Nyɛtaoa Mɛi Ni Amɛsu Hi Kɛha Naanɔ Wala Lɛ
“Mɛi abɔ ni amɛsu hi kɛha naanɔ wala lɛ batsɔmɔ heyelilɔi.”—BƆFOI LƐ ASAJI 13:48, New World Translation.
1. Mɛɛ nyɛmɔ Yehowa yɔɔ yɛ adesa tsui lɛ he?
YEHOWA NYƆŊMƆ baanyɛ ale nɔ ni yɔɔ tsui lɛ mli. Afee enɛ faŋŋ yɛ be mli ni gbalɔ Samuel tee koni eyafɔ Ishai binuu ko mu akɛ Israel maŋtsɛ lɛ. Beni ena Eliab pɛ kɛkɛ ni Samuel kɛɛ: “‘Mɔ ni Yehowa efɔ lɛ mu lɛ damɔ ehiɛ nɛɛ!’ Shi Yehowa kɛɛ Samuel akɛ: ‘Kaakwɛ ehiɛŋtso loo ekwɔlɛ nyenyereŋŋ lɛ; shi misumɔɔɔ lɛ. Ejaakɛ Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ.’” No hewɔ lɛ, akudɔ Samuel koni efɔ David, ni bafee ‘Nyɔŋmɔ tsuinaa gbɔmɔ lɛ’ mu.—1 Samuel 13:13, 14; 16:4-13.
2. Mɛni hɔ gbɔmɔ okadi tsui lɛ mli, no hewɔ lɛ mɛni wɔkaneɔ yɛ enɛ he yɛ Ŋmalɛi lɛ amli?
2 Mɔ ko jieɔ su titri ko ni yɔɔ emli lɛ kpo. Eyɛ subaŋ pɔtɛɛ ko ni ehe shi yɛ etsui ni ji okadi tsui lɛ mli. (Mateo 12:34, 35; 15:18-20) No hewɔ lɛ, wɔkaneɔ mɔ ni ‘ta yɔɔ etsui mli’ lɛ he sane. (Lala 55:22) Akɛɔ wɔ akɛ “mlilatsɛ lɛ etɔmɔ faa.” Ni wɔkaneɔ akɛ: “Nanemɛi yɛ ni amɛsu ji ni amɛkumɔ amɛhe dukuduku, shi naanyo ko yɛ ni kpɛtɛɔ mɔ he gbagbalii fe nyɛmi.” (Abɛi 18:24; 29:22, NW) Yɛ miishɛɛ mli lɛ, mɛi pii batsɔmɔ tamɔ Jeŋmajiaŋbii komɛi ni yɔɔ Antiokia yɛ Pisidia lɛ. Beni amɛnu gbɛjianɔ ni Yehowa eto kɛha yiwalaheremɔ lɛ he lɛ, “amɛmli fili amɛ, ni amɛwo Yehowa wiemɔ lɛ hiɛ nyam, ni mɛi abɔ ni su hi kɛha naanɔ wala lɛ batsɔmɔ heyelilɔi.”—Bɔfoi lɛ Asaji 13:44-48, NW.
Heyelilɔi lɛ “Tsuii Amli Tse”
3, 4. (a) Namɛi tsuii amli tse lɛ? (b) Mɛi ni tsuii amli tse nɛɛ naa Nyɔŋmɔ yɛ mɛɛ gbɛ nɔ?
3 Nakai heyelilɔi ni yɔɔ Antiokia lɛ batsɔmɔ Kristofoi ni abaptisi amɛ, ni anɔkwafoi ni yɔɔ amɛteŋ lɛ baanyɛ ni amɛkɛ Yesu wiemɔi nɛɛ ato amɛhe: “Miishɛɛ ji mɛi ni tsuii amli tse lɛ, ejaakɛ amɛaana Nyɔŋmɔ.” (Mateo 5:8, NW) Shi namɛi “tsuii amli tse lɛ”? Ni “amɛaana Nyɔŋmɔ” yɛ mɛɛ gbɛ nɔ?
