Yitso 11
Maŋtsɛyeli lɛ He Abɛbuai
1. Mɛni hewɔ mɛi fɛɛ ni sɔmɔɔ Nyɔŋmɔ lɛ yɔɔ Yesu abɛbuai lɛ ahe miishɛɛ lɛ?
BENI Yesu kɛ ekaselɔi lɛ yɔɔ lɛ, ewie nibii pii ahe yɛ abɛbuai, loo mfoniri feemɔi amli. Enɛɛmɛi tsɔɔ nibii ni he hiaa kɛha ŋwɛi Maŋtsɛyeli lɛ mlinyo tsɔmɔ. Amɛtsɔɔ gbɛ ni esa akɛ Maŋtsɛyeli niyelɔi “asafoku bibioo” lɛ akɔ, kɛ agbɛnɛ nɔ ni esa akɛ mɛi ni baana naanɔ wala yɛ shikpɔŋ nɔ yɛ nakai maŋtsɛyeli lɛ shishi lɛ hu akɔ. Nɛkɛ “tooi krokomɛi” nɛɛ hu naa miishɛɛ akɛ amɛaale gbalɛi ni kɔɔ Maŋtsɛyeli lɛ he lɛ ahe saji, ni amɛsɔleɔ waa ni ‘eba.’—Luka 12:32; Yohane 10:16; 1 Tesalonikabii 5:16-20.
2, 3. (a) Mɛni hewɔ ni Yesu kɛ abɛbuai tsu nii lɛ? (b) Mɛni hewɔ yɛ ekaselɔi lɛ asɛɛ lɛ, mɛi krokomɛi lɛ nuuu shishi lɛ? (d) Akɛ mɛi ni tamɔɔɔ mɛi ni awie amɛhe yɛ Mateo 13:13-15 lɛ, mɛni hewɔ esa akɛ wɔkase Nyɔŋmɔ Wiemɔ lɛ kɛ ekaa lɛ?
2 Beni ebu gbɔmɛi lɛ abɛbuai nɛɛ ekome egbe naa lɛ, Yesu kaselɔi lɛ ba eŋɔɔ ni amɛbabi lɛ akɛ: “Mɛni hewɔ okɛ amɛ wieɔ yɛ abɛbuai amli lɛ?” Ni Yesu kɛɛ amɛ, yɛ hetoohamɔ mli akɛ:
“Ejaakɛ nyɛ lɛ aŋɔha nyɛ akɛ nyɛle ŋwɛi maŋtsɛyeli lɛŋ teemɔŋ saji lɛ, shi amɛ lɛ aŋɔhako amɛ.” (Mateo 13:10, 11)
Ni mɛni hewɔ aŋɔhako amɛ lɛ? Nɔ hewɔ ji akɛ, amɛsumɔɔɔ ni amɛgbo deŋme ni amɛkɛna ewiemɔi lɛ ahe shishinumɔ ni mli kwɔ, koni amɛtsuii atsirɛ amɛ ni amɛtsu “sanekpakpa” lɛ he nii. Amɛbuuu Maŋtsɛyeli lɛ akɛ eji “jwetri” aloo “adiagba [ko] ni jara wa.”—Mateo 13:44-46.
3 Yesu tsɛ Yesaia gbalɛ lɛ sɛɛ akɛ ena mlibaa yɛ nakai gbɔmɛi ni heee yeee lɛ anɔ, ni ekɛɛ: “Nu lɛ, nyɛbaanu nɛ, shi nyɛnaŋ shishi; ni na lɛ, nyɛbaana nɛ, shi nyɛyooŋ sɛɛ. Ejaakɛ nɛkɛ maŋ nɛɛ tsui ekplim, ni amɛtoii ewa, ni amɛmĩamĩa amɛhiŋmɛii; koni amɛkana kɛ amɛhiŋmɛii, ni amɛkanu kɛ amɛtoii, ni amɛtsuii hu akana shishi, ni amɛkpale ni mitsa amɛ.” (Mateo 13:13-15) Esa akɛ wɔsumɔ akɛ wɔɔkwa gbɔmɛi ni hiɛ esɔɔɔ nii tamɔ nɛkɛ ni wɔɔtsɔmɔ. Belɛ, nyɛhaa wɔkɛ wɔhe awoɔ Nyɔŋmɔ Wiemɔ lɛ kasemɔ mli.
