Te Otsuɔ Osatofeemɔ He Nii Ohaa Tɛŋŋ?

YUDA ISKARIOT tee Yesu ŋɔɔ ni “eshɔ enaa,” yɛ Getsemane abɔɔ lɛ mli. Eji kusum nifeemɔ ni tsɔɔ mɔ hedɔɔ ni ayɔɔ. Shi Yuda nifeemɔ lɛ ji nɔ ko ni ekwa efee koni ekɛjie Yesu etsɔɔ mɛi ni eba nakai gbɛkɛ lɛ koni amɛbamɔ lɛ lɛ. (Mateo 26:48, 49) Yuda ji osatofonyo—mɔ ni kwaa efeɔ ehe mɔ kpakpa, mɔ ko ni feɔ enii tamɔ ehi shi ehiii. Hela wiemɔ ni atsɔɔ shishi akɛ “osatofonyo” lɛ tsɔɔ “mɔ ni haa hetoo” ni etsɔɔ mɔ ni jieɔ mɛi ahiɛtserɛ yɛ shwɛmɔhe hu. Yɛ be ni sa mli lɛ, wiemɔ lɛ bakɔ mɔ ko ni miikwa eefee nɔ ko bɔni afee ni ekɛlaka mɛi krokomɛi lɛ he.

Te ofeɔ onii yɛ osatofeemɔ he ohaa tɛŋŋ? Ani omli fuɔ, akɛ nɔkwɛmɔnɔ lɛ, kɛji ona ni tawa feelɔi miiwo eshɛremɔ he hewalɛ yɛ tsofafeemɔ mli odaseyeli ni tsɔɔ akɛ amɛ nibii lɛ yeɔ mɔ awui lɛ fɛɛ sɛɛ? Ani omli fuɔ yɛ osatofeemɔ ni shiakwɛlɔi ni feɔ mɛi ni akɛ amɛ ewo amɛkwɛmɔ shishi lɛ yiwalɛ nibii lɛ ahe? Ani onuɔ he akɛ aye bo awui kɛji naanyo ko ni osusuɔ akɛ eji anɔkwafo lɛ bafee mɔ ni yeee anɔkwa lɛ? Mɛɛ gbɛ nɔ jamɔ mli osatofeemɔ saa ohe yɛ?

“Kpóo Hã Nyɛ . . . Osatofoi!”

Susumɔ jamɔ shihilɛ ni yɔɔ beni Yesu yɔɔ shikpɔŋ nɔ lɛ he okwɛ. Woloŋmalɔi kɛ Farisifoi kwa amɛfee amɛhe Nyɔŋmɔ Mla lɛ tsɔɔlɔi anɔkwafoi, shi yɛ anɔkwale mli lɛ amɛkɛ gbɔmɛi atsɔɔmɔi ni jie jwɛŋmɔ kɛjɛ Nyɔŋmɔ nɔ lɛ wo mɛi ajwɛŋmɔ mli obɔ. Woloŋmalɔi kɛ Farisifoi lɛ feɔ veveeve yɛ mla wolo lɛ nɔ, shi amɛkpoɔ shishijee shishitoo tɛi ni jieɔ suɔmɔ kɛ musuŋtsɔlɛ kpo lɛ. Amɛkwaa amɛfeɔ amɛhe mɛi ni etuu amɛhe amɛha Nyɔŋmɔ, shi yɛ teemɔŋ lɛ amɛmli eyi kɛ efɔŋ sɔŋŋ. Amɛnifeemɔi lɛ kɛ amɛwiemɔi lɛ kpaaa gbee kwraa. Yiŋtoo hewɔ ni amɛfeɔ lɛ ji “koni mɛi ana.” Amɛtamɔ “gbohii asãŋi ni asha he ni amɛhewɔ efee fɛo moŋ, shi amɛmligbɛ lɛ eyimɔ obɔbɔ kɛ gbohii awui kɛ muji srɔtoi fɛɛ.” Beni Yesu kɛ ekãa jieɔ amɛ osatofeemɔ lɛ kpo lɛ, eti mli ekɛɛ amɛ akɛ: “Kpóo hã nyɛ, woloŋmalɔi kɛ Farisifoi, osatofoi!”—Mateo 23:5, 13-31.

