Nyɔŋmɔ Maŋtsɛyeli Lɛ—Ani Ooyoo Sɛɛ?
“Shi mɔ ni adũ yɛ shikpɔŋ kpakpa nɔ lɛ, lɛ ji mɔ ni nuɔ wiemɔ lɛ ni eyooɔ sɛɛ.”—MATEO 13:23.
1. Mɛni ji hemɔkɛyelii komɛi ni egbɛ eshwã waa yɛ ‘ŋwɛi maŋtsɛyeli lɛ’ he?
ANI ‘oyoo’ nɔ ni Nyɔŋmɔ Maŋtsɛyeli lɛ ji lɛ ‘sɛɛ’? Shishinumɔ ni ahiɛ yɛ ‘ŋwɛi maŋtsɛyeli lɛ’ he lɛ efee sɔrɔtoi babaoo yɛ afii ohai abɔ ni eho lɛ amli. Hemɔkɛyeli ni egbɛ eshwã waa yɛ sɔlemɔyalɔi komɛi ateŋ ŋmɛnɛ ji akɛ, Maŋtsɛyeli lɛ ji nɔ ko ni Nyɔŋmɔ kɛwoɔ mɔ tsui mli yɛ be mli ni mɔ lɛ tsakeɔ lɛ. Mɛi krokomɛi hu nuɔ he akɛ eji he ko ni gbɔmɛi kpakpai yaa yɛ gbele sɛɛ ni amɛnaa naanɔ jɔɔmɔ mli ŋɔɔmɔ. Ni mɛi krokomɛi hu kɛɔ akɛ Nyɔŋmɔ eshi eha adesai ni amɛ diɛŋtsɛ amɛkɛ Maŋtsɛyeli lɛ aba shikpɔŋ nɛɛ nɔ, kɛtsɔ mɔdɛŋ ni amɛaabɔ ni amɛdũ Kristofoi atsɔɔmɔi kɛ nifeemɔi amɛwo adesai ashihilɛ kɛ nɔyeli gbɛjianɔtoi amli lɛ nɔ.
2. Te Biblia lɛ tsɔɔ Nyɔŋmɔ Maŋtsɛyeli lɛ, kɛ nɔ ni ebaatsu lɛ mli ehaa tɛŋŋ?
2 Shi kɛlɛ, Biblia lɛ tsɔɔ faŋŋ akɛ Nyɔŋmɔ Maŋtsɛyeli lɛ jeee gbɛjianɔtoo ko ni yɔɔ shikpɔŋ nɛɛ nɔ. Ejeee tsui mli shihilɛ loo adesai kɛ amɛshihilɛ gbɛjianɔtoo ni aaafee amɛ Kristofoi. Lɛlɛŋ, nɔ ni Maŋtsɛyeli nɛɛ ji lɛ he shishinumɔ ni ja ni aaana lɛ kɛ tsakemɔi wuji baa mɛi ni naa emli hemɔkɛyeli lɛ ashihilɛ mli. Shi Maŋtsɛyeli lɛ diɛŋtsɛ lɛ, eji Nyɔŋmɔ nɔyeli ni ajɛ ŋwɛi ato shishi, ni ebaaha Nyɔŋmɔ suɔmɔnaa nii aba mli, ni ebaajie nibii ni jɛɔ esha kɛ gbele mli kɛbaa lɛ kɛya ni ebaasaa ekɛ jalɛ shihilɛ aba shikpɔŋ nɔ ekoŋŋ. Amrɔ nɛɛ Maŋtsɛyeli nɛɛ eŋɔ hewalɛ yɛ ŋwɛi momo, ni etsɛŋ ni “eeejwara [adesai amaŋtsɛyelii] nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”—Daniel 2:44; Kpojiemɔ 11:15; 12:10.