4 Mɛi ni tsuii amli tse lɛ ahe tse yɛ mligbɛ. Amɛnɔ lɛ ji krɔŋŋ-feemɔ loo hetsemɔ yɛ hiɛsɔɔ, hedɔɔi, akɔnɔi kɛ yiŋtoi amli. (1 Timoteo 1:5) Amɛnaa Nyɔŋmɔ bianɛ ni tsɔɔ akɛ amɛmiina ni eetsu nii kɛmiiha emuuyeli mlihiɛlɔi. (Okɛto 2 Mose 33:20; Hiob 19:26; 42:5 he.) Hela wiemɔ ni atsɔɔ shishi akɛ “na” yɛ biɛ lɛ hu tsɔɔ “ni akɛ jwɛŋmɔ lɛ ana nii, ayoo, ale.” Akɛni Yesu jie Nyɔŋmɔ su kɛ baŋ kpo etsɔɔ yɛ emuuyeli mli hewɔ lɛ, “mɛi ni tsuii amli tse,” ni tsɔɔ Kristo kɛ esha-kpatamɔ afɔleshaa lɛ mli hemɔkɛyeli, ni akɛ amɛhe eshai lɛ keɔ amɛ, ni amɛnyɛɔ amɛkɛ jamɔ ni saa Nyɔŋmɔ hiɛ lɛ haa lɛ lɛ naa nakai su kɛ baŋ lɛ shishinamɔ lɛ mli ŋɔɔmɔ. (Yohane 14:7-9; Efesobii 1:7) Kɛha mɛi ni afɔ amɛ mu lɛ, Nyɔŋmɔ namɔ lɛ shɛɔ he ni kwɔ fe fɛɛ yɛ be mli ni ateeɔ amɛ shi kɛyaa ŋwɛi, yɛ he ni amɛnaa Nyɔŋmɔ kɛ Kristo diɛŋtsɛ yɛ lɛ. (2 Korintobii 1:21, 22; 1 Yohane 3:2) Shi Nyɔŋmɔ ni aaana lɛ kɛtsɔ anɔkwale nilee kɛ anɔkwa jamɔ nɔ lɛ he hegbɛ yɛ kɛha mɛi fɛɛ ni tsuii amli tse lɛ. (Lala 24:3, 4; 1 Yohane 3:6; 3 Yohane 11). Amɛsu hi kɛha naanɔ wala yɛ ŋwɛi loo yɛ paradeiso shikpɔŋ nɔ.—Luka 23:43; 1 Korintobii 15:50-57; 1 Petro 1:3-5.
5. Mɛɛ gbɛ pɛ nɔ mɔ ko aaatsɔ etsɔ heyelilɔ kɛ Yesu Kristo sɛɛnyiɛlɔ?
5 Mɛi ni su ehiii loo amɛtsui ejaaa kɛhaaa naanɔ wala lɛ tsɔmɔŋ heyelilɔi. Amɛnyɛŋ amɛna hemɔkɛyeli. (2 Tesalonikabii 3:2) Agbɛnɛ, mɔ ko mɔ ko nyɛŋ abatsɔ Yesu Kristo sɛɛnyiɛlɔ anɔkwafo ja eji mɔ ni baa ehe shi kɛhaa nitsɔɔmɔ, ni Yehowa, mɔ ni naa bɔ ni tsui lɛ ji lɛ gbala nakai mɔ lɛ. (Yohane 6:41-47) Shi Yehowa Odasefoi tsɔɔɔ hiɛ amɛkojooo mɔ ko yɛ amɛ shia kɛ shia shiɛmɔ lɛ mli. Amɛnyɛŋ amɛkane loo amɛle bɔ ni tsuii yɔɔ, shi moŋ amɛshiɔ nɔ ni baajɛ mli aba lɛ amɛhaa Nyɔŋmɔ.
6. (a) Mɛni awie yɛ mɛi aŋɔɔ diɛŋtsɛ ni ayaa yɛ shia kɛ shia sɔɔmɔ lɛ mli lɛ he? (b) Mɛɛ gbɛjianɔ ato koni akɛye abua Yehowa Odasefoi ni amɛna mɛi ni su hi kɛha naanɔ wala lɛ?
6 Woloŋlelɔ ko ewie yɛ gbɛ ni ja nɔ akɛ: “[Paulo] tsɔɔ anɔkwale lɛ yɛ faŋŋ kɛ shia kɛ shia. Jeee wielɔi akpoku nɔ pɛ ejɛ eshiɛ Kristo lɛ, shi lɛ diɛŋtsɛ etee aŋkroaŋkroi aŋɔɔ eyashiɛ. Yɛ be babaoo mli lɛ, mɔ kɛ mɔ shiɛmɔ lɛ mɔɔ shi fe gbɛ fɛɛ gbɛ ni atsɔɔ nɔ koni nine ashɛ susumai anɔ.” (August Van Ryn) Woji tamɔ Theocratic Ministry School Guidebook, Reasoning From the Scriptures, kɛ Wɔ Maŋtsɛyeli Sɔɔmɔ lɛ yeɔ buaa Yehowa Odasefoi koni amɛha wiemɔi ni amɛnyɛ amɛya mɛi aŋɔɔ yɛ amɛsɔɔmɔ nitsumɔ lɛ mli. Nɔ ni yeɔ buaa hu ji Sɔɔmɔ Kpee mli nɔkwɛmɔ nii kɛ Teokrase Sɔɔmɔ Skul ŋaawoo. Mɛi ni kɛ amɛhe ewo skul lɛ mli lɛ anine shɛɔ tsɔsemɔ ni sɛɛnamɔ babaoo yɔɔ he nɔ yɛ wiemɔ mli sui kpakpai amli, tamɔ hiɛkpamɔi kpakpai, Ŋmalɛi lɛ kɛ nitsumɔ yɛ gbɛ ni ja nɔ, sane naatsɔɔmɔ ni ja kɛ nitsumɔ, naataomɔ ni tsɔɔ mɔ yiŋ, nɔkwɛmɔ nii kɛ nitsumɔ, kɛ naamuamɔi ni mɔɔ shi jogbaŋŋ. Nyɛhaa wɔkwɛa bɔ ni Biblia lɛ kɛ nɔ ko fataa nɛkɛ tsɔsemɔ ni baanyɛ aha Nyɔŋmɔ webii afee mɛi ni he esa babaoo yɛ be mli ni amɛtaoɔ mɛi ni su hi kɛha naanɔ wala lɛ he ehaa lɛ.
