Ni Ooosɔmɔ Akɛ Gbɔmɛi Ahe Wolɛi
“Yesu kɛɛ Simon akɛ: ‘Kaashe gbeyei. Kɛjɛ be nɛɛ nɔ kɛyaa nɛɛ, ooosha gbɔmɛi hiɛkalɔi.’”—LUKA 5:10, New World Translation.
1, 2. (a) Wuoyaa etsu mɛni yɛ gbɔmɛi ayinɔsane mli? (b) Mɛɛ wuoyaa hee ko akɛba aaafee afii 2,000 ni eho nɛ!
GBƆMƐI kɛ afii akpei abɔ esha looi kɛjɛ shikpɔŋ lɛ nɔ ŋshɔi, kpaakpoi kɛ faai amli kɛha niyenii. Looi ni jɛ Nilo faa lɛ mli lɛ ji blema Mizraim niyenii lɛ fa titri. Beni aha Nilo faa lɛ mli nui lɛ tsɔ lá yɛ Mose gbii lɛ amli lɛ, Mizraimbii lɛ na nɔ, jeee yɛ nu hɔmɔ ni jɛ mli ba lɛ kɛkɛ hewɔ, shi moŋ akɛni looi lɛ hu gboi, ni esa amɛniyenii ahe lɛ hu. Sɛɛ mli, beni Yehowa kɛ Mla lɛ ha Israel yɛ Sinai lɛ, ekɛɛ amɛ akɛ amɛbaanyɛ amɛye looi komɛi, shi ekomɛi ahe tseee, ni esaaa akɛ amɛyeɔ. Enɛ tsɔɔ akɛ, kɛ Israelbii lɛ yashɛ Shiwoo Shikpɔŋ lɛ nɔ lɛ amɛbaaye loo, no hewɔ lɛ amɛteŋ mɛi komɛi baatsɔmɔ wolɛi.—2 Mose 7:20, 21; 3 Mose 11:9-12.
2 Shi nɔ ni miihe ashɛ afi 2,000 nɛ, ni aha gbɔmɛi bale looi ashamɔ loo wuoyaa nitsumɔ kroko. Eji mumɔŋ looi ashamɔ nitsumɔ ko ni jeee wolɛi lɛ pɛ ehe baaba sɛɛnamɔ aha, shi moŋ looi lɛ hu! Aatsu looi ashamɔ nitsumɔ nɛɛ he nii lolo ŋmɛnɛ, ni ehe eba sɛɛnamɔ babaoo eha gbɔmɛi akpekpei abɔ yɛ jeŋ fɛɛ.
‘Gbɔmɛi ni Aasha Amɛ Hiɛkalɔi’
3, 4. Mɛɛ wolɛi enyɔ jie miishɛɛ babaoo kpo yɛ Yesu Kristo he lɛ?
3 Yɛ afi 29 Ŋ.B. lɛ, Yohane Baptisilɔ lɛ baptisi Yesu, Mɔ ni kɛ looi ashamɔ nitsumɔ hee nɛɛ baaba lɛ yɛ Yordan faa lɛ mli. Otsii fioo komɛi asɛɛ lɛ, Yohane kɛ enine tsɔɔ Yesu nɔ ni ekɛɛ ekaselɔi lɛ ateŋ mɛi enyɔ akɛ: “Naa, Nyɔŋmɔ Toobi lɛ!” Kaselɔi nɛɛ ateŋ mɔ kome, ni egbɛi ji Andrea lɛ kɛ oyaiyeli kɛɛ enyɛmi nuu Simon Petro akɛ: “Wɔna Mesia lɛ”! Nɔ ni yɔɔ miishɛɛ ji akɛ, Andrea kɛ Simon fɛɛ ji wolɛi.—Yohane 1:35, 36, 40, 41; Mateo 4:18.
4 Yɛ be saŋŋ ko sɛɛ lɛ, Yesu miishiɛ kɛmiitsɔɔ asafoi lɛ yɛ Galilea Ŋshɔ lɛ masɛi, ni ekɛ he ni Petro kɛ Andrea yɔɔ lɛ jɛkɛɛɛ. No mli lɛ eekɛɛ gbɔmɛi lɛ akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ.” (Mateo 4:13, 17) Wɔbaanyɛ wɔsusu akɛ Petro kɛ Andrea he miitswa shi waa akɛ amɛaanu esane lɛ. Shi, eka shi faŋŋ akɛ amɛyɔseee akɛ Yesu miiba abakɛɛ amɛ nɔ ko ni baatsake amɛshihilɛ kɛya naanɔ. Agbɛnɛ, nɔ ni Yesu baawie ni efee yɛ amɛhiɛ lɛ hiɛ shishinumɔ ko ni he hiaa waa kɛha wɔ fɛɛ ŋmɛnɛ.
