Yitso 10

Ebɛŋkɛmɔ Lɛ He “Okadi”

 1. Mɛni hewɔ esa akɛ wɔnya akɛ wɔɔle Afii Akpe ni ebɛŋkɛ lɛ he nɔ ko waa lɛ?

¹ KƐJI akɛ wɔkwɛ lɛ yɛ nɔ ni Biblia lɛ kɛɔ yɛ he lɛ naa lɛ, Afii Akpe lɛ ji nɔ ko ni esa akɛ adesai fɛɛ, mɛi ni yɔɔ wala mli kɛ mɛi ni egboi fɛɛ ashwe. No hewɔ ni adafitswaa akɛ ebɛŋkɛ lɛ ji sane ko ni mɛi ni nuɔ shishi lɛ taoɔ lɛ. Esa akɛ wɔkɛ miishɛɛ babaoo ale yiŋtooi ni sa ni wɔyɔɔ hewɔ ni wɔyɔɔ nɔmimaa akɛ ebɛŋkɛ lɛ mli. Mɛni ji no? Ani esa akɛ wɔhe be ni wɔkɛsusu ekomɛi ahe lo?

 2. (a) Mɛɛ henaabuamɔ ni wɔnaa akɛ eeya nɔ kɛ odaseyeli ni mli ka shi faŋŋ haa wɔnaa akɛ Afii Akpe lɛ ebɛŋkɛ? (b) Namɔ nyiɛɔ mɛi ni yɔɔ Nyɔŋmɔ masɛi lɛ “ata” lɛ hiɛ, ni eesɔmɔ yɛ mɛɛ gbɛhe mli momo bianɛ?

² Yɛ heni wɔsusu Afii Akpe lɛ he kɛbashɛ nɛɛ hewɔ lɛ, wɔbale anɔkwale ni eji akɛ esa akɛ ta ni kpataa nii ahiɛ fe fɛɛ yɛ adesa yinɔsane mli, “Nyɔŋmɔ ofe lɛ gbi wulu lɛ nɔ ta lɛ” yɛ Harmagedon atsɔ hiɛ aba. Wɔmiina agbɛnɛ akɛ aabua maŋkwramɔŋ nɔyelɔi aloo “maŋtsɛmɛi ni yɔɔ jeŋ muu lɛ fɛɛ lɛ” anaa yɛ hewalɛi ni adesa nyɛŋ akudɔ lɛ ahewalɛ shishi kɛha tai fɛɛ amli Ta lɛ. Esa akɛ anɔkwa sane nɛɛ diɛŋtsɛ afee odaseyeli ni ka shi faŋŋ akɛ afii akpe ni hiɛ ka nɔ ni nyiɛɔ Ta Iɛ sɛɛ lɛ hu ebɛŋkɛ. (Kpoj. 16:​13-16) Mɔ ni baanyiɛ nɛkɛ ta nɛɛ hiɛ, yɛ Nyɔŋmɔ Ofe lɛ gbɛfaŋ ji Nyɔŋmɔ ŋwɛi asafoi lɛ ahiɛnyiɛlɔ, mɔ ni atsɛɔ lɛ Anɔkwafo kɛ Anɔkwayelɔ, Nyɔŋmɔ Wiemɔ lɛ. Nɛkɛ ŋwɛi Hiɛnyiɛlɔ nɛɛ ji Maŋtsɛ momo po dani Harmagedon ta nɛɛ jeɔ shishi. “Ni maŋtsɛfaii pii bumɔ eyiteŋ,” ni “aŋma gbɛi ko yɛ etade kɛ egboŋ nɔ akɛ: maŋtsɛmɛi amaŋtsɛ kɛ nuntsɔmɛi a-Nuntsɔ.” (Kpoj. 19:​11-16) No hewɔ lɛ eeye nɔ momo po akɛ Maŋtsɛ dani eboteɔ nakai afii akpe be ni ekɛ ehefatalɔi niyelɔi Kristofoi 144,000 lɛ aaaye nɔ.​—Kpoj. 12:5; 14:​1-4; 20:​4-6.

 3. Mɛni ji nɔ ni Yohane na be mli ni atse klɛŋklɛŋ naasɔomɔi enyɔ lɛ naa (Kpoj. 6:​1-4) ni kɔɔ nibii ni ba dani Kristo afii akpe nɔyeli lɛ je shishi lɛ he lɛ?

³ Nɔ ni awie yɛ nɛkɛ maŋtsɛmɛi a-Maŋtsɛ, Yesu Kristo nɛɛ he akɛ eje enɔyeli shishi dani afii akpe lɛ je shishi lɛ jeɔ kpo yɛ wɔ afii ohai nyɔŋmai enyɔ nɛɛ mli jeŋ saji ni tsɔ hiɛ ba lɛ ahe mfoniri ni afee lɛ mli. Akɛ nɛkɛ mfoniri nɛɛ ha yɛ Kpojiemɔ yitso ekpaa, ni emli ni bɔfo Yohane kɛɔ wɔ nɔ ni ena yɛ be mli ni Nyɔŋmɔ Toobi Yesu Kristo bɔi naasɔɔmɔi kpawo ni akɛsɔo “wolo” ni enine shɛ nɔ kɛjɛ Nyɔŋmɔ ni ta ŋwɛi maŋtsɛsɛi lɛ nɔ lɛ dɛŋ lɛ anaagbelemɔ lɛ. Yohane kɛɛ akɛ: “Ni mina akɛ toobi lɛ tse naasɔɔmɔi kpawo lɛ ekome; ni minu akɛ hiɛkalɔi ejwɛ lɛ ateŋ mɔ kome kɛ gbee ni tamɔ nyɔŋmɔshimɔ gbee kɛɛ: Ba ni obakwɛ! Ni Mikwɛ, ni naa, okpɔŋɔ yɛŋ; ni mɔ ni ta nɔ lɛ hiɛ gai, ni aha lɛ akekre, ni eje kpo ni eye kunim, koni esaa eye kunim. Ni beni etse naasɔomɔ ni ji enyɔ lɛ, minu akɛ hiɛkalɔ ni ji enyɔ lɛ kɛɛ: Ba ni obakwɛ! Ni okpɔŋɔ kroko ni tsuɔ je kpo, ni mɔ ni ta enɔ lɛ, aha lɛ hegbɛ koni ejie hejɔlɛ kɛjɛ shikpɔŋ lɛ nɔ, ni amɛgbegbeɔ amɛhe, ni aha lɛ kalaŋte kpeteŋkpele ko.”​—Kpoj. 6:​1-4.

 4, 5. (a) Mɛni ji nɔ ni wɔnaa akɛ mɔ ni ta okpɔŋɔ ni tsuɔ lɛ nɔ lɛ feɔ he okadi? (b) Namɔ je kpo yɛ nakai be lɛ mli koni eyaye kunim kwraa, ni yɛɛ mɛɛ gbɛ nɔ enɛ saa Lala 2:​1-6 koni eba mli?