Hiɛkpamɔ Wiemɔi ni Kanyaa Jwɛŋmɔ
7. Wiemɔi ni Yesu kɛje e-Gɔŋ nɔ Shiɛmɔ lɛ shishi lɛ tsɔɔ mɛni yɛ hiɛkpamɔ wiemɔi ahe?
7 Mɛi ni saa amɛhe kɛhaa shia kɛ shia odaseyeli lɛ baanyɛ akase nɔ ko ni kɔɔ hiɛkpamɔ wiemɔi ni teeɔ miishɛɛ shi lɛ he kɛjɛ Yesu nɔkwɛmɔ nɔ lɛ mli. Yɛ be mli ni ejeɔ e-Gɔŋ nɔ Shiɛmɔ lɛ shishi lɛ, ekɛ wiemɔ “miishɛɛ” (ajɔɔ) tsu nii shii nɛɛhu sɔŋŋ. Akɛ nɔkwɛmɔ nɔ lɛ, ekɛɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ, ejaakɛ ŋwɛi maŋtsɛyeli lɛ ji amɛnɔ. . . . Miishɛɛ ji mɛi ni he jɔ lɛ, ejaakɛ amɛbaahi shikpɔŋ lɛ nɔ.” (Mateo 5:3-12, NW) Wiemɔi lɛ yɛ tɛɛ ni emli ka shi. Ni ŋwanejee ko bɛ he akɛ nakai hiɛkpamɔ lɛ tee miishɛɛ shi ni eha etoibolɔi lɛ kɛ amɛhe wo mli, ejaakɛ namɔ sumɔɔɔ ni enaa miishɛɛ?
8. Te esa akɛ akpa saneyitso kɛba sanegbaa hiɛ yɛ shia kɛ shia sɔɔmɔ lɛ mli aha tɛŋŋ?
8 Esa akɛ akpa saneyitso kɛha sanegbaa ni akɛtsuɔ nii yɛ shia kɛ shia lɛ hiɛ kɛ jwɛŋmɔ kpakpa, yɛ gbɛ ni ŋɔɔ ni yɔɔ fɛo nɔ. Shi mɔ ko mɔ ko kɛ hiɛkpamɔ wiemɔ ni faa mɔ tsui akatsu nii, tamɔ akɛ, “Miyɛ shɛɛ sane ko ni jɛ ŋwɛiniiaŋ kɛha bo.” Sanekpakpa lɛ jɛɛhe jɛ ŋwɛi moŋ, shi hiɛkpamɔ wiemɔ ni tamɔ nɛkɛ lɛ baaha shiatsɛ lɛ asusu kɛji akɛ esa akɛ ebo Odasefonyo Iɛ toi loo eshwie lɛ kɛjɛ ehiɛ amrɔ nɔŋŋ lɛ he.
Nyɔŋmɔ Wiemɔ kɛ Nitsumɔ yɛ Gbɛ ni Ja Nɔ
9. (a) Te esa akɛ akpa ŋmalɛi ahiɛ, ni akane, ni akɛto sɔɔmɔ lɛ he aha tɛŋŋ? (b) Mɛɛ nɔkwɛmɔ nɔ akɛha ni tsɔɔ bɔ ni Yesu kɛ sanebimɔi tsu nii?
