Sanegbaa Yɛ Kristofoi Asɔɔmɔ Nitsumɔ Lɛ Mli

“No hewɔ lɛ nyɛyaa ni nyɛyafea jeŋmaji fɛɛ mikaselɔi.”​—MATEO 28:⁠19.

 1. Mɛɛ nitsumɔ ko ni Kristo kɛha tsɔɔ akɛ ehe hiaa ni wɔkɛ mɛi awie lɛ?

NITSUMƆ ni Yesu kɛha, ni wɔtsɛ yisɛɛ yɛ yiteŋgbɛ nɛɛ, kɛ sanegbaa ni aaaya nɔ yɛ wɔkɛ gbɔmɛi ni wɔkɛkpeɔ lɛ ateŋ beni wɔyaa shia kɛ shia, ni wɔfeɔ sɛɛsaramɔi, ni wɔkɛ wɔhe woɔ Maŋtsɛyeli shiɛmɔ lɛ he nitsumɔi krokomɛi fɛɛ amli lɛ he kaa ko bafɔɔ wɔhiɛ. Nɔ ni fata nakai nitsumɔ lɛ he hu ji gbɛnaa nii ni ka wɔnɔ akɛ wɔha ale anɔkwale ni kɔɔ Yehowa Nyɔŋmɔ, Yesu Kristo, kɛ Mesia Maŋtsɛyeli ni Yesu yeɔ nɔ maŋtsɛ bianɛ lɛ he lɛ.​—Mateo 25:​31-33.

 2. Kɛji wɔɔwie ni emɔ shi jogbaŋŋ lɛ, mɛni he hiaa wɔ?

² Mɛɛ gbɛ nɔ wɔɔtsɔ wɔgba sane jogbaŋŋ ni emɔ shi? Klɛŋklɛŋ lɛ, esa akɛ wɔhe nɔ ni wɔwieɔ lɛ wɔye. Yɛ wiemɔ kroko mli lɛ, esa akɛ wɔna hemɔkɛyeli ni mli wa akɛ Yehowa ji anɔkwa Nyɔŋmɔ koome lɛ, akɛ Biblia lɛ ji Nyɔŋmɔ Wiemɔ lɛlɛŋ, ni akɛ Nyɔŋmɔ Maŋtsɛyeli lɛ ji adesai ahiɛnɔkamɔ kome pɛ. Yɛ nakai gbɛ nɔ lɛ, nɔ ni wɔtsɔɔ mɛi krokomɛi lɛ baajɛ wɔtsui mli, ni no baaha wɔbo ŋaawoo ni Paulo kɛha Timoteo lɛ toi: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.”​—2 Timoteo 2:⁠15.

Sanegbaa ni Atsɔɔɔ Wiemɔi Anɔ

3-5. (a) Mɛɛ gbɛ nɔ wɔɔtsɔ wɔtswa nɔ ko he adafi ni jeee kɛtsɔ wiemɔ nɔ? (b) Mɛɛ niiashikpamɔi yeɔ enɛ he odase?

³ Bei babaoo lɛ sanegbaa biɔ wiemɔi. Shi, yɛ anɔkwale mli lɛ, wɔhaa gbɔmɛi leɔ nɔ ni wɔtaoɔ amɛle lɛ dani wɔkɛ amɛ wieɔ po. Yɛ mɛɛ gbɛ nɔ? Kɛtsɔ bɔ ni wɔbaa wɔjeŋ kɛ agbɛnɛ bɔ ni wɔsaa wɔhe ni wɔwulaa wɔhaa lɛ nɔ. Afii komɛi ni eho nɛ lɛ, maŋsɛɛ sanekpakpa shiɛlɔ ni egbe nikasemɔ naa yɛ Watchtower Bible School of Gilead lɛ kɛ lɛji wuji lɛ eko miifa gbɛ kɛya maŋ nɔ he ni aha lɛ nitsumɔ yɛ lɛ. Beni amɛye gbii fioo yɛ ŋshɔ lɛ hiɛ lɛ, gbɔ ko babi lɛ nɔ hewɔ ni esoro lɛ kwraa yɛ mɛi krokomɛi fɛɛ ni yɔɔ lɛlɛ lɛ mli lɛ ahe lɛ. Maŋsɛɛ sanekpakpa shiɛlɔ lɛ miiha aale nɔ ko ni sa kadimɔ jogbaŋŋ​—akɛ esoro lɛ kwraa ni esa mɔ ni atsiɔ abɛŋkɛɔ lɛ​—yɛ ehesaamɔ kɛ bɔ ni ebaa ejeŋ ehaa lɛ kɛkɛ hewɔ. Enɛ kɛ hegbɛ fɛfɛo ha maŋsɛɛ sanekpakpa shiɛlɔ lɛ ni ekɛye odase.

