Yehowa Kɛfaa Babaoo
“Ha ni mɔ fɔŋ akwa egbɛi lɛ, ni nɔshafeelɔ akwa ejwɛŋmɔi lɛ, ni eku esɛɛ kɛba Yehowa ŋɔɔ, . . . shi akɛaafa lɛ aahu.”—YESAIA 55:7.
1. Mɛni akɛjɔɔ mɛi ni amɛnine shɛɔ Yahowa dɛŋ eshaifaa nɔ bianɛ lɛ?
YEHOWA kɛfaa efɔŋfeelɔi ni tsakeɔ amɛtsui lɛ ni ehaa amɛnaa jwɛŋmɔŋ toiŋjɔlɛ mli ŋɔɔmɔ yɛ mumɔŋ paradeiso mli bianɛ. Nakai enɛ ji ejaakɛ anaa taomɔ nii nɛɛ yɛ amɛhe: “Nyɛtaoɔ Yehowa, be mli ni eeeha ana lɛ, nyɛtsɛa lɛ, be mli ni ebɛŋkɛ! Ha ni mɔ fɔŋ akwa egbɛi lɛ, ni nɔshafeelɔ akwa ejwɛŋmɔi lɛ, ni eku esɛɛ kɛba Yehowa ŋɔɔ, ni emusuŋ aaatsɔlɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu.”—Yesaia 55:6, 7.
2. (a) Mɛni ji ‘Yehowa sɛɛ gbɛ taomɔ’ kɛ ‘sɛɛ ni aaaku kɛaaya eŋɔɔ’ taakɛ atsi ta yɛ Yesaia 55:6, 7 lɛ shishi? (b) Mɛni hewɔ ehe hiaa ni Yuda nomii ni yɔɔ Babilon lɛ aku amɛsɛɛ kɛba Yehowa ŋɔɔ lɛ, ni mɛni ba amɛteŋ mɛi komɛi anɔ?
2 Ni ‘aaatao Yehowa’ ni atsɛ lɛ yɛ nɔkpɛlɛmɔ mli lɛ, belɛ esa akɛ mɔ fɔŋ lɛ akwa egbɛ fɔŋ lɛ kɛ jwɛŋmɔ fɛɛ jwɛŋmɔ ni eeena akɛ eeefee mɛi krokomɛi efɔŋ lɛ. Bɔ ni ehe hiaa akɛ “eku esɛɛ kɛba Yehowa ŋɔɔ” lɛ tsɔɔ akɛ efɔŋ feelɔ lɛ shi Nyɔŋmɔ, mɔ ni kulɛ ekɛ lɛ yɔɔ wekukpaa ni bɛŋkɛ kpaakpa lɛ. Nakai sane lɛ ji yɛ mɛi ni yɔɔ Yudea, ni yɛ naagbee lɛ anɔkwa ni amɛyeee Nyɔŋmɔ lɛ ha aŋɔ amɛ nom kɛtee Babilon lɛ. Ehe miihia ni Yuda nomii lɛ aku amɛsɛɛ amɛba Yehowa ŋɔɔ kɛtsɔ amɛtsui ni amɛaatsake kɛjɛ amɛ nifɔjianii ni ha amɛtee Babilon nomŋɔɔ mli kɛ afii 70 amaŋfɔ ni amɛshikpɔŋ lɛ aaatsɔ ni agba afɔ shi lɛ he. Yɛ afi 537 D.Ŋ.B. lɛ, Yudafoi ni ji shwɛɛnii ko ni sheɔ Nyɔŋmɔ gbeyei ni aŋmɛɛ amɛhe kɛjɛ Babilon yɛ nɔyeli lɛ famɔ naa lɛ ku amɛsɛɛ amɛbahi shikpɔŋ lɛ nɔ ekoŋŋ. (Ezra 1:1-8; Daniel 9:1-4) Bɔ ni nɔ ni jɛ nakai saamɔ lɛ mli lɛ yɔɔ nyam ha sɔŋŋ hewɔ lɛ, akɛ Yuda shikpɔŋ lɛ to Eden Paradeiso he.—Ezekiel 36:33-36.
3. Yɛ mɛɛ gbɛ nɔ mumɔŋ Israel shwɛɛnii lɛ ena niiashikpamɔ ko ni tamɔ nomii ni sheɔ Nyɔŋmɔ gbeyei ni ku amɛsɛɛ kɛba Yuda lɛ anɔ lɛ nɔŋŋ?
