Mɛni Yaa Ni Aŋmɛ Lɛ Kɛ Looi Lɛ Tsɔɔ Kɛhaa Bo?
“Nyɛ lɛ, aŋɔha nyɛ akɛ nyɛle ŋwɛi maŋtsɛyeli lɛ mli teemɔŋ saji lɛ.”—MATEO 13:11.
1, 2. Mɛni hewɔ wɔbaanyɛ wɔnya Yesu abɛbuai lɛ ahe lɛ?
ANl onyaa teemɔŋ sane ko loo sane ni anaaa naa ni ooole lɛ he? Ni kɛji akɛ nakai feemɔ baaye abuao ni ona gbɛfaŋ nɔ ni ooona yɛ Nyɔŋmɔ yiŋtoo mli lɛ mli faŋŋ hu? Miishɛɛ sane ji akɛ, obaanyɛ ona hegbɛ ni haa anuɔ nii ashishi nɛɛ kɛtsɔ abɛbua ko ni Yesu kɛha lɛ nɔ. Eha mɛi ni nu lɛ ateŋ mɛi pii ayiŋ futu amɛ, ni étee nɔ eha mɛi pii ahiɛ, shi bo lɛ obaanyɛ onu shishi.
2 Kadimɔ nɔ ni Yesu wie yɛ Mateo yitso 13 ni kɔɔ bɔ ni ekɛ abɛbuai loo nɔkwɛmɔ nii tsuɔ nii lɛ he lɛ. Ekaselɔi lɛ bi akɛ: “Mɛni hewɔ okɛ amɛ wieɔ yɛ abɛbuai amli lɛ?” (Mateo 13:10) Hɛɛ, mɛni hewɔ Yesu kɛ abɛbuai ni mɛi pii nuŋ shishi lɛ tsu nii lɛ? Eha hetoo yɛ Mat 13 kukuji 11 kɛyashi 18: “Nyɛ lɛ aŋɔha nyɛ akɛ nyɛle ŋwɛi maŋtsɛyeli lɛ mli teemɔŋ saji lɛ, shi amɛ lɛ aŋɔhako amɛ. . . . Enɛ hewɔ mikɛ amɛ wieɔ yɛ abɛbuai amli lɛ, ejaakɛ amɛmiina shi amɛnaaa, ni amɛmiinu, shi amɛnuuu, ni amɛnaaa shishi hu.”
3. Yesu abɛbuai lɛ ashishinumɔ he baanyɛ aba sɛɛnamɔ aha wɔ yɛ mɛɛ gbɛ nɔ?
3 Kɛkɛ ni Yesu kɛ Yesaia 6:9, 10 ni tsɔɔ bɔ ni gbɔmɛi komɛi ji mumɔŋ toimulɔi kɛ shwilafoi lɛ to amɛhe. Shi wɔ lɛ, ehe ehiaaa ni wɔtamɔɔ amɛ. Kɛ wɔnu ebɛbuai lɛ ashishi ni wɔtsu he nii lɛ, wɔbaanyɛ wɔna miishɛɛ babaoo—bianɛ kɛ agbɛnɛ kɛmiiya wɔsɛɛ be ni bɛ naagbee lɛ mli. Yesu kɛ nɔmimaa ni miishɛɛ yɔɔ mli nɛɛ haa wɔ akɛ: “Ajɔɔ nyɛhiŋmɛii lɛ akɛ amɛmiina nii, kɛ nyɛtoii lɛ, akɛ amɛmiinu nii.” (Mateo 13:16) Nakai nɔmimaa lɛ kɔɔ Yesu abɛbuai lɛ fɛɛ ahe, shi nyɛhaa wɔgbalaa wɔjwɛŋmɔ kɛyaa yaa lɛ he abɛbua kuku ni aŋma afɔ shi yɛ Mateo 13:47-50 lɛ nɔ.
Abɛbua ni Hiɛ Shishinumɔ ni Yaa Shɔŋŋ
4. Mɛni Yesu gba kɛtsɔ abɛbua nɔ taakɛ aŋma afɔ shi yɛ Mateo 13:47-50 lɛ?
4 “Ŋwɛi maŋtsɛyeli lɛ tamɔ yaa ni afɔ yɛ ŋshɔ mli ni eŋɔ looi sɔrɔtoi fɛɛ eko; ni beni eyi lɛ, agbala kɛba shia nɔ, ni amɛtara shi amɛbua akpakpai lɛ anaa amɛwo kpaii amli; shi nii ni ehii lɛ amɛshɛre amɛshwie. Nakai nɔŋŋ abaafee yɛ je nɛŋ naagbee lɛ. Ŋwɛibɔfoi lɛ aaaje kpo aba, ni amɛaabahala mɛi fɔji lɛ yɛ jalɔi lɛ ateŋ; ni amɛkɛ nomɛi aaawo la flɔnɔɔ lɛ mli. Jɛmɛ yaafo kɛ nyanyɔji ashishikpemɔ aaahi.”
