Ye Omanye Yɛ Hiɛjoomɔ Tsɔne Lɛ Ni Oootsi Ohe Kɛjɛ He Lɛ Mli
“Mɛi ni taoɔ nii pii ana lɛ gbeeɔ kaa kɛ tsɔne . . . mli.—1 TIMOTEO 6 : 9.
1. Mɛni hewɔ esa akɛ wɔsusu tsɔnei ahe lɛ?
EKOLƐ wiemɔ “tsɔne” lɛ baaha gbɔbilɔ ko ni kɛ nɔ ko ehɔ shi yɛ ŋaa mli koni ekɛdũ kooloo ko ni hiɛ bɛ ehe nɔ lɛ hesusumɔ aba ojwɛŋmɔ mli. Shi kɛlɛ, Nyɔŋmɔ haa efeɔ faŋŋ ehaa wɔ akɛ jeee nɛkɛ nibii diɛŋtsɛ ni akɛhɔlɔ shi nɛɛ ji tsɔnei ni yɔɔ oshara fe fɛɛ kɛha wɔ lɛ, shi moŋ nibii ni baanyɛ atsɔ wɔ tsɔne yɛ mumɔŋ loo jeŋba mli. Abonsam he esa waa kɛ nɛkɛ tsɔnei nɛɛ atsɔɔ.—2 Korintobii 2:11; 2 Timoteo 2:24-26.
2. (a) Yehowa yeɔ ebuaa wɔ koni wɔkwa tsɔnei ni yɔɔ oshara yɛ mɛɛ gbɛ nɔ? (b) Mɛɛ tsɔne titri ko wɔgbalaa wɔjwɛŋmɔ kɛbaa nɔ bianɛ?
2 Yehowa haa wɔleɔ Satan tsɔnei ni yɔɔ sɔrɔtoi babaoo nɛɛ ekomɛi ni ekɛyeɔ ebuaa wɔ. Akɛ nɔkwɛmɔ nɔ lɛ, Nyɔŋmɔ bɔɔ wɔ kɔkɔ akɛ, kɛ wɔwieee kɛ nilee, ni wɔwieɔ nɔ fɛɛ nɔ he oya nɔŋŋ, aloo wɔwieɔ nɔ ni esaaa ni wɔwieɔ he lɛ, no lɛ wɔnaabu baanyɛ afee tsɔne eha wɔ. (Abɛi 18:7; 20:25) Henɔwomɔ baanyɛ atsɔ wɔ tsɔne, tamɔ bɔ ni mlifutsɛmɛi kɛ bɔɔ baanyɛ afee lɛ nɔŋŋ. (Abɛi 22:24, 25; 29:25) Shi nyɛhaa wɔyaa tsɔne kroko he wɔkwɛa: “Mɛi ni taoɔ nii pii ana lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ni tsiɔ mɛi ewoɔ hiɛkpatamɔ kɛ laajemɔ mli lɛ amli.” (1 Timoteo 6:9) Abaanyɛ amu nɔ ni hɔ nakai tsɔne lɛ sɛɛ, aloo enɔdaamɔ nɔ lɛ naa yɛ wiemɔ ni ji “hiɛjoomɔ” mli. Eyɛ mli akɛ bei pii lɛ, anaa hiɛjoomɔ he odaseyeli yɛ faishitswaa akɛ aaaná nii babaoo lɛ mli moŋ, shi hiɛjoomɔ ji tsɔne ni hiɛ sui babaoo diɛŋtsɛ.
Yehowa Bɔɔ Wɔ Kɔkɔ yɛ Oshara He
3, 4. Mɛɛ nikasemɔ ni kɔɔ hiɛjoomɔ he yɔɔ adesai ablema yinɔsane mli?
3 Klɛŋklɛŋ kwraa lɛ, hiɛjoomɔ ji nii babaoo namɔ sɛɛdii shɛii loo nɔ ni tekeɔ nɔ, ekɔɔɔ he eko kɛji nii lɛ ji shika, heloonaa nibii, hewalɛ, bɔlɛnamɔ, aloo nibii krokomɛi. Jeee wɔ ji klɛŋklɛŋ bii ni yajeɔ hiɛjoomɔ tsɔne lɛ he oshara mli. Mra mli tɔ̃ɔ yɛ Eden trom lɛ mli ni hiɛjoomɔ tsɔ Hawa tsɔne, kɛkɛ ni no sɛɛ lɛ, Adam hu yabote mli. Hawa hefatalɔ lɛ yɛ shihilɛ mli niiashikpamɔ babaoo fe lɛ, ni Yehowa diɛŋtsɛ kɛ famɔi eha nuu lɛ tɛɛ. Nyɔŋmɔ eha amɛ paradeiso shia. Amɛbaanyɛ amɛye niyenii kpakpai sɔrɔtoi babaoo, ni adũ yɛ shikpɔŋ ni muji bɛ nɔ lɛ mli ŋɔɔmɔ. Amɛbaanyɛ amɛkpa gbɛ akɛ amɛbaafɔ bii ni eye emuu, ni amɛkɛ amɛ ahi shi ni amɛsɔmɔ Nyɔŋmɔ kɛya naanɔ. (1 Mose 1:27-31; 2:15) Ani enɛ ebafeŋ nɔ ni fa bɔ ni sa ni aaaha adesa ko mii ashɛ ehe?