⁴ Wɔnaa okadii ni feɔ klɛŋklɛŋ jeŋ ta ni fɛ yɛ afi 1914 Ŋ. B. ni eji nɔ ni tsɔ jeŋ ta ni ji enyɔ ni jie toiŋjɔlɛ kɛjɛ shikpɔŋ lɛ nɔ afii ekpaa kroko hu hiɛ lɛ he mfoniri yɛ biɛ. Nakai jeŋ tai lɛ amli klɛŋklɛŋ nɔ̃ lɛ kadi be ni jalɔ tabilɔ, Yesu Kristo, nine shɛ ŋwɛi akekre lɛ nɔ ni ete shi ewo ehenyɛlɔi yɛ shikpɔŋ nɔ, koni eye ta lɛ mli kunim, ni eye eshikpɔŋ lɛ nɔ henyɛlɔi lɛ anɔ kunim kwraa. Enɛ tsɔɔ akɛ yɛ sɛɛ mli lɛ ebaawuu yɛ Nyɔŋmɔ gbɛfaŋ yɛ “Nyɔŋmɔ ofe lɛ gbi wulu lɛ nɔ ta” lɛ mli yɛ Harmagedon Maŋtsɛ ni awo lɛ yɛ ŋwɛi yɛ klɛŋklɛŋ jeŋ ta lɛ be lɛ mli lɛ toɔ gbɛjianɔ koni wiemɔi ni yɔɔ Lala Enyɔ lɛ aba mli:

⁵ “Mɛɛba jeŋmaji lɛ feɔ hoo, ni majimaji lɛ hu jwɛŋɔ yakanii? Shikpɔŋ nɔ maŋtsɛmɛi lɛ ete shi edamɔ shi, ni lumɛi lɛ hu efee ekome amɛtee Yehowa kɛ mɔ ni efɔ lɛ mu [e-Kristo, Hela Septuagint Version Biblia] lɛ yinɔ ajina: ‘Nyɛhaa wɔkumɔa amɛgboklɛi lɛ, ni wɔtserɛ amɛkpai lɛ yɛ wɔhe wɔshwie!’ Mɔ ni ta ŋwɛi lɛ miiŋmɔ; Nuntsɔ lɛ miiye amɛhe fɛo po. No dani ekɛ amɛ aaawie yɛ emlifu mli, ni eeewo amɛhe gbeyei yɛ emlila lɛ mli. ‘Shi miwo mi-Maŋtsɛ yɛ mi-gɔŋ krɔŋkrɔŋ Zion lɛ nɔ!’”​—Lala 2:​1-6; Okɛto Bɔfoi 4:​24-30 he.

 6. Ani jeŋ tai kɛ Jeŋmaji Ekomefeemɔ lɛ enyɛ efa Yehowa Maŋtsɛ ni yɔɔ Zion Gɔŋ lɛ nɔ lɛ, ni nɔ ni baajɛ Harmagedon ta lɛ mli aba lɛ baama mɛni nɔ mi ahawɔ?

⁶ Yɛ hoofeemɔ ni egba jeŋmaji lɛ anaa kɛjɛ klɛŋklɛŋ jeŋ ta ni ba yɛ 1914-1918 Ŋ.B. lɛ mli lɛ fɛɛ sɛɛ lɛ, Yehowa kɛ e-Maŋtsɛ, e-Bi Yesu Kristo eta ŋwɛi odehei anɔyeli sɛi lɛ nɔ yɛ Zion. (Kpoj. 14:1; Heb. 12:22) Jeŋ Ta I loo Jeŋ Ta II loo Jeŋmaji Ekomefeemɔ gbɛjianɔtoo lɛ nyɛɛɛ ajie Mesia Maŋtsɛ lɛ kɛjɛ maŋtsɛsɛi lɛ nɔ. “Nyɔŋmɔ ofe lɛ gbi wulu lɛ nɔ ta” yɛ Harmagedon lɛ baama nɔ mi akɛ eta Ŋwɛi maŋtsɛsɛi lɛ nɔ, ni ebaahi jɛmɛ koni ekɛje enɔyeli ni heɔ afii akpe kɛ enanemɛi niyelɔi odehei 144,000 lɛ shishi. (Kpoj. 19:​19-21) Yɛ yiŋtoo ni he hiaa nɛɛ hewɔ lɛ, ama Afii Akpe ni awo shi yɛ he kɛ emli jɔɔmɔi ni haa wala kɛha adesai lɛ nɔ mi aha wɔ. Ebɛŋkɛ!

 7. Mɛni hewɔ ni wɔtamɔɔɔ nakai blema “yinɔbii fɔji kɛ gbalafitelɔi” lɛ, ni kɛlɛ nɛgbɛ ji heni wɔnaa “okadi” ni Yesu kɛha wɔ lɛ yɛ koni wɔsusu he?

⁷ Yɛ odaseyeli ni akɛha yɛ yiteŋgbɛ nɛɛ fɛɛ sɛɛ lɛ, ŋwanejelɔi pii baabi “okadi” dani amɛto amɛyiŋ akɛ amɛaahe amɛye akɛ Afii akpe lɛ ebɛŋkɛ lɛlɛŋ, hɛɛ, ebaaje shishi yɛ wɔyinɔ nɛɛ mli. Wɔfataaa nakai “yinɔbii fɔji kɛ gbalafitelɔi” ni ji jamɔ mli woloŋmalɔi kɛ Farisifoi ni hi shi yɛ efii ohai nyɔŋma kɛ nɛɛhu ni eho lɛ mli, ni miitao ni amɛna okadi ko kɛjɛ Yesu Kristo dɛŋ, koni no aha amɛhe amɛye akɛ lɛ ji Mesia lɛ ahe. (Mat. 12:​38, 39) Shi kɛlɛ, wɔyɛ “okadi” ni Yesu Kristo diɛŋtsɛ tsɔɔ mli ni ekɛha lɛ, ni akɛni eha wɔnine shɛ nɔ hewɔ lɛ, kɛji akɛ wɔkpoo akɛ wɔɔsusu he lɛ, wɔkɛ wɔhe baawo shihilɛ ko ni nilee bɛ mli ni ehiii kwraa mli. Bɔni atsɔɔ mli aha wɔ lɛ yɛ Mateo yitsei nyɔŋmai enyɔ kɛ ejwɛ kɛ nyɔŋmai enyɔ kɛ enumɔ, Marko yitso nyɔŋma kɛ etɛ kɛ Luka yitso nyɔŋmai enyɔ kɛ ekome. Akɛ bɔni atsɔɔ okadi lɛ mli aha lɛ ha ebɔfoi lɛ yɛ be mli ni amɛbi enɛ shi lɛ, shi jeee ni amɛkɛtsɔɔ akɛ lɛ ji Mesia loo Kristo lɛ, shi moŋ koni akɛtsɔɔ akɛ wɔsɛɛ be mli nibii komɛi ni awo shi yɛ he lɛ ebɛŋkɛ, amɛmiihe amɛba mli. Akɛha yɛ afi 33 Ŋ.B., Nisan nyɔŋ ni ji agbiɛnaa be mli lɛ gbi ni ji nyɔŋma kɛ ekome lɛ nɔ, gbii etɛ dani egbo awuyeli gbele lɛ,

GBALƐ NI KƆƆ “OKADI” LƐ HE

 8. Mɛɛ gbɛ nɔ Yesu tsɔɔ yɛ akɛ ebaaya, ni mɛɛ wiemɔi abaawie yɛ esɛɛkuu lɛ mli?

⁸ Yesu egba nɔ ko ni yɔɔ gbeyei waa yɛ Yudafoi atoiiaŋ, ni ji, amɛsɔlemɔwe ni yɔɔ Yerusalem lɛ hiɛkpatamɔ. Jɛmɛ ejaje etsɔɔ ejamɔ mli shitee-kɛ-wolɔi lɛ akɛ: “Naa, aaashi nyɛwe lɛ amaŋfo ahanyɛ. Ejaakɛ miikɛɛnyɛ akɛ: Kɛjɛ be nɛɛ nɔ kɛyaa nɛɛ nyɛnaŋ mi dɔŋŋ kɛyashi beyinɔ ni nyɛaakɛɛ akɛ: Ajɔɔ mɔ ni baa yɛ Nuŋtsɔ lɛ gbɛi anɔ lɛ!” (Mat. 23:​38, 39) Enɛ tsɔɔ akɛ eeya. Kɛ eku esɛɛ lɛ, mɛi yɛ ni baahi shi ni baamɔ egbalɔ wiemɔi ni yɔɔ Lala 118:26 lɛ mli ni amɛkɛɛ akɛ: “Ajɔɔ mɔ ni baa yɛ Yehowa gbɛi anɔ lɛ!”