3 Mumɔŋ Israelbii ena niiashikpamɔ ko ni tamɔ Yudafoi ni sheɔ Nyɔŋmɔ gbeyei ni ku amɛsɛɛ kɛba Yuda yɛ Babilon nomŋɔɔ lɛ sɛɛ lɛ anɔ lɛ. (Galatabii 6:16) Mumɔŋ Israel shwɛɛnii lɛ fee tsakemɔi komɛi yɛ amɛgbɛ kɛ amɛjwɛŋmɔŋ, yɛ Jeŋ Ta I sɛɛ nɔŋŋ. Afi 1919 kadi nomŋɔɔ mli ni amɛtee kɛjɛ Nyɔŋmɔ duromɔ ni yeɔ emuu lɛ he, yɛ Babilon Kpeteŋkpele lɛ ni ji jeŋ apasa jamɔ maŋtsɛyeli lɛ nɔyeli he lɛ mli lɛ naagbee. Akɛni amɛtsake amɛtsui kɛjɛ esha ni amɛfee ni kɔɔ gbɔmɔ gbeyeishemɔ kɛ amɛhe ni jɔ yɛ Yehowa sɔɔmɔ mli lɛ he hewɔ lɛ, eŋmɛɛ amɛhe kɛjɛ Babilon Kpeteŋkpele lɛ mli, ni ekɛ amɛ ba amɛmumɔŋ shikpɔŋ ni ja lɛ nɔ ekoŋŋ, ni eje shishi akɛ ekɛ amɛ aaatsu nii ni amɛshiɛ Maŋtsɛyeli sane lɛ. Kɛjɛ nakai be lɛ mli kɛbaa nɛɛ mumɔŋ paradeiso ko eshwere yɛ Nyɔŋmɔ webii ateŋ, ni ewo egbɛi krɔŋkrɔŋ lɛ hiɛ nyam. (Yesaia 55:8-13) Belɛ, wɔyɛ odaseyeli ni yɔɔ faŋŋ yɛ blema shishijee nɔ lɛ kɛ ŋmɛnɛŋmɛnɛ beaŋ nɔ lɛ mli ni tsɔɔ akɛ jɔɔmɔi jɛɔ ŋwɛi eshaifaa mli baa ni ákɛ Yehowa kɛkeɔ mɛi ni tsakeɔ amɛtsui lɛ babaoo.
4. Mɛɛ gbeyeishemɔ Yehowa tsuji komɛi yɔɔ?
4 No hewɔ lɛ ŋmɛnɛŋmɛnɛ beaŋ Yehowa tsuji lɛ baanyɛ amɛkɛ amɛhe afɔ eshai ni ekɛkeɔ lɛ nɔ. Ni kɛlɛ, amɛteŋ mɛi komɛi elaaje hiɛnɔkamɔ yɛ tsutsu tɔmɔi ahewɔ, ni fɔyeli henumɔi miihe aye amɛnɔ kwraa. Amɛbuuu amɛhe akɛ mɛi ni sa akɛ amɛhiɔ mumɔŋ paradeiso lɛ mli. Yɛ anɔkwale mli lɛ, amɛteŋ mɛi komɛi sheɔ gbeyei akɛ amɛfee esha ko ni akɛfaŋ amɛ kɔkɔɔkɔ ni amɛnine shɛŋ Yehowa dɛŋ eshaifaa nɔ. Ani eeenyɛ efee akɛ nakai eji?
Eshai Komɛi ni Akɛfaaa
5. Mɛni hewɔ abaanyɛ akɛɛ akɛ akɛ eshai komɛi ekeŋ lɛ?
5 Eshai komɛi yɛ ni akɛfaaa. Yesu Kristo kɛɛ: “Aaaŋɔ esha kɛ musubɔɔ fɛɛ afa gbɔmɛi; shi mumɔ lɛ he musubɔɔ lɛ, aŋɔfaŋ gbɔmɛi.” (Mateo 12:31) No hewɔ lɛ, akɛ Nyɔŋmɔ mumɔ krɔŋkrɔŋ loo enifeemɔ hewalɛ lɛ he musubɔɔ ekeŋ. Esha ni tamɔ nɛkɛ he bɔfo Paulo wieɔ beni eŋma akɛ: “Ejaakɛ mɛi ni la etso amɛnɔ pɛŋ, . . . ni no sɛɛ amɛgbee shi lɛ, anyɛŋ amɛ atsake afee ehee ekoŋŋ aha tsuitsakemɔ, akɛni amɛmiisɛŋ Nyɔŋmɔ Bi lɛ ekoŋŋ amɛmiiha amɛhe ni amɛmiibɔ lɛ ahora amɛmiitsɔɔ hewɔ lɛ.”—Hebribii 6:4-6.
