Otsi Ni Tsake Je Lɛ

“Ajɔɔ mɔ ni baa yɛ Nuŋtsɔ [Yehowa] gbɛi anɔ lɛ!”​—MATEO 21:⁠9.

 1. Mɛɛ kui enyɔ ni esoro amɛ nibii ni ba yɛ nyɛsɛɛ August mli lɛ sa amɛhe?

“HAOMƆ KPELE GBII ETƐ NI HOSO JE LƐ.” Yɛ August 1991 mli lɛ, adafitswaa woji ahiɛ wiemɔi tamɔ enɛ ma anɔkwale ni eji akɛ je lɛ shihilɛ baanyɛ atsake kɛbote basabasa-feemɔ mli yɛ gbii fioo pɛ mli lɛ nɔ mi. Lɛlɛŋ, August nyɔŋ lɛ naagbee gbii lɛ bafee jaramɔ be fe fɛɛ, jeee kɛha je lɛ pɛ kɛkɛ, shi moŋ kɛha kuu ni Yesu wie yɛ amɛhe akɛ: “Amɛjɛɛɛ je lɛ mli” lɛ hu. Ale nɛkɛ kuu nɛɛ ŋmɛnɛ akɛ Yehowa Odasefoi.​—Yohane 17:⁠14.

 2, 3. (a) Mɛɛ gbɛ nɔ ama heyeli nɔ mi yɛ Zagreb yɛ ta ni heɔ afɛ lɛ fɛɛ sɛɛ? (b) Mɛɛ gbɛ nɔ awo hemɔkɛyeli ni mli wa he nyɔmɔ yɛ, yɛ Odessa?

² Ato Yehowa Odasefoi amajimaji ateŋ kpee ni ji klɛŋklɛŋ nɔ kwraa ni abaafee yɛ Yugoslavia lɛ he gbɛjianɔ kɛha August 16 kɛyashi 18. Taakɛ bɔ ni nibii balɛ lɛ, ebaafee klɛŋklɛŋ kpee wulu ni Yehowa webii feɔ yɛ maŋ ni miihe ebote maŋ tawuu mli lɛ mli. Odasefoi ni ji maŋbii, kɛ maji ni bɛŋkɛ amɛ lɛ anɔ bii ni kɛ amɛbe eha, egbo deŋme nyɔji enyɔ sɔŋŋ bɔni afee ni akɛsaa HASK Gradanski bɔɔltswaa he ni yɔɔ Zagreb lɛ ni aha jɛmɛ afee fɛo. Asaa jɛmɛ ni aha jɛmɛ fɛɛ tse keŋkeŋ, ni ebafee he ni sa jogbaŋŋ lɛlɛŋ kɛha “Mɛi ni Sumɔɔ Nyɔŋmɔ Heyeli” Kpee lɛ. Kpeeyalɔi akpei abɔ ni jɛ maji sɔrɔtoi anɔ to amɛgbɛjianɔtoi akɛ amɛbaaya kpee lɛ, ni mɛi 600 ni jɛ United State, Amerika hu fata he. Beni maŋ ta ni heɔ afɛ lɛ he gbeyeishemɔ lɛ yaa nɔ lɛ, abɔi wiemɔ akɛ: “Amerikabii lɛ baŋ kɔkɔɔkɔ.” Shi amɛna amɛba kɛ̃, kɛ kpeeyalɔi ni jɛ maji krokomɛi anɔ hu. Aakpa gbɛ akɛ mɛi ni baaba kpee lɛ ayifalɛ baashɛ 10,000, shi mɛi 14,684 ba shwɛmɔ he lɛ yɛ naagbee gbi lɛ nɔ! Ajɔɔ amɛteŋ mɔ fɛɛ mɔ babaoo diɛŋtsɛ ejaakɛ ‘amɛkwaaa amɛhe naabuamɔ.’​—Hebribii 10:⁠25.

