Yitso 8
‘Maŋtsɛyeli lɛ Ebɛŋkɛ’
1. Mɛni hewɔ Yohane wiemɔi ni yɔɔ Mateo 3:1-10 lɛ ba yɛ ebe naa pɛpɛɛpɛ lɛ?
HA WƆPƐI “[Mesia] Mɔ ni Afɔ lɛ Mu ni ji Lumɔ lɛ” nitsumɔ, yɛ eklɛŋklɛŋ baa lɛ mli lɛ mli fioo wɔkwɛ. Anu adafitswaa ni hɛleɔ mɔ shi nɛɛ yɛ Yohane Baptisilɔ lɛ naa, akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ.” (Mateo 3:2) Eshwɛ fioo ni wɔsɛɛ be mli Maŋtsɛ lɛ baapue! Beni ‘otsi ni ji nyɔŋmai kpawo,’ ni ji “otsi” kɛha duromɔ krɛdɛɛ lɛ bɛŋkɛɔ lɛ, be bashɛ lɛlɛŋ kɛha Yudafoi lɛ akɛ amɛtsake amɛtsui kɛjɛ eshai ni amɛfee amɛshi jalɛ mla kuu ni amɛ-Nyɔŋmɔ, Yehowa kɛha amɛ lɛ ahe. Ejaakɛ amrɔ nɛɛ, eshwɛ fioo ni Israel baabote kojomɔ gbi ko mli. No hewɔ lɛ, Yohane tee nɔ ekɛɛ maŋ lɛ jamɔŋ hiɛnyiɛlɔi osatofoi lɛ akɛ: “Shinɔi ashwiei, namɔ tsɔɔ nyɛ akɛ nyɛjo mlifu ni baaba lɛ naa foi? Belɛ nyɛwoa yibii ni sa tsuitsakemɔ mɔ! Shi lema lɛ ka tsei lɛ ashishifa lɛ nɔ momo, koni tso fɛɛ tso ni wooo yibii kpakpai lɛ, atoo lɛ agbee shi, ni ashɛ afɔ la mli.”—Mateo 3:7, 8, 10.
2. (a) Esoro Yesu baptisimɔ lɛ yɛ mɛɛ gbɛ nɔ? (b) Beni ‘ebɔi enitsumɔ lɛ,’ mɛni ehe bahia ni ekpee naa?
2 Nakai be lɛ mli ji be mli ni Yesu jɛ Galilea eba Yordan naa ni ebakɛɛ Yohane akɛ ebaptisi lɛ lɛ. Yohane le akɛ esha ko bɛ Yesu he, ni klɛŋklɛŋ lɛ, ekpɛlɛɛɛ nɔ. Shi, ebaasoro Yesu baptisimɔ lɛ kwraa. Ebaafee ehe ni ekɛhaa Yehowa kɛha nitsumɔ krɛdɛɛ ni e-Tsɛ lɛ yɔɔ kɛha lɛ yɛ shikpɔŋ nɔ akɛ ebatsu lɛ he mfoniri. No hewɔ lɛ, abaptisi Yesu yɛ nu mli yɛ gbɛ ni ja nɔ.
“Ni beni esɔleɔ lɛ, ŋwɛi gbele, ni mumɔ krɔŋkrɔŋ lɛ kpeleke shi kɛ su ni tamɔ okpo su kɛba enɔ; ni gbee ko jɛ ŋwɛi ekɛɛ: ‘Bo ji misuɔmɔ Bi lɛ, bo ohe tsui minaa!’ Ni beni Yesu diɛŋtsɛ bɔi lɛ, eye aaafee afii nyɔŋmai etɛ.”
Ákɛ Mesia kɛ mɔ ni ahala lɛ akɛ Maŋtsɛ lɛ, amrɔ nɔŋŋ kɛkɛ ni blema Onufu lɛ, Abonsam, kɛ nakai Yudafoi ajamɔ mli hiɛnyiɛlɔi ni kɛ osatofeemɔ kɛɔ akɛ amɛsɔmɔɔ Nyɔŋmɔ lɛ jie amɛhiɛ amɛka lɛ ni amɛbɔi lɛ tutuamɔ.—Luka 3:21-23.