6. Mɛni tsɔɔ akɛ abaanyɛ akɛ esha ko ake loo anyɛŋ akɛke?
6 Nyɔŋmɔ pɛ le mɔ ni efee esha ni akɛfaaa lɛ. Shi Paulo ha wɔna nɛkɛ sane nɛɛ mli beni eŋma akɛ: “Ejaakɛ kɛ wɔkwaa wɔfeɔ esha, beni wɔna anɔkwale lɛ he nilee sɛɛ lɛ, belɛ eshai ahe afɔle ko bɛ dɔŋŋ; shi kojomɔ gbɛkpamɔ ni yɔɔ gbeyei kɛkɛ, kɛ la grigri ni baasha henyɛlɔi lɛ.” ( Hebribii 10:26, 27 ) Mɔ ni jɛɔ esuɔmɔ mli efeɔ nii lɛ jeɔ gbɛ efeɔ, loo “ekɛ kuɛŋtimɔ feɔ etsuinaa nii.” (Webster’s New Collegiate Dictionary) Mɔ fɛɛ mɔ ni jeɔ gbɛ ekɛ kuɛŋtimɔ yaa nɔ efeɔ esha yɛ be mli ni ele anɔkwale lɛ sɛɛ lɛ, akɛfaaa lɛ. No hewɔ lɛ ejeee esha lɛ titri diɛŋtsɛ shi moŋ shihilɛ mli ni tsui lɛ yɔɔ lɛ, bɔ ni ajɛɔ suɔmɔ mli afeɔ nii lɛ ji nɔ ni saa esha ni akɛaake loo akɛkeŋ lɛ he. Yɛ gbɛ kroko nɔ lɛ, te sane lɛ baa lɛ tɛŋŋ beni Kristofonyo ko ehao waa yɛ enɔ fɔŋ feemɔ he lɛ? Ekolɛ bɔ ni esusuɔ he babaoo lɛ tsɔɔ akɛ, yɛ anɔkwale mli lɛ, efeko esha ni akɛkeee.
Anyɛŋ akɛ Amɛhe Eshai lɛ Afa Amɛ
7. Mɛni hewɔ wɔbaanyɛ wɔkɛɛ akɛ mɛi ni te shi wo Yesu yɛ jamɔ mli lɛ ateŋ mɛi komɛi fee esha ni anyɛŋ akɛke lɛ?
7 Yudafoi ajamɔ mli hiɛnyiɛlɔi komɛi ni te shi wo Yesu lɛ jɛ amɛsuɔmɔ mli amɛfee esha ni anyɛŋ akɛke amɛ. Eyɛ mli akɛ amɛna Nyɔŋmɔ mumɔ krɔŋkrɔŋ lɛ ni miitsu nii yɛ Yesu nɔ, beni efeɔ ekpakpa ni efeɔ naakpɛɛ nii lɛ moŋ, shi nakai osɔfoi lɛ kɛɛ ehewalɛ lɛ jɛ Beelzebul, loo Satan Abonsam hewalɛ mli. Amɛdamɔ nilee ni amɛyɔɔ yɛ Nyɔŋmɔ mumɔ lɛ nifeemɔ ni amɛna faŋŋ lɛ nɔ amɛfee esha. No hewɔ lɛ, amɛfee esha ni anyɛŋ akɛke amɛ, ejaakɛ Yesu kɛɛ: “Mɔ fɛɛ mɔ ni aaawie wiemɔ ko ashi mumɔ krɔŋkrɔŋ lɛ, aŋɔfaŋ lɛ yɛ je nɛŋ loo jeŋ ni baaba lɛ mli.”—Mateo 12:22-32.