⁴ Agbɛnɛ hu, nyɛmiyoo ko ni damɔ gbɛjegbɛ nɔ ekɛ Biblia kasemɔ woji miiha mɛi ni yaa kɛ baa lɛ kɛ naanyobɔɔ ŋmɔlɔ bɛŋkɛ yoo ko ni miiho yɛ emasɛi. Yoo nɛɛ bɔi atrakpoi lɛ kpelekemɔ kɛmiiya oketeke shidaamɔ he lɛ. Kɛkɛ ni etsake ejwɛŋmɔ, ni eku esɛɛ eba nyɛmiyoo lɛ ŋɔɔ, ni ebabi ni akɛ lɛ abakase Biblia lɛ yɛ eshia. Mɛni ji nɔ ni ehiɛ sɔ waa lɛ? Eyɛ mli akɛ ahako lɛ Biblia kasemɔ wolo ko moŋ, shi Odasefoi ni tsuɔ nii yɛ gbɛjegbɛ lɛ nɔ lɛ kɛ hiɛ su ni tsɔɔ naanyobɔɔ ŋmɔlɔ tsi bɛŋkɛ lɛ.

⁵ Nɔkwɛmɔ nɔ ni ji etɛ: Kuu ko ni ji Odasefoi obalaŋtai yaye nii yɛ niyeli he ko ni efee amɛ naakpɛɛ waa beni gbɔ ko ba amɛkpɔlɔ lɛ he ni ebawo amɛniyenii lɛ nyɔmɔ eha amɛ lɛ. Mɛni hewɔ efee nakai? Bɔ ni amɛba amɛjeŋ yɛ jɛmɛ lɛ sa ehiɛ waa. Nɛkɛ Kristofoi obalaŋtai nɛɛ eha ale akɛ amɛji gbɔmɛi ni yɔɔ Nyɔŋmɔ gbeyeishemɔ, ni amɛwieko wiemɔ kome folo po. Belɛ eyɛ faŋŋ akɛ, wɔhaa aleɔ nibii babaoo dani wɔwieɔ, kɛtsɔ wɔjeŋba, wɔhesaamɔ, kɛ naanyobɔɔ su ni wɔjieɔ lɛ kpo lɛ nɔ.​—Okɛto 1 Petro 3:​1, 2 he.

Niiahesusumɔ he Miihia Kɛha Sanegbaa

 6. Feemɔ bɔ ni niiahesusumɔ he hiaa kɛha sanegbaa lɛ he mfoniri.

⁶ Kɛji wɔkɛ gbɔmɛi baagba sanekpakpa lɛ he sane kɛtsɔ wiemɔ nɔ lɛ, no lɛ esa akɛ wɔsaa wɔhe, jeee ni kɛ wɔmiiwie lɛ amɛbɛ hegbɛ ni amɛbiɔ wɔ sane, shi moŋ ni wɔkɛ amɛ asusu nii ahe. Wɔkaneɔ shii abɔ akɛ Paulo kɛ mɛi ni ebɔɔ mɔdɛŋ akɛ eeeha sanekpakpa lɛ ashɛ amɛŋɔɔ lɛ susuɔ nii ahe. (Bɔfoi lɛ Asaji 17:​2, 17; 18:19) Mɛɛ gbɛ nɔ wɔɔtsɔ wɔnyiɛ enɔkwɛmɔ nɔ lɛ sɛɛ? Ojogbaŋŋ, ekolɛ jeŋ shihilɛ ni yaa nɔ efiteɔ lɛ haa mɛi krokomɛi jeɔ ŋwane akɛ Nyɔŋmɔ Ofe ni yɔɔ suɔmɔ ni esusuɔ adesai ahe ko yɛ. Shi, wɔbaanyɛ wɔkɛ amɛ asusu he akɛ Nyɔŋmɔ yɛ be ni eto kɛha nɔ fɛɛ nɔ. (Jajelɔ 3:​1-8) No hewɔ lɛ, Galatabii 4:4 kɛɔ akɛ beni be ni Nyɔŋmɔ eto lɛ shɛ lɛ, etsu e-Bi lɛ kɛba shikpɔŋ nɔ. Enɛ ba mli beni ewo shi akɛ ebaafee nakai lɛ sɛɛ afii akpei abɔ. Nakai nɔŋŋ hu, kɛji be ni eto lɛ shɛ lɛ, ebaaha amanehulu kɛ yiwalɛ fɛɛ sɛɛ afo. Ni kɛfata he lɛ, Nyɔŋmɔ Wiemɔ lɛ tsɔɔ akɛ Nyɔŋmɔ yɛ yiŋtoi kpakpai ahewɔ ni eŋmɛ amanehulu kɛ efɔŋfeemɔ gbɛ ni etsa nɔ aahu be kakadaŋŋ nɛkɛ lɛ. (Okɛto 2 Mose 9:16 he.) Ni wɔɔsusu nii ahe yɛ nɛkɛ gbɛi anɔ, kɛ mfonirifeemɔi kɛ Ŋmalɛ mli odaseyeli ni mli wa ni wɔkɛaafi enɛ esɛɛ lɛ baaye abua mɛi ni yɔɔ tsui krɔŋŋ lɛ ni amɛyoo akɛ anyɛŋ akɛ efɔŋfeemɔ ni egbɛ eshwa babaoo lɛ atsu nii akɛ naataomɔ ni akɛaaha akɛ Yehowa bɛ loo jeee ehe sane ko ji nɔ ni yaa nɔ lɛ.​—Romabii 9:​14-18.