4 Ni kɛlɛ, nii ni fa bɔ ni sa ni mɔ ko yɔɔ lɛ etsiii hiɛjoomɔ ni aaatsɔ tsɔne kɛha lɛ lɛ naa. Gbɛkpamɔ ni Hawa ná akɛ eeetamɔ Nyɔŋmɔ, ni ena heyeli babaoo ni efee mlai eha lɛ diɛŋtsɛ ehe lɛ tsɔ lɛ tsɔne. Etamɔ nɔ ni Adam miitao ni ehefatalɔ ni he yɔɔ fɛo waa lɛ kɛ lɛ ahi shi be fɛɛ be, ni nɔ ni baaba lɛ kɔɔɔ he eko. Akɛni hiɛjoomɔ tsɔ nɛkɛ adesai ni eye muu nɛɛ po tsɔne hewɔ lɛ, obaanyɛ ona nɔ hewɔ ni hiɛjoomɔ baanyɛ afee oshara kɛha wɔ hu lɛ jogbaŋŋ.
5. Te kwamɔ ni wɔɔkwa hiɛjoomɔ he tsɔne lɛ he hiaa ha tɛŋŋ?
5 Esa akɛ wɔkwɛ wɔhe nɔ jogbaŋŋ ni hiɛjoomɔ akatsɔ̃ wɔ tsɔne ejaakɛ bɔfo Paulo bɔɔ wɔ kɔkɔ akɛ: “Ani nyɛleee akɛ amimyelɔi anine shɛŋ Nyɔŋmɔ maŋtsɛyeli lɛ nɔ? Nyɛkahaa alakaa nyɛ! Ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii, loo julɔi loo hiɛjoolɔi . . . anine shɛŋ Nyɔŋmɔ maŋtsɛyeli lɛ nɔ kwraa.” (1 Korintobii 6:9, 10) Paulo kɛɔ wɔ hu akɛɛ “Shi ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ akatsĩ ta tete yɛ nyɛteŋ.” (Efesobii 5:3) No hewɔ lɛ esaaa ni hiɛjoomɔ feɔ saneyitso ni wɔkɛgbaa sane po kɛ yiŋtoo akɛ wɔkɛmiiha wɔheloo ni yeee emuu lɛ mii ashɛ ehe.
6, 7. (a) Mɛɛ Biblia mli nɔkwɛmɔ nii komɛi maa bɔ ni hiɛjoomɔ baanyɛ afee nɔ ni yɔɔ hewalɛ lɛ nɔ mi? (b) Mɛni hewɔ esa akɛ nakai nɔkwɛmɔ nii lɛ afee kɔkɔbɔɔ kɛha wɔ lɛ?
6 Yehowa eŋmala nɔkwɛmɔ nii pii hu eshwie shi koni ehɛle wɔ shi yɛ hiɛjoomɔ he oshara lɛ he. Kaimɔ Akan hiɛjoomɔ lɛ. Nyɔŋmɔ kɛɛ akɛ esa akɛ akpata Yeriko hiɛ, shi esa akɛ akɛ eshika, jwiɛtɛi, akɔɔble, kɛ dade lɛ aya E-nitoohe lɛ. Ekolɛ kɛjɛ shishijee lɛ, Akan kpɛ eyiŋ akɛ ebaanyiɛ nakai famɔ lɛ sɛɛ, shi hiɛjoomɔ tsɔ lɛ tsɔne. Ni eyashɛ Yeriko nɔŋŋ lɛ, efee lɛ tamɔ nɔ ni efa gbɛ kɛha nihemɔ, ni eeye nibii anaa kɛ jara ni waaa kwraa, kɛ nibii lɛ ekomɛi po tamɔ atade fɛfɛo ko ni baasa lɛ jogbaŋŋ. Beni eloɔ shika kɛ jwiɛtɛi ni jara baanyɛ ashɛ shika dɔlai akpei abɔ lɛ, ekolɛ eeesusu po akɛ, ‘Mɛɛ ninamɔ nɛ! Enamɔ waaa kwraa, tamɔ juu pɛpɛɛpɛ.’ Ni nakai pɛpɛɛpɛ hu eji! Akɛni ekɛ hiɛkɔɔ kɔlɔ nibii ni sa akɛ ekpata hiɛ loo ekɛbaha lɛ hewɔ lɛ, eju Nyɔŋmɔ nibii, ni no ha Akan laaje ewala. (Yoshua 6:17-19; 7:20-26) Agbɛnɛ, susumɔ Gehazi kɛ Yuda Iskariot nɔkwɛmɔ nii lɛ hu he okwɛ.—2 Maŋtsɛmɛi 5:8-27; Yohane 6:64; 12:2-6.
