Sanebimɔi Ni Jɛ Kanelɔi Adɛŋ

◼ Ani Kristofoi ni afɔ amɛ mu lɛ ateŋ mɛi komɛi baaje “amanehulu kpeteŋkpele” Iɛ mli ni amɛya nɔ amɛhi shikpɔŋ hee Iɛ nɔ dani aŋɔ amɛ kɛya ŋwɛi?

Kɛ wɔɔwie lɛ pɔtɛɛ lɛ, Biblia lɛ ewieee enɛ he.

Jeeŋmɔ beebe Kristofoi jɛ amɛnya hegbɛi ni Nyɔŋmɔ kɛhaa amɛ lɛ ahe. (Bɔfoi lɛ Asaji 1:⁠6) Ni enɛ efee anɔkwale, titri Iɛ yɛ wɔbei nɛɛ amli, kɛjɛ be mli ni ato Maŋtsɛyeli Iɛ ama shi lɛ. (Mateo 24:​3, 24, 34) Akɛni yiwalɛ gbɛjianɔtoo nɛɛ baaba enaagbee yɛ amɛbeaŋ hewɔ lɛ, Kristofoi esusu kɛji akɛ mɛi ni akɛ mumɔ efɔ amɛ mu lɛ ateŋ mɛi komɛi baahi shi kɛtsɔ “Nyɔŋmɔ Ofe Iɛ gbi wulu Iɛ ta lɛ” mli, ni amɛsɔmɔ yɛ shikpɔŋ nɔ yɛ be ko mli dani amɛnine ashɛ amɛŋwɛi nyɔmɔwoo lɛ nɔ. (Kpojiemɔ 16:14) Biblia Iɛ ewieee enɛ he akɛ ebaanyɛ ebalɛ nakai, ni kɛlɛ, nɔkwɛmɔ nii kɛ gbalɛi komɛi yɛ ni asusuɔ he akɛ yɛ nomɛi ahewɔ Iɛ nakai ebaaba lɛ. Ni wɔɔfee keketee moŋ yɛ enɛ he lɛ, esa akɛ wɔkwɛ ni wɔmɛ bɔ ni Nyɔŋmɔ baatsu nibii ahe nii eha.

Saji komɛi ni ba yɛ Biblia bei amli Iɛ naa amɛhe nɔkwɛmɔ nii yɛ sɛɛ mli yɛ Nyɔŋmɔ webii ateŋ. Akɛ nɔkwɛmɔ nɔ lɛ, wɔle akɛ Yona hi ŋshɔŋloo agbo ko mli gbii etɛ, jetsɛremɔ kɛ jenamɔ. Mɛi komɛi baasusu enɛ he akɛ eji ŋwɛi yiwalaheremɔ ko he nɔkwɛmɔ nɔ, shi Yesu kɛɛ akɛ eji gbalɛ nɔkwɛmɔ nɔ ni tsɔɔ bɔ ni ebaahi gbonyo bu mli be falɛ ni tamɔ nakai dani atee lɛ shi. (Yona 1:​17; Mateo 12:40) Hɛɛ, Yona niiashikpamɔ lɛ ji gbalɛ mfoniri. Yɛ shishinumɔ naa lɛ, Nyɔŋmɔ webii lɛ ekwɛ gbalɛi komɛi kɛ Biblia mli saji komɛi pɔtɛɛ koni amɛna kɛji akɛ enɛɛmɛi hu baatsɔɔ bɔ ni Yehowa kɛ amɛ baaye aha.