5. Wolɛɛnyo Petro nyɛ esɔmɔ Yesu yɛ mɛɛ gbɛ nɔ?
5 Wɔkaneɔ akɛ: “Eba mli akɛ, beni mɛi pii jwere enɔ ni amɛboɔ Nyɔŋmɔ wiemɔ lɛ toi lɛ, edamɔ Genesaret kpaakpo lɛ naa, ni ena lɛji enyɔ ŋmɔ shi yɛ kpaakpo lɛ naa; shi wolɛi lɛ eje mli ni amɛmiifɔ amɛyaai ahe.” (Luka 5:1, 2) Yɛ nakai be lɛ mli lɛ, mɛi ni kɛ wuoyaa efee amɛnitsumɔ lɛ fɔɔ nitsumɔ gbɛkɛ, ni hii nɛɛ miifɔ amɛyaai ahe beni amɛjɛ wuoyaa amɛba gbɛkɛ lɛ sɛɛ. Yesu kpɛ eyiŋ akɛ ebaata amɛlɛlɛi lɛ ekome mli koni ekɛshiɛ jogbaŋŋ etsɔɔ asafoi lɛ. “Ni eyabote lɛlɛ lɛ ekome ni ji Simon nɔ lɛ mli, ni ekpa lɛ fai akɛ etsi kɛya nu lɛ hiɛ fioo; ni eho eta shi, ni ejɛ lɛlɛ lɛ mli etsɔɔ mɛi lɛ anii.”—Luka 5:3.
6, 7. Mɛɛ naakpɛɛ nii ni kɔɔ looi ashamɔ he Yesu fee, ni no ha ewie mɛni yɛ looi ashamɔ he?
6 Kadimɔ akɛ Yesu yɛ nɔ ko yɛ ejwɛŋmɔ mli fe gbɔmɛi lɛ anitsɔɔmɔ kɛkɛ. “Beni efɔ̃ɔ wiemɔ lɛ, ekɛɛ Simon akɛ: ‘Nyɛtsia nyɛyaa bu lɛŋ ni nyɛyafɔa nyɛyaai lɛ, koni nyɛgbe loo.’” Kaimɔ akɛ wolɛi nɛɛ etsu nii jenamɔ fɛɛ. No hewɔ lɛ, ebɛ naakpɛɛ akɛ Petro ha lɛ hetoo akɛ: “Onukpa, nyɔɔŋ nɛɛ fɛɛ wɔtsu nii dɛŋdɛŋ ni wɔnaaa nɔ ko; shi kɛlɛ owiemɔ naa lɛ mafɔ yaa lɛ.” Mɛni ba beni amɛfee nakai lɛ? “Amɛgbe looi babaoo ni amɛyaa lɛ miigbala. Ni amɛfɔ amɛnanemɛi ni yɔɔ lɛlɛ kroko lɛ mli lɛ nine akɛ amɛba ni amɛbawa amɛ. Ni amɛba ni amɛwo lɛji enyɔ lɛ fɛɛ obɔbɔ ni amɛmiihe amɛshiu.”—Luka 5:4-7.
7 Yesu efee naakpɛɛ nii. Loo ko bɛ nakai ŋshɔ lɛ mli gbɛkɛ muu lɛ fɛɛ; agbɛnɛ looi eba mli obɔ. Naakpɛɛ nii nɛɛ na Petro nɔ hewalɛ waa. “Simon Petro . . . ho egbee Yesu naji anaa ni ekɛɛ: ‘Nuŋtsɔ, jee mimasɛi; ejaakɛ gbɔmɔ eshafeelɔ ji mi!’ Ni ekɛ mɛi ni fata ehe lɛ fɛɛ ahe jɔ̃ amɛhe yɛ looi pii ni amɛgbe lɛ hewɔ; ni nakai nɔŋŋ fee Yakobo kɛ Yohane, Zebedeo bii lɛ, ni ji Simon hefatalɔi lɛ.” Yesu jɔɔ Petro he, ni ewie wiemɔi ni baatsake Petro shihilɛ nɛɛ etsɔɔ lɛ: “Kaashe gbeyei. Kɛjɛ be nɛɛ nɔ kɛyaa nɛɛ, ooosha gbɔmɛi hiɛkalɔi.”—Luka 5:8-10, NW.