 9. Yɛ mɛɛ gbɛ nɔ Yesu tsɔɔ yɛ akɛ nakai wiemɔi ni akɛhereɔ lɛ yɛ esɛɛkuu lɛ mli lɛ efeŋ nɔ ni mɛi ni jaa yɛ Yerusalem sɔlemɔtsu lɛ mli lɛ kɛbaatsu nii?

⁹ Eka shi faŋŋ akɛ jeee sɔlemɔtsu diɛŋtsɛ ni yɔɔ Yerusalem lɛ mli Yehowa jalɔi lɛ kɛ nakai gbalɛ mli wiemɔi lɛ baahere mɔ ni baa yɛ Yehowa gbɛi anɔ lɛ. Enɛ ji nɔ ni Yesu ha efee faŋŋ, taakɛ ewiemɔi ni nyiɛ sɛɛ ni egbɛ ni tsɔɔ nɔ ko pɔtɛɛ lɛ ji lɛ: “Ni Yesu miije kpo yɛ sɔlemɔwe lɛ, ni eya. Ni ekaselɔi lɛ ba eŋɔɔ ni amɛbatsɔɔ lɛ sɔlemɔwe lɛ tsui lɛ. Ni Yesu kɛɛ amɛ akɛ: Nto nyɛmiina nii nɛɛ fɛɛ? Lɛlɛŋ miikɛɛnyɛ akɛ: Ashiŋ tɛ kome yɛ eko nɔ yɛ biɛ ni akpaŋ aluŋ shi.”​—Mat. 24:​1, 2.

10. Mɛɛ sane bɔfoi ejwɛ bi Yesu yɛ Mu Gɔŋ lɛ ni ajɛɔ jɛmɛ anaa sɔlemɔtsu lɛ nɔ, ni te shishitɔɔmɔi sɔrɔtoi biɔ amɛsane lɛ yɛ gbɛi sɔrɔtoi anɔ amɛhaa tɛɛŋ?

¹⁰ Bɔfoi nyɔŋma kɛ enyɔ lɛ bii sane yɛ nɛkɛ gbalɛ ni yɔɔ gbeyei nɛɛ he kɛyashi be mli ni amɛyashɛ Mu Gɔŋ lɛ nɔ, yɛ heni amɛtara ni amɛnaa Yerusalem kɛ esɔlemɔtsu lɛ ni Maŋtsɛ Herode Kpeteŋkpele lɛ esaa lɛ. Nɔ ni amɛna lɛ kanya sanebimɔ ko ni he hiaa shi yɛ bɔfoi lɛ ateŋ mɛi ejwɛ mli, ni enɛ hu tee mɛi krokomɛi lɛ amiishɛɛ shi, ejaakɛ wɔkaneɔ akɛ: “Shi beni eta shi yɛ Mu Gɔŋ lɛ nɔ lɛ, kaselɔi lɛ ba eŋɔɔ yɛ teemɔŋ ni amɛkɛɛ: Kɛɛmɔwɔ, mɛɛ be mli nibii nɛɛ baaba, ni mɛni ji beni oba lɛ [parousia, Hela] kɛ nibii agbɛjianɔtoo nɛɛ naagbee Iɛ he okadi?’” (Mat. 24:⁠3) Young’s Literal Translation of the Holy Bibly lɛ tsɔɔ amɛwiemɔi nɛɛ ashishi kɛjɛɔ Hela wiemɔ mli ni ehaa ekaneɔ akɛ: “Kɛɛmɔwɔ, mɛɛ be mli nibii nɛɛ baaba? ni mɛni ji beni oba lɛ, kɛ yinɔ lɛ naagbee kwraa lɛ he okadi?” Rotherham The Emphasised Bible lɛ kaneɔ tamɔ nakai nɔŋŋ: “Kɛɛmɔwɔ be mli ni nibii nɛɛ baaba, ni mɛni ji beni oba lɛ kɛ yinɔ lɛ naagbee he okadi.” Osɔfonukpa Newcome New Translation (Ŋmalɛ ni Asaa) lɛ kaneɔ akɛ: “Mɛni ji beni opue, kɛ yinɔ lɛ naagbee he okadi?”​—1808 nɔ̃.

11. (a) Mɛɛ be mli Yerusalem sɔlemɔtsu lɛ hiɛkpatamɔ ba, shi mɛni hu baaa yɛ nakai be lɛ mli? (b) No hewɔ lɛ mɛni eja gbɛ akɛ wɔfee yɛ yinɔsane he?

¹¹ Wɔ mɛi ni wɔyɔɔ ŋmɛnɛ lɛ le be mli ni akpata Yerusalem sɔlemɔtsu ni akɛ niji ma lɛ diɛŋtsɛ hiɛ. Eba yɛ afii ohai nyɔŋma kɛ nɛɛhu ni eho nɛ, yɛ afi 70 Ŋ.B. latsaa be mli, beni Roma asraafoi ni yɔɔ Tatsɛ Tito shishi lɛ kpata maŋ muu lɛ fɛɛ hiɛ lɛ. (Luka 21:​20-24) Shi nibii krokomɛi lɛ hu, Kristo Parousia. (ba ni eba, epuemɔ) lɛ kɛ yinɔ loo nibii agbɛjianɔtoo lɛ naagbee aloo, (shihilɛ loo maŋa) lɛ he “okadi” ni yɔɔ kaselɔi lɛ asanebimɔ lɛ mli lɛ hu? Eji anɔkwale akɛ Yudafoi amaŋ loo nibii agbɛjianɔtoo lɛ eshɛ enaagbee kwraa yɛ afi 70 Ŋ.B., shi jeee nibii agbɛjianɔtoo ni da kwraa fe no ni Yudafoi anibii agbɛjianɔtoo lɛ fee ehe gbalɛ mfoniri loo okadi lɛ naagbee. Agbɛnɛ Nuŋtsɔ Yesu Kristo Parousia, ba ni eba aloo epuemɔ lɛ baaa yɛ nakai afi lɛ mli. Akɛni nɛkɛ afii ohai nyɔŋmai enyɔ Ŋ.B. lɛ mli wɔyɔɔ bianɛ hewɔ lɛ, nɔ ni esa akɛ wɔfee ji akɛ wɔkwɛ wɔ afii ohai nyɔŋmai enyɔ nɛɛ yinɔsane mli koni wɔle kɛji akɛ “okadi” ni agba he sane afɔ shi lɛ epue yɛ wɔ diɛŋtsɛ wɔyinɔ nɛɛ mli.

12. Yɛ nɔ ni Stefano wie yɛ Kristo klɛŋklɛŋ baa lɛ he lɛ hewɔ lɛ, mɛni hewɔ ni esa akɛ wɔbi kɛji akɛ bɔfoi lɛ miihi Yesu “baa” aloo “Advent” taakɛ mɛi komɛi tsɛɔ lɛ lɛ he sane?

