Yitso Nyɔŋma
Toiŋjɔlɛ Lumɔ He Shiwoo Lɛ
1. Mɛɛ niiashikpamɔ adesai ená kɛjɛ Kain beaŋ kɛbaa?
AAAFEE afii akpei ekpaa ní eho nɛ ní afɔ́ klɛŋklɛŋ abifao ni ji adesa lɛ. Egbɛi ji Kain, ni efɔmɔ lɛ ji nɔ̃ krɛdɛɛ ko. No mli lɛ, efɔlɔi, kɛ ŋwɛibɔfoi, kɛ Bɔlɔ lɛ po enako adesa bi abifao dã. Kulɛ abifao ŋmɔŋ ní afɔ́ nɛɛ baanyɛ aha adesai aweku ní yɔɔ fɔbuu shishi lɛ aná hiɛnɔkamɔ. Shi kwɛ bɔ ni ekɛ nijiaŋwujee ba, beni eda ní ebatsɔ gbɔmɔgbelɔ lɛ! (1 Yohane 3:12) Kɛjɛ nakai beaŋ kɛbaa nɛɛ, adesai ena gbɔmɔgbeei krokomɛi babaoo. Akɛni adesai sumɔɔ ní amɛfee efɔŋ hewɔ lɛ, toiŋjɔlɛ bɛ amɛteŋ, loo amɛkɛ Nyɔŋmɔ teŋ.—1 Mose 6:5; Yesaia 48:22.
2, 3. Mɛɛ gbɛkpamɔi Yesu Kristo gbele naa, ni mɛni esa akɛ wɔfee koni wɔnine ashɛ nakai jɔɔmɔi lɛ anɔ?
2 Aaafee afii akpei ejwɛ yɛ Kain fɔmɔ sɛɛ lɛ, afɔ́ abifao kroko hu. Egbɛi ji Yesu, ni lɛ hu efɔmɔ lɛ ji nɔ̃ krɛdɛɛ ko. Oblayoo fro ko fɔ́ lɛ, kɛtsɔ mumɔ krɔŋkrɔŋ lɛ hewalɛ nɔ—no pɛ ji fɔmɔ ni tamɔ nakai yɛ yinɔsane mli. Beni afɔ́ lɛ lɛ, ŋwɛibɔfoi asafoi babaoo ní amɛmli efili amɛ lɛ lá kɛjie Nyɔŋmɔ yi akɛ: “Anunyam aha Nyɔŋmɔ yɛ ŋwɛi flooflo, ni hejɔlɛ aba shikpɔŋ lɛ nɔ, ní aná gbɔmɛi ahe tsuijurɔ!” (Luka 2:13, 14) Ákɛ mɔ ni jeee gbɔmɔgbelɔ lɛ, Yesu gbele gbɛ kɛha adesai koni toiŋjɔlɛ aba amɛkɛ Nyɔŋmɔ teŋ, koni amɛná naanɔ wala.—Yohane 3:16; 1 Korintobii 15:55.
3 Yesaia gba efɔ̃ shi akɛ abaatsɛ́ Yesu akɛ “Hejɔlɛ lumɔ.” (Yesaia 9:5) Ekɛ lɛ diɛŋtsɛ ewala baaha yɛ adesai ahewɔ, koni no aha amɛnyɛ amɛná eshaifaa. (Yesaia 53:11) Ŋmɛnɛ, wɔbaanyɛ wɔdamɔ Yesu Kristo mli hemɔkɛyeli nɔ wɔná wɔkɛ Nyɔŋmɔ teŋ toiŋjɔlɛ kɛ eshaifaa. Shi nɛkɛ jɔɔmɔi nɛɛ diɛŋtsɛ baaa kɛkɛ. (Kolosebii 1:21-23) Esa akɛ mɛi ní sumɔɔ ní amɛná jɔɔmɔi nɛɛ akase ní amɛbo Yehowa Nyɔŋmɔ toi. (1 Petro 3:11; okɛto Hebribii 5:8, 9 he.) Yɛ Yesaia gbii lɛ amli lɛ, Israel kɛ Yuda fɛɛ tsuuu nɔ ni ataoɔ nɛɛ he nii kwraa.
Daimonioi Aŋɔɔ ni Ayaa
4, 5. Mɛni ji shihilɛ ni yɔɔ Yesaia gbii lɛ amli, ni namɔ ŋɔɔ mɛi komɛi tsɔ amɛhe kɛtee?
4 Amɛtoigbele lɛ hewɔ lɛ, Yesaia yinɔbii lɛ yɛ jeŋba shihilɛ ni ehiii kwraa, ni ji mumɔŋ duŋ kpii shihilɛ diɛŋtsɛ mli. Yuda wuoyigbɛ maŋtsɛyeli lɛ, ni ji he ni Nyɔŋmɔ sɔlemɔtsu lɛ yɔɔ lɛ diɛŋtsɛ po bɛ toiŋjɔlɛ. Yɛ anɔkwa ní amɛyeee nɛɛ hewɔ lɛ, Ashurbii lɛ atutuamɔ bawo Yuda maŋ lɛ mli bii lɛ ahe gbeyei, ni jaramɔ bei kã amɛhiɛ kɛmiiba. Namɔ ŋɔɔ amɛbaaya kɛha yelikɛbuamɔ? Dɔlɛ sane ji akɛ, amɛteŋ mɛi pii tsɔ amɛhe kɛtee Satan ŋɔɔ, jeee Yehowa ŋɔɔ. Dabi, amɛkɛ Satan gbɛi bolɔɔɔ amɛtsɛɛɛ lɛ. Shi moŋ, taakɛ blema Maŋtsɛ Saul fee lɛ, amɛkɛ amɛhe woɔ mumɔi atsɛmɔ nifeemɔi amli, ni amɛtaoɔ amɛnaagbai lɛ anaa tsabaa kɛtsɔɔ kaa ní amɛkaa akɛ amɛkɛ gbohii lɛ aaawie lɛ nɔ.—1 Samuel 28:1-20.