5. Mɛɛ sanebimɔi nɛkɛ teɔ shi yɛ yaa lɛ he abɛbua lɛ shishinumɔ he?
5 Ekolɛ ona bɔ ni mɛi kɛ yaa shaa loo amɛhaa, kɛ hoo lɛ yɛ sini loo tɛlevishin nɔ da, no hewɔ lɛ Yesu abɛbua lɛ he mfoniri-feemɔ waaa. Shi emli nibii lɛ kɛ amɛshishinumɔ hu? Akɛ nɔkwɛmɔ nɔ lɛ, Yesu kɛɛ nɛkɛ abɛbua nɛɛ kɔɔ “ŋwɛi maŋtsɛyɛli” lɛ he. Kɛlɛ, yɛ anɔkwalɛ mli lɛ etsɔɔɔ akɛ gbɔmɛi “sɔrɔtoi fɛɛ,” mɛi kpakpai kɛ mɛi ni esaaa loo efɔŋfeelɔi lɛ fɛɛ baahi Maŋtsɛyɛli lɛ mli. Agbɛnɛ hu, namɛi shaa looi lɛ? Ani nɛkɛ looi ashamɔ kɛ mligbalamɔ nitsumɔ nɛɛ ba mli yɛ Yesu gbii lɛ amli, aloo ebaanyɛ efee nɔ ni kɔɔ wɔbe nɛɛ, “je nɛŋ naagbee lɛ” pɛ he? Ani onaa ohe yɛ abɛbua nɛɛ mli? Te ooofee tɛŋŋ ni okayafata mɛi ni foɔ ni amɛkpeɔ amɛnyanyɔji ashishi nɛɛ ahe hu?
6. (a) Mɛni hewɔ esa akɛ wɔnya yaa lɛ he abɛbua lɛ ni wɔɔnu shishi lɛ he waa lɛ? (b) Mɛni nɔ wɔbaatsɔ ni wɔnu shishi?
6 Sanebimɔi ni tamɔ nɛkɛ tsɔɔ akɛ abɛbua nɛɛ shishinumɔ bɛ mlɛo. Shi, kaaha ohiɛ miikpa nɔ akɛ: “Shi nyɛ lɛ, ajɔɔ nyɛhiŋmɛii lɛ, akɛ amɛmiina nii, kɛ nyɛtoii lɛ, akɛ amɛmiinu nii.” Nyɛhaa wɔkwɛa akɛ wɔbaanyɛ wɔpɛi eshishinumɔ lɛ mli lo koni wɔtoii akafee nɔ ni nuuu nii, koni wɔhiŋmɛii akaŋamɔ yɛ nɔ ni eshishinumɔ ji he. Yɛ anɔkwalɛ mli lɛ, wɔyɛ nɔ ni he hiaa ni baaha wɔnu shishi lɛ momo. Nikasemɔ ni tsɔ hiɛ lɛ gba akɛ Yesu fɔ nine etsɛ Galilea wolɛi ni amɛshi nakai nitsumɔ lɛ ni amɛkɛ amɛhe abawo mumɔŋ nitsumɔ ko mli akɛ “gbɔmɛi ahe wolɛi.” (Marko 1:17) Ekɛɛ amɛ akɛ: “Kɛjɛ be nɛɛ nɔ kɛyaa nɛɛ nyɛaasha gbɔmɛi hiɛkalɔi.”—Luka 5:10, New World Translation.
7. Mɛni he mfoniri Yesu feɔ beni ewie looi ahe lɛ?
7 Yɛ enɛ kɛ gbeekpamɔ naa lɛ, looi ni yɔɔ abɛbua nɛɛ mli lɛ damɔ shi kɛha gbɔmɛi. No hewɔ lɛ, kɛ kuku 49 lɛ miiwie mɛi fɔji lɛ ni aaahala amɛ kɛjɛ jalɔi lɛ ateŋ lɛ he lɛ, jeee ŋshɔ mli nibii ni wala yɔɔ mli ni ja loo nibii ni ejaaa ahe ewieɔ lɛ, shi moŋ gbɔmɛi jalɔi loo efɔŋfeelɔi ahe ewieɔ lɛ. Nakai nɔŋŋ hu esaaa akɛ kuku 50 lɛ haa wɔsusuɔ akɛ ŋshɔ mli looi fóɔ loo amɛkpeɔ amɛnyanyɔji ashishi. Dabi. Nɛkɛ abɛbua nɛɛ kɔɔ gbɔmɛi anaabuamɔ kɛ amɛmligbalamɔ yɛ sɛɛ mli, ni hiɛdɔɔ yɔɔ mli, taakɛ nɔ ni jɛɔ mli baa lɛ tsɔɔ lɛ he.