3. Beni Yesu yɔɔ kaa shishi lɛ, mɛɛ gbɛ nɔ esoro gbɛ ni ekɔ lɛ yɛ Adam kɛ Hawa nɔ lɛ he yɛ?
3 “Ni Yesu ni mumɔ krɔŋkrɔŋ eyi lɛ obɔ lɛ ku esɛɛ kɛjɛ Yordan he, ni mumɔ lɛ kpala lɛ kɛtee ŋa lɛ nɔ; ni Abonsam ka lɛ gbii nyɔŋmai ejwɛ.” (Luka 4:1, 2) Satan yoo Yesu akɛ “seshi” ni Nyɔŋmɔ ewo shi yɛ ehe, ni baajwara Abonsam kɛ “[e]seshi” fɔŋ lɛ yɛ be ni sa mli lɛ. Ani Satan baanyɛ afite Yehowa yiŋtoo kɛtsɔ E-nɔ toigbele ni eeeha Yesu afee lɛ nɔ? Yesu ehi ŋmaa aahu gbii 40 sɔŋŋ. No hewɔ lɛ, Abonsam kɛɛ Yesu ni hɔmɔ miiye lɛ lɛ akɛ eha nakai ŋa kplanaa ni tso ko wooo yibii yɛ nɔ lɛ nɔ tɛi lɛ ekomɛi atsɔmɔ aboloo. Amrɔ nɛɛ Yesu yɛ hewalɛ ni ebaanyɛ ekɛfee naakpɛɛ nii, shi etsɛ́ Yehowa jalɛ mla lɛ sɛɛ, ni ekɛɛ lɛ akɛ:
“Aŋma akɛ: ‘Jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.’ ” (Mateo 4:1-4; 5 Mose 8:3)
Kwɛ bɔ ni etamɔɔɔ Hawa kɛ ewu, Adam, mɛi ni gbo toi ni amɛyaye tso yibii ni agu amɛ akɛ amɛkaye, yɛ be mli ni niyenii krokomɛi babaoo ni hewalɛ yɔɔ mli ebɔle amɛ kɛkpe lɛ!
4. Mɛni wɔɔnyɛ wɔkase kɛjɛ bɔ ni Yesu kpee kaa ni ji enyɔ lɛ naa eha lɛ mli?
4 Yesu heshibaa kɛ bɔ ni ekɛ ehe fɔɔ e-Tsɛ lɛ nɔ kwraa lɛ je kpo yɛ gbɛ ni etsɔ nɔ ekpee kaa ni nyiɛ sɛɛ ba lɛ naa lɛ mli. Satan bɔ mɔdɛŋ ni eha Yesu asusu akɛ, ákɛ Nyɔŋmɔ Bi lɛ, eji mɔ ko ni he hiaa waa—mɔ ko ni ehe gbɛi. Hɛɛ, ha ni etũ kɛjɛ sɔlemɔtsu lɛ yiteŋ somromoo lɛ nɔ yakatswaa, ni Nyɔŋmɔ bɔfoi lɛ baasɔo lɛ yɛ amɛdɛŋ bɔ fɛɛ bɔ ni fee, koni ekaye ehe awui ko. Shi Yesu kpoo nɛkɛ kwashiai aŋaawoo nɛɛ, ni etsɛ wiemɔi asɛɛ kɛjɛ Yehowa mla lɛ mli ekoŋŋ, ni ekɛɛ:
“Aŋma ekoŋŋ akɛ: ‘Kaaka Nuŋtsɔ [Yehowa] o-Nyɔŋmɔ lɛ.’ ” (Mateo 4:5-7; 5 Mose 6:16)
Nikasemɔ ko yɛ enɛ mli yɛ biɛ kɛha mɛi fɛɛ ni kɛɔ akɛ Nyɔŋmɔ tsuji ji amɛ lɛ, aahu kɛbashi ŋmɛnɛ: Mɔ ko mɔ ko hiɛ akakã he ni ekɛ shidaamɔ ni yɔɔ ekɛ Yehowa teŋ lɛ fee nɔ ko. Jɔɔmɔ ni Nyɔŋmɔ jɔɔ wɔ lɛ damɔɔɔ wɔ tsutsu sɔɔmɔ loo gbɛhe ko ni wɔhi mli pɛŋ lɛ nɔ, shi moŋ ya ni wɔɔya nɔ wɔbo lɛ toi daa yɛ heshibaa mli, ni wɔna bulɛ ni mli kwɔ wɔha egbɛjianɔtoi kɛ etaomɔ nii lɛ nɔ.—Filipibii 2:5-7.