7 Esaaa ni wɔkuɔ wɔhiɛ wɔfɔɔ anɔkwale ni eji nɛɛ nɔ, akɛ mɛi etɛ ni atsi amɛ tã yɛ yiteŋgbɛ lɛ jeee wɔŋjalɔi ni leee Yehowa mlai. Shi moŋ, amɛkɛ Nyɔŋmɔ yɛ wekukpaa mli, ni amɛjɔɔ amɛhe nɔ amɛha lɛ. Amɛ fɛɛ amɛna naakpɛɛ nibii ni kulɛ esa akɛ no aha Nyɔŋmɔ hewalɛ kɛ bɔ ni ehe hiaa akɛ aaana ehiɛ duromɔ lɛ ana amɛnɔ hewalɛ. Shi kɛlɛ, hiɛjoomɔ he tsɔne lɛ kɛ amɛ tee shigbeemɔ mli. Wɔ hu wɔbaanyɛ wɔfite wɔkɛ Nyɔŋmɔ teŋ wekukpaa lɛ kɛ wɔha hiɛjoomɔ tsɔ wɔ tsɔne yɛ gbɛ ko nɔ. Mɛɛ hiɛjoomɔ gbɛi loo sui sɔrɔtoi yɔɔ ni baanyɛ afee oshara titri kɛha wɔ?
Hiɛjoomɔ Tsɔɔ Mɔ Tsɔne Kɛha Nifalɛ loo Heloonaa Ninamɔ
8. Mɛɛ kɔkɔbɔɔ Biblia lɛ kɛhaa yɛ ninamɔ he?
8 Kristofoi pii enu kɔkɔbɔi ni yɔɔ faŋŋ kɛjɛ Biblia lɛ mli, ni wieɔ shiɔ ninamɔ he suɔmɔ ni wɔɔna, aloo wɔhe ni wɔɔgbe kɛtao nii babaoo. Mɛni hewɔ otiii enɛɛmɛi ekomɛi amli, tamɔ nɔ ni wɔnaa yɛ Mateo 6:24-33; Luka 12:13-21; kɛ 1 Timoteo 6:9, 10 lɛ? Eyɛ mli akɛ ekolɛ onuɔ he akɛ okpɛlɛɔ ŋaawoo nɛɛ nɔ ni onyiɛɔ sɛɛ hu moŋ, shi ani enyɛŋ efee akɛ ekolɛ Akan, Gehazi, kɛ Yuda hu baakɛɛ akɛ amɛ hu amɛkɛ ŋaawoo lɛ kpaa gbee? Eyɛ faŋŋ akɛ, esa akɛ wɔfee babaoo fe kpɛlɛmɔ ni wɔɔkpɛlɛ nɔ yɛ wɔjwɛŋmɔ mli kɛkɛ. Esa akɛ wɔkwɛ jogbaŋŋ koni hiɛjoomɔ tsɔne kɛha nifalɛ loo heloonaa nii babaoo namɔ lɛ akasa wɔ daa gbi shihilɛi ahe.
9. Mɛni hewɔ esa akɛ wɔpɛi wɔsu yɛ nihemɔ he lɛ mli lɛ?
9 Ehe hiaa ni wɔhe nibii komɛi yɛ daa gbi shihilɛ mli—niyenii, atadei, kɛ shia nibii krokomɛi. (1 Mose 42:1-3; 2 Maŋtsɛmɛi 12:11, 12; Abɛi 31:14, 16; Luka 9:13; 17:28; 22:36) Shi jarayeli je lɛ woɔ hewalɛ ni ana nibii babaoo kɛ nibii heei hu. Nibii ahe adafitswai ni akɛwoɔ adafitswaa woji, woji tɛtrɛbii, kɛ TV mli fɛɛ obɔ lɛ ji teemɔŋ mɔdɛŋbɔi ni akɛwoɔ hiɛjoomɔ he hewalɛ. Nɛkɛ kanyamɔi nɛɛ baanyɛ aje kpo yɛ shwapoi ni eyi obɔ kɛ atadei, kootui, kɛ atadei sɔrɔtoi ni akɛgbeɔ fɛ̃i, kɛ aspaatrei heei, kɛ tsɔnei ni akɛtswaa lala, kɛ mfoniri-shamɔ tsɔnei hu lɛ amli. Kristofoi baasumɔ ni amɛbi amɛhe akɛ, ‘Ani nihemɔ ebatsɔ nɔ ni misumɔɔ waa aloo minaa he miishɛɛ fe fɛɛ yɛ mishihilɛ mli?’ ‘Ani nibii heei ni minaa lɛ ahe miihia mi lɛlɛŋ, aloo ani jarayeli je lɛ miidũ hiɛjoomɔi wui yɛ mimli koni ekwɛ̃?—1 Yohane 2:16.