8. (a) Mɛni wɔbaanyɛ wɔkase kɛjɛ nɔ ni ba looi ni ehii lɛ anɔ lɛ mli? (b) Yɛ nɔ ni awie yɛ looi ni ehii lɛ ahe lɛ hewɔ lɛ, mɛɛ sane naa wɔbaamu yɛ Maŋtsɛyeli lɛ he?
8 Kadimɔ akɛ looi ni ehiii, ni ji mɛi fɔji lɛ, abaashɛrɛ amɛ awo la flɔnɔɔ lɛ mli, ni amɛbaafo ni amɛkpe amɛnyanyɔji ashishi yɛ jɛmɛ. Yesu kɛ nɛkɛ yaafo kɛ nyanyɔji ashishikpemɔ nɛɛ to mɛi ni yɔɔ Maŋtsɛyeli lɛ sɛɛ lɛ ahe yɛ he kroko. (Mateo 8:12; 13:41, 42) Etsi “la Gehena” po ta yɛ Mateo 5:22 kɛ 18:9, ni ekɛwie naanɔ hiɛkpatamɔ he. Ani enɛ etsɔɔɔ bɔ ni ehe hiaa akɛ wɔɔnu abɛbua nɛɛ shishi ni wɔtsu he nii bɔ ni sa? Wɔ fɛɛ wɔle akɛ efɔŋfeelɔi bɛ Nyɔŋmɔ Maŋtsɛyeli lɛ mli, ni amɛhiŋ mli hu. No hewɔ lɛ, beni Yesu kɛɛ akɛ “ŋwɛi maŋtsɛyeli lɛ tamɔ yaa ni afɔ yɛ ŋshɔ mli” lɛ, belɛ eetsɔɔ akɛ, nɔ ko yɛ Nyɔŋmɔ Maŋtsɛyeli lɛ he ni tamɔ yaa ni afɔ̃ loo aŋmɛ ni ŋɔɔ looi sɔrɔtoi fɛɛ.
9. Yaa ni agbalaa lɛ he abɛbua lɛ kɔɔ ŋwɛibɔfoi ahe nɛ mɛɛ gbɛ nɔ?
9 Beni áfɔ loo aŋmɛ yaa lɛ ni ebua looi lɛ anaa lɛ, agbɛnɛ mligbalamɔ nitsumɔ ko baaba. Namɛi Yesu kɛɛ amɛbaatsu enɛ? Mateo 13:49 haa aleɔ nɛkɛ wolɛi ni halaa looi amli nɛɛ akɛ ŋwɛibɔfoi. No hewɔ lɛ, Yesu miigba wɔ dɛŋdade ko ni yɔɔ shikpɔŋ nɔ, ni ji ŋwɛibɔfoi anɔkwɛmɔ, ni akɛtsuɔ nii akɛyooɔ gbɔmɛi—ekomɛi lɛ ekpakpai ni hi kɛha ŋwɛi Maŋtsɛyeli lɛ, kɛ ekrokomɛi hu ni tsɔɔ akɛ amɛjeee mɛi ni sa kɛha nakai tsɛmɔ lɛ he sane.
Wuoyaa lɛ—Mɛɛ Be?
10. Mɛɛ nii ahesusumɔ nɔ wɔɔdamɔ wɔtsɔɔ akɛ wuoyaa nitsumɔ lɛ tee nɔ yɛ be kakadaŋŋ mli?
10 Emli sane lɛ yeɔ ebuaa wɔ ni wɔnaa be mli ni enɛ baa mli. Dani enɛ aaaba lɛ, Yesu kɛ abɛbua ko ni kɔɔ dumɔwui kpakpai ni adu, ni sɛɛ mli lɛ abadu jwɛi awo ŋmɔ ni feɔ je lɛ he mfoniri lɛ mli fɛɛ he lɛ ha. Etsɔɔ mli yɛ Mateo 13:38 akɛ dumɔnii kpakpai lɛ ji “maŋtsɛyeli lɛŋ bii lɛ; jwɛi lɛ ji mɔ fɔŋ lɛ bii lɛ.” Enɛɛmɛi kwɛ̃ ni amɛdara yɛ he kome afii ohai babaoo, kɛyashi ŋmaakpamɔ be lɛ mli yɛ nibii agbɛjianɔtoo lɛ naagbee. Kɛkɛ ni ahala jwɛi lɛ yɛ mli ni ashã yɛ sɛɛ mli. Nɔ ni tamɔ enɛ pɛpɛɛpɛ ji yaa ni aŋmɛ loo afɔle he abɛbua lɛ, ni wɔnaa akɛ bɔɔ nii ni aaaŋɔ amɛ awo yaa lɛ mli lɛ baahe be kakadaŋŋ diɛŋtsɛ.—Mateo 13:36-43.