5 Mɛi komɛi po woɔ nifeemɔ nɛɛ he hewalɛ. Yesaia gbala jwɛŋmɔ kɛtee hemɔkɛyeli kwamɔ nɛɛ nɔ ni ekɛɛ akɛ: “Kɛji amɛkɛɛ nyɛ akɛ: Nyɛyabia okɔmfoi kɛ klamɔi ni wieɔ gugɔ̃jiaŋ kɛ akroma gbee lɛ anii lɛ [nyɛkɛa amɛ akɛ]: Aso esaaa akɛ maŋ ko aaabi e-Nyɔŋmɔ nii? aloo gbohii moŋ anii abiɔ ahaa hiɛkãlɔi?” (Yesaia 8:19) Okɔmfoi baanyɛ “[awie] gugɔ̃jiaŋ kɛ akroma gbee,” ní amɛkɛlaka gbɔmɛi. Abaanyɛ afee gbee ní akɛwieɔ yɛ nɛkɛ gbɛ nɔ, ní akɛɔ akɛ eji gbohii lɛ amumɔi agbeei lɛ, kɛtsɔ hiɛkãlɔi agbee ní akɛaawie ní anaaa akɛ amɛ amɛwieɔ lɛ nɔ. Shi, bei komɛi lɛ, ekolɛ daimonioi lɛ kɛ amɛhe baawo mli tɛ̃ɛ, ni amɛbaaŋɔ mɔ ní egbo lɛ su pɛpɛɛpɛ, taakɛ anaa faŋŋ akɛ eba beni Saul yabi okɔmfo ko ni yɔɔ Endor lɛ nii lɛ.—1 Samuel 28:8-19.
6. Mɛni hewɔ Israelbii ní kɛ amɛhe yawo mumɔi atsɛmɔ nifeemɔi amli lɛ sa shwamɔ waa lɛ?
6 Enɛɛmɛi fɛɛ miiya nɔ yɛ Yuda, yɛ anɔkwale ni eji akɛ Yehowa egu mumɔi atsɛmɔ nifeemɔi kwraa lɛ fɛɛ sɛɛ. Yɛ Mose Mla lɛ mli lɛ, eji mlatɔmɔ ní kɛ gbele toigbalamɔ baa. (3 Mose 19:31; 20:6, 27; 5 Mose 18:9-12) Mɛni hewɔ gbɔmɛi ni ji Yehowa nii krɛdɛɛ lɛ tɔ̃ɔ tɔmɔ ní hiɛdɔɔ yɔɔ mli tamɔ nɛkɛ? Ejaakɛ amɛkpoo Yehowa Mla kɛ eŋaawoo lɛ, ni amɛkɛ ‘esha shishiumɔ lɛ ewaje amɛhe.’ (Hebribii 3:13) “Amɛtsui eti tamɔ fɔ,” ni amɛtsɔmɔ mɛi ní etsi amɛhe kɛjɛ amɛ-Nyɔŋmɔ lɛ he.—Lala 119:70.a
7. Mɛi pii kaseɔ Israelbii ní hi shi yɛ Yesaia gbii lɛ amli lɛ ŋmɛnɛ yɛ mɛɛ gbɛ nɔ, ni kɛ́ gbɔmɛi nɛɛ tsakeee amɛtsui lɛ, te amɛwɔsɛɛ be baafee tɛŋŋ?
7 Ekolɛ amɛsusu akɛ, ‘Mɛɛ sɛɛnamɔ yɔɔ Yehowa Mla lɛ he, beni Ashurbii lɛ baa amɛbatutua wɔ nɛɛ?’ Amɛmiitao amanehulu ní kã amɛhiɛ lɛ naa tsabaa ní yɔɔ oya kɛ mlɛo, ni amɛsumɔɔɔ ní amɛmɛ Yehowa ní ebatsu eyiŋtoo he nii. Yɛ wɔgbii nɛɛ amli hu lɛ, mɛi babaoo kpooɔ Yehowa mla lɛ ni amɛtaoɔ mumɔi atsɛlɔi asɛɛgbɛ, amɛyaa ŋulamiiaŋkwɛlɔi aŋɔɔ, ni amɛkɛ amɛhe woɔ ŋkunyaayeli gbɛ̀i krokomɛi amli ákɛ amɛkɛmiitao amɛnaagbai lɛ anaa tsabaa. Shi, jwɛŋmɔ bɛ mli ŋmɛnɛ ákɛ hiɛkãlɔi aaatao hetooi kɛjɛ gbohii adɛŋ tamɔ bɔ ni eji yɛ nakai beaŋ hu lɛ. Mɔ fɛɛ mɔ ní kɛ ehe woɔ nibii nɛɛ amli ní eshwaaa ehe lɛ wɔsɛɛ be baafee tamɔ “awuiyelɔi kɛ ajwamaŋbɔlɔi kɛ . . . wɔŋjalɔi kɛ amalelɔi fɛɛ” awɔsɛɛ. Amɛbɛ wala he gbɛkpamɔ ko kwraa kɛha wɔsɛɛ.—Kpojiemɔ 21:8.
Nyɔŋmɔ “Mla lɛ kɛ Odase Lɛ”
8. Mɛni ji “mla lɛ” kɛ “odase lɛ” ní esa akɛ wɔtao gbɛtsɔɔmɔ kɛjɛ mli ŋmɛnɛ lɛ?
8 Akɛ Yehowa mla ní guɔ mumɔi atsɛmɔ, kɛ kitai krokomɛi ní eshwɛ lɛ eteee yɛ Yuda. Aŋmala ashwie shi ni akɛbaa yi. Ŋmɛnɛ, nine nyɛɔ shɛɔ e-Wiemɔ muu lɛ fɛɛ nɔ ákɛ wolo ní aŋma afɔ̃ shi. No ji Biblia lɛ, ni jeee ŋwɛi mlai kɛ akpɔi ní abua naa pɛ kɛkɛ yɔɔ mli, shi moŋ bɔ ni Nyɔŋmɔ kɛ ewebii lɛ ye ha lɛ hu he saji yɛ mli. Nɛkɛ Biblia mli sane ní tsɔɔ Yehowa nifeemɔi nɛɛ feɔ odaseyeli, loo nɔmimaa, ní tsɔɔ wɔ bɔ ni Yehowa ji kɛ esui ahe saji. Yɛ nɔ najiaŋ ní amɛaabi gbohii anii lɛ, nɛgbɛ kulɛ esa akɛ Israelbii lɛ aya kɛha gbɛtsɔɔmɔ? Yesaia haa hetoo akɛ: “Mla lɛ kɛ odase lɛ!” (Yesaia 8:20a) Hɛɛ, esa akɛ mɛi ní taoɔ anɔkwa sɛɛyoomɔ lɛ aya Nyɔŋmɔ Wiemɔ ní aŋma lɛ mli.
9. Ani wiemɔi ní atsɛ́ɔ yisɛɛ kɛjɛɔ Biblia lɛ mli yɛ be kɛ bei amli lɛ he yɛ sɛɛnamɔ kɛha eshafeelɔi ní tsakeee amɛtsui lɛ?
