Onukpai​—Nyɛkɛ Nyɔŋmɔ Asafo Lɛ Ayea Yɛ Mlijɔlɛ Naa!

“Wɔ mli jɔ yɛ nyɛteŋ, taakɛ bɔ ni bii anyɛ hiɛɔ lɛ diɛŋtsɛ ebii dɔdɔɔdɔ Iɛ.”​—1 TESALONIKABII 2:7

 1. Mɛni hewɔ Odasefonyo anɔkwafo fɛɛ anɔkwafo baanyɛ anu he akɛ eyɛ shweshweeshwe lɛ?

YEHOWA ji Tookwɛlɔ Kpeteŋkpele lɛ. Etoɔ gbɛjianɔ babaoo ehaa etsuji tamɔ gwantɛŋi lɛ ni enyiɛɔ amɛhiɛ “yɛ jalɛ gbɛi anɔ” yɛ egbɛi krɔŋkrɔŋ lɛ hewɔ. No hewɔ lɛ, ehe ehiaaa ni mɛi ni feɔ esuɔmɔnaa nii lɛ ashe nɔ ko fɔŋ ko gbeyei ni amɛbaanyɛ amɛkɛ amɛhiɛ afɔ amɛ-Nyɔŋmɔ ni naa mɔbɔ lɛ nɔ kɛha miishɛjemɔ. Yɛ anɔkwale mli lɛ, mɔ fɛɛ mɔ ni ji Yehowa Odasefonyo anɔkwafo yɛ yiŋtoo kpakpa ni damɔ nɔ enu he akɛ eyɛ shweshweeshwe yɛ Nyɔŋmɔ suɔmɔ kwɛmɔ lɛ mli.​—Lala 23:​1-4.

 2. Akɛ mɔ ni jieɔ Nyɔŋmɔ anunyam kpo etsɔɔ lɛ, mɛni ji sui ni Yesu jie lɛ kpo lɛ ekomɛi?

² Yesu Kristo ji “(Nyɔŋmɔ) enunyam lɛ kpɛmɔ kɛ esu lɛ he nɔ.” (Hebribii 1:​1-4) No hewɔ lɛ Yesu, ni ji Tookwɛlɔ Kpakpa lɛ hu jie suɔmɔ kɛ mɔbɔnalɛ kpo. (Yohane 10:14, 15) Akɛ nɔkwɛmɔ nɔ lɛ, be ko lɛ “ena mɛi babaoo, ni emusuŋ tsɔ lɛ yɛ amɛ hewɔ, ejaakɛ amɛtamɔ tooi ni bɛ kwɛlɔ; ni ebɔi amɛ nibii pii tsɔɔmɔ.”​—Mateo 6:⁠34.

 3. (a) Esa akɛ Kristofoi ni ji nɔkwɛlɔi bibii lɛ ajie mɛɛ sui akpo tamɔ Yehowa Nyɔŋmɔ kɛ Yesu Kristo? (b) Mɛɛ ŋaawoo kɛ kɔkɔbɔɔ bɔfo Paulo kɛha nɔkwɛlɔi?

³ Esa akɛ Kristofoi fɛɛ ‘akase Nyɔŋmɔ ni amɛya nɔ amɛnyiɛ yɛ suɔmɔ mli taakɛ bɔ ni Kristo sumɔ amɛ lɛ.’ (Efesobii 5:​1, 2) No hewɔ lɛ esa akɛ amɛjie suɔmɔ kɛ musuŋtsɔlɛ kpo. Esa akɛ enɛ afee anɔkwale titri lɛ yɛ Nyɔŋmɔ asafo kuu lɛ nɔkwɛlɔi bibii lɛ ahe. Bɔfo Paulo kɛɛ: “No hewɔ lɛ nyɛlea nyɛhe nɔ kwɛmɔ kɛ tooi kuu lɛ fɛɛ ni mumɔ krɔŋkrɔŋ lɛ ewo nyɛ amɛ nɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ ela he lɛ. Ejaakɛ mile akɛ, kɛ mikpa mihe lɛ, klaji fulɔi baabote nyɛteŋ, ni amɛbaaŋ tooi kuu lɛ yi; ni nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛaashwie amɛsɛɛ.”​—Bɔfoi lɛ Asaji 20:​28-30.

 4. (a) Yɛ be ni sa mli lɛ, mɛni ba yɛ Paulo kɔkɔbɔɔ ni yɔɔ Bɔfoi lɛ Asaji 20:​29, 30 lɛ nɔyeli mli? (b) Mɛɛ sanebimɔi esa akɛ wɔsusu he agbɛnɛ?