³ Yɛ gbii etɛ ni nyiɛ Zagreb kpee lɛ sɛɛ lɛ mli lɛ, aka Soviet Union nɔyeli lɛ butumɔ yɛ ekaa naa, shi eyeee omanye. Yɛ nakai be lɛ mli lɛ, no mli lɛ mɛi ni sumɔɔ Nyɔŋmɔ heyeli lɛ miigbe nibii ni eshwɛ kɛha kpee ni amɛbaafee yɛ Odessa yɛ Ukraine lɛ ahe nitsumɔ naa. Ani abaanyɛ afee kpee lɛ? Nyɛmimɛi lɛ kɛ hemɔkɛyeli ni mli wa tsu nibii ni eshwɛ ni sa akɛ agbe naa lɛ fɛɛ ni amɛkɛsaa shwɛmɔ he lɛ mli fɛɛ fɛfɛo, ni kpeeyalɔi lɛ hu ba aahu kɛtsara nɔ. Nɔŋŋ kɛkɛ ni nɔyeli butumɔ lɛ ba naagbee, oookɛɛ tamɔ naakpɛɛ nɔ ko. Afee kpee ko ni ha ana miishɛɛ waa yɛ August 24, kɛ 25, ni mɛi 12,115 ba kpee lɛ shishi​—ni abaptisi 1,943​—ni ji yibɔ ni ba ni fa fe fɛɛ lɛ mlijaa oha mli 16! Nɛkɛ Odasefoi heei nɛɛ, kɛ mɛi ni kɛ be babaoo ehiɛ amɛ emuuyeli mli lɛ fɛɛ amli fili amɛ akɛ amɛba nakai kpee lɛ shishi kɛ hekɛnɔfɔɔ kwraa yɛ Yehowa mli.​—Abei 3:​5, 6.

 4. Mɛɛ nɔkwɛmɔ nɔ ko ni Yesu fee efɔ shi Odasefoi ni yɔɔ Europa Bokagbɛ lɛ nyiɛɔ sɛɛ?

⁴ Nɛkɛ Odasefoi anɔkwafoi nɛɛ miinyiɛ nɔkwɛmɔ nɔ ni wɔ Okaditolɔ, Yesu Kristo fee efɔ shi lɛ sɛɛ. Ekuuu ehiɛ efɔɔɔ ya ni eeeyaye gbijuji ni Yehowa ewo he mla lɛ anɔ kɔkɔɔkɔ, yɛ be mli ni Yudafoi lɛ taoɔ lɛ amɛgbe lɛ po. Beni eba Yerusalem kɛha enaagbee Hehoo lɛ, no mli lɛ amɛdamɔdamɔɔ shi yɛ sɔlemɔwe lɛ, ni amɛbi akɛ: “Te nyɛsusuɔ tɛŋŋ? Ani ebaŋ gbijurɔ lɛ?” (Yohane 11:56) Shi eba kɛ̃! Ni enɛ basaa gbɛ kɛha otsi ko ni ba naagbee kɛ tsakemɔ ni etsake bɔ ni adesai ayinɔsane mli nibii yaa nɔ haa lɛ. Ani agbɛnɛ wɔbaanyɛ wɔti nakai otsi lɛ​—Nisan 8 kɛyashi 14 yɛ Yudafoi akalenda lɛ nɔ lɛ mli saji otii ni ba lɛ ekomɛi amli wɔkwɛ?

Nisan 8

 5. Mɛni Yesu le jogbaŋŋ beni efaa gbɛ kɛyaa Betania yɛ Nisan 8, afi 33 Ŋ.B. lɛ?

⁵ Yesu kɛ ekaselɔi lɛ yashɛ Betania yɛ nɛkɛ gbi nɛɛ nɔ. Yesu baaye jenamɔi ekpaa yɛ biɛ, yɛ enaanyo Lazaro ni esumɔɔ esane waa, ni etee lɛ shi kɛjɛ gbohii ateŋ etsɛko tsɔ lɛ shia. Betania kɛ Yerusalem jɛkɛɛɛ. Yesu ewo ekaselɔi lɛ aŋaa yɛ teemɔŋ momo akɛ: “Naa! Wɔmiiya Yerusalem, ni aaaŋɔ gbɔmɔ Bi lɛ awo osɔfonukpai kɛ woloŋmalɔi lɛ adɛŋ, ni amɛaabu lɛ gbele fɔ. Ni amɛaaŋɔ lɛ amɛha jeŋmaji lɛ, ní amɛye ehe fɛo ní amɛkɛ kplebii ayi lɛ ní amɛsɛŋ lɛ; ni gbi ni ji gbi etɛ lɛ eeete shi ekoŋŋ.” (Mateo 20:​18, 19) Yesu le jogbaŋŋ kɛmɔ shi akɛ agbɛnɛ esa akɛ ekɛ kaai ni kɛ hejaramɔ baa akpe. Shi, beni kaa ni da fe fɛɛ be lɛ bɛŋkɛɔ lɛ, ebɔ mɔdɛŋ fɛɛ ni eeenyɛ ni ejɛ suɔmɔ mli esɔmɔ enyɛmimɛi lɛ. Eba akɛ bɔ ni “Kristo Yesu hu jwɛŋ lɛ, . . . [wɔɔ]jwɛŋ” nakai nɔŋŋ be fɛɛ be.​—Filipibii 2:​1-5; 1 Yohane 3:⁠16.

