“Nyɛhiɛ Ahia Nyɛhe nɔ yɛ Farisifoi kɛ Sadukifoi lɛ Amasha lɛ Hewɔ”

BENI Yesu Kristo wie nakai wiemɔi lɛ nɔ ni fe afii ohai 19 ni eho nɛ lɛ, no mli lɛ eehɛle ekaselɔi lɛ ashi yɛ jamɔ mli tsɔɔmɔi kɛ nifeemɔi ni yeɔ awui lɛ ahe. (Mateo 16:6, 12) Sane ni yɔɔ Marko 8:15 lɛ kɛbaa tɛ̃ɛ akɛ: “Nyɛkwɛa jogbaŋŋ, ni nyɛhiɛ ahia nyɛhe nɔ yɛ Farisifoi lɛ kɛ Herode masha lɛ hewɔ.” Mɛni hewɔ atsi Herode ta yɛ biɛ lɛ? Ejaakɛ Sadukifoi lɛ ateŋ mɛi komɛi ji Herodiabii, ni ji maŋkwramɔ kuu ko.

Mɛni hewɔ kɔkɔbɔɔ krɛdɛɛ ni tamɔ nɛkɛ he hiaa lɛ? Ani Farisifoi lɛ kɛ Sadukifoi lɛ fɛɛ jeee mɛi ni teɔ shi amɛwoɔ Yesu kwraa? (Mateo 16:21; Yohane 11:45-50) Hɛɛ, nakai amɛji. Ni kɛlɛ, yɛ sɛɛ mli lɛ, amɛteŋ mɛi komɛi baakpɛlɛ Kristojamɔ nɔ, ni amɛbaabɔ mɔdɛŋ ni amɛha Kristofoi asafo lɛ akpɛlɛ amɛ susumɔi anɔ.—Bɔfoi lɛ Asaji 15:5.

Oshara hu yɛ akɛ kaselɔi lɛ diɛŋtsɛ baanyɛ akase nakai jamɔ mli hiɛnyiɛlɔi lɛ ni atsɔse amɛ yɛ amɛ hewalɛ shishi lɛ. Yɛ bei komɛi amli lɛ, shihilɛ ni tamɔ nɛkɛ ni mɔ ko jɛ mli lɛ baanyɛ atsɔ gbɛtsii nii aha Yesu tsɔɔmɔi lɛ ashishi ni eeenu.

Mɛni ha Farisifoi atsɔɔmɔ kɛ Sadukifoi atsɔɔmɔ fee nɔ ni oshara yɔɔ he waa lɛ? Nyɔŋmɔjamɔ mli shihilɛi ni yɔɔ Yesu gbii lɛ amli lɛ kwɛmɔ baaha wɔle.

Jamɔ Mli Ekomefeemɔ ni Bɛ

Yinɔsaneŋmalɔ, Max Radin ŋma yɛ Yudafoi akutso ni yɔɔ Ŋ.B. klɛŋklɛŋ afii oha lɛ mli lɛ he akɛ: “Bɔ ni Yudafoi asafoi lɛ yeɔ amɛ diɛŋtsɛ amɛhe lɛ ji nɔ ko ni ka shi faŋŋ, ni ama nakai feemɔ po nɔ mi. . . . Yɛ bei pii amli lɛ, kɛ ama woo ni esa akɛ akɛha sɔlemɔwe lɛ kɛ maŋ krɔŋkrɔŋ lɛ nɔ mi waa lɛ, abaanyɛ ajie bulɛ ni abɛ kwraa kɛha mɛi ni amrɔ nɛɛ amɛji nɔyeli lɛ mli onukpai yɛ amɛ jaku maŋ lɛ mli lɛ kpo.”

Eji mumɔŋ shihilɛ ko ni yɔɔ awerɛho diɛŋtsɛ! Mɛni ji nibii ni kɛ enɛɛmɛi ba lɛ ekomɛi? Jeee Yudafoi lɛ fɛɛ yɔɔ Palestina. Hela hiŋmɛigbelemɔ, ni emli lɛ osɔfoi lɛ jeee akutsoŋ hiɛnyiɛlɔi lɛ, etsu egbɛfaŋnɔ yɛ fitemɔ ni efite bulɛ kɛha Yehowa osɔfoi agbɛjianɔtoo lɛ mli. (2 Mose 28:29; 40:12-15) Ni mɛi ni esaaa akɛ akuɔ hiɛ ashwieɔ amɛnɔ hu ji mɛi ni le woloŋ ni bɛ gbɛnaa ko lɛ kɛ woloŋmalɔi lɛ.

