Yitso 61

Atsa Gbekɛnuu ni Mumɔ Fɔŋ Yɔɔ Emli Lɛ

BENI Yesu, Petro, Yakobo, kɛ Yohane bɛ jɛmɛ, ni ekolɛ amɛtee Hermon Gɔŋ lɛ nɔ lɛ, kaselɔi krokomɛi lɛ kɛ sane ko kpe. Beni Yesu ku esɛɛ nɔŋŋ pɛ kɛkɛ ni ena akɛ nɔ ko etɔtɔ. Naa mɛi pii ni amɛbabua amɛhe naa yɛ kaselɔi lɛ ahe, ni woloŋmalɔi lɛ kɛ amɛ miitao saji anaa. Ni gbɔmɛi lɛ na Yesu lɛ, amɛnaa kpɛ amɛhe waa ni amɛjo foi kɛba eŋɔɔ koni amɛbaŋa lɛ. Ni ebi amɛ akɛ: “Mɛni nyɛbibiɔ amɛ?”

Kɛkɛ ni nuu ko je kpo kɛjɛ mɛi lɛ ateŋ ni eba ebakula shi yɛ Yesu hiɛ ni etsɔɔ mli akɛ: “Tsɔɔlɔ, mikɛ mibinuu ni mumɔ mumui yɔɔ emli ba oŋɔɔ. Ni he fɛɛ he ni emɔɔ lɛ yɛ lɛ, etsiɔ lɛ etswaa shi, ni enaa kwɛ̃ɔ afui, ni ekpeɔ enyanyɔji ashishi, ni etãa loo; ni mikɛɛ okaselɔi lɛ ni amɛfã lɛ; amɛnyɛɛɛ.”

Woloŋmalɔi lɛ miiwo nyɛ ni kaselɔi lɛ nyɛɛɛ atsa gbekɛnuu lɛ he waa, ni ekolɛ amɛmiiye amɛhe fɛo po. Shi nɛkɛ jaramɔ be nɛɛ mli nɔŋŋ pɛ kɛkɛ ni Yesu ba. Ni ekɛɛ: “Oo, yinɔbii ni heee yeee! Mɛɛ beyinɔ mikɛ nyɛ aaahi shi kɛyashi? Mɛɛ beyinɔ mahiɛ nyɛ kɛyashi?”

Etamɔ nɔ ni Yesu kɛ mɛi fɛɛ ni yɔɔ jɛmɛ lɛ miiwie nɛkɛ wiemɔi nɛɛ, shi ŋwanejee ko bɛ he akɛ ekɔɔ woloŋmalɔi lɛ ni gbaa ekaselɔi lɛ anaa lɛ ahe titri. Agbɛnɛ Yesu kɛɛ yɛ gbekɛnuu lɛ he akɛ: “Nyɛkɛ lɛ abaa miŋɔɔ.” Shi beni gbekɛnuu lɛ baa Yesu ŋɔɔ lɛ, daimonio ni yɔɔ emli lɛ tsi lɛ egbee shikpɔŋ ni eha eshɔ̃ keketee. Ni gbekɛnuu lɛ koklo shikpɔŋ ni enaa kwɛ̃ afui hu.

Yesu bi akɛ: “Mɛɛ beyinɔ enɛ bɔi lɛ feemɔ?”

Ni tsɛ lɛ ha hetoo akɛ: “Kɛjɛ egbekɛbiiashi; ni kpitiokpitio lɛ, [daimonio lɛ] shɛɔ lɛ efɔɔ la mli kɛ nui amli, koni ekpata ehiɛ.” Kɛkɛ ni tsɛ lɛ kpa fai akɛ: “Shi kɛlɛ kɛji ooonyɛ nɔ ko ofee lɛ, omusuŋ atsɔo yɛ wɔhe ni ofee he eko oha wɔ!”

Ekolɛ, tsɛ lɛ kɛ afii babaoo etao yelikɛbuamɔ. Ni agbɛnɛ, akɛni Yesu kaselɔi lɛ nyɛɛɛ afee hewɔ lɛ, efee yeyeeye waa. Ni Yesu wie nuu lɛ faikpamɔ ni nijiaŋwujee yɔɔ mli lɛ he, ni ekɛ ekaawoo kɛɛ: “No ji kɛ ooonyɛ ohe oye kɛkɛ lɛ; aaanyɛ afee nii fɛɛ aha mɔ ni heɔ yeɔ lɛ!”