5. (a) Mɛɛ sane titri ko nɔ kaa ni ji etɛ lɛ damɔ? (b) Te Yesu kɛ Nyɔŋmɔ mla lɛ tsu nii ekoŋŋ kɛha hetoo eha tɛŋŋ? (d) Enɛ feɔ nɔkwɛmɔ nɔ ni sa jogbaŋŋ kɛha wɔ ŋmɛnɛ yɛ mɛɛ gbɛ nɔ?
5 Agbɛnɛ, naagbee kaa, kɛ nɔ ni mli wa fe fɛɛ yɛ nɛkɛ be nɛɛ mli lɛ baa nɛɛ! Oo, kɛji Satan baanyɛ atsi Yesu agbee shi yɛ sane ni he hiaa fe fɛɛ, ni ji Maŋtsɛyeli lɛ he sane lɛ mli kɛkɛ! No hewɔ lɛ, “Abonsam lɛ ŋɔ lɛ kɛtee gɔŋ kpeteŋkpele ni kwɔ ko nɔ, ni eŋɔ jeŋ maŋtsɛyeli hei fɛɛ kɛ amɛnunyam lɛ etsɔɔ lɛ; ni ekɛɛ lɛ akɛ: ‘Maŋɔ enɛɛmɛi fɛɛ mahao, kɛji okula shi oja mi lɛ.’ ” Satan tsɔɔ mli akɛ, Yesu nine baanyɛ ashɛ adesai aje lɛ fɛɛ kudɔmɔ nɔ yɛ nakai beaŋ yɛ jɛmɛ nɔŋŋ kɛtsɔ saji ahe ni eeeŋmɛɛ fioo ni akɛsaa kɛkɛ lɛ nɔ, ni ehe ehiaaa ni emɛ aahu kɛtsɔ afii ohai abɔ lɛ fɛɛ mli kɛyashi Yehowa be ni eto lɛ baashɛ dã. Shi, Yesu tsɛ́ Yehowa mla lɛ sɛɛ ekoŋŋ, ni eha lɛ hetoo akɛ:
“Ho misɛɛ Satan! Ejaakɛ aŋma akɛ: ‘Nuŋtsɔ [Yehowa] o-Nyɔŋmɔ lɛ oja, ni lɛ kɛkɛ osɔmɔ!’ ” (Mateo 4:8-10; 5 Mose 6:13)
Shikome ekoŋŋ lɛ, eji nɔkwɛmɔ nɔ fɛfɛo kɛha mɛi ni sɔmɔɔ Yehowa ŋmɛnɛ lɛ! Bɔ fɛɛ bɔ ni gbɛ lɛ aaatamɔ nɔ ni jɛkɛ ha po lɛ, ekaba kɔkɔɔkɔ akɛ mɛi ni kɛ sɔɔmɔ krɔŋŋ haa Yehowa lɛ aaaŋmɛɛ Nyɔŋmɔ Maŋtsɛyeli lɛ ni amɛkɛyeɔ klɛŋklɛŋ gbɛhe yɛ amɛshihilɛ mli lɛ he. Ekaba hu akɛ amɛaagba afã ni amɛyato amɛ diɛŋtsɛ amɛ “maŋtsɛyeli hei” bibii amɛha amɛhe yɛ Satan jeŋ ni diɔ heloonaa nibii asɛɛ nɛɛ mli.