9 Taakɛ eji yɛ wielɔi akpoku nɔ lɛ, esa akɛ akpa ŋmalɛi lɛ ahiɛ yɛ gbɛ ni ja nɔ yɛ shiɛmɔ mli, ni akane kɛ nɔmimaa ni sa, ni akɛto sane he yɛ gbɛ ni mli ka shi, ni eji anɔkwale hu nɔ. Sanebimɔi ni haa shiatsɛ lɛ susuɔ Ŋmalɛ mli otii ahe lɛ hu baanyɛ aye abua. Shikome ekoŋŋ lɛ, gbɛ ni Yesu tsɔɔ nɔ etsɔɔ nii lɛ haa mɔ kaseɔ nii. Be ko lɛ, nuu ko ni le Mose Mla lɛ jogbaŋŋ bi lɛ akɛ: “Tsɔɔlɔ, mɛni mafee ni mana naanɔ wala?” Yɛ hetoohamɔ mli lɛ Yesu bi lɛ akɛ: “Mɛni aŋma yɛ Mla lɛ mli lɛ? Te okaneɔ tɛŋŋ?” Yiŋkɔshikɔshi-feemɔ ko bɛ he akɛ Yesu le akɛ nuu lɛ baanyɛ aha sanebimɔ lɛ hetoo. Eha hetoo yɛ gbɛ ni ja nɔ, akɛ: “Suɔmɔ Nuŋtsɔ [Yehowa] o-Nyɔŋmɔ lɛ, kɛjɛ otsui fɛɛ kɛ osusuma fɛɛ kɛ onyɛmɔ fɛɛ kɛ ojwɛŋmɔ fɛɛ mli, kɛ onaanyo hu tamɔ bɔ ni osumɔɔ bo diɛŋtsɛ ohe.” Enɛ ha Yesu jie eyi, ni eha sanegbaa lɛ tee nɔ.—Luka 10:25-37.
10. Mɛni esa akɛ mɔ fɛɛ mɔ aha ahi ejwɛŋmɔ mli yɛ saneyitso kɛha sanegbaa lɛ he, ni mɛni esa akɛ akwa yɛ be mli ni abiɔ shiatsɛmɛi lɛ saji komɛi lɛ?
10 Esa akɛ mɛi ni yeɔ odase yɛ shia kɛ shia lɛ ama saneyitso kɛha sanegbaa lɛ yitso lɛ nɔ mi, ni eha yiŋtoo hewɔ ni akaneɔ Biblia mli ŋmalɛi ni tsɔɔ nakai sane lɛ mli lɛ afee faŋŋ. Akɛni Odasefonyo lɛ miibɔ mɔdɛŋ ni enine ashɛ shiatsɛ lɛ tsui nɔ hewɔ lɛ, esa akɛ ekwa saji ni woɔ mɔ hiɛgbele lɛ bimɔ. ‘Eba akɛ wɔwiemɔ he aaaba nyam daa ni ŋoo ahi mli,’ yɛ be mli ni wɔkɛ Nyɔŋmɔ Wiemɔ lɛ tsuɔ nii lɛ.—Kolosebii 4:6.
11. Mɛɛ nɔkwɛmɔ nɔ wɔ yɔɔ yɛ kaa ni Satan kɛba Yesu nɔ lɛ mli, yɛ be mli ni wɔkɛ Ŋmalɛi lɛ tsuɔ nii ni wɔkɛjaje susumɔi komɛi ni ejaaa lɛ?
11 Sɛɛsaramɔi anɔ titri ehe baahia ni ajaje susumɔi ni ejaaa kɛtsɔ nɔ ni Ŋmalɛi lɛ kɛɔ loo etsɔɔ diɛŋtsɛ lɛ tsɔɔmɔ nɔ. Yesu fee nɔ ko ni tamɔ nakai ni eku Satan ni kɛɛ akɛ: “Kɛji Nyɔŋmɔ bi jio lɛ, ŋɔɔ ohe otswa shi [kɛjɛ sɔlemɔ we lɛ yiteŋ sosooso lɛ nɔ, tamɔ mɔ ni miigbe ehe]; ejaakɛshi aŋma akɛ: ‘Ohewɔ lɛ eeefa ebɔfoi lɛ ni amɛhiɛo yɛ amɛdɛŋ, koni okaŋɔ onane oshi tɛ ko’” lɛ naa. Lala 91:11, 12 ni Satan tsɛ yisɛɛ yɛ biɛ lɛ biii ni akɛ, wala ni ji nikeenii ni jɛ Nyɔŋmɔ ŋɔɔ lɛ awo oshara mli nakai. Akɛni ele akɛ ejaaa akɛ aaaka Yehowa kɛtsɔ oshara mli ni akɛ wala aaawo lɛ nɔ hewɔ lɛ, Yesu kɛɛ Satan akɛ: “Aŋma ekoŋŋ akɛ: ‘Kaaka Nuŋtsɔ [Yehowa] o-Nyɔŋmɔ lɛ.’” (Mateo 4:5-7) Shi Satan jeee mɔ ni taoɔ anɔkwale. Shi kɛji akɛ gbɔmɛi ni nuɔ sane shishi lɛ tsɔɔ jwɛŋmɔ ko ni ejaaa ni baatsi amɛmumɔŋ nɔyaa naa lɛ, esa akɛ Nyɔŋmɔ Wiemɔ lɛ he sɔɔlɔ lɛ kɛ ŋaa atsɔɔ nɔ ni Ŋmalɛi lɛ kɛɔ ni etsɔɔ diɛŋtsɛ. Enɛɛmɛi fɛɛ ji ‘anɔkwale wiemɔ lɛ he nitsumɔ yɛ gbɛ ni ja nɔ’ lɛ fa—nikasemɔi ni he hiaa ni atsɔɔ yɛ Teokrase Sɔɔmɔ Skul lɛ mli lɛ ekome.—2 Timoteo 2:15.