Farisifoi Lɛ

Eeenyɛ efee akɛ, gbɛi Farisifoi, loo Peru-shimʹ, lɛ shishi ji “mɛi ni etse amɛhe.” Farisifoi lɛ buɔ amɛhe akɛ amɛji Mose sɛɛnyiɛlɔi. Amɛto amɛ diɛŋtsɛ amɛ nyɛmifeemɔ kuu, loo nanemɛi akuu (Hebri, chavu-rahʹ). Kɛ aaahe mɔ ko awo kuu nɛɛ mli lɛ, ebaabi ni mɔ lɛ kɛ naashiwoo aha yɛ kuu lɛ mli bii etɛ hiɛ akɛ ebaaye Levibii akrɔŋŋfeemɔ lɛ nɔ gbagbalii, ni etsi ehe kɛjɛ ʽam-ha-aʹrets (gbɔmɛi pii ni leee nii) lɛ ni ekɛ ehe aaabɔ amɛhe kpaakpa lɛ he, ni ewo emlijaa nyɔŋma mli ekome lɛ fɛɛ pɛpɛɛpɛ. Marko 2:16 wieɔ “woloŋmalɔi lɛ kɛ Farisifoi lɛ” ahe. Kuu nɛɛ mli bii lɛ ateŋ mɛi komɛi ji woloŋmalɔi kɛ tsɔɔlɔi ni no ji amɛ nitsumɔ, yɛ be mli ni mɛi krokomɛi ji gbɔmɛi foji ni abuuu amɛ.—Mateo 23:1-7.

Farisifoi lɛ heɔ Nyɔŋmɔ ni yɔɔ he fɛɛ he amɛyeɔ. Amɛ jwɛŋmɔ ji, akɛni “Nyɔŋmɔ yɛ he fɛɛ he hewɔ lɛ, abaanyɛ aja Lɛ yɛ Sɔlemɔwe lɛ kɛ esɛɛ fɛɛ, ni jeee afɔleshãai anɔ pɛ abaatsɔ atsɛ lɛ. No hewɔ lɛ, amɛwo kpeehe lɛ ni amɛaaha efee jamɔ, nikasemɔ, kɛ sɔlemɔ he lɛ he hewalɛ, ni amɛwó nɔ ni ebatsɔ he titri ko ni he hiaa yɛ gbɔmɛi lɛ ashihilɛ mli, tamɔ Sɔlemɔwe lɛ nɔŋŋ.”—Encyclopaedia Judaica.

Farisifoi lɛ bɛ hiɛsɔɔ kɛha Yehowa sɔlemɔwe lɛ. Abaanyɛ ana enɛ kɛjɛ Yesu wiemɔi nɛɛ amli: “Kpoo ha nyɛ, gbɛtsɔɔlɔi shwilafoi! Nyɛ mɛi ni nyɛkɛɔ akɛ, ‘Mɔ ni aaaka sɔlemɔtsu lɛ kita lɛ, no jeee nɔ ko; shi moŋ, mɔ ni aaaka sɔlemɔtsu lɛ he shika lɛ kita lɛ, etere sɔ̃.’ Kwashiai kɛ shwilafoi! Te nɔ ni fe hu, shika lɛ, aloo sɔlemɔtsu lɛ ni haa shika lɛ feɔ krɔŋkrɔŋ lɛ? Ni asaŋ, ‘Mɔ ni aaaka afɔleshãa latɛ lɛ kita lɛ, no jeee nɔ ko; shi mɔ ni aaaka enɔ afɔle lɛ kita lɛ, etere sɔ̃’ Kwashiai kɛ shwilafoi! Te nɔ ni fe hu, afɔle lɛ, aloo afɔleshãa latɛ lɛ ni haa afɔle lɛ feɔ krɔŋkrɔŋ lɛ? No hewɔ lɛ, mɔ ni aaaka afɔleshãa latɛ lɛ kita lɛ, eka no kɛ nii ni yɔɔ nɔ lɛ fɛɛ kita.”—Mateo 23:16-20.