Eji ohi shi yɛ nakai gbii lɛ amli kulɛ, taakɛ mɛi krokomɛi ni hiɛ tsui ni ja lɛ ji lɛ ekolɛ jamɔ mli osatofeemɔ ni tamɔ enɛ baaje onijiaŋ wui. (Romabii 2:21-24; 2 Petro 2:1-3) Shi kulɛ ani obaaŋmɛ gbɛ ni woloŋmalɔi kɛ Farisifoi lɛ asatofeemɔ lɛ ahao bo kɛyashɛ he ni obaakpoo jamɔi fɛɛ, ni nɔ ni fata he ji nɔ ni Yesu Kristo kɛ ekaselɔi lɛ tsɔɔ ni amɛhi shi yɛ naa lɛ? Ani no yeŋ bo awui?

Ekolɛ osato su ni yɔɔ mɛi ni diɔ jamɔ sɛɛ lɛ ateŋ lɛ baagbala wɔ kɛjɛ jamɔ he, ni wɔnijiaŋ baaje wui. Shi kɛlɛ, nɔheremɔ ni tamɔ nɛkɛ hu baashwila wɔ yɛ anɔkwale ni kɔɔ anɔkwa jálɔi ahe lɛ mli. Naatsii nibii ni wɔtswaa wɔmaa shi kɛha hebuu kɛmiishi osatofeemɔ lɛ baanyɛ ni yɛ nakai feemɔ mli lɛ egbala wɔ kɛjɛ anɔkwa nanemɛi ahe. No hewɔ lɛ, esa akɛ bɔ ni wɔhereɔ osatofeemɔ nɔ wɔhaa lɛ afee nɔ ni nilee yɔɔ mli ni ŋmɛɔ pɛpɛɛpɛ.

“Nyɛkwɛa ni Nyɛhiɛ Ahia Nyɛhe Nɔ”

Klɛŋklɛŋ lɛ, esa akɛ wɔkase bɔ ni wɔɔfee wɔyoo osatofoi. Bei pii lɛ enɛ feemɔ bɛ mlɛo. Weku ko kase enɛ beni amɛlaaje nii babaoo. Nɔ̃ enyɔ nyɛ lɛ nɔ. Beni weku lɛ ŋmaa sãmamɔ wolo kɛshiɔ helatsamɔhe ko yɛ gbɛ gbonyo ni amɛtsɔ nɔ amɛkwɛ amɛnyɛ hewɔ lɛ, amɛyatao mlalelɔ ko ni ji shiɛlɔ yɛ sɔlemɔ ko ni yɔɔ he ni amɛyɔɔ lɛ. Eyɛ mli akɛ helatsamɔhe lɛ wo nɔ ni eba lɛ he nyɔmɔ shika dɔlai akpekpei 3.4 moŋ, shi oshara ni ba weku lɛ nɔ lɛ mli wo wu. Nyɛ lɛ gbo akɛ mɔ ni yeɔ ohia futafuta, ni anaaa shika ni akɛfee eyara. Mɛni hewɔ? Ejaakɛ mlalelɔ lɛ ju shika lɛ babaoo. Yɛ nɔ ni kɔɔ mlalelɔ nɛɛ he lɛ, mla he adafitswaa wolo ko wie akɛ: “Kɛji eshiɛɔ su ni ejieɔ lɛ kpo lɛ . . . , no lɛ esa akɛ esane lɛ afee akɛ: nyɛhaa wɔtswaa ojo.” Te wɔbaafee tɛŋŋ wɔbu wɔhe kɛjɛ gbɔmɛi ni tamɔ nakai ahe?

“Nyɛkwɛa ni nyɛhiɛ ahia nyɛhe nɔ” ji ŋaawoo ni Yesu kɛha mɛi ni hi shi yɛ egbii lɛ amli ni kɛ jamɔ mli osatofeemɔ kpe lɛ. (Mateo 16:6; Luka 12:1) Hɛɛ, esa akɛ wɔkwɛ wɔhe nɔ jogbaŋŋ. Ekolɛ gbɔmɛi baama oti ko ni hi fe fɛɛ ni akɛmaa hiɛ nɔ mi ni amɛbaajie anɔkwayeli babaoo kpo moŋ, shi ehe miihia ni wɔkwɛ shihilɛ lɛ kɛ nɔ fɛɛ nɔ ni baajɛ mli aba lɛ jogbaŋŋ koni wɔkakpɛlɛ nɔ kɛkɛ amrɔ nɔŋŋ yɛ sɛɛnamɔ ni yɔɔ he lɛ hewɔ. Ani wɔkwɛŋ wɔ shika ni wɔjieɔ yɛ shikatoohe lɛ jogbaŋŋ kɛji wɔle akɛ shika ni afo ni jeee ekpakpa lɛ yɛ he fɛɛ he?