Akɛ nɔkwɛmɔ nɔ ni kɔɔ Biblia gbalɛ he lɛ, The Watch Tower ni akala yɛ December 15, 1928 lɛ wie Mika 5:​2-15 he. Mika wolo lɛ wieɔ ‘Ashurbii’ ni fee Samaria amaŋfɔ lɛ he kɛ agbɛnɛ Yudafoi Iɛ asɛɛkuu kɛmiijɛ Babilon nomŋɔɔ mli Iɛ hu he. (Mika 1:​1, 5-7; 4:10) Shi egbalaa jwɛŋmɔ kɛyaa sɛɛ mli nibii ni baaba lɛ hu nɔ, tamɔ Mesia lɛ fɔmɔ yɛ Betlehem. (Mika 5:⁠2) Mika gba akɛ yɛ be mli ni ajie amɛ kɛjɛ “Ashur” dɛŋ Iɛ sɛɛ lɛ, “Yakob shwɛɛnɔ lɛ aaatsɔ tamɔ bɔ ni jɛ Yehowa ŋɔɔ” kɛ agbɛnɛ “tamɔ jata obalanyo yɛ tooikui ateŋ.” (Mika 5:​6-8) The Watch Tower lɛ wie enɛ he akɛ: “Ekolɛ abaanyɛ akɛɛ akɛ enɛ tsɔɔ akɛ shwɛɛ nii lɛ ateŋ mɛi komɛi baahi shikpɔŋ nɔ yɛ be mli ni awuu Harmagedon ta lɛ sɛɛ po, ni amɛbaana nitsumɔ babaoo amɛtsu yɛ Nuŋtsɔ lɛ gbɛi amli kɛha eyijiemɔ kɛ enunyam.” Kadimɔ hiɛshikamɔ, kɛ wiemɔi ni shishinumɔ yɔɔ mli ni akɛkpa nɔ ni ekolɛ eeenyɛ eba Iɛ hiɛ Iɛ: “Ekolɛ abaanyɛ akɛɛ akɛ enɛ tsɔɔ akɛ.”

Ni Biblia mli sane ni abaanyɛ akɛto yiwalaheremɔ ni tamɔ nɛkɛ he yɛ shikpɔŋ nɔ lɛ hu? Nɔkwɛmɔ nɔ kome ko ni akɛha lɛ kɔɔ Noa kɛ eweku lɛ he. Abuɔ Noa akɛ efeɔ Yesu he mfoniri yɛ naagbee be nɛɛ mli. (1 Mose 6:​8-10; Mateo 24:37) Bɔ ni Noa nyiɛ eŋa kɛ ebihii etɛ lɛ kɛ eshaayei etɛ Iɛ ahiɛ kɛtsɔ nakai blema gbɛjianɔtoo Iɛ naagbee lɛ mli lɛ, nakai nɔŋŋ Kristo hu baanyiɛ eyemforo kuu lɛ mli shwɛɛ nii Iɛ kɛ mɛi ni batsɔmɔɔ “Naanɔ Tsɛ” Yesu bii lɛ ahiɛ. Noa ŋa Iɛ je Nu Afua Iɛ mli, ni ena anɔkwa jamɔ ni ato shishi ekoŋŋ yɛ shikpɔŋ ni atsuu nɔ Iɛ mli gbɛfaŋnɔ. Nɔ ni tamɔ enɛ baanyɛ afee ayemforo kuu Iɛ mli shwɛɛ nii lɛ ni baaje mli kɛyabote jeŋ hee Iɛ mli.​—Yesaia 9:​6, 7; 2 Korintobii 11:2; Kpojiemɔ 21:​2, 9.a

Asusu Biblia mli saji krokomɛi ahe akɛ nomɛi hu tsɔɔ akɛ shwɛɛ nii lɛ ateŋ mɛi komɛi baanyɛ amɛhi wala mli kɛyabote jeŋ hee lɛ mli. Akɛ nɔkwɛmɔ nɔ lɛ, Yeremia je Yerusalem hiɛkpatamɔ Iɛ mli; “nuu” ni hiɛ woloŋmalɔ tɔ lɛ hu hi shi ni ena hiɛkpatamɔ nitsumɔ lɛ dani eku esɛɛ etee eyabɔ amaniɛ.​—Ezekiel 9:​4, 8, 11.