9 Israelbii komɛi ní kɛ amɛhe woɔ mumɔi atsɛmɔ nifeemɔi amli lɛ baanyɛ akɛɛ akɛ amɛyɛ bulɛ kɛha Nyɔŋmɔ Wiemɔ ní aŋma lɛ. Shi nɛkɛ wiemɔi nɛɛ ji wiemɔi foji kɛ osatofeemɔ. Yesaia kɛɔ akɛ: “Kɛji amɛwieee nɛkɛ wiemɔ nɛɛ lɛ, no lɛ je tsɛreŋ amɛ.” (Yesaia 8:20b) Mɛɛ wiemɔ Yesaia tsɔɔ lɛ? Ekolɛ eetsɔɔ wiemɔ ni ji: “Mla lɛ kɛ odase lɛ!” Eeenyɛ efee akɛ ekolɛ Israelbii hemɔkɛyeli kwalɔi komɛi tsɛ́ɔ Nyɔŋmɔ Wiemɔ lɛ yisɛɛ, taakɛ bɔ ni hemɔkɛyeli kwalɔi kɛ mɛi krokomɛi nyɛɔ amɛtsɛ́ɔ Ŋmalɛi ayisɛɛ lɛ. Shi wiemɔ folo kɛkɛ nɛ. Ŋmalɛ yisɛɛ ní amɛtsɛ́ɔ kɛkɛ lɛ haŋ ‘je atsɛre amɛ,’ loo amɛná sɛɛyoomɔ kɛjɛ Yehowa ŋɔɔ, kɛji Yehowa suɔmɔnaa nifeemɔ kɛ amɛhe ní amɛaatsi kɛaajɛ nifeemɔi ni he tseee lɛ ahe lɛ fataaa he.b
“Jeee Aboloo Hɔmɔ”
10. Yuda maŋ lɛ mli bii lɛ miina amanehulu yɛ Yehowa ní ekpoo lɛ lɛ hewɔ yɛ mɛɛ gbɛ nɔ?
10 Yehowa nɔ toigbele kɛ mumɔŋ duŋ shihilɛ baa. (Efesobii 4:17, 18) Yɛ mumɔŋ shishinumɔ naa lɛ, Yuda maŋ lɛ mli bii lɛ etsɔmɔ shwilafoi, amɛbɛ sane shishinumɔ. (1 Korintobii 2:14) Yesaia wie amɛshihilɛ lɛ he akɛ: “Amɛaatsɔ mli kɛaaho, ni aaawa aha amɛ ni hɔmɔ aaaye amɛ.” (Yesaia 8:21a) Yɛ anɔkwa ní maŋ lɛ yeee—titri lɛ yɛ Maŋtsɛ Ahaz nɔyeli beaŋ—lɛ hewɔ lɛ, shihilɛ mli ní Yuda baaya nɔ ahi ákɛ maŋtsɛyeli ní yeɔ ehe lɛ ebaje oshara mli. Henyɛlɔi ebɔle maŋ lɛ he kɛkpe. Ashurbii asraafoi miitutua Yuda maŋ kome kɛmiinyiɛ ekroko sɛɛ. Henyɛlɔi lɛ miifite shikpɔŋ kpakpa ní baa nii lɛ, ni no kɛ hɔmɔ miiba. Mɛi pii yɛ ní nibii amli ‘wa ha amɛ ni hɔmɔ miiye amɛ.’ Shi hɔmɔ kroko hu eba shikpɔŋ lɛ nɔ. Amos gba efɔ̃ shi yɛ afii nyɔŋmai abɔ ní etsɔ hiɛ lɛ mli akɛ: “Naa, gbii miiba, Nuntsɔ Yehowa kɛɛ, ni maha hɔmɔ aba shikpɔŋ lɛ nɔ, jeee aboloo hɔmɔ loo nu kumai ni, shi Yehowa wiemɔi lɛ atoiboo nɔ̃ ni!” (Amos 8:11) Amrɔ nɛɛ mumɔŋ hɔmɔ ní tamɔ nɛkɛ miiye Yuda!
11. Ani Yuda baakase nii kɛjɛ tsɔsemɔ ní akɛhaa lɛ lɛ mli?
11 Ani Yuda baakase nii kɛjɛ enɛ mli ní eku esɛɛ kɛba Yehowa ŋɔɔ? Ani emli bii lɛ baatsi amɛhe kɛjɛ mumɔi atsɛmɔ nifeemɔi kɛ wɔŋjamɔ he ní amɛku amɛsɛɛ kɛba “mla lɛ kɛ odase lɛ” he? Yehowa tsɔ hiɛ ena bɔ ni amɛbaafee amɛnii amɛha lɛ akɛ: “Aaaba mli akɛ, beni hɔmɔ yeɔ amɛ lɛ, amɛmli aaawo amɛhe la, ni amɛaalomɔ amɛmaŋtsɛ kɛ amɛ-Nyɔŋmɔ lɛ, ni amɛaatsɔmɔ amɛhiɛ kɛaatee ŋwɛi.” (Yesaia 8:21b) Hɛɛ, mɛi pii baashwa amɛmaŋtsɛ ni ji adesa lɛ akɛ lɛ enyiɛ amɛhiɛ kɛyabote nɛkɛ shihilɛ nɛɛ mli. Mɛi komɛi po kɛ kwashiafeemɔ baashwa Yehowa yɛ amɛmanehului lɛ ahewɔ! (Okɛto Yeremia 44:15-18 he.) Ŋmɛnɛ, mɛi pii feɔ amɛnii tamɔ nakai nɔŋŋ, ni amɛshwaa Nyɔŋmɔ yɛ amanehului ní adesai anɔ fɔŋ feemɔ kɛbaa lɛ he.
12. (a) Yuda he ní etsi kɛjɛ Nyɔŋmɔ he lɛ kɛ mɛni ba enɔ? (b) Mɛɛ sanebimɔi ni he hiaa teɔ shi?
12 Ani loomɔ ní amɛaalomɔ Nyɔŋmɔ lɛ baaha Yuda maŋbii lɛ aná toiŋjɔlɛ? Dabi. Yesaia gba efɔ̃ shi akɛ: “Amɛaakwɛ shikpɔŋ lɛ nɔ hu: ni naa, haomɔ kɛ duŋ kɛ hejaramɔ kpii; ni aaashwie amɛ awo duŋ kabitii mli!” (Yesaia 8:22) Beni amɛhole amɛhiŋmɛii anɔ kɛtee ŋwɛi ní amɛshwa Nyɔŋmɔ sɛɛ lɛ, amɛku sɛɛ amɛkwɛ shikpɔŋ lɛ ekoŋŋ, amɛkwɛ amɛgbɛkpamɔi ní hiɛnɔkamɔ ko bɛ mli lɛ. Amɛhe ní amɛtsi kɛjɛ Nyɔŋmɔ he lɛ kɛ amanehulu ba amɛnɔ. (Abɛi 19:3) Shi, shiwooi ní Nyɔŋmɔ kɛha Abraham, Isak, kɛ Yakob lɛ hu? (1 Mose 22:15-18; 28:14, 15) Ani Yehowa baaku mli? Ani Ashurbii lɛ loo asraafoi ahewalɛ kroko kɛ odehei aseshi ní awo Yuda kɛ David shi yɛ he lɛ baaba naagbee? (1 Mose 49:8-10; 2 Samuel 7:11-16) Ani abaabu Israelbii lɛ fɔ́ awo duŋ mli kɛya naanɔ?