Nisan 9

 6. Yɛ Nisan 9 gbɛkɛnaashi lɛ, mɛni Maria fee, ni mɛni Yesu kɛɛ Yuda?

⁶ Yɛ hulushinyɔɔ sɛɛ, beni Nisan 9 jeɔ shishi lɛ, Yesu ye nii yɛ Simon, tsutsu kpitiyelɔ lɛ shia. Biɛ ji he ni Lazaro nyɛmiyoo Maria fɔse mu ni jeɔ ŋma eshwie Yesu yiteŋ kɛ enaji ahe ni ekɛ eyitsɔi tsumɔ enaji ahe yɛ heshibaa mli lɛ. Beni Yuda te shi ewo lɛ lɛ, Yesu kɛɛ: “Kaagba enaa, efee enɛ eto mifũu gbi lɛ.” Beni osɔfonukpai lɛ nu akɛ Yudafoi lɛ ateŋ mɛi pii miiya Betania, ni amɛmiina Yesu mli hemɔkɛyeli lɛ, amɛtee eyi nɔ apam akɛ amɛbaagbe lɛ kɛ Lazaro fɛɛ.​—Yohane 12:​1-7.

 7. Yɛ Nisan 9 leebi mli lɛ, mɛɛ gbɛ nɔ awo Yehowa gbɛi hiɛ nyam yɛ, ni mɛni Yesu gba efɔ shi?

⁷ Leebi maaŋkpa mli lɛ, Yesu je egbɛfaa kɛmiiya Yerusalem lɛ shishi. Ni mɛi babaoo je kpo ni amɛyakpee lɛ, ni amɛhiɛ blɛoi amɛmiifɔ̃ kɛ bolɔmɔ akɛ: “Hosiana! Ajɔɔ mɔ ni baa yɛ Nuŋtsɔ [Yehowa] gbɛi anɔ lɛ, Israel maŋtsɛ lɛ!” Kɛkɛ ni Yesu ha gbalɛ ni yɔɔ Zakaria 9:9 lɛ ba mli kɛtsɔ teji nɔ ni eta kɛbote maŋtiase lɛ mli lɛ nɔ. Beni ebɛŋkɛɔ Yerusalem lɛ, efo yɛ maŋ lɛ hewɔ, ni egba efɔ shi akɛ Romabii lɛ kɛ tsei ni ajɔ naa piɔ̃piɔ̃ baawo maŋ lɛ he ka ni amɛbaakpata hiɛ butuu​—gbalɛ ko ni baana emlibaa yɛ gbɛ ni mli wa nɔ yɛ afii 37 sɛɛ. (Enɛ tsɔɔ haomɔ ni baaba Kristendom, ni ekwa hemɔkɛyeli lɛ yɛ blema Yerusalem nɔkwɛmɔ nɔ lɛ sɛɛnyiɛmɔ mli lɛ hu nɔ.) Yudafoi nɔyelɔi lɛ taooo Yesu akɛ amɛ-maŋtsɛ. Amɛkɛ mlifu bolɔ akɛ: “Naa! Je lɛ efa kɛnyiɛ esɛɛ lɛ.”​—Yohane 12:​13, 19.

Nisan 10

 8. Yɛ Nisan 10 lɛ, mɛɛ gbɛ nɔ Yesu tsɔɔ bulɛ ni mli kwɔ ni eyɔɔ kɛha Yehowa shia ni ji sɔlemɔwe lɛ, ni mɛni nyiɛ sɛɛ ba?

⁸ Yesu tee sɔlemɔtsu lɛ mli ekoŋŋ. Ni eyashwie jarayelɔi hiɛjoolɔi kɛ shika tsakelɔi lɛ kɛjɛ jɛmɛ, nɔ ni ji shii enyɔ nɔ. Esaaa akɛ akɛ jarayeli​—“shika suɔmɔ”​—baa Yehowa shia ni ji sɔlemɔ we lɛ! (1 Timoteo 6:​9, 10) Etsɛŋ ni Yesu baagbo. Ekɛ dumɔ wu ni adũɔ fee enɛ he mfoniri. Klɛŋklɛŋ dumɔ wu lɛ gboɔ, shi ekwɛ̃ɔ ni etsɛ̃ɔ nine ni woɔ yibii ni ji ŋmaa babaoo. Nakai nɔŋŋ hu, nɔ ni baajɛ Yesu gbele lɛ mli aba ji naanɔ wala kɛha gbɔmɛi asafoi babaoo ni naa hemɔkɛyeli yɛ emli lɛ. Akɛni egbele ni bɛŋkɛɔ lɛ miihao lɛ waa hewɔ lɛ, Yesu sɔle akɛ atsɔ no nɔ awo e-Tsɛ gbɛi lɛ hiɛ nyam. Yɛ enɔheremɔ mli lɛ, Nyɔŋmɔ gbee jɛ ŋwɛi ewie koni mɛi fɛɛ ni yɔɔ jɛmɛ lɛ anu, akɛ: “Miná miwo ehiɛ nyam, ni masaa mawo ehiɛ nyam ekoŋŋ.”​—Yohane 12:​27, 28.