4. (a) Mɛɛ tsuii nɛkɛ naaa wiemɔ lɛ he sɛɛ? (b) Kɛ wɔbɔ mɔdɛŋ akɛ wɔɔnu wiemɔ lɛ shishi lɛ, mɛɛ gbɛ nɔ abaajɔɔ wɔ yɛ?
4 Yesu wie lɛ diɛŋtsɛ ehe yɛ ebɛbua ni awie he yɛ Mateo 13:3-8 lɛ mli akɛ “nidulɔ” ni yadũ dumɔ wui. Edũ “maŋtsɛyeli lɛ he wiemɔ lɛ” yɛ tsuii sɔrɔtoi amli. Mɛi komɛi atsuii tamɔ gbɛjegbɛ nɔ sũ. Dani dumɔ wu lɛ aaana shishifa lɛ, Abonsam tsuɔ esamaŋfoi lɛ kɛbaa tamɔ “loofɔji” ni amɛbashaa “wiemɔ lɛ yɛ amɛtsuiiaŋ, koni amɛkahe amɛye ni ahere amɛyiwala.” Tsuii krokomɛi hu tamɔ tɛsaa shikpɔŋ. Klɛŋklɛŋ lɛ, amɛkpɛlɛɔ wiemɔ lɛ nɔ kɛ miishɛɛ, shi etsɛɛɛ kɛkɛ lɛ tso bibioo ni kwɛ̃ɔ lɛ egbĩ yɛ kaa loo yiwaa shishi. Wui lɛ ekomɛi hu yashwie “ŋmeei” ateŋ, ni “je nɛŋ he naagbamɔi kɛ ninamɔ kɛ ŋɔɔmɔyeli” tsurɔ amɛ ni amɛgboi yɛ jɛmɛ. Aa, shi “wui” lɛ ekomɛi hu yɛ ni adu yɛ shikpɔŋ sũ kpakpa mli!
“Lɛ ji mɔ ni nuɔ wiemɔ lɛ ni eyooɔ sɛɛ, ni esaa ewoɔ yibii hu, ni ebaa, mɔ ko oha, mɔ ko hu nyɔŋmai ekpaa, kɛ mɔ ko hu nyɔŋmai etɛ.” (Mateo 13:18-23; Marko 4:3-9, 14-20; Luka 8:4-8, 11-15)
Hɛɛ, kɛ wɔhe wiemɔ lɛ wɔwo tsuii ni hiɛ sɔɔ nii mli, ni wɔkɛ wɔ hewalɛ fɛɛ tsu nii waa yɛ Nyɔŋmɔ Maŋtsɛyeli lɛ he lɛ, no lɛ abaajɔɔ wɔ babaoo ni sɔɔmɔ krɔŋŋ ni wɔkɛhaa Nyɔŋmɔ lɛ baawo yibii diɛŋtsɛ!
“NIDULƆ” KROKO HU
5. (a) Mɛɛ abɛbua kroko hu awoɔ wɔ hewalɛ ni wɔha wɔjwɛŋmɔ ahi nɔ? (b) Mɛni hewɔ nɛkɛ “mɔ” nɛɛ nyɛŋ afee Nuŋtsɔ Yesu lɛ?