Wiemɔi ni tsɔɔ akɛ ekolɛ mɛi ni afɔ amɛ mu lɛ ateŋ mɛi komɛi baanyɛ aje mli kɛyabote jeŋ hee lɛ mli lɛ ji wiemɔi ni akɛ jwɛŋmɔ kpakpa wieɔ yɛ nɔkwɛmɔ nii ni anaa yɛ Biblia Iɛ mli ni akɛmiibɔ mɔdɛŋ ni anu gbalɛi loo nɔkwɛmɔ nii ni baanyɛ aba mli yɛ sɛɛ mli Iɛ ashishi lɛ hewɔ. Kɛji akɛ eba akɛ ashiii mɛi ni afɔ amɛ mu Iɛ ateŋ mɛi komɛi yɛ shikpɔŋ nɔ lɛ, enɛ kɛ tsui ni enyɔɔɔ mɔ mli baŋ. Wɔkpɛlɛ nɔ mɔmɔ akɛ anuɔ Biblia mli saji ashishi jogbaŋŋ yɛ be mli ni be hoɔ. Akɛ nɔkwɛmɔ nɔ lɛ, The Watchtower ni akala yɛ January 15, 1981 lɛ wie Mika 5:​6-9 he ekoŋŋ ni etsɔɔ mli akɛ, “mumɔŋ lsrael shwɛɛ nii Iɛ emɛɛɛ kɛyashi . . . Harmagedon sɛɛ dani amɛtsɔmɔ tamɔ ‘bɔ’ ni shɛjeɔ gbɔmɛi amii.” Nɛkɛ sane nɛɛ he susumɔ haa anaa akɛ ekolɛ shwɛɛ nii Iɛ baanyɛ aje Nyɔŋmɔ ta kpeteŋkpele lɛ mli ni “amɛya nɔ amɛtsɔmɔ tamɔ ‘bɔ’ ni shɛjeɔ mɛi amii amɛha ‘asafo babaoo’ ni ji ‘toi krokomɛi’ Iɛ,” yɛ be ko mli. Shi wɔbaanyɛ wɔna akɛ, bei ni hoɔ kɛ mumɔŋ la ni kpɛɔ babaoo lɛ baanyɛ aha shishinumɔ ni wɔyɔɔ yɛ Biblia mli gbalɛi loo Biblia mli nɔkwɛmɔ nii ahe Iɛ mli alɛɛ loo etsake.​—Abɛi 4:⁠18.

Wɔle akɛ Biblia lɛ kɛ ‘gbɔmɔ Bi lɛ baa’ toɔ ‘mɛi ni ahala lɛ anaabuamɔ kɛmiijɛ kɔɔyɔi ejwɛ lɛ anaa’ lɛ he. (Mateo 24:​29-31) Agbɛnɛ, yɛ be mli ni ‘Nuŋtsɔ lɛ eba’ yɛ Maŋtsɛyeli hewalɛ mli nɛɛ, ateeɔ mɛi ni afɔ amɛ mu lɛ ni wɔɔ yɛ gbele mli Iɛ ashi kɛyaa ŋwɛi wala mli. (1 Tesalonikabii 4:​15, 16) Mɛi ni asɔo amɛnaa nɛɛ yɛ jɛmɛ akɛ mɛi ni baafee Toobi lɛ ŋa lɛ fa. Mɛɛ be enɛ baa mli?