Shikpɔŋ ní ‘Aha Ehiɛ Eshwie Shi’
13. Mɛni ji “jeŋmaji a-Galilea” lɛ, ni mɛɛ gbɛ nɔ tsɔ ni ‘ashwie ehiɛ shi’ lɛ?
13 Agbɛnɛ Yesaia tsĩ tsakemɔi komɛi ní yɔɔ gbeyei ní ba Abraham seshibii lɛ anɔ trukaa lɛ ateŋ ekome ní mli wa fe fɛɛ tã, akɛ: “Duŋ kpii lɛ ekaŋ he ni hejaramɔ yɔɔ nɛɛ! Sá lɛ eha Zebulon shikpɔŋ kɛ Naftali shikpɔŋ lɛ hiɛ shwie shi, shi sɛɛkpee nɛɛ eeewo ehiɛ nyam, yɛ ŋshɔnaa gbɛ lɛ, yɛ Yordan sɛɛ lɛ, jeŋmaji a-Galilea lɛ.” (Yesaia 8:23) Galilea ji shikpɔŋkuku ko ní yɔɔ Israel kooyigbɛ maŋtsɛyeli lɛ mli. Yɛ Yesaia gbalɛ lɛ mli lɛ, “Zebulon shikpɔŋ kɛ Naftali shikpɔŋ lɛ” kɛ “ŋshɔnaa gbɛ lɛ,” ni ji blema gbɛjegbɛ ko ní tsɔɔ Galilea Ŋshɔ lɛ naa kɛyaa Mediteranea Ŋshɔ lɛ naa lɛ hu fata shikpɔŋkuku nɛɛ he. Yɛ Yesaia gbii lɛ amli lɛ, atsɛ́ nakai kpokpaa lɛ akɛ “jeŋmaji a-Galilea,” ekolɛ akɛni mɛi ni amɛjeee Israelbii yɔɔ emaŋtiasei lɛ amli babaoo mli lɛ hewɔ.c Mɛɛ gbɛ nɔ aha shikpɔŋ nɛɛ “hiɛ shwie shi” yɛ? Ashurbii wɔŋjalɔi lɛ baye shikpɔŋ lɛ nɔ kunim, ni amɛŋɔ Israelbii lɛ nom, ni amɛha wɔŋjalɔi, ni amɛjeee Abraham seshibii, bahi nakai kpokpaa lɛ nɔ fɛɛ. Enɛ hewɔ lɛ, akutsei nyɔŋma kooyigbɛ maŋtsɛyeli lɛ laaje kɛjɛ yinɔsane mli ákɛ maŋ pɔtɛɛ ní ale!—2 Maŋtsɛmɛi 17:5, 6, 18, 23, 24.
14. Yuda “duŋ kpii” lɛ shɛŋ akutsei nyɔŋma maŋtsɛyeli lɛ nɔ̃ lɛ yɛ mɛɛ shishinumɔ naa?
14 Yuda hu ebaje Ashurbii lɛ anɔnyɛɛ shishi. Ani ebaaba shi kɛbote “duŋ kpii” ni hiɔ shi daa mli, taakɛ eba lɛ yɛ akutsei nyɔŋma maŋtsɛyeli ní Zebulon kɛ Naftali damɔ shi kɛha lɛ lɛ gbɛfaŋ lɛ? Dabi. Yɛ “sɛɛkpee” lɛ, Yehowa kɛ jɔɔmɔi baaba Yuda wuoyigbɛ maŋtsɛyeli lɛ kpokpai anɔ kɛ shikpɔŋ ní tsutsu lɛ kooyigbɛ maŋtsɛyeli lɛ hu yeɔ nɔ lɛ po nɔ. Yɛ mɛɛ gbɛ nɔ?
15, 16. (a) Mɛɛ “sɛɛkpee” be mli shihilɛ lɛ baatsake kɛha “Zebulon kɛ Naftali niiaŋ” lɛ? (b) Mɛɛ gbɛ nɔ abaatsɔ awo shikpɔŋ ní ashwie ehiɛ shi lɛ hiɛ nyam?
15 Bɔfo Mateo haa sanebimɔ nɛɛ hetoo yɛ Yesu shikpɔŋ nɔ sɔɔmɔ nitsumɔ lɛ he saji ni jɛ mumɔŋ, ní eŋmala eshwie shi lɛ mli. Beni Mateo wieɔ nakai sɔɔmɔ nitsumɔ lɛ shishijee gbii lɛ amli saji ahe lɛ, ewie akɛ: “Ni [Yesu je] Nazaret ebahi Kapernaum ni kã ŋshɔnaa lɛ, yɛ Zebulon kɛ Naftali niiaŋ; koni gbalɔ Yesaia wiemɔ lɛ aba mli akɛ: ‘Zebulon shikpɔŋ kɛ Naftali shikpɔŋ, ŋshɔnaa gbɛ lɛ, yɛ Yordan sɛɛ lɛ, jeŋmaji a-Galilea lɛ, maŋ ni tara duŋ mli lɛ ena la kpeteŋkpele, ni mɛi ni tara gbele shikpɔŋ kɛ ehɔ̃ɔŋ mli lɛ, la ete shi eha amɛ.’”—Mateo 4:13-16.