5 Yɛ Sanekpakpai lɛ fɛɛ ateŋ lɛ, Marko nɔ lɛ pɛ tsaa nɛkɛ “nidulɔ” lɛ he abɛbua nɛɛ nɔ kɛ abɛbua ko ni kɔɔ “nidulɔ” kroko he. Dani eeegba nɛkɛ abɛbua nɛɛ, Yesu tsɛ ekaselɔi lɛ kɛtee afã ni ekɛɛ amɛ akɛ: “Nyɛkwɛa nɔ ni nyɛnuɔ lɛ jogbaŋŋ!” Kɛkɛ ni ekɛ abɛbua lɛ tsa nɔ, ni ekɛɛ:
“Bɔ ni Nyɔŋmɔ maŋtsɛyeli lɛ yɔɔ nɛ: etamɔ bɔ ni mɔ ko ŋɔɔ dumɔ nii eshwãa shikpɔŋ; ni eyawɔɔ ni eteɔ shi nyɔɔŋ kɛ shwane, ni dumɔ nii lɛ kwɛ̃ɔ ni edaa, ni no leee bɔ ni fee.” (Marko 4:24-27)
Eka shi faŋŋ akɛ, nɛkɛ “mɔ” nɛɛ jeee Nuŋtsɔ Yesu Kristo ni awo ehiɛ nyam lɛ, ejaakɛ shikpɔŋ nɔ wɔɔ yɛ nyɔɔŋ he ehiaaa lɛ dɔŋŋ. Ni nakai nɔŋŋ hu ejaaa akɛ aaakɛɛ akɛ Nyɔŋmɔ Bi lɛ, ni kɛ e-Tsɛ tsu nii kɛbɔ nibii fɛɛ lɛ “leee” bɔ ni nibii feɔ amɛdaa loo amɛkwɛ̃ɔ. (Kolosebii 1:16) No hewɔ lɛ, yɛ emli wiemɔi lɛ anaa lɛ, wɔbaanyɛ wɔna akɛ “mɔ” ni awieɔ ehe nɛɛ kɔɔ Kristofonyo mɔ aŋkro ni esa akɛ ‘ebo’ saji ni kɔɔ “Nyɔŋmɔ maŋtsɛyeli lɛ” he lɛ ‘toi jogbaŋŋ’ lɛ he.
6. Mɛɛ nibii enyɔ esa akɛ ‘nidulɔi’ lɛ ateŋ mɔ fɛɛ mɔ akwɛ jogbaŋŋ, ni mɛni hewɔ?
6 Esa akɛ ‘nidulɔi’ lɛ ateŋ mɔ fɛɛ mɔ akwɛ subaŋ kadimɔ nii ni ekɛdũɔ nii lɛ, kɛ agbɛnɛ he ni eduɔ nii lɛ yɛ lɛ hu jogbaŋŋ. Kɛji wɔhiɛ bɛ wɔhe nɔ yɛ he lɛ, ebaanyɛ ena wɔsubaŋ nɔ hewalɛ yɛ gbɛ kpakpa loo yɛ gbɛ fɔŋ nɔ, yɛ “shikpɔŋ” loo gbɔmɛi ni wɔkɛbɔɔ beni wɔbɔɔ mɔdɛŋ ni wɔna Kristofoi asui lɛ gbɛfaŋ—ekɔɔɔ he eko akɛ amɛyɛ asafo lɛ mli aloo amɛbɛ mli. (Okɛto 1 Korintobii 15:33 he.) Yɛ naagbee lɛ, “ŋmaa lɛ diɛŋtsɛ” baaje kpo yɛ ŋmaa lɛ yi, ni no pɛpɛɛpɛ wɔbaakpa hu. (Marko 4:28, 29) Kwɛ bɔ ni ehe hiaa waa akɛ “asafoku bibioo” lɛ mlibii lɛ, kɛ agbɛnɛ mɛi fɛɛ ni bɔɔ mɔdɛŋ akɛ amɛnine aaashɛ naanɔ wala nɔ yɛ Nyɔŋmɔ Maŋtsɛyeli gbɛjianɔtoo lɛ mli lɛ, akwɛ nɔ ni amɛdũɔ kɛ he ni amɛdũɔ yɛ hu, yɛ sui ni tamɔ Kristo nɔ lɛ eko ni amɛaana lɛ gbɛfaŋ!—Efesobii 4:17-24; Galatabii 6:7-9.