3. Beni Yesu je esɔɔmɔ nitsumɔ lɛ shishi lɛ, mɛɛ hegbɛ naa gbele kɛha adesai?
3 Yinɔsane ŋmalɔ H. G. Wells ŋma akɛ: “Nɛkɛ Ŋwɛi Maŋtsɛyeli nɛɛ he tsɔɔmɔ, ni ji Yesu tsɔɔmɔ titri, ni naa gbɛfaŋnɔ bibioo ko pɛ yɛ Kristofoi ahemɔkɛyeli tsɔɔmɔi amli lɛ ji tsɔɔmɔi ni eka shi faŋŋ akɛ esoro amɛ kwraa yɛ fɛɛ eko ni ekanya ni etsake adesa susumɔ lɛ ateŋ ekome he.” Kɛjɛ shishijee tɔ̃ɔ lɛ, saneyitso ni Yesu sɔɔmɔ nitsumɔ lɛ wieɔ he ji: “Nyɛtsakea nyɛtsuii, shi ŋwɛi maŋtsɛyeli lɛ ebɛŋkɛ.” (Mateo 4:17) No mli lɛ eyɛ shikpɔŋ nɛɛ nɔ akɛ Maŋtsɛ ni afɔ lɛ mu, ni miishɛɛ ni fe miishɛɛ fɛɛ ji akɛ, agbɛnɛ aagbele gbɛ aaha adesai, jeee ni amɛna nakai Maŋtsɛyeli lɛ shishi jɔɔmɔi lɛ amli gbɛfaŋnɔ kɛkɛ, shi moŋ ni amɛfata Yesu he akɛ enanemɛi maŋtsɛmɛi kɛ osɔfoi yɛ nakai Maŋtsɛyeli lɛ mli!—Luka 22:28-30; Kpojiemɔ 1:6; 5:10.
4. Te asafoi babaoo lɛ here “maŋtsɛyeli lɛ he sanekpakpa lɛ” nɔ amɛha tɛŋŋ yɛ klɛŋklɛŋ afii oha lɛ mli, ni mɛɛ kojomɔ enɛ kɛba?
4 Eyɛ mli akɛ asafoi babaoo nu “maŋtsɛyeli lɛ he sanekpakpa” ni yɔɔ miishɛɛ lɛ moŋ, shi mɛi fioo pɛ he amɛye. Nɔ hewɔ ni enɛ ba lɛ nakai lɛ fã ji akɛ, jamɔ mli hiɛnyiɛlɔi lɛ “[eŋa] ŋwɛi maŋtsɛyeli lɛ naa yɛ gbɔmɛi ahiɛ.” “[Amɛkɔ] nilee lɛ naa samfele” lɛ kɛtsɔ amɛ amale tsɔɔmɔi lɛ anɔ. Akɛni gbɔmɛi lɛ ateŋ mɛi babaoo kpoo Yesu akɛ Mesia kɛ Nyɔŋmɔ Maŋtsɛyeli lɛ nɔ Maŋtsɛ ni afɔ lɛ mu hewɔ lɛ, Yesu kɛɛ amɛ akɛ: “Abaashɔ̃ Nyɔŋmɔ maŋtsɛyeli lɛ yɛ nyɛdɛŋ, ni aaaŋɔha jeŋmaŋ ko ni woɔ yibii.”—Mateo 4:23; 21:43; 23:13; Luka 11:52.
5. Mɛi ni bo Yesu abɛbuai lɛ atoi lɛ ateŋ mɛi pii tsɔɔ akɛ amɛbooo toi kɛ shishinumɔ, yɛ mɛɛ gbɛ nɔ?
5 Be ko beni etsɔɔ asafo babaoo ko nii lɛ, taakɛ efɔɔ feemɔ lɛ, Yesu kɛ abɛbuai sɔrɔtoi babaoo tsu nii ni ekɛka gbɔmɛi asafoi babaoo lɛ ni ekɛjie mɛi ni yɔɔ Maŋtsɛyeli lɛ he miishɛɛ yɛ hiɛaŋhiɛaŋ kɛkɛ lɛ kɛjɛ mli. Klɛŋklɛŋ abɛbua lɛ kɔɔ nidulɔ ko ni yadu dumɔwui yɛ shikpɔŋ sũi sɔrɔtoi ejwɛ mli lɛ he. Klɛŋklɛŋ sũi sɔrɔtoi etɛ lɛ jeee nɔ ni hi kɛha nidumɔ, shi naagbee nɔ lɛ ji “shikpɔŋ kpakpa” ni wo yibii kpakpai. Abɛbua kuku nɛɛ ba naagbee kɛ ŋaawoo wiemɔ nɛɛ akɛ: “Mɔ ni yɔɔ toi ni ekɛaanu lɛ, ha ni enu.” (Mateo 13:1-9) Mɛi ni yɔɔ jɛmɛ yɛ nakai beaŋ lɛ ateŋ mɛi pii nu, shi ‘amɛbooo toi.’ Amɛnaaa kanyamɔ ko, ni amɛnaaa he miishɛɛ diɛŋtsɛ ko hu akɛ amɛaale bɔ ni dumɔwui ni adũ yɛ shihilɛi sɔrɔtoi amli lɛ tamɔ ŋwɛi Maŋtsɛyeli lɛ eha. Amɛku amɛsɛɛ kɛtee shia, kɛtee amɛ daa gbi shihilɛi amli, ekolɛ kɛ susumɔ akɛ Yesu abɛbuai lɛ ji adesãi kpakpai komɛi ni kɔɔ jeŋba mli saneyitsei ahe kɛkɛ. Mɛɛ shishinumɔ ni mli kwɔ, ni mɛɛ hegbɛi kɛ gbɛhei ni yɔɔ nyam po amɛlaaje ni amɛnine shɛɛɛ nɔ nɛkɛ, ejaakɛ amɛtsuii ekpiliŋ!