“AMƐJƐƐƐ JE LƐ MLI”
6. (a) Mɛɛ gbɛ nɔ agbɛnɛ Maŋtsɛyeli lɛ bɛŋkɛ yɛ? (b) Yɛ 1 Petro 2:21 kɛ nitsumɔ mli lɛ, mɛɛ Yesu nɔkwɛmɔ nɔ esa akɛ Kristofoi anyiɛ sɛɛ?
6 Mɛni nyiɛ Abonsam kaai ni Yesu tswa eshɛrɛ eshwie nɛɛ sɛɛ ba? Biblia mli sane ni aŋma lɛ kɛɔ wɔ akɛ:
“Yesu bɔi shiɛmɔ ni ekɛɛ: ‘Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ!’ ”
Mɛɛ gbɛ nɔ Maŋtsɛyeli lɛ ebɛŋkɛ yɛ? Kɛ shishinumɔ akɛ mɔ ni afɔ lɛ mu akɛ Maŋtsɛ, ni ji Yesu Kristo diɛŋtsɛ yɛ amrɔ nɛɛ, ni “etsɔɔ nii . . . ni eshiɛɔ maŋtsɛyeli lɛ he sanekpakpa lɛ etsɔɔ.” Gbɔmɛi asafoi babaoo diɛŋtsɛ nyiɛɔ esɛɛ kɛjɛɔ he kome kɛyaa he kroko. (Mateo 4:17, 23-25) Yesu fee lɛ faŋŋ jogbaŋŋ akɛ esa akɛ mɛi ni kpɛlɛɔ etsɔɔmɔi anɔ lɛ afee ‘mɛi ni jɛɛɛ je lɛ mli, taakɛ bɔ ni lɛ hu ejɛɛɛ je lɛ mli lɛ.’ Esa akɛ amɛtsi amɛhe kɛjɛ je lɛ kɛ eyiwalɛ, kɛ ejeŋba shara gbɛi lɛ ahe. Esa akɛ mɛi fɛɛ ni sumɔɔ ni amɛnyiɛ Yesu sɛɛ ŋmɛnɛ lɛ hu afee nakai.—Yohane 17:14, 16; 1 Petro 2:21; kwɛmɔ Mateo 5:27, 28; 26:52 hu.
7. Yɛ Yesu wiemɔi ni yɔɔ Yohane 8:44 lɛ hewɔ lɛ, mɛni hewɔ ehe hiaa ni wɔpɛi jamɔ mli hiɛnyiɛlɔi lɛ atsɔɔmɔi amli ŋmɛnɛ akɛ ekɛ Biblia lɛ kpaa gbee lo lɛ?
7 Yesu kɛɛ jamɔ mli hiɛnyiɛlɔi ni hi shi yɛ egbii lɛ amli lɛ, yɛ apasa jamɔ he akɛ: “Nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee. Lɛ lɛ gbɔmɔgbelɔ ji lɛ kɛjɛ teteete, ni edamɔɔɔ anɔkwale lɛ mli, ejaakɛ anɔkwale bɛ emli. Kɛ eemale lɛ, lɛ diɛŋtsɛ enii ahe ewieɔ, ejaakɛ amalelɔ kɛ malemɔ tsɛ ji lɛ.” (Yohane 8:44) Ehe miihia waa kɛha gbɔmɛi foji lɛ yɛ nakai beaŋ akɛ amɛye amɛhe kɛjɛ blema amale kusumii (ni akɛwo Talmud lɛ mli yɛ sɛɛ mli) ni ebahe shi waa yɛ Yudafoi ajamɔ mli lɛ ahe. Ni ŋmɛnɛ hu, yɛ mɛi ni kɛ amɛwala be fɛɛ ehi amɛ blematsɛmɛi ajamɔ mli aahu, taakɛ Yudafoi lɛ ji lɛ agbɛfaŋ lɛ, ehe miihia ni amɛpɛi mli amɛkwɛ akɛ ani amɛ jamɔ mli hiɛnyiɛlɔi lɛ ‘etswa’ Nyɔŋmɔ wiemɔ lɛ amɛfɔ ‘afã’ ni amɛtsɔɔ adesai ablema kusumii kɛkɛ lo.—Marko 7:9-13.