 7, 8. Mɛɛ gbɛ nɔ niiahesusumɔ baanyɛ aye abua wɔ ni wɔnyɛ wɔkɛ Yudafonyo diɛŋtsɛ agba sane?

⁷ Ŋɔɔ lɛ akɛ beni onyiɛ shia kɛ shia shiɛmɔ nɔ lɛ, shiatsɛ ko kɛɛ bo akɛ: “Yudafonyo ji mi. Mibɛ he miishɛɛ.” Mɛɛ gbɛ nɔ obaatsɔ otsa nɔ? Nyɛminuu ko bɔ omanye ni eye yɛ gbɛ nɛɛ kɛ nitsumɔ mli lɛ he amaniɛ akɛ: ‘Miheɔ miyeɔ akɛ okɛ mi baakpa gbee akɛ Mose ji gbalɔi kpelei ni Nyɔŋmɔ kɛtsu nii da lɛ ateŋ mɔ kome. Ni ani ole akɛ ewie nɔ ko ni aŋma yɛ 5 Mose 31:29 lɛ, akɛ: “Mile akɛ migbele sɛɛ lɛ . . . nyɛaakpale kɛaajɛ gbɛ ni miwo nyɛ he kita lɛ nɔ, ni efɔŋ aaaba nyɛnɔ”? Mose ji gbalɔ anɔkwafo, no hewɔ lɛ esa akɛ ewiemɔi lɛ aba mli anɔkwale yɛ be ko mli. Ani eeenyɛ efee akɛ amɛba mli anɔkwale beni Nyɔŋmɔ tsu Mesia lɛ kɛba Yudafoi lɛ aŋɔɔ lɛ, ni no hewɔ ni Yudafoi lɛ ekpɛlɛɛɛ enɔ lɛ? Ekolɛ eeenyɛ efee akɛ nakai ji bɔ ni sane lɛ ji. Agbɛnɛ kɛji nɛkɛ sane lɛ ji ni amɛtɔ̃ lɛ, ani esa akɛ no afee yiŋtoo ni bo kɛ mi fɛɛ aaadamɔ nɔ ni wɔtɔ̃ nakai tɔmɔ lɛ nɔŋŋ?’

⁸ Kaimɔ hu akɛ, Yudafoi lɛ ena amanehulu babaoo yɛ Kristendom dɛŋ, titri lɛ yɛ afii oha nɛɛ mli. No hewɔ lɛ ekolɛ obaasumɔ ni okɛɛ shiatsɛ lɛ akɛ wɔkɛ wɔhe wooo nakai nifeemɔ lɛ mli. Akɛ nɔkwɛmɔ nɔ lɛ, ekolɛ obaasumɔ ni okɛɛ lɛ akɛ: ‘Ani ole akɛ beni Hitler yeɔ nɔ lɛ, Yehowa Odasefoi kɛ kpoomɔ ni ekɛɛ akpoo Yudafoi anibii fɛɛ lɛ tsuuu nii? Amɛkpoo hu akɛ amɛkɛɛɛ “Heil Hitler” aloo ‘Ajie Hitler yi’ ni amɛyafataaa esaraafoi lɛ ahe.a

 9, 10. Mɛɛ gbɛ nɔ abaanyɛ akɛ niiahesusumɔ atsu nii ni akɛye abua mɔ ko ni heɔ hɛl la eyeɔ lɛ yɛ?

