Yitso 110

Esɔɔmɔ Yɛ Sɔlemɔ We lɛ Ba Naagbee

YESU miiya sɔlemɔ we lɛ nɔ ni ji naagbee nɔ. Yɛ anɔkwale mli lɛ, ekɛ emaŋ sɔɔmɔ nitsumɔ yɛ shikpɔŋ nɔ lɛ miiba naagbee, ni nibii ni kɔɔ ekojomɔ kɛ egbele he, ni baaba yɛ gbii etɛ ni baa lɛ mli lɛ pɛ eshwɛ. Agbɛnɛ etee nɔ ewie eshi woloŋmalɔi lɛ kɛ Farisifoi lɛ waa.

Etee nɔ shii etɛ sɔŋŋ ejaje akɛ: “Kpoo ha nyɛ, woloŋmalɔi kɛ Farisifoi, osatofoi!” Klɛŋklɛŋ lɛ, ejaje kpoo eshwie amɛnɔ ejaakɛ amɛtsuuɔ “kpulu he kɛ kã sɛɛ; shi amɛmligbɛ eyimɔ obɔbɔ kɛ ojotswaa kɛ adufudeyeli.” No hewɔ lɛ ewo amɛ ŋaa akɛ: “Ha kpulu lɛ kɛ kã lɛ mli tsutsu aje, dani esɛɛ hu aje!”

Yɛ no sɛɛ lɛ ejaje kpoo eshwie woloŋmalɔi lɛ kɛ Farisifoi lɛ anɔ yɛ amɛmligbɛ kpɔtɔmɔ kɛ nishaianii ni amɛbɔɔ mɔdɛŋ ni amɛkɛtee kɛtsɔ kponɔgbɛ ejurɔ ni amɛfeɔ lɛ nɔ lɛ hu hewɔ. Ekɛɛ amɛ akɛ: “Nyɛtamɔ gbohii asaŋi ni asha he ni amɛhewɔ efee fɛo moŋ, shi amɛmligbɛ lɛ eyimɔ obɔbɔ kɛ gbohii awui kɛ mujii sɔrɔtoi fɛɛ.”

Yɛ naagbee lɛ, amɛ osatofeemɔ lɛ je kpo faŋŋ yɛ shwe ni amɛshweɔ akɛ amɛaamamɔ gbalɔi lɛ agbohii abui ni amɛwula amɛ fɛfɛo koni amɛkɛgbala mɛi ajwɛŋmɔ kɛba amɛ ejurɔfeemɔ nitsumɔi anɔ lɛ mli. Ni kɛlɛ, taakɛ Yesu jie lɛ kpo lɛ, “mɛi ni gbe gbalɔi lɛ abii ji” amɛ. Lɛlɛŋ, mɔ fɛɛ mɔ ni kaa akɛ eeekpa amɛ osatofeemɔ lɛ he mama lɛ yɛ oshara mli!

Ni Yesu tee nɔ ejaje efɔbuu wiemɔi ni mli wa fe fɛɛ lɛ eshwie amɛnɔ. Ekɛɛ akɛ: “Onufui, shikpaai ashwiei! Te nyɛaafee tɛŋŋ nyɛjo Gehena fɔbuu lɛ naa foi hu?” Gehena ji jɔɔ ko ni atsiɔ Yerusalem jwɛi ashwieɔ jɛmɛ. No hewɔ lɛ Yesu miikɛɛ akɛ akɛni amɛkɔ amɛyiwalɛ gbɛ nɛɛ hewɔ lɛ, woloŋmalɔi lɛ kɛ Farisifoi lɛ baana naanɔ hiɛkpatamɔ.

Yesu wie mɛi ni etsu amɛ kɛtee akɛ enajiaŋdamɔlɔi lɛ ahe akɛ: “Nyɛaagbe amɛteŋ mɛi komɛi, ni mɛi komɛi lɛ, nyɛaayi amɛ kplebii yɛ nyɛ kpeehei lɛ, ni nyɛaawa amɛ yi kɛaajɛ maŋ mli kɛaatee maŋ mli; bɔni afee ni jalɔi ala fɛɛ ni ashwie shi yɛ shikpɔŋ lɛ nɔ kɛjɛ Abel, jalɔ lɛ, la lɛ nɔ kɛbashi Zakaria, Barakia [ni atsɛɔ lɛ Yehoiada yɛ Kronika Wolo ni ji Enyɔ lɛ mli] lɛ bi lɛ, ni nyɛgbe yɛ sɔlemɔ tsu lɛ kɛ afɔleshaa latɛ lɛ teŋ lɛ la lɛ nɔ lɛ aba nyɛnɔ. Lɛlɛŋ, miikɛɛ nyɛ akɛ: Enɛɛmɛi fɛɛ aaaba yinɔbii nɛɛ anɔ.”

Akɛni Zakaria gbala Israel hiɛnyiɛlɔi lɛ atoi waa hewɔ lɛ, “amɛtee eyinɔ apam, ni amɛyatswia lɛ tɛi yɛ maŋtsɛ lɛ famɔ naa, yɛ Yehowa we lɛ kpo lɛ nɔ.” Shi, Israel baawo jalɔi ala ni amɛfɔse amɛshwie shi nɛɛ fɛɛ he nyɔmɔ, taakɛ Yesu egba lɛ. Amɛwo he nyɔmɔ yɛ afii 37 sɛɛ, yɛ afi 70 Ŋ.B., beni Roma asraafoi lɛ bakpata Yerusalem hiɛ ni Yudafoi fe mɛi akpeiakpe kome hiɛ kpata lɛ.