Gbɔmɛi Ahe Wolɛi
8. Te wolɛi ejwɛ here ninefɔɔ akɛ ‘amɛbasha gbɔmɛi hiɛkalɔi’ lɛ nɔ amɛha tɛŋŋ?
8 No hewɔ lɛ Yesu kɛ gbɔmɛi to looi ahe, ni efɔ nine etsɛ wolɛɛnyo heshibalɔ nɛɛ akɛ eŋmɛɛ eheloo gbɛfaŋ nitsumɔ lɛ he ni emɔ wuoyaa nitsumɔ ko ni yɔɔ nyam babaoo mli—gbɔmɛi ni aaasha amɛ hiɛkalɔi. Petro kɛ enyɛmi nuu Andrea kpɛlɛ ninefɔɔ lɛ nɔ. “Ni amrɔ lɛ amɛshi amɛyaai lɛ amɛbanyiɛ esɛɛ.” (Mateo 4:18-20) No sɛɛ lɛ Yesu tsɛ Yakobo kɛ Yohane ni miikpɛ amɛyaai yɛ amɛlɛlɛ mli lɛ. Efɔ mɛnɛɛmɛi anine ni amɛ hu amɛbatsɔmɔ gbɔmɛi ahe wolɛi. Te amɛhere nɔ amɛha tɛŋŋ? “Ni amrɔ lɛ amɛ hu amɛshi lɛlɛ lɛ kɛ amɛtsɛ lɛ amɛbanyiɛ esɛɛ.” (Mateo 4:21, 22) Yesu jie hesaa kpo akɛ susumai ahe wolɛɛnyo. Esha gbɔmɛi hiɛkalɔi ejwɛ yɛ nɛkɛ be nɛɛ mli.
9, 10. Mɛɛ hemɔkɛyeli Petro kɛ enanemɛi lɛ jie lɛ kpo, ni mɛɛ gbɛ nɔ atsɔ atsɔse amɛ yɛ mumɔŋ wuoyaa nitsumɔ lɛ mli?
9 Mɔ ni wuoyaa ji enitsumɔ lɛ hiɔ shi kɛtsɔɔ elooi ni ehɔ̃ɔ lɛ nɔ, shi mumɔŋ wolɛɛnyo lɛ nyɛŋ afee nakai. No hewɔ lɛ, nɛkɛ kaselɔi nɛɛ jie hemɔkɛyeli babaoo kpo beni amɛshi nɔ fɛɛ nɔ ni amɛbanyiɛ Yesu sɛɛ lɛ. Amɛyiŋ efeee amɛ kɔshikɔshi yɛ omanye ni amɛ mumɔŋ wuoyaa nitsumɔ lɛ aaaye lɛ he. Yesu enyɛ eha looi diɛŋtsɛ eyi nui ni looi bɛ mli lɛ mli obɔ. Nakai nɔŋŋ kɛ kaselɔi lɛ ŋmɛɛ amɛyaai lɛ ahe amɛwo nui ni ji Israel maŋ lɛ mli lɛ, amɛyɛ nɔmimaa akɛ, yɛ Nyɔŋmɔ yelikɛbuamɔ naa lɛ, amɛbaasha gbɔmɛi hiɛkalɔi. Mumɔŋ wuoyaa nitsumɔ ni je shishi yɛ nakai be lɛ mli lɛ miiya nɔ lolo, ni Yehowa miiha aasha looi pii lolo.
10 Yesu tsɔse nakai kaselɔi lɛ fe afii enyɔ yɛ gbɔmɛi ashamɔ lɛ mli. Be ko lɛ ekɛ famɔi ni mli ka shi faŋŋ ha amɛ, ni etsu amɛ kɛtsɔ ehiɛ koni amɛyashiɛ. (Mateo 10:1-7; Luka 10:1-11) Beni atsɔɔ Yesu sɛɛ gbɛ ni agbe lɛ lɛ, kaselɔi lɛ ahiɛ fee amɛ yaa. Shi ani Yesu gbele lɛ tsɔɔ akɛ gbɔmɛi ni amɛaasha amɛ lɛ bɛ dɔŋŋ? Etsɛɛɛ ni saji ni nyiɛ sɛɛ ba lɛ ha hetoo.
