Yitso 56

Mɛni Buleɔ Gbɔmɔ?

AGBƐNƐ shi ni ateɔ awoɔ Yesu lɛ mli bawa. Jeee akɛ ekaselɔi lɛ ateŋ mɛi pii shi lɛ kɛkɛ, shi moŋ Yudafoi ni yɔɔ Yudea lɛ miitao amɛgbe lɛ, taakɛ bɔ ni amɛfee yɛ be mli ni eyɔɔ Yerusalem yɛ afi 31 Ŋ.B. Hehoo be lɛ mli lɛ.

Agbɛnɛ eshɛ afi 32 Ŋ.B. Hehoo be lɛ mli. Etamɔ nɔ ni Yesu tee Hehoo lɛ yeli yɛ Yerusalem, yɛ Nyɔŋmɔ mla ni biɔ ni eya jɛmɛ lɛ nɔyeli mli. Shi kɛlɛ, ekwɛ ehe nɔ jogbaŋŋ ejaakɛ ewala yɛ oshara mli. Yɛ sɛɛ mli lɛ, eku esɛɛ kɛtee Galilea.

Ekolɛ Yesu yɛ Kapernaum beni Farisifoi lɛ kɛ woloŋmalɔi lɛ jɛ Yerusalem amɛba eŋɔɔ lɛ. Amɛmiitao nɔ ni amɛaadamɔ nɔ amɛfolɔ enaa akɛ eeku jamɔ he mlai lɛ amli. No hewɔ lɛ, amɛbi lɛ akɛ: “Mɛɛ hewɔ ni okaselɔi lɛ tɔɔ onukpai lɛ ablema saji lɛ anɔ lɛ? Ejaakɛ amɛfɔɔɔ amɛdɛ dani amɛyeɔ nii.” Enɛ jeee nɔ ko ni Nyɔŋmɔ miibi ni afee, shi kɛlɛ Farisifoi lɛ buɔ nɛkɛ blema kusum nɛɛ ni mɔ ko efeee lɛ akɛ tɔmɔ ni mli wa, kɛ niji ahe fɔmɔ kɛbashi nikutso he lɛ hu.

Ni Yesu aaaha amɛnaafolɔmɔ nɛɛ hetoo lɛ, ewie amɛyiwalɛ kɛ bɔ ni amɛjeɔ gbɛ amɛkuɔ Nyɔŋmɔ Mla mli lɛ he. Ebi amɛ akɛ: “Mɛɛ hewɔ ni nyɛ hu nyɛkɛ nyɛ blema saji lɛ tɔɔ Nyɔŋmɔ kita lɛ nɔ lɛ? Ejaakɛ Nyɔŋmɔ wo kita akɛ: ‘Wo otsɛ kɛ onyɛ!’ ni ‘mɔ ni lomɔɔ etsɛ loo enyɛ lɛ, gbe aaagbe lɛ!’ Shi nyɛ lɛ nyɛkɛɔ akɛ: ‘Mɔ fɛɛ mɔ ni aaakɛɛ etsɛ loo enyɛ akɛ: “Nɔ ni kulɛ ooona yɛ midɛŋ lɛ, mikɛke Nyɔŋmɔ” lɛ, ekawo etsɛ loo enyɛ dɔŋŋ.’ ”

Yɛ anɔkwale mli lɛ, Farisifoi lɛ tsɔɔ akɛ shika, heloonaa nii, aloo nɔ fɛɛ nɔ ni ajɔɔ nɔ akɛ nikeenii aha Nyɔŋmɔ lɛ ji sɔlemɔ we lɛ nɔ ni anyɛŋ akɛtsu nɔ kroko. Shi kɛlɛ, yɛ faŋŋ mli lɛ, mɔ ni jɔɔ nikeenii ni akɛkeɔ lɛ nɔ lɛ ji mɔ ni kɛtoɔ. Yɛ nɛkɛ gbɛ nɔ lɛ, kɛ binuu ko bakɛɛ akɛ eshika loo heloonaa nɔ ko ji “korban”—ni ji nikeenii ko ni ajɔɔ nɔ aha Nyɔŋmɔ loo sɔlemɔ we lɛ—ejeɔ gbɛnaa nii ni ka enɔ akɛ ewa efɔlɔi ni amɛdara, ni ekolɛ amɛyɔɔ jaramɔ shihilɛ mli lɛ mli.