6. Mɛni hewɔ akɛ “maŋtsɛyeli lɛŋ teemɔŋ saji lɛ” ashishinumɔ ha Yesu kaselɔi lɛ pɛ lɛ?
6 Yesu kɛɛ ekaselɔi lɛ akɛ: “Nyɛ lɛ aŋɔha nyɛ akɛ nyɛle ŋwɛi maŋtsɛyeli lɛŋ teemɔŋ saji lɛ, shi amɛ lɛ aŋɔhako amɛ.” Kɛkɛ ni beni etsɛɔ Yesaia wiemɔi asɛɛ lɛ, ekɛfata he akɛ: “ ‘Ejaakɛ nɛkɛ maŋ nɛɛ tsui ekpiliŋ, ni amɛtoii ewa, ni amɛmiamia amɛhiŋmɛii, ni amɛkanu kɛ amɛtoii, ni amɛtsui hu akana shishi, ni amɛkpale ni mitsa amɛ.’ Shi nyɛ lɛ, ajɔɔ nyɛhiŋmɛii lɛ, akɛ amɛmiina nii, kɛ nyɛtoii lɛ, ejaakɛ amɛmiinu nii.”—Mateo 13:10-16; Marko 4:11-13.
Maŋtsɛyeli lɛ ‘Shishi ni Aaanu’
7. Mɛni hewɔ ehe hiaa ni ‘ayoo’ Maŋtsɛyeli lɛ ‘sɛɛ’ lɛ?
7 Yesu tsɔɔ nɔ ni naagba lɛ ji diɛŋtsɛ. Ekɔɔ Maŋtsɛyeli shɛɛ sane lɛ ‘sɛɛ ni aaayoo’ he. Etsɛ ekaselɔi lɛ kɛtee afã ni ekɛɛ amɛ akɛ: “No hewɔ lɛ nyɛ lɛ nyɛboa nidulɔ lɛ he abɛ lɛ toi. Mɔ fɛɛ mɔ ni nuɔ maŋtsɛyeli lɛ he wiemɔ lɛ ni eyooo sɛɛ lɛ, mɔ fɔŋ lɛ baa bashaa nɔ ni adu yɛ etsui mli lɛ.” Etee nɔ etsɔɔ mli akɛ shikpɔŋ sũi sɔrɔtoi ejwɛ lɛ damɔ shi kɛha shihilɛi sɔrɔtoi ni tsui ni abaadũ “maŋtsɛyeli lɛ he wiemɔ lɛ” yɛ mli lɛ yɔɔ mli.—Mateo 13:18-23; Luka 8:9-15.
8. Mɛni tsĩ ‘dumɔwu’ ni adũ yɛ klɛŋklɛŋ sũi etɛ lɛ amli lɛ naa ni ehaaa ewo yibii lɛ?
8 ‘Dumɔwu’ lɛ hi yɛ eko fɛɛ eko mli, shi yibiiwoo lɛ baadamɔ bɔ ni sũ lɛ ji eha lɛ nɔ. Kɛji sũ ni ji tsui lɛ tamɔ gbɛjegbɛ ni anyiɛɔ nɔ daa, ni anaa nɔ aahu, ni nibii babaoo ni jeee mumɔŋ nibii ahe nitsumɔi eha ewa keketee lɛ, no lɛ ebaafee mlɛo kɛha mɔ ni nuɔ Maŋtsɛyeli shɛɛ sane lɛ akɛ eeejie enaa, akɛ enaaa be kwraa eha Maŋtsɛyeli lɛ. Abaanyɛ ashá dumɔwu ni ashi afɔ̃ shi lɛ kɛya oya dani eba akɛ eeenyɛ ena shishifã. Shi kɛji adũ dumɔwu lɛ yɛ tsui ni tamɔ shikpɔŋ ni tɛi yɔɔ nɔ hu? Ekolɛ dumɔwu lɛ baanyɛ akwɛ̃, shi ebaawa kɛha lɛ akɛ eeeha eshishifãi aya shikpɔŋ bɔ ni sa kɛha niyenii kpakpa namɔ kɛ eshidaamɔ shiŋŋ. Gbɛkpamɔ akɛ mɔ lɛ aaafee Nyɔŋmɔ tsulɔ ni feɔ toiboo, titri lɛ yɛ yiwaa ni naa wa waa shishi lɛ, baafee kaa ni baanyɛ aye enɔ kwraa, ni nakai mɔ aŋkro lɛ nane baatɔ̃tɔ̃. Ni shikome ekoŋŋ lɛ, kɛji etsui ni ji sũ lɛ eyi obɔ kɛ yeyeeye-feemɔi ni tamɔ ŋmeei loo heloonaa ninamɔ he akɔnɔ lɛ, no lɛ ebaatsurɔ Maŋtsɛyeli dumɔwu ni ekwɛ̃ bibioo lɛ ni ebaagbe lɛ. Awoŋ Maŋtsɛyeli yibii ko kwraa yɛ nɛkɛ shihilɛi sɔrɔtoi etɛ ni yɔɔ diɛŋtsɛ nɛɛ eko kwraa mli.
