Nyiɛmɔ Yesu Sɛɛ Daa
1 Yesu kɛɛ yɛ be ko mli akɛ: “Kɛji mɔ ko miisumɔ akɛ enyiɛ misɛɛ lɛ, ha ni ekwa ehe ni ewo esɛŋmɔtso lɛ ni enyiɛ misɛɛ daa.” (Mat. 16:24, NW) Yɛ anɔkwale mli lɛ, wɔmiisumɔ ni wɔkɛ ekãa ahere Yesu wiemɔi lɛ anɔ. Nyɛhaa wɔpɛia nɔ ni wiemɔi kukuji ni ekɛfɔɔ nine lɛ eko fɛɛ eko tsɔɔ lɛ mli.
2 “Ha ni Ekwa Ehe”: Kɛ wɔjɔɔ wɔ wala nɔ wɔha Yehowa lɛ, no tsɔɔ akɛ, wɔkwa wɔhe. Hela wiemɔ ni atsɔɔ shishi akɛ ‘akwa’ lɛ shishinumɔ diɛŋtsɛ ji “ni akɛɛ dabi.” No tsɔɔ akɛ, wɔjɛɔ wɔsuɔmɔ mli wɔŋmɛɛɔ nibii ni wɔtaoɔ, nibii ni wɔsumɔɔ, nibii ni haa wɔnaa miishɛɛ, kɛ pɛsɛmkunya mli nibii ni wɔnyaa he lɛ ahe—ni wɔtswaa wɔfai shi akɛ wɔbaasa Yehowa hiɛ kɛya naanɔi anaanɔ.—Rom. 14:8; 15:3.
3 “Ewo Esɛŋmɔtso Lɛ”: Kristofonyo shihilɛ lɛ ji shihilɛ ko mli ni atereɔ sɛŋmɔtso, ni ji afɔleshaa mli sɔɔmɔ ni akɛhaa Yehowa lɛ. Gbɛ kome ni aaanyɛ atsɔ nɔ ajie he-kɛ-afɔleshaa mumɔ kpo atsɔɔ ji, kɛtsɔ ekãa ni mɔ kɛaatsu nii yɛ sɔɔmɔ nitsumɔ lɛ mli lɛ nɔ. Kɛbashi amrɔ nɛɛ, shiɛlɔi pii miiná gbɛgbalɔi awalɔ nitsumɔ lɛ mli ŋɔɔmɔ afi nɛɛ. Ekolɛ, ofata amɛhe, ni obaanyɛ oma nɔ mi akɛ jɔɔmɔi ni onáa kɛjɛɔ mli lɛ fa fe najiaŋ ni atoɔ bo yɛ afɔlei ni okɛ ohe shaa lɛ mli. Bei babaoo lɛ, mɛi ni nyɛɛɛ asɔmɔ akɛ gbɛgbalɔi awalɔi lɛ toɔ gbɛjianɔ ni amɛkɛ bei pii tsuɔ nii yɛ shiɛmɔ nitsumɔ lɛ mli akɛ asafoŋ shiɛlɔi. Yɛ oti nɛɛ ni yɔɔ amɛjwɛŋmɔ mli hewɔ lɛ, asafoi komɛi miito amɛ kpeei kɛha shiɛmɔyaa lɛ ahe gbɛjianɔ koni amɛya mra fe bɔ ni amɛyaa tsutsu lɛ. Shiɛlɔi babaoo hiɛ sɔɔ be kakadaŋŋ nɛɛ ni amɛkɛtsuɔ nii yɛ shiɛmɔ nitsumɔ lɛ mli lɛ. Mɛi komɛi hu eye omanye jogbaŋŋ kɛmɔ shi, yɛ be mli ni amɛkpɛ amɛyiŋ akɛ amɛbaaya ‘shia kome pɛ mli kɛfata he’ loo ni amɛkɛ ‘minitii fioo ko aaatsu nii kɛfata he’ lɛ.
4 Gbɛ kroko ni atsɔɔ nɔ ajieɔ he-kɛ-afɔleshaa mumɔ kpo atsɔɔ ji kɛtsɔ otii ni mɔ ko kɛaamamɔ ehiɛ lɛ anɔ. Mɛi komɛi ebatsɔmɔ daa gbɛgbalɔi yɛ gbɛjianɔ kpakpa ni amɛtoɔ, kɛ agbɛnɛ, kɛtsɔ amɛ gbɛjianɔtoo ni amɛtsakeɔ mli lɛ nɔ. Mɛi krokomɛi enyɛ eto amɛ shihilɛ he gbɛjianɔ koni amɛkɛ amɛhe aha koni amɛsɔmɔ yɛ Betel loo ákɛ gbɛgbalɔi krɛdɛɛi. Mɛi komɛi eshi kɛtee he ko ni Maŋtsɛyeli shiɛlɔi ahe hiaa waa yɛ lɛ.
5 “Enyiɛ Misɛɛ Daa”: Eyɛ mli akɛ awa Yesu kaselɔi lɛ ayi babaoo moŋ, shi ekãa kɛ tsuishiŋmɛɛ ni eyɔɔ yɛ sɔɔmɔ nitsumɔ lɛ mli lɛ wo amɛ hewalɛ. (Yoh. 4:34) Amɛnáa hewalɛ hee kɛtsɔ le ni amɛle akɛ eyɛ jɛmɛ lɛ kɛ eshɛɛ sane ni ekɛhaa lɛ nɔ. No hewɔ ni mɛi ni nyiɛ esɛɛ lɛ jie anɔkwa miishɛɛ kpo yɛ faŋŋ mli lɛ. (Mat. 11:29) Nyɛhaa wɔwoa wɔteŋ mɔ fɛɛ mɔ hewalɛ nakai nɔŋŋ, koni wɔŋmɛ wɔtsui shi yɛ Maŋtsɛyeli lɛ shiɛmɔ kɛ kaselɔ-feemɔ nitsumɔ ni he hiaa fe fɛɛ lɛ mli.
6 Eba akɛ, wɔ fɛɛ wɔbaatsu Yesu ninefɔɔ akɛ wɔnyiɛ esɛɛ daa lɛ he nii yɛ gbɛ ni ja nɔ, kɛtsɔ he-kɛ-afɔleshaa mumɔ ni wɔɔna lɛ nɔ. Yɛ be mli ni wɔfeɔ nakai lɛ, wɔbaana miishɛɛ babaoo amrɔ nɛɛ, ni wɔbaanyɛ wɔkpa jɔɔmɔi babaoo diɛŋtsɛ po gbɛ yɛ wɔsɛɛ be mli.