Nisan 11​—Gbi ni Saji Babaoo Ba

 9. (a) Mra mli yɛ Nisan 11 gbi lɛ nɔ lɛ, mɛɛ gbɛ nɔ Yesu kɛ abɛbuai tsu nii ni ekɛbu Yudafoi ni ekwa hemɔkɛyeli lɛ fɔ yɛ? (b) Yɛ Yesu abɛbua lɛ naa lɛ, namɛi eha hegbɛ kpele ko eje amɛdɛŋ lɛ?

⁹ Yesu kɛ ekaselɔi lɛ shi Betania ekoŋŋ gbi muu fɛɛ, ni saji pii ba yɛ mli. Yesu kɛ sane naatsɔɔmɔi etɛ tsu nii ni ekɛtsɔɔ nɔ hewɔ ni abu Yudafoi agbɛjianɔtoo ni ekwa hemɔkɛyeli lɛ fɔ lɛ. Elomɔ agbamitso ko ni wooo yibii, ni shihilɛ mli ni eyɔɔ amrɔ nɛɛ, ni egbi lɛ feɔ bɔ ni Yudafoi lɛ amaŋ lɛ bɛ hemɔkɛyeli, ni ewooo yibii hu lɛ he mfoniri. Beni amɛbote sɔlemɔwe lɛ, etsɔɔ bɔ ni yɛ naagbee lɛ, nuŋtsɔ ko weintrom hulɔi fɔji gbe amɛnuŋtsɔ lɛ binuu kɛ gboshiniyelɔ​—ni ekɛfee bɔ ni Yudafoi lɛ ebuuu nii ni Yehowa etuu ewo amɛdɛŋ lɛ, ni baashɛ enaagbee kwraa kɛtsɔ gbe ni amɛbaagbe Yesu lɛ nɔ lɛ he mfoniri. Ewie yookpeemɔ okpɔlɔŋmɛɛ ni maŋtsɛ ko​—Yehowa​—to he gbɛjianɔ, ni mɛi ni ekpee amɛ kɛba okpɔlɔ lɛ he (Yudafoi lɛ) kɛ hiɛjoomɔ jie amɛnaa akɛ amɛbaŋ lɛ he. No hewɔ lɛ, akɛ ninefɔɔ lɛ yaha mɛi kpɔji​—Jeŋmajiaŋbii lɛ​—ni amɛteŋ mɛi komɛi here nɔ. Shi ashwie nuu ko ni ana akɛ ewooo yookpeemɔ atade lɛ kɛjɛ jɛmɛ. Edamɔ shi kɛha amale Kristofoi ni yɔɔ Kristendom lɛ. Afɔ Yesu beaŋ Yudafoi lɛ ateŋ mɛi pii anine, “shi mɛi fioo ahala,” koni amɛfata mɛi 144,000 ni asɔo amɛnaa ni amɛnine baashɛ ŋwɛi Maŋtsɛyeli lɛ nɔ lɛ ahe.​—Mateo 22:​14; Kpojiemɔ 7:⁠4.

10-12. (a) Mɛni hewɔ ni Yesu wie waa eshi Yudafoi osɔfoi lɛ, ni mɛɛ heguɔgbee ni mli wa ekɛshwie nakai osatofoi lɛ anɔ? (b) Mɛɛ gbɛ nɔ yɛ naagbee lɛ atsu kojomɔ he nii yɛ Yudafoi hemɔkɛyeli kwalɔi lɛ anɔ?