⁴ Yɛ be ni sa mli lɛ, hemɔkɛyeli kwamɔ “klaji fulɔi” jie amɛhe kpo ni ‘amɛkɛ mlijɔlɛ ebaaa tooi kuu lɛ yi.’ Ni kɛlɛ kwɛ miishɛɛ ni wɔna akɛ onukpai ni yɔɔ Yehowa Odasefoi lɛ ateŋ lɛ kɛ yiwalɛ ni tamɔ nɛkɛ tsuuu nii! Ní kɛlɛ nanemɛi heyelilɔi lɛ miikpa gbɛ akɛ nɛkɛ nɔkwɛlɔi ni akɛ mumɔ ehala amɛ nɛɛ kɛ amɛ aaaye yɛ mɛɛ gbɛ nɔ? Ni te mɛi ni ahala amɛ nɛɛ aaafee tɛŋŋ amɛjie mlijɔlɛ kpo yɛ Yehowa tooi lɛ ahe?

Nyɛkayaa Asafo Kuu Lɛ Nɔ

 5. (a) Te je lɛ nɔyelɔi yeɔ amɛshishibii anɔ amɛhaa tɛŋŋ? (b) Te Yesu tsɔɔ akɛ yiwalɛ nɔyeli bɛ gbɛfaŋnɔ ko yɛ esɛɛnyiɛlɔi lɛ ateŋ eha tɛŋŋ?

⁵ Wɔbaanyɛ wɔkpa gbɛ yɛ gbɛ ni ja nɔ akɛ onukpai ni ji Kristofoi lɛ kɛwɔ baaye yɛ musuŋtsɔlɛ naa. Amɛtamɔɔɔ je lɛŋ nɔyelɔi, ni yeɔ amɛshishibii lɛ anɔ lɛ. Akɛ nɔkwɛmɔ nɔ lɛ, abɔɔ amaniɛ akɛ Frankish maŋtsɛ Charlemagne (eye nɔ kɛjɛ 768-814 Ŋ.B.) “nyɛ Saxonbii lɛ anɔ, yɛ gbele piŋmɔ shishi, koni abaptisi amɛ, ekɛ toigbalamɔ ni wa fe fɛɛ gbala mɛi ni kuɔ Ŋmaahilɛ lɛ mli lɛ toi ni ekɛ nɔnyɛɛ to yiŋtsɔmɔ najiaŋ yɛ he fɛɛ he.” (The History of the Christian Church, ni William Jones ŋma) Yiwalɛ nɔyeli bɛ gbɛfaŋnɔ ko yɛ Yesu sɛɛnyiɛlɔi lɛ atɛŋ, ejaakɛ ekɛɛ: “Nyɛle akɛ jeŋmaji lɛ anɔyelɔi yeɔ amɛnɔ nuŋtsɔmɛi asane, ni amɛteŋ gbɔmɛi wuji lɛ kɛ yiwalɛ yeɔ amɛ nɔ. Shi esaaa akɛ ebaa lɛ nakai yɛ nyɛteŋ, shi mɔ fɛɛ mɔ ni sumɔɔ akɛ efee agbo yɛ nyɛteŋ lɛ efee nyɛsɔɔlɔ, ni mɔ fɛɛ mɔ ni sumɔɔ ni ena klɛŋklɛŋ gbɛhe yɛ nyɛteŋ lɛ afee nyɛtsulɔ taakɛ bɔ ni Gbɔmɔ Bi lɛ baaa koni abasɔmɔ lɛ, shi moŋ ebasɔmɔ mɛi krokomɛi, koni ekɛ ewala aha akɛ kpɔmɔ nɔ kɛha mɛi pii.”​—Mateo 20:​25-28, An American Translation.

 6. (a) Yɛ onukpai ahe lɛ, mɛɛ shishijee nibii komɛi Jeɔ kpo faŋŋ? (b) Asafo lɛ yɛ nɔ ni eeedamɔ nɔ ekpa mɛni gbɛ kɛjɛ onukpai lɛ adɛŋ, ni te esa akɛ nɛkɛ hii nɛɛ abu amɛhe amɛha tɛŋŋ?

⁶ Kristofonyo nuu ni ‘taoɔ nɔkwɛmɔ nitsumɔ lɛ miitao nitsumɔ kpakpa.’ (1 Timoteo 3:⁠1) Kɛ wɔsusu enɛ kɛ Yesu ŋaawoo ni wɔtsɔ hiɛ wɔtsɛ yisɛɛ nɛɛ he lɛ, ehaa nɛkɛ shishijee hiamɔ nii nɛɛ jeɔ kpo faŋŋ: (1) Esaaa akɛ onukpai ni ji Kristofoi kɛ yiwalɛ yeɔ mɛi krokomɛi anɔ; (2) esa akɛ mɛi ni gbɛnaa nii jwere amɛnɔ yɛ Yesu sɛɛnyiɛlɔi lɛ ateŋ lɛ afee tsuji, jeee nuŋtsɔmɛi; (3) esa akɛ hii ni taoɔ nɔkwɛmɔ nitsumɔ lɛ akwɛ enɛ akɛ “nitsumɔ kpakpa,” jeee”‘akɛ gbɛhe ko ni awo nɔ. (Abɛi 25:​27; 1 Korintobii 1:31) Wiemɔ ni ji “onukpa” lɛ wooo gbɔmɔ ko nɔ kɛtekeee Yehowa jalɔi krokomɛi lɛ. Shi moŋ, asafo lɛ yɛ hegbɛ akɛ ekpaa gbɛ akɛ onukpai fɛɛ baafee mɛi ni amɛdara yɛ mumɔŋ, mɛi ni yɔɔ niiashikpamɔ, hii heshibalɔi ni nyɛɛɔ hiɛ yɛ sɔɔmɔ krɔŋkrɔŋ mli. Yɛ anɔkwale mli lɛ, esa akɛ onukpai lɛ abu amɛ diɛŋtsɛ amɛhe akɛ Yehowa Nyɔŋmɔ, Yesu Kristo, kɛ enanemɛi Kristofoi lɛ atsuji ni baa amɛhe shi.​—Romabii 12:​11; Galatabii 5:​13; Kolosebii 3:⁠24.