APASA MAŊTSƐYELI KO
7. Abɛbuai sɔrɔtoi lɛ fɛɛ yeɔ buaa wɔ ni wɔsusu Maŋtsɛyeli lɛ he yɛ mɛɛ gbɛ nɔ?
7 Marko sane lɛ wieɔ Yesu he akɛ etee nɔ ewie akɛ:
“Mɛni he wɔɔŋɔ Nyɔŋmɔ maŋtsɛyeli lɛ wɔto, aloo mɛɛ abɛ wɔɔbu yɛ he?” (Marko 4:30)
Kɛkɛ ni no sɛɛ lɛ ebi ni wɔsusu Maŋtsɛyeli lɛ he yɛ shihilɛ sɔrɔto ko kwraa mli. Lɛlɛŋ, nɛkɛ abɛbuai nɛɛ yeɔ ebuaa wɔ ni wɔsusuɔ Maŋtsɛyeli lɛ he kɛjɛɔ shihilɛi sɔrɔtoi amli, tamɔ bɔ ni wɔbaanyɛ wɔkwɛ tsu ko kɛjɛ ekponɔgbɛ kɛ emligbɛ, kɛ agbɛnɛ kɛjɛ hei sɔrɔtoi babaoo hu lɛ.
8. (a) Mɛni hewɔ dalɛ kpele ni jɛɔ sinapi wu lɛ mli kɛbaa lɛ nyɛŋ akɔ Maŋtsɛyeli niyelɔi lɛ ahe lɛ? (b) Mɛni hewɔ nilee yɔɔ mli akɛ enɛ sa Kristendom “maŋtsɛyeli” lɛ? (d) Bɔ ni Nyɔŋmɔ wie Israel hemɔkɛyeli kwalɔi lɛ ahe eha lɛ fiɔ susumɔ nɛɛ sɛɛ yɛ mɛɛ gbɛ nɔ?
8 No hewɔ lɛ, mɛni he esa akɛ wɔkɛ Nyɔŋmɔ Maŋtsɛyeli lɛ ato? Yesu ha hetoo akɛ:
“Etamɔ sinapi wu kuli kome ní beni aduɔ yɛ shikpɔŋ lɛ, eji wu bibioo fe shikpɔŋ lɛ nɔ wui fɛɛ; shi kɛ adũ lɛ, ekwɛ̃ɔ ni edaa fe shwiebaai fɛɛ, ni egbalaa niji kpelei, bɔ ni ŋwɛi loofɔji lɛ aaanyɛ afee tsũi yɛ ehɔɔŋ lɛ shishi.” (Marko 4:30-32)
Dalɛ kpele diɛŋtsɛ nɛ—ni eka shi faŋŋ akɛ, etsɔɔ nɔ ni mli lɛɛ kwraa fe “asafoku bibioo” ni ji Maŋtsɛyeli niyelɔi 144,000 lɛ, mɛi ni ‘Tsɛ lɛ yɔɔ he tsuijurɔ akɛ eeeŋɔ maŋtsɛyeli lɛ eha amɛ lɛ’! (Luka 12:32; Kpojiemɔ 14:1, 3) Shi moŋ, eji Kristendom apasa “tso” kpeteŋkpele lɛ dalɛ akɛ hemɔkɛyeli kwamɔ kɛmiijɛ asafo ni Yesu edũ lɛ he. (Luka 13:18, 19) Eda agbo! Ni eshwaa akɛ eyɛ emlibii ni fa fe 900,000,000 yɛ je lɛŋ fɛɛ, ni ekɛɔ akɛ eyɛ yaahe ko kɛha amɛ yɛ ŋwɛi. Israel sɛɛsɛɛyalɔ lɛ fee nɛkɛ apasa maŋtsɛyeli nɛɛ he mfoniri yɛ jeeŋmɔ be ko ni eho, mɛi ni Yehowa wie yɛ amɛhe akɛ: “Mitɛo bo akɛ weintso kpakpa ni jɛ nɔ ni hi kwraa mli. Te fee tɛŋŋ ni otsake otsɔ kooŋ weintso ni ehiii oha mi nɛɛ?”—Yeremia 2:21-23; kwɛmɔ Hoshea 10:1-4 hu.
9. (a) Namɛi ji “loofɔji” lɛ kɛ “tso” lɛ niji lɛ? (b) Yɛ wiemɔi ni yɔɔ 2 Tesalonikabii 1 kɛ Mateo 7 lɛ anaa lɛ, mɛni hewɔ esa akɛ wɔtsi wɔhe kɛjɛ nakai “tso” lɛ he kɛya sɛɛ fɛlɛŋŋ amrɔ nɛɛ?