⁹ Yɛ be mli ni obɔɔ mɔdɛŋ akɛ okɛ mɔ ko ni heɔ hɛl la eyeɔ lɛ aaagba sane lɛ, ekolɛ okɛ lɛ baasusu nii ahe akɛ kɛji mɔ ko aaana nɔ kɛya naanɔ yɛ hɛl lɛ, no lɛ esa akɛ ena susuma ni gbooo. Mɔ ni heɔ hɛl la eyeɔ lɛ kɛ bo baakpa gbee amrɔ nɔŋŋ. Kɛkɛ lɛ no sɛɛ lɛ obaanyɛ otsi nɔ ni aŋma ni kɔɔ Adam kɛ Hawa bɔɔ he lɛ ta, ni okɛ mlihilɛ abi lɛ kɛji ena akɛ atsi susuma ni gbooo ko ta yɛ sane lɛ mli. Beni oyaa nɔ yɛ oniiahesusumɔ lɛ mli lɛ, agbɛnɛ obaanyɛ ogbala ejwɛŋmɔ kɛya 1 Mose 2:7 nɔ, he ni Biblia lɛ kɛɔ wɔ yɛ akɛ Adam tsɔ susuma lɛ. Ni kadimɔ nɔ ni Nyɔŋmɔ kɛɛ akɛ no baajɛ Adam esha lɛ mli aba lɛ hu: “Ohiɛ latsaa mli oooye nii yɛ, kɛyashi beyinɔ ni oooku osɛɛ kɛaatee shikpɔŋ su mli, ejaakɛ emli ajieo kɛjɛ. Ejaakɛ su jio, ni su mli oooku osɛɛ kɛaatee.” (1 Mose 3:19) No hewɔ lɛ, Adam ni ji susuma lɛ ku esɛɛ kɛtee shikpɔŋ su lɛ mli.

¹⁰ Agbɛnɛ hu obaanyɛ ogbala ejwɛŋmɔ kɛya anɔkwale ni eji akɛ he ko he ko bɛ sane ni aŋma yɛ 1 Mose wolo lɛ mli ni Nyɔŋmɔ tsĩ naanɔ piŋmɔ yɛ hɛl la mli tã lɛ hu nɔ. Beni Nyɔŋmɔ bɔ Adam kɔkɔ akɛ ekaye tso yibii ni agu eyeli lɛ, ekɛɛ: “Gbi nɔ ni oooye eko lɛ, gbo ooogbo.” (1 Mose 2:17) Atsiii hɛl la ko ta! Kɛji nɔ diɛŋtsɛ ni baajɛ esha lɛ mli aba kɛha Adam lɛ jeee gbele, ‘esɛɛ ni eeeku kɛaatee shikpɔŋ su mli,’ shi naanɔ piŋmɔ lɛ, yɛ jalɛsane mli lɛ, ani esaaa ni kulɛ Nyɔŋmɔ tsɔɔ enɛ mli faŋŋ ehaa lɛ? No hewɔ lɛ, niiahesusumɔ jogbaŋŋ kɛ mlihilɛ hu lɛ baanyɛ aye abua mɔ ko ni yɔɔ tsui krɔŋŋ lɛ ni ena nibii ni teɔ shi woɔ amɛhe yɛ ehemɔkɛyeli lɛ mli lɛ faŋŋ. Ekaba akɛ wɔɔku wɔhiɛ wɔfɔ bɔ ni ehe hiaa ni wɔha amɛsusu nii ahe beni wɔgbaa mɛi krokomɛi Nyɔŋmɔ Wiemɔ lɛ mli anɔkwale lɛ nɔ kɔkɔɔkɔ.​—Okɛto 2 Timoteo 2:​24-26; 1 Yohane 4:​8, 16 he.

Sui ni He Hiaa Kɛha Sanegbaa ni Mɔɔ Shi Jogbaŋŋ

11-13. Mɛɛ Kristofoi asui baanyɛ aye abua wɔ ni wɔnyɛ wɔkɛ mɛi awie jogbaŋŋ ni emɔ shi?

¹¹ Agbɛnɛ, mɛɛ sui nɛkɛ esa akɛ wɔna bɔni afee ni wɔnyɛ wɔwie Maŋtsɛyeli anɔkwalei lɛ ahe ni emɔ shi jogbaŋŋ? Ojogbaŋŋ, mɛni ji nɔ ni Yesu nɔkwɛmɔ nɔ lɛ kɛɔ wɔ? Wɔkaneɔ ewiemɔi nɛɛ yɛ Mateo 11:​28-30 lɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.” Jɛmɛ wɔnaa gbɛi ni ha Yesu ye omanye yɛ ekɛ mɛi asanegbaa mli lɛ ekome yɛ. Ehe jɔ ni ebaa ehe shi yɛ etsui mli tɔɔ. Gbɔmɛi ni yɔɔ tsuii kpakpa lɛ na akɛ ehaa mɔ he jɔɔ lɛ. Bɔfo Paulo hu fee nɔkwɛmɔ nɔ kpakpa, ejaakɛ, taakɛ ekɛɛ onukpai ni jɛ Efeso lɛ, kɛjɛ klɛŋklɛŋ gbi ni eba amɛŋɔɔ lɛ nɔ kɛbaa fɛɛ lɛ, esɔmɔɔ kɛhaa Nuŋtsɔ lɛ “kɛ heshibaa jwɛŋmɔ fɛɛ.”​—Bɔfoi lɛ Asaji 20:⁠19.