Te aaafee tɛŋŋ ni Farisifoi lɛ ashishinumɔ aaatsɔmɔ nɛkɛ hu? Mɛni amɛkuɔ amɛhiɛ amɛshwieɔ nɔ lɛ? Kadimɔ nɔ ni Yesu kɛɛ kɛnyiɛ sɛɛ nɛɛ. “Ni mɔ ni kaa sɔlemɔtsu lɛ kita lɛ, eka no kɛ mɔ ni hiɔ mli lɛ kita.” (Mateo 23:21) Woloŋlelɔ E. P. Sanders wie yɛ kuku nɛɛ he akɛ: “Sɔlemɔtsu lɛ yɛ krɔŋkrɔŋ, ni jeee akɛ ajaa Nyɔŋmɔ, mɔ krɔŋkrɔŋ lɛ yɛ jɛmɛ kɛkɛ, shi moŋ eyɛ jɛmɛ hu.” (Judaism: Practice and Belief, 63 BCE—66 CE) Shi, jɛmɛ ni Yehowa yɔɔ yɛ gbɛ krɛdɛɛ nɔ lɛ etsɔɔŋ nɔ ko kɛhaŋ mɛi ni susuɔ akɛ eyɛ he fɛɛ he lɛ.

Agbɛnɛ hu Farisifoi lɛ heɔ shɛɛ-mli-sane kɛ heyeli mli ni ajɛɔ afeɔ nii lɛ fɛɛ amɛyeɔ. Yɛ gbɛ kroko nɔ lɛ, “atsɔ hiɛ ato nɔ fɛɛ nɔ afɔ shi momo, ni kɛlɛ akɛ nihalamɔ mli heyeli hu eha.” Fɛɛ sɛɛ lɛ, amɛhe amɛye akɛ ato afɔ shi akɛ Adam kɛ Hawa afee esha, ni ákɛ nɔ ko ni aaafo mɔ ko wao fioo lɛ po ji nɔ ni ato afɔ shi momo.

Ekolɛ apasa susumɔi nɛɛ yɔɔ Yesu jwɛŋmɔ mli yɛ be mli ni ewie mɔ̃ɔ ko ni kumɔ ni gbe gbɔmɛi 18 lɛ he lɛ. Ebi akɛ: “Aloo, nyɛsusuɔ akɛ, mɛi nyɔŋma kɛ kpaanyɔ lɛ ni Siloa mɔ̃ɔ lɛ ku shwie amɛnɔ ni egbe amɛ lɛ, amɛ amɛji nɔtɔlɔi fe gbɔmɛi fɛɛ ni yɔɔ Yerusalem?” (Luka 13:4) Taakɛ eji yɛ osharai pii ahe lɛ, enɛ jɛ “be kɛ nibii ni baa trukaa ni aleee,” jeee shɛɛ-mli-sane taakɛ Farisifoi lɛ tsɔɔ lɛ. (Jajelɔ 9:11, NW) Te aaafee tɛŋŋ ni mɛi ni susuɔ akɛ amɛle nii nɛɛ aaatsu Ŋmalɛ mli kitai ahe nii hu?

Mɛi ni kɛ Jamɔ Mli Nibii Heei Baa

Farisifoi lɛ maa nɔ mi akɛ esa akɛ rabifoi ni hiɔ yinɔ fɛɛ yinɔ mli lɛ atsɔɔ Ŋmalɛ mli kitai lɛ ashishi yɛ saji heei ni eba lɛ anaa. No hewɔ lɛ, Encyclopaedia Judaica lɛ kɛɔ akɛ “ewaaa haaa amɛ kwraa akɛ amɛaaha Torah tsɔɔmɔi lɛ kɛ amɛsusumɔi heei ni etee hiɛ lɛ aaakpa gbee, aloo ni amɛaaha Torah lɛ mli wiemɔi lɛ afee akɛ no nɔŋŋ amɛsusumɔi tsɔɔ lɛ.”

Yɛ daa afi Kpatamɔ Gbi lɛ he lɛ, amɛjie hewalɛ ni osɔfonukpa lɛ yɔɔ ni ekɛkpataa eshai lɛ kɛtee gbi lɛ diɛŋtsɛ nɔ. (3 Mose 16:30, 33) Yɛ Hehoo gbijurɔyeli lɛ nɔ lɛ, amɛmaa Mizraim Shimɔ lɛ he saji akasemɔ mlitii lɛ nɔ mi babaoo, yɛ be mli ni amɛnuɔ wein kɛ matzo lɛ fe hehoo toobi lɛ.