8. Mɛni hewɔ anyɛŋ akɛ Yuda Iskariot esha lɛ ake lɛ lɛ?
8 Anyɛŋ akɛ Yuda Iskariot esha lɛ hu ake. Yesu ni etsɔɔ esɛɛ gbɛ lɛ ji nɔ ni jɛ gbɛ ni eje ekɛ osato kɛ anɔkwa ni ayeee fee nii lɛ mli ba. Akɛ nɔkwɛmɔ nɔ lɛ, beni Yuda na bɔ ni Maria kɛ mu ni jara waa fɔɔ Yesu lɛ, ebi akɛ: “Mɛni hewɔ ahɔɔɔ mu nɛɛ aheee denarioi ohai etɛ, ni aŋɔha ohiafoi?” Bɔfo Yohane kɛfata he akɛ: “Shi enɛ ni [Yuda] kɛɛ nɛɛ, jeee ohiafoi lɛ ahe ni dɔɔ lɛ hewɔŋ, shi moŋ julɔ ji lɛ, ni lɛ etoɔ fotro lɛ ni ehiɛɔ nɔ ni aŋɔwoɔ mli lɛ.” No sɛɛ etsɛɛɛ kwraa ni Yuda tsɔɔ Yesu sɛɛ gbɛ ekɛhe jwiɛtɛi kukuji 30. (Yohane 12:1-6; Mateo 26:6-16) Lɛlɛŋ, sane lɛ dɔ Yuda ni eyagbe ehe. ( Mateo 27:1-5) Shi akɛfaaa lɛ, ejaakɛ epɛsɛmkunya gbɛ ni ejeɔ ekɛfeɔ nii ni ekãa he yɛ mli kɛ ekutumpɔo nifeemɔ lɛ jie esha ni efee eshi mumɔ krɔŋkrɔŋ lɛ kpo. Kwɛ bɔ ni esa jogbaŋŋ ha akɛ Yesu aaatsɛ Yuda akɛ “laajemɔ bi lɛ”!—Yohane 17:12; Marko 3:29; 14:21.
Akɛ Amɛha Eshai Ke Amɛ
9. Mɛni hewɔ Nyɔŋmɔ kɛ esha ni David fee yɛ Batsheba he lɛ ke lɛ lɛ?
9 Eshai ni ajɛɔ suɔmɔ mli afeɔ lɛ yɛ sɔrɔto kwraa yɛ mɛi ni Nyɔŋmɔ kɛ amɛhe eshai eke amɛ lɛ atɔmɔi ahe. Okɛ Israel Maŋtsɛ David afee nɔkwɛmɔ nɔ. Ekɛ Batsheba, Uria ŋa lɛ fite gbala, ni yɛ sɛɛ mli lɛ eha Yoab tsɔ ŋaa koni Uria agbo yɛ tawuu mli. (2 Samuel 11:1-27) Mɛni hewɔ Nyɔŋmɔ na David mɔbɔ? Titri lɛ yɛ Maŋtsɛyeli kpaŋmɔ lɛ hewɔ, kɛ agbɛnɛ yɛ David diɛŋtsɛ mɔbɔnalɛ kɛ etsuitsakemɔ yɛ anɔkwayeli mli lɛ hewɔ.—1 Samuel 24:4-7; 2 Samuel 7:12; 12:13.
10. Eyɛ mli akɛ Petro fee esha ni hiɛdɔɔ yɔɔ mli moŋ, shi mɛni hewɔ Nyɔŋmɔ kɛkɛ lɛ lɛ?
10 Agbɛnɛ hu susumɔ bɔfo Petro he. Efee esha ko ni hiɛdɔɔ yɔɔ mli yɛ Yesu ni ekwa lɛ shii abɔ lɛ hewɔ. Mɛni hewɔ Nyɔŋmɔ kɛfa Petro? Etamɔɔɔ Yuda Iskariot, Petro eye anɔkwa yɛ Nyɔŋmɔ kɛ Kristo sɔɔmɔ mli. Bɔfo nɛɛ esha lɛ jɛ gbɔmɔtsoŋ gbɔjɔmɔ, ni eshwa ehe diɛŋtsɛ ni “eje kpo eyafo aahu.”—Mateo 26:69-75.
