Adebɔɔ Mli Osharai​—Ani Eji Bei Lɛ He Okadi?

MAŊ aaate shi awo maŋ, ni maŋtsɛyeli aaate shi awo maŋtsɛyeli; ni hɔji kɛ tsɛŋemɔ helai kɛ shikpɔŋhosomɔi aaaba hei sɔrɔtoi fɛɛ. Shi enɛɛmɛi fɛɛ lɛ kɔɔmɔi lɛ abɔimɔ ni.” Yesu Kristo kɛ nɛkɛ wiemɔi nɛɛ tsɔɔ ekaselɔi lɛ afii ohai 19 ni eho nɛ akɛ nɛkɛ amanehului ni baaba nɛɛ, kɛ mlakwamɔ hu ni baafa babaoo, kɛ Nyɔŋmɔ Maŋtsɛyeli lɛ he sanekpakpa lɛ shiɛmɔ yɛ je lɛŋ fɛɛ lɛ kɛ okadi ko ni nibii pii yɔɔ mli baaha, ní kadiɔ “je nɛŋ naagbee lɛ.”​—Mateo 24:3-14.

Enɛ hewɔ lɛ, esa akɛ wɔbi akɛ: Ani wɔmiina amanehului ni shikpɔŋhosomɔi, ahum kɛ nugbɔnɛmɔ, nu afuai, nu hɔmɔ, kɛ hɔmɔ diɛŋtsɛ kɛbaa lɛ fe yinɔi ni eho lɛ? Ni yɛ hiɛyaa ni eba yɛ jeŋ nilee kɛ tsɔnei ahe nitsumɔ mli lɛ fɛɛ sɛɛ lɛ, ani mɛi ni fa babaoo miina amanehulu yɛ nibii nɛɛ ahewɔ?

Kɛha mɛi pii lɛ, ehetoo ji hɛɛ. Akɛ nɔkwɛmɔ nɔ lɛ, New Scientist wolo tɛtrɛɛ lɛ bɔɔ kɔkɔ akɛ “je lɛ baanyɛ akpa osharai babaoo gbɛ yɛ 1990 afii lɛ amli fe afii nyɔŋmai abɔ ni eho lɛ.” Nakai nɔŋŋ hu World Meteorological Organization lɛ nɔ onukpa lɛ wie yɛ UN Chronicle ni je kpo yɛ June 1991 lɛ mli akɛ: “Bɔ ni nibii yaa nɔ haa lɛ yɛ faŋŋ. Kɛjɛ 1960 afii lɛ amli kɛbashi 1980 afii lɛ amli lɛ . . . , bɔ ni adebɔɔ mli osharai wuji lɛ fɔɔ baa lɛ eku ebɔ he toi enumɔ, ni shika gbɛfaŋ nyɔmɔbɔɔ ni jɛɔ mli baa lɛ hu eku ebɔ he toi etɛ.” Beni egbalaa sane nɛɛ mli fioo lɛ, World Health, ni ji UN World Health Organization lɛ wolo tɛtrɛɛ lɛ wie akɛ: “Abaanyɛ ana adebɔɔ mli osharai kɛ amanehului ni ejɛ mli eba lɛ yɛ yinɔsane be fɛɛ mli. Shi, beni wɔbɛŋkɛɔ afii ohai 21 lɛ, wɔkɛ adesai ayifalɛ, nibii ni ebɔle wɔhe kɛkpe, kɛ tsɔnei ahe nitsumɔ mli shihilɛi ni efutu, ni haa gbɔmɛi babaoo yajeɔ shihilɛi ni baaha adebɔɔ mli osharai kɛ osharai ni jɛ gbɔmɛi adesai asa amɛhe waa lɛ amli lɛ miikpe.”

Mɔ fɛɛ mɔ ni le nibii ni yaa nɔ bianɛ lɛ hiɛ efeee lɛ yaa yɛ wiemɔi ni tamɔ enɛ he. Be ko bɛ ni nibii ni yɔɔ gbeyei ejeee kpo yɛ adafitswaa saji amli, ekolɛ lasu gɔŋ ko fɛmɔ yɛ Philippines, shikpɔŋhosomɔ yɛ California, nu afua yɛ Bangladesh, hɔmɔ yɛ Somalia, nugbɔnɛmɔ kɛ ahum yɛ Hawaii, aloo ŋshɔ ni yiɔ kɛbaa shikpɔŋ yɛ Nicaragua. Nyɔŋ kome ko hoko ni abɔɔɔ oshara ko ni eba yɛ je lɛ fa kome loo fa kroko he amaniɛ.