¹² Esa akɛ wɔkadi akɛ kaselɔi lɛ bi Nuŋtsɔ Yesu Kristo Parousia lɛ shi. Ani amɛmiibi “ebaa” lɛ shi yɛ nakai feemɔ mli? Ebaa loo “Advent” taakɛ mɛi komɛi tsɛɔ lɛ lɛ? Esa akɛ abi nɛkɛ sane nɛɛ, ejaakɛ beni Stefano, Kristofonyo lá Odasefonyo lɛ wieɔ Nuŋtsɔ Yesu klɛŋklɛŋ “baa” lɛ he lɛ, ekɛɛ Yudafoi asaneyelihe wulu loo Sanhedrin ni yɔɔ Yerusalem lɛ akɛ: “Gbalɔi lɛ ateŋ namɔ ni nyɛtsɛmɛi lɛ wako lɛ yi da? Ni amɛgbe mɛi ni gba sa yɛ jalɔ lɛ baa [eleusis, Hela] lɛ hewɔ lɛ, mɔ hu ni agbɛnɛ nyɛ nyɛtsɔmɔ esɛɛgbɛ tsɔɔlɔi kɛ awuyelɔi lɛ.” (Bɔf. 7:52) Wɔkadiɔ yɛ biɛ akɛ beni Stefano wieɔ Kristo klɛŋklɛŋ baa lɛ he lɛ, ekɛ wiemɔ parousia lɛ tsuuu nii, shi moŋ ekɛ Hela wiemɔ eleusis tsu nii. Jeee akɛ esoro nɛkɛ Hela wiemɔi enyɔ nɛɛ yɛ amɛsu kɛ amɛjɛɛhe mli pɛ kɛkɛ, shi moŋ esoro amɛshishinumɔ hu.

13. Yɛ heni aná kɛjɛ lɛ hewɔ lɛ mɛni ji wiemɔ parousia lɛ diɛŋtsɛ shishi, shi mɛni ji nɔ ni mɛi ni lɛ Belɛ wiemɔi lɛ tsɔɔ mli akɛ eshishi ji?

¹³ Wiemɔ parousia lɛ shishinumɔ diɛŋtsɛ ji “yɛ masɛi gbɛ,” ni ajie kɛjɛ Hela wiemɔ para (“masɛi gbɛ”) kɛ ousia (“yɛ”) . Liddell kɛ Scott wolo, A Greek-English Lexicon, Kpo II, baafa 1343, afagbɛ 2, kɛ Ŋleshi wiemɔ “ba ni eba” ha akɛ eklɛŋklɛŋ shishitsɔɔmɔ. Ekɛ wiemɔ ni ji shishɛɛ ha akɛ emlitsɔɔmɔ ni ji enyɔ, ni ekɛfata he akɛ: “Titri lɛ odehe ko loo maŋ onukpa ko saramɔ.” Yɛ enɛ kɛ gbeekpamɔ naa lɛ, Theological Dictionary of the New Testament (ni Gerhard Friedrich ŋma) lɛ Kpo 5 kɛ Ŋleshi wiemɔ “Ba Ni Eba” haa akɛ “Bɔni Anuɔ Shishi yɛ He Fɛɛ He.” (Baafa 859) Agbɛnɛ “Yɛ Gbɛ loo Shishinumɔ Kroko ni Akɛtsuɔ Nii” yɛ Hela wiemɔ mli lɛ, ekɛ “1. Nɔyelɔ ko Saramɔ” haa akɛ emlitsɔɔmɔ. Ekɛɔ yɛ baafa 865 yɛ “Bɔni akɛ pareimi [feemɔ wiemɔ] kɛ parousia yɛ Kpaŋmɔ Hee lɛ mli lɛ Tsuɔ Nii yɛ Gbɛ loo Shishinumɔ Kroko Nɔ” lɛ he akɛ: “Akɛ wiemɔi lɛ tsuuu nii ahaaa Kristo baa yɛ heloo mli yɛ Kpaŋmɔ Hee lɛ mli, ni parousia etsɔɔɔ esɛɛkuu. Jwɛŋmɔ ni ana akɛ parousia fe ekome yɔɔ lɛ ji nɔ ko ni ebana klɛŋklɛŋ kwraa yɛ sɛɛ mli Sɔlemɔ lɛ pɛ mli.

14. (a) Yɛ bɔni akɛ Hela wiemɔ nɛɛ tsuɔ nii yɛ gbɛi krokomɛi anɔ lɛ amɛwiemɔ mli hewɔ lɛ, mɛɛ wiemɔ akɛbaatsu ni fe “ba ni eba? (b) Mɛɛ shishitsɔɔmɔi amli atsɔɔ parousia shishi yɛ be fɛɛ mli akɛ “ba ni eba,” ni te ekɛ enɛ to he yɛ Filipibii 2:12 he aha tɛɛŋ?

¹⁴ No hewɔ lɛ Yesu kaselɔi lɛ biii “eshishɛɛ” lɛ he sane, shi moŋ eshishɛɛ lɛ sɛɛ. Amɛmiibi “ba ni eba” lɛ he sane. Ni kɛji akɛ beni esa akɛ wɔkɛ wiemɔ “ba ni eba” lɛ atsu nii lɛ wɔje shishi wɔkɛ bɔni Helabii kɛ wiemɔ lɛ tsuɔ nii “Yɛ Gbɛ loo Shishinumɔ Kroko Mli” lɛ bɔi nitsumɔ lɛ, belɛ abaanu shishi akɛ kaselɔi lɛ miibi Yesu akɛ: “Mɛni ji [osaramɔ akɛ odehe] lɛ kɛ nibii agbɛjianɔtoo lɛ naagbee he okadi? Babaoo yɛ “saramɔ” mli fe “shishɛɛ.” Nɔ ni fata he hu ji “ba ni eba.” Hela wiemɔ parousia lɛ pueɔ shii nyɔŋmai-enyɔ kɛ ejwɛ yɛ nɔ ni akɛɛ atsɛɔ lɛ Kpaŋmɔ Hee lɛ mli, ni yɛ hei ni ejeɔ kpo yɛ jɛmɛ lɛ fɛɛ lɛ, jeee akɛ New World Translation of the Holy Scriptures Biblia lɛ pɛ tsɔɔ wiemɔ lɛ shishi yɛ be fɛɛ mli akɛ “ba ni eba,” shi moŋ shishitsɔɔmɔi krokomɛi hu feɔ nakai nɔŋŋ, tamɔ Young’s Literal Translation of the Holy Bible, ni afee yɛ 1862 Ŋ.B.; Wilson The Emphatic Diaglott ni afee yɛ 1857-1863 Ŋ.B.; kɛ Rotherham The Emphasised Bible, ni afee yɛ 1897 Ŋ.B. Wɔnaa bɔni akɛ wiemɔ “yɔɔ” (beni eba) kɛ “mibɛ” (beni ebɛ) to he fɛfɛo yɛ Filipibii 2:​12, heni bɔfo Paulo kɛɛ akɛ: “Nyɛboɔ toi daa nɛɛ, jeee beni mikɛnyɛ yɔɔ lɛ kɛkɛ shi moŋ titri lɛ agbɛnɛ ni mibɛ nyɛŋɔɔ nɛɛ hu lɛ.”

OBALAYEI NYƆŊMA LƐ AHE ABƐBUA LƐ

15. “Okadi” ni Yesu tsɔ hiɛ egba efɔ shi lɛ he nibii sɔrɔtoi lɛ biɔ ni atsɔɔ Parousia lɛ shishi yɛ mɛɛ gbɛ nɔ, akɛ nɔkwɛmɔ nɔ lɛ, yɛ mɛɛ abɛbua mli?

