Nikpamɔ Be!

MƐNl hewɔ ni anaaa Kristofoi ashihilɛ kwraa yɛ ‘Kristojamɔ’ yinɔsane mli lɛ? Mɛi ni susuɔ nii ahe lɛ ateŋ mɛi babaoo ebi sane nɛɛ, shi Yesu ha hetoo aaafee afii 2,000 nɛ yɛ abɛbua ko mli. Ewie ‘nuu ko ni duɔ dumɔnii kpakpai yɛ ebɔɔ mli’ lɛ he. Kɛkɛ ni, “ehenyɛlɔ ko ba ebadu jwɛi efutu ŋmaa lɛ.” Beni dumɔ wui lɛ kwɛ̃ lɛ, nitsulɔi lɛ na jwɛi lɛ, ni amɛmiitao ni kulɛ amɛfamɔ amɛshwie. Shi nuu lɛ kɛɛ amɛ akɛ: “Nyɛhaa enyɔ lɛ fɛɛ akwɛa kɛyashia ŋmaa kpamɔ bo lɛ.” Abaagbala ŋmaa lɛ mli kɛjɛ jwɛi lɛ mli, yɛ nikpamɔ be lɛ mli.​—Mateo 13:24-30.

Beni Yesu tsɔɔ abɛbua lɛ mli lɛ, awie akɛ lɛ diɛŋtsɛ ji mɔ ni du ‘dumɔnii kpakpai’ lɛ​—anɔkwa Kristofoi. Henyɛlɔ lɛ ji Satan, mɔ ni badu ‘jwɛi’ efutu mli​—ni ekɛ amale Kristofoi bawo asafo lɛ mli lɛ. Yesu ŋmɛ amale kɛ anɔkwale Kristofoi lɛ fɛɛ gbɛ ni amɛhi shi kutuu​—shi kɛyashi nikpamɔ be lɛ mli pɛ. No sɛɛ lɛ abaagbala amɛmli.​—Mateo 24:​36-44.

No hewɔ lɛ, kɛ wɔnu akɛ “Kristofoi” agbɛjianɔtoi ni ehi shi yɛ afii ohai abɔ lɛ mli lɛ egbe Nyɔŋmɔ he guɔ kɛtsɔ wɔŋjalɔi atsɔɔmɔi ni amɛtsɔɔ jeŋba-shara ni amɛkpɛlɛ nɔ, tai ni awuɔ kɛyeɔ mɛi anɔ ni amɛfiɔ sɛɛ, kɛ yiwalɛ niseniianifeemɔi anɔ lɛ, efeee wɔ naakpɛɛ. Wɔnaa akɛ enɛ ji dumɔ wui gbohii ni Satan badu ewo mli lɛ. Shi, kɛ wɔkane akɛ aŋkroaŋkroi komɛi na amanehulu ni amɛgboi, fe ni amɛaaŋmɛɛ Biblia shishitoo mlai ahe ni akɛsaa lɛ, ehaa wɔnaa akɛ akpataaa wui kpakpai lɛ ahiɛ.

Yesu wie akɛ nikpamɔ be lɛ ji “jɛ nɛŋ naagbee lɛ.” Akɛni wɔyɛ amrɔ jɛ nɛɛ nibii agbɛjianɔtoo lɛ naagbee be lɛ mli hewɔ lɛ, eka shi faŋŋ akɛ nɛkɛ be nɛɛ ji nikpamɔ be lɛ! No hewɔ lɛ mligbalamɔ ko miiya nɔ yɛ anɔkwale kɛ amale Kristofoi lɛ ateŋ. Esa akɛ gbɔmɛi komɛi ahi shi ŋmɛnɛ, jeee aŋkroaŋkroi komɛi ni egbɛ eshwa kɛkɛ, ni bɔ ni Yesu wie anɔkwa Kristofoi ahe eha lɛ sa amɛ​—mɛi ni baa amɛhe shi amɛhaa Nyɔŋmɔ Maŋtsɛyeli lɛ ni amɛshiɛɔ ehe sanekpakpa lɛ, mɛi ni jieɔ jeŋba kpakpa ni damɔ Biblia nɔ lɛ kpo ni amɛkpooɔ wɔŋjalɔi atsɔɔmɔi ni amɛfiɔ Biblia mli anɔkwale lɛ sɛɛ, mɛi ni haa Nyɔŋmɔ gbɛi jeɔ kpo faŋŋ, ni amɛjɛɛɛ je lɛ mli.​—Mateo 6:​33; 24:14; Yohane 3:​20; 8:​32; 17:​6, 16.

Wɔmiikɛɛ bo kɛ nɔmimaa akɛ, gbɔmɛi ni tamɔ nakai yɛ! Ani oosumɔ ni osɔmɔ Nyɔŋmɔ yɛ gbɛ ni ekpɛlɛɔ nɔ lɛ nɔ? No lɛ taomɔ gbɔmɛi nɛɛ, ni okɛ amɛ asɔmɔ Nyɔŋmɔ.