¹² Kɛtsɔ heshibaa kɛ heshibaa jwɛŋmɔ ni wɔɔjie lɛ kpo be fɛɛ be lɛ nɔ lɛ, mɛi krokomɛi baana akɛ wɔ hu wɔhaa mɔ he jɔɔ lɛ, ni enɛ baaha efee mlɛo kɛha wɔ akɛ wɔkɛ amɛ aaagba sane. Ekolɛ sui krokomɛi fɛɛ ni tamɔɔɔ nakai ni wɔɔjie lɛ kpo lɛ baafee gbɛtsii nii yɛ wɔ kɛ mɛi ni wɔbɔɔ mɔdɛŋ akɛ wɔkɛ amɛ aaagba sane lɛ ateŋ. Lɛlɛŋ, “heshibalɔi moŋ yɔɔ nilee.”​—Abɛi 11:⁠2.

¹³ Ehe miihia hu ni wɔto wɔtsui shi ni wɔkɛ ŋaa atsu nii bɔni afee ni wɔnyɛ wɔkɛ adafitswaa saji aha ni emɔ shi jogbaŋŋ. Eka shi faŋŋ akɛ bɔfo Paulo kɛ ŋaa tsu nii jogbaŋŋ beni eye woloŋlelɔi ni babua amɛhe naa yɛ ehiɛ yɛ Mars Gɔŋ lɛ nɔ lɛ odase lɛ. Ekɛ sanekpakpa lɛ ha yɛ gbɛ ni amɛbaanyɛ amɛnu shishi nɔ. (Bɔfoi lɛ Asaji 17:​18, 22-31) Kɛji wɔmiitao wɔkɛ wɔtoibolɔi lɛ awie ni emɔ shi jogbaŋŋ lɛ, no lɛ esa akɛ wɔbo ŋaawoo ni bɔfo Paulo kɛha Kolosebii beni ekɛɛ amɛ nɛkɛ lɛ toi: “Nyɛhaa nyɛsanegbaa he abaa nyam be fɛɛ be, ni akafee nɔ ni eŋɔɔɔ; ni nyɛkase bɔ ni nyɛkɛ mɔ fɛɛ mɔ ni nyɛkɛkpeɔ lɛ aaawie.” (Kolosebii 4:​6, The New English Bible) Esa akɛ wɔwiemɔ aŋɔɔ be fɛɛ be. Wiemɔ ni tamɔ nakai lɛ baagbele wɔtoibolɔi lɛ ajwɛŋmɔi amli, yɛ be mli ni wiemɔi ni asusuuu he jogbaŋŋ lɛ baaha amɛŋamɔ amɛjwɛŋmɔi ni amɛboŋ toi kwraa.

14. Mɛɛ gbɛ nɔ tswãa ni wɔɔfee kɛ sanegbaa su baanyɛ aye abua wɔ ni wɔnyɛ wɔkɛ mɛi krokomɛi awie yɛ?

¹⁴ Wɔmiisumɔ ni ana wɔ akɛ mɛi ni yɔɔ tswãa yɛ bei fɛɛ mli. Enɛ haa efeɔ mlɛo kɛhaa wɔtoibolɔi lɛ akɛ amɛaabo wɔ toi. Ni wɔɔfee tswãa lɛ tsɔɔ akɛ wɔfeee shɛii akɛ wɔkome pɛ wɔɔwie sɔŋŋ. Shi moŋ, kɛji wɔjie tsuishitoo su kpo ni wɔtsɔ sanebimɔi ni tsɔɔ naanyobɔɔ nɔ lɛ, no lɛ wɔhaa wɔtoibolɔi lɛ hegbɛ koni amɛ hu amɛwie. Ni titri lɛ, kɛji wɔmiiye odase trukaa lɛ, no lɛ nilee yɛ mli waa akɛ wɔɔha mɔ kroko lɛ hu awie eko. Akɛ nɔkwɛmɔ nɔ lɛ, Odasefonyo ko na akɛ mɔ ni eta emasɛi yɛ kɔɔyɔɔŋ lɛlɛ ko mli lɛ ji Roma Katolek osɔfo. Odasefonyo lɛ tee nɔ ekɛ osɔfo lɛ gba sane kɛtsɔ sanebimɔi anɔ yɛ ŋaa mli, aaafee ŋmɛlɛtswaa kome sɔŋŋ, ni yɛ be mli ni osɔfo lɛ haa hetoo lɛ, eha ena hegbɛ ni ekɛwie babaoo. Shi beni amɛgbala amɛmli lɛ, no mli lɛ osɔfo lɛ ehe Biblia kasemɔ he woji babaoo. Tsuishitoo gbɛ ni tamɔ nɛkɛ lɛ baaye abua wɔ koni wɔnyɛ wɔjie su kroko ni he hiaa lɛ kpo, niiahenumɔ.