Beni Yesu susuɔ nɛkɛ shihilɛ ni yɔɔ gbeyei nɛɛ he lɛ, eha ewerɛ ho ehe waa. Ni ejaje shikome ekoŋŋ akɛ: “Yerusalem, Yerusalem, . . . shii enyiɛ mitaoɔ akɛ kulɛ mabua obii anaa tamɔ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛɛɛ. Naa, aaashi nyɛwe lɛ amaŋfɔ aha nyɛ!”

Kɛkɛ ni Yesu kɛfata he akɛ: “Kɛjɛ be nɛ nɔ kɛyaa nɛɛ nyɛnaŋ mi dɔŋŋ kɛyashi beyinɔ ni nyɛaakɛɛ akɛ: ‘Ajɔɔ mɔ ni baa yɛ Nuŋtsɔ lɛ [Yehowa] gbɛi anɔ lɛ!’ ” Nakai gbi lɛ baafee be mli ni Kristo baaba yɛ eŋwɛi Maŋtsɛyeli lɛ mli ni gbɔmɛi kɛ hemɔkɛyeli hiŋmɛii aaana lɛ lɛ.

Kɛkɛ ni agbɛnɛ Yesu shi jɛmɛ kɛtee he ko ni eeenyɛ ena shika fotroi ni yɔɔ sɔlemɔ we lɛ kɛ mɛi ni kɛ shika woɔ mli lɛ hu. Niiatsɛmɛi lɛ kɛ shika pii wo mli. Shi kɛlɛ yoo okulafo ohiafo ko hu ba ni ekɛ kaplɛji bibii enyɔ ni jara shɛɛɛ nɔ ko kwraa bawo mli.

Ni Yesu tsɛ ekaselɔi lɛ kɛba, ni ekɛɛ amɛ akɛ: “Lɛlɛŋ, miikɛɛ nyɛ akɛ: Nɛkɛ okulafo ohiafo nɛɛ kɛ pii wo mli fe mɛi fɛɛ ni kɛ eko ebawo shikatoo he lɛ mli lɛ.” Ekolɛ amɛbaasusu bɔ ni aaafee ni enɛ abalɛ nakai lɛ he. No hewɔ lɛ Yesu tsɔɔ mli akɛ: “Ejaakɛ mɛi lɛ fɛɛ lɛ, nɔ ni amɛna ni eteke nɔ lɛ eko amɛkɛbawo mli; shi mɔ nɛ lɛ, nɔ ni eyɔɔ yɛ ehia mli ni ekɛlɛɔ ehe lɛ fɛɛ ekɛbawo mli nɛɛ.” Beni ewie nɛkɛ wiemɔi nɛɛ sɛɛ lɛ, Yesu je kpo kɛjɛ sɔlemɔ we lɛ nɔ ni ji naagbee nɔ kwraa.

Ni ekaselɔi lɛ anaa kpɛ amɛhe yɛ sɔlemɔ tsu lɛ dalɛ kɛ efɛo lɛ hewɔ, ni amɛteŋ mɔ kome kɛɛ: “Tsɔɔlɔ, kwɛ tɛi komekome kɛ tsui komekome!” Yɛ anɔkwale mli lɛ, awieɔ akɛ tɛi lɛ akɛlɛmɔ fe ninetalɔi 35, ni amɛlɛɛmɔ fe ninetalɔi 15 ni amɛkwɔlɛ hu fe ninetalɔi 10!

Yesu ha amɛ hetoo akɛ: “Oona nɛkɛ tsui kpeteŋkpelei nɛɛ? Ashiŋ tɛ kome yɛ ekroko nɔ ni atsiŋ atswaŋ shi.”

Beni ewie wiemɔi nɛɛ egbe naa lɛ, Yesu kɛ ekaselɔi lɛ tsɔ Kidron Jɔɔ lɛ mli ni amɛkwɔ kɛtee Mu Gɔŋ lɛ nɔ. Agbɛnɛ amɛbaanyɛ amɛkwɛ sɔlemɔ tsu fɛfɛo lɛ jogbaŋŋ kɛjɛ biɛ. Mateo 23:25–24:3; Marko 12:41–13:3; Luka 21:1-6; 2 Kronika 24:20-22.

▪ Mɛni Yesu fee yɛ be mli ni etee sɔlemɔ we lɛ nɔ ni ji naagbee nɔ kwraa lɛ?

▪ Mɛɛ gbɛ nɔ ajie woloŋmalɔi lɛ kɛ Farisifoi lɛ asatofeemɔ lɛ kpo faŋŋ yɛ?

▪ Mɛni ji wiemɔ “Gehena fɔbuu” lɛ shishinumɔ?

▪ Mɛni hewɔ Yesu kɛɛ akɛ yoo okulafo lɛ kɛ shika pii wo fotro lɛ mli fe niiatsɛmɛi lɛ?