10. Mɛɛ hiɛjoomɔ he tsɔne ko yɔɔ oshara titri kɛha hii?
10 Kɛ nihemɔ ji tsɔne ni fɔɔ yei duu waa lɛ, no lɛ shika babaoo namɔ ji nɔ ni dũɔ hii babaoo. Yesu fee nɛkɛ tsɔne nɛɛ he mfoniri kɛ nuu niiatsɛ ko ni naa nii babaoo, shi kɛlɛ etswa efai shi akɛ ‘ebaakumɔ eboŋoi lɛ eshwie shi, ni emamɔ ewuji, koni ebua eŋmaa kɛ enibii kpakpai lɛ fɛɛ anaa yɛ jɛi.’ Yesu haaa wɔyiŋ afee wɔ kɔshikɔshi yɛ oshara ni yɔɔ he lɛ he, akɛ: “Nyɛhiɛ ahia nyɛhe nɔ jogbaŋŋ yɛ hiɛjoomɔ hewɔ.” (Luka 12:15-21) Wɔyɛ nii jio, wɔbɛ nii jio, esa akɛ wɔbo nakai ŋaawoo lɛ toi.
11. Hiɛjoomɔ kɛha shika babaoo namɔ baanyɛ atsɔ Kristofonyo tsɔne yɛ mɛɛ gbɛ nɔ?
11 Bei pii lɛ, shika babaoo namɔ, loo nibii ni shika baanyɛ ahe lɛ he hiɛjoomɔ hiɔ teemɔŋ. Ekolɛ ebaajie ehe kpo akɛ ŋaatsɔɔ kɛha shikanamɔ oya—ekolɛ hegbɛ ni baa shikome yɛ mɔ wala beaŋ kɛha shika gbɛfaŋ shweshweeshwefeemɔ kɛtsɔ nitsumɔ ko ni yɔɔ oshara tsumɔ nɔ. Aloo ekolɛ nɔ ko aaalaka mɔ ko ni etao shika kɛtsɔ nitsumɔ gbɛi gbohii loo nɔ ni mla ekpɛlɛɛɛ nɔ lɛ anɔ. Nɛkɛ hiɛjoomɔ mumɔ nɛɛ baanyɛ ana mɔ nɔ hewalɛ, ni etsɔ lɛ tsɔne. (Lala 62:11; Abɛi 11:1; 20:10) Kristofoi asafo lɛ mlibii lɛ ateŋ mɛi komɛi eje nitsumɔi ashishi kɛ gbɛkpamɔ akɛ amɛnyɛmimɛi ni heɔ amɛ amɛyeɔ lɛ baafee amɛkpelɔi titri. Kɛ oti ni ma amɛhiɛ lɛ jeee ni amɛkɛ nibii loo sɔɔmɔ ni he hiaa lɛ aha kɛtsɔ ‘mɔdɛŋbɔɔ nɔ, ni amɛkɛ amɛniji atsu nitsumɔ kpakpa,’ shi moŋ ni amɛna shika oyayaayai kɛjɛ amɛnanemɛi Kristofoi ahe lɛ, no lɛ amɛmiifee enɛ kɛmiijɛ hiɛjoomɔ mli. (Efesobii 4:28; Abɛi 20:21; 31:17-19, 24; 2 Tesalonikabii 3:8-12) Shika he hiɛjoomɔ etsirɛ mɛi komɛi ewo atsi-atsi tikiti hemɔ, asɔshwɛmɔ, loo loto-tsemɔ mli. Mɛi krokomɛi hu eku amɛhiɛ amɛshwie mlihilɛ kɛ nilee ni amɛkɛaatsu saji ahe nii lɛ nɔ, ni amɛkɛ oyaiyeli eyasama mɛi, kɛ hiɛnɔkamɔ akɛ amɛbaana nii loo shika babaoo kɛjɛ mli.
12. Mɛni hewɔ wɔle akɛ abaanyɛ aye ninamɔ he hiɛjoomɔ nɔ kunim lɛ?
12 Nibii ni wɔtsi ta kɛtsɔ hiɛ nɛɛ ji hei ni hekaa-kɛ-kwɛmɔ sa jogbaŋŋ yɛ, bɔni afee ni wɔnyɛ wɔkɛ anɔkwayeli ana akɛ ani hiɛjoomɔ miitsu nii yɛ wɔmli lo. Ni kɛ eetsu nii yɛ wɔmli po lɛ, wɔbaanyɛ wɔtsake. Kaimɔ akɛ Zakeo tsake. (Luka 19:1-10) Kɛ mɔ ko na akɛ hiɛjoomɔ kɛha nifalɛ loo heloonaa ninamɔ yɛ emli lɛ, no lɛ esa akɛ etswa efai shi tamɔ Zakeo fee lɛ, ni ekɛje nakai tsɔne lɛ mli.—Yeremia 17:9.
