Yitso 97

Nitsulɔi yɛ Wein Trom lɛ Mli

ETSƐKO tsɔ ni Yesu kɛɛ akɛ “klɛŋklɛbii pii aaatsɔmɔ sɛɛkpelɔi, ni sɛɛkpelɔi aaatsɔmɔ klɛŋklɛŋbii.” Agbɛnɛ egba amɛ sane ko ni ekɛtsɔɔ wiemɔ nɛɛ mli. Eje shishi akɛ: “Ejaakɛ ŋwɛi maŋtsɛyeli lɛ tamɔ nuu shiatsɛ ko ni je kpo maŋkɛ mra eyabɔ nitsulɔi apaa kɛtee ewein trom mli.”

Yesu tee nɔ akɛ: “Ni beni [shiatsɛ lɛ] ekɛ nitsulɔi lɛ eye naa denario kome jenamɔ lɛ, ewo amɛ gbɛ kɛtee ewein trom lɛ mli. Ni kɛbaa ŋmɛlɛ nɛɛhu mli lɛ, eje kpo ekoŋŋ ni eyana mɛi krokomɛi damɔ shi yaka yɛ jara lɛ nɔ; ni ekɛɛ mɛnɛɛmɛi hu akɛ: ‘Nyɛ hu nyɛyaa wein trom lɛ mli, ni nɔ ni ja lɛ, maha nyɛ.’ Ni amɛtee. Asaŋ kɛbaa ŋmɛlɛ nyɔŋma kɛ enyɔ mli kɛ ŋmɛji etɛ mli lɛ eje kpo, ni eyafee nakai nɔŋŋ. Ni kɛbaa gbɛkɛ ŋmɛji enumɔ mli lɛ, eje kpo ni eyana mɛi krokomɛi hu damɔ shi yaka, ni ekɛɛ amɛ akɛ: ‘Mɛɛba ni nyɛdamɔ shi yaka yɛ biɛ jenamɔ nɛɛ fɛɛ nɛɛ?’ Amɛkɛɛ lɛ akɛ: ‘Akɛni mɔ ko ebɔko wɔ apaa lɛ hewɔŋ.’ Ekɛɛ amɛ akɛ: ‘Nyɛ hu nyɛyaa wein trom lɛ mli.’ ”

Shiatsɛ lɛ, loo wein trom lɛ nɔtsɛ ji Yehowa Nyɔŋmɔ, ni wein trom lɛ ji Israel maŋ lɛ. Nitsulɔi ni yɔɔ wein trom lɛ mli lɛ ji gbɔmɛi ni akɛ amɛ ba Mla kpaŋmɔ lɛ mli lɛ; amɛji nakai Yudafoi ni yɔɔ bɔfoi lɛ agbii lɛ amli lɛ pɔtɛɛ. Mɛi ni tsuɔ nii gbi muu fɛɛ lɛ pɛ akɛ amɛ fee nyɔmɔwoo he kpaŋmɔ lɛ. Nyɔmɔwoo lɛ ji denario kɛha gbi muu nitsumɔ. Akɛni ‘ŋmɛlɛtswaa ni ji etɛ’ lɛ ji leebi ŋmɛlɛ 9:00 hewɔ lɛ, mɛi ni atsɛ yɛ ŋmɛlɛtswai ni ji 3, 6, 9, kɛ 11 lɛ kɛ ŋmɛlɛtswai 9, 6, 3, kɛ 1 pɛ baatsu nii taakɛ ato naa lɛ.

Ŋmɛlɛtswai 12, aloo gbi muu fɛɛ nitsulɔi lɛ damɔ shi kɛha Yudafoi ahiɛnyiɛlɔi ni jamɔ mli nifeemɔi ehe amɛbe be fɛɛ be lɛ. Amɛtamɔɔɔ Yesu kaselɔi lɛ, ní yɛ amɛshihilɛ mli be babaoo mli lɛ, amɛtsu nii akɛ wolɛi loo mɛi ni tsuɔ nitsumɔi krokomɛi lɛ. Eyɛ mli aahu kɛbashi afi 29 Ŋ.B. lɛ gbo be mli dani “shiatsɛ” lɛ tsu Yesu Kristo kɛba koni ebabua mɛnɛɛmɛi anaa ni efee amɛ ekaselɔi. No hewɔ lɛ amɛbatsɔmɔ “sɛɛkpelɔi,” aloo gbɛkɛ ŋmɛji enumɔ mli wein trom lɛ mli nitsulɔi.