¹⁰ Yudafoi osɔfoi osatofoi lɛ tao be ni amɛnine baanyɛ ashɛ Yesu nɔ, shi eha amɛsanebimɔi ni amɛtsɔ̃ ŋaa gbɛi anɔ amɛbi lɛ babaoo hetoo ni efutu amɛyiŋ yɛ maŋbii lɛ ahiɛ. O, nakai Yudafoi hemɔkɛyeli kwalɔi lɛ! Kwɛ bɔ ni Yesu kã amɛhiɛ jogbaŋŋ eha! Amɛsumɔɔ hiɛnyam taomɔ, atadei ni haa esoroɔ amɛ woo, kɛ sãbalai wuji ni akɛaatsɛ amɛ, tamɔ “Rabi” kɛ “Tsɛ,” taakɛ osɔfoi pii feɔ yɛ wɔgbii nɛɛ amli lɛ. Yesu jaje nɛkɛ mla nɛɛ: “Mɔ fɛɛ mɔ ni aaawo ehe nɔ lɛ, aaaba lɛ shi; ni mɔ fɛɛ mɔ ni aaaba ehe shi lɛ, aaawo enɔ.”​—Mateo 23:⁠12.

¹¹ Yesu wie eshi nakai jamɔ mli hiɛnyiɛlɔi lɛ kɛ wiemɔi ni mli wa. Ejaje shii kpawo sɔŋŋ akɛ: “Kpoo ha nyɛ!” ni etsɛ amɛ gbɛtsɔɔlɔi shwilafoi kɛ osatofoi. Ni be fɛɛ be lɛ etsɔɔ nɔ hewɔ ni ebuɔ amɛ fɔ lɛ mli faŋŋ. Amɛmiitsi mɛi anaa koni amɛkanyɛ amɛbote ŋwɛi Maŋtsɛyeli lɛ mli. Kɛ amɛlaka mɔ ko ni etsake kɛba amɛjamɔ lɛ mli lɛ, ebafeɔ mɔ ni abu lɛ fɔ toi enyɔ aha Gehena, ejaakɛ ekolɛ eji mɔ ko ni sa hiɛkpatamɔ momo yɛ etsutsu esha ni hiɛdɔɔ yɔɔ he loo ejamɔ mli shɛii-feemɔ hewɔ. “Kwashiai kɛ shwilafoi!” Yesu kɛɛ, ejaakɛ Farisifoi lɛ gbalaa amɛjwɛŋmɔ amɛmaa sɔlemɔwe lɛ shika lɛ nɔ moŋ fe jamɔ krɔŋŋ ni amɛaatsu he nii yɛ jɛmɛ. Amɛkuɔ amɛhiɛ amɛshwieɔ jalɛsaneyeli, mɔbɔnalɛ, kɛ anɔkwayeli nɔ yɛ be mli ni amɛwoɔ kowɛ, anisi, kɛ kumino ni amɛkɛ hiɛjoomɔ na lɛ mlijaa nyɔŋma, shi amɛkuɔ amɛhiɛ amɛshwieɔ Mla lɛ mli saji wuji lɛ anɔ. Kusum naa hejuui ejieŋ amɛmligbɛ bulemɔ lɛ kɛyaŋ kɔkɔɔkɔ​—ja tsui ni atsuu he kɛtsɔ hemɔkɛyeli yɛ Yesu afɔleshaa ni bɛŋkɛɔ lɛ mli lɛ nɔ pɛ baanyɛ atsu enɛ. Amɛmligbɛ osatofeemɔ kɛ mlakwamɔ lɛ jieɔ amɛ kponɔ gbɛ ni “asha he” lɛ kpo akɛ amale.​—Mateo 23:​13-29.

¹² Hɛɛ, eji kpoo lɛlɛŋ kɛha Farisifoi lɛ, ni “mɛi ni gbe gbalɔi [ni hi shi blema] lɛ abii” ji amɛ lɛlɛŋ! Onufui, shikpaai ashwiei ni abu amɛ fɔ aha Gehena ji amɛ, ejaakɛ jeee Yesu kome pɛ kɛkɛ amɛbaagbe, shi moŋ mɛi ni etsu lɛ hu. Enɛ ji kojomɔ ko ni abaatsu he nii yɛ “yinɔbii nɛɛ anɔ.” Yɛ emlibaa mli lɛ, akpata Yerusalem hiɛ butuu yɛ no sɛɛ afii 37 mli.​—Mateo 23:​30-36.