Beni be shwieɔ mli lɛ, Farisifoi lɛ bana hewalɛ waa yɛ sɔlemɔwe lɛ. Kɛkɛ ni amɛto nu ni atereɔ kɛjɛɔ Siloam kpaakpo lɛ mli ni akɛfoɔ shi yɛ Naabuamɔ Gbijurɔ lɛ gbɛkɛ nɔ lɛ he gbɛjianɔ, amɛfɔseɔ nakai nu lɛ eko amɛshwieɔ shi enɔ jetsɛremɔ leebi, amɛtswiaa faa-naa tsei yɛ afɔleshaa latɛ lɛ nɔ yɛ gbijurɔyeli lɛ naagbee, kɛ daa sɔlemɔi daa gbi ni bɛ shishitoo yɛ Mla lɛ mli.

The Jewish Encyclopedia lɛ kɛɔ akɛ, “nɔ ni sa kadimɔ jogbaŋŋ” ji “nibii heei ni Farisifoi lɛ kɛba yɛ Hejɔɔmɔ Gbi lɛ he lɛ.” Aakpa gbɛ ni ŋa ahere Hejɔɔmɔ Gbi lɛ atuu kɛtsɔ kanei ni eeesũ lɛ nɔ. Kɛ etamɔ nɔ ni nifeemɔ ko baaha atsu nii yɛ gbɛ ni mla eŋmɛɛɛ gbɛ nɔ lɛ, Farisifoi lɛ guɔ enɛ. Amɛtee shɔŋŋ po yɛ tsofafeemɔ he mlahamɔ mli, ni amɛmli fu tsamɔ ni Yesu kɛha yɛ Hejɔɔmɔ Gbi lɛ nɔ lɛ. (Mateo 12:9-14; Yohane 5:1-16) Shi, nɛkɛ jamɔ mli nibii heei nɛɛ baaa naagbee kɛ gbɛjianɔtoi heei ni ato shishi koni akɛbɔ mɔdɛŋ ni akɛfo afabaŋ, loo atswa gbogbo awo he, kɛha Ŋmalɛ mlai ahebuu lɛ.

Emlifoo

Farisifoi lɛ kɛɛ amɛyɛ hegbɛ ni amɛkɛtsiɔ Ŋmalɛ mli mlai amɛtoɔ sɛɛ loo amɛfoɔ mli. Amɛsusumɔ lɛ jeɔ kpo yɛ Talmud abɛbua nɛɛ mli: “Ehi moŋ akɛ aaafo mla kome mli fe ni hiɛ aaakpa Torah lɛ fɛɛ nɔ.” Enɛ he nɔkwɛmɔ nɔ ji Nyamɔ Afi lɛ ni ayeee dɔŋŋ kɛ yiŋtoo akɛ ebaalaaje nii ni ekɛɔ akɛ nomɛi ji enii yɛ be mli ni be lɛ bɛŋkɛɔ ni mɔ ko kɛ nɔ ko efaŋ ohiafo ni mɔ lɛ ana he sɛɛ dɔŋŋ lɛ.—3 Mose, yitso 25.

Nɔkwɛmɔ nii krokomɛi ji yoo ni asusuɔ akɛ efite gbala lɛ ni akaa lɛ akwɛɔ, kɛ gbɔmɔgbee ko ni anaaa mɔ ni fee, kɛ kpatamɔ nifeemɔ lɛ ni amɛfo mli lɛ. (4 Mose 5:11-31; 5 Mose 21:1-9) Ni be miishɛ ni Farisifoi lɛ baafo Ŋmalɛ naa taomɔ nii ni ji mɔ fɔlɔi ni ehia amɛ lɛ ni eeekwɛ amɛ lɛ po mli.—2 Mose 20:12; Mateo 15:3-6.