Hiɛjoomɔ yɛ Shihilɛ Mli Nibii Krokomɛi Amli
13. Lala 10:18 gbalaa wɔjwɛŋmɔ kɛyaa mɛɛ hiɛjoomɔ he tsɔne kroko nɔ?
13 Efeɔ mlɛo kɛhaa mɛi komɛi akɛ amɛaana oshara ni yɔɔ hiɛjoomɔ he lɛ yɛ shika loo ninamɔ gbɛfaŋ, fe gbɛi krokomɛi ni etsɔɔ nɔ ejeɔ kpo yɛ lɛ. Hela wiemɔi ashishitsɔɔmɔ wolo ko wieɔ akɛ wiemɔi ni atsɔɔ shishi akɛ “hiɛjoomɔ” loo “hiɛkɔɔ” lɛ hiɛ shishinumɔ ko ni tsɔɔ “ babaoo taomɔ,” yɛ nɔ ni kɔɔ hewalɛ loo nibii krokomɛi, kɛ heloonaa nii pii namɔ he lɛ mli.” Hɛɛ, hiɛjoomɔ ni wɔkɛaatao hewalɛ ni wɔkɛye mɛi krokomɛi anɔ, ekolɛ ni wɔha amɛhe akpokpo yɛ wɔhewalɛ shishi lɛ baanyɛ atsɔ wɔ tsɔne.—Lala 10:18.
14. Mɛɛ hei komɛi hewalɛnamɔ he suɔmɔ ni aaana lɛ efee oshara yɛ?
14 Kɛjɛ mra mli tɔ̃ɔ lɛ, adesai ni yeee emuu lɛ naa hewalɛ ni anaa yɛ mɛi krokomɛi anɔ lɛ he miishɛɛ. Nyɔŋmɔ tsɔ hiɛ ena akɛ awerɛho sane ni baajɛ adesa esha mli aba ji akɛ, wumɛi pii ‘baaye amɛŋamɛi anɔ.’ (1 Mose 3:16) Shi, nɛkɛ shigbeemɔ nɛɛ etee shɔŋŋ kɛteke gbalashihilɛ mli nifeemɔi. Afii akpei abɔ sɛɛ lɛ, Biblia ŋmalɔ ko wie akɛ “gbɔmɔ yeɔ enaanyo gbɔmɔ nɔ ni ekɛyeɔ ehe awui.” (Jajelɔ 8:9) Ekolɛ ole bɔ ni enɛ ji anɔkwale ha yɛ maŋkwramɔŋ kɛ asraafoi asaji amli, shi ani eeenyɛ efee akɛ yɛ wɔ diɛŋtsɛ wɔ shihilɛi hu mli lɛ, wɔbɔɔ mɔdɛŋ ni wɔna mɛi anɔ hewalɛ loo hegbɛ babaoo?
15, 16. Mɛɛ nibii amli nɛkɛ suɔmɔ ni aaana aha hewalɛ babaoo namɔ lɛ baanyɛ atsɔ Kristofonyo lɛ tsɔne yɛ? (Filipibii 2:3)
15 Wɔ fɛɛ wɔkɛ adesai krokomɛi naa sharamɔ—yɛ wɔweku kɔkrɔɔ loo wekui ni mli lɛɛ amli, yɛ wɔnitsumɔ hei aloo yɛ skul, yɛ nanemɛi ateŋ, kɛ agbɛnɛ yɛ asafo lɛ mli. Bei komekomei, aloo bei pii lɛ, ekolɛ wɔɔna gbɛfaŋnɔ yɛ nɔ ni abaafee, kɛ bɔ ni abaafee lɛ aha kɛ be ni abaafee lɛ he susumɔ mli. Tɔmɔ ko bɛ enɛ he, ni ejeee efɔŋ hu. Shi, ani wɔnaa hegbɛ ni ekolɛ wɔyɔɔ ni wɔkɛaatsu nii lɛ he miishɛɛ fe nine? Ani eeenyɛ efee akɛ ekolɛ wɔsumɔɔ ni wɔ wɔfee naagbee yiŋkpɛɛ, ni wɔmiitao nakai babaoo hu? Bei pii lɛ, je lɛŋ nitsumɔ nɔkwɛlɔi loo onukpai fɔɔ nɛkɛ su nɛɛ kpojiemɔ kɛtsɔɔ mɛi ni kpɛlɛɔ nɔ fɛɛ nɔ nɔ haa amɛ, ni amɛtsɔɔɔ jwɛŋmɔi sɔrɔtoi yɛ saji ahe, ni amɛteee shi hu amɛwooo amɛnɔ onukpai lɛ ajeŋbii asu (hiɛjoomɔ) kɛha hegbɛ taomɔ, ni amɛkɛbɔleɔ amɛhe lɛ nɔ.