13. Wiemɔi ni Yesu wie yɛ sɔlemɔwe oniatsumɔ he lɛ jeɔ kpo yɛ mɛɛ shihilɛi amli ŋmɛnɛ?

¹³ Dani ebaashi sɔlemɔwe lɛ, Yesu wie ni ejie yoo okulafo ohiafo ko ni kɛ shika bibii enyɔ bawo oniatsumɔ adeka lɛ mli lɛ yi​—“nii ni ekɛkwɛɔ ehe nɔ lɛ fɛɛ ekɛbawo mli nɛɛ.” Lɛlɛŋ esoro lɛ kwraa yɛ niiatsɛmɛi hiɛjoolɔi lɛ ahe, mɛi ni kɛ nɔ ko bibioo ko pɛ bawoɔ adeka lɛ mli lɛ! Ŋmɛnɛ, Yehowa Odasefoi jɛɔ amɛsuɔmɔ mli amɛkɛ amɛbe, hewalɛ, kɛ shika shaa afɔle bɔni afee ni amɛkɛfi jeŋ muu fɛɛ Maŋtsɛyeli nitsumɔ lɛ sɛɛ ni amɛkɛlɛɛ mli hu, tamɔ bɔ ni nakai yoo okulafo lɛ fee lɛ pɛpɛɛpɛ. Kwɛ bɔ ni esoro amɛ kwraa yɛ nakai TV nɔ sanekpakpa shiɛlɔi ni bɛ jeŋba ni shishiuɔ amɛsɛɛnyiɛlɔi lɛ ni amɛkɛbuaa ninamɔ babaoo naa amɛhaa amɛ diɛŋtsɛ amɛhe lɛ ahe!​—Luka 20:​45–21:⁠4.

Beni Nisan 11 Baa Naagbee Lɛ

14. Mɛɛ awerɛho ko Yesu ye, ni yɛ mɛɛ gbɛ nɔ eha saji ni ekaselɔi lɛ tee nɔ amɛbi lɛ ahetoo?

¹⁴ Yesu fo yɛ Yerusalem kɛ emlibii lɛ ahewɔ ni ekɛɛ: “Kɛjɛ be nɛɛ nɔ kɛyaa nɛɛ nyɛnaŋ mi dɔŋŋ kɛyashi beyinɔ ni nyɛaakɛɛ akɛ: ‘Ajɔɔ mɔ ni baa yɛ Nuŋtsɔ [Yehowa] gbɛi anɔ lɛ!’” (Mateo 23:​37-39) Yɛ sɛɛ mli, beni amɛtara Mu Gɔŋ lɛ nɔ lɛ, Yesu kaselɔi ni bɛŋkɛ lɛ kpakpa lɛ bi lɛ enɛ he saji, ni yɛ hetoohamɔ mli lɛ Yesu tsɔɔ okadi ni baatsɔɔ ba ni eba yɛ Maŋtsɛyeli hewalɛ mli lɛ kɛ Satan nibii agbɛjianɔtoo fɔŋ lɛ naagbee lɛ.​—Mateo 24:​1–25:​46; Marko 13:​1-37; Luka 21:​5-36.

15. Mɛɛ okadi Yesu kɛha yɛ ba ni eba kɛha kojomɔ lɛ he, ni aaha eeba mli kɛjɛ mɛɛ be mli kɛbaa?

¹⁵ Beni ewieɔ Yehowa kojomɔ ni etsɛŋ ni abaatsu he nii yɛ sɔlemɔwe lɛ nɔ lɛ he lɛ, Yesu tsɔɔ akɛ enɛ feɔ wɔsɛɛ be mli gbeyei nibii ni baaba yɛ nibii agbɛjianɔtoo muu lɛ fɛɛ naagbee be lɛ mli lɛ he mfoniri. Nɔ ni baakadi nakai be mli ni eba lɛ ji tai ni baatetee shi bɔ ni anako enɔ da, kɛ hɔmɔ, shikpɔŋhosomɔi, kɛ tsɛŋemɔ helai, kɛ suɔmɔ ni bɛ kɛ mlakwamɔ hu. Kwɛ bɔ ni enɛ efee anɔkwale eha yɛ wɔ afii ohai 20 nɛɛ mli kɛjɛ 1914 kɛbaa!

16, 17. Mɛɛ jeŋ shihilɛi komɛi Yesu wie he, ni te esa akɛ Kristofoi afee amɛnii yɛ gbalɛ nɛɛ he amɛha tɛŋŋ?