Yiŋtsɔmɔ Yɛ Egbɛhe
12, 13. Mɛni hewɔ eja gbɛ akɛ wɔkɛ yiŋtsɔmɔ aaatsu nii yɛ sɔɔmɔ nitsumɔ lɛ mli lɛ?
12 Yiŋtsɔmɔ yɛ gbɛhe ni sa yɛ Kristofoi asɔɔmɔ nitsumɔ lɛ mli. Akɛ nɔkwɛmɔ nɔ lɛ, Paulo wo ehefatalɔ nitsulɔ Timoteo hewalɛ koni eya ehiɛ yɛ nibii ni ekase ni “atsɔ eyiŋ koni ehe eye” lɛ amli. (2 Timoteo 3:14, NW) Beni Paulo yɔɔ Korinto lɛ, “daa hejɔɔmɔ gbi nɔ lɛ eyawieɔ etsɔɔ mɛi yɛ kpeehe lɛ, ni etsɔɔ Yudafoi kɛ Helabii ayiŋ.” (Bɔfoi lɛ Asaji 18:1-4) Ni yɛ Efeso hu lɛ, ‘eha wiemɔi ni ekɛ yiŋtsɔmɔ tsu nii ni ekɛma Nyɔŋmɔ maŋtsɛyeli lɛ nɔ mi.’ (Bɔfoi lɛ Asaji 19:8) Ni beni amɔ lɛ ni eyɔɔ Roma lɛ, bɔfo lɛ tsɛ gbɔmɛi kɛba emasɛi ni eye amɛ odase, ‘ni etao ni amɛyiŋ atsɔ,’ ni mɛi komɛi batsɔmɔ heyelilɔi.—Bɔfoi lɛ Asaji 28:23, 24.
13 Shi bɔ fɛɛ bɔ ni Odasefonyo lɛ kɛ yiŋtsɔmɔ baatsu nii aha lɛ fɛɛ sɛɛ lɛ, mɛi pɛ ni amɛsu hi loo amɛtsui ja kɛha naanɔ wala lɛ pɛ baatsɔmɔ heyelilɔi. Naataomɔ ni tsɔɔ mɔ yiŋ kɛ sane mlitsɔɔmɔ ni mli ka shi faŋŋ baanyɛ atsɔ amɛyiŋ ni amɛhe amɛye. Shi mɛni hu baanyɛ aye abua ni atsɔ amɛyiŋ?
Feemɔ Mɔ Ni kɛ Sane Naatsɔɔmɔ Ni Ja Tsuɔ Nii Ni Etsɔɔ Mɔ Yiŋ
14. (a) Sane naatsɔɔmɔ ni ja ni atsara kɛ nitsumɔ tsɔɔ mɛni? (b) Naataomɔ kɛ yiŋtsɔmɔ biɔ ni afee mɛni?
14 Wiemɔ mli sui kpakpai ni ama nɔ mi yɛ Teokrase Sɔɔmɔ Skul lɛ mli ji sane naatsɔɔmɔ ni ja, ni tsara ni akɛmiitsu nii. Nɔ ni kɔɔ enɛ he ji emli saji otii lɛ kɛ saji krokomɛi ni kɔɔ he lɛ fɛɛ ni akɛ shishinumɔ aaato naa. Nɔ ni he hiaa hu ji naataomɔ ni tsɔɔ mɔ yiŋ, ni biɔ ni akɛ shishitoo kpakpa afɔ shi ni akɛ ehe odaseyeli ni ji anɔkwale aha. Nɔ ni tamɔ enɛ ji toibolɔi lɛ ni aaaye abua amɛ ni amɛsusu saji ahe kɛtsɔ gbee ni amɛkɛ bo aaakpa nɔ, otsɔɔ saji otii lɛ amli bɔ ni sa, ni okɛto mɛi loo saji ahe yɛ gbɛ ni mɔɔ shi nɔ. Shikome ekoŋŋ lɛ, Ŋmalɛ krɔŋkrɔŋ lɛ kɛ gbɛtsɔɔmɔ haa.