Yɛ Kpojiemɔ wolo Iɛ mli, yɛ be mli ni Yohane gba akɛ Nyɔŋmɔ ekpata jamɔ mli ajwamaŋ, Babilon Kpeteŋkple lɛ hiɛ Iɛ sɛɛ nɔŋŋ pɛ kɛkɛ ni etsɔɔ “Toobi Iɛ yookpeemɔ” lɛ mli. Ajie “yoo” ajwamaŋ ni he yɔɔ taŋ Iɛ kɛtee, ni wɔnaa “ayemforo lɛ, Toobi Iɛ ŋa lɛ” ni ‘wo klala ni he tse ni kpɛlɛɔ nyeramnyeram, ni damɔ shi kɛha krɔŋkrɔŋbii lɛ ajalɛ nii’ lɛ. (Kpojiemɔ 18:​10; 19:​2, 7, 8; 21:⁠9) Babilon Kpeteŋkple lɛ hiɛkpatamɔ fata amanehulu kpeteŋkpele lɛ he. (Mateo 24:​21; Kpojiemɔ 7:14) No hewɔ lɛ abaanyɛ asusu akɛ ayemforo kuu Iɛ mlibii lɛ ateŋ mɛi komɛi baanyɛ aje amanehulu kpeteŋkpele Iɛ mli akɛ Yehowa nɔkpɛlɛmɔ kɛ ehebuu he odaseyeli. (Zefania 2:3; okɛto Mateo 24:22 he.) Kɛ abaa amɛyi nɛkɛ yɛ shikpɔŋ nɔ lɛ, amɛbaahi biɛ kɛyashi be mli ni Nyɔŋmɔ aaahala akɛ eeeŋɔ amɛ kɛaaya ŋwɛi.

Shi, bɔ ni akɛ Kpojiemɔ lɛ ha lɛ etsɔɔɔ akɛ nakai pɛpɛɛpɛ ato nibii Iɛ anaa akɛ esa akɛ eba yɛ. Akɛ enɛ etsɔɔɔ akɛ shwɛɛ nii ni afɔ amɛ mu Iɛ ateŋ mɛi fioo ni eshwɛ lɛ ahe baahia dani jeŋ hee lɛ aje shishi, ejaakɛ amɛtsɔse Kristofoi anɔkwafoi akpekpei abɔ ni baahi shi kɛya naanɔ yɛ shikpɔŋ nɔ. No hewɔ lɛ, Nyɔŋmɔ baanyɛ ni ekɛ emɛi ni efɔ amɛ mu Iɛ aya ŋwɛi amrɔ nɔŋŋ yɛ Babilon Kpeteŋkpele Iɛ hiɛkpatamɔ Iɛ sɛɛ, koni eto gbɛjianɔ kɛha “Toobi lɛ yookpeemɔ lɛ” mlibaa. Kɛkɛ lɛ, krɔŋkrɔŋbii lɛ fɛɛ baanyɛ ana hegbɛ kɛ Kristo yɛ ‘jeŋmaji lɛ ni akɛ dadetso aaakpala amɛ’ lɛ mli yɛ amanehulu kpeteŋkpele Iɛ fa ni eshwɛ lɛ mli. (Kpojiemɔ 2:​26, 27; 19:​11-21) Kɛji akɛ nakai ji bɔ ni Nyɔŋmɔ baaatsu nibii ahe nii lɛ, belɛ 144,000 lɛ fɛɛ kɛ Yesu baahi shi koni ‘amɛkɛ Kristo aye maŋtsɛ afii akpe kome lɛ fɛɛ.’​—Kpojiemɔ 20:⁠4.

Ehi jogbaŋŋ diɛŋtsɛ akɛ Nyɔŋmɔ webii ahe miitswa shi ni amɛyɛ miishɛɛ akɛ amɛaapɛi nibii amli diɛŋtsɛ ni amɛle bɔ ni ebaakudɔ saji ni ewo etsuji anyɔmɔ eha. (Okɛto 1 Petro 1:12 he.) Enɛ jieɔ amɛhekɛnɔfɔɔ lɛ kpo akɛ amɛbaafee esuɔmɔnaa nii. Eyɛ mli akɛ esaaa akɛ wɔfeɔ keketee ni wɔnyɛŋ wɔfee nakai hu yɛ saji komɛi ahe moŋ, shi wɔbaanyɛ wɔkɛ miishɛɛ kɛ hehiamɔ akpa nɔ ni baaba lɛ gbɛ.

[Shishigbɛ niŋmai]