11. Majimaji ateŋ wuoyaa nitsumɔ ko je shishi yɛ klɛŋklɛŋ afii oha lɛ mli yɛ mɛɛ gbɛ nɔ?
11 Taakɛ Yesu abɛbua lɛ tsɔɔ lɛ, abaabua looi anaa kɛkɛ ni ajieee mli, ni ji akɛ, yaa lɛ ŋɔ looi kpakpai kɛ nɔ ni ehii fɛɛ. Beni bɔfoi lɛ yɔɔ wala mli lɛ, ŋwɛibɔfoi ni kwɛɔ wuoyaa nitsumɔ lɛ nɔ lɛ kɛ Nyɔŋmɔ Kristofoi agbɛjianɔtoo lɛ tsu nii ni akɛsha “looi” ni batsɔmɔ Kristofoi ni afɔ amɛ mu. Ekolɛ obaakɛɛ akɛ dani Pentekoste afi 33 Ŋ.B. aaashɛ lɛ, no mli lɛ, gbɔmɛi ni Yesu sha lɛ ha enyɛ ebua kaselɔi aaafee 120 naa. (Bɔfoi lɛ Asaji 1:15) Shi beni ato Kristofoi ni afɔ amɛ mu lɛ asafo lɛ ama shi pɛ kɛkɛ ni wuoyaa kɛ dɛŋdade ni ji yaa lɛ je shishi, ni asha looi kpakpai akpei abɔ. Kɛjɛ afi 36 Ŋ.B. kɛyaa lɛ, wuoyaa nitsumɔ lɛ gbɛ shwa kɛtee majimaji ateŋ ŋshɔi amli, beni agbala Jeŋmajiaŋbii kɛba Kristojamɔ mli ni amɛbatsɔmɔ Kristo asafo ni afɔ amɛ mu lɛ mlibii lɛ.—Bɔfoi lɛ Asaji 10:1, 2, 23-48.
12. Mɛni ba yɛ bɔfoi lɛ agbele sɛɛ?
12 Yɛ bɔfoi lɛ agbele sɛɛ afii ohai abɔ ni nyiɛ sɛɛ ba lɛ amli lɛ, Kristofoi komɛi tee nɔ amɛhi shi ni amɛmiibɔ mɔdɛŋ ni amɛna ŋwɛi anɔkwale lɛ ni amɛmɔ mli. Kɛ hoo lɛ amɛteŋ mɛi komɛi na Nyɔŋmɔ nɔkpɛlɛmɔ, ni ekɛ mumɔ krɔŋkrɔŋ fɔ amɛ mu. Shi kɛlɛ, bɔfoi lɛ agbele jie hewalɛ ko ni tsiɔ nii anaa lɛ kɛtee, ni enɛ ha hemɔkɛyeli kwamɔ ba, ni egbɛ eshwa. (2 Tesalonikabii 2:7, 8) Gbɛjianɔtoo ko te shi ni tsɛ ehe Nyɔŋmɔ asafo yɛ gbɛ ni esaaa nɔ. Ekɛ apasa tsɛ ehe akɛ maŋ krɔŋkrɔŋ ni akɛ Nyɔŋmɔ mumɔ efɔ lɛ mu ni ekɛ Yesu aye maŋtsɛ.