8, 9. (a) Mɛni hewɔ Yesu jaje akɛ emaŋtsɛyeli lɛ “jɛɛɛ je nɛŋ” lɛ? (b) Belɛ, mɛni hewɔ ni anɔkwa Kristofoi kɛ yiwaa kpeɔ lɛ? (d) Mɛni hewɔ esa akɛ amɛna ekaa lɛ?
8 Beni akojoɔ lɛ ni ewala baanyɛ aje edɛŋ lɛ, Yesu jaje yɛ ebe lɛ mli maŋkwramɔŋ nɔyelii lɛ ahe akɛ:
“Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ mimaŋtsɛyeli lɛ jɛɛɛ biɛ.”
Yesu Maŋtsɛyeli lɛ jɛɛhe yɛ ŋwɛi. Enaa enɔyeli hegbɛ kɛjɛɔ Maŋtsɛ ni Nɔ Kwɔ Fe Fɛɛ, Yehowa Nyɔŋmɔ ŋɔɔ, shi jeee kɛmiijɛ Satan ŋɔɔ. No hewɔ lɛ, Satan kɛ eshikpɔŋ nɔ “seshi” lɛ tsu nii ni ekɛwa Yesu kɛ esɛɛnyiɛlɔi lɛ ayi.—Yohane 18:36.
9 No hewɔ lɛ, Yesu kɛɛ enɔkwa kaselɔi lɛ akɛ: “Enɛ mikɛɔ nyɛ, akɛ nyɛsumɔ nyɛhe. Kɛji je lɛ miinyɛ nyɛ lɛ, nyɛnaa nyɛlea akɛ mi tsutsu enyɛ. Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛɔ nyɛ lɛ.” (Yohane 15:17-19) Yehowa jalɔi kɛ nyɛɛ kɛ yiwaa ni naa wa ekpe aahu kɛbashi amrɔ nɛɛ gbii nɛɛ amli ejaakɛ amɛtsiɔ amɛhe kɛjɛɔ maŋkwramɔŋ nifeemɔi fɔji kɛ yiwalɛ ni egbɛ eshwa babaoo ŋmɛnɛ lɛ ahe. Shi nyɔmɔwoo ni yɔɔ nyam miimɛ mɛi fɛɛ ni naagbee lɛ amɛyeɔ je lɛ nɔ lɛ. Taakɛ Yesu ma nɔ mi eha ekaselɔi lɛ: “Je lɛŋ lɛ, hejaramɔ nyɛnaa, shi kɛlɛ nyɛtsui anyɔa nyɛmli; miye je lɛ nɔ kunim.”—Yohane 16:33.
MAŊTSƐ SUI NI ATAOƆ
10, 11. (a) Mɛni tsɔɔ akɛ jeee ŋwɛi hegbɛ naa jeŋ nɔyelɔi lɛ yeɔ nɔ yɛ? (b) Kɛ akɛto he lɛ, Yesu etsɔɔ akɛ esa kɛha maŋtsɛyeli yɛ mɛɛ gbɛ nɔ?
10 Mɛɛ sui obaasumɔ ni ona yɛ je lɛŋ nɔyelɔ ko he? Nɔyelɔi ni eho yɛ yinɔsane mli lɛ ateŋ mɛi pii fee amɛhe “hewalɔi,” hewolɔi, kɛ mɛi ni woɔ amɛhe nɔ waa. Bei pii lɛ amɛkɛ amɛ diɛŋtsɛ amɛhiɛyaa yeɔ klɛŋklɛŋ gbɛhe yɛ gbɔmɛi foji lɛ ahiamɔ nii ahiɛ. Amɛteŋ mɛi komɛi eshwã akɛ amɛto maŋtsɛyelii kpeteŋkpelei ashishi, shi yɛ be ko sɛɛ lɛ, amɛmaŋtsɛyelii kpeteŋkpelei nɛɛ fɛɛ butu, kɛma bɔ ni Maŋtsɛ Salomo wiemɔi nɛɛ ji anɔkwale ha lɛ nɔ mi, akɛ: “Kɛ jeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme.” (Lala 127:1) Yɛ anɔkwale mli lɛ, nɛkɛ “maŋtsɛmɛi” nɛɛ ema nɔ mi akɛ jeee ŋwɛi hegbɛ naa amɛyeɔ maŋtsɛmɛi lɛ yɛ. Amɛmaŋtsɛyeli lɛ jɛɛɛ Yehowa Nyɔŋmɔ ŋɔɔ.