¹⁵ “Ba ni eba” lɛ shishinumɔ kɛha parousia jeɔ kpo yɛ Yesu gbalɛ ni kɔɔ Parousia lɛ kɛ nibii agbɛjianɔtoo lɛ naagbee he “okadi” lɛ he nibii babaoo mli. Akɛ nɔkwɛmɔ nɔ lɛ, nyɛhaa wɔsusua egbalɛ lɛ fa ni afɔɔ he wiemɔ akɛ obalayei ninelɔi kɛ kwashiai lɛ ahe abɛbua lɛ he. No mli lɛ Yesu egbe egbalɛ ni kɔɔ “tsulɔ anɔkwafo kɛ nilelɔ” lɛ kɛ “tsulɔ fɔŋ” lɛ he lɛ naa, ni agbɛnɛ egba nɔ kroko ni kɔɔ e-Parousia lɛ he. Kɛkɛ ni etee nɔ ekɛɛ, “no mli ŋwɛi maŋtsɛyeli lɛ aaatamɔ obalayei nyɔŋma ni kɔlɔ amɛkanei akɛ amɛyaakpee ayemforowu. Shi amɛteŋ mɛi enumɔ lɛ nilelɔi ji amɛ, ni mɛi enumɔ lɛ kwashiai. Mɛi ni ji kwashiai lɛ hole amɛkanei lɛ shi amɛŋɔɔɔ mu amɛfataaa he. Shi nilelɔi lɛ ŋɔ mu wo amɛtɔi amli amɛfata amɛkanei lɛ ahe.”​—Mat. 26:​1-4; 24:​45-51.

16. Yɛ bɔni aje abɛbua lɛ shishi aha hewɔ lɛ, yei lɛ ji “obalayei” yɛ mɛɛ shishinumɔ mli?

¹⁶ Klɛŋklɛŋ kwraa lɛ, esa akɛ wɔkadi akɛ nɛkɛ abɛbua nɛɛ kɔɔ gbɔmɛi akuu ko he, no hewɔ lɛ ejeee nɔ ni akɛbaatɔ gbɔmɔ aŋkro ko shihilɛ kɛ egbele fɛɛ he. Mɛi ni enɛ kɔɔ amɛhe lɛ ji “obalayei” yɛ shishinumɔ krɛdɛɛ ko mli, akɛni amɛdamɔ shi kɛha “ŋwɛi maŋtsɛyeli” lɛ hewɔ, ejaakɛ taakɛ Yesu kɛɛ lɛ, “no mli lɛ ŋwɛi maŋtsɛyeli lɛ aaatamɔ [mɛni?] obalayei nyɔŋma.” Enɛ ji “maŋtsɛyeli” ni Yesu tsɔ hiɛ ewie he yɛ egbalɛ lɛ mli akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba” lɛ.​—Mat. 24:⁠14.

17. (a) “Obalayei” lɛ ni amɛyibɔ ji nyɔŋma lɛ feɔ mɛni he mfoniri? (b) Mɛɛ be mli abɛbua Iɛ mlibaa je shishi ni mɛni hewɔ yɛ nakai be lɛ mli?

¹⁷ Yɛ Ŋmalɛ naa lɛ yibɔ ni ji “nyɔŋma” lɛ damɔ shi kɛha emuuyeli yɛ shikpɔŋ nɔ nibii amli, ni akɛni “obalayei” lɛ, ayibɔ ji nyɔŋma hewɔ lɛ efeɔ Kristofoi ni amɛkɛɔ akɛ amɛbaabote ŋwɛi maŋtsɛyeli lɛ mli akɛ Yesu Kristo nanemɛi niyelɔi lɛ fɛɛ he mfoniri. Belɛ, mɛɛ be mli gbalɛ abɛbua nɛɛ mlibaa je shishi? Yɛ Hɔgbaa, Sivan 6, Pentekoste Gbijurɔyeli lɛ nɔ yɛ afi 33 Ŋ.B. Yɛ mɛɛ gbɛ nɔ? Ejaakɛ nakai be lɛ mli obalayei akuu lɛ ba shihilɛ mli. Ejaakɛ nakai gbi lɛ nɔ akɛ mumɔ krɔŋkrɔŋ baptisi Yesu Kristo kaselɔi anɔkwafoi ni amɛbua amɛhe naa yɛ ŋwɛitsu ko mli yɛ Yerusalem lɛ. Ni no hewɔ lɛ Nyɔŋmɔ fɔ amɛ ni amɛbafee emumɔŋ bii ni amɛna gbɛhe akɛ ‘Nyɔŋmɔ niyelɔi’ kɛ “Kristo nanemɛi niyelɔi.” (Rom. 8:17) Shi yɛ Biblia mli lɛ niyelɔi lɛ bafeɔ bihii; ni mɛni hewɔ ni yɛ nɛkɛ abɛbua nɛɛ mli lɛ, afeɔ Kristo kaselɔi asafo ni akɛ mumɔ efɔ amɛ lɛ amlibii lɛ fɛɛ he mfoniri akɛ yei, obalayei, yɛ ayemforo kpeemɔ gbɛkɛ, ni amɛjeɔ kpo amɛkɛ ayemforowu lɛ yakpeɔ lɛ? ni namɔ ji nɛkɛ “ayemforowu” nɛɛ?

18. Yohane Baptisilɔ Iɛ kɛ lɛ diɛŋtsɛ kɛ Yesu to mɛni he yɛ yookpeemɔ saji amli ni Yohane gbala lɛ diɛŋtsɛ ekaselɔi Iɛ ajwɛŋmɔ kɛtee namɔ nɔ?

¹⁸ Klɛŋklɛŋ kwraa lɛ, nɛkɛ “ayemforowu” nɛɛ ji Nuŋtsɔ Yesu Kristo ni atee lɛ shi ni awo ehiɛ nyam lɛ. Yohane Baptisilɔ lɛ wie ehe yɛ nakai shishinumɔ mli ni yɛ enɛ hewɔ lɛ ekɛ lɛ diɛŋtsɛ ehe to “ayemforowu lɛ shieŋtsɛ” lɛ he. Yɛ nakai gbii lɛ amli lɛ, “ayemforowu lɛ shieŋtsɛ” lɛ ji mɔ ni toɔ gbalashihilɛ ni yaa nɔ yɛ ayemforowu lɛ kɛ ayemforo lɛ teŋ lɛ he gbɛjianɔ. Yɛ nakai gbɛkɛ ni mɛi enyɔ ni boteɔ gbalashihilɛ mli nɛɛ bakpeɔ lɛ, agbalaa jwɛŋmɔ kɛbaa ayemforowu lɛ nɔ fe ayemforowu lɛ shieŋtsɛ lɛ. No hewɔ lɛ Yohane Baptisilɔ lɛ kɛɛ ekaselɔi lɛ ni eesaa amɛ eha Yesu Kristo akɛ amɛ mfoniri-feemɔ mli “ayemforowu” lɛ akɛ: “Jeee mi ji Kristo lɛ, shi moŋ akɛ atsu mi kɛtsɔ ehiɛ. Mɔni hiɛ ayemforo lɛ, lɛ ji ayemforowu; shi ayemforowu lɛ shieŋtsɛ ni damɔ shi boɔ lɛ toi lɛ, nya enyaa yɛ ayemforowu lɛ gbee lɛ hewɔ. No hewɔ lɛ nɛkɛ minyamɔ nɛɛ eba mli. Lɛ lɛ, ja eshwere, ni mi lɛ, minɔ gbɔ.” (Yoh. 3:​28-30) No hewɔ lɛ Yohane gbala ekaselɔi lɛ ejwɛŋmɔ kɛba,Yesu nɔ yɛ gbɛ ni ja nɔ.

