Ahere Amɛyiwala Kɛjɛ “Yinɔ Fɔŋ” ko Mli
“Oo yinɔbii ni heee yeee ni bɛ amɛŋɛlɛ nɔ! Mɛɛ beyinɔ mikɛ nyɛ aaahi shi, ni mahiɛ nyɛ kɛyashi?”—LUKA 9:41.
1. (a) Mɛni he okadi wɔ haomɔ be nɛɛ feɔ? (b) Mɛni Ŋmalɛi lɛ kɛɔ yɛ mɛi ni baana yibaamɔ lɛ ahe?
WƆYƐ amanehulu bei amli. Shikpɔŋ hosomɔi, nu afuai, hɔmɔ, helai, mlakwamɔ, okpɛlɛmii atswiamɔ, tai ni yɔɔ gbeyei—enɛɛmɛi kɛ ekrokomɛi babaoo ebaha adesai anɔ kwraa yɛ wɔ afii ohai 20 nɛɛ mli. Shi kɛlɛ, amanehulu kpeteŋkpele fe fɛɛ yɛ wɔsɛɛ be ni kã wɔhiɛ nɔŋŋ nɛɛ mli. Mɛni ji no? Eji “amanehulu babaoo . . . ni anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mateo 24:21) Ni kɛlɛ, wɔteŋ mɛi pii baanyɛ akpa wɔsɛɛ be ni yɔɔ miishɛɛ gbɛ! Mɛni hewɔ? Ejaakɛ Nyɔŋmɔ diɛŋtsɛ Wiemɔ lɛ kɛɔ akɛ “asafo babaoo ni mɔ ko mɔ ko nyɛŋ akane, . . . jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli . . . ‘Mɛnɛɛmɛi ji mɛi ni jɛ amanehulu kpeteŋkpele lɛ mli lɛ . . . Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ . . . Ni Nyɔŋmɔ aaatsumɔ amɛhiɛaŋ yaafonui fɛɛ.’ ”—Kpojiemɔ 7:1, 9, 14-17.
2. Mɛɛ klɛŋklɛŋ gbalɛ mlibaa Mateo 24, Marko 13, kɛ Luka 21 lɛ shishijee kukuji lɛ ná?
2 Nɔ ni ajɛ mumɔŋ aŋma yɛ Mateo 24:3-22, Marko 13:3-20, kɛ Luka 21:7-24 lɛ kpaa bɔ ni Yesu wie ‘nibii agbɛjianɔtoo lɛ naagbee lɛ’ he eha lɛ hiɛ.a Gbalɛ nɛɛ ná eklɛŋklɛŋ mlibaa yɛ Yudafoi anibii agbɛjianɔtoo fɔŋ ni hi shi yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli lɛ nɔ, ni etee nɔ aahu kɛyagbe naa akɛ “amanehulu babaoo” ni anako eko dã, yɛ Yudafoi lɛ anɔ. Akpata Yudafoi ajamɔ kɛ maŋkwramɔŋ gbɛjianɔtoo muu lɛ fɛɛ, ni shikwɛ̃ɛ he yɔɔ Yerusalem sɔlemɔtsu lɛ mli lɛ hiɛ kwraa, ni atooo amaaa shi dɔŋŋ.
3. Mɛni hewɔ ehe hiaa waa akɛ wɔbo Yesu gbalɛ lɛ toi ŋmɛnɛ lɛ?
3 Agbɛnɛ nyɛhaa wɔsusua shihilɛi ni kɔɔ Yesu gbalɛ lɛ klɛŋklɛŋ mlibaa lɛ he lɛ he wɔkwɛa. Enɛ baaye ebua wɔ ni wɔnu emlibaa ni kɛ no kpaa gbee ŋmɛnɛ lɛ shishi jogbaŋŋ. Ebaatsɔɔ wɔ bɔ ni ehe hiaa ni wɔtsu he nii diɛŋtsɛ amrɔ nɛɛ bɔni afee ni wɔyi ana wala kɛfo amanehulu kpeteŋkpele fe fɛɛ ni kã adesai fɛɛ ahiɛ lɛ.—Romabii 10:9-13; 15:4; 1 Korintobii 10:11; 15:58.
“Naagbee Lɛ”—Mɛɛ Be?
4, 5. (a) Mɛni hewɔ Yudafoi ni sheɔ Nyɔŋmɔ gbeyei, ni hi shi yɛ Ŋ.B. klɛŋklɛŋ afii oha lɛ mli lɛ ná gbalɛ ni yɔɔ Daniel 9:24-27 lɛ he miishɛɛ lɛ? (b) Mɛɛ gbɛ nɔ gbalɛ nɛɛ ba mli yɛ?