¹⁶ Ebaashɛ enaagbee kwraa yɛ “amanehulu babaoo [ni] baaba, ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ” lɛ mli. Akɛni enɛ baakpata nii ahiɛ waa tamɔ Noa gbii lɛ amli Nu Afua lɛ fee lɛ nɔŋŋ hewɔ lɛ, Yesu bɔ kɔkɔ yɛ wɔhe ni wɔkɛaawo je lɛŋ nibii asɛɛdii mli vii lɛ he. “No hewɔ lɛ nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ-Nuŋtsɔ lɛ baa.” Kwɛ bɔ ni wɔmii aaanyɛ ashɛ wɔhe aha akɛ Nuŋtsɔ lɛ ehala “tsulɔ anɔkwafo kɛ nilelɔ” ko ni afɔ lɛ mu bɔni afee ni ekɛ kɔkɔbɔɔ lɛ aha koni ekɛ mumɔŋ niyenii babaoo hu aha yɛ nɛkɛ gbi ni eba nɛɛ mli!​—Mateo 24:​21, 42, 45-47.

¹⁷ Yɛ wɔ afii ohai 20 nɛɛ mli lɛ, wɔna “jeŋmaji afimɔ lɛ [yɛ] shikpɔŋ lɛ nɔ, ni amɛfee yeyeeye . . . [kɛ] nɔ ni aaanyɔnyɔɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ.” Shi Yesu kɛɔ wɔ akɛ: “Shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.” Ni ewo wɔ ŋaa hu akɛ: “Shi nyɛhiɛ ahia nyɛhe nɔ, koni fufeemɔ kɛ daatɔɔ kɛ daaŋ ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa.” Ja wɔshiɔ kpe pɛ dani wɔɔnyɛ wɔdamɔ shi akɛ mɛi ni akpɛlɛɔ amɛnɔ yɛ Yesu, “gbɔmɔ Bi lɛ” hiɛ, yɛ ba ni eba nɛɛ mli.​—Luka 21:​25-28, 34-36.

18. Mɛɛ hewalɛwoo wɔbaanyɛ wɔna kɛjɛ Yesu abɛbuai ni kɔɔ obalayei nyɔŋma lɛ kɛ talɛntai lɛ ahe lɛ mli?

¹⁸ Beni ekɛ nibii ni baaba yɛ ŋmɛnɛŋmɛnɛ beaŋ ni ewieɔ he kɛtsɔɔ hiɛ kɛ nɔmimaa lɛ baa naagbee lɛ, Yesu kɛ abɛbuai etɛ komɛi ha. Klɛŋklɛŋ lɛ, esaa ema bɔ ni ehe hiaa ni ‘wɔsara’ lɛ nɔ mi ekoŋŋ yɛ obalayei nyɔŋma lɛ abɛbua lɛ mli. Kɛkɛ ni, yɛ tsuji kɛ talentai lɛ hu ahe abɛbua lɛ mli lɛ, etsɔɔ bɔ ni ekaa kɛ nitsumɔ he baa sɛɛnamɔ haa kɛtsɔ ninefɔɔ ni anaa akɛ ‘abote Nuŋtsɔ lɛ miishɛɛ lɛ mli’ lɛ nɔ. Kristofoi ni afɔ amɛ mu, ni atsɔɔ hiɛ afeɔ amɛhe mfoniri yɛ nɛkɛ abɛbuai nɛɛ amli lɛ, kɛ tooi krokomɛi lɛ hu fɛɛ baanyɛ amɛna hewalɛwoo kɛjɛ nɛkɛ mfonirifeemɔi ni mli ka shi faŋŋ nɛɛ amli.​—Mateo 25:​1-30.

19, 20. Mɛɛ ŋmɛnɛŋmɛnɛ beaŋ wekukpaa ko ni yɔɔ miishɛɛ awie he yɛ Yesu abɛbua ni kɔɔ gwantɛŋi kɛ abotiai ahe lɛ mli?

¹⁹ Abɛbua ni ji etɛ lɛ wieɔ ba ni Yesu eba yɛ Maŋtsɛyeli hewalɛ mli beni eyashɛ shi ni eyata enunyam ŋwɛi maŋtsɛsɛi lɛ nɔ lɛ sɛɛ lɛ he. Eji be ni akɛbaakojo jeŋmaji lɛ ni akɛbaagbala gbɔmɛi ni yɔɔ shikpɔŋ nɔ lɛ amli awo kui enyɔ mli, ekome baafee mɛi ni he jɔ tamɔ gwantɛŋi lɛ, ni ekroko lɛ baafee mɛi ni kuɛŋ ti tamɔ abotiai lɛ. Gwantɛŋi lɛ bɔɔ mɔdɛŋ waa bɔni afee ni amɛkɛ amɛhe atsɔɔ akɛ mɛi ni fiɔ Maŋtsɛ lɛ nyɛmimɛi lɛ asɛɛ​—mɛi ni afɔ amɛ mu lɛ ateŋ mɛi ni eshwɛ yɛ shikpɔŋ nɔ yɛ nɛkɛ je lɛ naagbee be nɛɛ mli lɛ. Akɛ wala woɔ nɛkɛ gwantɛŋi nɛɛ anyɔmɔ, yɛ be mli ni abotiai ni amɛhiɛ esɔɔɔ nii lɛ yaa naanɔ hiɛkpatamɔ mli.​—Mateo 25:​31-46.