Yesu nyaŋe yiwalɛ gbɛ ni Farisifoi lɛ tsɔɔ nɔ amɛtsɔmɔɔ Nyɔŋmɔ mla lɛ, ni ekɛɛ: “Ni nyɛ blema saji lɛ ahewɔ lɛ nyɛgu Nyɔŋmɔ kita lɛ. Osatofoi! Gbɛnaa pɛ Yesaia gba yɛ nyɛhewɔ akɛ: ‘Maŋ nɛɛ kɛ amɛnaabu woɔ mi; shi amɛtsuii etsi ehe kɛjɛ mihe kɛtee shɔŋŋ. Shi yakatswaa amɛjaa mi lɛ, ejaakɛ amɛtsɔɔ tsɔɔmɔi ni ji gbɔmɛi akitai.’ ”

Ekolɛ gbɔmɛi asafo babaoo lɛ etee sɛɛ fioo koni amɛŋmɛ Farisifoi lɛ agbɛ ni amɛbabi Yesu nii. Agbɛnɛ, ni Farisifoi lɛ naaa hetoo amɛha naafolɔmɔi ni Yesu kɛshwie amɛnɔ lɛ hewɔ lɛ, etsɛ mɛi lɛ kɛbɛŋkɛ lɛ ekoŋŋ. Ni ekɛɛ amɛ akɛ: “Nyɛboa toi ni nyɛna shishi! Jeee nɔ ni boteɔ mɔ daaŋ lɛ buleɔ gbɔmɔ; shi moŋ nɔ ni jeɔ mɔ daaŋ lɛ, no buleɔ gbɔmɔ.”

Yɛ sɛɛ mli beni amɛbote shia ko mli lɛ, ekaselɔi lɛ bi lɛ akɛ: “Ole akɛ, beni Farisifoi lɛ nu nɛkɛ wiemɔi nɛɛ, efee amɛ taŋ?”

Yesu ha amɛ hetoo akɛ: “Tso fɛɛ tso ni jeee miŋwɛi Tsɛ lɛ tɛo lɛ, fa aaafa. Nyɛkadia amɛsɛɛ! Shwilafoi ni tsɔɔ shwilafoi agbɛ ji amɛ; ni kɛ shwilafo miitsɔɔ shwilafo gbɛ lɛ, amɛ yi enyɔ lɛ fɛɛ amɛaagbee bu mli.”

Etamɔ nɔ ni Yesu naa kpɛ ehe, beni Petro damɔ kaselɔi lɛ anajiaŋ ni ebi ni etsɔɔ amɛ nɔ ni buleɔ mɔ lɛ mli jogbaŋŋ lɛ. Yesu ha hetoo akɛ: “Ani nyɛ hu nyɛleko nii lolo? Ani nyɛkpako shi akɛ, nɔ fɛɛ nɔ ni boteɔ mɔ daaŋ lɛ, musuŋ eyaa ni ajieɔ awoɔ tiafi mli? Shi nii ni jɛɔ daaŋ jeɔ kpo lɛ, tsui mli ejɛɔ, ni nomɛi buleɔ mɔ lɛ. Ejaakɛ tsui mli susumɔi fɔji, gbɔmɔgbee, gbalafitemɔ, ajwamaŋbɔi, juui, amale odaseyeli kɛ musubɔi jɛɔ. Enɛɛmɛi ji nii ni buleɔ gbɔmɔ; shi dɛ ni afɔɔɔ dani ayeɔ nii lɛ, no buleee mɔ.”

Jeee akɛ Yesu miiwie eeshi falefale-feemɔ yɛ biɛ. Jeee akɛ eetsɔɔ akɛ ehe ehiaaa ni mɔ ko afɔ edɛ dani ehoo nii loo eye nii. Shi moŋ, Yesu miiwie eeshi jamɔ mli hiɛnyiɛlɔi ni bɔɔ mɔdɛŋ ni amɛfee nibii ni amɛkɛku Nyɔŋmɔ Mla lɛ mli kɛtsɔ kusumii ni damɔɔɔ Ŋmalɛ nɔ ni amɛkɛfiɔ mɛi anɔ lɛ osatofeemɔ lɛ. Hɛɛ, yiwalɛ nibii ji nɔ ni buleɔ mɔ, ni Yesu miitsɔɔ akɛ enɛɛmɛi jɛɔ mɔ lɛ tsui mli. Yohane 7:1; 5 Mose 16:16; Mateo 15:1-20; Marko 7:1-23; 2 Mose 20:12; 21:17; Yesaia 29:13.

▪ Mɛɛ shitee-kɛ-woo Yesu kɛkpe agbɛnɛ?

▪ Mɛɛ naafolɔmɔ Farisifoi lɛ kɛfɔ Yesu nɔ, shi taakɛ Yesu wie lɛ, mɛɛ gbɛ nɔ Farisifoi lɛ jeɔ gbɛ amɛkuɔ Nyɔŋmɔ Mla lɛ mli yɛ?

▪ Mɛɛ nibii Yesu jie amɛ kpo akɛ nibii ni buleɔ mɔ lɛ?