4 Aaafee afi 539 D.Ŋ.B. lɛ, akɛ nibii ni baaba yɛ be sɛɛjekɛmɔ ni feɔ “otsii nyɔŋmai kpawo” lɛ mli naagbee “otsi” lɛ mli lɛ he ninaa ha Nyɔŋmɔ gbalɔ Daniel. (Daniel 9:24-27) Nɛkɛ “otsii” nɛɛ je shishi yɛ afi 455 D.Ŋ.B. beni Persia Maŋtsɛ Artashasta kɛ famɔ ha akɛ ayasaa atswa Yerusalem maŋtiase lɛ ama shi ekoŋŋ lɛ. Naagbee “otsi” lɛ je shishi kɛ Mesia, ni ji Yesu Kristo puemɔ, beni abaptisi lɛ ni afɔ lɛ mu yɛ afi 29 Ŋ.B. lɛ.b Yudafoi ni sheɔ Nyɔŋmɔ gbeyei, ni hi shi yɛ Ŋ.B. klɛŋklɛŋ afii oha lɛ mli lɛ le be he okadi ni yɔɔ Daniel gbalɛ nɛɛ mli lɛ jogbaŋŋ. Akɛ nɔkwɛmɔ nɔ lɛ, Luka 3:15 wieɔ gbɔmɛi asafo babaoo ni ke yuu kɛba amɛbabo Yohane Baptisilɔ lɛ toi yɛ afi 29 Ŋ.B. lɛ ahe akɛ: “Maŋ lɛ hiɛ kã nɔ, ni mɛi lɛ fɛɛ susuɔ yɛ amɛtsuiiaŋ yɛ Yohane hewɔ akɛ: ‘Benɛ lɛ ji Kristo lɛ.’ ”
5 “Otsi” ni gbeɔ yi feɔ 70 lɛ baafee afii kpawo, ni ji duromɔ krɛdɛɛ ko ni akpã mli aha Yudafoi lɛ. Eje shishi yɛ afi 29 Ŋ.B., ni Yesu baptisimɔ kɛ esɔɔmɔ nitsumɔ lɛ, efɔleshaa gbele ni egbo yɛ “otsi lɛ teŋ” yɛ afi 33 Ŋ.B., kɛ ‘otsi fã’ kroko hu kɛyashi afi 36 Ŋ.B. lɛ fata he. Yɛ “otsi” nɛɛ mli lɛ, akpã hegbɛ ni yɔɔ akɛ aaatsɔmɔ Yesu kaselɔi ni afɔ amɛ mu lɛ mli aha Yudafoi ni sheɔ Nyɔŋmɔ gbeyei lɛ kɛ mɛi ni etsake kɛba Yuda jamɔ mli lɛ pɛ. Kɛkɛ ni yɛ afi 70 Ŋ.B., ni ji be ko ni aleee kɛtsɔɔɔ hiɛ lɛ, Roma asraafoi ni yɔɔ Tito shishi lɛ bakpata Yudafoi agbɛjianɔtoo ni ekwa hemɔkɛyeli lɛ hiɛ kwraa.—Daniel 9:26, 27.
6. Mɛɛ gbɛ nɔ “amaŋfɔ nihii nii lɛ” tsɔ ebɔi nitsumɔ yɛ afi 66 Ŋ.B., ni te Kristofoi lɛ fee amɛnii yɛ enɛ he amɛha tɛŋŋ?
6 Enɛ hewɔ lɛ abule Yudafoia osɔfoyeli ni ebule Yerusalem sɔlemɔwe lɛ, ní efata he ni akpaŋ Nyɔŋmɔ diɛŋtsɛ Bi lɛ yinɔ, ni agbe lɛ lɛ shishi kwraa. Akpata maŋ lɛ kɛ wekui ahe saji ni aŋmala ashwie shi lɛ hu fɛɛ hiɛ afata he. Kɛjɛ nakai be lɛ sɛɛ kɛbaa lɛ, Yudanyo ko nyɛɛɛ akɛɛ akɛ eyɛ osɔfoyeli loo maŋtsɛyeli hegbɛ ko yɛ mla naa dɔŋŋ. Shi, miishɛɛ sane ji akɛ, ájie mumɔŋ Yudafoi ni akɛ mumɔ efɔ amɛ mu lɛ kɛtee afã akɛ maŋtsɛmɛi ni yeɔ osɔfoi, koni ‘amɛjaje Yehowa Nyɔŋmɔ agbojee lɛ.’ (1 Petro 2:9) Beni Roma asraafoi lɛ bawo Yerusalem he ka klɛŋklɛŋ kwraa, ni amɛtsa gbogboi ni yɔɔ sɔlemɔwe lɛ masɛi lɛ ashishi yɛ afi 66 Ŋ.B. lɛ, Kristofoi yoo nakai asraafoi ahewalɛ lɛ akɛ “amaŋfɔ nihii nii lɛ ni gbalɔ Daniel wie he lɛ akɛ ema he krɔŋkrɔŋ lɛ.” Yɛ Yesu gbalɛ mli famɔ lɛ toiboo mli lɛ, Kristofoi ni yɔɔ Yerusalem kɛ Yudea lɛ jo foi kɛtee gɔji lɛ akpokpai anɔ kɛha hebuu.—Mateo 24:15, 16; Luka 21:20, 21.