16 Tsɔne ni esa akɛ wɔtsi wɔhe kɛjɛ he nɛ, beni wɔkɛ wɔnanemɛi Kristofoi yeɔ lɛ. Yesu kɛɛ: “Nyɛle akɛ maji lɛ anɔ lumɛi lɛ yeɔ amɛnɔ, ni amɛteŋ gbɔmɛi agboi lɛ hu yɛ hewalɛ yɛ amɛnɔ. Akafee nakai yɛ nyɛteŋ; shi mɔ fɛɛ mɔ ni sumɔɔ akɛ etsɔ agbo yɛ nyɛteŋ lɛ, lɛ moŋ etsɔ nyɛsɔɔlɔ.” (Mateo 20:25, 26) Esa akɛ nɛkɛ heshibaa nɛɛ aje kpo beni Kristofoi onukpai kɛ amɛnanemɛi onukpai krokomɛi, asafoŋ sɔɔlɔi, kɛ tooku lɛ yeɔ lɛ. Akɛ nɔkwɛmɔ nɔ lɛ, ani onukpai asɛinɔtalɔ ko jieɔ bɔ ni esumɔɔ ni ena hewalɛ babaoo lɛ kpo kɛtsɔɔ onukpai krokomɛi ni ekɛ amɛ kpeɔ kɛsusuɔ saji bibii pɛ ahe, shi lɛ diɛŋtsɛ pɛ efeɔ yiŋkpɛi titrii fɛɛ lɛ nɔ? Ani eesumɔ lɛlɛŋ ni ekɛ nitsumɔi awo mɛi krokomɛi adɛŋ? Naagbai baanyɛ ajɛ mli aba, kɛji asafoŋ sɔɔlɔ ko ni miikwɛ kpee kɛha shiɛmɔyaa nɔ lɛ fee shɛii tsɔ yɛ egbɛjianɔtoo mli, ni ekolɛ eefee mlai po lɛ.—1 Korintobii 4:21; 9:18; 2 Korintobii 10:8; 13:10; 1 Tesalonikabii 2:6, 7.
17. Mɛni hewɔ esa akɛ wɔsusu niyenii he kɛ wɔmiisusu hiɛjoomɔ he tsɔne he lɛ?
17 Niyenii ji he kroko hu ni hiɛjoomɔ baanyɛ atsɔ wɔ tsɔne yɛ. Yɛ anɔkwale mli lɛ, eji adebɔɔ su akɛ wɔɔna niyeli kɛ ninumɔ mli ŋɔɔmɔ; Biblia lɛ wieɔ he kɛ nɔkpɛlɛmɔ. (Jajelɔ 5:18) Shi kɛlɛ, efɔɔ kaa akɛ suɔmɔ ni anaa yɛ enɛ gbɛfaŋ lɛ daa kɛyaa hiɛ yɛ be kplaŋŋ ko mli, ni emli lɛɛɔ kwraa kɛtekeɔ nɔ ni nilee yɔɔ mli akɛ anaa mli ŋɔɔmɔ, ni fa bɔ ni sa. Kɛ enɛ jeee nɔ ni sa akɛ Nyɔŋmɔ tsuji asusu he waa lɛ, belɛ mɛni hewɔ mɔ ni Yehowa Wiemɔ lɛ kɛɛ yɛ Abɛi 23:20, akɛ: “Kaaŋɔ ohe ofutu daatɔlɔi kɛ mɛi ni feɔ loo he fu lɛ”? Ni kɛlɛ, mɛɛ gbɛ nɔ wɔɔtsɔ wɔtsi wɔhe kɛjɛ nɛkɛ tsɔne nɛɛ he?
18. Mɛɛ hekaa-kɛ-kwɛmɔ wɔ diɛŋtsɛ wɔɔnyɛ wɔfee, yɛ niyenii kɛ daanumɔ gbɛfaŋ?
18 Nyɔŋmɔ wooo ŋaa akɛ ewebii ahi shi yɛ niyenii he mla shɛii naa. (Jajelɔ 2:24, 25) Shi nakai nɔŋŋ hu ekpɛlɛɛɛ niyenii kɛ dãa ni wɔɔha efee oti fe fɛɛ yɛ wɔsanegbaa kɛ gbɛjianɔtoo mli lɛ hu nɔ. Wɔbaanyɛ wɔbi wɔhe akɛ, ‘Ani bei pii lɛ minaa miishɛɛ waa, titri lɛ kɛ miiwie niyenii ko ni miye aloo miito gbɛjianɔ ni maye lɛ he?’ ‘Ani be fɛɛ be nɛɛ miiwie niyenii kɛ dãa he?’ Nɔ kroko hu ni tsɔɔ nakai ji bɔ ni wɔfeɔ wɔnii wɔhaa kɛji wɔna niyenii ko ni jeee wɔ wɔhoo aloo wɔ wɔwo nyɔmɔ, ekolɛ kɛji afɔ̃ wɔ nine kɛtee mɔ kroko shia, aloo afee niyenii yɛ Kristofoi akpee ko shishi. Ani eeenyɛ ebalɛ akɛ no hewɔ lɛ wɔyeɔ pii fe bɔ ni wɔyeɔ daa? Wɔkaiɔ akɛ Esau ŋmɛ gbɛ ni niyenii he bahia lɛ waa fe bɔ ni sa, ni ekɛ efɔŋ ba enɔ kɛtee naanɔ.—Hebribii 12:16.