 7. (a) Te esa akɛ onukpai kɛ 2 Korintobii 1:24 atsu nii yɛ mɛi krokomɛi asaneyeli mli amɛha tɛŋŋ? (b) Mɛni esa akɛ onukpai lɛ afee yɛ famɔi ni amɛnine shɛɔ nɔ kɛjɛɔ Nɔyeli Kuu lɛ dɛŋ lɛ he?

⁷ Ni onukpa lɛ kɛ heshibaa aaasɔmɔ mɛi krokomɛi lɛ baatsi lɛ gbɛ koni ekabɔ mɔdɛŋ ni eye amɛnɔ ‘nuŋtsɔmɛi asane.’ Ni kwɛ bɔ ni ehi akɛ wɔ nɔkwɛlɔi lɛ jieɔ su ni tamɔ Paulo nɔ lɛ kpo amɛtsɔɔ! Ekɛɛ Kristofoi ni yɔɔ Korinto lɛ akɛ: ‘Wɔyeee nyɛ hemɔkɛyeli lɛ nyɔŋ, shi moŋ wɔji nanemɛi nitsulɔi kɛha nyɛ miishɛɛnamɔ.’ (2 Korintobii 1:24) No hewɔ lɛ, mɛi ni kɛ suɔmɔ kwɛɔ asafo lɛ nɔ lɛ kɛ adesai amlai ni tamɔ jatsu tereee amɛnanemɛi heyelilɔi lɛ. Shi moŋ, Ŋmalɛ naa shishitoo mlai ji nɔ ni yeɔ nɔkwɛlɔi ni yɔɔ Yehowa Odasefoi ateŋ lɛ nɔ, ni amɛsɔmɔɔ yɛ mlihilɛ mli, ni amɛyeɔ amɛbuaa. Amɛjieɔ bulɛ ni mli kwɔ kpo amɛtsɔɔ Nyɔŋmɔ asafo kuu lɛ kɛtsɔɔ famɔi ni amɛnine shɛɔ nɔ kɛjɛɔ Yehowa Odasefoi a-Nɔyeli Kuu lɛ dɛŋ lɛ ni amɛkɛtsuɔ nii yɛ oyaiyeli mli lɛ nɔ.​—Bɔfoi lɛ Asaji, yitso 15.

 8. Mɛɛ su Paulo hiɛ yɛ enanemɛi heyelilɔi ahe, ni te esa akɛ enɛ ana hewalɛ yɛ afii ohai 20 nɛɛ mli onukpai lɛ anɔ aha tɛŋŋ?

⁸ Akɛni Paulo kɛ mlijɔlɛ tsuɔ Nyɔŋmɔ asafo kuu lɛ he nii hewɔ lɛ, ebaanyɛ ekɛɛ Kristofoi ni yɔɔ Tesalonika lɛ akɛ: “Wɔmli jɔ yɛ nyɛteŋ, taakɛ bɔ ni bii anyɛ hiɛɔ lɛ diɛŋtsɛ ebii dɔdɔɔdɔ lɛ. Ni akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔsumɔɔ nyɛ naakpa.” (1 Tesalonikabii 2: 7, 8) Paulo fee enii tamɔ bɔ ni bii anyɛ ni sumɔɔ ebii jogbaŋŋ hiɛɔ amɛ dɔdɔɔdɔ ni haa ekɛ nibii ni he hiaa amɛ yeɔ lɛ diɛŋtsɛ enɔ hiɛ ni agbɛnɛ ekɛ mlijɔlɛ tsuɔ amɛhe nii lɛ. Kwɛ bɔ ni esa akɛ enɛ atsirɛ afii ohai 20 nɛɛ mli onukpai lɛ koni amɛ hu amɛkɛ Nyɔŋmɔ asafo kuu lɛ aye yɛ mlijɔlɛ naa!