7, 8. Mɛɛ “okadi” Kristofoi lɛ na, shi mɛni amɛleee?
7 Nakai Yudafoi Kristofoi anɔkwafoi lɛ na Daniel gbalɛ lɛ mlibaa, ni amɛ diɛŋtsɛ amɛna amanehulu ni ba, ni ji tai, hɔmɔ, tsɛŋemɔ helai, shikpɔŋ hosomɔi, kɛ mlakwamɔ ni Yesu gba efɔ shi akɛ ‘nibii agbɛjianɔtoo lɛ naagbee lɛ he okadi’ lɛ fã lɛ kɛ amɛhiŋmɛii. (Mateo 24:3) Shi ani Yesu tsɔɔ amɛ be pɔtɛɛ ni Yehowa baatsu kojomɔ he nii yɛ nakai gbɛjianɔtoo ni efite lɛ nɔ lɛ? Dabi. Nɔ ni egba efɔ shi yɛ be mli ni eba akɛ odehe lɛ naagbee kwraa he lɛ kɔ klɛŋklɛŋ afii oha lɛ mli “amanehulu babaoo” lɛ hu he nakai nɔŋŋ, akɛ: “Shi no gbi lɛ kɛ no ŋmɛlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, ni Bi lɛ tete leee, ja mi-Tsɛ kome kɛkɛ.”—Mateo 24:36.
8 Yudafoi lɛ baanyɛ ajɛ Daniel gbalɛ lɛ mli amɛbu be mli ni Yesu baapue akɛ Mesia lɛ he akɔntaa. (Daniel 9:25) Shi kɛlɛ, atsɔɔɔ amɛ be ko kɛha “amanehulu babaoo” ni naagbee lɛ efee Yudafoi hemɔkɛyeli kwalɔi anibii agbɛjianɔtoo lɛ amaŋfɔ lɛ. Yerusalem kɛ esɔlemɔtsu lɛ hiɛkpatamɔ lɛ sɛɛ pɛ dani amɛyoo akɛ be lɛ ji afi 70 Ŋ.B. Shi kɛlɛ, amɛle Yesu gbalɛ wiemɔi nɛɛ jogbaŋŋ momo, akɛ: “Nɛkɛ yinɔ nɛɛ hoŋ, ja nii nɛɛ fɛɛ eba mli dã.” (Mateo 24:34) Eyɛ faŋŋ akɛ, bɔ ni akɛ wiemɔ “yinɔ” tsu nii aha yɛ biɛ lɛ yɛ sɔrɔto yɛ nɔ ni yɔɔ Jajelɔ 1:4, ni wieɔ yinɔi ni tsaraa nɔ kɛbaa ni amɛyaa yɛ be sɛɛjekɛmɔ ko mli he lɛ he.
“Nɛkɛ Yinɔ Nɛɛ” —Mɛɛ Yinɔ?
9. Te wiemɔi komekomei ashishitsɔɔmɔ woji tsɔɔ Hela wiemɔ ge·ne·aʹ shishi amɛhaa tɛŋŋ?
9 Beni bɔfoi ejwɛ ni kɛ Yesu ta Mu Gɔŋ lɛ nɔ lɛ nu egbalɛ ni kɔɔ ‘nibii agbɛjianɔtoo lɛ naagbee lɛ’ he lɛ, te amɛbaanu nakai wiemɔ “nɛkɛ yinɔ nɛɛ” shishi amɛha tɛŋŋ? Yɛ Sanekpakpai lɛ amli lɛ, atsɔɔ wiemɔ “yinɔ” shishi kɛjɛ Hela wiemɔ ge·ne·aʹ mli, ni wiemɔi komekomei ashishitsɔɔmɔ woji heei tsɔɔ shishi kɛ wiemɔi nɛɛ, akɛ: “Yɛ faŋŋ mli lɛ, mɛi fɛɛ ni jɛ blematsɛ kome mli.” (Walter Bauer Greek-English Lexicon of the New Testament lɛ) “Mɛi ni afɔ amɛ, weku; . . . wekukpaa ko mli bii . . . aloo gbɔmɛi aweku ko mli bii . . . loo gbɔmɛi akuu muu fɛɛ mli bii ni tsara nɔ, ni hi shi yɛ be kome mli, Mat. 24:34; Mar. 13:30; Luka 1:48; 21:32; Filip. 2:15, kɛ titri lɛ, Yudafoi aweku lɛ mli bii ni hi shi yɛ be sɛɛjekɛmɔ kome mli lɛ.” (W. E. Vine Expository Dictionary of New Testament Words lɛ) “Mɛi ni afɔ amɛ, gbɔmɛi ni jɛ shishijee jɛɛhe kome, weku; . . . gbɔmɛi akuu muu fɛɛ mli bii ni tsara nɔ, ni hi shi yɛ be kome mli: Mt. xxiv. 34; Mk. xiii. 30; Lk. i. 48 . . . ni akɛtsuɔ nii, titri lɛ yɛ Yudafoi aweku lɛ mli bii ni hi shi yɛ be sɛɛjekɛmɔ kome mli lɛ ahe.”—J. H. Thayer Greek-English Lexicon of the New Testament lɛ.