19. Hiɛjoomɔ baanyɛ afee naagba yɛ bɔlɛnamɔ mli miishɛɛnamɔ he yɛ mɛɛ gbɛ nɔ?
19 Paulo haa wɔ sɛɛyoomɔ yɛ tsɔne kroko hu he: “Shi ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ akatsi tã tete yɛ nyɛteŋ, taakɛ bɔ ni sa mɛi krɔŋkrɔŋi.” (Efesobii 4:17-19; 5:3) Lɛlɛŋ, hiɛjoomɔ baanyɛ aje kpo yɛ bɔlɛnamɔ mli miishɛɛnamɔ he. Shi yɛ anɔkwale mli lɛ, nɛkɛ miishɛɛnamɔ nɛɛ jeɔ kpo yɛ gbɛ ni sa nɔ yɛ gbalashihilɛ wekukpaa lɛ mli. Suɔmɔ ni mli wa waa ni jeɔ kpo yɛ nɛkɛ miishɛɛnamɔ nɛɛ mli lɛ he hiaa waa bɔni afee ni eye ebua wu kɛ ŋa lɛ ni amɛhi shi daa akɛ mɛi ni kɛ amɛhe eha amɛhe kwraa yɛ gbalashihilɛ mli afii babaoo. Shi kɛlɛ, mɛi fioo pɛ ekpɛlɛŋ nɔ akɛ ŋmɛnɛ je nɛɛ maa bɔlɛnamɔ nɔ mi fe nine, ni ehaa nɔ ni jeɔ kpo akɛ hiɛjoomɔ ni Paulo tsi tã lɛ feɔ tamɔ nɔ ni tɔmɔ ko bɛ he. Ni mɛi titri ni kpɛlɛɔ nɛkɛ bɔlɛnamɔ mli miishɛɛnamɔ he susumɔ ni ejaaa nɛɛ nɔ yɛ gbɛ ni waaa kwraa nɔ ji mɛi ni kɛ amɛhe haa bɔlɛnamɔ mli jeŋba shara kɛ yayai-nyiɛmɔ ni jeɔ kpo waa ŋmɛnɛ yɛ sinii, videoi, kɛ woji tɛtrɛbii pii amli, kɛ agbɛnɛ yɛ hiɛtserɛjiemɔ hei hu lɛ.
20. Kristofoi baanyɛ atsɔɔ akɛ amɛhiɛ yɛ amɛhe nɔ yɛ hiɛjoomɔ he oshara lɛ he yɛ bɔlɛnamɔ mli saji ahe yɛ mɛɛ gbɛ nɔ?
20 Esha ni David kɛ Batsheba fee lɛ he sane lɛ tsɔɔ akɛ bɔlɛnamɔ he hiɛjoomɔ baanyɛ atsɔ Nyɔŋmɔ tsuji ateŋ mɔ ko tsɔne. Eyɛ mli akɛ eyɛ hegbɛ ni enaa miishɛɛ yɛ lɛ diɛŋtsɛ egbalashihilɛ mli moŋ, shi David ha bɔlɛnamɔ fɔŋ he suɔmɔ da yɛ emli. Beni ena bɔ ni Uria ŋa lɛ he yɔɔ fɛo ha lɛ, eŋmɛ nakai susumɔ kɛ nifeemɔ ni ji bɔlɛnamɔ fɔŋ mli miishɛɛ ni ekɛ yoo lɛ aaana lɛ gbɛ kwraa. (2 Samuel 11:2-4; Yakobo 1:14, 15) Eka shi faŋŋ akɛ esa akɛ wɔtsi wɔhe kɛjɛ nɛkɛ hiɛjoomɔ nɛɛ he. Eja gbɛ akɛ aaajo hiɛjoomɔ naa foi yɛ gbalashihilɛ mli po. Nɔ ni fataa enɛ he ji bɔlɛnamɔ mli nifeemɔi ni tekeɔ nɔ, ni aaatsi he kɛjɛ he. Wu ni etswa efai shi akɛ ebaatsi ehe kɛjɛ hiɛjoomɔ he yɛ enɛ mli lɛ baajie anɔkwa suɔmɔ kpo yɛ ehefatalɔ lɛ he, ni tsɔɔ akɛ nɔ fɛɛ nɔ ni amɛyi enyɔ lɛ fɛɛ amɛhalaa yɛ bii afɔmɔ gbɛjianɔtoo mli lɛ haŋ nuu lɛ miishɛɛnamɔ afee nɔ ni he hiaa babaoo fe eŋa lɛ amrɔ loo wɔsɛɛ be mli gbɔmɔtsoŋ hewalɛnamɔ —Filipibii 2:4.