11 Shi, awieɔ Maŋtsɛ ni Nyɔŋmɔ efɔ lɛ mu, ni ji Yesu Kristo he yɛ gbalɛ wiemɔ mli akɛ etaa okpɔŋɔ nɔ kɛwuɔ eshiɔ ehenyɛlɔi lɛ yɛ “anɔkwale kɛ mlijɔlɛ kɛ jalɛ hewɔ.” Awieɔ yɛ ehe akɛ: “Osumɔɔ jalɛ ni onyɛɔ nifɔjianii; hewɔ lɛ Nyɔŋmɔ, ni ji o-Nyɔŋmɔ lɛ, kɛ mlifilimɔ mu lɛ efɔo fe onanemɛi”—maŋtsɛmɛi ni jɛ David weku lɛ mli ni tsɔ ehiɛ lɛ. (Lala 45:5, 8) Akɛni enyɛɔ nɔ fɛɛ nɔ ni wooo Yehowa gbɛi krɔŋkrɔŋ lɛ hiɛ nyam ni ekuɔ Nyɔŋmɔ jalɛ shishitoo mlai lɛ amli lɛ hewɔ lɛ, yɛ be ni sa mli lɛ, ŋwɛi Maŋtsɛ lɛ baatsuu shikpɔŋ nɛɛ he kɛjɛ efɔŋ feemɔ fɛɛ mli, koni ekɛsaa gbɛ kɛha jalɛ nɔyeli ko baa. Ani Yesu ejie ehe kpo akɛ mɔ ni sa akɛ efee nakai nɔyelɔ lɛ? Eka shi faŋŋ akɛ ejie ehe kpo nakai!
12. Mɛɛ sɔɔmɔ krɔŋŋ he nɔkwɛmɔ nɔ Yesu fee efɔ shi eha wɔ?
12 Beni eji gbɔmɔ adesa ni eye emuu lɛ, Yesu fee nɔkwɛmɔ nɔ efɔ shi yɛ suɔmɔ ni anaa ahaa Nyɔŋmɔ kɛ naanyo gbɔmɔ lɛ mli. Ákɛ Nyɔŋmɔ maŋ Israel, ni ejɔɔ ehe nɔ eha Yehowa lɛ mli nyo lɛ, Yesu fee nɔkwɛmɔ nɔ efɔ shi yɛ kitai wuji enyɔ ni fe fɛɛ lɛ toiboo mli. Ekɛɛ: “Kitai lɛ fɛɛ ateŋ klɛŋklɛŋ nɔ ji enɛ: ‘Bo toi, Israel! Nuŋtsɔ [Yehowa] wɔ-Nyɔŋmɔ lɛ, Nuŋtsɔ [Yehowa] kome ni; ni suɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!’ Enɛ ji klɛŋklɛŋ kita. Ni nɔ ni ji enyɔ lɛ tamɔ no: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ ” (Marko 12:29-31; 5 Mose 6:4, 5) Yesu kɛ ehe ha kwraa kɛmɔ shi yɛ sɔɔmɔ ni ekɛha Yehowa lɛ kɛ enanemɛi Yudafoi lɛ anitsɔɔmɔ mli. Beni mɛnɛɛmɛi ka akɛ amɛaatsi enaa ni amɛbo nibii babaoo toi lolo lɛ, ekɛɛ amɛ akɛ:
“Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43)
Yesu hi shi akɛ nitsulɔ yɛ sɔɔmɔ krɔŋŋ ni ekɛha lɛ mli, ni ekɛto okadi efɔ shi eha anɔkwa Kristofoi fɛɛ ni amɛnyiɛ sɛɛ.—Okɛto Yohane 5:17 he.