Yesu bɔ kɔkɔ akɛ: “Nyɛhiɛ ahia nyɛhe nɔ yɛ Farisifoi lɛ amasha, ni ji osatofeemɔ lɛ hewɔ.” (Luka 12:1) Farisifoi atsɔɔmɔ, kɛ esui ni jeee teokrase nɔ̃ lɛ nyɛŋ afee nɔ ko nɔ ko akɛ osatofeemɔ—eyɛ faŋŋ akɛ ejeee nɔ ko ni esa akɛ akɛba Kristofoi asafo lɛ mli. Kɛlɛ, Yudafoi awoji wieɔ Farisifoi lɛ ahe ekpakpa fioo fe bɔ ni amɛfeɔ Sadukifoi lɛ. Nyɛhaa wɔsusua kuu ni sumɔɔɔ tsakemɔ nɛɛ he agbɛnɛ.

Sadukifoi Lɛ

Eeenyɛ efee akɛ ana gbɛi Sadukifoi lɛ kɛjɛ osɔfonukpa Zadok ŋɔɔ, yɛ Salomo gbii lɛ amli. (1 Maŋtsɛmɛi 2:35, NW, shishigbɛ niŋmaa) Sadukifoi lɛ fee kuu ko ni sumɔɔɔ tsakemɔ ni tsuɔ sɔlemɔtsu lɛ kɛ osɔfoyeli lɛ hilɛ-kɛhamɔ he nii. Ákɛ mɛi ni tamɔɔɔ Farisifoi lɛ ni kɛɔ akɛ hegbɛ ni amɛyɔɔ lɛ damɔ nikasemɔ kɛ jamɔ su nɔ lɛ, Sadukifoi lɛ kɛ hegbɛ ni amɛyɔɔ lɛ damɔɔ weku shishitsɔɔmɔ kɛ gbɛhe nɔ. Amɛte shi amɛwo nibii heei ni Farisifoi lɛ kɛba lɛ aahu kɛbashi sɔlemɔtsu lɛ hiɛkpatamɔ yɛ afi 70 Ŋ.B. lɛ mli.

Kɛfata shɛɛ-mli-sane ni amɛkpoɔ lɛ he lɛ, Sadukifoi lɛ kpoo akɛ amɛaakpɛlɛ tsɔɔmɔ fɛɛ tsɔɔmɔ ni atsiii ta faŋŋ yɛ Pentateuch (Mose Woji Enumɔ) lɛ mli lɛ nɔ, kɛ awie enɛ po yɛ he kroko yɛ Nyɔŋmɔ Wiemɔ lɛ mli. Yɛ anɔkwale mli lɛ, “amɛbuɔ akɛ eji jeŋba kpakpa akɛ aaaje ŋwane” yɛ saji nɛɛ ahe. (The Jewish Encyclopedia) Enɛ haa akaiɔ beni amɛkɛ Yesu tao saji anaa yɛ gbohiiashitee lɛ he lɛ.

Beni amɛkɛ okulafo ni kɛ wumɛi kpawo ehi shi lɛ he nɔkwɛmɔ nɔ lɛ tsuɔ nii lɛ, Sadukifoi lɛ bi akɛ: “Belɛ gbohiiashitee lɛ mli lɛ, mɛi kpawo lɛ ateŋ namɔ ŋã eeetsɔ?” Shi amɛ okulafo ni amɛtsi eta nɛɛ baanyɛ afee mɔ ni na wumɛi 14 loo 21. Yesu tsɔɔ mli akɛ: “Gbohiiashitee lɛ mli lɛ, amɛwɛɛɛ yei, ni asaŋ akɛ yei haaa gbala.”—Mateo 22:23-30.

Akɛni ele akɛ Sadukifoi lɛ kpoɔ niŋmalɔi ni mumɔ tsirɛ amɛ lɛ ja Mose pɛ hewɔ lɛ, Yesu tsɛ wiemɔ kɛjɛ Mose Woji Enumɔ lɛ mli ekɛma anɔkwale ni E-sane lɛ ji lɛ nɔ mi. Ekɛɛ: “Shi gbohii lɛ, akɛni amɛteɔ shi ekoŋŋ lɛ, ani nyɛkaneko yɛ Mose wolo lɛ mli, yɛ ŋmeitso lɛ he, bɔ ni Nyɔŋmɔ kɛɛ lɛ akɛ: ‘Mi lɛ, Abraham Nyɔŋmɔ, kɛ Isak Nyɔŋmɔ, kɛ Yakob Nyɔŋmɔ ji mi’ lɛ? Nyɔŋmɔ jeee gbohii a-Nyɔŋmɔ, shi hiɛkalɔi moŋ a-Nyɔŋmɔ ji lɛ.”—Marko 12:26, 27.