Looi ni Ashaa yɛ Adesai Ŋshɔ lɛ Mli
11, 12. Yɛ eshitee lɛ sɛɛ lɛ, mɛɛ naakpɛɛ nii Yesu fee ni kɔɔ wuoyaa loo looi ashamɔ he?
11 Yɛ Yesu gbele yɛ Yerusalem kɛ eshitee lɛ sɛɛ nɔŋŋ lɛ, kaselɔi lɛ ku amɛsɛɛ kɛtee Galilea. Amɛteŋ mɛi kpawo kpe yɛ be kome mli yɛ Galilea Ŋshɔ lɛ naa. Petro kɛɛ eeya wuo, kɛkɛ ni mɛi krokomɛi lɛ yafata ehe. Taakɛ amɛfɔɔ feemɔ lɛ, amɛtee wuo gbɛkɛ. Yɛ anɔkwale mli lɛ, amɛŋmɛ yaai lɛ aahu shi amɛnaaa loo ko kwraa jenamɔ muu lɛ fɛɛ. Kɛkɛ ni yɛ maŋkɛ lɛ, mɔ ko ni damɔ ŋshɔ lɛ naa tsɛ amɛ yɛ nu lɛ hiɛ: “Bii, nyɛyɛ niyenii ko lo?” Kaselɔi lɛ here nɔ akɛ: “Dabi!” No hewɔ lɛ, mɔ ni damɔ ŋshɔ lɛ naa lɛ kɛɛ amɛ akɛ: “‘Nyɛfɔa yaa lɛ yɛ lɛlɛ lɛ ninejurɔ gbɛ, ni nyɛaana nɔ ko.’ Kɛkɛ ni amɛfɔ, ni looi lɛ afalɛ naa lɛ, amɛnyɛɛɛ yaa lɛ amɛgbala”—Yohane 21:5, 6.
12 Mɛɛ niiashikpamɔ ni haa mɔ naa kpɛɔ ehe nɛ! Eeenyɛ eba akɛ kaselɔi lɛ kai klɛŋklɛŋ naakpɛɛ nii ni kɔɔ looi ahe lɛ, ni kɛ hoo lɛ amɛteŋ mɔ kome yoo mɔ ni yɔɔ ŋshɔ lɛ naa lɛ. “Kaselɔ ni Yesu sumɔɔ lɛ lɛ kɛɛ Petro akɛ: ‘Nuŋtsɔ lɛ ni!’ Agbɛnɛ beni Simon Petro nu akɛ Nuŋtsɔ lɛ ni lɛ, ekɛ etade lɛ ŋmɔ ehɛ, ejaakɛ eta shi yayai, ni etu egbee ŋshɔ lɛ mli. Shi kaselɔi krokomɛi lɛ tsɔ lɛlɛ bibioo lɛ mli kɛba, ejaakɛ amɛkɛ shikpɔŋ jɛkɛɛɛ, shi aaafee ninetalɔi ohai enyɔ loo nɔ kɛkɛ.”—Yohane 21:7, 8.
13. Beni Yesu kwɔ kɛtee ŋwɛi lɛ sɛɛ lɛ, mɛɛ majimaji ateŋ wuoyaa nitsumɔ ko aje shishi?
13 Mɛni nɛkɛ naakpɛɛ nii nɛɛ tsɔɔ? Ákɛ nitsumɔ ni akɛshaa gbɔmɛi lɛ bako naagbee. Ama anɔkwa sane nɛɛ nɔ mi beni Yesu kɛɛ Petro shii etɛ—ní etsɔ enɔ ekɛɛ kaselɔi lɛ hu fɛɛ—akɛ amɛlɛ Yesu tooi lɛ. (Yohane 21:15-17) Hɛɛ, mumɔŋ lɛɛ he gbɛjianɔtoo ko ka amɛhiɛ. Etsɔ hiɛ egba dani egbo akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase.” (Mateo 24:14) Be eshɛ agbɛnɛ ni nakai gbalɛ lɛ mlibaa yɛ klɛŋklɛŋ afii oha lɛ mli lɛ baaje shishi. Ekaselɔi lɛ miihe aŋmɛɛ amɛyaai lɛ ahe amɛwo adesai ŋshɔ lɛ mli, ni amɛgbalaŋ amɛyaai lɛ efolo.—Mateo 28:19, 20.