13. Mɛni hewɔ abaanyɛ akɛɛ akɛ Kristendom na yaa lɛ he nitsumɔ mli gbɛfaŋnɔ lɛ?
13 Ani osusuɔ akɛ mɛi ni yeee anɔkwa ni kɛɔ akɛ amɛyɔɔ Kristojamɔ mli lɛ ná yaa lɛ he abɛbua lɛ mli gbɛfaŋnɔ ko? Ojogbaŋŋ, wɔyɛ nɔ ni wɔɔdamɔ nɔ wɔha hetoo akɛ hɛɛ, amɛna mli gbɛfaŋnɔ. Kristendom fata okadi yaa lɛ he. Eji anɔkwale akɛ Katolek Sɔlemɔ lɛ kɛ afii ohai pii bɔ mɔdɛŋ koni gbɔmɛi foji lɛ anine akashɛ Biblia lɛ nɔ. Ni kɛlɛ, Kristendom mli bii kɛ afii ohai abɔ etsu babaoo yɛ Nyɔŋmɔ Wiemɔ lɛ shishitsɔɔmɔ, enɔ ni akwɛɔ aŋmalaa ekomɛi, kɛ ejaa mli. Yɛ sɛɛ mli lɛ, sɔlemɔi lɛ to Biblia asafoi loo amɛfi ekomɛi asɛɛ, ni amɛtsɔɔ Biblia lɛ shishi kɛtee shikpɔji ni yɔɔ hei banee lɛ awiemɔi amli. Amɛtsu maŋsɛɛ sanekpakpa shiɛlɔi ni ji tsofafeelɔi kɛ tsɔɔlɔi, ni amɛha gbɔmɛi batsɔmɔ Kristofoi yɛ niyenii kɛ heloo gbɛfaŋ nibii ni amɛnine shɛɔ nɔ lɛ hewɔ. Enɛ bua looi babaoo ni ehiii, ni bɛ Nyɔŋmɔ nɔkpɛlɛmɔ lɛ anaa. Shi kɛ hoo lɛ, eha gbɔmɛi akpekpei abɔ ni jeee Kristofoi bale Biblia lɛ kɛ Kristojamɔ ko, eyɛ mli akɛ ekpɔtɔ.
14. Nitsumɔ ko ni Kristendom sɔlemɔi lɛ tsu lɛ ye bua looi kpakpai ni ashaa amɛ lɛ yɛ gbɛ ko nɔ yɛ mɛɛ gbɛ nɔ?
14 No mli fɛɛ lɛ, anɔkwafoi ni amɛgbɛ amɛshwa ni kɛ amɛhe kpɛtɛɔ Nyɔŋmɔ Wiemɔ lɛ he lɛ mia amɛhiɛ bɔ ni amɛaanyɛ. Amɛ amɛfee Nyɔŋmɔ anɔkwa asafo ni afɔ amɛ mu ni yɔɔ shikpɔŋ nɔ yɛ bei sɔrɔtoi lɛ amli lɛ. Ni wɔbaanyɛ wɔna nɔmimaa akɛ amɛ hu amɛsha looi, loo gbɔmɛi, ni Nyɔŋmɔ baabu amɛteŋ mɛi pii akɛ amɛhi ni ekɛ emumɔ lɛ baafɔ amɛ mu. (Romabii 8:14-17) Nɛkɛ gbɔmɛi kpakpai ni kɛɔ akɛ amɛji Kristofoi nɛɛ nyɛ amɛkɛ Biblia mli anɔkwale lɛ baha mɛi pii ni amɛkɛɛ amɛtsɔmɔ Kristofoi yɛ niyenii kɛ heloo naa nibii ni amɛnine shɛ nɔ, loo mɛi ni amɛna Biblia lɛ he nilee fioo yɛ Ŋmalɛi ni Kristendom Biblia asafoi lɛ tsɔɔ shishi kɛtee amɛwiemɔi amli hewɔ lɛ. Eji anɔkwale akɛ no mli lɛ looi kpakpai lɛ anaabuamɔ lɛ miiya nɔ, eyɛ mli akɛ nɔ ni Kristendom buaa naa lɛ ateŋ nɔ ni fa jeee nɔ ni sa yɛ Nyɔŋmɔ hiɛ.
15. Kɛ aaawie he pɔtɛɛ lɛ, abɛbua lɛ mli yaa lɛ damɔ shi kɛha mɛni?
15 No hewɔ lɛ yaa lɛ damɔ shi kɛha shikpɔŋ nɔ dɛŋdade ko ni kɛɔ akɛ eji Nyɔŋmɔ asafo ni buaa looi anaa kɛbaa mli. Nɔ ni fata enɛ he ji Kristendom kɛ Kristofoi ni afɔ amɛ mu lɛ asafo lɛ fɛɛ, ni sɛɛkpee bii nɛɛ etee nɔ ebua looi kpakpai anaa, yɛ ŋwɛibɔfoi ni anaaa amɛ lɛ akudɔmɔ shishi, yɛ Mateo 13:49 kɛ gbeekpamɔ naa.