Hejɔɔmɔ Kɛ Miishɛɛjemɔ Jɛɛhe

 9. Mɛɛ shihilɛ ni ŋmɛnɛŋmɛnɛ beaŋ Yehowa webii yɔɔ agba he sane afɔ shi yɛ Yesaia 32:​1, 2?

⁹ Yɛ be mli ni ekɛ enine tsɔɔ ŋmɛnɛ gbi nɛɛ ni Yesu Kristo Maŋtsɛyeli lɛ yeɔ nɔ lɛ, gbalɔ Yesaia gba akɛ maŋtsɛ ko “baaye maŋtsɛ yɛ jalɛ naa” ni “lumɛi” hu baaye lumɔ “yɛ jalɛ kojomɔ naa.” No hewɔ lɛ, onukpai ni yɔɔ ŋmɛnɛŋmɛnɛ beaŋ teokrase gbɛjianɔtoo lɛ mli lɛ miitsu ŋwɛi Maŋtsɛyeli ni ato ama shi lɛ he nibii ahe nii​—eji lumɛi asɔɔmɔ lɛlɛŋ. Nɛkɛ hii ni akɛ gbɛnaa nii ewo amɛdɛŋ nɛɛ Yesaia gbalɛ lɛ kɔɔ amɛhe lolo akɛ: “Ni mɔ fɛɛ mɔ aaatsɔ tamɔ abobaahe yɛ kɔɔyɔɔ naa kɛ teemɔ he yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ni haa hɔɔŋ yɛ shikpɔŋ gbiŋ nɔ.”​—Yesaia 32:​1, 2, New World Translation.

10. Esa akɛ onukpa fɛɛ onukpa ni yɔɔ Yehowa Odasefoi ateŋ lɛ afee mɛni jɛɛhe?

¹⁰ Akɛni amɛtamɔɔɔ Kristendom jamɔ mli hiɛnyiɛlɔi yiwalɛ lɛ hewɔ lɛ, onukpai ni yɔɔ Yehowa Odasefoi ateŋ lɛ ji hejɔɔmɔ kɛ miishɛjemɔ jɛɛhe. Akɛ onukpai akuu lɛ, amɛhaa toiŋjɔlɛ, hejɔlɛ kɛ shweshweeshwe shihilɛ hiɔ Yehowa webii ateŋ. Onukpai lɛ ateŋ mɔ fɛɛ mɔ baanyɛ aha shihilɛ kpakpa ni tamɔ nɛkɛ aya hiɛ kɛtsɔ mlijɔlɛ gbɛ ni eeetsɔ nɔ ekɛ asafo kuu lɛ aye yɛ nɔ lɛ nɔ.

Kɛ Jalɛsaneyeli Kɛ Jalɛ Nifeemɔ

11. (a) Mɛɛ shihilɛ ko ni yɔɔ klɛŋklɛŋ afii oha lɛ mli Kristofoi lɛ ateŋ yɔɔ Yehowa Odasefoi asafoi pii amli ŋmɛnɛ? (b) Mɛɛ gbɛnaa nii ka nɔkwɛlɔi lɛ anɔ yɛ asafo lɛ he, ni mɛni hewɔ?

¹¹ Eyɛ mli akɛ naagbai komɛi te shi yɛ klɛŋklɛŋ afii oha lɛ mli Kristofoi asafoi lɛ ekomɛi amli moŋ, shi shihilɛ ni amɛ fɛɛ amɛyɔɔ mli lɛ ji toiŋjɔlɛ, ekomefeemɔ kɛ miishɛɛ nɔ. (1 Korintobii 1:​10-12; 3:​5-9; Efesobii 1:2; Yakobo 2:​1-9; 3:​2-12; 4:​11, 12; 1 Yohane 1:​3, 4) Mumɔŋ shihilɛ kpakpa hu yɛ Yehowa Odasefoi asafoi lɛ babaoo mli ŋmɛnɛ yɛ Nyɔŋmɔ jɔɔmɔ, Kristo hiɛnyiɛmɔ kɛ onukpai ni ahala amɛ lɛ anɔkwayeli nitsumɔ lɛ hewɔ. Bɔni afee ni ama asafoŋ toiŋjɔlɛ, ekomefeemɔ kɛ miishɛɛ nɔ mi lɛ, nɛkɛ hii nɛɛ taoɔ ŋwɛi yelikɛbuamɔ ni amɛbɔɔ mɔdɛŋ koni amɛha Nyɔŋmɔ asafo lɛ he atse yɛ jeŋba kɛ mumɔŋ fɛɛ. (Yesaia 52:11) Asafo loo gbɛjianɔtoo ni he tseee lɛ nyɛŋ afee nɔ ni toiŋjɔlɛ kɛ miishɛɛ yɔɔ mli, ni yɛ anɔkwale mli lɛ enaŋ Nyɔŋmɔ nɔkpɛlɛmɔ kɛ jɔɔmɔ. ‘Ehiŋmɛii yɛ krɔŋŋ tsɔ bɔ ni ekɛaakwɛ nɔ fɔŋ,’ koni eŋmɛ nɔ fɔŋ feemɔ gbɛ. (Habakuk 1:13) No hewɔ lɛ, kɛfata nibii krokomɛi ahe lɛ, aakpa gbɛ akɛ onukpai baatsu saneyeli he nii yɛ gbɛ ni ja nɔ, yɛ Ŋmalɛ naa. Shi mɛni ji nibii komɛi ni he hiaa ni esa akɛ akai yɛ be mli ni atsuɔ nɛkɛ saji nɛɛ ahe nii lɛ?