14. Ajɔɔ Yesu sɛɛnyiɛlɔi lɛ awuoyaa nitsumɔ lɛ nɔ yɛ afi ni teɔ Yerusalem hiɛkpatamɔ lɛ hiɛ lɛ mli yɛ mɛɛ gbɛ nɔ?
14 Dani eeekwɔ kɛaaya e-Tsɛ lɛ maŋtsɛsɛi lɛ hiɛ yɛ ŋwɛi lɛ, Yesu kɛɛ esɛɛnyiɛlɔi lɛ akɛ: “Shi moŋ kɛ mumɔ krɔŋkrɔŋ lɛ na ba nyɛnɔ lɛ, nyɛaana hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.” (Bɔfoi lɛ Asaji 1:8) Beni afɔse mumɔ krɔŋkrɔŋ ashwie kaselɔi lɛ anɔ yɛ Pentekoste afi 33 Ŋ.B. lɛ, kɛkɛ ni mumɔŋ wuoyaa nitsumɔ kpeteŋkpele lɛ je shishi yɛ majimaji ateŋ. Yɛ Pentekoste gbi lɛ nɔ pɛ lɛ, asha susumai akpei etɛ hiɛkalɔi, ni no sɛɛ etsɛɛɛ lɛ, “mɛi ni nu wiemɔ lɛ ateŋ mɛi pii he ye, ni hii lɛ ayibɔ aaafee akpei enumɔ.” (Bɔfoi lɛ Asaji 2:41; 4:4) Yifalɛ lɛ tee nɔ. Nɔ ni aŋma afɔ shi lɛ kɛɔ wɔ akɛ: “Ni asaŋ akɛ mɛi ni heɔ Nuŋtsɔ lɛ nɔ yeɔ, hii kɛ yei babaoo bafata amɛhe.” (Bɔfoi lɛ Asaji 5:14) Etsɛɛɛ ni Samariabii kpɛlɛ sanekpakpa lɛ nɔ, ni no sɛɛ etsɛɛɛ ni Jeŋmajiaŋbii foolɔi lɛ hu kpɛlɛ nɔ. (Bɔfoi lɛ Asaji 8:4-8; 10:24, 44-48) Aaafee Pentekoste sɛɛ afi 27 lɛ, bɔfo Paulo ŋma wolo eyaha Kristofoi ni ji Kolosebii lɛ akɛ ‘ashiɛ sanekpakpa lɛ atsɔɔ bɔɔ nii ni yɔɔ ŋwɛi shishi nɛɛ fɛɛ.’ (Kolosebii 1:28) Eka shi faŋŋ akɛ Yesu kaselɔi lɛ eshi Galilea nui lɛ amɛyahɛ looi yɛ shɔŋŋ. Amɛŋmɛɛ amɛyaai lɛ ahe yɛ Yudafoi ni amɛgbɛ amɛshwa Roma Maŋtsɛyeli lɛ mli fɛɛ lɛ ateŋ, kɛ agbɛnɛ yɛ ŋshɔi ni ji gbɔmɛi ni jeee Yudafoi ni abɛ hiɛnɔkamɔ ko yɛ amɛmli lɛ hu ateŋ. Ni amɛyaai lɛ ba ni eyimɔ obɔbɔ kɛ looi. Yesu gbalɛ ni yɔɔ Mateo 24:14 lɛ ba mli kɛha klɛŋklɛŋ afi oha lɛ mli Kristofoi lɛ ahiamɔ nii dani akpata Yerusalem hiɛ yɛ afi 70 Ŋ.B.
Gbɔmɛi ni Aasha Amɛ yɛ “Nuŋtsɔ lɛ Gbi lɛ Nɔ”