Mɛi ni Wa Yesu kɛ Esɛɛnyiɛlɔi lɛ Ayi

Sadukifoi lɛ heɔ maŋ lɛ ni amɛkɛaatsu nii yɛ be mli ni amɛkɛ maji krokomɛi yeɔ lɛ amɛyeɔ, fe ni amɛaamɛ Mesia lɛ—kɛ amɛheɔ ebaa lɛ amɛyeɔ po. Yɛ gbeekpamɔ ni ka amɛkɛ Roma teŋ lɛ naa lɛ, amɛ amɛbaakwɛ sɔlemɔtsu lɛ nɔ, ni amɛsumɔɔɔ ni Mesia ko apue ni ebagba amɛnaa. Akɛni amɛbuɔ Yesu akɛ eewo amɛ gbɛhe lɛ he gbeyei hewɔ lɛ, amɛkɛ Farisifoi lɛ fee ekome koni amɛkɛkpaŋ egbele.—Mateo 26:59-66; Yohane 11:45-50.

Akɛni maŋkwramɔ kudɔɔ amɛ nilee kɛ henumɔ hewɔ lɛ, Sadukifoi lɛ kɛ anɔkwa ni amɛaaye Roma lɛ fee sane yɛ sane-naatsɔɔmɔ ni ja naa, ni amɛbolɔ akɛ: “Wɔbɛ maŋtsɛ ko akɛ ja Kaisare.” (Yohane 19:6, 12-15) Yɛ Yesu gbele kɛ eshitee lɛ sɛɛ lɛ, Sadukifoi lɛ ji mɛi ni tsɔ mɔdɛŋ ni abɔ akɛ aaatsi Kristojamɔ ni aaagbɛ ashwa lɛ naa lɛ hiɛ. (Bɔfoi lɛ Asaji 4:1-23; 5:17-42; 9:14) Yɛ sɔlemɔtsu lɛ hiɛkpatamɔ yɛ 70 Ŋ.B. sɛɛ lɛ, kuu nɛɛ ehiii shi dɔŋŋ.

Bɔ ni Ehe Hiaa ni Wɔhi Shi akɛ Mɛi ni Hiɛ Yɔɔ Amɛhe Nɔ

Kwɛ bɔ ni Yesu kɔkɔbɔɔ lɛ efee nɔ ni sa jogbaŋŋ ha! Hɛɛ, ehe miihia ni ‘wɔha wɔhiɛ ahi wɔhe nɔ yɛ Farisifoi kɛ Sadukifoi lɛ amasha lɛ hewɔ.’ Nɔ ni esa akɛ mɔ ko akwɛ pɛ ji amɛ yibii gbohii ni yɔɔ Yuda jamɔ kɛ Kristendom jamɔ fɛɛ mli ŋmɛnɛ lɛ.

Shi, nɔ ni tamɔɔɔ enɛ kwraa lɛ, Kristofoi onukpai ni he esa ni yɔɔ Yehowa Odasefoi asafoi fe 75,500 mli yɛ jeŋ fɛɛ lɛ ‘haa amɛhiɛ hiɔ amɛ diɛŋtsɛ amɛhe nɔ kɛ amɛ tsɔɔmɔ lɛ nɔ.’ (1 Timoteo 4:16) Amɛkpɛlɛɔ Biblia muu lɛ fɛɛ nɔ akɛ ejɛ Nyɔŋmɔ mumɔ mli. (2 Timoteo 3:16) Ni amɛkɛ nibii heei aaaba ni amɛha ale amɛ diɛŋtsɛ amɛ jamɔ mli nifeemɔi moŋ lɛ, amɛtsuɔ nii yɛ ekomefeemɔ mli yɛ gbɛjianɔtoo ni damɔ Biblia nɔ, ni kɛ wolo tɛtrɛɛ nɛɛ tsuɔ nii akɛ enitsɔɔmɔ dɛŋdade titri lɛ gbɛtsɔɔmɔ shishi.—Mateo 24:45-47.