9 Yɛ bɔ ni Mateo wie “tso” nɛɛ he eha lɛ naa lɛ, “ŋwɛi loofɔji lɛ baa bafeɔ tsũi yɛ eniji lɛ ateŋ.” Eka shi faŋŋ akɛ, amɛ nɔŋŋ ji “loofɔji” ni yɔɔ abɛbua ni tsɔ hiɛ lɛ mli, ni bakɔlɔ “maŋtsɛyeli lɛ he wiemɔ” ni yashwie gbɛ toi lɛ. (Mateo 13:4, 19, 31, 32) Nakai “loofɔji” lɛ feɔ amɛtsũi yɛ “tso” lɛ niji ni ji mligbalamɔ kui ohai abɔ lɛ amli. Amɛdamɔ shi kɛha hemɔkɛyeli kwalɔ “esha [mlakwamɔ] gbɔmɔ” lɛ, Kristendom osɔfoi lɛ. Hei ni amɛsɔmɔ ni yɔɔ shweshweeshwe lɛ baaje amɛdɛŋ beni Nyɔŋmɔ baafo “tso” lɛ, kɛ apasa jamɔi krokomɛi hu fɛɛ lɛ. Tsi ohe kɛya sɛɛ fɛlɛŋŋ, bianɛ! Ejaakɛ nakai “tso” lɛ shigbeemɔ lɛ miiba!—Okɛto 2 Tesalonikabii 1:6-9; 2:3; Mateo 7:19-23 he.
10, 11. (a) Mɛɛ saji ahe wiemɔi amli Mateo kɛ Luka ŋmala “sinapi wu” lɛ he abɛbua lɛ yɛ, ni mɛni hewɔ eja gbɛ jogbaŋŋ nakai lɛ? (b) Mɛɛ ŋaawoo kɛ kɔkɔbɔɔ Maŋtsɛyeli abɛbua ni kɔɔ mãsha lɛ he lɛ kɛhaa wɔ?
10 Eja gbɛ jogbaŋŋ akɛ Luka wieɔ “sinapi wu” abɛbua lɛ he kɛtsaa heguɔgbee wiemɔi ni Yesu wie eshi egbii lɛ amli Nyɔŋmɔ jalɔi hemɔkɛyeli kwalɔi lɛ nɔ. Ni oookɛ nɔ ni miima oti koome lɛ nɔ mi lɛ, no sɛɛ lɛ Mateo kɛ Luka fɛɛ wie Yesu he akɛ ekɛ abɛbua ni kɔɔ “mãsha” lɛ he lɛ hu ha. (Mateo 13:32, 33; Luka 13:10-21) Kɛ akɛmiitsu nii yɛ mfoniri feemɔ mli yɛ Biblia lɛ mli lɛ, be fɛɛ be lɛ mãsha tsɔɔ nɔ ko ni ehiii, tamɔ beni Yesu bɔ ekaselɔi lɛ kɔkɔ ni ‘amɛkwɛ ni amɛhiɛ ahi amɛhe nɔ yɛ Farisifoi kɛ Sadukifoi amãsha lɛ hewɔ’ lɛ, kɛ beni bɔfo Paulo wo Kristofoi aŋaa ni amɛjie “efɔŋ loo nɔ sha feemɔ mãsha” lɛ kɛjɛ amɛteŋ lɛ.—Mateo 16:6, 11, 12; 1 Korintobii 5:6-8; Galatabii 5:7-9.