15, 16. Mɛɛ gbɛ nɔ niiahenumɔ baanyɛ aye abua wɔ ni wɔkɛ mɛi anyɛ awie yɛ?

¹⁵ Niiahenumɔ ni wɔɔjie lɛ kpo lɛ tsɔɔ, kɛ wɔɔkɛɛ lɛ, wɔhe ni wɔkɛwoɔ mɛi krokomɛi ashihilɛ mli. Bɔfo Paulo nu bɔ ni ehe hiaa ni ajie niiahenumɔ kpo atsɔɔ lɛ shishi jogbaŋŋ, taakɛ bɔ ni anyɛɔ anaa kɛjɛɔ nɔ ni eŋma eyaha Korintobii lɛ mli lɛ: “Tsɛbelɛ mihiɛ mihe ni mijeee mɔ ko mɔ ko nɔ, kɛlɛ mikɛ mihe efee mɛi fɛɛ atsulɔ, bɔni afee ni minine ashɛ mɛi babaoo nɔ. Yudafoi lɛ, mitsɔ tamɔ Yudanyo miha amɛ, bɔni afee ni minine ashɛ Yudafoi anɔ; mɛi ni yɔɔ mla shishi lɛ, mitsɔ tamɔ mɔ ko ni yɔɔ mla shishi hu miha amɛ, tsɛ mi diɛŋtsɛ mibɛ mla shishi, bɔni afee ni minine ashɛ mɛi ni yɔɔ mla shishi lɛ anɔ; mɛi ni bɛ mla lɛ, mitsɔ tamɔ mɔ ko ni bɛ mla miha amɛ, tsɛ mijeee mɔ ko ni bɛ Nyɔŋmɔ mla, shi moŋ miyɛ Kristo mla shishi, bɔni afee ni minine ashɛ mɛi ni bɛ mla lɛ anɔ. Mitsɔ tamɔ gbedelɔ miha gbedelɔi lɛ, bɔni afee ni minine ashɛ gbedelɔi lɛ anɔ; mitsɔ mihe nɔ fɛɛ nɔ miha mɛi fɛɛ, koni bɔ fɛɛ bɔ ni aaafee lɛ mikɛhere mɛi komɛi ayiwala.”​—1 Korintobii 9:​19-22.

¹⁶ Kɛji wɔɔkase bɔfo Paulo yɛ enɛɛmɛi amli lɛ, no lɛ ehe miihia ni wɔkɛ ŋaa atsu nii, wɔna sɛɛyoomɔ, ni wɔkadi nii jogbaŋŋ. Niiahenumɔ baaye abua wɔ ni wɔnyɛ wɔwie anɔkwale lɛ he wɔtsɔɔ wɔtoibolɔi lɛ yɛ bɔ ni amɛsusuɔ nii ahe kɛ bɔ ni amɛnuɔ nii ahe hu amɛhaa lɛ naa. Reasoning From the Scriptures wolo lɛ kɛ yelikɛbuamɔ babaoo haa wɔ yɛ enɛ he. Hiɛmɔ eko be fɛɛ be yɛ sɔɔmɔ nitsumɔ lɛ mli.

Suɔmɔ​—Yelikɛbuamɔ Nii yɛ Sanegbaa Mli

17. Yɛ Kristofoi asui lɛ fɛɛ ateŋ lɛ, te nɔ ni he hiaa fe fɛɛ kɛha anɔkwale lɛ he wiemɔ ni mɔɔ shi lɛ, ni mɛɛ gbɛ nɔ atsɔɔ enɛ yɛ?