15. (a) Te fee tɛŋŋ ni Paulo gbala gbɔmɛi lɛ ajwɛŋmɔ ni eha amɛkɛ lɛ kpa gbee beni ewie yɛ Mars’ Hill lɛ? (b) Mɛɛ odaseyeli wɔyɔɔ ni tsɔɔ sane naatsɔɔmɔ ni ja ni tsara nɔ yɛ Paulo wiemɔ lɛ mli?
15 Nɛkɛ wiemɔ mli sui kpakpai nɛɛ jeɔ kpo yɛ bɔfo Paulo wiemɔ ni he gbɛi yɛ Mars’ Hill yɛ blema Ateene lɛ mli. (Bɔfoi lɛ Asaji 17:22-31, NW) Ehiɛkpamɔ wiemɔ lɛ gbala jwɛŋmɔ ni akɛ lɛ kpa gbee, ejaakɛ ekɛɛ: “Ataamɛi Ateenebii, miyoo yɛ nibii fɛɛ mli akɛ etamɔ nɔ ni nyɛsheɔ nyɔŋmɔi lɛ agbeyei babaoo fe bɔ ni mɛi krokomɛi feɔ.” Kɛha amɛ lɛ, ŋwanejee ko bɛ he akɛ enɛ tamɔ yijiemɔ. Yɛ be mli ni Paulo etsi afɔleshaa latɛ ko ni ajɔɔ nɔ aha “Nyɔŋmɔ ni Aleko Lɛ” lɛ tã lɛ, etee nɔ yɛ esane naatsɔɔmɔ ni ja, ni tsara kɛ naataomɔ ni tsɔɔ mɔ yiŋ lɛ mli. Etsɔɔ mli akɛ nɛkɛ Nyɔŋmɔ ni amɛleee lɛ nɛɛ “fee je lɛ kɛ emli nibii fɛɛ.” Etamɔɔɔ Atena loo Hela nyɔŋmɔi krokomɛi lɛ, ‘ejaakɛ ehiii sɔlemɔtsui ni akɛ niji fee mli, ni asaŋ akɛ gbɔmɛi aniji jaaa lɛ.’ Kɛkɛ ni yɛ no sɛɛ lɛ bɔfo lɛ tsɔɔ akɛ nɛkɛ Nyɔŋmɔ nɛɛ ha wɔ wala ni ehaaa ni wɔgbugbuu shi tamɔ shwilafoi ni miitao lɛ. Kɛkɛ ni Paulo kɛ amɛ susu saji ahe akɛ wɔ Bɔlɔ lɛ, ni eku ehiɛ eshwie bei ni wɔleee nɔ ko nɔ ko ni wɔjaa amagai lɛ anɔ lɛ, ‘miikɛɛ adesai fɛɛ ni yɔɔ he fɛɛ he lɛ akɛ amɛtsake amɛtsui.’ Nɔ ni sane naatsɔɔmɔ ni ja nɛɛ yabote mli ji sane titri akɛ, ‘Nyɔŋmɔ baakojo shikpɔŋ lɛ nɔ bii lɛ yɛ jalɛ naa kɛtsɔ nuu ko ni ehala lɛ ni etee lɛ shi kɛjɛ gbohii ateŋ lɛ nɔ.’ Akɛni Paulo “miijaje Yesu kɛ shitee lɛ he sanekpakpa lɛ” hewɔ lɛ, nakai Ateenebii lɛ le akɛ nɛkɛ Kojolɔ nɛɛ baafee Yesu Kristo.—Bɔfoi lɛ Asaji 17:18.
16. Paulo wiemɔ yɛ Mars’ Hill kɛ tsɔsemɔ ni anaa kɛjeɔ Teokrase Sɔɔmɔ Skul lɛ mli lɛ baanyɛ ana hewalɛ kpakpa yɛ mɔ ko sɔɔmɔ nitsumɔ lɛ nɔ yɛ mɛɛ gbɛ nɔ?
16 Eji anɔkwale akɛ, jeee shia kɛ shia Paulo shiɛɔ yɛ, yɛ Mars’ Hill lɛ. Shi Yehowa Odasefoi baanyɛ akase nii babaoo ni baanyɛ aha amɛsɔɔmɔ nitsumɔ lɛ aya hiɛ kɛjɛ ewiemɔ lɛ kɛ tsɔsemɔ ni akɛhaa amɛ yɛ Teokrase Sɔɔmɔ Skul lɛ mli lɛ mli. Hɛɛ, enɛɛmɛi fɛɛ yeɔ buaa ni efeɔ amɛ sɔɔlɔi ni he esa babaoo, taakɛ bɔ ni Paulo sane naatsɔɔmɔ ni ja kɛ naataomɔ ni yiŋtsɔmɔ yɔɔ mli lɛ tsɔ Ateenebii lɛ ekomɛi ayiŋ ni amɛbatsɔmɔ heyelilɔi lɛ.—Bɔfoi lɛ Asaji 17:32-34.