16 Hɛɛ, “sɛɛkpee nɛɛ” ní Yesaia gba efɔ̃ shi lɛ ji Kristo sɔɔmɔ nitsumɔ be lɛ. Yesu ye eshikpɔŋ nɔ be lɛ mli babaoo yɛ Galilea. Galilea kpokpaa nɔ ji he ni eje esɔɔmɔ nitsumɔ lɛ shishi yɛ, ni ebɔi adafitswaa akɛ: “Ŋwɛi maŋtsɛyeli lɛ ebɛŋkɛ!” (Mateo 4:17) Galilea eyɔɔ, ni ekɛ e-Gɔŋ nɔ Shiɛmɔ ní ehe gbɛi lɛ ha, ni ehala ebɔfoi lɛ, ni efee eklɛŋklɛŋ naakpɛɛ nii, ni ejie ehe kpo etsɔɔ esɛɛnyiɛlɔi aaashɛ 500 yɛ eshitee lɛ sɛɛ lɛ. (Mateo 5:1–7:27; 28:16-20; Marko 3:13, 14; Yohane 2:8-11; 1 Korintobii 15:6) Yesu tsɔ nɛkɛ gbɛ nɔ eha Yesaia gbalɛ lɛ ba mli kɛtsɔ woo ní ekɛha “Zebulon shikpɔŋ kɛ Naftali shikpɔŋ lɛ” nɔ. Shi kɛlɛ, Yesu tsuuu esɔɔmɔ nitsumɔ lɛ yɛ Galileabii lɛ pɛ ateŋ. Yesu tsɔ sanekpakpa lɛ ní eshiɛ yɛ shikpɔŋ lɛ nɔ fɛɛ lɛ nɔ ‘eha akɛ woo ha’ Israel maŋ muu lɛ fɛɛ, ni Yuda hu fata he.
“La Kpeteŋkpele” Lɛ
17. “La kpeteŋkpele” ko kpɛ́ yɛ Galilea yɛ mɛɛ gbɛ nɔ?
17 Shi, “la kpeteŋkpele” ní ana yɛ Galilea, ní Mateo tsĩ tã lɛ hu? Enɛ hu ji wiemɔ ní etsɛ́ yisɛɛ kɛjɛ Yesaia gbalɛ lɛ mli. Yesaia ŋma akɛ: “Maŋ ní nyiɛɔ duŋ mli lɛ ena la kpeteŋkpele; mɛi ní hi gbele hɔ̃ɔŋ shikpɔŋ lɛ nɔ lɛ, la etso amɛnɔ!” (Yesaia 9:1) Beni shɛɔ Ŋ.B. klɛŋklɛŋ afii oha lɛ mli lɛ, no mli lɛ wɔŋjamɔ mli amalei etsĩ anɔkwale la lɛ hiɛ kwraa. Yudafoi ajamɔ mli hiɛnyiɛlɔi lɛ ha naagba lɛ mli wo wu kɛtsɔ amɛjamɔ mli kusumii ní amɛhiɛ mli kpɛŋŋ, ní amɛtsɔ nɔ ‘amɛgu Nyɔŋmɔ kita lɛ’ nɔ. (Mateo 15:6) Anyɛ heshibalɔi lɛ anɔ ni afutu amɛjwɛŋmɔ, ni amɛnyiɛ “gbɛtsɔɔlɔi shwilafoi” asɛɛ. (Mateo 23:2-4, 16) Beni Yesu ni ji Mesia lɛ pue lɛ, heshibalɔi babaoo ahiŋmɛii gbele yɛ naakpɛɛ gbɛ nɔ. (Yohane 1:9, 12) Akadi nitsumɔ ní Yesu tsu beni eyɔɔ shikpɔŋ lɛ nɔ kɛ jɔɔmɔi ní jɛɔ efɔleshaa lɛ mli baa lɛ yɛ gbɛ ní ja nɔ yɛ Yesaia gbalɛ lɛ mli ákɛ “la kpeteŋkpele.”—Yohane 8:12.
18, 19. Mɛɛ yiŋtoo mɛi ní kpɛlɛ la lɛ nɔ lɛ ná kɛha mlifilimɔ kpele lɛ?
18 Mɛi ni kpɛlɛ la lɛ nɔ lɛ ná yiŋtoi babaoo ní amɛaadamɔ nɔ amɛmli afili amɛ. Yesaia tee nɔ akɛ: “Oha jeŋmaŋ lɛ yi efá, oha enyamɔ lɛ eda, amɛmiinya yɛ ohiɛ, tamɔ anyaa yɛ nikpamɔ be mli, tamɔ bɔ ni mɛi amli filiɔ amɛ kɛ́ amɛmiija nomŋɔɔ nii lɛ.” (Yesaia 9:2) Nɔ ni jɛ Yesu kɛ esɛɛnyiɛlɔi lɛ ashiɛmɔ nitsumɔ lɛ mli ba ji akɛ, mɛi ni yɔɔ jalɛ tsui lɛ jie amɛhe kpo, ni amɛtsɔɔ akɛ amɛmiisumɔ ní amɛjá Yehowa yɛ mumɔ kɛ anɔkwale mli. (Yohane 4:24) Yɛ nɔ ni shɛɛɛ afii ejwɛ mli lɛ, gbɔmɛi babaoo kpɛlɛ Kristojamɔ nɔ. Abaptisi mɛi akpei etɛ yɛ Pentekoste gbi lɛ nɔ, yɛ afi 33 Ŋ.B. No sɛɛ etsɛɛɛ lɛ, “hii lɛ ayibɔ aaafee akpei enumɔ.” (Bɔfoi lɛ Asaji 2:41; 4:4) Beni kaselɔi lɛ yaa nɔ amɛkɛ ekãa jieɔ la lɛ kpo amɛtsɔɔ lɛ, “kaselɔi lɛ ayi bafá babaoo diɛŋtsɛ yɛ Yerusalem; ni osɔfoi lɛ tete ateŋ mɛi pii boɔ hemɔkɛyeli lɛ toi.”—Bɔfoi lɛ Asaji 6:7.
19 Taakɛ mɛi ní náa miishɛɛ yɛ nikpamɔ babaoo hewɔ loo mɛi ni mli filiɔ amɛ yɛ nomŋɔɔ nii ajaa mli yɛ asraafoi akunimyeli kpele ko sɛɛ lɛ ji lɛ, Yesu sɛɛnyiɛlɔi lɛ hu amii shɛ amɛhe yɛ shweremɔ ní ba lɛ he. (Bɔfoi lɛ Asaji 2:46, 47) Yɛ be ni sa mli lɛ, Yehowa ha la lɛ kpɛ́ yɛ jeŋmaji lɛ ateŋ. (Bɔfoi lɛ Asaji 14:27) No hewɔ lɛ gbɔmɛi ní jɛ hewolonɔ sui srɔtoi fɛɛ amli ná miishɛɛ akɛ agbele gbɛ ní amɛaatsɔ nɔ amɛbɛŋkɛ Yehowa lɛ aha amɛ.—Bɔfoi lɛ Asaji 13:48.
“Taakɛ Bɔ ni Ofee yɛ Midian Gbi lɛ Nɔ Lɛ”
20. (a) Midianbii lɛ jie amɛhe kpo akɛ Israel henyɛlɔi yɛ mɛɛ gbɛ̀i anɔ, ni mɛɛ gbɛ nɔ Yehowa tsɔ ekɛ hegbeyeiwoo ní amɛkɛbaa lɛ ba naagbee? (b) Yesu kɛ hegbeyeiwoo ní Nyɔŋmɔ webii ahenyɛlɔi lɛ kɛbaa lɛ baaba naagbee wɔsɛɛ be mli “Midian gbi lɛ nɔ” yɛ mɛɛ gbɛ nɔ?