Osatofoi ejie amɛhe kpo yɛ anɔkwa Kristofoi asafo lɛ po mli. Kaselɔ Yuda bɔ kɔkɔ yɛ amɛhe akɛ: “Mɛnɛɛmɛi ji mɛi ni woɔ nyɛsuɔmɔ niyenii lɛ ahe muji, ejaakɛ amɛkɛ nyɛ yeɔ nii ni amɛsheee gbeyei, amɛmiilɛ amɛ diɛŋtsɛ amɛhe, atatui ni nu bɛ amɛmli ni kɔɔyɔi kpalaa amɛ kɛbɔleɔ shi ji amɛ, tsei ni yibaai ekpala ni amɛwooo yibii.”—Yuda 12.

Ní ‘wɔɔkwɛ ni wɔhiɛ ahi wɔhe nɔ’ lɛ tsɔɔ gbɛ ni wɔŋmɛŋ ni mɔ ko ni kwaa efeɔ ehe mɔ ni sumɔɔ mɔ shi yɛ anɔkwale mli lɛ eji mɔ ni buɔ ehe fe nine ni ewoɔ susumɔi ni damɔɔɔ Nyɔŋmɔ Wiemɔ lɛ nɔ lɛ mli hewalɛ lɛ alaka wɔ. Taakɛ tɛ wulu kɛ enaabui piɔpiɔ ni kã nui ni efeko hamahama shishi lɛ ji lɛ, gbɔmɔ ni tamɔ nɛkɛ baanyɛ aha mɛi ni hiɛ bɛ amɛhe nɔ lɛ ayasha shi yɛ mumɔŋ. (1 Timoteo 1:19) Ekolɛ osatofonyo lɛ kɛ mumɔŋ hejɔɔmɔ he shiwoo babaoo baaha shi ebaatsɔ ‘atatu ni nu bɛ mli’—ni haaa nugbɔ anɛ. Taakɛ tso ni wooo yibii ji lɛ, shishiulɔ wooo anɔkwa Kristofoi ayibii. (Mateo 7:15-20; Galatabii 5:19-21) Hɛɛ, ehe miihia ni wɔkwɛ wɔhe nɔ jogbaŋŋ yɛ shishiulɔi ni tamɔ nɛkɛ he. Ni kɛlɛ, esa akɛ wɔfee nakai ní wɔnaaa mɔ ko susumɔi ahe jwɛŋmɔ fɔŋ.

“Nyɛkakojoa”

Kwɛ bɔ ni eyɔɔ mlɛo kɛha adesai ni yeee emuu akɛ amɛkɛ amɛnine aaatsɔɔ mɛi krokomɛi atɔmɔi yɛ be mli ni amɛkuɔ amɛhiɛ amɛshwieɔ amɛ diɛŋtsɛ amɛnɔ lɛ nɔ! Shi kɛlɛ, nɛkɛ su nɛɛ haa wɔbafeɔ mɛi ni osatofeemɔ baanyɛ aye wɔ awui. Yesu kɛɛ akɛ: “Osatofo, jiemɔ mplaŋ lɛ yɛ bo diɛŋtsɛ ohiŋmɛi mli tsutsu, ni no dani ooona faŋŋ ni ojie kuli lɛ yɛ onyɛmi lɛ hiŋmɛi mli.” Ebaahi jogbaŋŋ akɛ wɔɔbo eŋaawoo lɛ toi akɛ: “Nyɛkakojoa, koni akakojo nyɛ. Shi nɔ̃ kojomɔ ni nyɛŋɔkojoɔ lɛ, aaaŋɔkojo nyɛ . . . Shi mɛɛba onaa kuli ni yɔɔ onyɛmi hiŋmɛi mli lɛ, shi bo diɛŋtsɛ ohiŋmɛi mli mplaŋ lɛ, oyooo lɛ?”—Mateo 7:1-5.