9. Mɛni hewɔ dumɔwu ni adũ yɛ shikpɔŋ kpakpa nɔ lɛ nyɛ ewo yibii kpakpai lɛ?
9 Shi, Maŋtsɛyeli dumɔwu ni adũ yɛ shikpɔŋ kpakpa nɔ lɛ hu? Yesu haa hetoo akɛ: “Shi mɔ ni adũ yɛ shikpɔŋ kpakpa nɔ lɛ, lɛ ji mɔ ni nuɔ wiemɔ lɛ ni eyooɔ sɛɛ, ni esaa ewoɔ yibii hu, ni ebaa, mɔ ko oha, mɔ ko hu nyɔŋmai ekpaa, ni mɔ ko hu nyɔŋmai etɛ.” (Mateo 13:23) Yɛ Maŋtsɛyeli lɛ ‘sɛɛyoomɔ’ mli lɛ, amɛbaawo yibii kpakpai yɛ shihilɛi ni amɛyɔɔ mli aŋkroaŋkro lɛ naa.
Gbɛnaa Nii Fataa Shishinumɔ He Kɛbaa
10. (a) Yesu tsɔɔ akɛ Maŋtsɛyeli lɛ ‘sɛɛ ni aaayoo’ lɛ kɛ jɔɔmɔi kɛ gbɛnaa nii fɛɛ baa yɛ mɛɛ gbɛ nɔ? (b) Ani famɔ ni Yesu kɛha akɛ aya ni ayafee mɛi kaselɔi lɛ kɔɔ klɛŋklɛŋ afii oha lɛ mli kaselɔi pɛ ahe?
10 Beni ekɛ abɛbuai krokomɛi ekpaa eha ni ekɛtsɔɔ Maŋtsɛyeli lɛ he nibii sɔrɔtoi amli sɛɛ lɛ, Yesu bi ekaselɔi lɛ akɛ: “Nyɛna nii nɛɛ fɛɛ shishi lo?” Beni amɛha lɛ hetoo akɛ “hɛɛ” lɛ, ekɛɛ amɛ akɛ: “No hewɔ lɛ, woloŋmalɔ fɛɛ woloŋmalɔ ni afee lɛ kaselɔ aha ŋwɛi maŋtsɛyeli lɛ, etamɔ shiatsɛ ko ni jieɔ nii heei kɛ nii memeji kɛjɛɔ ejwetri lɛŋ.” Tsɔɔmɔi kɛ tsɔsemɔ ni Yesu kɛha ekaselɔi lɛ baatswa amɛ ema shi ni amɛaatsɔmɔ Kristofoi ni edara yɛ mumɔŋ, ni baanyɛ ajie mumɔŋ niyenii kpakpai ni sɛɛ efooo kɛjɛ amɛ ‘jwetri’ lɛ mli. Enɛ mli nibii babaoo kɔɔ Nyɔŋmɔ Maŋtsɛyeli lɛ he. Yesu fee lɛ faŋŋ akɛ jeee jɔɔmɔi pɛ Maŋtsɛyeli lɛ ‘sɛɛ ni aaayoo’ lɛ kɛbaaba, shi moŋ ekɛ gbɛnaa nii hu baafɔ̃ amɛnɔ. Efã akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛ nyɛ yɛ daa kɛyashi jeŋ naagbee lɛ.”—Mateo 13:51, 52; 28:19, 20.