20 Nibii ni jɛ Mesia lɛ nitsumɔ lɛ mli ba lɛ hiɔ shi daa, taakɛ wɔnaa yɛ Yesaia wiemɔi ni nyiɛ sɛɛ lɛ amli lɛ, akɛ: “Amɛjatsu teremɔ tso lɛ kɛ amɛkɔŋ nɔ tso lɛ kɛ amɛkplalɔ lɛ tso lɛ ekumɔ, taakɛ bɔ ni ofee yɛ Midian gbi lɛ nɔ lɛ.” (Yesaia 9:3) Afii ohai abɔ dani Yesaia gbii lɛ aaashɛ lɛ, Midianbii lɛ kɛ Moabbii lɛ kpaŋ akɛ amɛbaalaka Israel kɛya esha mli. (4 Mose 25:1-9, 14-18; 31:15, 16) Sɛɛ mli lɛ, Midianbii lɛ bawo Israelbii lɛ ahe gbeyei kɛtsɔ tutuamɔ ní amɛbatutua amɛ ní amɛhà amɛkrowai kɛ amɛŋmɔshi nibii fɛɛ afii kpawo sɔŋŋ lɛ nɔ. (Kojolɔi 6:1-6) Kɛkɛ ni Yehowa tsɔ etsulɔ Gideon nɔ eye Midian asraafoi lɛ anɔ kunim kwraa. Yɛ nakai “Midian gbi lɛ” sɛɛ lɛ, odaseyeli ko bɛ ní tsɔɔ akɛ Yehowa webii na amanehulu ekoŋŋ yɛ Midianbii lɛ adɛŋ. (Kojolɔi 6:7-16; 8:28) Yɛ wɔsɛɛ be ní ebɛŋkɛ lɛ mli lɛ, Yesu Kristo, ni ji Gideon kpeteŋkpele lɛ, kɛ hiɛkpatamɔ tutuamɔ baaba Yehowa webii ahenyɛlɔi ni yɔɔ ŋmɛnɛŋmɛnɛ beaŋ lɛ anɔ. (Kpojiemɔ 17:14; 19:11-21) Kɛkɛ lɛ, “taakɛ bɔ ni [afee] yɛ Midian gbi lɛ nɔ lɛ,” abaaye kunim kɛmɔ shi kɛya naanɔ, jeee kɛtsɔ adesa ekãafeemɔ ko nɔ, shi moŋ kɛtsɔ Yehowa hewalɛ nɔ. (Kojolɔi 7:2-22) Nyɔŋmɔ webii enaŋ amanehulu yɛ nɔnyɛɛ apã lɛ shishi dɔŋŋ kɔkɔɔkɔ!
21. Mɛni Yesaia gbalɛ lɛ tsɔɔ yɛ tawuu wɔsɛɛ be he?
21 Ŋwɛi hewalɛ kpojiemɔi lɛ jeee ta hiɛnyamwoo. Yesu ní atee lɛ shi lɛ ji Toiŋjɔlɛ Lumɔ lɛ, ni ebaatsɔ ehenyɛlɔi lɛ ahiɛ ní eeekpata kwraa lɛ nɔ ekɛ naanɔ toiŋjɔlɛ aba. Agbɛnɛ Yesaia wie asraafoi anibii ní akɛwuɔ ta lɛ ahe akɛ akɛ la ekpata fɛɛ hiɛ kwraa, akɛ: “Aspaatre fɛɛ aspaatre ní tawulɔi woɔ kɛshimɔɔ shi yɛ ta gidigidifeemɔ mli lɛ kɛ atade ni wuɔ shi yɛ lá mli lɛ, shã abaashã, ni eeetsɔ la niyenii.” (Yesaia 9:4) Anuŋ hosomɔ ní asraafoi ní shiɔ ako lɛ aspaatrei lɛ hosoɔ shikpɔŋ lɛ he dɔŋŋ kɔkɔɔkɔ. Anaŋ tabilɔi ní tawuu ewaje amɛ jogbaŋŋ lɛ atadei ní lá ekpá mli kpɔtɔɔ lɛ dɔŋŋ. Awuŋ ta dɔŋŋ!—Lala 46:10.
‘Naakpɛɛ Ŋaawolɔ’
22. Mɛɛ gbalɛ mli gbɛi ni hiɛ fãi babaoo akɛha Yesu yɛ Yesaia wolo lɛ mli?
22 Beni afɔ́ lɛ yɛ naakpɛɛ gbɛ nɔ lɛ, awo mɔ ni afɔ́ lɛ ákɛ Mesia lɛ gbɛi akɛ Yesu, ni shishinumɔ ji “Yehowa Ji Yiwalaheremɔ.” Shi eyɛ gbɛi krokomɛi hu, gbalɛ mli gbɛi ní tsɔɔ nitsumɔ titri ní ebaatsu kɛ egbɛhe ní awó nɔ lɛ. Gbɛi nɛɛ ateŋ ekome ji Imanuel, ni shishinumɔ ji “Nyɔŋmɔ Kɛ Wɔ Yɛ.” (Yesaia 7:14, NW, shishigbɛ niŋmaa) Agbɛnɛ Yesaia wie gbalɛ mli gbɛi kroko hu he akɛ: “Áfɔ́ bi fufɔoo aha wɔ, aha wɔ binuu hu; ni elumɔyeli lɛ aaakã ekɔŋ nɔ, ni aaatsɛ́ egbɛi akɛ Naakpɛɛ, Ŋaawolɔ, Nyɔŋmɔ hewalɔ, Naanɔ tsɛ kɛ Hejɔlɛ lumɔ.” (Yesaia 9:5) Susumɔ shishinumɔ kpele ni nɛkɛ gbalɛ mli gbɛi ní fãi srɔtoi nɛɛ hiɛ lɛ he okwɛ.
23, 24. (a) Yesu ji “Naakpɛɛ, Ŋaawolɔ” yɛ mɛɛ gbɛ nɔ? (b) Kristofoi ŋaawolɔi baanyɛ akase Yesu nɔkwɛmɔnɔ lɛ ŋmɛnɛ yɛ mɛɛ gbɛ nɔ?