11. Te obaatsɔɔ “tsuitsakemɔ” mli oha tɛŋŋ, ni mɛni esa akɛ mɔ ko afee kɛ eshwa ehe loo etsake etsui lɛlɛŋ?
11 Nɔkwɛmɔ nii ni wɔna nɛɛ tsɔɔ akɛ mɔ ni feɔ esha ni hiɛdɔɔ yɔɔ mli lɛ po baanyɛ ana Yehowa Nyɔŋmɔ dɛŋ eshaifaa. Shi mɛɛ su ji nɔ ni ataoɔ dani akɛke? Kɛ Nyɔŋmɔ kɛaafa Kristofonyo ni etɔ lɛ, belɛ anɔkwa tsuitsakemɔ he miihia. Ni aaatsake tsui tsɔɔ “esha ni aaatsi he kɛaajɛ he kɛtsɔ dɔlɛ ni aaajie lɛ kpo yɛ efɔŋ ni afee yɛ tsutsu lɛ he” aloo “he ni aaashwa loo awerɛho ni mɔ ko aaaye yɛ nɔ ni mɔ lɛ efee loo efeee hewɔ.” (Webster’s Third New International Dictionary) Mɔ ni etsake etsui lɛlɛŋ lɛ baajie dɔlɛ kpo yɛ ahorabɔɔ, awerɛho, loo haomɔi ni ehe eshai lɛ kɛba Yehowa gbɛi lɛ kɛ egbɛjianɔtoo lɛ nɔ lɛ he. Efɔŋ feelɔ ni etsake etsui lɛ hu baawo yibii ni tsɔɔ nakai, ni ebaatsu nitsumɔi ni sa tsuitsakemɔ (Mateo 3:8; Bɔfoi lɛ Asaji 26:20) Akɛ nɔkwɛmɔ nɔ lɛ, kɛji akɛ etswa mɔ ko ojo lɛ, ebaato gbɛjianɔ ni sa koni eto mɔ lɛ najiaŋ. (Luka 19:8) Kristofonyo ni etsake etsui nɛkɛ lɛ yɛ Ŋmalɛ naa yiŋtoo ni sa ni eeedamɔ nɔ ena hekɛnɔfɔɔ akɛ Yehowa kɛbaake lɛ aahu. Mɛni ji enɛɛmɛi?
Yiŋtoi ni Adamɔɔ nɔ Anaa Hekɛnɔfɔɔ yɛ Nyɔŋmɔ Eshaifaa Mli
12. Mɛni nɔ Lala 25:11 damɔɔ etsɔɔ akɛ mɔ ni etsake etsui lɛ baanyɛ asɔle kɛha eshaifaa lɛ?
12 Efɔŋ feelɔ ni etsake etsui lɛ baanyɛ adamɔ Yehowa gbɛi lɛ nɔ asɔle yɛ hekɛnɔfɔɔ mli kɛha eshaifaa. David kpa fai akɛ: “Yehowa, ogbɛi lɛ hewɔ lɛ, ŋɔɔ minɔsha lɛ ofa mi, ejaakɛ eda.” (Lala 25:11) Esa akɛ sɔlemɔ ni tamɔ nɛkɛ, ni tsuitsakemɔ yɛ ahorabɔɔ ni efɔŋ feelɔ lɛ kɛba Yehowa gbɛi lɛ nɔ lɛ fata he lɛ atsu nii akɛ nɔ ni baatsi esha ni hiɛdɔɔ yɔɔ mli ni aaafee yɛ wɔsɛɛ be mli lɛ naa.
13. Mɛɛ gbɛfaŋnɔ sɔlemɔ tsuɔ yɛ eshaifaa ni Nyɔŋmɔ kɛhaa lɛ mli?
13 Yehowa Nyɔŋmɔ boɔ etsuji ni tɔ̃ɔ ni amɛtsakeɔ amɛtsui lɛ asɔlemɔi ni jɛ tsuiŋ tɔ̃ɔ lɛ toi. Akɛ nɔkwɛmɔ nɔ lɛ, Yehowa tsimɔɔɔ etoi yɛ David ni jɛ etsuiŋ esɔle, beni eyɔse bɔ ni esha ni efee yɛ Batsheba he lɛ da ha lɛ he. Yɛ anɔkwale mli lɛ, David wiemɔi ni yɔɔ Lala 51 lɛ jieɔ heshibaa faikpamɔ sɔlemɔi akpo. Ekpa fai akɛ: “Naa mi mɔbɔ, Nyɔŋmɔ, yɛ omlihilɛ naa; omusuŋtsɔlɛ falɛ naa lɛ, gbee minɔtɔmɔi lɛ! Juu mihe kwraa kɛjɛ minɔsha lɛ mli, ni otsuu mihe kɛjɛ mihe esha lɛ mli! Nyɔŋmɔ afɔlei lɛ ji mumɔ ni werɛ eho ehe; tsui ni werɛ eho ehe ni tswiaa shi kɛ dɔlɛ lɛ, Nyɔŋmɔ, okpoŋ!”—Lala 51:3, 4, 19.
14. Mɛɛ gbɛ nɔ Ŋmalɛi lɛ maa nɔ mi yɛ akɛ Nyɔŋmɔ kɛ mɛi ni tsɔɔ hemɔkɛyeli yɛ Yesu kpɔmɔ afɔleshaa lɛ mli lɛ ahe eshai keɔ amɛ?
