Yitso 13
Nii ni Wɔɔkase Kɛaajɛ Yesu Kaai lɛ Amli
BENI abaptisi Yesu lɛ sɛɛ nɔŋŋ lɛ, Nyɔŋmɔ mumɔ lɛ nyiɛ ehiɛ kɛtee Yudea ŋa lɛ nɔ. Eyɛ nibii babaoo ni ebaasusu he, ejaakɛ ebaptisimɔ be lɛ mli lɛ, “agbele ŋwɛi naa aha lɛ,” koni enyɛ eyoo ŋwɛi nibii. Lɛlɛŋ, eyɛ nibii babaoo ni ebaasusu he!
Yesu ye shwane shwane kɛ nyɔɔŋ nyɔɔŋ gbii 40 yɛ ŋa lɛ nɔ ni eyeee nɔ ko nɔ ko yɛ nɛkɛ be nɛɛ mli. Kɛkɛ ni, beni hɔmɔ yeɔ Yesu waa lɛ, Abonsam ba jɛmɛ koni ebaka lɛ, ni ekɛɛ: “Kɛji Nyɔŋmɔ bi jio lɛ, kɛɛmɔ koni tɛi nɛɛ atsɔmɔ aboloo.” Shi Yesu le akɛ ejaaa akɛ ekɛ naakpɛɛ hewalɛ ni eyɔɔ lɛ aaatsu lɛ diɛŋtsɛ ehiamɔ nii ahe nii. No hewɔ lɛ ekpɛlɛɛɛ akɛ eeeha aka lɛ.
Shi Abonsam nijiaŋ ejeee wui. Eka gbɛ kroko hu ekwɛ. Etswa Yesu mpoa akɛ etu kɛjɛ sɔlemɔtsu lɛ gbogboi lɛ anɔ eyi shi koni Nyɔŋmɔ bɔfoi lɛ abasɔo lɛ. Shi Yesu ekaaa akɛ eeefee nɛkɛ naakpɛɛ nii nɛɛ etsɔɔ. Beni etsɛɔ wiemɔi asɛɛ kɛjɛɔ Ŋmalɛi lɛ amli lɛ, Yesu tsɔɔ mli akɛ ejaaa gbɛ akɛ aaaka Nyɔŋmɔ yɛ nɛkɛ gbɛ nɔ.
Yɛ kaa ni ji etɛ lɛ mli lɛ, Abonsam kɛ je lɛŋ maŋtsɛyelii lɛ fɛɛ tsɔɔ Yesu yɛ naakpɛɛ gbɛ nɔ ni ekɛɛ lɛ akɛ: “Maŋɔ enɛɛmɛi fɛɛ mahao, kɛji okula shi oja mi lɛ.” Shi Yesu kpoo ekoŋŋ akɛ eŋmɛŋ ehe ehaŋ kaa ni baaha efee efɔŋ, ni ehala akɛ ebaaye anɔkwa eha Nyɔŋmɔ.
Wɔbaanyɛ wɔkase nii kɛjɛ kaai ni akɛba Yesu nɔ nɛɛ amli. Akɛ nɔkwɛmɔ nɔ lɛ, amɛtsɔɔ akɛ Abonsam jeee efɔŋfeemɔ he su ko kɛkɛ, taakɛ bɔ ni mɛi komɛi kɛɔ lɛ, shi moŋ eji mɔ ko ni yɔɔ diɛŋtsɛ, ni anaaa lɛ. Kaa ni ekɛba Yesu nɔ lɛ hu tsɔɔ akɛ je lɛŋ nɔyelii lɛ fɛɛ ji Abonsam nii. Ejaakɛ eji jeee enii ni kulɛ, te aaafee tɛŋŋ ni ha ni Abonsam kɛhaa Kristo lɛ aaafee kaa diɛŋtsɛ lɛ?
Ni susumɔ enɛ he okwɛ: Abonsam kɛɛ ebaasumɔ ni ewo Yesu nyɔmɔ yɛ jamɔ nifeemɔ kome ni eeefee lɛ hewɔ, ni ekɛ je lɛŋ maŋtsɛyelii lɛ fɛɛ baaha lɛ po. Abonsam baanyɛ abɔ mɔdɛŋ akɛ eeeka wɔ yɛ gbɛ ni tamɔ nakai nɔŋŋ nɔ, ekolɛ ekɛ hegbɛi ni baalaka wɔ ni wɔtao jeŋ ninamɔ, hewalɛ, aloo gbɛhei baamamɔ wɔhiɛ. Shi kwɛ bɔ ni wɔɔfee nilelɔi wɔha akɛ wɔɔnyiɛ Yesu nɔkwɛmɔ nɔ lɛ sɛɛ kɛtsɔ anɔkwa ni wɔɔye Nyɔŋmɔ lɛ nɔ ni kaa ni aaaba wɔgbɛ nɔ lɛ kɔɔɔ he eko! Mateo 3:16; 4:1-11; Marko 1:12, 13; Luka 4:1-13.
▪ Mɛni ji nibii ni eka shi faŋŋ akɛ Yesu susu he beni eye gbii 40 yɛ ŋa lɛ nɔ lɛ?
▪ Mɛɛ gbɛ nɔ Abonsam ka akɛ eeeka Yesu yɛ?
▪ Mɛni wɔbaanyɛ wɔkase kɛjɛ kaai ni akɛba Yesu nɔ lɛ amli?