Yitso 57

Musuŋtsɔlɛ Kɛha Mɛi ni Piŋɔ Lɛ

BENI Yesu ekpoo Farisifoi lɛ yɛ amɛkusumii ni amɛkɛsɔmɔɔ amɛ diɛŋtsɛ amɛhe lɛ sɛɛ lɛ, ekɛ ekaselɔi lɛ shi. Ekolɛ obaakai akɛ be fioo ni tsɔ hiɛ lɛ, mɔdɛŋ ni ebɔ ni ekɛ amɛ ashi jɛmɛ kɛya ni eyajɔɔ ehe lɛ yeee omanye yɛ be mli ni gbɔmɛi asafoi babaoo lɛ na lɛ lɛ. Agbɛnɛ ekɛ ekaselɔi lɛ shi kɛtee Tiro kɛ Sidon kpokpai lɛ anɔ, shitoi babaoo kɛtee kooyigbɛ. Etamɔ nɔ ni enɛ pɛ ji gbɛ ni Yesu kɛ ekaselɔi lɛ fa ni tekeɔ Israel husui.

Beni amɛna shia ni amɛbaahi mli sɛɛ lɛ, Yesu ha amɛle yɛ faŋŋ mli akɛ esumɔɔɔ ni mɔ ko leɔ he ni amɛyɔɔ. Shi kɛlɛ, enyɛɛɛ etee ehe yɛ kpokpaa ni jeee Israelbii anɔ nɛɛ po nɔ. Hela yoo ko, ni afɔ lɛ yɛ biɛ yɛ Foenika yɛ Siria lɛ na lɛ ni ebɔi lɛ faikpamɔ akɛ: “Naa mi mɔbɔ, Nuŋtsɔ, David Bi; mibiyoo miina nɔ kɛ daimonio.” Shi kɛlɛ, Yesu ewieee wiemɔ kome folo po kɛhaaa lɛ hetoo.

Yɛ naagbee lɛ, Yesu kaselɔi lɛ kɛɛ lɛ akɛ: “Wo lɛ gbɛ ni eya, shi eebolɔ kɛmiinyiɛ wɔsɛɛ!” Beni Yesu tsɔɔ eyiŋtoo ni ekɛkpoo lɛ lɛ mli lɛ, ekɛɛ: “Israel we tooi ni elaaje lɛ aŋɔɔ kɛkɛ atsu mi.”

Shi kɛlɛ, yoo lɛ nijiaŋ ejeee wui. Ebɛŋkɛ Yesu ni eho ekulashi yɛ ehiɛ. Ekpa lɛ fai akɛ: “Nuŋtsɔ, feemɔ he nɔ ko oha mi!”

Kwɛ bɔ ni yoo lɛ nibimɔ lɛ baatsirɛ Yesu tsui eha! Ni kɛlɛ, esaa eti eklɛŋklɛŋ gbɛnaa nii lɛ mli ekoŋŋ, akɛ esɔmɔ Nyɔŋmɔ webii ni ji Israelbii lɛ. Yɛ nakai beaŋ nɔŋŋ lɛ, ewie tamɔ Yudafoi ni hiɛ jwɛŋmɔ gbonyo yɛ mɛi fɛɛ ni jɛ maji krokomɛi anɔ lɛ ahe lɛ, ekolɛ koni ekɛka ehemɔkɛyeli ekwɛ, ni ekɛɛ: “Ejaaa akɛ aŋɔɔ bii lɛ aboloo lɛ ashɛrɛɔ ashwieɔ shifɔji abii.”

Yesu tsɔ egbee kɛ ehiɛ ni tsɔɔ mɔbɔnalɛ lɛ nɔ ejie bɔ ni eyɔɔ henumɔ yɛ mɛi ni jeee Yudafoi ahe lɛ kpo etsɔɔ. Eha bɔ ni ekɛ Jeŋmajiaŋbii lɛ toɔ gbeei ahe lɛ ba shi kɛtsɔ “shifɔji abii” aloo gbeei abii ni etsɛ amɛ lɛ nɔ. Yɛ nɔ najiaŋ ni yoo lɛ mli aaafu lɛ, enu Yudafoi ajwɛŋmɔ ni ejaaa ni Yesu wie he lɛ shishi ni ekpa lɛ fai akɛ: “Nuŋtsɔ, eyɛ mli moŋ, shi bɛ shifɔji abii lɛ hu yeɔ fufuji ni shwieɔ amɛnuŋtsɔmɛi akpɔlɔi lɛ ashishi lɛ eko.”