Mɛi komɛi tswaa enɛ amɛshɛɔ amɛfɔɔ akɛ ehe ehiaaa. Amɛwieɔ akɛ osharai ni efa babaoo yɛ wɔbe nɛɛ mli lɛ jɛ bɔ ni abɔɔ he amaniɛ jogbaŋŋ loo bɔ ni aŋmalaa he saji ashwieɔ shi jogbaŋŋ lɛ kɛkɛ. Amɛwieɔ kɛfataa he hu akɛ mɛi pii miina amanehulu yɛ osharai ahewɔ ejaakɛ mɛi ayi efa babaoo ŋmɛnɛ. Shi ani wiemɔi ni amɛwieɔ nɛɛ ji nɔ pɛ ni kɔɔ sane lɛ he?

Kadimɔ nɔ ni awie yɛ New Scientist lɛ mli sane ni wɔtsɛ yisɛɛ yɛ yiteŋgbɛ lɛ mli. “Abɔ osharai 523 he amaniɛ yɛ 1960 afii lɛ amli kɛ 767 yɛ 1970 afii lɛ amli. Beni shɛɔ 1980 afii lɛ amli lɛ, no mli lɛ yibɔ lɛ eyashɛ 1387.” Etee nɔ etsɔɔ mli akɛ “etamɔ nɔ ni abaanyɛ akɛɛ akɛ bɔ ni etee hiɛ babaoo yɛ afii nyɔŋma ni eho lɛ mli lɛ jɛ bɔ ni abɔɔ osharai ni baa yɛ china kɛ Soviet Union lɛ he amaniɛ yɛ faŋŋ mli lɛ.” Kɛkɛ ni ekɛfata he akɛ: “Ni kɛ nakai eji po lɛ, eeya nɔ eefa lolo.” Anyɛŋ akɛ bɔ ni abɔɔ amaniɛ jogbaŋŋ aloo bɔ ni aŋmalaa nibii ahe saji ashwieɔ shi jogbaŋŋ lɛ aha akɛ naajiemɔ kɛha bɔ ni osharai yaa nɔ efaa babaoo lɛ.

Kɛfata he lɛ, UN Chronicle ni je kpo yɛ March 1992 lɛ bɔ amaniɛ akɛɛ “Afii nyɔŋmai enyɔ ni eho lɛ mli lɛ, gbɔmɛi aaashɛ akpekpei 3 elaaje amɛwala, ni mɛi akpekpei 800 krokomɛi yɛ ni ‘nifitemɔ, jaramɔ shihilɛ kɛ amanehulu’ ni adebɔɔ mli oshara kɛbaa lɛ esa amɛhe waa.” Enɛ tsɔɔ akɛ gbɔmɛi ni yɔɔ shikpɔŋ lɛ nɔ lɛ ateŋ mɔ 1 yɛ mɛi 7 mli ni oshara loo amanehulu ko kɛ̃ esa ehe. Enɛ haa mɔ he jɔ̃ɔ ehe waa, ni ehaaa mɔ nɔdaamɔ nɔ bibioo po kɛha ŋwanejee akɛ wɔyinɔ nɛɛ ji basabasa feemɔ kɛ tsakemɔ ni baa trukaa yinɔ.

Akɛni Biblia lɛ gbaa amanehulu kpele be tamɔ nɛkɛ efɔɔ shi hewɔ lɛ, ani etsɔɔ akɛ Nyɔŋmɔ ji mɔ ni haa osharai kɛ amanehului ni jɛɔ mli baa lɛ baa? Mɛi pii susuɔ nakai. Shi mɛni anɔkwa saji lɛ tsɔɔ? Ni nɔ ni he hiaa fe fɛɛ lɛ, mɛni Biblia lɛ tsɔɔ?

[He ni Mfoniri ni yɔɔ baafa 2 lɛ Jɛ]

Cover: W. Faidley/Weatherstock

[Hei ni Mfonirii ni yɔɔ baafa 3 lɛ Jɛ]

Teŋ mfoniri: Mark Peters/Sipa Press

WHO/League of Red Cross