11. Beni 1914 shɛ lɛ, mɛɛ nibii ni kɔɔ Maŋtsɛyeli lɛ he ba mli?
11 Taakɛ ewo shi lɛ, Yesu etee nɔ ekɛ enɔkwa kaselɔi lɛ ehi shi kɛtsɔ afii ohai abɔ lɛ amli fɛɛ aahu kɛbashi ŋmɛnɛ. Etee nɔ eha amɛ nii ashishinumɔ fiofio, yɛ nɛkɛ naagbee gbii nɛɛ amli, ni amɛ nɔŋŋ ji mɛi ni ekɛ sɔ̃ efɔ̃ amɛnɔ kɛha anɔkwale la ni yaa nɔ ekpɛɔ babaoo lɛ kɛ nitsumɔ. (Luka 19:11-15, 26) Yɛ 1914 mli lɛ, Maŋtsɛyeli lɛ he nifeemɔi bɔi kpojee oyayaayai, yɛ gbɛ ni sa kadimɔ hu nɔ. Jeee akɛ Maŋtsɛyeli ni hiɛ ekã nɔ aahu be babaoo lɛ “fɔmɔ” ba yɛ nakai afi lɛ nɔ kɛkɛ, shi moŋ ‘nibii agbɛjianɔtoo lɛ naagbee lɛ’ hu je shishi. (Kpojiemɔ 11:15; 12:5, 10; Daniel 7:13, 14, 27) Anɔkwa Kristofoi, ni yoo nibii ni baa amrɔ nɛɛ ashishinumɔ lɛ, etsu Maŋtsɛyeli-shiɛmɔ kɛ nitsɔɔmɔ he tafãa kpele fe fɛɛ yɛ yinɔsane mli lɛ he nii. Yesu gba enɛ efɔ shi, ni ekɛɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14.
12. (a) Mɛni ejɛ ŋmɛnɛŋmɛnɛ beaŋ Maŋtsɛyeli odaseyeli ni mli lɛɛ waa lɛ mli eba? (b) Mɛɛ oshara yɔɔ kɛha Kristofoi, yɛ jeŋ ni jeɔ ŋwane nɛɛ mli?
12 Nɛkɛ Maŋtsɛyeli lɛ he odaseyeli ni mli lɛɛ waa nɛɛ eyashɛ shikpɔji ni fa fe 230 nɔ. Amrɔ nɛɛ, anɔkwa kaselɔi ni fa fe akpekpei enumɔ miina nɛkɛ nitsumɔ nɛɛ mli gbɛfaŋnɔ, ni aaya nɔ aabua mɛi krokomɛi anaa lolo. Shi kɛ wɔkɛ kaselɔi lɛ ayifalɛ to gbɔmɛi akpekpei akpei 5.6 ni yɔɔ shikpɔŋ nɛɛ nɔ lɛ ahe lɛ, anaa faŋŋ akɛ taakɛ eji yɛ Yesu gbii lɛ amli lɛ, adesai ateŋ mɛi babaoo diɛŋtsɛ ‘yooo’ Maŋtsɛyeli lɛ ‘sɛɛ.’ Taakɛ agba afɔ̃ shi lɛ, mɛi babaoo yeɔ he fɛo amɛkɛɔ akɛ: “Nɛgbɛ ebaa lɛ he shiwoo lɛ yɔɔ?” (2 Petro 3:3, 4) Ákɛ Kristofoi lɛ, nɔ ni yɔɔ oshara kɛha wɔ ji akɛ, amɛ shikpilikpii feemɔ, kɛ ŋwanejee, kɛ heloonaa ninamɔ su lɛ baanyɛ asa bɔ ni wɔbuɔ wɔ Maŋtsɛyeli hegbɛi lɛ wɔhaa lɛ he fiofio. Akɛni je nɛɛ mli bii ji mɛi ni ebɔle wɔ kɛkpe hewɔ lɛ, wɔbaanyɛ wɔbɔi amɛ sui kɛ amɛnifeemɔi lɛ ekomɛi asɛɛnyiɛmɔ yɛ gbɛ ni waaa kwraa nɔ. Kwɛ bɔ ni ehe hiaa waa akɛ ‘wɔyoo’ Nyɔŋmɔ Maŋtsɛyeli lɛ ‘sɛɛ’ ni wɔhiɛ mli kpɛŋŋ!
Wɔmli ni Wɔɔpɛi yɛ Maŋtsɛyeli lɛ Gbɛfaŋ
13. Yɛ famɔ ni akɛha akɛ ashiɛ Maŋtsɛyeli lɛ he sanekpakpa lɛ gbɛfaŋ lɛ, mɛɛ gbɛ nɔ wɔɔka wɔhe wɔkwɛ akɛ ani wɔmiiya nɔ ‘wɔmiinu’ kɛ sɛɛyoomɔ lo?