¹⁷ Hiɛshikamɔ, heshibaa jwɛŋmɔ, tsuishitoo, kɛ niiahenumɔ he miihia kɛha wiemɔ ni mɔɔ shi jogbaŋŋ yɛ be mli ni wɔkɛ mɔ ko gbaa sane lɛ. Shi, nɔ ni fe fɛɛ ji, suɔmɔ ni pɛsɛmkunya bɛ mli baaye abua wɔ ni wɔye omanye yɛ mɛi krokomɛi atsuii ahe ni wɔɔshɛ lɛ mli. Yesu jie musuŋtsɔlɛ kpo yɛ gbɔmɛi lɛ ahe ejaakɛ “etɔ amɛ ni amɛfee yuuyaa tamɔ tooi ni bɛ kwɛlɔ.” Suɔmɔ ji nɔ ni tsirɛ Yesu ni ekɛɛ amɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ.” (Mateo 9:​36; 11:28) Suɔmɔ ni wɔyɔɔ kɛha gbɔmɛi lɛ hewɔ ni wɔ hu, wɔsumɔɔ ni wɔha amɛhe ajɔ amɛ ni wɔye wɔbua amɛ ni amɛbanyiɛ wala gbɛ lɛ nɔ lɛ. Shɛɛ sane ni suɔmɔ yɔɔ mli wɔjajeɔ lɛ, no hewɔ lɛ nyɛhaa wɔyaa nɔ wɔjajea yɛ suɔmɔ mli. Nɛkɛ suɔmɔ nɛɛ jieɔ ehe kpo yɛ naanyobɔɔ ŋmɔlɔ mli, kɛtsɔ mlihilɛ kɛ mlijɔlɛ nɔ, kɛtsɔ miishɛɛ kɛ henumɔ nɔ.

18. Mɛɛ gbɛ nɔ wɔɔtsɔ wɔkase Paulo, taakɛ ekase Nuŋtsɔ lɛ?

¹⁸ Bɔfo Paulo ji e-Nuŋtsɔ, Yesu Kristo kaselɔ yɛ gbɛ ni yɔɔ fɛo nɔ yɛ enɛ gbɛfaŋ. Mɛni hewɔ ni eye omanye yɛ asafoi ni eto shishi kɛtsara nɔ babaoo lɛ mli nakai lɛ? Ekaa ni eyɔɔ lɛ hewɔ? Hɛɛ. Shi yɛ suɔmɔ ni ejie kpo etsɔɔ lɛ hu hewɔ. Kadimɔ ewiemɔi ni tsɔɔ suɔmɔ ni eyɔɔ kɛha esafo hee ni ato shishi yɛ Tesalonika lɛ jogbaŋŋ: “Wɔmli jɔ yɛ nyɛteŋ, taakɛ bɔ ni bii anyɛ hiɛɔ lɛ diɛŋtsɛ ebii dɔdɔɔdɔ lɛ. Ni akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.” Kasemɔ ni wɔɔkase Paulo lɛ baaye abua wɔ yɛ mɔdɛŋ ni wɔbɔɔ ni wɔkɛ mɛi agba sane lɛ mli.​—1 Tesalonikabii 2:​7, 8.

19. Mɛni hewɔ esaaa akɛ wɔhaa shikpɔŋkuku ni abooo wiemɔ lɛ toi yɛ mli lɛ haa wɔnijiaŋ jeɔ wui lɛ?

¹⁹ Kɛji wɔfee bɔ ni wɔɔnyɛ fɛɛ koni wɔkɛ mɛi agba sane ni kɛlɛ ewooo yibii ni wɔkpaa gbɛ lɛ, ani esa akɛ wɔnijiaŋ aje wui? Dabida. Biblia Kaselɔi (taakɛ tsutsu lɛ atsɛɔ Yehowa Odasefoi) lɛ fɔɔ kɛɛmɔ akɛ dani gbɔmɛi aaakpɛlɛ anɔkwale lɛ nɔ lɛ, ehe miihia ni amɛna sui etɛ nɛɛ fɛɛ eko. Ehe miihia ni amɛfee anɔkwafoi, heshibalɔi, kɛ mɛi ni mumɔŋ hɔmɔ miiye amɛ. Wɔnyɛŋ wɔkpa gbɛ akɛ gbɔmɛi ni yeee anɔkwa, mɛi ni jeee anɔkwafoi lɛ baakpɛlɛ anɔkwale lɛ nɔ; ni nakai nɔŋŋ hu wɔnyɛŋ wɔkpa gbɛ akɛ aŋkroaŋkroi ni ji hewolɔi loo henɔwolɔi baabo sanekpakpa lɛ toi. Ni kɛfata he lɛ, kɛ mɔ aŋkro ko jieɔ anɔkwayeli kɛ heshibaa kpo yɛ gbɛ ko nɔ po lɛ, ekolɛ ekpɛlɛŋ anɔkwale lɛ nɔ kɛji mumɔŋ hɔmɔ yeee lɛ.