10. (a) Mɛɛ shishitsɔɔmɔi ni je amɛhe niŋmalɔi enyɔ komɛi ni ale amɛ waa kɛha beni amɛtsɛ Mateo 24:34 sɛɛ lɛ? (b) Te wolo ko ni tsɔɔ Nyɔŋmɔ jamɔ wiemɔi ashishi kɛ Biblia shishitsɔɔmɔi komɛi fiɔ shishitsɔɔmɔ nɛɛ sɛɛ amɛhaa tɛŋŋ?
10 Enɛ hewɔ lɛ Vine kɛ Thayer fɛɛ tsɛ Mateo 24:34 sɛɛ kɛtsɔɔ “nɛkɛ yinɔ nɛɛ,” ni ji (he ge·ne·aʹ hauʹte) shishi akɛ “gbɔmɛi akuu muu fɛɛ mli bii ni tsara nɔ, ni hi shi yɛ be kome mli.” Theological Dictionary of the New Testament (1964) fiɔ nɛkɛ shishitsɔɔmɔ nɛɛ sɛɛ, ni ekɛɔ akɛ: “Wiemɔ ‘yinɔ’ ni Yesu kɛtsu nii lɛ jieɔ eyiŋtoo ni mli lɛɛɔ kɛsaa kuu lɛ fɛɛ he lɛ kpo: eewie gbɔmɛi lɛ fɛɛ ahe, ni ele bɔ ni amɛfee ekome yɛ eshafeemɔ mli hu.” Lɛlɛŋ, “bɔ ni amɛfee ekome yɛ eshafeemɔ mli” lɛ je kpo faŋŋ yɛ Yudafoi amaŋ lɛ mli beni Yesu yɔɔ shikpɔŋ nɛɛ nɔ lɛ, tamɔ bɔ ni ekadiɔ jeŋ gbɛjianɔtoo lɛ hu ŋmɛnɛ lɛ.c
11. (a) Mɛɛ hegbɛ ko esa akɛ ekudɔ wɔ klɛŋklɛŋ, koni wɔnyɛ wɔna bɔ ni wɔkɛ he ge·ne·aʹ hauʹte baatsu nii wɔha? (b) Te nakai mɔ lɛ kɛ wiemɔ lɛ tsu nii eha tɛŋŋ?
11 Shi kɛlɛ, Kristofoi ni kaseɔ sane nɛɛ he nii lɛ kudɔɔ amɛsusumɔ, klɛŋklɛŋ lɛ, kɛtsɔɔ bɔ ni Sanekpakpa ŋmalɔi ni akɛ mumɔ tsirɛ amɛ lɛ kɛ Hela wiemɔ he ge·ne·aʹ hauʹte, aloo “nɛkɛ yinɔ nɛɛ” tsu nii kɛbɔ Yesu wiemɔi lɛ ahe amaniɛ amɛha lɛ nɔ. Ekɛ wiemɔ lɛ tsu nii yɛ gbɛ kome nɔ, ni ekɛwieee amɛhe ekpakpa. Enɛ hewɔ lɛ, Yesu tsɛ Yudafoi ajamɔ mli hiɛnyiɛlɔi lɛ akɛ “onufui, shikpãi ashwiei,” kɛkɛ ni etee nɔ ewie akɛ abaatsu Gehena kojomɔ he nii yɛ “yinɔ bii nɛɛ” anɔ. (Mateo 23:33, 36) Shi, ani osɔfoi osatofoi lɛ pɛ nɔ nɛkɛ kojomɔ nɛɛ baaba? Dabi, jeee amɛ pɛ. Yesu kaselɔi lɛ nu ni eewie “nɛkɛ yinɔ nɛɛ” he yɛ bei sɔrɔtoi amli, ni ekɛ wiemɔ lɛ tsu nii nakai nɔŋŋ pɛpɛɛpɛ yɛ shishinumɔ ni mli lɛɛ naa. Mɛni ji nakai shishinumɔ lɛ?
