia Española) Enɛ gbalaa jwɛŋmɔ kɛyaa sane oti ko ni yɛ bei komɛi amli lɛ wumɛi ahiɛ kpaa nɔ lɛ nɔ.
17. (a) Kɛfata nibii krokomɛi ahe lɛ, mɛni kɔɔ ‘mɔ ni he waaa tuutu ko’ lɛ “bɔɔ su m waaa” lɛ he?(b) Te wu lɛ aaafee tɛŋŋ ajie bulɛ kpo atsɔɔ eŋa lɛ?
17 Mɛni hewɔ ŋa lɛ “bɔɔ su waaa kwraa” lɛ? Kɛfata nibii krokomɛi ahe lɛ, yɛ enikee nii ni ji fɔmɔ hewɔ. Efɔmɔ shihilɛ haa eyaa tsui asɛɛ loo efeɔ yei anii daa nyɔŋ nɔ ni eshɛɔ bei pii ni enuɔ he akɛ ebɛ pɛpɛɛpɛ loo ebaje nɔnyɛɛ shishi. Kɛji akɛ wu lɛ susuuu enɛ he ni eeebi ni eŋa lɛ atsu esuɔmɔnaa nii ko he nii daa gbi yɛ nyɔŋ lɛ nɔ lɛ, no baatsɔɔ akɛ ekɛ woo haaa lɛ. No baatsɔɔ akɛ ekɛlɛ hiɔ shi yɛ pɛsɛmkunya kɛ nilee ni bɛ naa moŋ fe ni ekɛ lɛ aaahi shi yɛ nilee naa.—3 Mose 18:19; 1 Korintobii 7:5.
Woo Ni Akɛaaha Yoo Akɛ Nɔ Ni He Waaa Tuutu Ko
18. Mɛɛ subaŋ ko ni ejaaa hefatalɔi komɛi kɛ amɛhe woɔ mli? (b) Te esa akɛ wu ni ji Kristofonyo lɛ afee enii eha tɛŋŋ?
18 Gbɛ kroko ni wu lɛ baanyɛ ajie suɔmɔ kɛ bulɛ kpo aha eŋa lɛ ji kɛtsɔ hiɛsɔɔ ni eeejie kpo etsɔɔ lɛ kɛ esui. Wu ko baanyɛ ni ekɛfee esu akɛ eeewie wiemɔi ni gbeɔ eŋa lɛ he guɔ aloo eeeye ehe fɛo bɔ ni esaaa. Ekolɛ wu ni tamɔ nɛkɛ susuɔ akɛ enɛ yeɔ ebuaa ni anaa bulɛ ahaa lɛ. Shi yɛ anɔkwale mli lɛ, nɔ ni jɛɔ mli baa lɛ tamɔɔɔ nakai, ejaakɛ kɛji akɛ ehaa eŋa lɛ tsɔɔ tamɔ buulu yɛ be fɛɛ mli lɛ, sane ni eka shi faŋŋ ni abaabi ji akɛ: Mɛni hewɔ ekɛ yoo buulu ni tamɔ nɛkɛ yahi shi? Yɛ anɔkwale mli lɛ, ebaatamɔ akɛ wu ni bɛ shweshweeshwe lɛ pɛ kɛ ehe baawo nifeemɔi ni tamɔ nɛkɛ mli. Wu ni yɔɔ suɔmɔ lɛ buɔ eŋa.—Abɛi 12:18; 1 Korintobii 13:4-8.