19, 20. (a) Yɛ mɛɛ gbɛ nɔ Yesu kɛ ehe to ayemforowu he yɛ abɛbua mli kɛ agbɛnɛ yɛ Kpojiemɔ? (b) Nɔ ni kɛ enɛ kpaa gbee lɛ, te atsɛɔ Yerusalem Hee Iɛ tɛɛŋ?

¹⁹ Yɛ lɛ diɛŋtsɛ egbɛfaŋ lɛ, Yesu kɛ lɛ diɛŋtsɛ ehe to ayemforowu he yɛ abɛbua kroko ni ekɛha lɛ mli. Enɛ ji abɛbua ni kɔɔ “yookpeemɔ okpɔlɔŋ” ni maŋtsɛ ko ŋmɛ eha ebinuu ni ebinuu lɛ damɔ shi kɛha Yehowa Nyɔŋmɔ, Naanɔ Maŋtsɛ Kpeteŋkpele lɛ Binuu lɛ. (Mat. 22:​1-14) Ni yɛ Kpojiemɔ ni Yesu Kristo nine shɛ nɔ kɛjɛ Nyɔŋmɔ ŋɔɔ ni ekɛha bɔfo Yohane lɛ mli lɛ, akɛ Yesu, ákɛ Nyɔŋmɔ Toobi lɛ to ayemforowu ni kɛ ekaselɔi asafo lɛ boteɔ gbalashihilɛ mli lɛ he, yɛ nɛkɛ wiemɔi nɛɛ fa mli: “Nyɛhaa wɔmii ashɛa ni wɔmli aflia wɔ ni wɔwoa ehiɛ nyam! Ejaakɛ toobi lɛ yookpeemɔ lɛ eshɛ, ni eŋa lɛ esaa ehe eto. Ni aha lɛ klala ni he tse ni kpɛɔ nyeramnyeram koni ewo. Ejaakɛ klala lɛ ji krɔŋkrɔŋbii lɛ ajalɛ nii lɛ. Ni ekɛɛ mi akɛ: Ŋmaa: Ajɔɔ mɛi ni atsɛ amɛ kɛba toobi lɛ yookpeemɔ okpɔlɔ lɛ he lɛ.” Agbɛnɛ hu bɔfo Yohane wie ŋwɛibɔfo ko ni ba eŋɔɔ ni ebakɛɛ lɛ sane nɛɛ he:

²⁰ “Ba, ni matsɔɔo ayemforo lɛ ni ji toobi lɛ ŋa lɛ. Ni eŋɔ mi yɛ mumɔ mli kɛtee gɔŋ kpele ko ni kwɔ ko nɔ, ni etsɔɔ mi maŋ kpeteŋkpele lɛ ni ji Yerusalem krɔŋkrɔŋ lɛ ni ejɛ Nyɔŋmɔ ŋɔɔ yɛ ŋwɛi eekpelekeshi, ni ehiɛ Nyɔŋmɔ anunyam lɛ.”​—Kpoj. 19:​7-9; 21:​9-11.

21. Paulo kɛ wekukpaa ni ka Yesu Kristo kɛ esafo lɛ teŋ lɛ to mɛni he yɛ Efesobii 5:​23-27?

²¹ Bɔfo Paulo kɛ wekukpaa ni ka Yesu Kristo kɛ ehefatalɔi niyelɔi 144,000 asafo lɛ teŋ lɛ to wu kɛ ŋa he. Eŋma akɛ: “Ejaakɛ wu lɛ ji ŋa lɛ yitso, taakɛ bɔni Kristo hu ji asafo lɛ yitso lɛ, ni lɛ nɔŋŋ ji gbɔmɔtso lɛ yiwalaherelɔ. Shi taakɛ bɔni asafo lɛ baa ehe shi ehaa Kristo lɛ, nakai nɔŋŋ yei lɛ hu afee aha amɛ diɛŋtsɛ amɛwumɛi lɛ yɛ nɔ fɛɛ nɔ mli. Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi taakɛ bɔni Kristo hu sumɔɔ asafo lɛ ni eŋɔ lɛ diɛŋtsɛ ehe eha yɛ ehewɔ, koni ekɛ nu hejuu lɛ atsuu ehe yɛ wiemɔ mli ni ehaŋ efee krɔŋkrɔŋ, koni eŋɔ lɛ edamɔ shi eha lɛ diɛŋtsɛ ehe akɛ anunyam asafo ni he bɛ kpa ko aloo hiɛkuamɔ ko aloo nakai nɔ ko, shi moŋ efee krɔŋkrɔŋ ni shwamɔ ko akahi ehe.”​—Efe. 5:​23-27.

22. Yookpeemɔ lɛ baa mli yɛ nɛgbɛ, ni mɛni hewɔ ni Yesu abɛbua lɛ etsiii ayemforowu lɛ ayemforo loo eŋa lɛ ta lɛ?

²² Ayemforowu Yesu Kristo kɛ esafo “ayemforo” lɛ kpeemɔ lɛ baa mli yɛ ŋwɛi, heni amɛbaafee ekome yɛ, yɛ Yehowa Nyɔŋmɔ, ni ji Ŋwɛi Tsɛ lɛ jɔɔmɔ shishi. Shi esa akɛ akadi akɛ, yɛ obalayei nyɔŋma lɛ abɛbua lɛ mli lɛ, atsiii ayemforo lɛ ta. Afee enɛ beni afee ni akɛtsĩ yiŋfutumɔ ko ni baaba yɛ nibii ahe susumɔ mli lɛ naa. Ejaakɛ, yɛ anɔkwale mli lɛ, ahalaa “ayemforo” lɛ kɛjɛɔ “obalayei nyɔŋma” lɛ diɛŋtsɛ ateŋ, “obalayei” lɛ ni ahalaa amɛ lɛ ji mɛi ni “ajɔɔ” ni “atsɛ amɛ kɛba toobi lɛ yookpeemɔ okpɔlɔ lɛ he” lɛ. (Kpoj. 19:⁠9) Yɛ enɛ kɛ gbeekpamɔ naa lɛ Yesu abɛbua lɛ tsɔɔ akɛ “obalayei” ni sa lɛ tsɔ shinaa lɛ mli kɛtee yookpeemɔ asa lɛ nɔ. Abɛbua lɛ tee nɔ etsɔɔ bɔni fee ni amɛhe sa lɛ mli.