“Yinɔ Fɔŋ Nɛɛ”
12. Beni ekaselɔi lɛ boɔ toi lɛ, te Yesu kɛ “mɛi babaoo” lɛ tsa “nɛkɛ yinɔ nɛɛ” he wiemɔ nɔ eha tɛŋŋ?
12 Yɛ afi 31 Ŋ.B., yɛ Yesu Galilea sɔɔmɔ nitsumɔ kpele lɛ mli, yɛ Hehoo lɛ sɛɛ nɔŋŋ lɛ, ekaselɔi lɛ nu ni eekɛɛ “mɛi babaoo lɛ” akɛ: “Shi namɔ he maŋɔ nɛkɛ yinɔbii nɛɛ mato? Amɛtamɔ gbekɛbii ni tara jaji anɔ ni amɛtsɛtsɛɔ amɛnanemɛi akɛ: ‘Wɔkpã bɛlɛ wɔha nyɛ, ni nyɛjoko; wɔwo yara wɔha nyɛ, ni nyɛfoko.’ Ejaakɛ Yohane [Baptisilɔ lɛ] ba, ni eyeee nii ni esaa enuuu nɔ ko lɛ, amɛkɛɛ akɛ: ‘Daimonio yɛ emli.’ Gbɔmɔ Bi lɛ ba, ni eyeɔ nii ni esaa enuɔ nɔ ko lɛ, amɛkɛɛ akɛ: ‘Naa, nuu fulɔ kɛ daanulɔ, toohelɔi kɛ eshafeelɔi ashieŋtsɛ nɛ!’ ” Nɔ ko kwraa bɛ ni abaafee ni ebaasa nakai “mɛi babaoo” ni yeee mla nɔ lɛ ahiɛ.—Mateo 11:7, 16-19.
13. Namɛi Yesu tsɛ amɛ akɛ “yinɔ fɔŋ nɛɛ” ni ebu amɛ fɔ yɛ ekaselɔi lɛ ahiɛ lɛ?
13 Sɛɛ mli yɛ afi 31 Ŋ.B., beni Yesu kɛ ekaselɔi lɛ je amɛ shiɛmɔ he gbɛfaa ni ji enyɔ ni kɛ amɛ tee Galilea lɛ shishi lɛ, “woloŋmalɔi kɛ Farisifoi lɛ ateŋ mɛi komɛi” bi Yesu akɛ amɛmiitao okadi. Ni ekɛɛ amɛ kɛ “mɛi babaoo” ni yɔɔ jɛmɛ lɛ akɛ: “Yinɔbii fɔji kɛ gbalafitelɔi miitao okadi; shi ahaŋ amɛ okadi ko, akɛ ja gbalɔ Yona okadi lɛ. Ejaakɛ bɔ ni Yona ye shwane-shwane kɛ nyɔɔŋ-nyɔɔŋ gbii etɛ yɛ ŋshɔŋ loo kpeteŋkpele lɛ musuŋ lɛ, nakai gbɔmɔ Bi lɛ aaaye shwane-shwane kɛ nyɔɔŋ-nyɔɔŋ gbii etɛ yɛ shikpɔŋ lɛ tsui mli. . . . Nakai nɔŋŋ aaafee yinɔ fɔŋ nɛɛ hu.” (Mateo 12:38-46) Eka shi faŋŋ akɛ, jamɔ mli hiɛnyiɛlɔi lɛ kɛ “mɛi babaoo” ni nuuu okadi ni aha eba mli yɛ Yesu gbele kɛ eshitee lɛ mli lɛ shishi lɛ fɛɛ fata nɛkɛ “yinɔ fɔŋ nɛɛ” he.d
14. Mɛɛ fɔbuu wiemɔ Yesu kaselɔi lɛ nu ni ewie yɛ Sadukifoi kɛ Farisifoi lɛ ahe?
14 Yɛ afi 32 Ŋ.B. Hehoo lɛ sɛɛ, beni Yesu kɛ ekaselɔi lɛ ba Galilea kpokpaa ni ji Magadan niiaŋ lɛ, Sadukifoi lɛ kɛ Farisifoi lɛ tee amɛyabi Yesu ekoŋŋ akɛ amɛmiitao okadi. Ni esaa ekɛɛ amɛ ekoŋŋ akɛ: “Yinɔbii fɔji kɛ gbalafitelɔi miitao okadi, shi ahaŋ amɛ okadi ko, akɛ ja gbalɔ Yona okadi lɛ.” (Mateo 16:1-4) Lɛlɛŋ, nakai jamɔ mli osatofoi lɛ ji mɛi ni sa jɛmɔ wiemɔi fe fɛɛ ejaakɛ amɛji hiɛnyiɛlɔi yɛ “mɛi babaoo” ni yeee anɔkwa, ni Yesu bu amɛ fɔ akɛ “yinɔ fɔŋ nɛɛ” lɛ ateŋ.