15. Mɛɛ wuoyaa nitsumɔ kroko agba afɔ shi yɛ Kpojiemɔ wolo lɛ mli, ni mɛɛ be mli abaaje shishi?
15 Shi babaoo yɛ lolo ni baaba. Kɛmiiba klɛŋklɛŋ afii oha lɛ naagbee lɛ, Yehowa ŋmɛ naagbee bɔfo ni yɔɔ wala mli lolo, Yohane, gbɛ koni ena nibii ni baaba yɛ “Nuŋtsɔ lɛ gbi lɛ nɔ” lɛ he ninaa. (Kpojiemɔ 1:1, 10) Ehe nɔ ko ni ekaaa ji sanekpakpa lɛ ni aaashiɛ atsɔɔ yɛ jeŋ fɛɛ. Wɔkaneɔ akɛ: “Ni mina bɔfo kroko miifiliki yɛ ŋwɛi teŋ, ni ehiɛ naanɔ sanekpakpa ni eyaajaje etsɔɔ mɛi ni yɔɔ shikpɔŋ lɛ nɔ kɛ jeŋmaŋ fɛɛ jeŋmaŋ, kɛ akutso fɛɛ akutso, kɛ majianɔ wiemɔi fɛɛ, kɛ maŋ fɛɛ maŋ.” (Kpojiemɔ 14:6) Nyɔŋmɔ tsuji baashiɛ sanekpakpa lɛ diɛŋtsɛ yɛ shikpɔŋ ni ayɔɔ nɔ lɛ fɛɛ nɔ, yɛ ŋwɛibɔfoi agbɛtsɔɔmɔ shishi, shi jeee yɛ Roma Maŋtsɛyeli lɛ mli pɛ. Abaatsu jeŋ muu fɛɛ nitsumɔ ko ni kɔɔ susumai ashamɔ he, ni wɔgbii nɛɛ ena nakai ninaa lɛ mlibaa.
16, 17. Mɛɛ be naagbee gbii lɛ amli mumɔŋ wuoyaa nitsumɔ lɛ je shishi, ni Yahowa ejɔɔ nɔ yɛ mɛɛ gbɛ nɔ?
16 Te wuoyaa nitsumɔ lɛ etee nɔ eha yɛ afii ohai 20 nɛɛ mli eha tɛŋŋ? Kɛjɛ shishijee lɛ, wolɛi lɛ ayi faaa. Beni Jeŋ Ta I ba naagbee lɛ, no mli lɛ sanekpakpa shiɛlɔi ni yɔɔ ekaa aaafee akpei ejwɛ pɛ yɔɔ, hii kɛ yei ni yɔɔ ekaa ni amɛteŋ mɛi titri ji mɛi ni afɔ amɛ mu. Amɛfɔɔ amɛyaai lɛ yɛ he fɛɛ he ni Yehowa aaagbele gbɛ aha amɛ, ni amɛsha susumai pii hiɛkalɔi. Yɛ jeŋ ta ni ji enyɔ lɛ sɛɛ lɛ, Yehowa gbele nui heei anaa koni ahɛ looi yɛ mli. Maŋsɛɛ sanekpakpa shiɛlɔi ni amɛtee Buu-Mɔɔ Biblia Skul ni ji Gilead lɛ nyiɛ nitsumɔ lɛ hiɛ yɛ shikpɔji pii anɔ. Maji tamɔ Japan, Italia, kɛ Spania, ni tsutsu lɛ amɛtamɔ shikpɔŋ gbiŋ lɛ, wo susumai babaoo yɛ naagbee tamɔ ŋmaakpamɔ be mli nɔ. Nyɛsɛɛ nɛɛ nɔŋŋ hu wɔbale bɔ ni wuoyaa nitsumɔ lɛ eye omanye yɛ Europa Bokagbɛ.
17 Ŋmɛnɛ, yaai lɛ miihe afɛlɛ yɛ maji pii anɔ. Ŋmaakpamɔ babaoo ni ji susumai ni nine shɛɔ amɛnɔ lɛ eha ehe ehia ni ato asafoi kɛ kpokpaai heei. Bɔni afee ni anyɛ afee enɛ lɛ, aamamɔ Maŋtsɛyeli Asai kɛ kpee Asai heei bɛ fɛɛ be. Aatao onukpai kɛ asafoŋ sɔɔlɔi babaoo koni amɛkwɛ yifalɛ ni baa lɛ nɔ. Nakai anɔkwafoi lɛ je nitsumɔ kpeteŋkpele ko shishi yɛ 1919. Yesaia 60:22 eba mli yɛ gbɛ pɔtɛɛ diɛŋtsɛ nɔ. ‘Mɔ fioo lɛ etsɔ mɛi akpe,’ ejaakɛ nakai wolɛi akpei ejwɛ pɛ lɛ ebatsɔ mɛi fe akpekpei ejwɛ ŋmɛnɛ. Ni naagbee lɛ bako.