Okɛ Nɔkwɛmɔ Nii Ni Tsɔɔ Saji Amli Atsu Nii
17. Mɛɛ nɔkwɛmɔ nii nɛkɛ esa akɛ akɛtsu nii yɛ sɔɔmɔ lɛ mli?
17 Teokrase Sɔɔmɔ Skul lɛ hu yeɔ buaa Nyɔŋmɔ sɔɔlɔi lɛ ni amɛkɛ nɔkwɛmɔ nii kpakpai atsu nii yɛ shia kɛ shia odaseyeli mli kɛ sɔɔmɔ lɛ mli nitsumɔi krokomɛi amli. Bɔni afee ni ama saji otii anɔ mi lɛ, esa akɛ akɛ nɔkwɛmɔ nii ni mli ka shi faŋŋ ni yɔɔ mlɛo ni sa atsu nii. Esa akɛ Odasefonyo lɛ ana enɛɛmɛi kɛjɛ shihilɛi ni ale jogbaŋŋ lɛ amli ni ekwɛ jogbaŋŋ koni eha bɔ ni ekɛtoɔ saji ahe lɛ mli aka shi. Ana nɛkɛ taomɔ nii nɛɛ fɛɛ yɛ nɔkwɛmɔ nii ni Yesu kɛtsu nii lɛ amli.
18. Mateo 13:45, 46 he baanyɛ aba sɛɛnamɔ yɛ sɔɔmɔ lɛ mli yɛ mɛɛ gbɛ nɔ?
18 Akɛ nɔkwɛmɔ nɔ lɛ, susumɔ Yesu wiemɔi nɛɛ ahe okwɛ: “Asaŋ ŋwɛi maŋtsɛyeli lɛ tamɔ guɔyelɔ ko ni taoɔ ojarawa tɛi fɛfɛji, ni beni eyana ojarawa tɛ kome ni jara wa lɛ, etee ni eyahɔɔ nii fɛɛ ni eyɔɔ lɛ, ni ekɛ-he.” (Mateo 13:45, 46, NW) Anaa ojarawa tɛi nɛɛ yɛ adɔde ŋoŋoi kɛ ŋoŋoi krokomɛi amli. Shi ojarawa nɛɛ ekomɛi pɛ ji ‘ekpakpai.’ Guɔyelɔ lɛ na sɛɛyoomɔ ni he hiaa ni ha eyoo bɔ ni ojarawa tɛ kome nɛɛ jara wa fe fɛɛ lɛ, ni eesumɔ ni ehɔɔ nibii fɛɛ ni eyɔɔ lɛ koni ekɛ-he enɛ. Ekolɛ obaanyɛ ni okɛ nɛkɛ nɔkwɛmɔ nɔ nɛɛ atsu nii yɛ sɛɛsaramɔ loo shia Biblia mli nikasemɔ mli, ni okɛtsɔɔ akɛ, mɔ ni hiɛ sɔɔ Nyɔŋmɔ Maŋtsɛyeli lɛ lɛlɛŋ lɛ baafee enii tamɔ nakai guɔyelɔ lɛ. Gbɔmɔ ni tamɔ nɛkɛ kɛ Maŋtsɛyeli lɛ baafee nɔ ni he hiaa fe fɛɛ yɛ eshihilɛ mli, ele akɛ afɔle fɛɛ afɔle ni eeeshã yɛ he lɛ sa.
Okɛ Kanyamɔ Amu Sane Naa
19. Mɛni esa akɛ shiɛmɔ naamuamɔ yɛ shia kɛ shia sɔɔmɔ lɛ mli lɛ atsɔɔ shiatsɛ lɛ?
19 Nyɔŋmɔ webii kaseɔ yɛ Teokrase Sɔɔmɔ Skul lɛ mli hu akɛ, esa akɛ wiemɔ loo sanegbaa ko naamuu akɔ saneyitso lɛ he tɛɛ ni etsɔɔ toibolɔi lɛ nɔ ni esa akɛ amɛfee ni ewo amɛ hewalɛ ni amɛfee nakai. Ehe miihia ni atsɔɔ shiatsɛ lɛ gbɛ pɔtɛɛ ni akpaa lɛ gbɛ akɛ eeetsɔ nɔ, tamɔ Biblia kasemɔ wolo ko ni eeehe aloo sɛɛsaramɔ ni eeekpɛlɛ nɔ lɛ yɛ shia-kɛ-shia nitsumɔ lɛ mli.