15. Dani tsakemɔ lɛ aaaba, kɛ etsakemɔ lɛ sɛɛ nɔŋŋ hu lɛ, mɛni tee nɔ yɛ Yesu kɛ ekaselɔi lɛ kɛ ‘yinɔ nɛɛ’ teŋ?
15 Kɛbaa esɔɔmɔ nitsumɔ yɛ Galilea lɛ naagbee gbɛ lɛ, Yesu tsɛ mɛi babaoo lɛ kɛ ekaselɔi lɛ kɛba eŋɔɔ ni ekɛɛ amɛ akɛ: “Mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele yɛ yinɔbii gbalafitelɔi kɛ eshafeelɔi nɛɛ ateŋ lɛ, lɛ hu ehe aaafee gbɔmɔ Bi lɛ hiɛgbele.” (Marko 8:34, 38) No hewɔ lɛ, eka shi faŋŋ akɛ, nakai Yudafoi babaoo ni hi shi yɛ nakai beaŋ, ni tsakeee amɛtsui lɛ ji “yinɔbii gbalafitelɔi kɛ eshafeelɔi nɛɛ.” Gbii fioo sɛɛ, yɛ Yesu tsakemɔ lɛ sɛɛ lɛ, Yesu kɛ ekaselɔi lɛ “[bashɛ] asafo lɛ ŋɔɔ,” ni nuu ko kɛ lɛ bawie koni etsa ebinuu eha lɛ. Yesu wie akɛ: “Oo yinɔbii ni heee yeee ni bɛ amɛŋɛlɛ nɔ! Mɛɛ beyinɔ mikɛ nyɛ aaahi shi kɛyashi? Mɛɛ beyinɔ nɔŋŋ mahiɛ nyɛ kɛyashi?”—Mateo 17:14-17; Luka 9:37-41.
16. (a) Mɛɛ “asafoi” lɛ afɔbuu ko Yesu ti mli ekoŋŋ yɛ Yudea? (b) Mɛɛ gbɛ nɔ “yinɔbii nɛɛ” bafee efɔŋ ni fe efɔji fɛɛ yɛ?
16 Ekolɛ Yudea ji he ni eyɔɔ, yɛ Asesei Agbijurɔ ni aye yɛ afi 32 Ŋ.B. lɛ sɛɛ, “beni asafoi lɛ ebabua amɛhe naa pii” kɛbɔle Yesu he lɛ, ni esaa eti bɔ ni ebu amɛ fɔ lɛ mli ekoŋŋ, akɛ: “Yinɔbii nɛɛ yinɔbii fɔji ni; amɛmiitao okadi, ni ahaŋ amɛ okadi ko, akɛ ja gbalɔ Yona okadi lɛ.” (Luka 11:29) Yɛ naagbee, beni jamɔ mli hiɛnyiɛlɔi lɛ kɛ Yesu ba koni akojo lɛ lɛ, Pilato kɛɛ amɛ akɛ eetao ni eŋmɛɛ ehe. Sane ni aŋma afɔ̃ shi lɛ kɛɔ akɛ: “Osɔfonukpai lɛ kɛ onukpai lɛ ewo asafoi lɛ ayiŋ akɛ, amɛbi Baraba moŋ, ni agbe Yesu. . . . Pilato kɛɛ amɛ akɛ: ‘Belɛ, mɛni mifee Yesu ni atsɛɔ lɛ Kristo lɛ he mɔ?’ Amɛ fɛɛ amɛkɛɛ: ‘Ha ni asɛŋ lɛ!’ Ni amralo lɛ kɛɛ: ‘Mɛɛ efɔŋ efee?’ Shi no moŋ ha amɛbolɔ amɛkɛɛ: ‘Ha ni asɛŋ lɛ!’ ” Nakai “yinɔbii fɔji” lɛ miitao ni agbe Yesu kɛ̃!—Mateo 27:20-25.
17. Te nɛkɛ “yinɔ kɔ̃ɔdɔ̃ŋ” nɛɛ mli bii lɛ ekomɛi here Petro shiɛmɔ yɛ Pentekoste lɛ nɔ amɛha tɛŋŋ?
17 “Yinɔbii ni heee yeee ni bɛ amɛŋɛlɛ nɔ,” ni amɛ jamɔ mli hiɛnyiɛlɔi lɛ wo amɛ hewalɛ lɛ, tsɔ nakai gbɛ nɔ amɛna gbele ni amɛkɛba Nuntsɔ Yesu Kristo nɔ lɛ mli gbɛfaŋnɔ titri. Gbii nyɔŋmai enumɔ sɛɛ, yɛ Pentekoste yɛ afi 33 Ŋ.B. lɛ, mumɔ krɔŋkrɔŋ ba kaselɔi lɛ anɔ ni amɛbɔi lilɛii sɔrɔtoi awiemɔ. Beni amɛnu gbɛɛmɔ lɛ he lɛ, “mɛi babaoo babua amɛhe naa,” ni bɔfo Petro kɛ amɛ wie ni etsɛ amɛ “Yuda hii kɛ mɛi fɛɛ ni yɔɔ Yerusalem,” ni ekɛɛ: “Nyɛtsɔ mɛi ni bɛ mla lɛ anine nɔ nyɛsɛŋ [Yesu] ni nyɛgbe lɛ.” Te mɛi ni boɔ lɛ toi lɛ ateŋ mɛi komɛi fee amɛnii yɛ enɛ he amɛha tɛŋŋ? “Etsurɔ amɛtsuiiaŋ.” Kɛkɛ ni Petro kɛ amɛ wie koni amɛtsake amɛtsuii amli. “Ewie wiemɔi krokomɛi pii ekɛye odase ni ekɛwo amɛ ŋaa akɛ: ‘Nyɛhaa aherea nyɛyiwala kɛjɛa yinɔ kɔ̃ɔdɔ̃ŋ nɛɛ mli.’ ” Yɛ enɛ nɔkpɛlɛmɔ mli lɛ, mɛi aaashɛ akpei etɛ “kpɛlɛ yɛ tsuijurɔ naa [ni] abaptisi amɛ.”—Bɔfoi lɛ Asaji 2:6, 14, 23, 37, 40, 41.