Yɛ naagbee lɛ, mfonirifeemɔ mli gbi lɛ ba naagbee kɛ Yesu gbele lɛ, ni be bashɛ ni esa akɛ awo nitsulɔi lɛ nyɔmɔ. Akɛ mla ni akɛtsuuu nii lɛ tsu nii, ni ji akɛ awo sɛɛkpelɔi lɛ anyɔmɔ klɛŋklɛŋ, taakɛ atsɔɔ mli lɛ: “Shi beni shɛ gbɛkɛ lɛ, wein trom tsɛ lɛ kɛɛ etsulɔ nukpa lɛ akɛ: ‘Tsɛ nitsulɔi lɛ ni owo amɛ nyɔmɔ, ni obɔi kɛjɛ sɛɛkpeebii lɛ anɔ kɛyashi klɛŋklɛŋbii lɛ anɔ.’ Ni beni gbɛkɛ ŋmɛji enumɔ nɔ bii lɛ ba lɛ, amɛ fɛɛ amɛna denario kome kome. Ni beni klɛŋklɛŋbii lɛ ba lɛ, amɛsusu akɛ abaaŋmɛ amɛnɔ lɛ nɔ; shi amɛ hu amɛna denario kome kome. Shi beni eshɛ amɛdɛŋ lɛ, amɛshɛ tɔkemɔ kɛ shiatsɛ lɛ woo, amɛkɛɛ: ‘Sɛɛkpeebii nɛɛ, ŋmɛlɛtswaa kome pɛ kɛkɛ amɛtsu nii, ni oha amɛ kɛ wɔ ni wɔtsu nii jenamɔ ni etɔ wɔ ni latsaa etsa wɔ lɛ fɛɛ pɛ.’ Shi ehere nɔ ekɛɛ amɛteŋ mɔ kome akɛ: ‘Naanyo, mifekoo efɔŋ ko; ani jeee denario mikɛo ye naa? Ŋɔɔ nɔ ni ji onɔ lɛ ni oya. Shi miisumɔ akɛ maha sɛɛkpee mɔ nɛɛ tamɔ bɔ ni mihao lɛ nɔŋŋ. Aloo mibɛ hegbɛ akɛ mikɛ mi diɛŋtsɛ minii feɔ nɔ ni misumɔɔ? Ani mimlihilɛ nɛɛ hewɔ ohiŋmɛi etsu nɛɛ?’ ” Yɛ naamuamɔ mli lɛ, Yesu ti sane ko ni ewie momo kɛtsɔ hiɛ lɛ mli ekoŋŋ akɛ: “Nɛkɛ ni sɛɛkpeebii aaatsɔmɔ klɛŋklɛŋbii, ni klɛŋklɛŋbii aaatsɔmɔ sɛɛkpeebii.”

Amɛnine shɛ denario lɛ nɔ, jeee yɛ Yesu gbele be mli, shi moŋ yɛ Pentekoste yɛ afi 33 Ŋ.B., beni Kristo, “tsulɔ nukpa” lɛ fɔse mumɔ krɔŋkrɔŋ lɛ eshwie ekaselɔi lɛ anɔ lɛ. Yesu kaselɔi lɛ tamɔ “sɛɛkpeebii lɛ,” aloo ŋmɛji enumɔ mli nitsulɔi lɛ. Denario lɛ damɔɔɔ shi kɛhaaa mumɔ krɔŋkrɔŋ lɛ nikeenii lɛ diɛŋtsɛ. Denario lɛ ji nɔ ko ni kaselɔi lɛ kɛbaatsu nii yɛ shikpɔŋ nɛɛ nɔ. Eji nɔ ko ni tsɔɔ amɛshihilɛ, amɛ naanɔ wala. Eji hegbɛ ni amɛnaa akɛ amɛfee mumɔŋ Israelbii, mɛi ni afɔ amɛ mu ni amɛshiɛ Nyɔŋmɔ Maŋtsɛyeli lɛ.

Etsɛɛɛ kɛkɛ ni mɛi ni abɔ amɛ apaa klɛŋklɛŋ lɛ na akɛ awo Yesu kaselɔi lɛ nyɔmɔ, ni amɛna amɛ ni amɛkɛ mfonirfeemɔŋ denario lɛ miitsu nii. Shi amɛmiitao babaoo fe mumɔ krɔŋkrɔŋ lɛ kɛ Maŋtsɛyeli hegbɛi ni fata he lɛ. Amɛ tɔkemɔi kɛ wiemɔi-kɛ-shimɔ lɛ tsɔ yiwaa ni amɛkɛbaa Kristo kaselɔi lɛ, wein trom lɛ mli nitsulɔi “sɛɛkpelɔi” lɛ anɔ.

Ani nakai klɛŋklɛŋ afii oha lɛ mli mlibaa lɛ pɛ ji Yesu abɛbua lɛ mlibaa? Dabi, Kristendom osɔfoi ni yɔɔ afii ohai 20 nɛɛ mli lɛ hu ebafee tamɔ “klɛŋklɛŋbii” ni abɔ amɛ apaa kɛha nitsumɔ yɛ Nyɔŋmɔ mfonirifeemɔŋ wein trom lɛ mli, kɛtsɔ amɛgbɛhei kɛ hegbɛi ni amɛyɔɔ lɛ anɔ. Amɛbuɔ shiɛlɔi ni ejɔɔ amɛhe nɔ ni kɛ amɛhe ebabɔ Buu Mɔɔ Biblia kɛ Woji Bibii Asafo lɛ he lɛ akɛ “sɛɛkpelɔi” kwraa yɛ mɛi ni naa nitsumɔ yɛ Nyɔŋmɔ sɔɔmɔ mli lɛ ateŋ. Shi, yɛ anɔkwale mli lɛ, nɛkɛ mɛi ni osɔfoi lɛ kpoo amɛ nɛɛ ji mɛi ni na denario lɛ—hegbɛ ni woo yɔɔ mli akɛ amɛaasɔmɔ akɛ Nyɔŋmɔ ŋwɛi Maŋtsɛyeli lɛ najiaŋdamɔlɔi ni afɔ amɛ mu lɛ. Mateo 19:30–20:16.

▪ Mɛni wein trom lɛ damɔ shi kɛha? Namɛi wein trom nɔtsɛ lɛ kɛ nitsulɔi ni tsu nii ŋmɛlɛtswai 12 kɛ ŋmɛlɛtswaa 1 lɛ damɔ shi kɛha?

▪ Mɛɛ be mli mfonirifeemɔŋ nitsumɔ gbi lɛ ba enaagbee, ni mɛɛ be awo nyɔmɔ?

▪ Mɛni denario ni akɛwo nyɔmɔ lɛ damɔ shi kɛha?