14 Nyɔŋmɔ kɛfaa mɛi ni tsɔɔ hemɔkɛyeli yɛ Yesu kpɔmɔ afɔleshaa lɛ mli. Paulo ŋma akɛ: “Lɛ emli nɔŋŋ wɔna kpɔmɔ lɛ yɛ, ni ji nɔtɔmɔi afaa lɛ, yɛ ela lɛ hewɔ, yɛ eduromɔ falɛ lɛ naa.” (Efesobii 1:7) Nakai shishinumɔ nɔŋŋ bɔfo Yohane kɛŋma akɛ: “Mibii bibii, miiŋma nyɛ nii nɛɛ, koni nyɛkafee esha. Ni kɛ mɔ ko fee esha jiŋŋ, wɔyɛ mlidamɔlɔ yɛ Tsɛ lɛ ŋɔɔ, Yesu Kristo, jalɔ lɛ. Ni lɛ ji wɔhe eshai lɛ ahe kpatamɔ nɔ; shi jeee wɔ nɔ lɛ kɛkɛ he, shi moŋ jeŋ muu lɛ fɛɛ nɔ lɛ hu he.”—1 Yohane 2:1, 2.
15. Mɛni esa akɛ eshafeelɔ ni etsake etsui lɛ afee, koni eya nɔ ena Nyɔŋmɔ mɔbɔnalɛ mli ŋɔɔmɔ?
15 Yehowa mɔbɔnalɛ lɛ kɛ nɔdaamɔ nɔ kɛha hekɛnɔfɔɔ haa akɛ abaanyɛ akɛ efɔŋ feelɔ ni etsake etsui lɛ he eshai ake lɛ. Nehemia kɛɛ: “Shi bo lɛ eshaifaa Nyɔŋmɔ jio, durolɔ kɛ musuŋtsɔlɔ, ni otoɔ tsui shi ni omɔbɔnalɛ fa.” (Nehemia 9:17; okɛto 2 Mose 34:6, 7 he.) Shi kɛ eshafeelɔ lɛ aaaya nɔ ana ŋwɛi mɔbɔnalɛ mli ŋɔɔmɔ lɛ, esa akɛ ebɔ mɔdɛŋ ni eye Nyɔŋmɔ mlai anɔ. Taakɛ Lalatsɛ lɛ kɛɛ lɛ, “ha omusuŋtsɔlɛ lɛ aba minɔ, ni miyi ana wala; ejaakɛ omla lɛ he mimii shɛɔ. Yehowa, omusuŋtsɔlɛi lɛ fa babaoo; okojomɔi lɛ anaa lɛ ha miyi ana wala.”—Lala 119:77, 156.
16. Mɛɛ miishɛjemɔ yɔɔ, yɛ anɔkwale ni eji akɛ Nyɔŋmɔ susuɔ eshafeemɔ shihilɛ ni wɔyɔɔ mli lɛ he lɛ hewɔ?
16 Anɔkwale ni eji akɛ Yehowa susuɔ eshafeemɔ shihilɛ mli ni wɔyɔɔ lɛ he lɛ haa eshafeelɔ ni etsake etsui lɛ naa miishɛjemɔ kɛ nɔ ni eeedamɔ nɔ esɔle yɛ hekɛnɔfɔɔ mli akɛ Nyɔŋmɔ kɛbaake lɛ. (Lala 51:7; Romabii 5:12) Lalatsɛ David kɛ nɔmimaa ni shɛjeɔ mɔ mii ha beni ejaje akɛ: “Jeee wɔhe eshai lɛ anaa [Yehowa Nyɔŋmɔ] kɛ wɔ yeɔ yɛ, ni jeee wɔnishaianii lɛ anaa ewoɔ wɔ nyɔmɔ yɛ. Shi moŋ bɔ ni ŋwɛi kwɔ fe shikpɔŋ lɛ, nakai emɔbɔnalɛ lɛ fa yɛ mɛi ni sheɔ lɛ lɛ anɔ. Bɔ ni boka kɛ anai teŋ jɛkɛ lɛ, nakai ehaa wɔkɛ wɔnɔtɔmɔi lɛ ateŋ jɛkɛɔ. Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ni sheɔ lɛ lɛ ahe. Ejaakɛ ele wɔsu kɛ wɔbaŋ, ekaiɔ akɛ su kɛkɛ ji wɔ.” (Lala 103:10-14) Hɛɛ, wɔŋwɛi Tsɛ lɛ naa mɔbɔ ni emusuŋ tsɔɔ lɛ babaoo po fe fɔlɔ ni ji adesa.