19. Mɛni hewɔ efeŋ nɔ ni ja gbɛ akɛ wu aaagbe eŋa he guɔ lɛ?
19 Yɛ maji komɛi amli lɛ, nɔ ni hii fɔɔ feemɔ akɛ kusum nii ji ni amɛgbe amɛŋamɛi ahe guɔ akɛ hiɛshikamɔ loo heshibaa su ko. Akɛ nɔkwɛmɔ nɔ lɛ, wu ni ji Japannyo lɛ kɛ eŋa baatsɔɔ akɛ “Gusai,” ni eshishi ji ‘ŋa buulu loo kwashia.’ Yiŋtoo ni yɔɔ enɛ mli ji akɛ esa akɛ mɔ kroko lɛ kɛ yijiemɔ wiemɔ ko ni kɔɔ yoo lɛ he aha koni ekɛha shihilɛ lɛ aŋmɛ pɛpɛɛpɛ. Kɛ Kristofonyo wu ko kɛ eŋa tsɔɔ yɛ nɛkɛ gbɛ nɔ lɛ, belɛ ani ‘ekɛ woo’ miiha eŋa lɛ lɛlɛŋ taakɛ Petro wo ŋaa lɛ? Kɛ wɔkwɛ saji kɛjɛ gbɛ kroko nɔ lɛ, ani ekɛ mɔ ni eba ni ebaasara amɛ lɛ miiwie anɔkwale lɛlɛŋ? Ani eheɔ eyeɔ lɛlɛŋ akɛ eŋa lɛ buulu ni?—Efesobii 4:15, 25; 5:28, 29.
20. (a) Mɛɛ shihilɛ ni kɛ ehe kpaaa gbee baanyɛ ate oshi yɛ wu kɛ ŋa teŋ? (b) Te aaafee tɛŋŋ akwa enɛ.
20 Yɛ bei komɛi amli lɛ wu lɛ baajie suɔmɔ kɛ bulɛ ni ebɛ kpo kɛtsɔ ehiɛ ni aaakpa nɔ akɛ eŋa lɛ ji enyɛmiyoo akɛ Kristofonyo, ni jeee yɛ Maŋtsɛyeli Asa lɛ nɔ kɛkɛ, shi moŋ yɛ shia kɛ agbɛnɛ yɛ bei fɛɛ mli hu lɛ nɔ. Kwɛ bɔ ni ewaaa kwraa akɛ wu lɛ aaajie mlihilɛ kɛ bulɛ kpo yɛ asa lɛ nɔ kɛ mɔ ni ebuuu mɔ ni hiŋmɛi gbeleko ni efeɔ enii sakasaka yɛ shia! No hewɔ lɛ kwɛ bɔ ni Paulo ŋaawoo lɛ sa jogbaŋŋ ha! Eŋma akɛ: “No hewɔ lɛ agbɛnɛ nyɛhaa wɔtiua hejɔlɛ nibii kɛ nibii ni wɔkɛaaha wɔnanemɛi anane amɔ shi moŋ.” “Wɔteŋ mɔ fɛɛ mɔ asa enaanyo hiɛ, koni ahi aha lɛ ni enane amɔ shi.” (Romabii 14:19; 15:2) Hefatalɔ ko bɛ ni bɛŋkɛ fe wu loo ŋa.
21. Mɛni wumɛi baanyɛ afee ni amɛkɛwo amɛŋamɛi hewalɛ?
21 No hewɔ lɛ, Kristofonyo wu ni yɔɔ suɔmɔ lɛ baajie hiɛsɔɔ kpo atsɔɔ eŋa kɛtsɔ wiemɔi kɛ nifeemɔi anɔ. Taakɛ lalafolɔ ko ni haaa ale egbɛi lɛ tsɔɔ mli lɛ:
“Yɛ gbalashihilɛ mli naagbai anɔkwɛmɔ mli
Yɛ tɔlɛ kɛ nitsumɔ mli shihilɛi amli
Kɛ obuɔ oŋa akɛ ejara wa hao nakai lɛ—
Kɛɛmɔ lɛ nakai! . . .
Bo ji enɔ kɛ enɔ pɛ;
Ole jogbaŋŋ akɛ enɔ fɛɛ nɔ ji onɔ;
Kaamɛ ni okpɛ enɛ yɛ tɛ nɔ—
Kɛɛmɔ lɛ nakai!”