11 Yɛ abɛbua lɛ mli lɛ, awie akɛ nɔ ko yɛ “ŋwɛi maŋtsɛyeli lɛ” he ni tamɔ mãsha ni yoo ko kɛto mã tsesei etɛ mli. No hewɔ lɛ mã muu lɛ fɛɛ sha. Enɛ feɔ mɛi ni tsɛ amɛhe Kristofoi asafo lɛ ni akɛ Babilon apasa tsɔɔmɔ kɛ nifeemɔi fite lɛ fiofio, ni ha abaná Kristendom apasa maŋtsɛyeli gbɛjianɔtoo kpeteŋkpele lɛ he mfoniri. Esa akɛ enɛ afee kɔkɔbɔɔ nɔ kɛha wɔ. Beni amɛnaa nibii ni yɔɔ dɔlɛ ni hemɔkɛyeli kwamɔ lɛ kɛba Kristendom nɔ lɛ, esa akɛ Maŋtsɛyeli niyelɔi “asafoku bibioo” lɛ kɛ amɛhefatalɔi ni yɔɔ ŋmɛnɛ lɛ ahiɛ ahi amɛhe nɔ ni amɛkaŋmɛ gbɛ ni “mãsha,” ni ji apasa, kɛ lakamɔ tsɔɔmɔi lɛ miifite tsuiŋ hiɛsɔɔ ni amɛyɔɔ kɛha bɔ ni “maŋtsɛyeli lɛ he wiemɔ” lɛ yɔɔ krɔŋŋ ni eji anɔkwale hu lɛ.
NIDULƆ LƐ KƐ “EHENYƐLƆ” LƐ
12, 13. (a) Yɛ “ŋmaa” lɛ kɛ “jwɛi” lɛ he abɛbua lɛ mli lɛ, te Yesu ha ale emli nibii titrii lɛ eha tɛŋŋ? (b) Mɛni ji nikpamɔ lɛ, ni mɛɛ odaseyeli wɔnaa ni tsɔɔ akɛ enɛ miiya nɔ ŋmɛnɛ?
12 Yɛ abɛbua kroko hu mli lɛ, Yesu kɛ “ŋwɛi maŋtsɛyeli lɛ” to “nuu ko ni duɔ dumɔ nii kpakpai yɛ ebɔɔ mli” lɛ he. Kɛkɛ ni, “beni mɛi wɔ lɛ, ehenyɛlɔ ko ba ebadu jwɛi efutu ŋmaa lɛ, ni eyiŋ etee.” Mɛɛ yibii nɛkɛ abaanyɛ akpa gbɛ kɛjɛ nakai abɔɔ lɛ mli? Yesu tee nɔ eha ale nidulɔ nɛɛ akɛ lɛ diɛŋtsɛ, “gbɔmɔ Bi lɛ,” mɔ ni du Maŋtsɛyeli dumɔ wui ni wo yibii ni ji Kristofoi ni tamɔ ŋmaa, ni ji “maŋtsɛyeli lɛŋ bii lɛ.” Henyɛlɔ lɛ ji “Abonsam,” ni “jwɛi” lɛ ji “mɔ fɔŋ lɛ bii lɛ”—ejamɔ mli “seshi” osatofoi lɛ. (Okɛto 1 Mose 3:15 he.) Yɛ emlibaa mli lɛ, anɔkwa Kristofoi komɛi tee nɔ amɛdara yɛ “jwɛi” ni ebua amɛhe naa amɛfee ekome ni kadi hemɔkɛyeli kwamɔ kpeteŋkpele lɛ kɛjɛ klɛŋklɛŋ afii lɛ mli aahu kɛbaa fɛɛ lɛ ateŋ. Shi amrɔ nɛɛ, wɔbashɛ nikpamɔ be lɛ mli, yɛ wɔ afii ohai 20 nɛɛ mli—“je nɛŋ naagbee lɛ; ni nikpalɔi lɛ ji ŋwɛibɔfoi”!—Mateo 13:24-30, 36-39.
13 Yɛ naagbee lɛ, abua “ŋmaa” lɛ naa kɛjɛ “jwɛi” lɛ ateŋ, yɛ ŋwɛibɔfoi agbɛtsɔɔmɔ shishi. Aha sɔrɔto feemɔ ni yɔɔ kui enyɔ lɛ ateŋ lɛ eje kpo faŋŋ. Taakɛ bɔ ni wɔbaana lɛ, odaseyelii babaoo yɛ ni tsɔɔ akɛ “gbɔmɔ Bi lɛ” eba eŋwɛi maŋtsɛyeli lɛ mli ŋmɛnɛ, ni eebua anɔkwa Kristofoi ni tamɔ ŋmaa lɛ anaa kɛha Maŋtsɛyeli nitsumɔ. Shi Kristendom kɛ etsɔɔlɔi ni tsɔɔ hemɔkɛyeli kwamɔ lɛ hu? Yesu abɛbua lɛ yaa nɔ ekɛɔ akɛ:
“Gbɔmɔ Bi lɛ aaatsu ebɔfoi lɛ, ni amɛaabua nanetɔtɔmɔ nii fɛɛ kɛ mɛi ni tsuɔ mlakwamɔ nii lɛ anaa kɛaajɛ emaŋtsɛyeli lɛ mli.”