Yesu ha lɛ hetoo akɛ: “Oh, yoo, ohemɔkɛyeli da! Afee ahao tamɔ bɔ ni otaoɔ lɛ.” Ni afee nakai pɛpɛɛpɛ! Beni eku esɛɛ etee eshia lɛ, ena ebiyoo lɛ ka saatso lɛ nɔ, ni atsa lɛ kwraa.

Agbɛnɛ Yesu kɛ ekaselɔi lɛ shi Sidon ŋshɔnaa kpokpaa lɛ nɔ, ni amɛfo mli kɛtsɔ maŋ lɛ mli, kɛtee Yordan Faa lɛ ŋwɛi gbɛ. Eka shi faŋŋ akɛ amɛfo Yordan Faa lɛ yɛ Galilea Ŋshɔ lɛ yiteŋ gbɛ he ko ni amɛbote Dekapolis kpokpaa lɛ nɔ yɛ ŋshɔ lɛ bokagbɛ. Amɛyakwɔ gɔŋ ko yɛ jɛmɛ, shi gbɔmɛi asafo babaoo lɛ na amɛ ni amɛkɛ amɛ obubuafoi, akpakei, shwilafoi, kɛ mumui, kɛ mɛi krokomɛi babaoo ni yeɔ helai sɔrɔtoi loo amɛje kpa lɛ ba Yesu ŋɔɔ. Amɛkɛ amɛ bashwie Yesu naji anaa, ni etsa amɛ. Gbɔmɛi lɛ anaa kpɛ amɛhe, yɛ be mli ni amɛna mumuii lɛ miiwie, ni obubuafoi lɛ miinyiɛ, ni shwilafoi lɛ miina nii lɛ; ni amɛjie Israel Nyɔŋmɔ lɛ yi.

Agbɛnɛ Yesu kɛ ejwɛŋmɔ ma nuu toimulɔ ko ni nyɛɛɛ awie kwraa hu nɔ. Yɛ bei babaoo mli lɛ, kɛ toimulɔi yɛ mɛi ateŋ lɛ, amɛhiɛ gboiɔ. Ekolɛ Yesu na akɛ nɛkɛ nuu pɔtɛɛ nɛɛ ehao. No hewɔ lɛ Yesu kɛ musuŋtsɔlɛ tsɛ lɛ kɛjɛ mɛi lɛ ateŋ ni ekɛ lɛ tee sɛɛ. Beni amɛtsi amɛhe banee lɛ, Yesu tsɔɔ lɛ nɔ ni ebaafee eha lɛ lɛ. Ekɛ ewaobii wo nuu lɛ toii amli, ni etsɛ lajɔ ekɛsa elilɛi he. Kɛkɛ ni Yesu kwɛ ŋwɛi gbɛ, ni emu waa ni ekɛɛ: “Gbelemɔ.” Amrɔ nɔŋŋ kɛkɛ ni asaa nuu lɛ ninumɔ hewalɛi lɛ ekoŋŋ, ni enyɛ ewie tamɔ mɛi fɛɛ wieɔ lɛ pɛpɛɛpɛ.

Beni Yesu tsa mɛi babaoo nɛɛ sɛɛ lɛ, gbɔmɛi asafo babaoo lɛ jie hiɛsɔɔ kpo. Amɛkɛɛ: “Efee nii fɛɛ jogbaŋŋ! Ehaa toimulɔi nuɔ nii, ni mumuii hu wieɔ.” Mateo 15:21-31; Marko 7:24-37.

▪ Mɛni hewɔ ni Yesu tsaaa Hela yoo lɛ biyoo lɛ amrɔ nɔŋŋ lɛ?

▪ Yɛ sɛɛ mli lɛ, nɛgbɛ Yesu kɛ ekaselɔi lɛ tee?

▪ Mɛɛ gbɛ nɔ Yesu tsɔ etsa toimulɔ ni nyɛɛɛ awie hu lɛ yɛ musuŋtsɔlɛ naa?