Yaa nɔ Otswa Ofai Shi akɛ Obaatsi Ohe Kɛjɛ Hiɛjoomɔ He
21. Mɛni hewɔ esaaa ni hiɛjoomɔ he ni wɔsusuɔ nɛɛ haa wɔnijiaŋ jeɔ wui lɛ?
21 Yehowa kɛ ŋaawoi kɛ kɔkɔbɔɔi haaa yɛ hekɛnɔfɔɔ ni ebɛ hewɔ. Ele akɛ etsuji ni etuu amɛhe amɛha lɛ lɛ miitao ni amɛsɔmɔ lɛ kɛ anɔkwayeli, ni eyɛ hiɛnɔkamɔ akɛ amɛteŋ mɛi babaoo baaya nɔ amɛfee nakai. Ákɛ kuu lɛ, ebaanyɛ ewie ewebii fɛɛ ahe kɛ wiemɔi ni tamɔ nɔ ni ekɛwie Hiob he, beni ekɛ Satan wieɔ lɛ, akɛ: “Ani oŋɔ otsui ofɔ mitsulɔ Hiob hu nɔ? Ejaakɛ mɔ ko mɔ ko bɛ ni tamɔ lɛ yɛ shikpɔŋ lɛ nɔ, eji nuu ni kpa ko bɛ ehe ni eja, esheɔ Nyɔŋmɔ gbeyei, ni esɔleɔ ehe yɛ efɔŋ he.” (Hiob 1:8) Wɔ ŋwɛi Tsɛ ni yɔɔ suɔmɔ kɛ hekɛnɔfɔɔ lɛ hɛleɔ wɔ shi yɛ tsɔnei, tamɔ nɔ ni kɔɔ hiɛjoomɔ sui sɔrɔtoi ahe lɛ he osharai ahe, ejaakɛ eetao ni wɔya nɔ wɔye lɛ anɔkwa daa ni wɔkɛ nɔ ko akawo wɔhe muji.
22. Kɛji wɔnikasemɔ lɛ ejie lɛ kpo akɛ wɔyɛ wɔ diɛŋtsɛ wɔgbɔjɔmɔ loo oshara ko lɛ, mɛni esa akɛ wɔfee?
22 Wɔteŋ mɔ fɛɛ mɔ ena henumɔ ko yɛ fɔmɔ mli ni haa wɔkpalaŋɔ kɛyaa hiɛjoomɔ he yɛ gbɛ ko nɔ, aloo ekolɛ wɔha etee hiɛ waa yɛ hewalɛ ni jeŋ fɔŋ nɛɛ ena yɛ wɔnɔ lɛ hewɔ. Shi kɛji beni wɔkaseɔ hiɛjoomɔ he nii—nɔ ni kɔɔ shika, heloonaa ninamɔ, hewalɛ kɛ gbɛhe taomɔ, niyenii, loo bɔlɛnamɔ mli miishɛɛnamɔ he lɛ sɛɛ lɛ—ona akɛ gbɔjɔmɔ ko yɛ he ko hu? No lɛ ŋɔɔ Yesu ŋaawoo nɛɛ oto otsui mli, akɛ: “Kɛ onine miitɔ̃tɔ̃ onane lɛ, foo; faŋ nɔ ni okɛ nine kome bote wala mli fe nɔ ni okɛ niji enyɔ atee gehena mli.” (Marko 9:43) Feemɔ tsakemɔi ni he hiaa lɛ yɛ jeŋba kɛ nibii ni onaa he miishɛɛ lɛ agbɛfaŋ. Tsi ohe kɛjɛ hiɛjoomɔ he tsɔne ni kpataa mɔ hiɛ lɛ he. Ni kɛtsɔ Nyɔŋmɔ yelikɛbuamɔ nɔ lɛ, “[oo]obote wala mli.”
Mɛni Mikaseɔ?
◻ Mɛni hewɔ esa akɛ wɔsusu hiɛjoomɔ he tsɔne lɛ he lɛ?
◻ Shika kɛ ninamɔ he tsɔne baanyɛ atsɔ wɔ tsɔne yɛ mɛɛ gbɛ nɔ?
◻ Hiɛjoomɔ yɛ shihilɛ mli hei krokomɛi baanyɛ afee oshara yɛ mɛɛ gbɛ nɔ?
◻ Mɛni esa akɛ efee wɔsu yɛ gbɔjɔmɔi ni ekolɛ wɔyɔɔ yɛ hiɛjoomɔ he lɛ ahe?