13, 14. (a) Te Yesu bu gbɔmɛi eha tɛŋŋ? (b) Mɛni hewɔ etee eyashiɛ lɛ, ni mɛni hewɔ etsu mɛi krokomɛi hu lɛ? (d) Mɛɛ nɔkwɛmɔ adesai baanyɛ akpa gbɛ yɛ Maŋtsɛyeli lɛ shishi?
13 Yesu jie ehe kpo akɛ mɔ ni yɔɔ suɔmɔ kɛ musuŋtsɔlɛ. Eshwe yɛ etsui mli akɛ eeena akɛ ewebii eye amɛhe kɛjɛ jatsui ni tsii ni mɛi ni nyɛɔ amɛnɔ yɛ jamɔ mli lɛ kɛshwie amɛnɔ lɛ ashishi. No hewɔ lɛ ekɛ amɛ wie Maŋtsɛyeli lɛ he, ni etsu ekaselɔi lɛ ni ekɛɛ amɛ akɛ:
“Shi ni nyɛyaa nɛɛ, nyɛshiɛa nyɛkɛa akɛ: ‘Ŋwɛi maŋtsɛyeli lɛ eshɛ shi eta.’ ”—Mateo 9:35–10:7.
14 Nɛkɛ Maŋtsɛ ni ahala lɛ nɛɛ fɔ̃ gbɔmɛi lɛ anine, ni ekɛɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipa lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.” (Mateo 11:28-30) Ákɛ Nyɔŋmɔ ŋwɛi Maŋtsɛ ni ewo yɛ adesai fɛɛ nɔ lɛ, Yesu baajie nakai musuŋtsɔlɛ lɛ nɔŋŋ kpo, ni ebaakwɛ koni ato e-Maŋtsɛyeli hefatalɔi lɛ ahe gbɛjianɔ, taakɛ efee beni eyɔɔ shikpɔŋ nɔ lɛ, koni amɛkɛ heyeli kɛ nɔkwɛmɔ ni mlihilɛ yɔɔ mli, ni he hiaa adesai lɛlɛŋ lɛ aha amɛ. Mɛi fɛɛ ni baahi shikpɔŋ lɛ nɔ yɛ Yesu Maŋtsɛyeli nɔyeli lɛ shishi lɛ baana hejɔɔmɔ amɛha amɛsusumai lɛ lɛlɛŋ.
TƆMƆ KO BƐ EHE YƐ EMUUYELI MLIHIƐMƆ MLI
15. Mɛɛ gbɛ nɔ Yesu ha Satan mpoatswaa lɛ hetoo jogbaŋŋ kɛmɔ shi yɛ?
15 Nɔ ni fe fɛɛ lɛ, adesai awɔsɛɛ Maŋtsɛ lɛ jie emuuyeli mlihiɛmɔ ni tɔmɔ bɛ mli kɛ toiboo kpo eha eŋwɛi Tsɛ lɛ, kɛtsa nɔ aahu kɛyabote yiwalɛ gbele mli tɔ̃ɔ yɛ sɛŋmɔtso nɔ. Beni nakai ŋmɛlɛtswaa ni abaagbe lɛ lɛ bɛŋkɛɔ lɛ, Yesu sɔle eha Yehowa, ni ekɛɛ: “Ataa, wo ogbɛi lɛ hiɛ nyam!” Kɛkɛ ni Yehowa gbee here nɔ kɛjɛ ŋwɛi akɛ: “Miná miwo ehiɛ nyam, ni masaa mawo ehiɛ nyam ekoŋŋ.” Yesu ha Satan mpoatswaa lɛ hetoo jogbaŋŋ kɛmɔ shi yɛ e-Tsɛ gbɛi lɛ hetsemɔ mli. Eha efee faŋŋ akɛ adesa ni eye emuu lɛ baanyɛ ahiɛ anɔkwayeli mli eha Nyɔŋmɔ yɛ kaa fɛɛ kaa ni henyɛlɔ lɛ kɛbaate shi awo lɛ lɛ shishi. No hewɔ lɛ, Yesu baanyɛ akɛɛ akɛ: “Agbɛnɛ je nɛŋ kojomɔ lɛ eshɛ; kpaako abaafã je nɛŋ lumɔ [Satan] lɛ ashɛ afɔ”—kɛ hiɛgbele kwraa, ni ama nɔ mi hu akɛ eji amalelɔ. Ákɛ ‘onufu lɛ seshi’ lɛ, Yudafoi ajamɔ mli hiɛnyiɛlɔi lɛ kɛ “nanetsitsi” pilamɔ ko ni waa mɔ he baaba Nyɔŋmɔ gbɛjianɔtoo ni tamɔ yoo lɛ “seshi” lɛ nɔ, shi Nyɔŋmɔ baatee e-Bi ni sa jogbaŋŋ nɛɛ shi kɛya mumɔŋ shihilɛ mli.—1 Mose 3:15; Yohane 12:27-31.