13 Yesu wie nikpamɔ be ni wɔyɔɔ mli nɛɛ he akɛ: “Gbɔmɔ Bi lɛ aaatsu ebɔfoi lɛ, ni amɛaabua nanetɔ̃tɔ̃mɔ nii fɛɛ kɛ mɛi ni tsuɔ mlakwamɔ nii lɛ anaa kɛaajɛ emaŋtsɛyeli lɛ mli . . . Ni jalɔi lɛ aaakpɛ tamɔ hulu yɛ amɛtsɛ maŋtsɛyeli lɛ mli. Mɔ ni yɔɔ toii ni ekɛaanu lɛ, ha ni enu.” (Mateo 13:41, 43) Ani ooya nɔ ‘oonu’ famɔ ni akɛha akɛ ashiɛ Maŋtsɛyeli lɛ atsɔɔ ni afee mɛi kaselɔi kɛtsɔ ehe nitsumɔ nɔ lɛ toiboo nɔ? Kaimɔ akɛ, “mɔ ni adũ yɛ shikpɔŋ kpakpa nɔ lɛ” ‘nu wiemɔ lɛ ni eyoo sɛɛ’ ni ewo yibii kpakpai.—Mateo 13:23.
14. Kɛ akɛ famɔ ha lɛ, mɛɛ gbɛ nɔ wɔɔtsɔɔ akɛ ‘wɔyooɔ’ ŋaawoo ni akɛha lɛ ‘sɛɛ’ yɛ?
14 Kɛ wɔmiifee wɔ teemɔŋ nikasemɔ aloo wɔtee Kristofoi akpeei lɛ, esa akɛ ‘wɔkɛ wɔtsuii aha sanesɛɛkɔmɔ.’ (Abɛi 2:1-4) Kɛ akɛ ŋaawoo ha yɛ jeŋba, atadewoo, lalai, kɛ hiɛtserɛjiemɔ he lɛ, esa akɛ wɔŋmɛ gbɛ ni enyɔ shi kɛbote wɔtsuii amli ni etsirɛ wɔ ni wɔfee tsakemɔi ni he hiaa. Ekaba akɛ wɔɔkpɛ wɔyiŋ bɔ ni wɔsumɔɔ, loo wɔɔjie wɔnaa, aloo ekolɛ wɔkɛtsuuu nii kwraa. Kɛ Maŋtsɛyeli lɛ ji nɔ ni yɔɔ diɛŋtsɛ yɛ wɔshihilɛi amli lɛ, no lɛ wɔɔhi shi yɛ tɛi ni efolɔ lɛ anaa ni wɔkɛ ekaa baajaje wɔtsɔɔ mɛi krokomɛi. Yesu kɛɛ: “Jeee mɔ fɛɛ mɔ ni kɛɔ mi akɛ, ‘Nuntsɔ, Nuntsɔ’ lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mi-Tsɛ ni yɔɔ ŋwɛi lɛ suɔmɔnaa nii lɛ.”—Mateo 7:21-23.
15. Mɛni hewɔ ehe hiaa ni ‘atao maŋtsɛyeli lɛ kɛ Nyɔŋmɔ jalɛ lɛ tsutsu’ lɛ?
15 Eji adesa su akɛ eeefee yeyeeye yɛ niyenii, hehaanɔ, kɛ wɔɔhe ni he hiaa lɛ lɛ he, shi Yesu wie akɛ: “Nyɛtaoa Nyɔŋmɔ maŋtsɛyeli lɛ kɛ [Nyɔŋmɔ] jalɛ lɛ tsutsu, ni akɛ nii nɛɛ fɛɛ aaafata he aha nyɛ.” (Mateo 6:33, 34) Kɛ ooto nibii ni he hiaa bo lɛ anaa lɛ, ha Maŋtsɛyeli lɛ aye klɛŋklɛŋ gbɛhe yɛ oshihilɛ mli. Ha oshihilɛ afee mlɛo, ni omii ashɛ hiamɔ nii ni oyɔɔ lɛ he. Ebaafee kwashiai asane akɛ wɔɔha wɔshihilɛ ayi obɔ kɛ nifeemɔi kɛ ninamɔi ni he ehiaaa, ekolɛ ni wɔsusu po akɛ akpɛlɛɔ nakai nibii lɛ afeemɔ nɔ, ejaakɛ nɛkɛ nibii nɛɛ diɛŋtsɛ jeee efɔŋ yɛ gbɛ ko nɔ. Eyɛ mli akɛ ebaafee anɔkwale moŋ, shi mɛni nakai nibii ni he ehiaaa lɛ anamɔ kɛ amɛkɛ nitsumɔ baafee aha wɔ teemɔŋ nikasemɔ he gbɛjianɔtoo, kɛ wɔ Kristofoi akpeeiyaa, kɛ wɔhe ni wɔkɛaawo shiɛmɔ nitsumɔ lɛ mli? Yesu wie akɛ Maŋtsɛyeli lɛ tamɔ jarayelɔ ko ni yana “adiagba kome ni jara wa waa [ni] etee ni eyahɔ̃ɔ nii fɛɛ ni eyɔɔ lɛ, ni ekɛhe.” (Mateo 13:45, 46) Nɛkɛ ji bɔ ni esa akɛ wɔnu he yɛ Nyɔŋmɔ Maŋtsɛyeli lɛ he. Esa akɛ wɔkase Paulo, jeee Dema mɔ ni ŋmɛɛ sɔɔmɔ nitsumɔ lɛ he akɛni “esumɔ amrɔmrɔ nɛɛ je nɛŋ” lɛ.—2 Timoteo 4:10, 18; Mateo 19:23, 24; Filipibii 3:7, 8, 13, 14; 1 Timoteo 6:9, 10, 17-19.