Atsɔɔ Mɛi ni “Yinɔ Nɛɛ” Ji
18. Bɔ ni Yesu kɛ wiemɔ “nɛkɛ yinɔ nɛɛ” tsu nii eha lɛ kɔɔ mɛni he be fɛɛ be?
18 Belɛ, mɛni ji “yinɔ” ni Yesu wie he shii abɔ yɛ ekaselɔi lɛ ahiɛ lɛ mɔ? Te amɛnu wiemɔi ni ewie akɛ: “Nɛkɛ yinɔ nɛɛ hoŋ, ja nii nɛɛ fɛɛ eba mli dã” lɛ shishi amɛha tɛŋŋ? Eka shi faŋŋ akɛ, Yesu tsakeee bɔ ni ale ni ekɛ wiemɔ ni ji “nɛkɛ yinɔ nɛɛ” tsuɔ nii ehaa lɛ, ni etee nɔ ekɛtsu nii nakai nɔŋŋ yɛ ebeaŋ mɛi babaoo, kɛ amɛ ‘gbɛtsɔɔlɔi shwilafoi,’ ní amɛ fɛɛ kutuu amɛfeɔ Yudafoi amaŋ lɛ he. (Mateo 15:14) Haomɔi ni Yesu gba efɔ shi lɛ fɛɛ ba “nɛkɛ yinɔ nɛɛ” nɔ, kɛkɛ ni no sɛɛ lɛ eho etee yɛ “amanehulu babaoo” ni eko tamɔɔɔ no, ni ba Yerusalem nɔ lɛ mli.—Mateo 24:21, 34.
19. Mɛɛ be, ni mɛɛ gbɛ nɔ Yudafoi agbɛjianɔtoo lɛ “ŋwɛi kɛ shikpɔŋ” lɛ ho etee yɛ?
19 Yehowa kojo Yudafoi lɛ yɛ klɛŋklɛŋ afii oha lɛ mli. Ahere mɛi ni tsake amɛtsuii, ni baná gbɛjianɔ ni Yehowa eto kɛtsɔ Kristo nɔ lɛ mli hemɔkɛyeli lɛ ayiwala kɛtsɔ “amanehulu babaoo” ni ba lɛ mli. Lɛlɛŋ hu yɛ Yesu wiemɔi lɛ anaa lɛ, nibii ni agba afɔ̃ shi lɛ fɛɛ ba mli pɛpɛɛpɛ, kɛkɛ ni Yudafoi anibii agbɛjianɔtoo lɛ “ŋwɛi kɛ shikpɔŋ”—ni ji maŋ muu lɛ fɛɛ, kɛ ejamɔ mli hiɛnyiɛlɔi kɛ emli gbɔmɛi fɔji lɛ fɛɛ—ho etee. Yehowa etsu kojomɔ he nii!—Mateo 24:35; okɛto 2 Petro 3:7 he.
20. Mɛɛ ŋaawoo ni eba yɛ ebe naa kɔɔ Kristofoi fɛɛ he kɛ hiamɔ?
20 Yudafoi lɛ ateŋ mɛi ni bo Yesu gbalɛ wiemɔi lɛ atoi lɛ yoo akɛ amɛyiwalaheremɔ damɔɔɔ mɔdɛŋ ni amɛaabɔ ni amɛbu “yinɔ” loo “bei loo yinɔi” komɛi ni atsɔɔ lɛ asɛɛkɛlɛ he akɔntaa nɔ, shi moŋ edamɔ amɛhe ni amɛaatsi kɛaajɛ nakai beaŋ yinɔ bii fɔji lɛ ahe, ni amɛkɛ ekaa afee Nyɔŋmɔ suɔmɔnaa nii lɛ nɔ. Eyɛ mli akɛ Yesu gbalɛ lɛ mli naagbee wiemɔi lɛ kɔɔ emlibaa wulu yɛ wɔgbii nɛɛ amli lɛ he moŋ, shi esa akɛ klɛŋklɛŋ afii oha lɛ mli Yudafoi Kristofoi lɛ abo ŋaawoo ni ekɛha lɛ toi, akɛ: “No hewɔ lɛ nyɛsaraa be fɛɛ be, ni nyɛsɔlea, koni nyɛnyɛ nii ni baaba nɛɛ fɛɛ mli nyɛje, ni nyɛnyɛ gbɔmɔ Bi lɛ hiɛ nyɛdamɔ.”—Luka 21:32-36; Bɔfoi lɛ Asaji 1:6-8.