Wɔbe Nɛɛ Ji Be Krɛdɛɛ Ko
16, 17. Mɛni hewɔ be ni wɔyɔɔ mli nɛɛ he hiaa waa yɛ Yesu abɛbua ni kɔɔ yaa lɛ he lɛ he nitsumɔ
16 Agbɛnɛ nyɛhaa wɔsusua be he sane lɛ he wɔkwɛa. Dɛŋdade ni ji yaa nɛɛ kɛ afii ohai abɔ ebua looi kpakpai kɛ nɔ ni ehiii, loo efɔŋfeelɔi babaoo hu naa. Kɛkɛ ni be bashɛ ni ŋwɛibɔfoi lɛ kɛ amɛhe wo mligbalamɔ nitsumɔ ko ni hiɛdɔɔ yɔɔ mli lɛ mli. Mɛɛ be? Ojogbaŋŋ, Mat 13 kuku 49 kɛɔ yɛ faŋŋ mli akɛ “yɛ je nɛŋ naagbee lɛ.” Enɛ kɛ nɔ ni Yesu wie yɛ gwantɛŋi lɛ kɛ abotiai lɛ ahe abɛbua lɛ mli lɛ kpaa gbee pɛpɛɛpɛ: “Shi beni gbɔmɔ Bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli taakɛ bɔ ni tookwɛlɔ gbalaa gwantɛŋi kɛ abotiai amli lɛ.”—Mateo 25:31, 32.
17 No hewɔ lɛ, yɛ Mateo 13:47-50 kɛ gbeekpamɔ naa lɛ, mligbalamɔ nitsumɔ ko ni hiɛdɔɔ yɔɔ mli etee nɔ yɛ ŋwɛibɔfoi agbɛtsɔɔmɔ shishi kɛjɛ be mli ni “je nɛŋ naagbee lɛ” je shishi yɛ 1914 lɛ. Enɛ baje kpo faŋŋ yɛ 1919 sɛɛ, beni aŋmɛɛ mɛi ni afɔ amɛ mu lɛ ateŋ shwɛɛnii lɛ ahe kɛjɛ be kuku ni amɛkɛhi mumɔŋ nyɔŋyeli loo nomŋɔɔ mli, ni yɛ naagbee lɛ amɛbatsɔmɔ dɛŋdade ni sa jogbaŋŋ kɛha looi ashamɔ nitsumɔ lɛ.
18. Abua looi kpokpai lɛ anaa awo kpaii loo kɛŋtɛŋi amli yɛ mɛɛ gbɛ nɔ?
18 Mɛni baaba looi kpakpai ni abua amɛnaa lɛ anɔ? Mat 13 Kuku 48 kɛɔ akɛ ŋwɛibɔfoi wolɛi kɛ mlihalalɔi lɛ “bua [looi] kpakpai lɛ anaa amɛwo kpaii amli; shi nii ni ehiii lɛ, amɛshɛrɛ amɛshwie.” Kpaii lɛ ji kɛŋtɛŋi loo kafui ni baa nii ayi ni akɛ looi kpakpai lɛ woɔ mli. Ani enɛ ba mli yɛ wɔgbii nɛɛ amli? Hɛɛ, eba mli. Kɛji asha okadi looi kpakpai hiɛkalɔi lɛ, abuaa amɛnaa awoɔ anɔkwa Kristofoi asafoi amli. Nɛkɛ asafoi ni tamɔ kpaii loo kɛŋtɛŋi nɛɛ eye ebua ni abaa amɛyi, ni akɛ amɛ eto aha sɔɔmɔ krɔŋkrɔŋ, aloo okɛ wɔ kpaaa gbee? Shi kɛlɛ, mɔ ko baasusu akɛ, ‘Enɛɛmɛi fɛɛ hi jogbaŋŋ, shi te enɛ kɔɔ miŋmɛnɛŋmɛnɛ shihilɛ kɛ miwɔsɛɛ be he ehaa tɛŋŋ?’
19, 20. (a) Mɛni hewɔ ehe hiaa waa akɛ wɔɔnu abɛbua nɛɛ shishi ŋmɛnɛ lɛ? (b) Mɛɛ wuoyaa nitsumɔ ko ni he hiaa atsu kɛjɛ 1919 kɛbaa?