²⁰ Mɛɛ wekukpaa ni yɔɔ nyam wɔnaa yɛ tooi krokomɛi lɛ kɛ Maŋtsɛ lɛ nyɛmimɛi lɛ ateŋ nɛkɛ yɛ nɛkɛ nibii agbɛjianɔtoo nɛɛ naagbee be nɛɛ mli! Eyɛ mli akɛ shwɛɛ nii ni afɔ amɛ mu lɛ ji mɛi ni tsu nitsumɔ lɛ mli nɔ ni fa babaoo yɛ ba ni Maŋtsɛ lɛ eba lɛ shishijee be lɛ mli moŋ, shi amrɔ nɛɛ tooi krokomɛi akpekpei abɔ ni yɔɔ ekaa babaoo lɛ feɔ Nyɔŋmɔ tsuji fɛɛ ni yɔɔ shikpɔŋ nɔ lɛ amlijaa oha mli 99.8. (Yohane 10:16) Ni amɛ hu amɛkɛ amɛhe etsɔɔ akɛ mɛi ni miisumɔ ni amɛŋmɛ amɛtsui shi yɛ hɔmɔ, kumai, he yayai-nyiɛmɔ, hela, kɛ tsuŋwoo mli akɛ emuuyeli mlihiɛlɔi ni afɔ amɛ mu lɛ ahefatalɔi.a

Nisan 12

21. Mɛni tee nɔ ekoŋŋ yɛ Nisan 12, ni yɛ mɛɛ gbɛ nɔ.

²¹ Yesu yinɔ ni akpaŋɔ koni agbe lɛ lɛ miiya nɔ. Yuda tee osɔfonukpai lɛ aŋɔɔ yɛ sɔlemɔwe lɛ, ni ekpɛlɛ nɔ akɛ ebaatsɔɔ Yesu sɛɛ gbɛ kɛha jwiɛtɛi kukuji 30. Agba enɛ he sane po afɔ shi momo.​—Zakaria 11:⁠12.

Nisan 13

22. Mɛɛ hesaamɔ ko atsu he nii yɛ Nisan 13?

²² Yesu, ni ekolɛ etee nɔ ehi Betania kɛha sɔlemɔ kɛ shihilɛ lɛ nɔ jwɛŋmɔ lɛ tsu ekaselɔi lɛ kɛtee Yerusalem koni amɛyatao “Ashimashi” ko. Amɛyasaa ŋwɛitsu ko mli, yɛ nuu nɛɛ shia, ni amɛfee lɛ klalo kɛha Hehoo lɛ. (Mateo 26:​17-19) Beni hulu nyɔɔ shi yɛ Nisan 13 lɛ. Yesu yafata amɛhe yɛ jɛmɛ kɛha gbijurɔyeli ni sa kadimɔ fe fɛɛ yɛ yinɔsane mli lɛ. Mɛni mɛɔ lɛ agbɛnɛ yɛ Nisan 14? Wɔnikasemɔ ni nyiɛ sɛɛ lɛ baatsɔɔ.

[Shishigbɛ niŋmai]

Te Obaamu Naa Oha Tɛŋŋ

Mɛɛ gbɔfeemɔ kɛ hiɛmɛɛ mɛi komɛi here Yesu kɛjɛ Nisan 6 kɛyashi Nisan 10?

Yɛ mɛɛ gbɛ nɔ Yesu kpa osɔfoi osatofoi lɛ ahe mama yɛ Nisan 11?

Mɛɛ gbalɛ kpele ko Yesu gba efɔ shi, ni aaha eeba mli ŋmɛnɛ yɛ mɛɛ gbɛ nɔ?

Yɛ mɛɛ gbɛ nɔ nibii tee nɔ kɛbɛŋkɛ amɛnaagbee he yɛ Nisan 12 kɛ 13?

[Mfoniri ni yɔɔ baafa 12]

Yesu jie yoo okulafo ohiafo ni kɛ shika bibii enyɔ batsu onia lɛ yi​—nɔ ni eyɔɔ fɛɛ ji no