Kɛkɛ ni amrɔ lɛ nɔŋŋ lɛ, gbekɛ lɛ tsɛ lɛ bo kɛ yaafo, ni ekpa fai akɛ: “Miihe miiye, Nuŋtsɔ, ye obua mihemɔkɛyeli ni mibɛ lɛ!”

Beni Yesu na akɛ asafo lɛ hiɛ foi kɛmiiba eŋɔɔ lɛ, efa daimonio lɛ yi ni ekɛɛ: “Bo mumɔ mumui kɛ toimulɔ, miifao akɛ oje emli ni okabote emli dɔŋŋ!” Beni daimonio lɛ shiɔ emli lɛ, eha gbekɛnuu lɛ bolɔ waa ekoŋŋ ni eha eshɔ̃ keketee shii abɔ. Kɛkɛ ni gbekɛnuu lɛ ka shi tamɔ gbonyo, kɛkɛ ni mɛi pii hu kɛɛ akɛ: “Egbo!” Shi Yesu mɔ gbekɛnuu lɛ nine mli, ni ete shi.

Mra be ko, beni atsu kaselɔi lɛ ni amɛyashiɛ lɛ, amɛfamɔ daimonioi. No hewɔ lɛ, agbɛnɛ, beni amɛbote shia ko mli lɛ, amɛbi Yesu yɛ teemɔŋ akɛ: “Mɛɛba wɔ lɛ wɔnyɛɛɛ lɛ wɔfa lɛ?”

Beni Yesu tsɔɔ akɛ ejɛ amɛhemɔkɛyeli ni faaa hewɔ lɛ, eha amɛ hetoo akɛ: “Nɛkɛ he nɔ sɔrɔto nɛɛ anyɛɛɛ lɛ afa yɛ nɔ ko nɔ ko naa, akɛ ja yɛ sɔlemɔ kɛ ŋmaahilɛ naa kɛkɛ.” Eka shi faŋŋ akɛ ebiɔ hesaamɔ dani anyɛ afa daimonio ni he wa waa nɛɛ. Hemɔkɛyeli ni mli wa kɛ sɔlemɔ ni akɛaabi Nyɔŋmɔ yelikɛbuamɔ ni woɔ mɔ hewalɛ he miihia.

Ni Yesu kɛfata he akɛ: “Lɛlɛŋ, miikɛɛ nyɛ akɛ: Kɛji nyɛyɛ hemɔkɛyeli ni tamɔ sinapi wu lɛ, nyɛaakɛɛ gɔŋ nɛɛ akɛ: ‘Fãa yɛ biɛ kɛya jɛi!’ ni eeefã; ni nɔ ko bɛ ni nyɛnyɛŋ nyɛfee.” Kwɛ bɔ ni hemɔkɛyeli he wa ha!

Gbɛtsii nii kɛ naagbai ni tsiɔ nɔyaa gbɛ yɛ Yehowa sɔɔmɔ mli lɛ baanyɛ afee tamɔ nibii ni anyɛŋ aye nɔ loo ajie kɛjɛ jɛmɛ kwraa tamɔ gɔŋ kpeteŋkpele diɛŋtsɛ ko. Shi kɛlɛ, Yesu miitsɔɔ akɛ kɛji wɔtɛo hemɔkɛyeli yɛ wɔtsuii amli, ni wɔshwie nɔ nu ni wɔwo lɛ hewalɛ ni eda lɛ, no lɛ ebaalɛɛ kɛyashɛ dalɛ mli ni ebaaye ebua wɔ ni wɔye gbɛtsii nii kɛ naagbai ni tamɔ gɔji nɛɛ anɔ. Marko 9:14-29; Mateo 17:19, 20; Luka 9:37-43.

▪ Mɛɛ shihilɛ Yesu kɛkpe beni eku esɛɛ kɛjɛ Hermon Gɔŋ lɛ nɔ lɛ?

▪ Mɛɛ hewalɛwoo Yesu kɛha gbekɛnuu ni daimonio yɔɔ emli lɛ tsɛ?

▪ Mɛni hewɔ ni kaselɔi lɛ nyɛɛɛ afa daimonio lɛ?

▪ Te Yesu tsɔɔ akɛ hemɔkɛyeli he wa ha tɛŋŋ?