20. Mɛɛ naamuamɔ ni kanyaa mɔ lɛ he nɔkwɛmɔ nɔ kpakpa wɔyɔɔ yɛ Mateo 7:24-27?
20 Yesu Gɔŋ nɔ Shiɛmɔ lɛ naamuu kɛ nɔkwɛmɔ nɔ kpakpa haa. Yesu tsɔ nɔkwɛmɔ nɔ ni abaanyɛ anu shishi oya nɔ etsɔɔ akɛ ebaafee nilee gbɛ akɛ aaabo ewiemɔi atoi. Emu sane lɛ naa akɛ: “No hewɔ lɛ mɔ fɛɛ mɔ ni nuɔ miwiemɔi nɛɛ ni eyeɔ nɔ lɛ maŋɔ lɛ mato ŋaalelɔ ni ma etsu yɛ tɛsaa nɔ lɛ he. Ni nugbɔ tue, ni faai ba, ni kɔɔyɔɔ tswa, ni amɛshimɔ tsu lɛ, shi ewuleee; ejaakɛ ato shishi yɛ tɛsaa nɔ. Shi mɔ fɛɛ mɔ ni nuɔ miwiemɔi nɛɛ ni eyeee nɔ lɛ, aaaŋɔ lɛ ato nuu kwashia ni ma etsu yɛ shia nɔ lɛ he. Ni nugbɔ tue, ni faai ba, ni kɔɔyɔɔ tswa, ni amɛshimɔ tsu lɛ, ni ewule, ni ewulemɔ lɛ da.” (Mateo 7:24-27) Kwɛ bɔ ni enɛ tsɔɔ jogbaŋŋ ha akɛ esa akɛ Nyɔŋmɔ sɔɔlɔi lɛ abɔ mɔdɛŋ ni amɛkanya shiatsɛmɛi lɛ!
21. Wɔ nikasemɔ lɛ efee mɛni he nɔkwɛmɔ nɔ, shi mɛni esa akɛ ayoo?
21 Otii ni wɔkase nɛɛ feɔ bɔ ni Teokrase Sɔɔmɔ Skul lɛ baanyɛ aye abua mɛi pii ni amɛfee Maŋtsɛyeli shiɛlɔi ni he esa lɛ he nɔkwɛmɔ nɔ. Shi, klɛŋklɛŋ lɛ, sa ni wɔhe aaasa jogbaŋŋ lɛ jɛ Nyɔŋmɔ ŋɔɔ. (2 Korintobii 3:4-6) Ni yɛ bɔ ni sɔɔlɔ lɛ he esa ha lɛ fɛɛ sɛɛ lɛ, mɔ ko mɔ ko nyɛŋ atsɔ gbɔmɛi ayiŋ ni amɛbatsɔmɔ heyelilɔi ja Nyɔŋmɔ tsɔ Kristo nɔ egbala amɛ. (Yohane 14:6) Kɛlɛ, esa akɛ Nyɔŋmɔ webii aŋɔ hegbɛi fɛɛ ni mumɔŋ nibii ni Yehowa eto he gbɛjianɔ lɛ kɛhaa amɛ lɛ ni amɛkɛtsu nii, yɛ be mli ni amɛtaoɔ mɛi ni amɛsu loo amɛtsui hi kɛha naanɔ wala lɛ.
Mɛni ji Ohetooi?
◻ Namɛi ji mɛi ni “tsui amli atse” lɛ, ni “amɛaana Nyɔnmɔ” yɛ mɛɛ gbɛ nɔ?
◻ Mɛni nibii esa akɛ asusu he yɛ be mli ni ajeɔ Maŋtsɛyeli lɛ he sane lɛ shishi loo akpaa sane lɛ hiɛ yɛ shia kɛ shia nitsumɔ lɛ mli lɛ?
◻ Mɛɛ gbɛ nɔ aaatsɔ ni akɛ Nyɔŋmɔ Wiemɔ lɛ atsu nii yɛ gbɛ ni ja nɔ yɛ sɔɔmɔ nitsumɔ lɛ mli?
◻ Mɛni baaye abua ni akɛ sane naatsɔɔmɔ ni ja ni tsɔɔ mɔ yiŋ atsu nii yɛ sɔɔmɔ nitsumɔ lɛ mli?
◻ Mɛni esa akɛ akai yɛ nɔkwɛmɔ nii ni akɛtsuɔ nii yɛ sɔɔmɔ lɛ mli lɛ he?
◻ Mɛni esa akɛ sane naamuu ni akɛtsuɔ nii yɛ odaseyeli nitsumɔ lɛ mli lɛ atsu?
[Mfoniri ni yɔɔ baafa 16]
Yesu kɛɛ akɛ “mɛi ni tsuii amli tse Iɛ,” amɛ “amɛaana Nyɔŋmɔ.” Mɛni enɛ tsɔɔ?
[Mfoniri ni yɔɔ baafa 18]
Esa akɛ akpa ŋmalɛi ahiɛ yɛ gbɛ ni ja nɔ, akane kɛ nɔmimaa ni sa, ni akɛto sane he loo akɛtsu nii yɛ gbɛ ni mli ka shi faŋŋ ni ja hu nɔ