19 Abɛbua ni atsɔɔ mli yɛ biɛ lɛ he nitsumɔ jeee nɔ ni kɔɔ afii ohai abɔ ni baka bɔfoi lɛ abe lɛ kɛ 1914 teŋ lɛ pɛ he. Dɛŋdade ni ji yaa lɛ bua mɛi ni kɛ apasa kɛɔ akɛ amɛji Kristofoi kɛ mɛi ni ji anɔkwafoi lɛ fɛɛ anaa yɛ nakai be lɛ mli. Hɛɛ, eebua looi ni ehiii kɛ looi kpakpai fɛɛ naa. Agbɛnɛ hu, mligbalamɔ nitsumɔ ni ŋwɛibɔfoi lɛ tsu lɛ baaa naagbee yɛ 1919 mli. Dabi kwraa. Nɛkɛ yaa nɛɛ he abɛbua lɛ kɔɔ wɔbe nɛɛ he diɛŋtsɛ yɛ gbɛi sɔrɔtoi komɛi anɔ. Ekɔɔ wɔhe, ni nakai eji kɛha wɔ wɔsɛɛ be ni ka wɔhiɛ kpaakpa nɛɛ. Ehe miihia ni wɔnu bɔ ni kɛ nɔ hewɔ ni nakai eji lɛ shishi kɛ wɔmiisumɔ ni nɛkɛ wiemɔi nɛɛ akɔ wɔhe: “Ajɔɔ nyɛhiŋmɛii lɛ, akɛ amɛmiina nii, kɛ nyɛtoii lɛ, akɛ amɛmiinu nii” kɛ shishinumɔ.—Mateo 13:16.
20 Ekolɛ ole akɛ yɛ 1919 sɛɛ lɛ, shwɛɛnii ni afɔ amɛ mu lɛ kɛ amɛhe wo shiɛmɔ nitsumɔ mli waa, kɛ ŋwɛibɔfoi ni tee nɔ amɛkɛ okadi yaa lɛ gbala looi kɛba ŋshɔ lɛ naa, koni amɛhala ekpakpai lɛ kɛjɛ nɔ ni ehiii lɛ ateŋ lɛ. Akɔntaabuu ni jɛ nakai be lɛ mli tsɔɔ akɛ, looi kpakpai ni ashaa amɛ koni Nyɔŋmɔ mumɔ lɛ afɔ amɛ mu lɛ tee nɔ yɛ be mli ni okadi yaa lɛ buaa 144,000 lɛ mli naagbee bii lɛ anaa lɛ. (Kpojiemɔ 1:1-4) Shi okadi looi kpakpai lɛ ahalamɔ koni mumɔ krɔŋkrɔŋ lɛ afɔ amɛ mu lɛ ba naagbee yɛ 1930 afii lɛ teŋgbɛ. Ani shwɛɛnii ni afɔ amɛ mu lɛ asafo lɛ baaŋmɛɛ yaa lɛ kɛ nitsumɔ he agbɛnɛ, ni amɛtara shi kɛkɛ ni amɛtsuuu nɔ ko, ni amɛmiimɛ amɛ ŋwɛi nyɔmɔwoo lɛ? Dabi kwraa!
Bɔ ni Wuoyaa Nitsumɔ lɛ Kɔɔ Ohe Ehaa
21. Mɛɛ wuoyaa nitsumɔ kroko etee nɔ yɛ wɔbe nɛɛ mli? (Luka 23:43)
21 Yesu abɛbua ni kɔɔ yaa lɛ he lɛ gbala jwɛŋmɔ kɛtee looi kpakpai ni akɛ gbɛhe yɛ ŋwɛi Maŋtsɛyeli lɛ mli lɛ baawo amɛ nyɔmɔ lɛ anɔ. Ni kɛlɛ, yɛ nakai abɛbua lɛ sɛɛ lɛ, okadi wuoyaa nitsumɔ kroko miiya nɔ yɛ gbɛ ni da waa nɔ taakɛ afee he nɔkwɛmɔ nɔ yɛ nikasemɔ ni tsɔ hiɛ lɛ mli lɛ. Nɛkɛ wuoyaa nɛɛ kɔɔɔ looi kpakpai ni afɔ amɛ mu ni yɔɔ Yesu abɛbua lɛ mli lɛ ahe, shi moŋ ekɔɔ okadi looi ni abaasha amɛ hiɛkalɔi ni akɛ wala yɛ paradeiso shikpɔŋ nɔ he hiɛnɔkamɔ ni yɔɔ naakpɛɛ baaha amɛ lɛ ahe.—Kpojiemɔ 7:9, 10; okɛto Mateo 25:31-46 he.
