Yitso 106

Akpa Amɛhe Mama Kɛtsɔ Wein Trom Abɛbua lɛ Nɔ

YESU yɛ sɔlemɔ we lɛ. Etsɛko tsɔ ni eha jamɔ mli hiɛnyiɛlɔi ni taoɔ ni amɛle nɔ hegbɛ ni eyɔɔ ni ekɛfeɔ nibii lɛ ayiŋ futu amɛ. Ni dani amɛhiɛ aaatserɛ amɛ kɛjɛ amɛyiŋfutumɔ lɛ mli lɛ, Yesu bi amɛ akɛ: “Shi agbɛnɛ te nyɛsusuɔ tɛŋŋ?” Kɛkɛ ni agbɛnɛ etsɔ abɛbua ko nɔ etsɔɔ amɛ nɔ gbɔmɛi diɛŋtsɛ ni amɛji.

Yesu gba akɛ: “Nuu ko yɛ bii enyɔ; ni etee klɛŋklɛŋ mɔ lɛ ŋɔɔ ni ekɛɛ: ‘Mibi, ŋmɛnɛ yaatsu nii yɛ miwein trom lɛ mli.’ Ni ehere nɔ ekɛɛ: ‘Ataa, matee,’ shi eyaaa. Ni etee mɔ ni ji enyɔ lɛ hu ŋɔɔ, ni ekɛɛ lɛ nakai nɔŋŋ. Shi lɛ lɛ, ehere nɔ ekɛɛ: ‘Miyaaa.’ Shi yɛ sɛɛ mli lɛ eshwa ehe, ni etee.” Ni Yesu bi akɛ: “Te mɛi enyɔ nɛɛ ateŋ mɔ ni fee nɔ ni amɛtsɛ lɛ sumɔɔ hu?”

Ni mɛi ni teɔ shi woɔ lɛ nɛɛ ha hetoo akɛ: “Sɛɛkpee mɔ lɛ.”

No hewɔ lɛ Yesu tsɔɔ mli akɛ: “Lɛlɛŋ, miikɛɛ nyɛ akɛ, toohelɔi lɛ kɛ ajwamaŋi lɛ miitsɔ nyɛhiɛ kɛmiiya Nyɔŋmɔ maŋtsɛyeli lɛ mli.” Kɛjɛ shishijee lɛ, toohelɔi lɛ kɛ ajwamaŋi lɛ kpoo akɛ amɛaasɔmɔ Nyɔŋmɔ. Shi kɛlɛ, amɛtsake amɛtsui ni amɛsɔmɔ lɛ, tamɔ bi ni ji enyɔ lɛ fee lɛ. Shi yɛ gbɛ kroko nɔ lɛ, jamɔ mli hiɛnyiɛlɔi lɛ kɛɔ akɛ amɛsɔmɔɔ Nyɔŋmɔ, tamɔ klɛŋklɛŋ bi lɛ, ni kɛlɛ, taakɛ Yesu kɛɛ lɛ: “Yohane [Baptisilɔ lɛ] ba nyɛŋɔɔ yɛ jalɛ gbɛ lɛ nɔ, ni nyɛ lɛ nyɛheee lɛ nyɛyeee; shi toohelɔi kɛ ajwamaŋi lɛ he lɛ ye. Ni fee sɛɛ, beni nyɛyoo hu lɛ, nyɛshwaaa nyɛhe tete, koni nyɛhe lɛ nyɛye.”

Yesu tee nɔ etsɔɔ mli akɛ kpoomɔ ni nakai jamɔ mli hiɛnyiɛlɔi lɛ ekpoo lɛ lɛ jeee Nyɔŋmɔ ni amɛsɔmɔɔɔ lɛ lɛ kɛkɛ. Dabi, shi moŋ efɔŋfeelɔi ji amɛ, gbɔmɛi fɔji. Yesu gba akɛ: “Shiatsɛ ko yɛ, ni efee wein trom, ni efo afabaŋ ewo he kɛkpe, ni etsa wein bu yɛ mli, ni etswa mɔɔ yɛ mli; ni ekɛha hulɔi apaayeli, ni edom. Ni beni yibii be lɛ shɛ lɛ, etsu etsuji kɛtee hulɔi lɛ aŋɔɔ, akɛ amɛyaŋɔ eyibii lɛ amɛbaha lɛ. Ni hulɔi lɛ mɔmɔ etsuji lɛ, ni amɛyi mɔ kome, ni amɛgbe mɔ kome, ni amɛtswia mɔ kome hu tɛi. Asaŋ etsu tsuji krokomɛi ni fa fe tsutsu bii lɛ, ni amɛfee amɛ nakai nɔŋŋ.”

“Tsuji” lɛ ji gbalɔi lɛ ni “shiatsɛ” lɛ, Yehowa Nyɔŋmɔ, tsu kɛtee “ewein trom” lɛ mli “hulɔi” lɛ aŋɔɔ lɛ. Nɛkɛ hulɔi nɛɛ ji Israel maŋ, ni Biblia lɛ wieɔ he akɛ Nyɔŋmɔ “wein trom” lɛ najiaŋdamɔlɔi otii lɛ.