16, 17. (a) Mɛni hewɔ wɔbaanyɛ wɔna hekɛnɔfɔɔ ni mli wa yɛ shikpɔŋ lɛ wɔsɛɛ Maŋtsɛ lɛ mli lɛ? (b) Ŋmalɛi lɛ tsɔɔ akɛ paradeiso he hiɛnɔkamɔ lɛ ji nɔ ni yɔɔ diɛŋtsɛ yɛ mɛɛ gbɛ nɔ? (d) Ani esa akɛ otsutsu shihilɛ gbɛ lɛ atsi onaa ni onine akashɛ nakai hiɛnɔkamɔ lɛ nɔ?
16 Jalɛ nifeemɔ ni Yesu sumɔɔ, mlakwamɔ ni enyɛɔ, bɔ ni enaa gbɔmɛi adesai ahe miishɛɛ waa, kɛ nɔ ni fe fɛɛ lɛ, etoiboo ni yɔɔ shiŋŋ ni ekɛfeɔ e-Tsɛ suɔmɔnaa nii kɛwoɔ Yehowa gbɛi lɛ hiɛ nyam lɛ—enɛɛmɛi fɛɛ maa nɛkɛ Bi anɔkwafo nɛɛ nɔ mi akɛ mɔ ni asumɔɔ esane, ni sa akɛ shikpɔŋ lɛ wɔsɛɛ Maŋtsɛ. Ani osumɔŋ ni obote naanɔ wala mli akɛ mɔ ko ni yɔɔ maŋtsɛ ni tamɔ nɛkɛ shishi?
17 Bɔ ni oshihilɛ efee shihilɛ kpakpa aloo shihilɛ gbonyo kɛbashi amrɔ nɛɛ lɛ kɔɔɔ he eko, onine baanyɛ ashɛ nakai naanɔ wala he hiɛnɔkamɔ yɛ shikpɔŋ ni asaa nɔ fɛfɛo lɛ nɔ. Ejaakɛ, aha julɔ ni tsake etsui, ni agbe lɛ afata Yesu he lɛ po nɛkɛ gbohiiashitee he hiɛnɔkamɔ nɛɛ! Beni ekɛɛ Yesu akɛ, “Kaimɔ mi, beni oooba yɛ omaŋtsɛyeli lɛ mli lɛ,” Yesu to he eha lɛ akɛ: “Lɛlɛŋ, miikɛɛ bo ŋmɛnɛ akɛ, Okɛ mi aaahi Paradeiso.” (Luka 23:42, 43, NW) Etsɛŋ ni Paradeiso lɛ baafee nɔ ni yɔɔ diɛŋtsɛ. Ani bo hu okɛ sɔlemɔ miibɔ mɔdɛŋ ni onine ashɛ Maŋtsɛyeli lɛ ‘baa’ lɛ kɛ ejɔɔmɔi lɛ anɔ?
[Mfoniri ni yɔɔ baafa 77]
GBƆMƆ NI FE MƆ FƐƐ MƆ YƐ SHIKPƆŊ NƆ
Ákɛ mɔ ni awo lɛ Maŋtsɛ lɛ, ehiɛ emuuyeli mli kɛtee gbele mli, ni etsɔ ela ni efɔse eshwie shi lɛ nɔ ekpɔ̃ adesai kɛjɛ esha kɛ gbele mli