12. Eyɛ mli akɛ abiii ni onukpai lɛ akwɛ mɛi ni yɔɔ esafo lɛ mli lɛ ateemɔŋ saji ni ekuuu Biblia mlai loo shishitoo mlai amli moŋ, shi mɛni esa akɛ afee yɛ Galatabii 6:1 hewɔ?

¹² Nɔ kome ji akɛ, yɛ saji ni kɔɔ mligbalamɔi ni bakaa gbɔmɛi enyɔ ateŋ lɛ he lɛ, ebaahi akɛ aŋkroaŋkroi lɛ aaasaa saji lɛ yɛ teemɔ mli. (Mateo 18:​15-17) Akɛni onukpai lɛ jeee ‘wɔhemɔkɛyeli lɛ nɔ nɔyelɔi,’ hewɔ lɛ, akpaaa gbɛ akɛ amɛbaakwɛ teemɔŋ saji ni bakaa mɛi ateŋ ni kɔɔɔ Biblia mlai loo shishitoo mlai amlikuu yɛ hiɛdɔɔ mli lɛ he lɛ mli. Shi kɛji akɛ odaseyeli ko yɛ ni tsɔɔ akɛ “nɔtɔmɔ ko banina mɔ ko trukaa,” lɛ esa akɛ mɛi ni yɔɔ mumɔŋ hesaa lɛ abɔ mɔdɛŋ ni amɛsaa “nakai mɔ lɛ ekoŋŋ yɛ mlijɔlɛ mumɔ mli.”​—Galatabii 6:⁠1.

13. Yɛ mɛɛ gbɛ nɔ Ŋmalɛi lɛ tsɔɔ akɛ esa akɛ onukpai lɛ atsu nɔ fɔŋ feemɔ ko he odaseyeli he nii pɛ shi jeee nɔ ni anu loo akɛɛ-akɛɛ kɛkɛ?

¹³ Onukpai lɛ baasɔmɔ “yɛ jalɛsaneyeli hewɔ,” mɛi ni jeee mɛi ahiɛaŋkwɛlɔi yɛ be fɛɛ mli. No hewɔ lɛ esa akɛ amɛtsu nɔ fɔŋ feemɔ ko he odaseyeli he nii, jeee nɔ ni anu loo akɛɛ-akɛɛ kɛkɛ. Paulo wo ŋaa akɛ: “Kɛ afolɔ onukpa ko naa lɛ, kaahe okpɛlɛ akɛ ja yɛ odasefoi enyɔ loo etɛ naa da.”(1 Timoteo 5:19) Taakɛ Yehowa taomɔ nii yɛ blema Israel ji lɛ, agbeɔ mɔ ni sa gbele lɛ yɛ ‘odasefoi enyɔ loo etɛ daaŋ wiemɔ nɔ, jeee mɔ kome.’ Agbɛnɛ hu, mɔ ni afolɔɔ enaa lɛ hu naa hegbɛ akɛ ekɛ mɛi ni folɔɔ enaa lɛ akpe; ni kɛji akɛ odaseyeli lɛ sa lɛ, ‘odasefoi lɛ tsutsu aniji saa ehe dani agbeɔ lɛ.’​—5 Mose 17:​6, 7.

14. (a) Mɛni Diotrefe bɔ mɔdɛŋ ni efee yɛ gbɛ ni ejaaa nɔ? (b) Mɛni Nyɔŋmɔ kpaa gbɛ kɛjɛɔ onukpa adɛŋ yɛ be mli ni amɛtsuɔ kojomɔ saji ahe nii lɛ?