Afii ohai abɔ nɛ ni Kristendom osɔfoi lɛ etɔtɔ gbɔmɛi anɔkwafoi lɛ anaji kɛ amɛ amale tsɔɔmɔi kɛ amɛ kponɔgbɛ jalɛ ni amɛkɛtsɔɔ mɛi lɛ. Shi amɛbaje Nyɔŋmɔ kojomɔ shishi, ni ‘amɛmiifó ni amɛmiikpe amɛnyanyɔji ashishi.’ Ŋmɛnɛ, amɛyeɔ awerɛho yɛ sɔlemɔyalɔi lɛ asɛɛfimɔ ni nɔ gbɔɔ kɛ mligbalamɔ ni eba amɛteŋ lɛ hewɔ. Nɔ ni tamɔɔɔ enɛ lɛ, Yehowa tsuji ni tamɔ ŋmaa lɛ miiye emaŋtsɛyeli lɛ he odase kɛ miishɛɛ. Amɛmiikpɛ “tamɔ hulu yɛ amɛ-Tsɛ maŋtsɛyeli lɛ mli.”—Mateo 13:40-43; okɛto Yesaia 65:13, 14 he.
‘WUOYAA’ NITSUMƆ KO NI MIIYE OMANYE
14, 15. (a) Mɛɛ gbɛ nɔ Yesu je ‘wuoyaa’ nitsumɔ kpele ko shishi yɛ, shi mɛɛ ‘wuoyaa’ sɔrɔtoi krokomɛi hu etee nɔ kɛjɛ nakai beaŋ kɛbaa, ni mɛɛ looi ‘asha’? (b) Belɛ mɛɛ gbɛfaŋnɔ ŋwɛibɔfoi yɔɔ yɛ mli mɔ, ni mɛɛ gbɛ nɔ amɛtsuɔ “looi” lɛ ahe nii yɛ? (d) No hewɔ lɛ, mɛɛ hegbɛ esa akɛ wɔda shi waa yɛ he?
14 Yesu wie akɛ: “Asaŋ, ŋwɛi maŋtsɛyeli lɛ tamɔ yaa ni afɔ̃ yɛ ŋshɔ mli ni eŋɔ looi sɔrɔtoi fɛɛ eko.” (Mateo 13:47) Yesu diɛŋtsɛ je nɛkɛ ‘wuoyaa’ nitsumɔ nɛɛ shishi, beni etsɛ eklɛŋklɛŋ ekaselɔi lɛ kɛjɛ amɛyaai lɛ ahe koni efee amɛ “gbɔmɛi ahe wolɛi” lɛ. (Mateo 4:19) Shi hemɔkɛyeli kwamɔ kpeteŋkpele be lɛ mli lɛ, kui bibii anɔkwafoi kɛ Kristendom jamɔi lɛ fɛɛ etee nɔ ‘amɛsha looi’ ni ji amɛmlibii aahu yɛ ŋwɛibɔfoi anɔkwɛmɔ shishi. Shi, ani mfoniri feemɔŋ ŋshɔ mli bɔɔ nii sɔrɔtoi akpekpei ohai abɔ lɛ fɛɛ ji nɔ ni ebafee ‘looi kpakpai’? Taakɛ bɔ ni wɔna momo lɛ, Kristendom jamɔi lɛ eha amɛtsɔɔmɔi lɛ edamɔ Plato Hela jeŋ nilee, kɛ blema Babilon “teemɔŋ saji” anɔ. Anaa yibii ni amɛwo lɛ yɛ nyɛɛ, tai kɛ lashishwiemɔ ni ekpa Kristendom yinɔsane baafai lɛ fɛɛ amli lɛ, kɛ bɔ ni amɛfi jeŋ tai enyɔ ni awuu yɛ wɔ afii ohai 20 nɛɛ mli lɛ asɛɛ lɛ mli.