“Amimyelɔi Anine Shɛŋ Nyɔŋmɔ Maŋtsɛyeli lɛ Nɔ”
16. Nyɔŋmɔ Maŋtsɛyeli lɛ ‘sɛɛ ni wɔɔyoo’ lɛ baanyɛ aye abua wɔ ni wɔtsi wɔhe kɛjɛ jeŋba fɔŋ he yɛ mɛɛ gbɛ nɔ?
16 Beni Korinto asafo lɛ ŋmɛɔ jeŋba shara gbɛ yɛ amɛteŋ lɛ, Paulo wie faŋŋ akɛ: “Ani nyɛleee akɛ amimyelɔi anine shɛŋ Nyɔŋmɔ maŋtsɛyeli lɛ nɔ? Nyɛkahaa alakaa nyɛ! Ajwamaŋbɔlɔi loo wɔŋjalɔi loo gbalamlikulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii, loo julɔi loo hiɛjoolɔi loo daatɔlɔi loo mɛi ajɛlɔi loo amimyelɔi anine shɛŋ Nyɔŋmɔ maŋtsɛyeli lɛ nɔ kwraa.” (1 Korintobii 6:9, 10) Kɛ ‘wɔyoo’ Nyɔŋmɔ Maŋtsɛyeli lɛ ‘sɛɛ’ lɛ, wɔlakaŋ wɔhe ni wɔsusu akɛ Yehowa baakpɛlɛ jeŋba shara nɔ yɛ gbɛ ko nɔ, bei abɔ ni enaa wɔ akɛ wɔkɛ wɔdeka fɛɛ miitsu nii yɛ Kristofoi asɔɔmɔ mli lɛ. Esaaa ni atsĩɔ nyaŋemɔ nitsumɔ tã po yɛ wɔteŋ. (Efesobii 5:3-5) Ani oyooɔ akɛ je nɛŋ susumɔi loo nifeemɔi gbohii lɛ ekomɛi miije shishi eebote oshihilɛ mli yɛ gbɛ ni yɔɔ nigii nɔ? No lɛ jiemɔ fɛɛ yɛ oshihilɛ mli kwraa amrɔ nɔŋŋ! Maŋtsɛyeli lɛ jara wa kwraa fe bɔ ni wɔɔha eje wɔdɛŋ yɛ nibii ni tamɔ enɛɛmɛi ahewɔ.—Marko 9:47.
17. Hiɛsɔɔ ni wɔɔna wɔha Nyɔŋmɔ Maŋtsɛyeli lɛ baanyɛ aha wɔna heshibaa babaoo, ni ebaajie nanetɔ̃tɔ̃mɔ nii yɛ mɛɛ gbɛi anɔ?
17 Yesu kaselɔi lɛ bi akɛ: “Namɔ ji agbo yɛ ŋwɛi maŋtsɛyeli lɛ mli?” Yesu kɛ gbekɛ bibioo ko badamɔ amɛteŋ ni ekɛha amɛ hetoo ni ekɛɛ: “Lɛlɛŋ, miikɛɛ nyɛ akɛ: Kɛji nyɛtsakeee ni nyɛtsɔmɔ tamɔ gbekɛbii bibii lɛ, nyɛboteŋ ŋwɛi maŋtsɛyeli lɛ mli kwraa. No hewɔ lɛ, mɔ fɛɛ mɔ ni baa ehe shi tamɔ gbekɛ nɛɛ lɛ, lɛ ji agbo yɛ ŋwɛi maŋtsɛyeli lɛ mli.” (Mateo 18:1-6) Henɔwolɔi, mɛi ni yɔɔ shɛii, mɛi ni susuuu mɔ he, kɛ mlakwalɔi ehiŋ Nyɔŋmɔ Maŋtsɛyeli lɛ mli, ni amɛfeŋ Maŋtsɛyeli lɛ shishibii hu. Ani suɔmɔ ni oyɔɔ kɛha onyɛmimɛi, oheshibaa, kɛ o-Nyɔŋmɔ gbeyeishemɔ, tsirɛɔ bo koni okɛ ojeŋba akatɔ̃tɔ̃ mɛi krokomɛi anaji? Aloo opeleɔ “ohegbɛi” ahe, ni bɔ ni su nɛɛ kɛ jeŋba ni ojieɔ lɛ kpo lɛ baanyɛ asa mɛi krokomɛi ahe eha lɛ kɔɔɔ ohe eko?—Romabii 14:13, 17.
