Sanebimɔi ni Jɛ Kanelɔi Adɛŋ

Yesu henyɛlɔi lɛ wie amɛshi lɛ kɛ ekaselɔi yɛ nibii pii ahewɔ, ni dɛ̃ fɔmɔ sane nɛɛ hu fata he. Mose Mla lɛ tsɔɔ nibii komɛi ni buleɔ mɔ, kɛ nɔ ni esa akɛ mɔ ko afee koni ehe atse ekoŋŋ. Akɛ nɔkwɛmɔnɔ lɛ, ewie akɛ kɛ́ mɔ ko he miiho nu loo lá, eeye kpiti, loo eyata kooloo ko loo gbɔmɔ ko gbonyo he lɛ, ehe tseee. Mla lɛ tsɔɔ akɛ, mɔ lɛ baanyɛ atsɔ afɔleshãa, loo hejuu nɔ ehã ehe atse ekoŋŋ. Yɛ shihilɛi komɛi amli lɛ, akɛ nui komɛi shwãa mɔ lɛ he dani ehe tseɔ.​—3 Mose yitso 11-15; 4 Mose yitso 19.

Yudafoi amlatsɔɔlɔi lɛ, ni atsɛɔ amɛ akɛ rabifoi lɛ, wo mlai babaoo yɛ nɔ ni Nyɔŋmɔ kɛhã nɛɛ sɛɛ. Wolo ko wie akɛ, amɛkɔlɔ nibii ni Mla lɛ etsɔɔ akɛ ebuleɔ mɔ lɛ fɛɛ ekomekomei, ni amɛbɔ mɔdɛŋ akɛ amɛbaatsɔɔ gbɛ pɔtɛ̃ɛ ni etsɔɔ nɔ ebuleɔ mɔ, shihilɛi pɔtɛi amli ni enyɛɔ ebuleɔ mɔ yɛ, nibii srɔtoi ni kɛ́ mɔ ni he tseee lɛ fee lɛ ebaabule mɛi krokomɛi, nibii pɔtɛi ni kɛ́ mɔ ni he tseee lɛ yata he lɛ ebule amɛ, kɛ nibii krokomɛi ni esa akɛ efee yɛ nɔ ni Mla lɛ etsɔɔ lɛ sɛɛ dani ehe atse.

Yesu henyɛlɔi lɛ bi lɛ akɛ: “Mɛni hewɔ okaselɔi lɛ yeee blematsɛmɛi lɛ akusum lɛ nɔ, shi amɛyeɔ nii kɛ niji ni abule lɛ?” (Mar. 7:5) Kɛ́ mɔ ko yaaye nii ni efɔɔɔ edɛ̃ loo eniji ahe lɛ hela baamɔ lɛ. Shi jeee no hewɔ Farisifoi lɛ folɔ Yesu kaselɔi lɛ anaa lɛ. No mli lɛ, rabifoi lɛ ewo mla akɛ, kɛ́ mɔ ko yaaye nii lɛ, esa akɛ atsɔ nu ashwie eniji ahe. Wolo ni atsɛ yisɛɛ yɛ kuku ni tsɔ hiɛ lɛ mli lɛ wie akɛ: “Amɛtsɔɔ nibii pɔtɛi ni abaanyɛ akɛtsɔ nu lɛ, nu pɔtɛɛ ni esa akɛ akɛtsu nii, mɔ ni esa akɛ etsɔ nu lɛ, kɛ he ni esa akɛ afɔ niji lɛ ahe kɛyashi.”

Mɛni Yesu wie yɛ mlai babaoo nɛɛ ni amɛwo lɛ ahe? Ekɛɛ Yudafoi ajamɔŋ hiɛnyiɛlɔi lɛ akɛ: “Eja pɛ akɛ Yesaia gba yɛ nyɛ osatofoi nɛɛ ahe, taakɛ aŋma lɛ, akɛ, ‘Mɛi nɛɛ kɛ amɛnaabu woɔ mi [Yehowa], shi amɛtsuii etsi amɛhe kɛje mihe kɛtee shɔŋŋ. Yakatswaa amɛyaa nɔ amɛjáa mi lɛ, ejaakɛ amɛtsɔɔ tsɔɔmɔi ni ji gbɔmɛi akitãi.’ Nyɛshiɔ Nyɔŋmɔ kitã lɛ, ni nyɛhiɛɔ gbɔmɛi akusum mli kpɛŋŋ.”​—Mar. 7:6-8.