23. Yɛ anɔkwale ni eji ákɛ akɛ Kristo asafo lɛ mlibii lɛ toɔ “obalayei” ahe Iɛ kɛ mɛɛ taomɔnii fɔɔ amɛnɔ?

²³ Akɛ Kristo ayemforo asafo lɛ toɔ “obalayei” ahe yɛ gbɛi babaoo nɔ fe yiŋtoo ni ji akɛ átsɛ amɛhe baa aha obalanyo Ayemforowu lɛ pɛ. Amɛji “obalayei” hu yɛ mumɔŋ shishinumɔ mli. Taakɛ obalayoo fro he tse, eyɛ krɔŋkrɔŋ mɔ ni nuuko etako ehe lɛ, nakai nɔŋŋ hu esa akɛ Kristofoi asafo lɛ mlibii anɔkwafoi nɛɛ afee mɛi ni yɔɔ krɔŋŋ ni amɛhe tse kɛtsɔ amɛhe ni amɛaatsi kɛaajɛ je lɛ he lɛ nɔ, ni amɛkɛ jamɔ mli kɛ maŋkwramɔŋ gbɛjianɔtooi ni yɔɔ je nɛŋ lɛ akana nɔ ko feemɔ kwraa. Amɛkɛ amɛhe wooo Sɔlemɔ lɛ kɛ Maŋ lɛ ekomefeemɔ ko mli. Amɛhiɔ amɛhetsemɔ akɛ obalayei yɛ mumɔŋ lɛ amli, ni amɛkɛ amɛhe wooo je nɛŋ saji amli. (2 Tim. 2:​3, 4) Enɛ ji nɔ ni atsɔɔ be mli ni awie yɛ 144,000 lɛ ni ana ni amɛkɛ Nyɔŋmɔ Toobi lɛ damɔ mumɔŋ Zion Ofɔŋ lɛ nɔ lɛ ahe akɛ: “Mɛnɛɛmɛi ji mɛi ni kɛ yei buleko amɛhe [tamɔ jamɔ mli ajwamaŋ, Babilon Kpeteŋkpele lɛ kɛ ebiyei lɛ], ejaakɛ obalahii muji ji amɛ ni amɛnyiɛɔ toobi lɛ sɛɛ kɛyaa he fɛɛ he ni eyaa lɛ.”​—Kpoj. 14:4; 17:​3-5.

24. Mɛni ji nɔ ni Yakobo 1:​26, 27 kɛɔ yɛ hetsemɔ ni ataoɔ yɛ mɛi ni tamɔ obalayei lɛ ahe lɛ he?

²⁴ Yɛ hetsemɔ ni ataoɔ lɛ he lɛ, kaselɔ Yakobo kɛɛ akɛ: “Shi kɛ efeɔ nyɛteŋ mɔ ko akɛ Nyɔŋmɔjalɔ ji lɛ, ni ewooo elilɛi manyofɛlɛ shi moŋ eshishiuɔ etsui lɛ, nɛkɛ gbɔmɔ nɛɛ jamɔ lɛ yaka ni. Nyɔŋmɔjamɔ ni he tse ni ehe bɛ muji ko yɛ Nyɔŋmɔ kɛ tsɛ lɛ hiɛ ji enɛ, akɛ mɔ asara awusai kɛ okulafoi yɛ amɛmanehulu lɛ mli, ni eto ehe kɛjɛ je nɛŋ koni ekawo ehe muji.”​—Yak. 1:​26, 27.

AAAJE KPO AYAKPEE “AYEMFOROWU” LƐ

25. Mɛɛ gbɛ nɔ Kristo asafo lɛ je shishi kɛ jamɔ krɔŋŋ ni he tse ni he bɛ muji ko yɛ Nyɔŋmɔ hiɛ yɛ Pentekoste yɛ afi 33 Ŋ.B, ni mɛɛ odaseyeli amɛyɔɔ yɛ enɛ he?

²⁵ Kristofoi asafo lɛ je shishi kɛ “Nyɔŋmɔjamɔ ni he tse ni ehe bɛ muji ko yɛ Nyɔŋmɔ kɛ tsɛ lɛ hiɛ” yɛ afi 33 Ŋ.B. Pentekoste Gbijurɔyeli lɛ nɔ, yɛ be mli ni mumɔ krɔŋkrɔŋ lɛ jɛ ŋwɛi tamɔ baptisimɔ ba Yesu Kristo kaselɔi anɔkwafoi lɛ anɔ yɛ be mli ni amɛmɛɔ yɛ Yerusalem lɛ. Yɛ mumɔŋ gbɛfaŋ lɛ amɛji obalayei akuu, ni amɛtsi amɛhe kɛjɛ jamɔ mli gbɛjianɔtoo ni ekpoo Yesu Kristo ni amɛha Roma amralo Pontio Pilato sɛŋ Yesu yɛ tso nɔ lɛ he. (Bɔf. 2:​1-42) Amɛkɛ Mesia Yesu tsɔɔmɔi lɛ kɛ ebɔfoi nyɔŋma kɛ enyɔ lɛ atsɔɔmɔi lɛ je shishi, ni amɛtsi amɛhe kɛjɛ “yinɔ kɔdɔŋ” ni kɛ ehe ewo jamɔŋ blemasaji ni bɛ ŋmalɛ lɛ mli ni amɛblematsɛmɛi ni ashishiu amɛ lɛ kɛha amɛ lɛ he. (Bɔf. 2:​40; Gal. 1:​13-17; Mat. 15:​1-9) Mumɔ krɔŋkrɔŋ baptisimɔ kɛ nikeenii ni ji lilɛi sɔrɔtoi lɛ ji odaseyeli ni tsɔɔ akɛ amɛyɛ anɔkwale jamɔ, ni amɛle enɛ hu. Agbɛnɛ esa akɛ amɛhi shi akɛ “obalayei” muji yɛ mli.

26, 27. (a) Atsɛ Kristofoi asafo lɛ he baa yɛ mumɔŋ aha namɔ yɛ Pentekoste gbi lɛ nɔ yɛ afi 33 Ŋ.B.? (b) Paulo wie etsɔɔ Kristofoi lɛ yɛ 2 Korintobii 1:​2-5 tamɔ “ayemforowu lɛ shieŋtsɛ” yɛ mɛɛ gbɛ nɔ?

²⁶ Nakai (Sivan 6, afi 33 Ŋ.B.) gbi lɛ nɔ atsɛ Kristofoi asafo lɛ he baa aha ŋwɛi Ayemforowu, Yesu Kristo. Mɛi fɛɛ ni yɛ sɛɛ mli amɛbafee mɛi ni fata shishijee asafo lɛ ni amɛyibɔ ji kaselɔi 120 Iɛ ahe yɛ Yerusalem lɛ bafee nakai kuu ni atsɛ amɛhe baa lɛ fa, ni ebafee gbɛnaa nii ni ka amɛnɔ akɛ amɛhi shi akɛ “obalayei” muji. Anɔkwasane, nɛɛ ji nɔ ni bɔfo Paulo wie he yɛ be mli ni ebɔ Kristofoi ni yɔɔ Korinto lɛ kɔkɔ akɛ amɛkwɛ jogbaŋŋ koni amɛkafite amɛhe baa ni atsɛ aha Yesu Kristo lɛ ni amɛyakpee amale Kristo ko. Paulo kɛɛ nɔ ko tamɔ eji “ayemforowu lɛ shieŋtsɛ” akɛ:

²⁷ “Ejaakɛ miiye nyɛhe awuŋa miiha Nyɔŋmɔ; ejaakɛ mitsɛ nyɛhe baa miha nuu kome, ni mikɛ obalayoo fro ni he tse ayaha Kristo. Shi miishe gbeyei akɛ aleenɔ taakɛ bɔni onufu lɛ kɛ ekutumpɔo lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔi kɛjɛ krɔŋfeemɔ ni nyɛjie nyɛtsɔɔ Kristo lɛ mli. Ejaakɛ eji akɛ mɔ ni baa lɛ bashiɛɔ Yesu kroko ni wɔshiɛko, aloo mumɔ kroko ni nyɛnako sa, aloo sanekpakpa kroko ni nyɛheko, kulɛ nyɛaahere lɛ jogbaŋŋ. Ejaakɛ misusuɔ akɛ eshwɛɛɛ mi nɔ ko nɔ ko ni mikɛ bɔfoi agboi lɛ aye egbɔ.”​—2 Kor. 11:​2-6.