23 Ŋaawolɔ ji mɔ ko ní kɛ ŋaawoo haa, loo ewieɔ etsɔɔ mɔ. Beni Yesu Kristo yɔɔ shikpɔŋ nɔ lɛ, ekɛ ŋaawoo ni yɔɔ naakpɛɛ ha. Wɔkaneɔ yɛ Biblia lɛ mli akɛ “mɛi lɛ ahe jɔ̃ amɛhe yɛ enitsɔɔmɔ lɛ hewɔ.” (Mateo 7:28) Eji Ŋaawolɔ ni yɔɔ nilee kɛ mlitsɔlɛ, kɛ adesai asu kɛ baŋ lɛ he shishinumɔ ní ekaaa. Eŋaawoo lɛ jeee hiɛkamɔi loo toigbalamɔ pɛ. Bei pii lɛ, ekɛhaa ákɛ gbɛtsɔɔmɔ kɛ wiemɔ kɛ tsɔɔmɔ ni suɔmɔ yɔɔ mli. Yesu ŋaawoo lɛ yɛ naakpɛɛ ejaakɛ nilee yɛ mli, ni eye emuu be fɛɛ be, ni tɔmɔ ko kwraa bɛ he. Kɛ́ anyiɛ sɛɛ lɛ, ekɛ mɔ yaa naanɔ wala mli.—Yohane 6:68.
24 Jeee akɛ Yesu ŋaawoo lɛ jɛ ejwɛŋmɔ ní hiɛ kã shi waa mli kɛkɛ. Shi moŋ, ekɛɔ akɛ: “Minitsɔɔmɔ lɛ, jeee minɔ̃ŋ, shi moŋ mɔ ni tsu mi lɛ nɔ̃ŋ.” (Yohane 7:16) Taakɛ eji yɛ Salomo gbɛfaŋ lɛ, Yehowa Nyɔŋmɔ ji Yesu nilee lɛ Jɛɛhe. (1 Maŋtsɛmɛi 3:7-14; Mateo 12:42) Esa akɛ Yesu nɔkwɛmɔnɔ lɛ akanya tsɔɔlɔi kɛ ŋaawolɔi ní yɔɔ Kristofoi asafo lɛ mli lɛ ní amɛha amɛgbɛtsɔɔmɔi lɛ adamɔ Nyɔŋmɔ Wiemɔ lɛ nɔ be fɛɛ be.—Abɛi 21:30.
“Nyɔŋmɔ Hewalɔ” kɛ “Naanɔ Tsɛ”
25. Mɛni ji nɔ ni gbɛi “Nyɔŋmɔ hewalɔ” lɛ kɛɔ wɔ yɛ Yesu ní yɔɔ ŋwɛi lɛ he?
25 Yesu ji “Nyɔŋmɔ hewalɔ” kɛ “Naanɔ tsɛ” hu. Enɛ etsɔɔɔ akɛ eheɔ Yehowa, mɔ ni ji “wɔtsɛ Nyɔŋmɔ” lɛ hegbɛ kɛ egbɛhe lɛ kɛjɛɔ edɛŋ. (2 Korintobii 1:2) “[Yesu] ebuuu egbɔ ní ekɛ Nyɔŋmɔ ye lɛ akɛ nihaa nii.” (Filipibii 2:6) Atsɛɔ lɛ Nyɔŋmɔ Hewalɔ, jeee Nyɔŋmɔ Ofe. Yesu susuuu lɛ diɛŋtsɛ ehe kɔkɔɔkɔ akɛ Nyɔŋmɔ Ofe, ejaakɛ ewie e-Tsɛ lɛ he akɛ “anɔkwa Nyɔŋmɔ kome lɛ,” ni tsɔɔ akɛ, lɛ pɛ ji Nyɔŋmɔ ní esa akɛ ajá lɛ. (Yohane 17:3; Kpojiemɔ 4:11) Yɛ Ŋmalɛi lɛ amli lɛ, wiemɔ “nyɔŋmɔ” lɛ shishinumɔ baanyɛ afee “hewalɔ” aloo “mɔ ni he wa.” (2 Mose 12:12; Lala 8:6; 2 Korintobii 4:4) Dani Yesu baaba shikpɔŋ nɔ lɛ, no mli lɛ eji “nyɔŋmɔ ko,” ni “Nyɔŋmɔ su lɛŋ eyɔɔ.” Yɛ eshitee lɛ sɛɛ lɛ, eku esɛɛ kɛtee gbɛhe ní nɔ kwɔ fe nakai po mli yɛ ŋwɛi. (Yohane 1:1; Filipibii 2:6-11) Kɛfata he lɛ, gbɛi ni ji “nyɔŋmɔ” lɛ hiɛ shishinumɔ kroko hu. Atsɛ́ kojolɔi ni hi Israel lɛ akɛ “nyɔŋmɔi”—Yesu diɛŋtsɛ tsɛ́ amɛ nakai shikome. (Lala 82:6; Yohane 10:35) Yesu ji Kojolɔ ni Yehowa ehala lɛ, “ní baaba ebakojo hiɛkalɔi kɛ gbohii.” (2 Timoteo 4:1; Yohane 5:30) Eyɛ faŋŋ akɛ, gbɛi ní awo lɛ ákɛ Nyɔŋmɔ Hewalɔ lɛ sa jogbaŋŋ.
26. Mɛni hewɔ abaanyɛ atsɛ́ Yesu akɛ “Naanɔ tsɛ” lɛ?
26 Sabala ni ji “Naanɔ tsɛ” lɛ kɔɔ hewalɛ kɛ hegbɛ ní Mesia Maŋtsɛ lɛ yɔɔ ní ekɛaaha adesai naanɔ wala he gbɛkpamɔ yɛ shikpɔŋ nɔ lɛ he. (Yohane 11:25, 26) Gboshinii ní wɔ klɛŋklɛŋ fɔlɔ, Adam shi eha wɔ ji gbele. Yesu, ni ji naagbee Adam lɛ, “tsɔ mumɔ ni haa mɔ yi náa wala.” (1 Korintobii 15:22, 45; Romabii 5:12, 18) Taakɛ bɔ ni Yesu, ni ji Naanɔ Tsɛ lɛ, baahi shi kɛya naanɔ lɛ, nakai nɔŋŋ adesai toibolɔi lɛ hu baaná amɛtsɛ ni eji lɛ he sɛɛ kɛya naanɔ.—Romabii 6:9.
“Hejɔlɛ Lumɔ”
27, 28. Mɛɛ sɛɛnamɔi ni yɔɔ naakpɛɛ baa “Hejɔlɛ lumɔ” lɛ shishibii lɛ anɔ bianɛ kɛ wɔsɛɛ be mli hu?