Akɛni “hulɔi” lɛ fee “tsuji” lɛ basabasa ni amɛgbe amɛ hewɔ lɛ, Yesu tsɔɔ mli akɛ: “Fee sɛɛ lɛ, [wein trom tsɛ lɛ] tsu ebinuu kɛtee amɛŋɔɔ ni ekɛɛ: ‘Mibi lɛ, lɛ lɛ amɛhiɛ aaasɔ lɛ.’ Shi hulɔi lɛ, beni amɛna bi lɛ moŋ lɛ, amɛkɛɛkɛɛ amɛhe akɛ: ‘Niyelɔ lɛ nɛ! Nyɛbaa, nyɛhaa wɔgbea lɛ, koni wɔye enii lɛ!’ Ni amɛmɔ lɛ amɛtsirɛ eyisɛɛ kɛjɛ wein trom lɛ mli, ni amɛgbe lɛ.”

Agbɛnɛ, Yesu kɛ jamɔ mli hiɛnyiɛlɔi lɛ wie ni ebi amɛ akɛ: “Agbɛnɛ, kɛ wein trom tsɛ lɛ ba lɛ, te eeefee hulɔi nɛɛ tɛŋŋ?”

Jamɔ mli hiɛnyiɛlɔi lɛ ha hetoo akɛ: “Eeekpata nɛkɛ gbɔmɛi fɔji nɛɛ ahiɛ butuu, ni eeeŋɔ wein trom lɛ eha hulɔi krokomɛi apaayeli, mɛi ni kɛ yibii aaabaha lɛ yɛ be ni sa mli.”

No hewɔ lɛ, akɛni amɛfata Israelbii “hulɔi” ni kwɛɔ Yehowa maŋ ni ji Israel “wein trom” lɛ nɔ lɛ ahe hewɔ lɛ, amɛ diɛŋtsɛ amɛmiijaje kojomɔ amɛmiishwie amɛnɔ ni amɛleee. Yibii ni Yehowa kpaa gbɛ kɛjɛɔ nɛkɛ hulɔi nɛɛ adɛŋ ji hemɔkɛyeli ni amɛaana yɛ e-Bi, anɔkwa Mesia lɛ mli. Akɛni amɛkɛ yibii nɛɛ haaa hewɔ lɛ, Yesu bɔ amɛ kɔkɔ akɛ: “Ani nyɛkaneko yɛ Ŋmalɛi lɛ amli [yɛ Lala 118:22, 23] da akɛ: ‘Tɛ lɛ ni tsutswalɔi lɛ shɛ fɔ̃ lɛ, no nɔŋŋ etsɔ koŋ tɛ ni tere tsu lɛ. Nuŋtsɔ lɛ [Yehowa] dɛŋ enɛ jɛ, ni eyɛ naakpɛɛ yɛ wɔhiŋmɛiiaŋ’? No hewɔ lɛ, miikɛɛ nyɛ akɛ: Abaashɔ̃ Nyɔŋmɔ maŋtsɛyeli lɛ yɛ nyɛdɛŋ, ni aaaŋɔha jeŋmaŋ ko ni woɔ yibii. Ni mɔ fɛɛ mɔ ni aaagbee tɛ nɛɛ nɔ lɛ, emli aaatserɛ; shi mɔ nɔ ni tɛ lɛ aaagbee lɛ, eeegbɛlɛ lɛ mɔ̃nyɔ̃mɔ̃nyɔ̃.”

Agbɛnɛ woloŋmalɔi lɛ kɛ osɔfonukpai lɛ yoo akɛ Yesu miiwie amɛhe, no hewɔ lɛ amɛtao akɛ amɛaagbe lɛ, ni ji “niyelɔ” diɛŋtsɛ lɛ. No hewɔ lɛ, akɛ maŋ lɛ, abaahe hegbɛ ni kulɛ amɛyɔɔ akɛ amɛaafee nɔyelɔi yɛ Nyɔŋmɔ Maŋtsɛyeli lɛ mli lɛ kɛjɛ amɛdɛŋ, ni abaato maŋ hee ko ni ji ‘wein trom hulɔi’ nɔ ni baawo yibii ni sa lɛ shishi.

Akɛni jamɔ mli hiɛnyiɛlɔi lɛ miishe asafoi lɛ ni amɛbuɔ Yesu akɛ gbalɔ lɛ gbeyei hewɔ lɛ, amɛkaaa akɛ amɛbaagbe lɛ yɛ nɛkɛ be nɛɛ mli. Mateo 21:28-46; Marko 12:1-12; Luka 20:9-19; Yesaia 5:1-7.

▪ Namɛi bii enyɔ ni yɔɔ Yesu klɛŋklɛŋ abɛbua lɛ mli lɛ damɔ shi kɛha?

▪ Yɛ abɛbua ni ji enyɔ lɛ mli lɛ, namɛi “shiatsɛ” lɛ, “wein trom” lɛ, “hulɔi lɛ,” “tsuji” lɛ, kɛ “niyelɔ lɛ” damɔ shi kɛha?

▪ Mɛni baaba ‘wein trom hulɔi’ lɛ anɔ, ni namɛi baaye amɛnajiaŋ?