Blema Maŋtsɛ Lemuel nyɛ fiɔ nɛkɛ henumɔi nɛɛ asɛɛ yɛ faŋŋ mli. Ewiemɔ lɛ fa ko tsɔɔ bɔ ni ŋa kpakpa yɔɔ lɛ nɛkɛ: “Ebii lɛ kɛ gbee kome tsɛɔ lɛ miishɛɛ; ewu hu, laa eyijiemɔ lalai: ‘Yei pii tsɔɔ mɔdɛŋbɔlɔi ni amɛji; shi ofe amɛ fɛɛ.’” (Abɛi 31:1, 28, 29, The New English Bible) Wumɛi, ani nyɛjieɔ nyɛŋamɛi ayi yɛ be fɛɛ mli, aloo nyɛfee nakai yɛ nyɛnyiɛmɔ ni kɛ nyɛ bote gbalashihilɛ mli lɛ pɛ mli?
22, 23. Gbalashihilɛ ni yeɔ omanye lɛ damɔ mɛni nɔ?
22 Yɛ nɔ kuku ni wɔsusu he nɛɛ hewɔ lɛ, eka shi faŋŋ akɛ kɛ wu aaajie suɔmɔ kɛ bulɛ kpo yɛ egbalashihilɛ mli lɛ, belɛ efaaa kɛkɛ akɛ akɛ nyɔŋgbele nyɔmɔwoo aaaba shia. Gbalashihilɛ ni yeɔ omanye lɛ damɔ wekukpaa ni suɔmɔ, anɔkwayeli kɛ mɔ he susumɔ yɔɔ mli lɛ nɔ. (1 Petro 3:8, 9) Beni afii lɛ hoɔ lɛ, esa akɛ wekukpaa nɛɛ mli akwɔ yɛ be mli ni wu kɛ ŋa hiɛ sɔɔ amɛteŋ mɔ fɛɛ mɔ sui kpakpai lɛ ni no wajeɔ amɛ ni amɛkaseɔ bɔ ni akuɔ hiɛ ashwieɔ tɔmɔ nɔ ni akɛ mɔ fɛɛ mɔ gbɔjɔmɔ keɔ lɛ lɛ.—Efesobii 4:32; Kolosebii 3:12-14.
23 Kɛji akɛ wu lɛ tsɔ hiɛ yɛ suɔmɔ kɛ bulɛ ni ajieɔ lɛ kpo lɛ mli lɛ, abaajɔɔ weku muu lɛ fɛɛ. Shi mɛɛ nitsumɔ esa akɛ ŋa Kristofonyo lɛ atsu yɛ miishɛɛ weku mli? Nikasemɔ ni nyiɛ sɛɛ nɛɛ baasusu enɛ kɛ sanebimɔi krokomɛi ahe.
Ani Okaiɔ?
◻ Namɔ ji mɔ n ni baanyɛ aha gbalashihilɛ lɛ afee no ni miishɛɛ yɔɔ mli, ni mɛni hewɔ?
◻ Mɛɛ gbɛ no wumɛi aaatsɔ akase Kristo nɔkwɛmɔ no ni haa mo he jɔɔ lɛ lɛ?
◻ Mɛɛ pɛpɛɛpɛŋmɛɛ he hiaa yɛ asafoŋ kɛ weku mli gbɛnaa nii ahe nitsumɔ mli?
◻ Te wu aaafee tɛŋŋ ni ‘ekɛ eŋa ahi shi yɛ nilee’ mli Iɛ?
◻ Akɛ akɛ ‘woo aha ŋa akɛ nɔ ni he waa tuutu’ lɛ tsɔɔ mɛni?
[Mfoniri ni yɔɔ baafa 11]
Onukpa ni ŋmɛɔ pɛpɛɛpɛ lɛ le akɛ kwɛmɔ jeɔ shishi kɛjɛɔ shia