27 Yɛ naanɔ wala sɛɛ lɛ, toiŋjɔlɛ hu he hiaa gbɔmɔ, yɛ ekɛ Nyɔŋmɔ, kɛ ekɛ enaanyo gbɔmɔ hu teŋ. Ŋmɛnɛ po, mɛi ní baa amɛhe shi amɛhaa “Hejɔlɛ lumɔ” lɛ nɔyeli lɛ ‘kɛ amɛklantei esɔ̃ kɔii ni amɛkɛ amɛkpɔlɔi hu esɔ̃ adedai.’ (Yesaia 2:2-4) Amɛnaaa mɛi ahe hetsɛ yɛ maŋkwramɔ, shikpɔŋkuku, hewolonɔ su, loo shika gbɛfaŋ béi ahewɔ. Amɛfee ekome yɛ anɔkwa Nyɔŋmɔ koome, ni ji Yehowa jamɔ mli, ni amɛbɔɔ mɔdɛŋ akɛ amɛaaha toiŋjɔlɛ wekukpaa ahi amɛkɛ amɛnanemɛi gbɔmɛi ateŋ, yɛ asafo lɛ mli kɛ esɛɛ fɛɛ.—Galatabii 6:10; Efesobii 4:2, 3; 2 Timoteo 2:24.
28 Yɛ Nyɔŋmɔ diɛŋtsɛ be ní sa mli lɛ, Kristo baato toiŋjɔlɛ ní baakpele jeŋ muu fɛɛ, ní baama shi shiŋŋ kɛya naanɔ yɛ shikpɔŋ nɔ lɛ shishi. (Bɔfoi lɛ Asaji 1:7) “Elumɔyeli lɛ shweremɔ kɛ hejɔlɛ lɛ sɛɛ efoŋ yɛ David maŋtsɛsɛi lɛ nɔ kɛ emaŋtsɛyeli lɛ nɔ, ni ekɛ kojomɔ kɛ jalɛ aaaha ema shi shiŋŋ ni eeewo lɛ hewalɛ kɛjɛ ŋmɛnɛ nɔ aahu kɛyashi naanɔ.” (Yesaia 9:6a) Yesu kɛ yiwalɛ tsuŋ nii, yɛ be mli ní ekɛ hegbɛ ni eyɔɔ ákɛ Toiŋjɔlɛ Lumɔ lɛ yeɔ nɔ lɛ. Eheŋ heyeli ní eshishibii lɛ yɔɔ ní amɛkɛaahala nɔ ni amɛsumɔɔ lɛ kɛjɛŋ amɛdɛŋ ní ekɛ nɔnyɛɛ aye amɛnɔ. Shi moŋ, nɔ fɛɛ nɔ ní ebaatsu lɛ baaba yɛ “kojomɔ kɛ jalɛ” naa. Mɛɛ tsakemɔ ní haa mɔ hejɔɔmɔ po nɛ!
29. Kɛ́ wɔmiisumɔ ní wɔná jɔɔmɔ ni ji naanɔ toiŋjɔlɛ mli ŋɔɔmɔ lɛ, mɛni esa akɛ wɔfee?
29 Yɛ nibii ni yɔɔ naakpɛɛ ní Yesu gbalɛ mli gbɛi lɛ tsɔɔ lɛ hewɔ lɛ, bɔ ni Yesaia mu egbalɛ lɛ fã nɛɛ naa eha lɛ yɛ miishɛɛ waa lɛɛlɛŋ. Eŋma akɛ: “Yehowa Zebaot hiɛdɔɔ lɛ aaafee enɛ.” (Yesaia 9:6b) Hɛɛ, Yehowa feɔ nii kɛ hiɛdɔɔ. Efeee nɔ ko kɛ tsui fã-kɛ-fã. Wɔbaanyɛ wɔná nɔmimaa akɛ nɔ fɛɛ nɔ ní ewoɔ shi lɛ, ebaatsu he nii kɛmɔ shi. Belɛ, kɛ́ mɔ ko miishwe ní ená naanɔ toiŋjɔlɛ mli ŋɔɔmɔ lɛ, no lɛ ha ní esɔmɔ Yehowa kɛ etsui muu fɛɛ. Taakɛ Yehowa Nyɔŋmɔ kɛ Yesu, ni ji Toiŋjɔlɛ Lumɔ lɛ ji lɛ, eba akɛ Nyɔŋmɔ tsuji fɛɛ ‘ahiɛ baadɔ nitsumɔi kpakpai ahe.’—Tito 2:14.
[Shishigbɛ niŋmai]
a Mɛi pii heɔ yeɔ akɛ Hezekia ji mɔ ni ŋma Lala 119 lɛ dani ebatsɔ maŋtsɛ. Kɛ́ nakai ni lɛ, no lɛ eeenyɛ efee akɛ aŋma beni Yesaia gbaa lɛ.
b Ekolɛ wiemɔ kuku ni ji “nɛkɛ wiemɔ nɛɛ” ni yɔɔ Yesaia 8:20 lɛ miitsɔɔ wiemɔ ní kɔɔ mumɔi atsɛmɔ nifeemɔi ahe, ní atsɛ yisɛɛ yɛ Yesaia 8:19 lɛ. Kɛji nakai ji sane lɛ, no lɛ Yesaia miikɛɛ akɛ mɛi ní woɔ mumɔi atsɛmɔ nifeemɔi ahe hewalɛ yɛ Yuda lɛ baaya nɔ amɛwo mɛi krokomɛi hewalɛ ní amɛyabi okɔmfoi anii, ni no hewɔ lɛ amɛnáŋ sɛɛyoomɔ ko kwraa kɛjɛŋ Yehowa ŋɔɔ.
c Mɛi komɛi ewie akɛ ekolɛ mɛi ní amɛjeee Israelbii ji mɛi ni yɔɔ Galilea maŋtiasei 20 ní Maŋtsɛ Salomo kɛke Hiram, ni ji Tiro maŋtsɛ lɛ mli.—1 Maŋtsɛmɛi 9:10-13.
[Shikpɔŋ he mfoniri/Mfoniri ni yɔɔ baafa 122]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Korazin
Kapernaum
Betsaida
Genesaret Ŋã Kplanaa
Galilea Ŋshɔ
Magadan
Tiberia
Yordan Faa
GADARA
Gadara
[Mfonirii ni yɔɔ baafa 119]
Kain kɛ Yesu fɔmɔ lɛ fɛɛ ji nifeemɔi krɛdɛɛi. Yesu nɔ̃ lɛ pɛ nɔ ko ní yɔɔ miishɛɛ jɛ mli kɛba
[Mfoniri ni yɔɔ baafa 121]
Hɔmɔ ko baaba ní naa wa kwraa fe aboloo hɔmɔ kɛ nu kumai
[Mfoniri ni yɔɔ baafa 127]
Yesu ji la yɛ shikpɔŋ lɛ nɔ