22. Mɛɛ niiashikpamɔ ni yɔɔ miishɛɛ baajɛ mli aba aha wɔ, ni kɛ jeee nakai Iɛ mɛɛ nɔ kroko baajɛ mli aba?
22 Kɛ onyaa nakai hiɛnɔkamɔ lɛ he lɛ, belɛ omli baafili bo akɛ Yehowa eŋmɛ gbɛ akɛ yiwalaheremɔ nitsumɔ ko ni kɔɔ wuoyaa he aya nɔ kɛbashi bianɛ. Enɛ eha onyɛ ona gbɛkpamɔ ko ni yɔɔ nyam. Gbɛkpamɔ? Hɛɛ, no ji wiemɔ ni sa ni akɛaatsu nii, ejaakɛ nɔ ni baajɛ mli aba lɛ damɔ anɔkwa ni wɔɔya nɔ wɔye Mɔ ni kudɔɔ wuoyaa nitsumɔ ni yaa nɔ lɛ nɔ. (Zefania 2:3) Kaimɔ kɛjɛ abɛbua lɛ mli akɛ jeee looi fɛɛ ni yaa lɛ sha lɛ anine shɛɔ nɔ kpakpa nɔ. Yesu kɛɛ akɛ abaahala nɔ ni ehiii, loo mɛi fɔji lɛ, kɛjɛ jalɔi lɛ ateŋ. Kɛha mɛni feemɔ? Yesu tsɔɔ nɔ ni yɔɔ hiɛdɔɔ ni baaje mli aba aha looi ni ehiii loo efɔŋfeelɔi lɛ yɛ Mateo 13:50. Abaashɛrɛ amɛ awo la flɔnɔɔi mli, ni tsɔɔ naanɔ hiɛkpatamɔ.—Kpojiemɔ 21:8.
23. Mɛni haa wuoyaa nitsumɔ lɛ feɔ nɔ ni he hiaa waa ŋmɛnɛ lɛ?
23 Anunyam wɔsɛɛ be yɛ kɛha looi kpakpai ni afɔ amɛ mu lɛ, kɛ agbɛnɛ okadi looi ni baahi shikpɔŋ nɔ kɛya naanɔ lɛ. Belɛ yiŋtoo kpakpa hewɔ ni ŋwɛibɔfoi lɛ kwɛɔ koni wuoyaa nitsumɔ ko ni yeɔ omanye aya nɔ bianɛ yɛ jeŋ fɛɛ lɛ. Ni mɛɛ okadi looi po amɛshaa nɛkɛ! Ebaaja akɛ oookɛɛ akɛ, yɛ gbɛ ko nɔ lɛ, looi ashamɔ nɛɛ yɛ naakpɛɛ tamɔ bɔ ni looi diɛŋtsɛ ni bɔfoi lɛ sha beni amɛŋmɛ amɛyaa lɛ yɛ Yesu famɔ naa lɛ yɔɔ naakpɛɛ lɛ pɛpɛɛpɛ.
24. Mɛni esa akɛ wɔsumɔ akɛ wɔɔfee yɛ mumɔŋ wuoyaa nitsumɔ lɛ he?
24 Ani ooná yiwalaheremɔ nitsumɔ ni ji mumɔŋ looi ashamɔ nɛɛ mli gbɛfaŋnɔ babaoo bɔ ni sa? Bɔ fɛɛ bɔ ni wɔna mli gbɛfaŋnɔ babaoo kɛbashi nɛkɛ be nɛɛ mli fɛɛ ákɛ aŋkroaŋkroi wɔha lɛ, eeefee sɛɛnamɔ kɛha wɔteŋ mɔ fɛɛ mɔ akɛ wɔɔkwɛ nɔ ni atsuɔ yɛ wuoyaa kɛ yiwalaheremɔ nitsumɔ ni yɔɔ nyam ni yaa nɔ bianɛ yɛ jeŋ fɛɛ lɛ. Esa akɛ nakai feemɔ akanya wɔ ni wɔna ekãa babaoo yɛ yaai lɛ ni wɔŋmɛɔ koni wɔgbe loo yɛ gbii ni jwere wɔhiɛ nɛɛ amli lɛ mli.—Okɛto Mateo 13:23; 1 Tesalonikabii 4:1 he.
◻ Looi sɔrɔtoi enyɔ ni yɔɔ Yesu abɛbua ni kɔɔ yaa lɛ he lɛ mli lɛ damɔ shi kɛha mɛni?
◻ Kristendom sɔlemɔi lɛ ena yaai lɛ ahe nitsumɔ lɛ mli gbɛfaŋnɔ yɛ mɛɛ shishinumɔ naa?
◻ Mɛni hewɔ hiɛdɔɔ yɔɔ wuɔyoo nitsumɔ ni yaa nɔ yɛ wɔbe nɛɛ mli lɛ mli waa lɛ?
◻ Esa akɛ yaa lɛ he abɛbua lɛ aha wɔteŋ mɔ fɛɛ mɔ apɛi lɛ diɛŋtsɛ emli ekwɛ yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 18]
Wuoyaa nitsumɔi etee nɔ yɛ Galilea Ŋshɔ lɛ nɔ afii ohai abɔ
[He ni Sane lɛ Jɛ]
Pictorial Archive (Near Eastern mama Est.