¹⁴ Esa akɛ ana Ŋmalɛ naa nɔdaamɔ nɔ kɛha saneyeli yɛ kojomɔ mli. Kwɛ miishɛɛ ni wɔji akɛ asafoŋ nɔkwɛlɔi lɛ tamɔɔɔ Diotrefe ni woɔ ehe nɔ ni hi shi yɛ Ŋ.B. klɛŋklɛŋ afii oha lɛ mli lɛ! Ebɔ mɔdɛŋ yɛ gbɛ ni ejaaa nɔ koni ‘eshwie’ mɛi ni sumɔɔ ni amɛhere nyɛmimɛi gbɛfalɔi lɛ ni amɛfee amɛ gbɔ lɛ ‘kɛjɛ asafo lɛ mli.’ Bɔfo Yohane ebuuu enɛ kɛ nibii gbohii krokomɛi ni esaaa lɛ akɛ nibii ni yɔɔ flɛflɛ shi moŋ ebɔ kɔkɔ akɛ: “No hewɔ lɛ, kɛ miba jiŋŋ, makai enitsumɔi ni etsuɔ lɛ.” (3 Yohane 9, 10) No hewɔ lɛ, esa akɛ ŋmɛnɛŋmɛnɛ beaŋ saneyeli ajinafoi lɛ akwɛ jogbaŋŋ akɛ Biblia mli nɔdaamɔ nɔ yɛ kɛha mɔ fɛɛ mɔ ni ashwieɔ lɛ lɛ lo.a Nyɔŋmɔ miikpa gbɛ akɛ onukpai ni ji Kristofoi lɛ baaye jalɛsane yɛ amɛkɛ mɛi krokomɛi asaneyeli mli. Yɛ anɔkwale mli lɛ, esa akɛ mɛi ni kwɛɔ Yehowa shikpɔŋ nɔ gbɛjianɔtoo lɛ saji anɔ lɛ afee “hii ni yɔɔ hewalɛ, ni sheɔ Nyɔŋmɔ gbeyei, ni amɛji anɔkwafoi.”​—2 Mose 18:⁠21.

15. Mɛɛ gbɛfaŋnɔ esa akɛ sɔlemɔ ana yɛ kojomɔ saneyeli mli?

¹⁵ Esa akɛ Kristofoi asaneyeli ajinafoi lɛ eko fɛɛ eko atao Yehowa yelikɛbuamɔ yɛ sɔlemɔ ni mli wa mli. Kpee ni akɛ nyɛminuu loo nyɛmi yoo ko ni afolɔ enaa akɛ efee efɔŋ ko ni hiɛdɔɔ yɔɔ mli lɛ kpeɔ lɛ afee nɔ ni akɛ sɔlemɔ baaje shishi ni akɛgbe naa. Yɛ anɔkwale mli lɛ, ebaafee nɔ ni ja gbɛ akɛ aaasɔle yɛ saneyeli lɛ mli be fɛɛ be ni aaanu he akɛ hiamɔ krɛdɛɛ ko kɛha Nyɔŋmɔ yelikɛbuamɔ aaate shi lɛ.​—Yakobo 5:​13-18.

16. Mɛɛ gbɛ esa akɛ onukpai atsɔ nɔ atsu kojomɔ saneyeli he nii yɛ, ni mɛni hewɔ?

¹⁶ Onukpai lɛ le akɛ naanyo heyelilɔ ko ni afolɔ enaa akɛ eji nɔtɔlɔ lɛ ji “gwantɛŋ” yɛ Nyɔŋmɔ asafo kuu lɛ mli ni esa akɛ akɛ lɛ aye yɛ mlijɔlɛ naa. (Okɛto Ezekiel 34:​7-14 he.) Ebiɔ ni akɛ mlijɔlɛ akwɛ tooi diɛŋtsɛ nɔ, ejaakɛ amɛji bɔɔ nii ni yɔɔ shɔɔ, ni amɛkɛ amɛhe fɔɔ amɛkwɛlɔ lɛ nɔ kɛha hebuu. No hewɔ lɛ Okadi gwantɛŋi ni yɔɔ asafo lɛ mli lɛ hu? Ŋwanejee ko bɛ he akɛ amɛnuɔ he akɛ amɛyɛ shweshweeshwe yɛ Tookwɛlɔ Kpeteŋkpele, Yehowa Nyɔŋmɔ, kɛ Tookwɛlɔ Kpakpa, Yesu Kristo nɔkwɛmɔ shishi. Shi esa akɛ asafo kuu lɛ nɔ tookwɛlɔi bibii lɛ afee amɛnii yɛ gbɛi ni baaha Yehowa tsuji ni tamɔ tooi lɛ anu Nyɔŋmɔ toiŋjɔlɛ shweshweeshwe shihilɛ he. Kɛ oji Kristofonyo tookwɛlɔ bibioo lɛ, belɛ ani onyɛmimɛi hii kɛ yei lɛ nuɔ he akɛ amɛyɛ shweshweeshwe ni amɛtoiŋ jɔɔ amɛ yɛ okwɛmɔ shishi? Eji anɔkwale akɛ esa akɛ onukpai lɛ amɔ Biblia mlai kɛ shishitoo mlai amli kpɛŋŋ. Shi Ŋmalɛ naa taomɔ nii ka amɛnɔ akɛ amɛkɛ tooi lɛ aye yɛ suɔmɔ gbɛ nɔ ni amɛtsu saneyeli he nii yɛ dioofeemɔ, gbɛjianɔtoo kpakpa, mlihilɛ, kɛ agbɛnɛ yɛ mɛi ahesusumɔ naa.

