5. Te obaatsɔɔ tsakemɔ lɛ mli oha tɛŋŋ yɛ bo diɛŋtsɛ owiemɔ mli lɛ?

⁵ Tsakemɔ lɛ ji gbalɛ mli nifeemɔ. Yesu kɛɛ akɛ: “Gbɔmɔ bi lɛ baaba yɛ etsɛ anunyam lɛ mli kɛ ebɔfoi lɛ . . . Lɛɛlɛŋ, miikɛɛ nyɛ akɛ: Mɛi komɛi yɛ mɛi ni damɔ biɛ nɛɛ ateŋ ní amɛsaŋ amɛnaa gbele kɛyashi beyinɔ ní amɛaana gbɔmɔ bi lɛ miiba yɛ emaŋtsɛyeli lɛ mli.” (Mateo 16:27, 28) Ani bɔfoi lɛ ekomɛi na Yesu lɛɛlɛŋ ní eeba yɛ e-Maŋtsɛyeli lɛ mli? Mateo 17:1-7 kɛɔ akɛ: “Ni no sɛɛ gbii ekpaa lɛ Yesu ŋɔ Petro kɛ Yakobo kɛ enyɛmi Yohane, ni ekɛ amɛ tee gɔŋ ni kwɔ ko nɔ yɛ afã. Ni esu tsake yɛ amɛhiɛ.” Mɛɛ nifeemɔ ni yɔɔ naakpɛɛ nɛ! “Ehiɛ kpɛ́ tamɔ hulu, ni etadei lɛ yɛ́ tamɔ la. Ni naa, Mose kɛ Elia bajie amɛhe kpo tsɔɔ amɛ, ni amɛkɛ lɛ wie.” Agbɛnɛ hu “atatu hãlaŋŋ ko bakete amɛnɔ,” ni amɛnu Nyɔŋmɔ diɛŋtsɛ gbee ni miikɛɛ, akɛ: “Mɔnɛ ji misuɔmɔ bi ní mináa ehe tsui lɛ; nyɛboa lɛ toi! Ni beni kaselɔi lɛ nu lɛ, amɛkɛ amɛhiɛ bumɔ shi, ni amɛshe gbeyei naakpa. Ni Yesu ba ni ebatara amɛhe ekɛɛ: Nyɛtea shi, nyɛkashea gbeyei!”

 7. Te wɔfeɔ tɛŋŋ wɔleɔ akɛ, Petro kai tsakemɔ lɛ mli nɔ fɛɛ nɔ?

⁷ Tsakemɔ lɛ ye ebua kɛwaje bɔfoi etɛ lɛ, ní baatsu hiɛnyiɛmɔ gbɛhei ahe nii yɛ Kristofoi asafo lɛ mli lɛ ahemɔkɛyeli. Kristo hiɛ ní kpɛlɛ kaŋkaŋ, kɛ etadei ní yɛ́ futafuta, kɛ Nyɔŋmɔ diɛŋtsɛ gbee ní kɛɛ akɛ Yesu ji E-suɔmɔ Bi ní esa akɛ amɛbo lɛ toi—nɛɛ fɛɛ tsu yiŋtoo ni yɔɔ sɛɛ lɛ he nii kɛmɔ shi jogbaŋŋ. Shi esaaa akɛ bɔfoi lɛ gbaa ninaa lɛ amɛtsɔɔ mɔ ko mɔ ko kɛyashi be mli ni abaatee Yesu shi. Aaafee afii 32 sɛɛ lɛ, no mli lɛ ninaa nɛɛ yɛ Petro jwɛŋmɔ mli jogbaŋŋ lolo. Beni egbalaa jwɛŋmɔ kɛyaa nɔ kɛ bɔ ni ehe hiaa lɛ nɔ lɛ, eŋma akɛ: “Ejaakɛ jeee adesãi ni atã yɛ ŋaa mli asɛɛ wɔnyiɛ wɔjaje wɔ-Nuntsɔ Yesu Kristo hewalɛ kɛ ebaa lɛ he sane wɔtsɔɔ nyɛ, shi moŋ wɔji odasefoi ni na enunyam kpeteŋkpele lɛ kɛ wɔhiŋmɛii. Ejaakɛ ená woo kɛ anunyam kɛjɛ tsɛ Nyɔŋmɔ lɛ ŋɔɔ, beni nakai gbee lɛ jɛ anunyam kpeteŋkpele lɛ mli ba eŋɔɔ akɛ: ‘Mɔnɛ ji misuɔmɔ bi, ní mináa ehe tsui lɛ.’ Ni nɛkɛ gbee nɛɛ wɔ diɛŋtsɛ wɔnu akɛ ŋwɛi ejɛ, beni wɔkɛ lɛ yɔɔ gɔŋ krɔŋkrɔŋ lɛ nɔ lɛ.”—2 Petro 1:16-18.