15 Yɛ naagbee lɛ, be ebashɛ kɛha ŋwɛibɔfoi lɛ akɛ amɛgbala “yaa” lɛ, “yɛ je nɛŋ naagbee lɛ.” Enɛ feɔ mɛi ni tsɛɔ amɛhe akɛ Yesu Kristo sɛɛnyiɛlɔi lɛ agbɛjianɔtoi ni yɔɔ shikpɔŋ lɛ nɔ lɛ—anɔkwale nɔ kɛ amale nɔ lɛ fɛɛ. Abaashɛrɛ “looi” ni anaa amɛ akɛ “nii ni ehiii” kɛha “ŋwɛi maŋtsɛyeli lɛ” ashwie kwraa, ni akɛ amɛ baawo hiɛkpatamɔ “la flɔnɔɔ” lɛ mli. “Jɛi yaafo kɛ nyanyɔji ashishikpemɔ aaahi.” (Mateo 13:48-50) Shi ŋwɛibɔfoi lɛ miihala ‘looi kpakpai’ lɛ hu kɛmiijɛ mfoniri feemɔŋ yaa lɛ mli. Kwɛ bɔ ni esa akɛ wɔda shi babaoo wɔha yɛ hegbɛ ni wɔna akɛ aaakane wɔ afata nomɛi ahe lɛ he—gbɔmɛi ni esoro amɛ kwraa, ni amɛjɔɔ amɛhe nɔ akɛ amɛbaawó Yehowa gbɛi lɛ nɔ, ni amɛsɔleɔ kɛ shishinumɔ kɛhaa e-Maŋtsɛyeli lɛ ni ‘eba’!
16. Mɛɛ sanebimɔi nɛkɛ naagbee abɛbua nɛɛ teeɔ amɛ shi, ni mɛni hewɔ esa akɛ wɔsumɔ akɛ wɔɔle amɛ hetooi lɛ?
16 Shi, mɛni ji “je nɛŋ naagbee lɛ,” ni Yesu wieɔ he waa yɛ naagbee abɛbua nɛɛ mli lɛ? Mɛni ji “naagbee gbii” lɛ, ni Yesu kaselɔi lɛ ateŋ mɛi babaoo ŋmala he saji lɛ? Ani nakai gbii lɛ amli wɔyɔɔ amrɔ nɛɛ? Kɛ nakai lɛ, mɛni enɛ tsɔɔ kɛhaa wɔ, kɛ agbɛnɛ, adesai fɛɛ hu?
[Akrabatsa ni yɔɔ baafa 104]
BO YESU ABƐBUAI NI KƆƆ MAŊTSƐYELI LƐ HE LƐ TOI!
● Enɛɛmɛi wieɔ Maŋtsɛyeli lɛ he akɛ nɔ ni asumɔɔ, tamɔ “jwetri” loo “adiagba” ko. Akɛ mɛi ni taoɔ lɛ toɔ “shikpɔŋ kpakpa,” “ŋmaa,” kɛ “looi kpakpai” ahe.
● Afeɔ apasa maŋtsɛyeli lɛ he mfoniri akɛ sinapi “tso” ni yɔɔ niji babaoo, kɛ mãsha. Esɛɛfilɔi lɛ ji “loofɔji,” “jwɛi” kɛ ‘looi gbohii.’
● Kɛji aakwɛ Maŋtsɛyeli lɛ shweremɔ kɛmiijɛ shihilɛi sɔrɔtoi amli lɛ, ehaa wɔnyɛɔ wɔnuɔ sane kpele ni ka adesai fɛɛ ahiɛ ŋmɛnɛ lɛ shishi jogbaŋŋ, ni ewoɔ wɔ hewalɛ koni wɔkɔ shidaamɔ ni yɔɔ shiŋŋ yɛ Maŋtsɛyeli lɛ masɛi.