17. Mɛɛ Ŋmalɛ naa saji otii esa akɛ onukpai lɛ aha ahi amɛjwɛŋmɔ mli, titri lɛ yɛ be mli ni amɛyeɔ kojomɔ mli saji lɛ?

¹⁷ Akɛni wɔyeee emuu hewɔ lɛ, “wɔ fɛɛ wɔtɔɔ babaoo” yɛ nɔ ni wɔkɛɔ lɛ mli. (Yakobo 3:⁠2) Nyɔŋmɔ mɔbɔnalɛ he miihia’wɔteŋ mɔ fɛɛ mɔ kɛ Kristo “kpatamɔ afɔleshaa” lɛ. (1 Yohane 1:​8–2:2; Lala 130:​3, New World Translation) No hewɔ lɛ esa akɛ Kristofonyo tookwɛlɔ bibioo lɛ abu lɛ diɛŋtsɛ ehe akɛ mɔ ni baa shi ni esa akɛ ekai Yesu wiemɔi nɛɛ: “Ni bɔ ni nyɛtaoɔ akɛ mɛi afee aha nyɛ lɛ, nyɛ hu nyɛfea nakai nɔŋŋ nyɛhaa amɛ.” (Luka 6:31) Esa akɛ akɛ nɛkɛ ŋaawoo nɛɛ atsu nii, titri lɛ yɛ saneyeli bei amli. Esa akɛ hii ni sa yɛ mumɔŋ lɛ abɔ mɔdɛŋ ni amɛjaje Kristofonyo ni tɔɔ lɛ ‘yɛ mlijɔlɛ mumɔ mli, koni wɔ fɛɛ wɔkwɛ wɔ diɛŋtsɛ wɔhe nɔ jogbaŋŋ, akɛ aleee nɔ wɔ hu wɔɔgbee kaa ni tamɔ nɛkɛ mli.’​—Galatabii 6:1; 1 Korintobii 10:⁠12.

18. (a) Mɛni baanyɛ aba kɛji akɛ onukpai kɛ mɛi krokomɛi ye keketee yɛ be mli ni atsuɔ kojomɔ saji komɛi ahe nii lɛ? (b) Yɛ Marko 9:42 hewɔ lɛ, esa akɛ onukpai lɛ kristofoi krokomɛi akwɛ amɛhe nɔ jogbaŋŋ ni amɛkafee mɛni?

¹⁸ Kɛji akɛ onukpai kɛ mɛi krokomɛi aaaye keketee yɛ saneyeli mli lɛ, enɛ baaye aŋkroaŋkroi ni tamɔ nɛkɛ awui. Ni kɛji akɛ henumɔŋ loo gbɔmɔtsoŋ awuiyeli ko jɛɛɛ enɛ mli baaa po lɛ, enɛ baanyɛ aye awui diɛŋtsɛ yɛ mumɔŋ, ni abaanyɛ abi sane yɛ sa ni nɛkɛ nɔkwɛlɔi nɛɛ sa lɛ he. (Okɛto Yakobo 2:13 he.) No hewɔ lɛ kɛ aaye saji ni agbɛnɛ yɛ bei krokomɛi fɛɛ mli lɛ, esa akɛ onukpai lɛ amli ajɔ ni amɛkwɛ amɛtã nɔ jogbaŋŋ ni amɛkatɔtɔ mɛi krokomɛi anaji. Eji anɔkwale akɛ esa akɛ Kristofoi fɛɛ akwɛ amɛhe nɔ jogbaŋŋ yɛ enɛ mli, ejaakɛ Yesu kɛɛ: “Ni mɔ ni aaatɔtɔ mɛi bibii nɛɛ ni heɔ minɔ yeɔ lɛ ateŋ mɔ kome nane lɛ, faŋ nɔ ni aŋɔ wiɛ aŋmɔ ekuɛ, ni ayashɛ lɛ afɔ ŋshɔŋ.” (Marko 9:42) Ŋwɛi gbɛ wiɛ baanyɛ afee nɔ ni da aahu akɛ kooloi ahewalɛ ji nɔ ni akɛtsɔmɔɔ enɛ, ni mɔ ko mɔ ko bɛ ni akɛ tsiimɔ ni tamɔ nɛkɛ aaaŋmɔ ekuɛ ni ashɛ lɛ afɔ ŋshɔŋ ni eyi baana wala. Yɛ anɔkwale mli lɛ, belɛ esa akɛ onukpa lɛ akwɛ jogbaŋŋ koni ekatɔtɔ mɔ ko nane bɔ ni no aaaha nɔ ni baajɛ mli aba lɛ afee mumɔŋ awui ni eeeye lɛ diɛŋtsɛ ehe kɛ aŋkro ko ni lɛ hu atɔtɔ enane lɛ awui.​—Filipibii 1:​9-11.