17. Mɔ ko tsutsu sɔɔmɔ kɛha Nyɔŋmɔ yɛ anɔkwayeli mli lɛ kɔɔ eshaifaa he yɛ mɛɛ gbɛ nɔ?
17 Eshafeelɔ ni etsake etsui lɛ baanyɛ asɔle kɛha eshaifaa kɛ hekɛnɔfɔɔ akɛ Yehowa ekuŋ ehiɛ eshwieŋ etsutsu sɔɔmɔ yɛ anɔkwayeli mli lɛ nɔ. Jeee akɛ Nehemia miisɔle koni akɛ ehe eshai ake lɛ, shi moŋ ekɛɛ: “Mi-Nyɔŋmɔ, kaimɔ mi, ni ahi aha mi.” (Nehemia 13:31) Kristofonyo ni etsake etsui lɛ baanyɛ ana miishɛjemɔ kɛjɛ wiemɔi nɛɛ amli: “Ejaakɛ Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ” lɛ.—Hebribii 6:10.
Yelikɛbuamɔ ni Jɛ Onukpai lɛ Aŋɔɔ
18. Mɛni esa akɛ afee kɛ Kristofonyo lɛ esha eha efee mɔ ni he miiye yɛ mumɔŋ?
18 Shi kɛji akɛ Kristofonyo ko nuɔ he akɛ ejeee mɔ ni sa akɛ ehiɔ mumɔŋ paradeiso lɛ mli loo enyɛɛɛ esɔle ejaakɛ ehe eshai lɛ eha ehe miiye yɛ mumɔŋ hu? Kaselɔ Yakobo ŋma akɛ: “Etsɛ asafo lɛ mli onukpai lɛ kɛba eŋɔɔ, ni amɛkpa lɛ mu yɛ Nuŋtsɔ [Yehowa] gbɛi amli ni amɛsɔle amɛha lɛ, ni hemɔkɛyeli sɔlemɔ lɛ aaahere helatsɛ lɛ yiwala, ni Nuŋtsɔ [Yehowa] aaatee lɛ shi, ni kɛji efee esha lɛ, aaaŋɔfa lɛ.” Hɛɛ asafo lɛ mli onukpai lɛ baanyɛ amɛkɛ naanyo heyelilɔ ni etsake etsui lɛ asɔle, ni amɛsɔle amɛha lɛ, kɛ hiɛnɔkamɔi akɛ amɛaasaa lɛ ekoŋŋ kɛba mumɔŋ hewalɛnamɔ kpakpa mli.—Yakobo 5:14-16.
19. Kɛ ashwie mɔ ko kɛjɛ asafo lɛ mli lɛ, mɛni esa akɛ efee koni akɛke lɛ ni ahe lɛ kɛba asafo lɛ mli ekoŋŋ.
19 Kɛji akɛ kojomɔ ajinafoi shwie eshafeelɔ ni tsakeee etsui po lɛ, enɛ etsɔɔɔ doo akɛ efee esha ni anyɛŋ akɛfa lɛ. Shi dani akɛaake lɛ ni ahe lɛ ekoŋŋ lɛ, esa akɛ ekɛ heshibaa abo Nyɔŋmɔ mlai atoi, ni ewo yibii ni sa tsuitsakemɔ, ni ebi onukpai lɛ ni amɛhe lɛ ekoŋŋ. Beni ashwie ajwamaŋbɔlɔ ko kɛjɛ asafo ko ni yɔɔ blema Korinto lɛ mli lɛ sɛɛ lɛ, Paulo ŋma akɛ: “Nakai mɔ lɛ, ehiɛ ni mɛi eka lɛ fa ha lɛ, hewɔ lɛ agbɛnɛ nyɛŋo-faa lɛ, ni nyɛshɛje emii moŋ, koni ŋkɔmɔyeli tuutu lɛ akabasu etsui. No hewɔ lɛ, miikpa nyɛ fai ni nyɛha nyɛsuɔmɔ lɛ mli awa yɛ enɔ.”—2 Korintobii 2:6-8; 1 Korintobii 5:1-13.
Nyɔŋmɔ kɛ Hewalɛ Haa
20, 21. Mɛni baanyɛ aye abua mɔ ni feɔ yeyeeye loo ehao yɛ esha ni ekolɛ akɛkeee ni efee hewɔ lɛ?