28. Yɛ mɛɛ gbɛ nɔ Yesu kɛ ŋwɛibɔfoi fɛɛ kɛɛ kaselɔi lɛ akɛ ebaaba tamɔ Yudanyo ayemforowu ni ebaŋɔ amɛ kɛya shia?

²⁸ Amɛkpeemɔ kɛmiiha obalanyo Ayemforowu lɛ yɛ ŋwɛi baafee nɔ ko ni baaba yɛ wɔsɛɛ be mli ni aleko, be ko ni yɔɔ shɔŋŋ kɛjɛ gbɛ ni atsɛ amɛhe baa yɛ afi 33 Ŋ.B. Pentekoste gbi lɛ nɔ kɛyaa. Gbii nyɔŋmai enumɔ kɛ enyɔ dani enɛ aaaba lɛ, yɛ gbɛkɛ ni bɔfo Yuda Iskariot ni yeee anɔkwale lɛ tsɔɔ esɛɛ gbɛ lɛ, no mli lɛ Yesu ekɛɛ ebɔfoi anɔkwafoi lɛ akɛ: “Shihilɛhei pii yɛ mitsɛwe lɛ; jeee nakai kulɛ mikɛɛnyɛ momo; ejaakɛ miiya ni mayasaa gbɛhe matonyɛ. Ni kɛji mitee ni miyasaa gbɛhe mitonyɛ lɛ, mibaba ekoŋŋ ni mibaŋɔnyɛ kɛya heni mi diɛŋtsɛ miyɔɔ lɛ, koni heni miyɔɔ lɛ nyɛhu nyɛhi jɛi. Ni heni miyaa lɛ nyɛle.” (Yoh. 14:​2-4) No sɛɛ gbii nyɔŋmai ejwɛ kɛ enyɔ lɛ, beni ekwɔɔ kɛjɛɔ Mu Gɔŋ lɛ nɔ kɛyaa ni ekaselɔi lɛ ateŋ mɛi komɛi miina lɛ lɛ, bɔfoi enyɔ jie amɛhe kpo tsɔɔ amɛ ni amɛkɛɛ amɛ akɛ̃: “Nyɛ Galileabii, mɛɛba nyɛdamɔ shi nyɛkwɛɔ ŋwɛi nɛkɛ? Nɛkɛ Yesu nɛɛ ni aŋɔ lɛ kɛjɛ nyɛŋɔɔ kɛtee ŋwɛi nɛɛ, ebaaba nakai nɔŋŋ tamɔ bɔni nyɛnaa akɛ eyaa ŋwɛi nɛɛ.” (Bɔf. 1:​9-11) No hewɔ lɛ kaselɔi lɛ le akɛ Yesu ni yaa lɛ baaba abaŋɔ amɛ kɛya eŋwɛi Tsɛ lɛ shia, tamɔ Yudanyo ayemforowu yɛ yoo kpeemɔ gbɛkɛ, taakɛ bɔni Yesu etsɔ hiɛ ewo amɛ shi lɛ.​—Yoh. 14:​1-3.

29. (a) Mɛɛ be mli “obalayei” akuu lɛ je shishi akɛ amɛkɛ Ayemforowu lɛ yaakpe? (b) Mɛɛ sanebimɔ te shi agbɛnɛ, ni anɔkwale ni eji akɛ obalayei akui enyɔ lɛ ayibɔ lɛ fɛɛ yeɔ egbɔ lɛ tsɔɔ mɛni?

²⁹ Obalayoo fro kuu ni atsɛ amɛhe baa nɛɛ kɛ nakai yookpeemɔ he gbɛkpamɔ lɛ yiŋ akɛ amɛkɛ Ayemforowu lɛ yaakpe, koni amɛhere lɛ koni amɛkɛ lɛ anya. Esa akɛ amɛsara, ejaakɛ “amɛlee nɔ gbi loo nɔ ŋmɛlɛtswaa nɔ.” (Mat. 25:13) Mɛi ni je shishi kɛjɛ afi 33 Ŋ.B. Pentekoste gbi lɛ nɔ lɛ kɛ akpei krokomɛi ni kɛ amɛhe yabɔ amɛhe yɛ sɛɛ mli lɛ ateŋ mɛi enyiɛ baatsɔmɔ tamɔ obalayei “nilelɔi” yɛ nakai abɛbua lɛ mli, ni amɛteŋ mɛi enyiɛ baafee tamɔ obalayei “kwashiai” aloo mɛi ni leee nii? Abɛbua lɛ feɔ nilelɔi lɛ ayibɔ lɛ akɛ ekɛ kwashiai lɛ ayibɔ lɛ yeɔ egbɔ, ni tsɔɔ ãkɛ, akɛ hegbɛ ni yeɔ egbɔ haa mɛi fɛɛ ni jeɔ shishi lɛ, ni agbɛnɛ beni afee ni ekatsɔɔ akɛ fa kome yi baafa fe fa kroko hewɔ lɛ ashi sane lɛ ni amuuu naa. Shi abɛbua lɛ gba fɔ shi akɛ jeee mɛi fɛɛ ni jeɔ shishi akɛ “obalayei” lɛ baajie amɛhe kpo akɛ mɛi ni sa akɛ aŋɔɔ amɛ awoɔ mli ni amɛyanaa miishɛɛ yɛ “Toobi lɛ yookpeemɔ okpɔlɔ lɛ” shishi.​—Luka 12:​35-38.

30. (a) Mɛni kɛ sɔrɔtofeemɔ ba obalayei nilelɔi lɛ kɛ kwashiai lɛ ateŋ? (b) Ani amɛfɛɛ amɛkɛ kanei ni miitso je shishi, no hewɔ lɛ mɛni ji sanebimɔ ni he hiaa yɛ enɛ mli lɛ?

³⁰ Belɛ mɛni ji nɔ ni kɛ sɔrɔtofeemɔ ba obalayei nilelɔi lɛ kɛ obalayei kwashiai loo mɛi ni leee nii lɛ ateŋ? Enɛ: “Mɛi ni ji kwashiai lɛ hole amɛkanei lɛ, shi amaŋɔɔɔ mu amɛfataaa he. Shi nilelɔi lɛ ŋɔ mu wo amɛtɔi amli amɛfata amɛkanei lɛ ahe.” (Mat. 25:​3, 4) Shi kɛlɛ amɛfɛɛ amɛle akɛ kanei ni tsoɔ kɛyashiɔ be mli ni aaahere mɛi ni nyiɛ yookpeemɔ lɛ sɛɛ lɛ kɛaaba mli lɛ baafee nɔ ni baakadi amɛ, nɔ ni yeɔ odase akɛ amɛsa akɛ aŋɔɔ amɛ kɛboteɔ yookpeemɔ okpɔlɔŋmɛɛ lɛ shishi. Yɛ enɛ hewɔ lɛ mu ni fa he miihia amɛ kɛyashi be mli ni kuu ni nyiɛ ayemforo lɛ sɛɛ lɛ fɛɛ aaayashɛ ayemforowu lɛ shia. Mɛni ji nɔ ni mu lɛ feɔ he mfoniri yɛ abɛbua nɛɛ mlibaa lɛ mli? Amɛje shishi akɛ amɛkɛ ayemforowu lɛ aaakpe dani atswa eshishɛɛ lɛ he adafi, ni beni amɛje shishi lɛ, no mli amɛkanei lɛ miitso. No hewɔ lɛ kɛ hoo kwraa lɛ mu yɛ amɛkanei lɛ amli. Shi ani efa bɔni eeeha amɛkanei lɛ atso kɛyashi be mli ni mɛi ni nyiɛ ayemforo lɛ sɛɛ lɛ aaabote ayemforowu lɛ shia?

[Shishigbɛ niŋmai]