Yaa Nɔ Ojie Mlijɔlɛ Kpo Otsɔɔ Mɛi Krokomɛi

19. Mɛɛ ŋaawoo Petro kɛha nanemɛi onukpai lɛ, ni amɛhe nitsumɔ yɛ gbɛ kpakpa nɔ lɛ kɔɔ mɛni he yɛ amɛhe?

¹⁹ Bɔfo Petro tsɔɔ bɔ ni esa akɛ nanemɛi nɔkwɛlɔi lɛ akwɛ asafo kuu lɛ nɔ aha beni eŋma akɛ: “Nyɛlɛa Nyɔŋmɔ asafo kuu ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; asaŋ jeee akɛ mɛi ni yeɔ asafoi lɛ anɔ nuŋtsɔmɛi asane, shi moŋ mɛi ni toɔ okadii amɛhaa asafo kuu lɛ, ni beni tookwɛlɔ nukpa lɛ aaajie ehe kpo lɛ, nyɛnine ashɛ anunyam akekere ni ŋalaaa lɛ nɔ.” (1 Petro 5:​2-4) Ŋaawoo nɛɛ ni wɔkɛaatsu nii kɛ Nyɔŋmɔ asafo kuu lɛ ni wɔɔjie mlijɔlɛ kpo wɔtsɔɔ amɛ lɛ pɛ nɔ nɔkwɛlɔi ni afɔ amɛ mu lɛ aaatsɔ ni amɛnine ashɛ amɛ ŋwɛi nyɔmɔwoo akɛ mumɔŋ bɔɔ nii ni gboiii lɛ nɔ ni nakai gbɛ pɛ nɔ onukpai ni yɔɔ shikpɔŋ nɔ hiɛnɔkamɔ lɛ aaatsɔ ni amɛnine ashɛ amɛ naanɔ wala yɛ jeŋ muu fɛɛ Paradeiso ni baa lɛ mli lɛ nɔ.

20. (a) Te esa akɛ Kristofoi ni ji nɔkwɛlɔi bibii lɛ kɛ amɛnanemɛi heyelilɔi aye aha tɛŋŋ? (b) Te onuɔ onukpai ni kɛ mlijɔlɛ kɛ suɔmɔ sɔmɔɔ mɛi lɛ ahe ohaa tɛŋŋ?

²⁰ Yehowa Nyɔŋmɔ kɛ Yesu Kristo fɛɛ ji Tookwɛlɔi ni yɔɔ suɔmɔ kɛ musuŋtsɔlɛ. No hewɔ lɛ yɛ bɛ mli ni Kristofoi ni ji tookwɛlɔi bihii lɛ kɛ amɛhe kpɛtɛɔ ŋwɛi taomɔ nii ahe kpɛŋŋ lɛ, esa akɛ amɛjie suɔmɔ kɛ musuŋtsɔlɛ kpo yɛ be mli ni amɛkɛ amɛnanemɛi heyelilɔi ni tamɔ gwantɛŋi lɛ yeɔ lɛ. Yɛ anɔkwale mli lɛ, Yehowa Odasefoi anɔkwafoi fɛɛ ahiɛ sɔɔ nɛkɛ onukpai ni kɛ amɛhe shaa afɔle nɛɛ ni buɔ nɔ ni atu awo amɛdɛŋ lɛ he lɛ ni kɛ Nyɔŋmɔ asafo kuu lɛ yɛɔ yɛ mlijɔlɛ naa lɛ sɔɔmɔ kɛ nɔkwɛmɔ nɔ kpakpa lɛ. Obaanyɛ ojie nakai hiɛsɔɔ lɛ kɛ bulɛ ni sa kpo kɛtsɔ toiboo ni ooofee oha mɛi ni nyiɛɔ hiɛ yɛ wɔteŋ lɛ nɔ.

[Shishigbɛ niŋmai]

Te Osusuɔ Enɛ He Ohaa Tɛŋŋ?

◻ Mɛɛ gbɛ nɔ Yesu Kristo tsɔɔ yɛ akɛ yiwalɛ nɔyeli bɛ gbɛfaŋnɔ ko yɛ esɛɛnyiɛlɔi lɛ ateŋ?

◻ Mɛni esa akɛ onukpai Iɛ afee kɛ amɛnine shɛ famɔi anɔ kɛjɛ Nɔyeli Kuu lɛ dɛŋ?

◻ Taakɛ Yesaia 32:​1, 2 tsɔɔ Iɛ, esa akɛ onukpai lɛ afee mɛni jɛɛhe?

◻ Mɛɛ gbɛ nɔ Ŋmalɛi Iɛ tsɔɔ yɛ akɛ esaaa akɛ onukpai lɛ tsuɔ saji ni amɛnuɔ kɛkɛ loo akɛɛ-akɛɛ lɛ he nii yɛ saneyeli mli?

◻ Te esa akɛ nɔkwɛlɔi bibii ni ji Kristofoi lɛ kɛ asafo kuu lɛ aye amɛha tɛŋŋ?