20 Kɛ nibii tamɔ hewalɛ kpakpa ni anaaa loo haomɔ miiha oofee yeyeeye yɛ esha ni anyɛŋ akɛke ni ofee he lɛ, hejɔɔmɔ kɛ wɔɔ ni ooona lɛ baanyɛ aye abua. Shi titri lɛ, esa akɛ okai Petro wiemɔi lɛ: “Nyɛŋɔa nyɛhaomɔ fɛɛ nyɛfɔa [Nyɔŋmɔ] nɔ, ejaakɛ lɛ ejwɛŋɔ nyɛnɔ.” Ni nyɛkahaa Satan miijea nyɛnijiaŋ wui kɔkɔɔkɔ, ejaakɛ Petro kɛfata he akɛ: “Nyɛhiɛ akaa shi, nyɛsaraa; ejaakɛ nyɛhenyɛlɔ Abonsam lɛ nyiɛ tamɔ jata ni huuɔ eetao mɔ ni eeemi. Nyɛdamɔa shi shiŋŋ yɛ hemɔkɛyeli lɛ mli nyɛtsia lɛ gbɛ, ejaakɛ nyɛle akɛ nakai amanehului lɛ nɔŋŋ nyɛ nyɛmimɛi ni yɔɔ je lɛŋ lɛ hu naa. Shi duromɔ fɛɛ Nyɔŋmɔ . . . lɛ, lɛ diɛŋtsɛ eeesaa nyɛ pɛ, ni eeewaje nyɛ, ni eeewo nyɛ hewalɛ, ni eeeha nyɛfi shi shiŋŋ.”—1 Petro 5:6-10.
21 No hewɔ lɛ, kɛ ooye awerɛho yɛ esha ko hewɔ, shi ooshe gbeyei akɛ oye esha ni akɛkeŋ bo lɛ he fɔ lɛ, kaimɔ akɛ Nyɔŋmɔ gbɛi lɛ nilee, jalɛ kɛ suɔmɔ gbɛi ni. No hewɔ lɛ, sɔlemɔ oha lɛ yɛ hemɔkeyeli mli. Yaa nɔ oye mumɔŋ niyenii ni etsɔɔ “tsulɔ anɔkwafo kɛ nilelɔ” lɛ nɔ ekɛhaa lɛ. (Mateo 24:45-47) Okɛ ohe abɔ nanemɛi heyelilɔi lɛ ahe ni okɛ ohe awo Kristofoi asɔɔmɔ nitsumɔ lɛ mli be fɛɛ be. Enɛ baawaje ohemɔkɛyeli ni eha oye ohe kɛje gbeyeishemɔ ni onaa akɛ ekolɛ Nyɔŋmɔ kɛ ohe eshai lɛ ekeko bo lɛ mli.
22. Mɛni wɔbaasusu he yɛ enɛ sɛɛ?
22 Mɛi ni hiɔ mumɔŋ paradeiso lɛ mli lɛ baanyɛ ana miishɛɛ yɛ nilee ni amɛyɔɔ akɛ Yehowa kɛfaa aahu lɛ mli. Ní kɛlɛ, amɛshihilɛ jeee nɔ ni kaai bɛ mli ŋmɛnɛ. Ekole amɛhaoɔ ejaakɛ suɔlɔ ho egbo loo naanyo ko ni asumɔɔ lɛ waa lɛ he miiye waa. Taakɛ wɔbaana lɛ, Yehowa yeɔ ebuaa ni etsɔɔ emumɔ krɔŋkrɔŋ lɛ nɔ enyiɛɔ ewebii ahiɛ yɛ enɛɛmɛi kɛ agbɛnɛ yɛ shihilɛi krokomɛi amli.
Mɛni Ji Ohetooi?
◻ Mɛɛ odaseyeli yɔɔ ni tsɔɔ akɛ Yehowa ‘kɛfaa aahu’?
◻ Mɛɛ esha akɛkeee?
◻ Mɛɛ shihilɛ ashishi akɛ mɔ ko eshai keɔ lɛ?
◻ Mɛni hewɔ efɔŋ feelɔi ni amɛtsake amɛtsui baanyɛ ana hekɛnɔfɔɔ yɛ esha ni Nyɔŋmɔ kɛfaa lɛ mli lɛ?
◻ Mɛɛ yelikɛbuamɔ yɔɔ kɛha eshafeelɔi ni amɛtsake amɛtsui lɛ?
[Mfoniri ni yɔɔ baafa 10]
Ani ole nɔ hewɔ ni akɛ David kɛ Petro he eshai ke amɛ shi akɛ Yuda Iskariot nɔ lɛ ekeee lɛ lɛ?
[Mfoniri ni yɔɔ baafa 12]
Yelikɛbuamɔ ni asafoŋ onukpai kɛaaha lɛ baanyɛ afee babaoo ni eye ebua Kristofonyo ko yɛ mumɔŋ