21. Mɛɛ nibii ni baaba trukaa wɔbaanyɛ wɔkpa gbɛ yɛ wɔsɛɛ be ni kã wɔhiɛ kpaakpa lɛ mli?
21 Ŋmɛnɛ, “Yehowa gbi wulu lɛ . . . ebɛŋkɛ, ni eeye oyai naakpa.” (Zefania 1:14-18; Yesaia 13:9, 13) Trukaa, yɛ Yehowa diɛŋtsɛ ‘gbi kɛ ŋmɛlɛtswaa’ ni etsɔ hiɛ eto momo lɛ nɔ lɛ, abaaŋmɛɛ emlifu he ashwie je lɛŋ jamɔ, maŋkwramɔ, kɛ jarayeli gbɛjianɔtoi lɛ anɔ, kɛfata gbɔmɛi ni ekɔ gbɛ fɔŋ, ni feɔ wɔbe nɛɛ mli “yinɔbii fɔji kɛ gbalafitelɔi” lɛ ahe. (Mateo 12:39; 24:36; Kpojiemɔ 7:1-3, 9, 14) Te ooofee tɛŋŋ oyi ana wala kɛfo “amanehulu kpeteŋkpele” lɛ? Wɔ nikasemɔ ni nyiɛ sɛɛ lɛ baaha hetoo ni ebaatsɔɔ wɔ hiɛnɔkamɔ ni yɔɔ nyam kɛha wɔsɛɛ be hu.
[Shishigbɛ niŋmai]
a Kɛ ootao gbalɛ nɛɛ mlitsɔɔmɔ fitsofitso lɛ, ofainɛ kwɛmɔ tao ni yɔɔ February 15, 1994 Buu-Mɔɔ baafa 14, 15 lɛ.
b Kɛ ootao “otsii” ni damɔ shi kɛha afii lɛ he saji babaoo lɛ, kwɛmɔ The Bible—God’s Word or Man’s? wolo ni Watchtower Bible and Tract Society of New York, Inc. fee lɛ, baafai 130-2.
c Biblia komɛi tsɔɔ he ge·ne·aʹ hauʹte ni yɔɔ Mateo 24:34 lɛ shishi nɛkɛ: “nɛkɛ gbɔmɛi nɛɛ” (The Holy Bible in the Language of Today [1976], ni W. F. Beck fee lɛ); “nɛkɛ maŋ nɛɛ” (The New Testament—An Expanded Translation [1961], ni K. S. Wuest fee lɛ); “gbɔmɛi nɛɛ” (Jewish New Testament [1979], ni D. H. Stern fee lɛ).
d Esaaa ni akɛ nɛkɛ “mɛi babaoo” ni yeee anɔkwa nɛɛ toɔ ʽam-ha·ʼaʹrets, loo “shikpɔŋ lɛ nɔ bii,” ni jamɔ mli hiɛnyiɛlɔi henɔwolɔi lɛ sumɔɔɔ ni amɛkɛ amɛ feɔ nɔ ko kwraa, shi Yesu “musuŋ tsɔ lɛ” yɛ amɛhe lɛ ahe.—Mateo 9:36; Yohane 7:49.
Te Obaaha Hetoo Tɛŋŋ?
◻ Mɛni wɔkaseɔ kɛjɛɔ Daniel 9:24-27 mlibaa mli?
◻ Te wiemɔi komekomei ashishitsɔɔmɔ woji heei tsɔɔ “nɛkɛ yinɔ nɛɛ,” taakɛ akɛtsu nii yɛ Biblia lɛ mli lɛ shishi amɛhaa tɛŋŋ?
◻ Te Yesu tee nɔ ekɛ wiemɔ “yinɔ” lɛ tsu nii yɛ shishinumɔ kome naa eha tɛŋŋ?
◻ Mɛɛ gbɛ nɔ Mateo 24:34, 35 ba mli yɛ klɛŋklɛŋ afii oha lɛ mli?
[Mfoniri ni yɔɔ baafa 12]
Yesu kɛ “nɛkɛ yinɔ nɛɛ” to gbekɛbii babaoo ni ekpɛlɛɛɛ kudɔmɔ he
[Mfoniri ni yɔɔ baafa 15]
Yehowa pɛ tsɔ̃ hiɛ ele ŋmɛlɛtswaa nɔ ni abaatsu kojomɔ he nii yɛ Yudafoi agbɛjianɔtoo fɔŋ lɛ nɔ