Shikpɔŋ lɛ Baatsɔ Mɛi ni He Jɔ lɛ Anɔ̃
“Minaa akɛ tsakemɔi baaba shihilɛ mli, ni toiŋjɔlɛ baaba adebɔɔ nibii fɛɛ ateŋ. . . . Shi kɛlɛ, jeee ŋmɛnɛ loo wɔ, shi moŋ wɔsɛɛ be ko ni yɔɔ shɔŋŋ, beni abɔ ŋwɛi hee kɛ shikpɔŋ hee lɛ.”—Jean-Marie Pelt, Francenyo adebɔɔ nibii ahe nilelɔ kpanaa.
NIBII ni eyaaa nɔ jogbaŋŋ yɛ adesai ashihilɛ mli kɛ agbɛnɛ hu yɛ adebɔɔ nibii ni ebɔle wɔ lɛ agbɛfaŋ lɛ eha mɛi babaoo ehao, ni amɛná kulɛ, afee wɔshikpɔŋ nɛɛ paradeiso. Kɛlɛ, enɛ jeee yaka hiɛnɔkamɔ ni ŋmɛnɛŋmɛnɛ beaŋ bii ená. Blema beebe Biblia lɛ wo shi akɛ abaaku sɛɛ afee shikpɔŋ lɛ Paradeiso. Yesu wiemɔi tamɔ, “mɛi ni he jɔ lɛ . . . amɛaaye shikpɔŋ lɛ nɔ” kɛ “afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ,” fata ŋmalɛi ni ale jogbaŋŋ yɛ Biblia lɛ mli lɛ ahe. (Mateo 5:5; 6:10) Shi ŋmɛnɛ lɛ, mɛi babaoo heee amɛyeee akɛ mɛi ni he jɔ lɛ baahi paradeiso shikpɔŋ nɔ. Kɛha mɛi pii ni kɛɔ akɛ Kristofoi ji amɛ lɛ, Paradeiso ko bɛ ni baaba.
Beni France adafitswaa wolo ni ji La Vie ní akalaa daa otsi lɛ tsɔɔ nɔ̃ hewɔ ni titri lɛ Katolik Sɔlemɔ lɛ mlibii heee amɛyeee akɛ paradeiso ko baaba—kɛ́ yɛ shikpɔŋ nɔ jio, ŋwɛi jio—lɛ, ewie akɛ: “Eyɛ mli akɛ paradeiso shihilɛ bafee Katolik tsɔɔmɔi titrii lɛ ateŋ ekome nɔ ni fe afii 1,900 moŋ, shi amrɔ nɛɛ paradeiso [tsɔɔmɔ lɛ] elaaje kwraa yɛ amɛkpeei amli, amɛwieee he kɛ́ amɛmiifee sɔlemɔ Hɔgbaa, ni amɛtsɔɔɔ hu yɛ amɛsɔfoi askul kɛ skul ni amɛfeɔ kɛtsɔɔ mɛi sɔlemɔ lɛ tsɔɔmɔi lɛ.” Akɛɛ wiemɔ paradeiso lɛ ji “teemɔŋ sane ko ni futuɔ mɔ yiŋ.” Osɔfoi komɛi jeɔ gbɛ amɛkuɔ amɛhiɛ amɛshwieɔ nɔ akɛ amɛaawie he ejaakɛ amɛkɛɛ “egbalaa mɛi ajwɛŋmɔ kɛyaa miishɛɛ ni abaaná yɛ shikpɔŋ nɔ lɛ nɔ fe nine.”
Kɛha Frédéric Lenoir ni ji adesai ashihilɛ he nilelɔ ní kase Nyɔŋmɔjamɔ he nii lɛ, kɛ́ atsĩ paradeiso tã lɛ, “mfonirii pɔtɛɛi komɛi ji nɔ ni baa mɔ jwɛŋmɔ mli.” Jean Delumeau ni ji yinɔsaneŋmalɔ kɛ woloŋmalɔ ní eŋmala woji saŋŋ yɛ paradeiso he lɛ hu susuɔ akɛ, Biblia shiwoi lɛ ji mfonirifeemɔ nibii, ni ákɛ ebaŋ mli diɛŋtsɛ. Eŋma akɛ: “Kɛ́ abi akɛ, ‘Ní Paradeiso hu lɛ?’ Kristofoi atsɔɔmɔ lɛ haa hetoo akɛ: Akɛni Yiwalaherelɔ lɛ ete shi kɛjɛ gbohiiajeŋ hewɔ lɛ, be ko baaba ni wɔ fɛɛ wɔbaaná miishɛɛ taakɛ wɔhiɛ kã nɔ lɛ.”
Ani ehe miihia ni wɔya nɔ wɔsusu shikpɔŋ nɔ paradeiso he sane lɛ he? Mɛni tuuntu baaba wɔshikpɔŋ nɛɛ nɔ wɔsɛɛ? Ani wɔbaanyɛ wɔle nɔ̃ diɛŋtsɛ ni baaba wɔsɛɛ, aloo wɔnyɛŋ? Abaaha sanebimɔi nɛɛ ahetoo yɛ sane ni nyiɛ sɛɛ lɛ mli.
[He ni Mfoniri ni yɔɔ baafa 2 lɛ Jɛ]
MFONIRI NI YƆƆ WOLO LƐ SƐƐ: Emma Lee/Life File/Getty Images