18. Te wɔɔfee tɛŋŋ wɔkase klɛŋklɛŋ afii oha lɛ mli gbɔmɛi ahe mumɔŋ wolɛi lɛ anɔkwɛmɔ nɔ kpakpa lɛ?
18 Mɛni ji nɔ ni enɛɛmɛi fɛɛ tsɔɔ kɛhaa wɔ akɛ aŋkroaŋkroi? Ŋmalɛi lɛ kɛɔ akɛ beni atsɛ Petro, Andrea, Yakobo, kɛ Yohane akɛ amɛbatsɔmɔ gbɔmɛi ahe wolɛi lɛ, “amɛshi fɛɛ, ni amɛnyiɛ [Yesu] sɛɛ.” (Luka 5:11) Mɛɛ hemɔkɛyeli kɛ henɔjɔɔmɔ he nɔkwɛmɔ nɔ kpakpa po nɛ! Ani wɔbaanyɛ wɔna he-kɛ-afɔleshaa mumɔ nɛɛ eko, ni ji klalo ni wɔɔfee akɛ wɔɔsɔmɔ Yehowa ni nɔ ni wɔɔlaaje lɛ kɔɔɔ he eko lɛ? Akpekpei abɔ eha hetoo akɛ amɛbaanyɛ. Kaselɔi lɛ sha gbɔmɛi yɛ klɛŋklɛŋ afi oha lɛ mli yɛ he fɛɛ he ni Yehowa ŋmɛɔ gbɛ. Amɛsha looi yɛ Yudafoi kɛ Jeŋmajiaŋbii fɛɛ ateŋ ni ajieee mli. No hewɔ lɛ, nyɛhaa wɔshiɛa wɔtsɔɔa mɔ fɛɛ mɔ ni naatsii loo mɛi ahe jwɛŋmɔ fɔŋ bɛ mli.
19. Mɛni esa akɛ wɔfee kɛ etamɔ nɔ ni looi bɛ nui ni wɔhɛɔ yɛ mli lɛ mli?
19 Shi kɛ amrɔ nɛɛ oshikpɔŋkuku lɛ tamɔ nɔ ni wooo yibii hu? Kaaha onijiaŋ miije wui. Kaimɔ akɛ, Yesu kɛ looi wo kaselɔi lɛ ayaai lɛ amli obɔ, yɛ be mli ni amɛhɛ aahu jenamɔ fɛɛ ni amɛnaaa nɔ ko lɛ sɛɛ. Ebaanyɛ eba lɛ nakai nɔŋŋ yɛ mumɔŋ. Akɛ nɔkwɛmɔ nɔ lɛ, Odasefoi anɔkwafoi gbo deŋme afii abɔ yɛ Ireland, shi nɔ ko tsɔ jɛɛɛ mli baaa. Shi nibii etsake kwraa nyɛsɛɛ nɛɛ. 1991 Yearbook of Jehovah’s Witnesses lɛ bɔ amaniɛ akɛ, beni 1990 sɔɔmɔ afi lɛ baa naagbee lɛ, Ireland ena shiɛlɔi ayifalɛ ni etee nɔ etsara nɔ shii 29 sɔŋŋ! Ekolɛ oshikpɔŋkuku lɛ hu baawo yibii ni tamɔ nakai nɔŋŋ gbi ko. Bei abɔ ni Yehowa ŋmɛɔ gbɛ nɛɛ, nyɛyaa nɔ nyɛhɛa!
20. Mɛɛ be esa akɛ wɔkɛ wɔhe awo gbɔmɛi ni wɔshaa amɛ lɛ mli?
20 Yɛ Israel lɛ, wolɛi yaa wuɔ gbɛkɛ, beni mɛi ahe efe kulɔɔ ni amɛkamɔ amɛsaatsei anɔ lɛ. Jeee be ni hi kɛha amɛ lɛ mli amɛyaa, shi moŋ yɛ be mli ni amɛbaana looi pii amɛsha. Wɔ hu esa akɛ wɔle wɔshikpɔŋkuku lɛ jogbaŋŋ, koni wɔya wuo, taakɛ eji lɛ, yɛ be mli ni gbɔmɛi lɛ ateŋ mɛi ni fa yɔɔ shia ni amɛbaasumɔ ni amɛbo toi. Enɛ baanyɛ afee gbɛkɛnaashi, otsii anaagbee, loo yɛ bei krokomɛi amli. Nyɛhaa wɔfea nɔ fɛɛ nɔ ni wɔɔnyɛ yɛ be ni sa mli ni wɔkɛna mɛi ni yɔɔ tsuijurɔ lɛ.