20. Mɛni hewɔ abaanyɛ akɛɛ be fɛɛ be akɛ wɔmɔdɛŋbɔɔ lɛ efeŋ yaka lɛ?

²⁰ Ŋwanejee ko bɛ he akɛ mɛi ni okɛkpeɔ yɛ oshikpɔŋkuku lɛ mli lɛ ateŋ mɛi pii bɛ sui etɛ lɛ amli ekome loo fɛɛ po. Gbalɔ Yeremia kɛ nakai niiashikpamɔ lɛ nɔŋŋ eko kpe. (Yeremia 1:​17-19; okɛto Mateo 5:3 he.) Shi kɛlɛ, wɔmɔdɛŋbɔɔ lɛ efeŋ yaka. Mɛni hewɔ? Ejaakɛ Yehowa gbɛi lɛ kɛ e-Maŋtsɛyeli lɛ he adafi wɔtswaa. Wɔtsɔɔ wɔ shiɛmɔ kɛ wɔshikpɔŋkuku lɛ mli ni wɔyaa lɛ nɔ wɔbɔɔ efɔŋfeelɔ lɛ kɔkɔ. (Ezekiel 33:33) Ni nyɛkahaa wɔhiɛ miikpa nɔ akɛ wɔtsɔɔ mɔdɛŋ ni wɔbɔɔ akɛ wɔkɛ mɛi krokomɛi aaawie anɔkwale lɛ he lɛ nɔ wɔnaa sɛɛ wɔ diɛŋtsɛ. (1 Timoteo 4:16) Wɔhaa wɔhemɔkɛyeli mli waa ni wɔ Maŋtsɛyeli lɛ he hiɛnɔkamɔ lɛ kpɛɔ haŋŋ. Kɛfata he lɛ, wɔhiɛɔ wɔ emuuyeli mli ni wɔnaa Yehowa Nyɔŋmɔ gbɛi lɛ hetsemɔ lɛ mli gbɛfaŋnɔ, ni wɔhaa etsui nyɔɔ emli.​—Abɛi 27:⁠11.

21. Mɛni wɔbaanyɛ wɔkɛɛ yɛ enaamuu mli?

²¹ Yɛ enaamuu mli lɛ: Wiemɔ ji gbɛ ni atsɔɔ nɔ akɛ adafitswaa haa ni emɔɔ shi. Ŋaa gbɛ ni atsɔɔ nɔ awieɔ lɛ he miihia, ni kɛ sanegbaa eyaaa nɔ lɛ efiteɔ nii babaoo. Wɔna akɛ Yehowa Nyɔŋmɔ kɛ Yesu Kristo ji klɛŋklɛŋ adafitswalɔi loo wielɔi, ni akɛ Yesu Kristo ehala adafitswaa gbɛ ko ni ekɛtsuɔ nii yɛ wɔgbii nɛɛ amli. Wɔkadi hu akɛ wɔtsɔɔ wɔ hewulamɔ kɛ wɔjeŋba nɔ wɔkɛ mɛi wieɔ, ni wɔkɛ shɛɛ saji haa mɛi krokomɛi. Wɔkase akɛ niiahesusu tsuɔ gbɛfaŋnɔ ni he hiaa he nii yɛ mɔdɛŋ ni wɔbɔɔ ni wɔkɛ gbɔmɛi agba sane lɛ mli, ni akɛ, kɛji wɔɔnyɛ wɔkɛ mɛi agba sane ni emɔ shi jogbaŋŋ lɛ, no lɛ ehe miihia ni wɔba wɔhe shi, wɔjie niiahenumɔ kpo, ni wɔna tsuishitoo, koni nɔ ni fe fɛɛ lɛ, tsui ni eyi obɔ kɛ suɔmɔ atsirɛ wɔ. Kɛji wɔna nɛkɛ sui nɛɛ ni wɔnyiɛ Biblia mli nɔkwɛmɔ nii asɛɛ lɛ, no lɛ wɔbaafee Kristofoi ni yeɔ omanye yɛ amɛkɛ mɛi asanegbaa mli.​—Romabii 12:​8-11.

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛɛ gbɛ nɔ adafitswaa jeɔ shishi dani abɔi wiemɔ po yɛ?

◻ Mɛni ji sanegbaa ni mɔɔ shi kɛtsɔ niiahesusumɔ nɔ lɛ he nɔkwɛmɔ nii komɛi?

◻ Mɛɛ sui ye bua Yesu Kristo kɛ Paulo ni amɛnyɛ amɛwie ni emɔ shi jogbaŋŋ Iɛ?

◻ Mɛni hewɔ esaaa ni wɔnijiaŋ jieɔ wui kɛji wɔmɔdɛŋbɔɔ Iɛ wooo yibii oyayaayai Iɛ?