18. Mɛni baajɛ mli aba aha adesai toibolɔi beni Nyɔŋmɔ Maŋtsɛyeli lɛ haa afeɔ E-suɔmɔnaa nii “yɛ ŋwɛi, taakɛ afeɔ yɛ shikpɔŋ nɔ lɛ”?
18 Etsɛŋ ni wɔ ŋwɛi Tsɛ, Yehowa, baaha sɔlemɔ ni mli wa waa, ni wɔsɔle aahu akɛ: “Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ, taakɛ afeɔ yɛ ŋwɛi lɛ” hetoo jogbaŋŋ kɛmɔ shi. Etsɛŋ kwraa ni Maŋtsɛ ni yeɔ nɔ, ni ji Yesu Kristo, baaba kɛ shishinumɔ akɛ ebaata shi yɛ emaŋtsɛsɛi lɛ nɔ kɛha kojomɔ, koni egbálá “gwantɛŋi” lɛ amli kɛjɛ “abotiai” lɛ ateŋ. Kɛ nakai be ni ato lɛ shɛ lɛ, “maŋtsɛ lɛ aaakɛɛ mɛi ni yɔɔ eninejurɔ nɔ lɛ akɛ: ‘Nyɛbaa, nyɛ mɛi ni mitsɛ ejɔɔ nyɛ, nyɛbaŋɔa maŋtsɛyeli lɛ ni asaa ato nyɛ kɛjɛ jeŋ shishijee lɛ.’ ” Abotiai lɛ, “amɛaatee naanɔ hejaramɔ mli; shi jalɔi lɛ aaatee naanɔ wala mli.” (Mateo 6:10, NW; 25:31-34, 46) “Amanehulu kpeteŋkpele lɛ” baabɛɛ nibii agbɛjianɔtoo momo lɛ kɛ mɛi fɛɛ ni ekpɛlɛɛɛ akɛ ‘amɛaayoo’ Maŋtsɛyeli lɛ ‘sɛɛ’ lɛ kɛya kwraa. Shi mɛi akpekpei abɔ ni yi baana wala kɛfo “amanehulu kpeteŋkpele lɛ” kɛ mɛi akpekpei akpei abɔ ni abaatee amɛ shi lɛ anine baashɛ Maŋtsɛyeli jɔɔmɔi ni sɛɛ efooo nɔ yɛ shikpɔŋ nɔ Paradeiso ni asaa akɛba ekoŋŋ mli. (Kpojiemɔ 7:14) Maŋtsɛyeli lɛ ji shikpɔŋ nɔ nɔyeli hee, ni yeɔ nɔ kɛjɛɔ ŋwɛi. Ebaatsu Yehowa yiŋtoo kɛha shikpɔŋ nɛɛ kɛ adesai lɛ he nii kɛmɔ shi, ni akɛ fɛɛ baatse egbɛi ni yɔɔ krɔŋkrɔŋ fe fɛɛ lɛ he. Ani jeee gboshinii ni esa akɛ wɔtsu he nii, ni wɔkɛ wɔhe asha afɔle wɔha, ni wɔmɛ nɛ? Enɛ ji nɔ ni esa akɛ Maŋtsɛyeli lɛ ‘sɛɛ ni wɔɔyoo’ lɛ atsɔɔ kɛha wɔ!
Te Obaaha Hetoo Oha Tɛŋŋ?
◻ Mɛni ji Nyɔŋmɔ Maŋtsɛyeli lɛ?
◻ Mɛni hewɔ ni Yesu toibolɔi lɛ ateŋ mɛi pii ‘yooo’ Maŋtsɛyeli lɛ ‘sɛɛ’ lɛ?
◻ Maŋtsɛyeli lɛ ‘sɛɛ ni aaayoo’ lɛ kɛ jɔɔmɔi kɛ gbɛnaa nii fɛɛ baa yɛ mɛi gbɛ nɔ?
◻ Yɛ shiɛmɔ gbɛfaŋ lɛ, mɛni tsɔɔ akɛ ‘wɔyoo’ Maŋtsɛyeli lɛ ‘sɛɛ’?
◻ Wɔkɛ wɔjeŋba tsɔɔ akɛ ‘wɔyoo’ ŋaawoo ni akɛhaa lɛ ‘sɛɛ’ yɛ mɛɛ gbɛ nɔ?
[Mfonirii ni yɔɔ baafa 17]
Yesu kaselɔi lɛ ‘yoo’ Maŋtsɛyeli lɛ ‘sɛɛ’ ni amɛwo yibii kpakpai