21. Mɛni esa akɛ wɔkai kɛ afɔɔ nitsumɔ kpitiokpitio yɛ wɔ shikpɔŋkuku lɛ mli?
21 Ni kɛ atsuɔ shikpɔŋkuku lɛ mli nii kpitiokpitio hu? Mɛi ni yɔɔ je lɛŋ ni kɛ wuoyaa efee amɛnitsumɔ lɛ fɔɔ wiemɔ akɛ aahɛ babaoo tsɔ kɛmiiteke nɔ yɛ amɛnui lɛ amli. Shi ani wɔmumɔŋ nui lɛ baanyɛ afee nɔ ni ahɛɔ loo kɛtekeɔ nɔ yɛ mli? Jeee nakai tsɔ! Shikpɔŋkukuji babaoo woɔ yibii kɛ atsuɔ mli nii kpitiokpitio po. Pii woɔ yibii kpakpai akɛni atsuɔ mli nii jogbaŋŋ hewɔ. Kɛlɛ, kɛ ayaa shiai komɛi amli shii abɔ lɛ, kwɛmɔ ni ona nɔmimaa akɛ, akadi mɛi ni bɛ shia lɛ fɛɛ koni aya amɛŋɔɔ yɛ sɛɛ mli. Kasemɔ saji sɔrɔtoi ni obaanyɛ otsɔ nɔ okɛ mɛi agba sane. Ha ahi ojwɛŋmɔ mli akɛ mɔ kroko hu baaya jɛmɛ, no hewɔ lɛ kaatsɛ tsɔ aloo ni ooohao shia lɛ mli bii ni jeee akɛ gbɛ ojeɔ ofeɔ. Ni ha ohe asa yɛ gbɛjegbɛi anɔ nitsumɔ kɛ trukaa odaseyeli mli. Nyɛŋmɛa nyɛ mumɔŋ yaai lɛ be fɛɛ be kɛ hegbɛ lɛ kɛ ehe ba nɔŋŋ.
22. Mɛɛ hegbɛ ni yɔɔ nyam wɔnaa mli ŋɔɔmɔ yɛ nɛkɛ be nɛɛ mli?
22 Kaimɔ akɛ, wolɛi lɛ kɛ looi lɛ fɛɛ naa nɛkɛ wuoyaa nitsumɔ nɛɛ he sɛɛ. Kɛ mɛi ni wɔshaa amɛ lɛ ŋmɛ amɛtsui shi lɛ, amɛbaanyɛ amɛhi shi kɛya naanɔ. Paulo wo Timoteo hewalɛ akɛ: “Hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.” (1 Timoteo 4:16) Yesu ji klɛŋklɛŋ mɔ ni tsɔse ekaselɔi lɛ yɛ mumɔŋ wuoyaa nitsumɔ lɛ mli, ni aatsu nɛkɛ nitsumɔ nɛɛ lolo yɛ egbɛtsɔɔmɔ shishi. (Okɛto Kpojiemɔ 14:14-16 he.) Mɛɛ hegbɛ ni yɔɔ nyam po wɔna nɛkɛ akɛ wɔɔtsu nii yɛ eshishi ni wɔkɛgbe nitsumɔ lɛ naa! Nyɛhaa wɔyaa nɔ wɔŋmɛa wɔyaai lɛ bei abɔ ni Yehowa eŋmɛ gbɛ lɛ. Mɛɛ nitsumɔ kpele yɔɔ ni fe susumai hiɛkalɔi ashamɔ nɛɛ?
Ani Obaanyɛ Okai?
◻ Mɛɛ nitsumɔ Yesu tsɔse ekaselɔi ni amɛtsu?
◻ Mɛɛ gbɛ nɔ Yesu tsɔɔ yɛ akɛ egbele lɛ kɛ mumɔŋ wuoyaa nitsumɔ lɛ baaa naagbee?
◻ Yehowa jɔɔ mumɔŋ wouyaa nitsumɔ lɛ nɔ yɛ klɛŋklɛŋ afi oha lɛ mli yɛ mɛɛ gbɛ nɔ?
◻ Mɛɛ nikpamɔ babaoo ni ji looi áhɛ yɛ ‘Nuŋtsɔ lɛ gbi’ lɛ mli?
◻ Te wɔ akɛ aŋkroaŋkroi lɛ wɔɔfee tɛŋŋ wɔye omanye babaoo akɛ gbɔmɛi ahe wolɛi lɛ?
[Mfoniri ni yɔɔ baafa 15]
Yɛ Yesu shitee lɛ sɛɛ lɛ, ekaselɔi lɛ lɛɛ ŋwɛi nitsumɔ ni ji gbɔmɛi ni ashaa amɛ lɛ mli