Mɛni ejɛ mli eba? Gbɔmɛi akpekpei abɔ ni yɔɔ jeŋ fɛɛ lɛ ashihilɛ miiya hiɛ yɛ mumɔŋ, yɛ be mli ni amɛnuɔ Biblia lɛ shishi, amɛkɛtsuɔ nii yɛ amɛ shihilɛ mli, ni amɛtsɔɔ mɛi krokomɛi lɛ. Bɔni afee ni ona bɔ ni afeɔ enɛ ahaa lɛ, mɛni hewɔ oyasaraaa Yehowa Odasefoi asafo ni bɛŋkɛ bo lɛ loo oŋma oyaha mɛi ni feɔ wolo tɛtrɛɛ nɛɛ?

[Akrabatsa ni yɔɔ baafa 26]

YESU SUSU ETOIBOLƆI LƐ AHE

YESU KRISTO ha enitsɔɔmɔ lɛ mli fee faŋŋ, ni ejwɛŋ etoibolɔi lɛ asusumɔi ahe. Akɛ nɔkwɛmɔ nɔ lɛ, efee nakai beni ewie ‘fɔmɔ’ ekoŋŋ he etsɔɔ Nikodemo Farisinyo lɛ. Nikodemo bi akɛ: “Te aaafee tɛŋŋ ni beni gbɔmɔ egbɔ lɛ ni aaafɔ lɛ hu? Ani eeenyɛ ebote enyɛ musu mli ekoŋŋ ni afɔ lɛ?” (Yohane 3:1-5) Mɛni hewɔ Nikodemo naa kpɛ ehe nakai lɛ, akɛni Farisifoi lɛ heɔ yeɔ akɛ fɔmɔ hee he miihia mɛi ni atsakeɔ amɛ kɛbaa Yuda jamɔ mli lɛ, ni rabifoi awiemɔ ko kɛ mɔ ni atsake lɛ ehee lɛ toɔ “gbekɛ ni afɔ lɛ ehee” he lɛ?

A Commentary on the New Testament From the Talmud and Hebraica, ni John Lightfoot ŋma lɛ, kɛ shishinumɔ ni nyiɛ sɛɛ nɛɛ haa: “Jwɛŋmɔ ni Yudafoi lɛ hiɛ yɛ mɔ ni he saa akɛ Israelnyo he lɛ . . . eka Farisinyo nɛɛ jwɛŋmɔ mli” ni enyɛŋ “ejie eklɛŋklɛŋ jwɛŋmɔ ni ejaaa lɛ oya nakai . . . : ‘Yɛ be mli ni Israelbii lɛ . . . yɔɔ hegbɛ akɛ aŋɔɔ amɛ awoɔ Mesia lɛ Maŋtsɛyeli lɛ mli lɛ, ani okɛ owiemɔ nɛɛ miitsɔɔ akɛ, ehe miihia ni mɔ ko abote enyɛ musuŋ nɔ ni ji shii enyɔ nɔ, koni enyɛ etsɔ Israelnyo hee?’ ”—Okɛto Mateo 3:9 he.

Yɛ be mli ni ekpɛlɛɔ fɔmɔ hee kɛha mɛi ni atsake amɛ kɛba jamɔ lɛ mli lɛ nɔ lɛ, Nikodemo baabu nifeemɔ nɛɛ akɛ ehe ehiaaa kɛhaaa heloonaa Yudafoi—taakɛ eji lɛ, musuŋ botemɔ ekoŋŋ.

Yɛ be kroko mli lɛ, mɛi pii amli fu beni Yesu wie ‘eheloo ni aaaye kɛ ela ni aaanu’ lɛ he lɛ. (Yohane 6:48-55) Shi, Lightfoot tsɔɔ mli akɛ, “ejeee nɔ ni efɔɔɔ kaa yɛ Yudafoi lɛ anikasemɔ hei akɛ amɛkɛ wiemɔi kukuji, ‘niyeli kɛ ninumɔ’ aaatsu nii yɛ okadi gbɛ nɔ.” Ewie hu akɛ Talmud lɛ tsi “Mesia lɛ yeli” ta.

Nakai ebafee akɛ, Farisifoi lɛ kɛ Sadukifoi lɛ asusumɔi na klɛŋklɛŋ afii oha lɛ mli Yudafoi ajwɛŋmɔ nɔ hewalɛ waa. Shi, Yesu susuɔ etoibolɔi lɛ anilee kɛ niiashikpamɔ he yɛ gbɛ ni sa nɔ. Enɛ ji nibii sɔrɔtoi pii ni fee lɛ Tsɔɔlɔ Kpele lɛ ateŋ ekome.