Kɛji yɛ bei komɛi amli lɛ mɛi komɛi fee nibii ni tamɔ osatofeemɔ lɛ, esa akɛ wɔkwɛ jogbaŋŋ koni wɔkɛ oyaiyeli akatsɛ amɛ akɛ osatofoi. Ákɛ nɔkwɛmɔnɔ lɛ, bɔfo Petro ‘gbala ehe shi ni etse ehe’ kɛjɛ jeŋmajiaŋbii nanemɛi heyelilɔi ni yɔɔ Antiokia lɛ ahe bɔni afee ni ekɛsa saralɔi ni ji Yudafoi ni jɛ Yerusalem lɛ ahiɛ. ‘Agbala’ Barnaba ‘ni Petro kɛ mɛi krokomɛi fata he lɛ hu awo osatofeemɔ nɛɛ mli. Petro fee enɛ yɛ anɔkwale ni eji akɛ ená hegbɛ ni yɔɔ srɔto kwraa akɛ eeegbele gbɛ kɛha Jeŋmajiaŋbii lɛ koni akpɛlɛ amɛnɔ awo Kristofoi asafo lɛ mli lɛ fɛɛ sɛɛ. (Galatabii 2:11-14; Bɔfoi lɛ Asaji 10:24-28, 34, 35) Eka shi faŋŋ akɛ Barnaba kɛ Petro tɔmɔ nɛɛ kɛ amɛ wooo gbɛhe ni woloŋmalɔi kɛ Farisifoi lɛ loo Yuda Iskariot yɔɔ mli lɛ mli.

‘Nyɛsuɔmɔ lɛ Osato Akahi Mli’

Yesu kɛ ŋaawoo ha akɛ: “Kɛ oofee mɛi krokomɛi ejurɔ lɛ, kaaha tɛtɛrɛmantɛrɛ kpalɔ miinyiɛ ohiɛ, taakɛ bɔ ni osatofoi lɛ feɔ yɛ kpeehei lɛ kɛ blohui lɛ amli, koni gbɔmɛi ajie amɛyi lɛ.” (Mateo 6:2, Philips) Bɔfo Paulo ŋma akɛ: ‘Nyɛsuɔmɔ lɛ osato akahi mli.’ (Romabii 12:9) Ewo oblanyo Timoteo hewalɛ koni ena “suɔmɔ ni jɛ tsui ni mli tse . . . kɛ hemɔkɛyeli ni apasa ko bɛ mli lɛ mli.” (1 Timoteo 1:5) Kɛji suɔmɔ kɛ hemɔkɛyeli ni wɔyɔɔ lɛ ji anɔkwa nɔ lɛ—ni pɛsɛmkunya kɛ lakamɔ bɛ mli lɛ—mɛi krokomɛi baaná hekɛnɔfɔɔ yɛ wɔmli. Wɔbaafee hewalɛnamɔ kɛ ekãawoo jɛɛhe diɛŋtsɛ kɛha mɛi ni bɔle wɔ lɛ. (Filipibii 2:4; 1 Yohane 3:17, 18; 20, 21) Ni nɔ ni fe fɛɛ lɛ, wɔbaaná Yehowa nɔkpɛlɛmɔ.

Yɛ gbɛ kroko nɔ lɛ, naagbee mli lɛ osatofeemɔ baafee nɔ ni gbeɔ mɛi ni kɛ amɛhe woɔ mli lɛ. Yɛ naagbee lɛ abaale bɔ ni osatofeemɔ ji yɛ faŋŋ mli. Yesu Kristo kɛɛ akɛ: “Nɔ ko nɔ ko bɛ ni abú nɔ, ní agbeleŋ naa; ni ateeko nɔ ko, ní aleŋ.” (Mateo 10:26; Luka 12:2) Nilelɔ Maŋtsɛ Salomo jaje akɛ: “Nyɔŋmɔ baakojo nitsumɔ fɛɛ nitsumɔ kɛ teemɔ sane fɛɛ teemɔ sane hu, ekpakpa jio, efɔŋ jio.”—Jajelɔ 12:14.

Beni be shwieɔ mli lɛ, mɛni hewɔ esa akɛ wɔŋmɛ gbɛ koni mɛi krokomɛi asatofeemɔ aná hewalɛ yɛ wɔnɔ kɛyashɛ he ni eeeshɔ̃ anɔkwa suɔmɔ ni wɔyɔɔ kɛha anɔkwa nanemɛi lɛ kɛjɛ wɔdɛŋ? Wɔhiɛ baanyɛ aka shi ni wɔfeee mɛi ni kɛ amɛhiɛ kaa mɔ babaoo. Ni bɔ fɛɛ bɔ ni fee lɛ, nyɛfainɛ nyɛhaa wɔhiɛa wɔ diɛŋtsɛ wɔsuɔmɔ kɛ hemɔkɛyeli ni osatofeemɔ bɛ mli lɛ mli.—Yakobo 3:17; 1 Petro 1:22.

[Mfonirii ni yɔɔ baafa 22, 23]

Ani kulɛ obaaŋmɛ gbɛ ni woloŋmalɔi kɛ Farisifoi lɛ asatofeemɔ lɛ agbala bo kɛjɛ Kristo kɛ ekaselɔi lɛ ahe?